Meib

Jehovab ge ǁîb khoenab ge Egipteb ǃkhōsisa xu a ǃnora kai, o pristerga tabernakeli ai nî ǃoabase ge ǁgaumâi. Leviǁîgab ge ǀnî hâ ǁgaumâisa tabernakeli ǃnâ ge mā. Jehovaba tabernakeli ǃnâ gere ǃoaban tsî tabernakeli xōǀkhā gere hân ǀguina gere kōǃgâ? Hî-i, Jehovab ge ǀgora-e ūhâ tama. Mâ Israelǁî-i hoa-i ge ǀgū ǀhōsagusisa Jehovab ǀkha ge ūhâ ǁkhā i.  Jehovab ge ge dī îs hoa ǁaesa ǃâus tsî ǀaes tabernakeli ǂamǃnâ ge hâ isa mû ǁkhā. (Eks. 40:38) Hoan ge ge mû ǁkhā i ǃâus gere gon tsoatsoa o, ǃnūse hân tsîna ǃkhōǂgā hâse. Tsîn ge ǁîn xūna ǀhami, tente ǂnaukhâi tsî ǀguiba gere ǃgû. (Num. 9:​15-23) ǁNās ǁkhās khami, mâpa ǀgui da ga nētsē ǃhūbaib ai a hâ xawe da ge Jehovab ǀnammi, kōǃgâs tsî ǁkhaubas tsîna a hōǃâ ǁkhā. w24.06 4¶10-12

Davidi ûib ge ǁkhōǁkhōsa mâsib ǃnâ ge hâ i. Davidi ǀgôab Absalommi ge ǁîba gere ǃgam ǂgao, îb ǁîba gao-ao kai. (2Sam. 15:​12, 13) ǃHaeseb ge Davida Jerusalemsa xu ge ǃkhoebē. ǃKhoe gu ra hînab ge Davida ge mûǂan ǀgui khoe-i nî hâ ǃgausa, Jerusalems ǃnâ î-i Absalommi tae-e ra ǀapeǁguisa kō tsî ǁîba ǂanǂan. ǁNā-amagab ge Sadoki tsî nau pristergu tsîna Jerusalems ǃnâ ge ǁnāxu, î gu ǃkhē-aogu ase sîsen. (2Sam. 15:​27-29) Nēsa gu ge ǃgaoǃgâxa tsî ǂanbasen nîse nî dī. Davidi ge mā gu sîsenni ge kaise ge ǁkhōǁkhōsa ī, ǂanǂuihe gu ga o gu nî ǃgamhe amaga. Davidi ge ǁîb ǂgomǂgomsa ǀhōsakha Sadoki tsî Husiab tsîkha ge ǂgan îb ǀapes ǀkha hui bi. (2Sam. 15:​32-37) Husaib ge Absalommab ra ǂkhâǃnâ khami gere tanisen tsî ǁîba ge ǀapemā îb Davida ǁnāǂam. Xawes ge nēsa Davida ǁaeba ge mā îb aiǂhomisen nē ǁnāǂams ǃaroma. Saorase, Absalommi ge Husaib ǀapemāsa a ǃgâ ob ge Husaiba Sadoki tsî Abiatari tsîna tae-i ge īsa ge mîba. (2Sam. 17:​8-16) Tsî gu ge ge dītsâ Davidi Absalommi ǀapes xa nî ǁnâusa. Jehovab huib ǀkha gu ge Sadoki tsî nau pristergu tsîna ǂhâǂhâsa ǃâ-e ge ǀhuru tsî Davidi ûiba ge sâu.—2Sam. 17:​21, 22. w24.07 4-5 ¶9-10

Jehovab ǃoaba-aon ǀnîn ge ǁāǁnâs aiǃâ tamas ka io ǁāǁnâs khaoǃgân ge dī ǁoren xa ra ǀhapitsâsen. Xawe da ge tā nî ǀuru Jehovab kaise a ǀnam dasa tsîb ge ǁnās ǀkha Xoremarib ǁguibasa a māsa în sida ǁorena ǀûbahe ǁkhā. Amaseb ge ǁîba ra ǂhâba î da ǁnā ǀkhaeba ūǃoa. Jehovab ge ǂgomǃgâsiba ra mā da ǃgomsiga da ga ǁîb ǀkha hoase “ǃhoaǂui” ob nî ǀûba dasa. Kaise da ge ra ǃgôaǃgâ sida ǀnamxaǃnâ ǁGûb Jehovab sida ǁorena ra ǀûbasa. ǁKhā ǁaeb aib ge ǁîba dī da ra ǃgâina ǀuru tama hâ. (Psa. 103:​9, 12; Heb. 6:10) ǃKharu ge ǁaeb ǃnâts ge dī ǁoren xats ga ǂâiǂhâsen o ǃgarise dītsâ tsî nēsis tsî hānîǁaeb ǃnâts nî dī xūn xa ǂâiǃgâ re. Sats ge ī ge xūna a ǀkharaǀkhara ǁoa xawets ge nēsi Jehovaba koa tsî a ǂkhîǂkhî ǁkhā. ǁÎb hānîǁaeb xa mîmâi hâ buruxa mîmâidi xas tsînats ge a ǂâiǃgâ ǁkhā. w24.10 8 ¶8-9

Elobmîsa du ga khomai, o du ge ǀnî ǁaegu ai ra ǂkhabuǂâi ǂgui xūn ai du nî sîsensa du ra mûǂan amaga. Aiǁgause mûnan-ai re, ǀnîsi du ge ǀguitsē sadu Elobmîs khomais ǃnâ khoeǀgoras xa ra khomai. (Jak. 2:​1-8) ǀNîsi du ge ra mû khoena du ra hâ-ū ǀgauba du nî ǃgâiǃgâisa tsî ra mîǁgui ǁnā ǀkharaǀkharana dīsa. ǁNāpaxu du ge saora tsē ǂhâǂhâsasib ǃhoa du ra ǀgauba kōǃgâs dib xa ra khomai. (Jak. 3:​1-12) Tsî du ge ra mûǂan ǀnî ǁaegu ai i sadu ǃhoa ǀgauba ǃgâi tamasa tsî du nau khoena ra ǂkhabuǂâi kai xūna ra ǃhoasa. ǁNā-amaga du ge ra mîǁgui î du ǂkhâǃnâ ra xūna nau khoen ǀkha ǃhoa. Saora tsēs Elobmîs khomais ge ra ǃkhâikhom du ǃhūbaib ǃnâ ǀhōsana ūhâs xa. (Jak. 4:​4-12) Nēsisa du ge ra ǃgaoǃgâ tae-e du khomai, kō tsî ra ǃgâsa. Sao ra tsēs ai du ge ǀnîsi kaise nî ǃgombahe nē ǀkharaǀkharan hoana dīsa. Tā ǂkhabuǂâi re. ǂÂis ǃnâ ūhâ, aiǃgû tsî da ge “ǀasa khoesiba” nî ana. w24.09 5-6 ¶11-12

Jesub ge ge ǂan i Jehovab ra mûsa matib ǂhanuoǃnâse ra hâ-ūhe ǀgausa. ǂHanuoǃnâse da ga hâ-ūhe, o da ge Jesuba a ǁgae ǁkhā ǃkhō-oasens ǃnâ. ǀNî ǂhanuoǃnâsigu ge a ǂkhariro tsî a kō ǃkharuhe ǁkhā. ǀNî ǁaegu ais ge ǃnōs tsîna a ǃgâi, îb mâsiba tā ǁgao. (Aoǁn. 3:7; Jak. 1:​19, 20) Nau ǁaegu ai da ge ǀnîsi xū-e nî mî mû da ga o, khoe-i ǃgâi tamase ra hâ-ūhesa. Tamas ka io amaba da ga ǁkhauba ǁaeb ai. (ǃNǃkh. 6:​1, 2) ǃHoa da ga ǁaeb ai da ge ǃnomsa tsî ǃgôasib ǀkha ǁnāsa nî dī. Jesuba ǁgae tsî da ge ‘Elob ǂhanu-ai ǀGoraǃgâ-aoba’ a ǂgomǃgâ ǁkhā.—1Pet. 2:23. w24.11 4-5 ¶9-10

ǁOre-ao i ga ǃhobasen, o da ge kaise a ǂkhî. (Luk. 15:7) Ham-e koasa anu hâ? ǂÂi-oa re Paulub ge ǁore-aon xa tae-e mîsa: “Elob ǁnāti ī mâǃoa-ao-i di ǂgaoba amab ǃnâ dabaǃkhuni ǁkhā xui-ao.” (2Tim. 2:25) Nē khoe-i ga ǁî-i ǂūb tsî ǂâiǀgauba dawa, o i ge koasa khoe-i xare-e ǃoa ī tama xawe Jehovaba ǃoa ra ī, hîna ǁnā Xristeǁî-e ra huiba î-i ǁnā ǀkharaǀkharana dī. Paulub ge ra ǁguiǃā ǃgâi xūn ra īna khoe-i ga ǃhobasen toa ǁaeb ai. ǁNā khoe-i ge ǃnāsa ǀgaub ǃnā amaba ra ǂan tsî ǁî-i ǁnâuǃāba ra hō-oa tsî ǁGâuab di ǃnuide xu ra ǂgōsen. (2Tim. 2:26) Khoe-i ga ǃhobasen o gu ge ǀhaohâb ǃûi-aoga ǁî-e sari tsî nî hui î-i, ǁî-i ǂgomsa ǀgaiǀgai tsî ǁGâuab ǃâitsâna xu ǂgōsen tsî ǂhanu xū-e dī.—Heb. 12:​12, 13 w24.08 23 ¶14-15

Jesub ge ǂûmā ǃgubis di khoen ge ǁîn di sorosi ǂhâsigu tsî turagu ai ǀgui ǂâisa ge ǂnûi hâ i. Mâǀgaub ǃnâ? ǁÎn ge sao ra tsēs ai ge mû Jesub tsî ǁîb apostelgu tsîn ge īsa. Khoen ge Tiberiahuriroba xū ra hā ǂgaudi ai ge ǂoa tsî Kapernaumsa ǃoa ge ī în Jesuba sī ôa. (Jhn. 6:​22-24) Elob Gaosib xan gere ǁnâu ǂgao amagan ge ǁnāsa dī? Hî-î. ǁÎn ge Jesub xa noxopa pere-e gere māhe ǂgao. ǁNāsa da māti a ǂan? ǃGaoǃgâ re tae-i ge īsa Jesuban ge Kapernaums ǁanǁkhuib ǃnâ ǀhao-ū o. Jesub ge ǁîna ǃoaǃū ge mîba, ǂû-en da ǂhâba amaga ǀguin ǁîba ra ôasa. ǁÎb ge ge ǂanǃgâ pere-e ǂû tsîn ge ǁâsa. Jesub ge ge mî ǁîn “ǂûn hîa ra toan ǃaroma” ǀgui ra saobi ti. ǁÎnab ge ge mîba în “ǀamo ûiba ra mā ǂûn” ǃaroma sîsen. (Jhn. 6:​26, 27) ǁÎnab ge ge mîba ǁîb ǁGûb ǁnāti ī ǂûna nî mā nîsa. w24.12 5 ¶8-9

ǃGâi ǁgauǃnâ-ao kai ǂgaots ga, ots ge nî kōǃgâ î-i sa ǃgâsanats ra mā ǀapemāde Elobmîs ǀkha ǃgûǀhao. Nēsa dīs ǃaromats ge Elobmîs tsî ǁîs ai ǃgaoǃgaosa ǂkhanina nî ôaǃnâ. (ǂKhm. 15:28) Elobmîs ai ǃgaoǃgaosa ǂkhaninats ge a sîsenū ǁkhā. ǃGarise dītsâ în khoena Jehovaba ǀnam tsî ǃnāsase ǁîna ǂkhâǃnâ re în ǁkhāǁkhāsenan go xūna ûiǂui. ǃGâi ǁgauǃnâ-ao kai ǁkhāts ge a ǃnāsa ǂansa ūhâ ǀhaohâb ǃûi-aogu aits ga huiba ǂgan o. (1Tim. 5:17) ǀHaohâb ǃûi-aogu ge ǃgâsana nî “ǂkhâǃnâ” xawe ǀnî ǁaegu ai ǁîna nî “ǂgōǀau.” Nēsa gu ga dī, o gu ge ǀhaohâb ǃûi-aoga khoexaǃnâ ǀgaub ǃnâ nî dī. Tsaura, ǀnamxaǃnâ tsîts ga sa ǁkhāǁkhāsa Elobmîs ai ǃgaoǃgao, ots ge ǃgâi ǁgauǃnâ-aob Jesuba ra ǁgae.—Mat. 11:​28-30; 2 Tim. 2:24. w24.11 24 ¶16

Jehovaba da ge ǂkhaisiba ra mā ǁîb xa da ra ǃhoa xūn ǃnâ-ū. Jehovab khoen ge ra ǁkhauhe, ǃKhūba “ǁnaeba re,” “ǀons âba kare re.” “ǁÎb ores di ǂhôasa tsēsa xu tsēs” ǀkha tani re. (Psa. 96:​1-3) Nē ǀgaugu ǃnâ da ge sida ǀhomsi ǁGûba ǂkhaisiba a mā ǁkhā. (ǃNǃkh. 4:29) Ū da hâ xūn ǀkha da ge Jehovaba ǂkhaisiba a ǁgau ǁkhā. Ama ǃoaba-aon Jehovab din ge ǁîba ǁnā ǀgaub ǃnâ ra koa. (ǂKhm. 3:9) Aiǁgause Israelǁaes ge mari-i tsî ūn hâ xūn tsîna ge mā, îb tempela om-ūnuhe tsî kōǃgâhe ǁkhā. (2Gao. 12:​4, 5; 1Kro. 29:​3-9) ǁKhāǁkhāsaben tsîn ge Jesub tsî apostelgu tsîna “ūn hâ xūn ǀkha gere” hui. (Luk. 8:​1-3) Elobmîs tsîn ge ra mî ǀnî Xristeǁîn ge ǃâtsūǀkhāba gere hōǃâ, on ge nau ǃādi ǃnâ gere hâ ǃgâsana ǁîna mari-e ge sîba. (ǃNǃkh. 11:​27-29) Sida tsîn ge nētsē Jehovaba ǂkhaisiba ra mā sida māsenxa mādi ǃnâ-ū. w25.01 4 ¶8; 5 ¶11

Tae-e Korneliuba ge hui îb ǁāǁnâhe? Elobmîs ge ra mî ǁîb ge ‘kaise ge eloǃaoǃgâxa i tsî ǁîb omaris ǀkha Israeli di Eloba gere ǃoaba.’ ǁÎb ge aiǃgû tsî Eloba hoaǁae ǀgores ǃnâ gere ǀkhoma. (ǃNǃkh. 10:2) Petrub ge Korneliub tsî ǁîb omarisa ǃgâiǂhôasa aoǁnâba, on ge ǁîna Xristuba ge ūǃoa tsî ge ǁāǁnâ kaisen. (ǃNǃkh. 10:​47, 48) Korneliub ge ǀkharaǀkharana ge dī ǁkhā i îb ǁîb omaris ǀkha ǀguiba Jehovaba ǃoaba. (Jos. 24:15; ǃNǃkh. 10:​24, 33) Saulub khamib ge Korneliuba ǁîb ǃkharos xa ǃaromahe hâse ga Xristeǁî kai tama hâ. Xaweb ge ǁnāsa ge mā-am tama hâ i. ǂGui ǀkharaǀkharanats ge sa ûib ǃnâ nî dī ǁāǁnâhe ǂgaots ga o. Jehovab ge nî hui tsi ǁnāsa dīsa. Elobmîs ǁgaraga sa ûib ǃnâ sîsenū sats ga mîǁgui, ob ge Jehovaba nî ǀkhae tsi. w25.03 5 ¶12-13

ǃGâi tama ǂhôana du ga ǀapeǂhomis tamas ka io ǂgaeǂguisa ra ū ǃgâsagu xa ǁnâu, o ǂâis ǃnâ ūhâ re Elob khākhoen ge Jesub tsî ǂgurokam ǁaeb Xristeǁîna gere mâǃoa ǀgausa. Jesub ge ge mî khoen Jehovab ǃoaba-aona mâǃoa tsî ǁîb xa ǂhomiba nî ǃhoasa. Tsî nēs ge amabes ǃnâ nētsē ra dīǀoaǀoahe. (Mat. 5:​11, 12) ǂHomi ǂhôana da ge ǂgom tide mâpa xun ra hāsa da ga ǁnâuǃā tsî ǁkhā ǁaeb ai ǁkhaubasen o. Mati da a ǁkhaubasen ǁkhā? ǂHomi ǂhôana mâǃoa. Apostle Paulub ge ǃgāsase ge ǁguiǃā tae-e da nî dīsa ǂhomi ǂhôana da ga ǁnâu o. ǁÎb ge Timoteuba ge mîba, în naun tsîna mîba în “tā ǂgobesen ǁau ǃhoa-ain tsî xū-e harebe tama ǀgaruben ǀkha.” (1Tim. 1:​3, 4) ǂHomi ǂhôana da ge ra mâǃoa, mâpa xu i ra hāsa da ra mûǂan amaga. Amaba xu da ge “ǁkhāǁkhāsen ǂuru ǁkhāǁkhāsa” da ge ra ǃkhōǀgara.—2Tim. 1:13. w24.04 11 ¶16; 13 ¶17

Elob ge ra ǂhâba î da ǀguiǃnâxase ǃoaba bi. Amaba da ra ǃkhōǀgaras kōse da ge ǀguiǃnâxasib ǃnâ nî hâ ǀgara. ǁNān ama tama ǂhôana amab ǃoagu ra mîn ge ǀgorasa ǀhaohâb ǃnâ ra kuru. ǁNās ǀkhab ge Eloba ra ǃkhâikhom da, î da ǁîna xu hâbē. Nēs ge a ǃaroma ǁkhā î da ama tama xūna ǂgom tsî Jehovaba xu ǂgae-oasen. (Rom. 16:17) Amaba mûǃā tsî da ga ǃkhōǀgara, o da ge Jehovab ǀgūse hâ tsî sada ǂgomsa ǀgaisase nî ūhâ ǀgara. (Efe. 4:​15, 16) ǁNāsa da ga dī, o da ge ǁGâuab ǂhumib tsî ama tama ǂhôana xu nî ǁkhaubahe. Kai ǁgâiǀāb ǁaeb ǃnâs tsîna da ge Jehovab xa ǁkhaubahe tsî nî kōǃgâhe. Amaba du ga ǃkhōǀgara, ob ge “ǂkhîb di Eloba sadu ǀkha nî hâ”.—Fil. 4:​8,9. w24.07 13 ¶16-17

Jesub ge ǁîb di ǂâisa, ǁoreb xa ǁgaise gere tsâ khoen ai ǃgōsase gere mâi. ǁÎnab ge ge ǁkhau în ǁîb saosabe kai. ǂAn nî ge ge ī khoen ǁîn ǁoren xa ǃaromahe hâse ǃgomma ra tsâsa. ǁNā-amagab ge aogu tsî taradi ǁore-aon ase ge ǂansa îna gere hui. ǂKhōsa ra sîsenūseb ge ge ǁguiǃā: “ǂUru khoen ge ǀaedī-ao-e ǂhâba tama, xawe ǀaesen hân ge ǂhâba bi hâ . . . xawe ǁore-aona ta nî ǂgaise ta ge ge hā.” (Mat. 9:​12, 13) Nēsab ge Jesuba dī tsî kaikhoes ǁîs ǁgamron ǀkha ǁîb ǂaide gere ǁās ǁorena ge ǀûba. (Luk. 7:​37-50) Jesub ge Samariaǁî khoesa ǂhâǂhâsa amab xa ge ǁkhāǁkhā, ǁîb ge ǂan-i xawe ǃgamme tamas hâ aob ǀkhas ra hâ ǀhaosa. (Jhn. 4:​7, 17-19, 25, 26) Elob tsîn ge Jesuba ǀgaiba ge mā, îb ǁoreb ra ǃaroma xū-e ǀam kai, ǁnāb ge ǁōba. Mati? Jesub ge khoena khâisa ge mā—aoren, taren, ǀgôan tsî kaikhoen tsîna ǃkhōǂgā hâse.—Mat. 11:5. w24.08 4 ¶9-10

Jehovaba hānîǁaeb ǃnâ mati nî ǁgau ǁîb ǀons ǃgôahesa anu hâsa? ǁÎb ge nēsa ǂhanu-aisiba hā-ūs ǃnâ-ū nî dī. ǀGūǁaeb ǃnâb ge Babilons kaisa nî dīkākā, ǁîn ǁgai xūna dī tsî ǂhûmi ǂhôana ǁîb xa ra ǁkhāǁkhā amaga. (J.ǂHa. 17:​5, 16; 19:​1, 2) Babilons kais ga dīkākāhe, on ge ǀnî khoena nî mîǁgui sida ǀkha ǀguiba Jehovaba ǃoabasa. Armagedons tawab ge Jehovaba ǁGâuab, ǁîb ǂgaeǂguis, ǁnān ǁîba ǃhuihân tsî ǁîb xa ama tama ǂhôana ra mîn tsîna nî dīkākā. Xaweb ge ǁnān ǁîba a ǀnam tsî ra ǁnâuǀnamna nî sâu, hoaǁae anub hâ ǂkhaisiba ra mā bina. (Mrk. 8:38; 2Tes. 1:​6-10) Xristub di duisend (1 000) kurigu ǂgaeǂguis khaoǃgâb ge Jehovaba nî ǁgau, ǁîb anu hâsa hoa khoen xa ǃoabahesa. (J.ǂHa. 20:​7-10) ǁNā ǁaeb ǃnâb ge hoa “ǃhūbaiba ǃKhūb ǂkhaisib ǂans xa nî ǀoa . . hurib ǁgammi xa ǀoa hâs ǁkhās khami.” (Hab. 2:14.) Kaise da ge nî ǂkhî hoa khoen ga Jehovaba anub hâ ǂkhaisiba māo. w25.01 7 ¶15-16

Tae-e Hebre Xristeǁîna ga hui hâ în ǁgâiǀāba mâǀgai? Paulub ge Xristeǁîna gere hui ǂgao în ǂhanu mûǂuiba ǁîn ra ǃkharuǃnâ xūn xa ūhâ. ǁNā-amagab ge ge ǁguiǃā Elob ǃâitsâba mā-am ǁkhāsa, Xristeǁî-i ǁnāsa xu nî ǁkhāǁkhāsen amaga. ǁNāti i ǁkhāǁkhās ge a hui ǁkhā în Xristeǁîna ǃgâi ǀgauga omkhâi. ǁNāti i ǃâitsâna xu ra hā sîsenǂuib ai ǁîn ǂâisa ǂnûis ǃnâ-ūn ge Hebre Xristeǁîna ga supubahe hâ mâǀgaisa. (Heb. 12:11) Paulub ge Hebre Xristeǁîna ge ǀkhoma în ǁkhoaǂgao tsî tā ǀûsen ǃgomsinan ga hōǃâ xawe. Apostel Paulub ge ǃgâi ǀapemāsa mâǃkharus ǃaroma ge mā ǁkhā i. ǁÎb ge Xristeǁî kaib nîs aiǃâ Xristeǁîna gere ǁgâiǀā, ǁnā-amagab ge ge ǂan i matikō ǁgaisen nî ǃâitsâhesa. Xristeǁî kaib ges khaoǃgâb ge ǂgui ǀgaugu ǃnâ ǁgâiǀāba ge hōǃâ.—2Kor. 11:​23-25. w24.09 12-13 ¶16-17

Tsēdi ra ǃkharu khami i ge sida aoǁnâ sîsen-e kaise ra ǁgariǁgarisa. Tae-i ǃaroma? ǁAeb ra mâ toa amaga. Jesub ge ǀuniga tsēdi ǃnâ i aoǁnâ sîsen-e nî ī ǀgaub xa mî xū-e ǃgaoǃgâ re Markub 13:10 ǃoagu. Mateub ǃnaeǃkhais ǃoagub ge Jesuba ge mî, ǃgâiǂhôas ǃhūbaib ǂhabase nî aoǁnâhesa “ǀams nî” hās aiǃâ. (Mat. 24:14) Nēs ge ǁGâuab eloxoresa ǃhūbaib hîkākāhes xa ra ǃhoa. Jehovab ge “tsēs tamas ka io īri” ǁnā xū-i nî īs diba ǂan. (Mat. 24:36; ǃNǃkh. 1:7) Mâ tsēs hoas ǃkharuras ge ǁnā tsēsa ǃoa ra ǀgūǀgū da. (Rom. 13:11) ǁNā-amaga da ge ǀams nî hās kōse nî aoǁnâ ǀgara. Sida aoǁnâ sîsenni xa da ra ǂâiǃgâ khami da ge sao ra dîsa ǂâis ǃnâ nî ūhâ. Tae-i ǃaroma da ǃgâiǂhôasa ra aoǁnâ? ǀNammi ge ra ǂkhâǃnâ da i da aoǁnâ. Aoǁnâ sîsenni ǃnâ da ra dī xūn ge sida ǀnamma ra ǁgau. ǁNās ge ǃgâiǂhôasa da ūba hâ ǀnammi, khoen tsî hoan ǂam-ai Jehovaba da ūba hâ ǀnammi tsîna ǃkhōǂgā hâ. w24.05 14-15 ¶2-3

ǁGûdo, sadu ǀgôa-e ǂkhâǃnâ re î-i Jehovab ge kuru buruxa xūn xa ǂâiǃgâ. ǃGārob ǃnâ du ga ǃgû tamas ka io du ga ǃhanab ǃnâ sîsen, o sadu ǀgôa-e hui re î-i Jehovab ge kuru ǃgâi xūna ǃgaoǃgâ tsî mati i ǃnākorobe ra sîsenūhesa. Sadu ǀgôa-e hui re î-i ǁnâuǃā, kaise gā-ai khoe-i ge nē xūna kuru ǃkhaisa. Kurus ǂansa ūhâ khoen ge nē saogu ra xūna ǂgui kuriga ge ǁkhāǁkhāsen. Kurus ǂansa ūhâ khoes Nicola Fameli ti ǀon hâs ge sao rase ra ǁguiǃā, kurus ǃnâ hâ xūn di ǃgôabats ga ǃgôa-khâi ots ge ǁkhā ǀgauba ūhâ ǃgôaba ra hō. Nē ǀgaub ge Fibonacci ti a ǂansa. Nē aiǁgaude da ge ǂgui xūn ǃnâ a mû ǁkhā, aiǁgause ǀgamirodi, haiǂnapogu tsî soneblomdi ǃnâs tsîna. w24.12 16 ¶7

Moseb, Davidi tsî Johanneb tsîgu ge ǂgui kuriga ǃkharuhâse ge ûihâ i. Tsî ǁîgu ge ûiǃnâ hâ i mâsigu ge sida nētsē ra ûiǀgauba xu kaise ra ǀkhara. Sida tsîn ge ǁîgu khami ī ǂgui ǃkharagaǃnâgu ǀgaugu ǃnâ. ǁÎgu ge ama Eloba gere ǃoaba sida khami. ǁÎgu khamis tsîna da ge sida Jehovaba ǃoa ra ǀgore, ǁîb ai ǂgomaiǂnûi tsî ǁîb ǃoa ra kō daoǁgaudi ǃaroma. Tsî ǁîgu khami da ge sida tsîna ra ǂgom, Jehovab ǁnān ǁîba ra ǁnâuǀnamna ra ǀkhae ǃkhaisa. Hā re î da ǁnā ǁkhara-aogu di ǀapemāsa sao tsî Jehovab mîmāde ǁnâuǀnam. O da ge nî ǃgâiǃgâ dī da ra xūn hoan ǃnâ tsî ǀamosib kōse nî ûi. Tsî da ge nî ǃgâiaǂgao sida ǀhomsi ǁGûba da ra ǂkhîǂkhî amaga, ǂâi da ras ǃgâ-ai nî mādawa-amda ba.—Efe. 3:20. w24.11 13 ¶20-21

ǂGurokam ǁaeb ǃnâ gu ge ǀnî ǃgâsaga ǀhaohâb hui-aogu ase gere ǁgaumâihe. (1Tim. 3:8) ǁÎgu ge Paulub ge mîgu hîna ge nauna gere ‘hui’ ga. ǀHaohâb hui-aogu ge ǂhâǂhâsa sîsen-e ra dī. ǁNās ge ǀhaohâb ǃûi-aoga ra hui î gu ǃgâsana ǁkhāǁkhā tsî ǂkhâǃnâs ai ǂâisa ǂnûi. Aiǁgause, ǀhaohâb hui-aogu ge xoade xoaǁnâs ǀkha gere hui tamas ka io xoas ǃaroma gere sîsenūhe xūna gere ǁama. ǀNî ǂhâǂhâsa xūn ǀhaohâb hui-aogu sadu ǀhaohâb ǃnâ ra dīn xa ǂâi re. (1Pet. 4:10) ǁÎgu ge ǀhaohâb mariǁkhōgu tamas ka io aoǁnâǃnâhe ra ǂkharis ǂkhanin tsî ǃgâsana ǂkhanina mās ǃnâs tsîna ra ǁgaumâihe. ǁÎgu ge audio tsî vidio xūn ǀkha ra sîsen, sali tawa ra ǀkhīna ra ǁkhoreǁhare tamas ka io sala kōǃgâs ǀkhas tsîna ra hui. Nē ǂhâǂhâsa sîsenan ge ra īǁkhā kai î-i ǀhaohâba ǃgâi ǀhaode ūhâ tsî aoǁnâ sîsen-e ǃgâi ǀgaub ǃnâ dīhe.—1Kor. 14:40 w24.10 19 ¶4-5

Mâ ǃgomsi-i ǀgui-i ga hâ xawe da ge nî mâǀgai, Jehovab a ûitsama ǃkhaisa da ga ǂâihō o tsîb hoaǁae nî hui dasa. ǁÎb ge Hoaǀgaixa tsî ǀgaiba ra mā da î da mâǀgai. Nēs ge ǂgomǃgâsiba ra mā da ǃgomsina da ga hōǃâ o. Jehovab ǂkhâǃnâsa da ga ǂkhari xūron ǃnâ hōǃâ os ge ǁnāsa ra ǂgomǃgâ kai da ǁîb kai ǃgomsin ǃnâ nî hui dasa. ǃGaoǃgâ re ǀgam xūn Gao-aob Davidi ge ǃkharu ǃnâna ǁîb ǂgomǃgâsiba ge Jehovab ǃnâ ǀgaiǀgaina. Davidi ge ǂkham gū ǃûi-ao i, o i ge bēri tsî xammi tsîna dadasab di gū-e ū tsî ge ǃkhoe. Hoa ǀgam ǃnāra aib ge Davida ǁkhoaǂgaose nē xamanina ge sauru, gūra sâus ǃaroma. Xaweb ge aitsama ge koasen tama hâ i. ǁÎb ge ge ǂan i Jehovab ge ǀgaiba mābisa. (1Sam. 17:​34-37) ǁNā xūna ǂâiǃgâs ǃnâ-ūb ge ǃnāsa ǂgomǃgâsiba ge omkhâi ûitsama Elob hānîǁaeb ǃnâs tsîna nî ǀgaiǀgaibi ǃkhaisa. w24.06 21 ¶5-6

Dîna dîs ǃnâ-ūts ge hoa amaba a ǂan ǁkhā. Aiǁgause, ǀnîsits ge ǁkhoaxa ǁaeba ūhâs ǃgao go ǁkhauhe. Nē ǁaxasiba ǃoats nî ī? ǁKhautsi go khoe-ets ga ǃgâise ǂan tama ī tamas ka iots tae-i ǁnāpa nî īsa a ǀū, ots ge ǁî-e sao ra dîde a dî ǁkhā: “Mâpa tsî mâǁae-i nē ǁaxasiba nî hâ? Matikō khoena ǁnāpa nî sī? Ham-e tae-i ǁaxasib tawa nî īsa ra kōǃgâ? Hamna ǁkhauhe hâ? ǁKhauhe hâ khoena taena sī nî dī? Xûi-e nî hâ?” Nē dîdi ǃereams ge nî huitsi, îts ǂhanu mîǁguiba dī. Sao rase, hoa amabats ga ǂan toa, o aibe hoa mâsib xa ǃamkuse ǂâiǃgâ re. Aiǁgausets ge ǀnîsi go ǁnâu, ǁkhauhe hâ khoen Elobmîs ǁgaragu ǃoagu ûi tamasa tsî î xûi-e mûǂamhe tamase nî āhesa. Mûǂan îts ra nē ǁaxasib a ǁgaoǂoa ǁkhā ǃkhaisa? (1Pet. 4:3) ǂAnǂûits go amab mati nē mâsiba ra tsâǀkhā ǀgaubats ga mû, o i ge nî supu ǃgâi mîǁguiba dīsa. w25.01 15 ¶4-5

Xoremarib ǁguibas ǃnâ-ūb ge Jehovaba ǃhobasen ran di ǁorena ra ǀariǂui. Kaise i ge a ǃgom ǀapa xū-e ǃuri xū-e xu ǁāǂuisa. Jehovab ge ra hōhōǃnâ da sada ǁoren a ǁā ǃanuǃanuhe ǁkhāsa tsîn ǁkhapa mûsen tidesa. ǁOren tsîn ge ‘suruden’ ǀkha ra ǀgopeǀnōhe. (Mat. 18:​32-35) Sada ǁoren ge ra ǀarosen ǃnās hoasa da ga ǁore o. ǁÎba da ge kaise surude hâ. Jehovab ga sada ǁorena ǀûba, o i ge sada surudenab ra ǀariǂui khami ī. ǁÎb ge ǀnai ǀûbahe hâ ǁoren ǃaroma matare kai da tama hâ. Suruden ga ǀariǂuihe o i khoe-e ra ǃgâiaǂgao, khami da ge ra ǃgâiaǂgao Jehovab ga ǀûba da o. w25.02 9-10 ¶9-10

Ama as ge ǁgûn kairan ga o huiba ǀgôana xu nî ǂhâsa tsî ǂgui ǀgôan ge ǁnāsa ra dī. (1Tim. 5:4) Jehovab ǃnâ ra ǂgom ǁgûn ge ra ǁnâuǃā, kaise î ǁîna ra ǂkhî kaisa ǁîn ǀgôanan ga hui o în Jehovab di ǃoaba-ao kai. ǂGui mari-e kuru tsîn ǁîna nî kōǃgâs xa. (3Jhn. 4) Sadu aiǁgaude xu ǀgôana ǁgau re matin Jehovab ǃnâ nî ǂgomǃgâsa, marisise kōǃgâsensan ra aiǂhumisen ǁaeb ǃnâ. ǂKhaman a ǁaeb ǃnâ ǁîna ǁkhāǁkhā în ǃgarise sîsens a ǃgâisa mûǂan. (ǂKhm. 29:21; Efe. 4:28) Kain ra khami ǁîna hui în ǃgâise skoli ai ǁkhāǁkhāsen. ǁGûn ge Elobmîs tsoatsoade a ôaǃnâ ǁkhā în ǀgôana gā-ai mîǁguiba skoli xa dī. ǁGûn ge ǀgôana nî hui în aitsama kōǃgâsensa ǂan tsî gagasi ǁaxasigu ǃnâ ǁhao. w25.03 30-31 ¶15-16

Jesajab 65ǁî danaǃâs ge ra ǁguiǃā matib ûiba nî īsa ǁnān hîna gagasi paradais ǃnâ ûi hân ǃaroma. Nē kebos ge 537ǁî kuri Jesub ǃnaes aiǃâ ǂgurose ge dīǀoaǀoahe. ǁNā ǁaeb ai i ge ǃhausen gere Jodeǁîna Babilons ǃkhōsisa xu gere ǃnora kaihe tsî ǁîn omde ǃoa gere oa. Jehovab ge ǁîb khoena ge ǀkhae tsî ge hui în dīkākāhe hâ ǃās Jerusalemsa ǁkhawa îxa kai. Tsîn ge tempeli tsîna ge dī-ūnu în ǁkhawa Jehovaba ǁnāpa ǃoaba Israeli ǃnâ. (Jes. 51:11; Sax. 8:3) ǀGamǁî dīǀoaǀoas Jesajab kēbos dis ge 1919 Jesub ǃnaes khaoǃgâ ge tsoatsoa, Jehovab ǃoaba-aon ge ǃnora kaihe o Babilons kaisa xu. ǁNās khaoǃgâs ge gagasi paradaisa ǃhūbaib ǂhawase ge khoraǂuisen. ǁKhoaǂgaoxa aoǁnâ-aon ge ǂgui ǀhaohâga tsoatsoa tsî Xristeǁî ǀgauga gere ǁgau. Khoen hîna ge ǂguro ǃkhamxa tsî ǀaib ǃnâ ûi hâ în ge “ǀasa khoesib, Elob īb ǃoa ge kuruheb tsî ǁîb di ǂhanu-aisib tsî ǃanusib” ǃnâ ge ûi tsoatsoa. w24.04 20-21 ¶3-4

ǀNî ǃhūgu ǃnân ge ǁgûn tamas ka io ǀnî hâ kai khoena sats ham-e nî ǃgammesa ra ǁhûiba tsi. ǀNî ǃhūgu ǃnâ i ge omaris ǁanin tamas ka io ǀhōsana ǃgamme tama khoe-e ǃgamme i nî khoe-e ra hōba tsî ra ge ǁîra ǀhao tsî a kō ǁkhā ǃgâiba gu ra asa. Khoe-i xats ga ǂganhe its ǃgamme ǁkhā i-a khoe-e ôa, o hoa ra a ǃgâiba tsî ǂhâba ra hâ xūna ǃhoaǃgao re. ǁNā khoe-i di ǂūgu, ǀgaugu tsî Jehovab ǀkha i ūhâ ǀgū ǀhōsagusisa ǂanǂui re. Jehovab ǀkha ǀgū ǀhōsagusisa ūhâs ge mari-i, ǁkhāǁkhāsens tamas ka io khoen xats a ǂanhe ǀgaub xa ǃnāsase a ǂhâǂhâsa. ǂÂis ǃnâ ūhâ nē khoera ge ǀuniga mîǁguiba nî dī ǃgamme ra nîsa. w24.05 23 ¶11

Dî-amgu ra khoera da ge a hui ǁkhā, mî da ra xūn tsî mî tama da hâ xūn ǃnâ-ū. ǀNî ǁaegu ai i ge a ǂhâǂhâsa î da ǃkhō-oasen tsî tā xū-e mî. (ǂKhm. 12:18) Aiǁgaus ase da ge ǀnîsi nau ǃgâsana dî-amgu ra ǃgâsara xa ra mîba ǂgao, xawe ra ge ǂgao tama hâ î da tā khoena mîba. ǁÎra aitsâma khoena ra mîba ǂgao amaga. Tā da ge dî-amgu ra ǃgâsara nî ǀhoe tsî ǁîra ge dī mîǁguigu ǃaroma nî mîǁgaiǁgai. (ǂKhm. 20:19; Rom. 14:10; 1Tes. 4:11) ǁNās xōǀkhā da ge tā xūna nî mî tsî dî-amgu ra khoera ǁgâiba nî mā dîna ni dî mâǁae ra nî ǃgammesa. Tae-e da nî dī khoera ga mîmâi o, i ra dî-amgusa ǀam kai? Sida ǀkha dī xū-e ūhâ tama dîn tamas ka io ǀkhā-e ǁhûisa xu da ge nî ǂgōsen. (1Pet. 4:15) ǃGâsara ga dî-amgu ǀû, o da ge tā nî mî ǁgai mîǁguiba ra go dīsa. ǃNāsa ǁaeba î ge ra ǂâibasen, dî-amgus go ǁîs ǂâibasensa a dīǀoaǀoasa tsî ǃgâsara a huisa îra ǃgâi mîǁguiba dī. Xawe i ge ǀnîsi dī ra ge mîǁguiba ra tsûaǂgao kai ra. ǁNā-amaga da ge ǁîra da nî hui ǀgauga nî ôa. w24.05 31 ¶15-16

ǀGui xū-i hoaǁae hoa da a ǃkhomba ǁkhā i ge, omaris ǁani-i tamas ka io ǀgū ǀhōsa i ga Jehovaba ǃoaba ǀû o. (Psa. 78:40) Nē khoe-ets kaise a ǀnam amaga i ge kaise ra ǃgom kai nēti ī mâsib ǃnâ mâǀgaisa. Sadoki ǂgomǂgomsa aiǁgaus ge nî ǀgaiǀgai du. ǁÎb ge ǂgomǂgomsase Jehovab ǃoa-ai ge hâ, ǁîb ǀgū ǀhōsab Abiatari ge Jehovaba a ǃoaba ǀû xawe. Nēs ge Davidi ǂgaeǂguis ǀams ai ge ī. Davidi kaira tsî ra ǁō ǁaeb ǃnâ i ge ǁîb ǀgôab Adoniaba gao-aob ase gere mâisen ǂgao. Jehovab ge Salomoba gao-aob ase gere mâi ǂgao xawe. (1Kro. 22:​9, 10) Abiatari ge ge ǁhûi Adoniaba mâxōǀkhāsa. (1Gao. 1:​5-8) Nēsa dīs ǃnâ-ūb ge Abiataba, Davidi tsî Sadoki ǃoagu ǀgui ǂgomǂgomsasiba ge khôa tama hâ i xawe Jehovab ǃoagus tsîna. ǁÎb tsî Abiatari tsîn ge 40 kurigu xa ǃnāsase ǀguiba pristergu ase gere sîsen.—2Sam. 8:17; 2Sam. 19:​11-14. w24.07 6 ¶14-15

ǂGomǃgâsiba da ge ūhâ ǁkhā, ǃâitsâgu ǃoagu ǁkhaubasens sada ǃgâib ǃaroma ǀgui hâsa. ǁOre da ga, o da ge “ǁaerob di ǁkhoab” ǀguiba ūhâ xawe da ga Jehovab ra ǂhâba ǀgaub ǃnâ ûi, o da ge ǀamosib kōse nî ǃgâiaǂgao. (Heb. 11:25; Psa. 19:8) Nēs ge a īǁkhā, Elob di ǀgaugu ǃoagu ûis ǀkha da kuruhe hâ amaga. (Gen. 1:27) Jehovaba ra ǂkhîǂkhî ǀgaub ǃnâ da ga ûi, o da ge ǃanu ǃgâiǂâisa xu ra hā tsâsiba nî ūhâ tsî ǀguitsē ǀamosib kōse nî ûi. (1Tim. 6:12; 2Tim. 1:3; Jud. 20, 21) Ama as ge “ǁgans ge a ǂkhabusa.” (Mat. 26:41) Xawes ge ǁnāsa ǂâibasen tama hâ ǂkhabusasigu ǃoagu da ǃkham dan hō tidesa. Jehovab ge a aiǂhomisa ǂhâ da hâ ǀgaiba mādasa. (2Kor. 4: 7) ǃGaoǃgâ re Jehovab ge ǃnāǂamsa ǀgaiba ra māda. Xawe da ge sada ūhâ ǀgaiba nî sîsenū, î da ǁnā ǃâitsâb ǃoagu ǃkham. Sada ǃâba da ga dī, o da ge ǂgomǃgâ ǁkhā Jehovab sida ǀgorede nî ǃereamsa ǃnāsa ǀgaiba mādas ǃnâ-ū. (1Kor. 10:13) Amase, Jehovab huib ǀkha da ge ǃâitsâgu ǃoagu ǃkham ǁkhā. w24.07 19 ¶19-21

Apostel Paulub ge nētsēs mîde ǁîb ǀkha gere ǃoaba ǀhaohâb ǃûi-aob Timoteuba ge mîba. ǁNān hîna ra ‘ǁoren’ ǃaromab nî dī xū-i xa. Tae-eb ge ǂâibasen? ǁÎb ge ‘hoa ǀhaohâb’ xa ge ǂâibasen tama hâ i xawe ǁnān hîna ǀnai ǁoreba a ǂanan xa gere ǃhao. Nēn ge mûn ge tamas ka io ǁore-ao i xan ge mîbahena ǃkhōǂgā hâ. ǀHaohâb ǃûi-aogu ge ǁîna nî mîba nē ǁhōb go sîsenǂamhesa tsî i go ǁore-ao-e a huihesa. ǀNî ǁaegu ain ge ǀnîna ǀnai a ǂan khoe-i ǀgaisa ǁoreba dī hâsa tamas ka io nî ǁnâu. ǁNāti ī mâsib ǃnâs ge nēsa ‘hoa ǀhaohâba’ ǃkhōǂgā hâ. ǁNā-amaga i ge ǀhaohâb ǃûi-ao-e nî ǂanǂan ǃgâsa i go ǁgau-oahesa. Tae-i ǃaroma? Î-i nēsa, “hoana ǃkhâikhoms ase ība” în tā ǁore. w24.08 23-24 ¶16-17

Jehovab ǃoabas ǃnâ da ge ǀams kose ǁkhā da ana nî dī. ǂKhauhesan ge ǂkhaikari nî hâ, în Jesub xa ūsao-e tsî ǁîn di ǀhomsi mādawa-amsa hō. (Mat. 24:40) ǁÎn ge kaise ra mûǂui matin Jesub xa nî ‘ǀhaoǀhaohesa’ ǀhomma ǃoa. Armagedons khaoǃgân ge ǁîna Jesub taras ase ǃgamme ǁâudīb ǃnâ ǃâ-e nî ūhâ. (2Tes. 2:1) Jesub ge ǀgūǁae nî ǀgoraǃgâ xawe da ge tā ǁnās xa nî ǃao. ǂGomǂgomsase da ga hâ ǀgara ob ge sida ǀnamxaǃnâ ǀhomsi ǁGûba “kai ǀgaib” hîna nî hui dab î da “hoan ǃnâ . . . ǃnorasase ǃkharu tsî khoen Ôab aiǃâ” ǂhaiba nî mā da. (2Kor. 4:7; Luk. 21:36) ǀHommi tsî ǃhūbaib ǃâubasensa da ga ūhâ tsî da ga Jesub ge ǂkhōdi ǃnâ-ū a mā ǃkhâikhomte ǃgaoǃgâ, ob ge sida ǁGûba kaise nî ǂkhî. Jehovab a ǀkhomxaǂgao amaga di ge sida ǀonde ‘ûib ǂkhanis’ ǃnâ nî hō-e.—Dan. 12:1; J.ǂHa. 3:5. w24.09 24-25 ¶19-20

Psalmdi xoa-aob khamits ge sats tsîna ǁnā ǂâiǀgauga sîsenǂam ǁkhā. Mâ ǀgaub ǃnâ? Ūts hâ ǃgâi xūn xa ǂâi re, nēs ge Jehovab xa ūǃoahes tsîna ǃkhōǂgā hâ. ǂÂis ǃnâ ūhâ, Jehovaba ǃoaba tama khoen ge ǁîb xa hui-tama. Jehovaba ǃoaba tama hân ge ǁkhoaxa ǁaeba ūhâs xa ǂhâǂhâsaba-e, ǃâubasensan ūhâ tama amaga. Sats ge nēsi ǂgui ǀkhaega Jehovaba xu hō tide xaweb ge ǁîba ra mîmâi, ǂgui ǀkhaegats hānîǁaeb ǃnâ nî hōsa. (Psa. 145:16) Nēs xas tsîna ǂâi re: ǀŪts ge a sa ûib ga mati ī hâsa ǀnî hâ mîǁguigats ga dī hâ o. ǀGui xū-i ǃnâ da ge ǂgomǃgâsiba ūhâ ǁkhā: Elob tsî khoen tsîna ǀnams ai ǃgaoǃgaohe hâse da ga mîǁguiba dī, o da ge hoaǁae ǃgâiaǂgaoba ra mā da xūna ūhâ. w24.10 27 ¶12-13