Junib

Xristub xoremarib ǁguibasa xu da ge ra ǀama. Aiǁgause, xoremarib māhe hâ amagab ge Jehovaba sida ǁorena ra ǀûba. ǁGarihe tamab ge hâ sida ǀûbasa, xaweb ge ra ǀûba da ǂgao. (Psa. 103:​3, 10-13) ǀNî khoen ge Jehovab xa ǀûbahesan anu tama khami ra tsâ. Hoa da ge ǀûbahesa anu tama hâ. Apostel Paulub ge ge mûǂan ǁîb “apostelse ǂgaihesa anu” tama hâsa. Xaweb ge ǀaro tsî ge mî, “Elob di ǀkhomma xus ge nē ta ī khami ta isa.” (1Kor. 15:​9, 10) Sida ǁorena xu da ga ǃhobasen, ob ge Jehovaba nî ǀûba da. Tae-i ǃaroma? Anu da hâ amagas ose xawe ǀnamdab a amaga. Jehovab ǀûbaba du anu tama hâ ti du ra ǂâi amaga du ga ǁgaise tsâo, ǂâis ǃnâ ūhâ, Jehovab ge xoremariba ǁore-e dī tama khoen ǃaroma mā tama. Xaweb ge xoremariba ǀoasa kurusa ūhâ taman, ǁîn ǁorena xu ǃhōbasen tsî ra dawa ǂgaon ǃaroma ge mā.—Luk. 5:32; 1Tim. 1:15. w25.01 26-27 ¶3-4

Khoen sida ǃoa mî tsî ra dī xūna da ge ǁkhae ǁoa xawe da ge sida ra ǃeream ǀgauba a ǃkhō-oa ǁkhā. ǃGâi xū-i hîna da a dī ǁkhā i ge ǀûbasa. Tae-i ǃaroma? Jehovaba da a ǀnam amaga tsî ǁîb ge ra ǂhâba î da ǀûbaxa. ǁAixa hâse da ga hâ ǀgara tsî nauna ǀûba tama i, o da ge gâre tamas ka io ǁnâuǃāoǃnâse tanisen tsî ǀaeb mâsib tsîna a hōǃâ ǁkhā. (ǂKhm. 14:​17, 29, 30) ǁAiba da ga ǁnāxū os ge nēsa ra hui da î da tā nauna ǁgaise hâ-ū. Nēs xa da ga ǂâi ǀû o da ge ǃgâi xū-e ra dībasen tsî ǁkhapa ǁkhoaxa ûiba ra ūhâ. Tae-e nî hui da î da ǁaixa ǀû? ǀGui ǀgaub hîna da nēsa a di ǁkhāb ge mā-amsa îb ǁaeroba ǃkharu. ǀAeǃkhōs khaoǃgâ i ge khoe-i hîna ǁgaise tsû hâ-e ǁaeba ǂhâhâ î-i ǂgau. ǁNās ǁkhās khami i ge ǁaeba nî ū khoe-e ǂgaoba xu ǀûbasa. (Aoǁn. 3:​3, 1Pet. 1:22) Jehovaba ǂgan re îb hui du î du ǀûbaxa. w25.02 16-17 ¶8-11

ǂGuro xūn ǁkhāǁkhāsen da ran ge ǃhōbasens, ǂgoms, ǁāǁnâs tsî khâis tsîna ǃkhōǂgā hâ. (Heb. 6:​1, 2) Nēn ge xūn mâ Xristeǁî-i hoa-i tsoatsoas ai ǁkhāǁkhāsen tsî ra ǂgom tsoatsoana. Petrub ge Pentekos tawab ge khoen ǀkha gere ǃhoa, o nē xūn xas tsîna gere ǃhoa. (ǃNǃkh. 2:​32-35, 38) Xristub ǁkhāǁkhāsabe kai ǂgao da ga, o da ge nē ǂguro ǁkhāǁkhāde nî ūǃoa. Aiǁgause, Paulub ge ge mî khâis ǃnâ da ga ǂgom tama io, o da a mîǁoasa ama Xristeǁî ta a ti. (1Kor. 15:​12-14) Xawe hâs ge ǀoasasib ǃnâ da ga Xristeǁî kai ǂgao, o da ge ǂguro ǁkhāǁkhādi xa ǃnāsana nî ǁkhāǁkhāsen. ǁNās ǂam-ai i ge ǂguro ǁkhāǁkhādi xa ǀgaisa ǂû-e Jehovab ǁgaragu ǀguiga ǃkhōǂgā tama, xawe ǁîb tsoatsoadi tsîna. Nēn ge ra hui da î da ǁîb ǀgauba ǁnâuǃā. Nē ǀgaisa ǂû-e xu da ga ǀama ǂgao, o da ge Elobmîsa ǂōrisase ǁkhāǁkhāsen, ǂâiǃgâ tsî ǁkhā da as kōse nî sîsenǂui sida ûigu ǃnâ. Nēsa da ga dī, o da ge ra ǁkhāǁkhāsen mati da Jehovaba a ǂkhî kai ǁkhā mîǁguiga a dī ǁkhāsa. w24.04 5 ¶12-13

Elob ge Jonaba ge ǂâiǂâiǃnâ, Nineves khoen ge ‘ǃgâin tsî tsūn ǁaegu ǀgora ǁoa-i’ ǃkhâisa. (Jon. 1:​1, 2; 3:10; 4:​9-11) Egab ge Jesuba ǁnā aiǁgausa sîsenū tsî Jehovab ǂhanu-aisib tsî ǀkhomxaǂgaosib xa ge ǁkhāǁkhā. Tae-e i ra ǂâibasen Nineves khoen nî “ǀgoraǃgâs” di khâisa hō ti i ga mîhe o? Jesub ge ge mî hānîǁaeb ǃnâ i ‘ǂkhabana gere dīna ǀgoraǃgâs ǃoa nî khâisa.’ (Jhn. 5:29) Duisend (1 000) kurigu di ǂgaeǂguis ǁaeba ǃoab ge gere ǁnaeǁgau, “ǂhanu-ain tsî ǂhanuoǃnân” ga khâisa hō o. (ǃNǃkh. 24:15) ǂHanuoǃnân ge “ǀgoraǃgâs” di khâisa nî hō. Nēs ge ra ǂâibasen nē khoen ga khâisa hō toa, o kha Jehovab tsî Jesub tsîkha ǁîn tanisen ǀgauba ǃgaoǃgâ tsî nî kōsa matin ǀasa ǁkhāǁkhā te ra ǁnâuǀnam ǀgausa. Nineveǁî-i khâisa ra hō i ga ra mîmâi o, Jehovaba i ǃoaba tidesa ob ge ǁîba mā-am tide î-i nē khoe-e ûi ǀgara. (Jes. 65:20) Xawe ǁnān Jehovaban ǂgomǂgomsase nî ǃoaba ti ra mîmâin ge ǀamo ûib di ǃâubasensa nî ūhâ.—Dan. 12:2. w24.05 5 ¶13-14

Jesub ge Jehovab ǀkhomxaǂgaosiba gere ǁgau. (Jhn. 14:9) Jesub khoen ǀkha gere hâ tsî ǁîna ǃhoa-ū ǀgaub ge Jehovab ǀkhomxaǂgaosiba ge ǁgau tsîb ǀoasa kurusa ūhâ tama khoena ǀnam tsî ra hui ǂgaosa. Jesub ge ǁore-aona gere hui ǂgao în ǁîn ûiga dawa tsî saobi. (Luk. 5:​27, 28) Jesub ge ge ǂan i ǁîb ûibab nî ǁguibasa. ǀGuis xa ǃnāsa ǃnādeb ge ǁîb saosabena ge mîba, gaxaǃnâhe tsîb ǃgâuhaib ai nî ǃgamhe ǃkhaisa. (Mat. 17:22; 20:​18, 19) ǁÎb ge ge ǂan i ǁîb ǁguibas ǃhūbaib ǁoreba nî ūbēsa, Johaneb tsî nau kēbo-aogu ge mî khami. Jesub tsîn ge ge ǁkhāǁkhā ǁîb ǁguibasab ga mā toa, ob ge ‘ǂguina’ ǁîba ǃoa nî ǂgae. (Jhn. 12:32) ǁOre-aon ge Jehovaba a ǂkhîǂkhî ǁkhā, Jesuban ga ǁîn ǃKhūb ase ūǃoa tsî ǁîba ǁgae o. ǁNātin ga dī on ge ‘ǁoreba xu nî ǃnoraǃnorahe.’ (Rom. 6:​14, 18, 22; Jhn. 8:32) Jesub ge ge ǁkhoaǂgao i tsî māsenxase tsûtsûsa ǁōba ge ǁō îb sida sâu ǁkhā.—Jhn. 10:​17, 18. w24.08 5 ¶11-12

ǂÂi-oa re mati du gere tsâsa ǂguroǃnās ase du ge amaba Elobmîsa xu ǁkhāǁkhāsen o. ǁKhāǁkhāsen du ge ge sadu ǀhomsi ǁGûb a ǀnam du ǃkhaisa tsîb ra ǂhâbasa i du ǁîb omaris di ǃâ kai. Tsîb ge ra mîmâi tsûbab ǀamǀam tsî hoa ǃgomsina nî ūbesa. Tsî da ge ǃâubasen ǁkhā sada ǀnamsaben ǁōgen ǁkhāba nî ûisa ǀasa ǃhūbaib ǃnâ. (Mrk. 10:​29, 30; Jhn. 5:​28, 29; Rom. 8:​38, 39; J.ǂHa. 21:​3, 4) Nē amab hîna du ge ǁkhāǁkhāsen nî ge kaise ge ǃgâiaǂgao kai du. (Luk. 24:32) ǁKhāǁkhāsen du ge xūna du ge ǀnam tsî mâ khoe-i hoa-e gere ǁgamba ǂgao. (Jer. 20:9) Elobmîs ǃnâ da ra ǁkhāǁkhāsen xūna da ga ǀnam, o da ge mâ khoe-i hoa-i ǀkha ra ǀgoragu ǂgao. (Luk. 6:45) ǂGurogam ǁaeb ǁkhāǁkhāsaben Jesub din ge mî khami da ge ra tsâ: “Tātsē khom ge sikhoma sikhom ge mû tsî ǁnâu ǃgâina khoena ǃhoabaǀû ǁoa.” (ǃNǃkh. 4:20) ǁNātikōse da ge amaba a ǀnam tsî da ge ǀguis xa ǃnāsa khoen ǀkha nē Elobmîs amaba ra ǀgoragu ǂgao. w24.05 15 ¶5; 16 ¶7

Jehovab khoen ase da ge nau khoena ra aoǁnâba sida ǀhomsi ǁGûba da a ǀnam amaga tsî da ge ra hui nî ǂgao in ǁîba ǂan. Xawen ge ǀnîna nēsa dīs xa ǃgombahe. Tae-i ǃaroma? ǀNîn ge kaise ra tao tsî ǃgâi ǁkhāǁkhā-ao taman hâ khami ra tsâ. ǀNîn ge ǃgâi tamase ra tsâ ǁkhauhe taman hâ hîna nau khoen omde ǃoa īsa. ǀNîn ge ǁaixa ūhesa ra ǃao. ǀNîn ge ǀnîsi ǂkhababa xu ǂgōsensa ge ǁkhāǁkhāhe. Nē ǃgâsan ge a ǃgombahe ǃgâiǂhôasa ǀūn a khoen ǀkha ǀgoragusa. ǁNā tsâsigu xa ǃaromahe hâse da a ǃgombahe ǂkhîba aoǁnâ sîsenni ǃnâ ūhâsa? ǁNati ī ga io tā ǂkhabuǂâi re. Sadu ǀgaub ge ra ǁgau ǃgamǃgamsenxa du asa tsî du sadu xa ǀgui ǂâi tamasa. Nēs tsîn ge ra ǁgau khoen ǀkha du ǂkhaba ǂgao tama hâsa. Khoena da ge ǁaixa kai ǂgao tama ǃgōsase ǃgâi xūna da ra dī hîna. Sada ǀhomsi ǁGûb ge ǃkharuǃnâ da ra xūna ǂan tsî ǂhâ da hâ huiba ra mā da ǂgao.—Jes. 41:13. w24.04 14 ¶1-2

Elobmîsa khomai tsî du ra mû taena du a ǃgâiǃgâi ǁkhāsa, khami sīǃnâ ǁkhā du a mîǁgui ga dī re. Khomai du ra xūn hoana ǀguiǃnās ams ai sîsenǂuis xa dītsâ re, i ǀgui tamas ka io ǀgam xūna sîsenǂui. Saora xū-e dītsâ re: Sîsen ai du nî xūna xoamâi tsî ǀguiǀguibes ǃnâ ǁîn ai sîsen retsî nauna ǀkhara ǁaeb ai. Mâpa du nî tsoatsoa? ǀNîsi du ge a mîǁgui ǁkhā supu mîǁguiga sīǃnâsa. Tamas ka io du ge a mîǁgui ǁkhā, î du ǂhâǂhâsa xū-i ǀkharaǀkhara ǂgao du ra i ǀkha tsoatsoa. Sadu mîǁguiba du ga ǁhûis khaoǃgâ du ge ǀapeǂhomis ǂkhanin tsîna ôaǃnâ ǁkhā. Sadu mîǁguib xa ǀgore tsî Jehovaba ǂgan,îb hui du sīǃnâ du nî xū-e dīs “turab tsî ǁkhāsib” tsîna māhesa. (Fil. 2:​13, NW) ǁNāpaxu ǁkhāǁkhāsen du go xūna sîsenǂui re. ǂGuro mîǁguiba du ga sīǃnâ, o du ge nî ǂkhâǃnâ-e saora mîǁguib ai sîsensa. Sadu Xristeǁî tanisen ǀgauba du ga ǃgâiǃgâi, o du ge nî ǂkhâǃnâhe aiǃgû tsî ǀkharaǀkharana dīsa. Tsî i ge ǀnîsi nî supu nau ǀkharaǀkharana dīsa. w24.09 6 ¶13-14

ǀNîsits ge ǃkharu ge ǁaeb ǃnâts ge nauna a tsūdī ǀgaub xa a ǂâiǂhâsen ǁkhā. Tae-e huitsi ǁkhā? ǁKhāts an hoana dī, ǁîn ǀkha xūna ǃgâiǃgâi tsî ǂgaob ǃgamsiba xu ǀûbaba ǂgan re. Jehovaba ǂgan îb sats xa ge tsūdīhena hui. ǁÎb ge sada hoa da hui ǁkhā î da aiǃgû tsî ǁîba ǂkhîb ǃnâ ǃoaba. ǃKharu ge ǁaeb ǃnâts ge dīsa xūna xu ǁkhāǁkhāsen re. Tsî mā-am îb Jehovaba sîsenū tsi ǁîb ra ǂhâba ǀgaub ai. Kēbo-aob Jonab aiǁgausa ǃgaoǃgâ re, Elob ge Jonaba ge mîmā îb Ninevesa ǃoa ī xaweb ge ǁîba ǀnî hâ ǃāsa ǃoa gere ī ǂgao. Jehovab ge Jonaba ge ǁnama tsîb ge ǁîb dīsāna xu ge ǁkhāǁkhāsen. (Jon. 1:​1-4, 15-17; 2:​7-10) Jehovab ge aiǃgû tsî Jonaba kēbo-aob ase ge sîsenū. Jehovab ge ǁkhapa ge mîba bi îb Ninevesa ǃoa ī. Nē ǃnās aib ge ge ǁnâuǀnam, dīsab ge xū-i xab gere ǃhausen xaweb ge Jonaba Jehovab ge ǂgānbi xū-e ge dī.—Jon. 3:​1-3. w24.10 8-9 ¶10-11

Jehovab ge sada ǁorena ǀûbas ǀguisa di tama, ǁînab ge ra ǀariǂui. Surudeb ga ǀariǂuihe, o i ge ǁnā maris go ǂkhanib ǃnâ a ǂgaeǀarihe khami ī. Xawe i ge khoe-e noxopa ǁnā marisa a mû ǁkhā. Xawe xū-e ǀariǂuis ge a ǀkhara. Nēsa ǁnâuǃās ǃaroma da ge nî ǂâi oa, ǃkharuge ǁaeb ǃnâ gere sîsenūhe ink-i ge supuse ǁgam-i ǀkha ge ǀarihe ǁkhā i. Khoe-i ge ǀâ lapihe ū tsî xoahe hâ xūna ge ǀaribē ǁkhā i. ǁNā-amaga i ge suruden gere ǀariǂuihe, o hoase gere bē. Nau khoen ge ǂguro go xoahe hâ i xū-e ge mû tama hâ i. ǁNā surudeb ge tātsē ī tama hâ i khami i ge ge ī-i. Kaise da ge ra ǃgôaǃgâ ǂansa Jehovab ga sada ǁorena ǀûba, oi ī tama i ge hâ i khami ra mûsen ǃkhaisa.—Psa. 51:9. w25.02 10 ¶11

Nau khoen ga ǀgoraǃgâ da tsî ǃgâi tamase hâ-ū da xawe da ge a ǂgomǃgâ ǁkhā Jehovab amaba a ǂansa. Tsî nē ǂgomǃgâsib ge nî hui da î da mâǃkharu ǂhanuoǃnâse da ga hâ ūhe xawe. ǂAn da a xui-ao Jehovab ǀgūǁae nē mâsiba nî ǀkharaǀkharasa. Jehovab ai da ga ǂgomǃgâ, o da ge ǁîb ai nî ǃâu îb nē hoa ǃgomsiga ǀariǂui. Tsî da ge ǁaixa hâse hâ ǀgara tsî nauna ǃhui tide. Nau khoe-i ǀkha ǁaixa hâse hâ ǀgaras ge ǁgarida ǁkhā ǁgai xū-e dīsa. Sada ǃgâiaǂgaob tsî Jehovab ǀkha da ūhâ ǀhōsagusis tsîna a ǁgaiǁgai ǁkhā. Ama as ge Jesub aiǁgausa da ǀoasase sao hō tidesa. ǀNî ǁaen ai da ge ǃhausen da nî xūna mî tsî dī ǁkhā. (Jak. 3:2) ǀNî ǂhanuoǃnâsigu ge sorosi tsûb tsî ǂâiǂhânsendi tsîna a ǃaroma ǁkhā. ǁNāsats ga hōǃâ o ǂâis ǃnâ ūhâ Jehovab ge ǂan sats ra ǃkharuǃnâ xūna. Jesub tsîn ge a ǂan matits ra tsâsa ǁîb ge ǁnā ǃgomsiga ǃkharuǃnâ amaga. (Heb. 4:​15, 16) Kaise da gere ǃgaiaǂgao Jehovab ge Elobmîs ǀapemādi, hui da ǁkhā de mādasa. w24.11 6 ¶12-13

Jesub ǃnâ da ge ǂgomsa nî ūhâ, “ǀamo ûiba” da ga hō ǂgao o. (Jhn. 3:​16-18, 36; 17:3) ǂGui Jodeǁîn ge Jesub ǃnâ ǂgomsa ǁgaus di ǁkhāǁkhāde ge ūǃoa tama hâ i. Jodeǁîn ge ǁîba ge dî: “Mâ sao-ets kha ra dī, mû tsî da nî satsa ǂgomse?” (Jhn. 6:30) Tsîn ge aiǃgû tsî ge mî, Moseb ǁaeb ǃnân ge khoena buruxa ǀgaub ǃnâ mana-e a hōsa în ǂû, ǁnā i ge ge ǁîn di tsēkorebe ǂû i. (Neh. 9:15; Psa. 78:​24, 25) Nēs ge ra ǁgau ǁîn ge ama pere-e hōs ai ǀgui ǂâisa ǂnûi hâ isa. Saoraseb ge Jesuba ‘ǀhommi di pere-i’ xa ge ǃhoa ǀamo ûiba a mā nî ǁkhā-e, xawen ge ge dî bi tama hâ i tae-eb ra ǂâibasensa. (Jhn. 6:32) ǁÎn ge sorosi ǂû-i ai ǂâisa ge ǂnûi hâ i tsî ǁnās ǀkha Jesub gere ǁkhāǁkhā amab ai ǂâisa ge ǂnûi tama hâ i. w24.12 5-6 ¶10-11

Sadu ǀgôa-i skoli ai kurus ǂans xa ra ǁkhāǁkhāsen khami i ge ǀkhara xūn xas tsîna noxopa nî ǁkhāǁkhāsen. Aiǁgause ǃnāsa hain ge saogu ra patronde ūhâ. Hais ge ra ǀgorasen tsî ǁnâugu tsî ǂnapogu tsîna ra kuru. Nēti ī ǀgaub ge fractal ti ra ǂgaihe. Nēti ī aiǁgaudi ge ǀkhara xūn kurus din ǃnâs tsîna ra hō-e. Ham-e nē īxa patronde ge kuru? Sadu ǀgôa-i ga ǃgamse Jehovab ge kuru īxa xūn xa ǂâi, os ge nēsa nî hui nî în ǀgaisa ǂgomsa omkhâi. Sadu ǀgôa-i ra kai khami du ge nî hui i, î-i ǁnâuǃā tae-i ǃaroma-i a ǂhâǂhâsasa Elob mîmāde ǁnâuǀnamsa. Nēsa dis ǃaroma du ge saora dîsa a dî i ǁkhā, “Elob ga kuru da o, ǂâi its ra ǁîb a ǂansa mati da nî tanisensa î da ǂkhîba ūhâ?” ǁNāpaxu du ge a ǁguiǃā ǁkhā Elob ge Elobmîsa a mādasa îb ǁgau da mati da a ǂkhî ǁkhāsa. w24.12 16 ¶8

ǃAnu gagab xa daoǁgauhe hâseb ge apostel Pauluba sîǂkhanisa ǀhaohâba ǃoa ge xoa, î-i ǃhobasen tama ǁore-ao-e ǀhaohâba xu ūǂûihe. (1Kor. 5:13) ǂGomǂgomsa Xristeǁî-e mati ǁnā khoe-i ǀkha nî hâ? Paulub ge ǁîna ge mîba “tā ǁîn ǀkha hâ ǀhao” ti. ǁNāsa tae-e gere ǂâibasen? Paulub ge ge ǁguiǃā ǁnāti ī khoe-i ǀkhan “ǂûs xawesa hî tide” ǃkhaisa. (1Kor. 5:11) ǁNāti ī khoe-i ǀkha ǂûǀhaos ge ǃnāsa ǁaeba ǁî-i ǀkha hâsa ǃaroma ǁkhā. ǃGāsaseb ge Pauluba gere ǂâibasen ǀhaohâb ǁnāti ī khoe-i ǀkha hâǀhao tidesa. ǁNās ǀhaohâba ǁnā khoe-i ǁgai ǀgauba xu nî ǁkhauba amaga. (1Kor. 5:​5-7) ǁNās xōǀkhā nēti ī khoe-i ǀkha hâ ǀûs ge ǁî-e nî hui, î-i mûǂan tsū xū-e i dī hâsa tsî î ge nî ǃhobasen. w24.08 15 ¶4-5

Israeli ǃnâs ge ǂkhîbagus tsēsa ǀguiǃnās ǀguisa kurib ǃnâ gere tsēdīhe. ǁNātsēs aib ge ǀgapipristera xamanin ǁguibasa khoen ǃaroma gere dī. Xamanin di ǁguibadi ge ǁoreba ge ǃgū-ai tama hâ i, khoe-i ûib xamanin dib xa a ǀgapi amaga. Xawe i ga ǁnā ǃhausen hâ Israelǁî-e Jehovab ra ǂgaoǀkhā ǁguibasa mā, ob ge māsenxase ǁî-i ǁoreba gere ǀûba. (Heb. 10:​1-4) ǂKhîbagus tsēs ge ǁîna gere hui în mûǂan ǁore-aon a ǃkhaisa. Jehovaba tae-e ge īǁkhā kai î-i khoen ǁorena ǀûbahe ǁkhā? ǁÎb ǀnamxa ǀGôab ge, “ǀgui ǃnās ǀguisa ge ǁguibahe, ǂguin di ǁorenab nî ūbēse.” (Heb. 9:28) Jesub ge ǁîb ûiba ‘ǂguin di orehes’ ǃgao ge mā.—Mat. 20:28. w25.02 4 ¶9-10

“Gasas ge amase a māsenxa, xawes ge sorosa a ǂkhabusa.” (Mat. 26:41) ǁNā mîdi ǀkhab ge Jesuba ge ǁgau, ǀoasa kurusa da ūhâ tama ǃkhaisab ra ǁnâuǃā tsî da ra dīsā ǃkhaisa. ǁÎb mîdi ǃnâ-ūb ge ra ǃkhâikhom da, î da tā ǂâi ǀgaisa da a tsî da ǁore tide ti. ǁAeba ǃkharu hâse Jesub ǁnā mîde nî mîs aiǃâ gu ge ǁkhāǁkhāsabe ga ge mîba bi, tātsēs tsîna gu xūbi tide ti. (Mat. 26:35) ǁÎgu di ǂâibasens ge ge ǃgâi i xawe gu ge ge ǁnâuǃā tama hâ i, ǃhaese gu a ǂkhabu ǁkhā ǃkhaisa ǃgom mâsigu ǃnâ gu ga ǂgâ o. ǁNā-amagab ge Jesuba ǁî ga nētsēs mîs ǃnâ ǃkhâikhom tsî ge mî ba i gu ǂkhaikari hâ. ǂAnbasen tsî gu ge ǂkhaiǂkhari hâ tama hâ i amaga gu ge, Jesub ǁkhāǁkhāsabe ga ǁîba gu ge mîmâiba xū-e dī tama i tsî ge ǃkhoexu bi.—Mat. 26:56. w24.07 14 ¶1-2

Adammi tsî Eva hâra ge ǁore ra ge o ǀamo ûib ǀguiba ge ǂoaǃnâ tama hâ i. Xawe ra ge ǁîra ǁGûb Jehovab ǀkha ra ge ūhâ i ǀhōsagusis tsîna ge ǂoaǃnâ. ǁOre ra nîs aiǃâ ra ge Adammi tsî Eva hâra ge Elob omaris di ǃâ i. (Luk. 3:38) Xawe ra ge Jehovaba ǁnâuǀnam tama hâ i, o ra ge ǁnā omarisa xu ge ǃkhaeǂûihe, ǀgôana ra nî hōs aiǃâ. (Gen. 3:​23, 24; 4:1) ǁÎra surib ase da ge huiba ǂhâ hâ, î da Jehovab ǀkha ǃgâi ǀhōsagusisa ūhâ. (Rom. 5:​10, 11) Elob ǀkha da ūhâ khākhoesisa ǀû tsî da ge nî ǁîb di ǀhōsa kai. ǀGui ôaǃnâs ǃoagu i ge Grike gowab mîs, “ǂkhîbagu” ti hâsa a ǂâibasen ǁkhā “sa khākhoe-i ǀkhats a ǀhōsasagu” ǁkhāsa. Buruxaseb ge Jehovaba ǂgurose nēs xa xū-e ge dī. Mâ ǀgaub ǃnâ? Jehovab ge ǀgauba ge dī în ǀoasa kurusa ūhâ tama khoena ǁîb di ǀhōsa kai. ǁÎb ge Adammi ge ǂoaǃnâ xū-e hō-oas ǃaroma xū-e ge dī. Nēs ge ǀoasasiba ūhâ xū-e ǁkhā ǀoasasiba ūhâ xū-i ǀkha ǃkhōǃkhunisa ǃoa ra ǁnaeǁgau. w25.02 3-4 ¶7-8

Apostel Paulub ge ge mî, “ǁnāti īb ǃaromab ge ǂguin âdu ge mā bi ǁkharaba ǂâu hâ.” (2Kor. 2:​5-8) Nēs ge gere ǂâibasen ǁîb îb taras ǀkha ge ǁgoeǁare ǁore-aob nî ǁnamahesa.(1Kor. 5:1) Tae-i ǃaroma? Îb ǃhobasen. (Heb. 12:11) Tsūdī-aob ge ǃhobasen amagab ge Pauluba ǀhaohâb ǃûi-aoga ge mā-am, î gu khoeba ǀhaohâba ǃoa oaǀkhī kai. Tsîb ge ǁîna ge mîba în ‘ǀûba, ǁkhaeǂgao’ tsî ǀnamma ǁgaubi. Paulub ge ǀhaohâba ge mîba în ǁîn mîdi tsî tanisen ǀgaub ǃnâ ǁgau khoeban amabes ǃnâ ǀnam ǃkhaisa. Nēs ǀkhab ge ǃgâsaba ǁkhoreǁharesase oaǀkhī ǁkhā ǀhaohâba ǃoa. w24.08 15 ¶4; 16-17 ¶6-8

ǁNā-amagab ge apostel Pauluba ge ǂan i ǁîn tae-e ǂhâ hâsa în mâǀgai. Xristeǁînab ge ge hōhōǃnâ, ǃgomsina mâǀgais ǃaroman ǁîn ai ǂgomaiǂnûi tidesa xawen Jehovab ai nî ǂgomaiǂnûisa. Paulub ge ǁkhoaǂgaose ge mî: “ǃKhūb ge a ti Hui-ao tsî ta ge ǃao tide.”(Heb. 13:6) ǀNî ǃgâsan sida din ge nēsi ra ǁgâiǀāhe. ǀGui ǀgaub ǁîna da ǀnamma a ǁgau ǁkhāb ge, ǁîna ǀgorebas, ǂhân hâ xū-e mās tsî hui nîsa. Elobmîs ge ǃgāsase ra mî: Xristub Jesub “ǃnâ ra ûi ǂgao khoe-i hoa-i ge ǃgomma nî tsâ.” (2Tim. 3:12) ǁNā-amaga da ge hoa da nî aiǂhumisen hānîǁae nî ī ǃgom xūn ǃaroma. Hā re î da aiǃgû tsî ǀoasase ǂgomaiǂnûi ǂgomǃgâsiba ūhâse ǁîb nî hui dasa, î da ǃgomsin ǃnâ mâǀgai mâ ǃgomsi-i ǀgui-e da ga hōǃâ xawe. ǀGūǁaeb ge ǁîb ǃoaba-aon hoana sâba nî mā.—2Tes. 1:​7, 8. w24.09 13 ¶17-18

Korinteǁîna tae-i xa ge hui-e în ǁāǁnâhe? (2Kor. 10:​4, 5) Elobmîs tsî Elob ǃanu gagab ge ǁîna ge hui în ǃhaese ǀkharaǀkharana ǁîn ûigu ǃnâ dī. (Heb. 4:12) Korintes ǃnâ ge hâ i khoen hîna ge Xristub xa hâ ǃgâiǂhôasa ūǃoan ge ǁgai ǁnaetiga ge ǁnāxu aiǁgause kaise ās, ǃnarib tsî mofin ûiǀgaub tsîna. (1Kor. 6:​9-11) Korintes ǃnâ hâ khoen ge ǂgui ǀkharaǀkharana ga dī hâ. ǁÎn ge ge ǂâi tama hâ i ǁnāsa dīs kaise a ǃgomsa în Xristeǁî kai. ǁÎn ge ǃgarise ge sîsen în ǀamo ûiba ǃoa garu ǀui daob ai ǃgû ǀgara. (Mat. 7:​13, 14) ǀKharaǀkharana sa ûib ǃnâ dīs xats ǃgombahe îts ǁāǁnâhe? Tā ǀûsen re ǀkharaǀkharana dīsa. Jehovaba ǀkhoma re îb ǁîb ǃanu gagab ǀkha hui tsi îts ǁgai xūna dīsa xu ǃkhō-oasen. w25.03 6 ¶15-17

Jehovaba ǂgan re îb hui du, î du ǁîb ǂâiǀgauba ǁnâuǃā. Jehovab ge ra mîmâi ǁîb gā-aisiba nî mā dasa î da ǂhanu daoba ǁhûi. ǁÎb ge “māǂgaoxase tsî ǀkhomxaǃnâse hoana” gā-aisiba ra mā. Jehovab daoǁgausa du ga ǀgores ǃnâ ǂgans khaoǃgâ, ǁîb mati ra ǃeream du ǀgausa ǃgaoǃgâ re. Aiǁgause, ǀnî hâ ǃā-e ǃoa du ga ī tsî du ga kā, o du ge khoe-i hîna ǁnā ǃāsa ǃamkuse a ǂan i ai huiba a ǂgan ǁkhā. ǁÎ-i ǃeream du tama hîna du garu nî ǃgû? Hî-i, tātsē. ǁÎ-i ra mā du daoǁgaude du ge amase ǂōrisase mâ tsî nî ǃgâ. ǁKhā ǀgaub ai du ga Jehovab ai gā-aisiba ǂgan, o matib ra ǃeream du ǀgauba ǃgaoǃgâ re, Elobmîs ǁgaragu tsî daoǁgaude ǁnā mâsib ǃnâ sîsenūs ǃnâ-ū. Aiǁgause du ga ǁkhoaxa ǁaeba ūhâs ǃaroma ǁkhauhe, o du ge ǀnîsi Elobmîs tae-e ǁâudīgu, ǃgâi tama ǀhōsan tsî Elob Gaosiba sadu ûib ǃnâ ǂgurose mâis xa ra mî xūna ôaǃnâ ǁkhā.—Mat. 6:33; Rom. 13:13; 1Kor. 15:33. w25.01 16 ¶6-7

Jesajab kēbos ge ǃkharagagusiba ra ǁgauǂui ǁnān gagasi paradais ǃnâ hân tsî ǁnān gagasi paradais ǃauga hân ǁaegu. Jehovab ge māxase ǁîb ǃoaba-aon hoana ǂhân hâ xūna ra mā, în ǁîb ǀgūse hâ. ǁÎb ǃanu gagab, ǁîb mîs tsî ǂgui gagasi ǂûn tsîna da ge ūhâ î da “ǂû, . . . ā, . . . tsî ǃgâiaǂgao.” (J.ǂHa. 22:17) Xawe mâsib ge a ǀkhara ǁnān hîna gagasi paradais ǃnâ hâ taman ǃaroma, ǁîn ge “ǃâ . . . , ǁgâ . . . , tsî ra taotaohe.” ǁÎn ge Elob ǀkha ǀhōsagusisa ūhâ tama. (Amo. 8:11) Jehovab ge hoa xūn ǂhâ da hâna ra māda. Nēn ge gagasi ǂûn tsîna ǃkhōǂgā hâ, î da sida ǂgomsa ǀgaisase ūhâ ǀgara. (Joe. 2:​21-24) Aiǁgauseb ge Elobmîs tsî Elobmîs ai ǃgaoǃgaosa ǂkhanin, sida internets ǂhaweb, ǀhaodi, ǀkharib kai ǀhaodi tsî ǂkharis kai ǀhaodi tsîna ra māda. Nē gagasi xūna xu da ge ǃgâiba tsēs hoasa a ǀama ǁkhā. ǁNās xa ǃaromahe hâse da ge ǃgâise ǂûmāhe tsî khoakhoasases tsîna ra tsâ. w24.04 21 ¶5-6

Khoe-ets ga dî-am ǂgao, ots ge ǁî-i ǀkha ǂgui khoen ra ǀhao ǃkhai-i ai ǀhao tsî a ǃhoa ǁkhā tamas ka io selfonni ǃnâ-ū. ǃGāsase ǁî-e mîba re ǀnammi tsâsibats ūba i hâsa tsîts ǁî-e ǃnāsase ra ǂan ǂgao ǃkhaisa. (1Kor. 14:9) ǂHâbasa i ga o ǁî-e ǁaeba mā re î-i ǂâiǃgâ ǃereamsa i nî mās aiǃâ. (ǂKhm. 15:28) ǁNā khoe-i ga sats ǃnâ ǃgâiǃgâibasensa ūhâ tama io, ǁî-i ra tsâ ǀgauba ǃgôasiba ǁgau. Tae-ets nî dī khoe-i ga mîba tsi o sats ǃnâ i ǃgâiǃgâibasensa ūhâ ti? ǁNā khoe-i ge ǁkhoaǂgaosiba omkhâi tsî tsâ i ra ǀgauba satsa go mîba. ǁNās ǀkha ǁî-e khoexaǃnâse hâ-ū tsî ǃgôasiba ǁgau. ǁAebats ga ǂhâba ǁnā khoe-e ǃereamsa māsa î ro soregu, o ǁî-e ti mîba re. ǁNātits ga mî o tā gaxuse ū ǁî-e ǃereamsa māsa. (ǂKhm. 13:12) ǁÎ-i ǃnâts ga ǃgâiǃgâibasensa ūhâ tama io ǃgāsa tsî khoexaǃnâ ǀgaub ǃnâ ǁî-e mîba. ǁÎ-ets ga dî-am ǂgao, o ǀhao tsî tsâ ro ra ǀgaub tsî nēsa xu ro tae-e ra ǃâubasensa ǃhoaǃgao. Saro ra ǂgaoǀkhāgu xūn ge a ǃkharagagu ǁkhā. w24.05 23-24 ¶12-13

Noxopab ǀnîsi a ǂkham hînab ge Davida toroǂnubis di kampsa sī ge sari. Sīb ge, o gu ge soldaga kaise ge ǃao hâ i kaihâ Filisteǁîb Goliat ti ǀon hâb ge “Israeli toroǂnubisa . . . ǃharaxū” amaga. (1Sam. 17:​10, 11) Soldagu ge gere ǃao ǁîgu ge Goliati kaimâ hâ ǀgaus tsî ǁîb gere mî xūn ai ǂâisa ǂnûi amaga. (1Sam. 17:​24, 25) Xawe Davidi ge ǀkhara xū-i ai ǁîb ǂâisa ge ǂnûi. Davidi ge ge ǂan i Goliati ge Israeli toroǂnubisa gere ǃkhāǃkhā ob ge “uitsama Elob” di toroǂnubisa gere mîǁgaiǁgaisa. (1Sam. 17:26) Davidi ge Jehovaba ǂâis ǃnâ ge ūhâ i. ǁÎb ge ǂgomǃgâsiba ge ūhâ i Elob ǁîba ge gū ǃûi-aob a hîna a huib, nē mâsib ǃoagu ǁîba nî huisa. Elob ǁîba nî hui ǃkhaisab a ǂan amagab ge Goliati ǀkha ge ǃkham tsî ge dan.—1Sam. 17:​45-51. w24.06 21 ¶7

ǂÂiǃgâ re matib ga sida ûiba ǀkhara hâsa Jehovaba da ga nēsi ǃoaba tama hâ o. ǁNās ge nî hui da î da ǂgomǂgomsase ǁîb ǃoagu hâ tsî da ge Psalmdi xoa-aob khami nî mî: “Xawe tita xasa, ǃgâiba te a Elob ǀgūse hâsa.” (Psa. 73:28) Mâ ǃgomsi-i ǀgui-e da ga nē ǀuniga tsēdi ǃnâ ǃkharuǃnâ xawe da ge a ǂan tanihō ǁkhā da nîsa “ûitsama tsî ama Eloba” da ra ǃoaba amaga. (1Tes. 1:9) Sida Elob ge ama khoeb ǁîba ra ǃoaba khoena ra tsâbaba. ǃKharu ge ǁaeb ǃnâb ge ǁîb ǃoaba-aona ge hâba i tsîb ge nētsēs tsîna sida ǀkha hâ. ǀGūǁae da ge kai ǁgâiǀāba nî hōǃâ nē ǃhūbaib ai. Xawe da ge ǀguri hâ tide, Jehovab ge sida ǀkha nî hâ. “ǁNā-amaga da kom ǁkhoase a mî ǁkhāo: ǃKhūb ge a ti Hui-ao tsî ta ge ǃao tide.”—Heb. 13:​5, 6. w24.06 25 ¶17-18

Elobmîs ge 40 xa ǃnāsa aogu xa ra mîba da gao-aogu ase gere ǂgaeǂguiga Israeli ǃnâ. ǁNā ǃnaeǃkhaidi ge ǂhauǃnâse ra mîba da nē gao-aogu gere dī xūn xa. Aiǁgause ǃgâi gao-aogu tsîn ge ǁgai xūna gere dī. ǃGâi Gao-aob Davidi xa ǂâi re, Jehovab ge ǁîb xa ge mî: “Ti ǃgāb Davidi, tita ǂgomǂgomsase ǃoaba, ti mîmāde ǁnâuǀnam tsî ti mûǁae ǂhanun ǀguina gere dīb.” (1Gao. 14:8) Xaweb ge ǁîba ǃgamme hâ taras ǀkha ge ǀai tsî ǁîs ti ǃgamme aoba toroba ǃoa ge sî îb ǁnāba sī ǃgamhe. (2Sam. 11:​4, 14, 15) Elobmîs tsîn ge ǂgomǂgomsase ge Jehovab ǃoagu hâ tama i gao-aogu gere dī ǃgâi xūn xa ra mîba da. Rehabeammi xa ǂâiǃgâ re, Jehovab mûǁaeb ge “ǂkhawadīn ǀguina gere dī.” (2Kro. 12:14) Xaweb ge Rehabeammi tsîna ǃgâi xūna gere dī. Aiǁgauseb ge Jehovaba ge ǁnâuǀnam, Jehovab ge mîba bi o îb disi ǃhaodi Israelǁaes didi ǃoagu tā ǃkham tsî ǁîna mā-am in ǀnî hâ gao-aoba ǁhûibasen. Tsîb ge ǁîb tsîna ǂgui ǃāde ǁîb ǁaeb ǃnâ ge hâ i te ge ǀgaiǀgai. Nēs ge Elob khoena ǁîn khākhoena xu ge ǁkhauba. (1Gao. 12: 21-24; 2Kro. 11: 5-12) Xaweb ge Jehovaba mati gere mîǁgui nē gao-aob a ǂhanu-ai khaisa? ǁÎb ǂgaob mâsib, ǃhobaseni ge ǃkhais tsî ama ǃoabasab ge uǃoa ǃkhais aib ge ǂâisa ge ǂnûi. w24.07 20 ¶1-3

ǀHaohâb ǃûi-aoga tae-e nî dī 18 kurigu xa ǂkham ǀgôa-i ga ǀhaohâb ǃnâ ǀgaisa ǁoreba dī o? ǀGam ǀhaohâb ǃûi-aokha ge ǁnā ǀgôa-i Xristeǁî ǁgûn ǀkha nî ǀhao. ǀHaohâb ǃûi-aogu ge nî ǂanǂûi ǂgao ǁgûn ǀnai tae-e dī hâsa ǁîn di ǀgôa-e ǃhobasensa ǃoa huis ǃaroma. ǀGôa-i ga ǁgau o ǁî-i ǁgûna i ra ǃgâ tsî ǂâiǀgauba ǀkharaǀkhara, o gu ge ǀhaohâb ǃûi-aoga mîǁgui ǁkhā ǁhōba ǁnāpa ǀgui ǁnāxusa. ǀHaohâb ǃûi-aogu ge a ǂan Jehovab ǁgûna ǃereamsa mā hâsa în ǁîn ǀgôana ǀnamxaǃnâ ǀgaub ǃnâ hui. (Deu. 6:​6, 7; ǂKhm. 6:20; 22:6; Efe. 6:​2-4) ǁNāpaxu gu ge ǀhaohâb ǃûi-aoga ǁaeba xu ǁaeb ǀkha ǁgûn ǀkha nî kō ǀgôa-i ǂhâbasa huiba ra hōsa. ǀHaohâb ǃûi-aoga tae-e nî dī ǁāǁnâsa ǂkham ǀgôa-i ga ǀkharaǀkharana dī ǂgao tama io? ǁNāti i ga ī, o gu ge ǃnona ǀhaohâb ǃûi-aogu tsî ǁnā ǀgôa-i Xristeǁî ǁgûn tsîna nî ǀhao. w24.08 24 ¶18

ǂAn da ge a hoa da ra ǂkhîsa ǀkhae xū-e da ga hō o. Xawe da ge ǃnāsase ra ǂkhî nauna da ga mā o. Jehovab ge nēti ī ǀgaub ǃnâ a kuru da amaga da ge sida ǂkhîba ǀaro ǁkhā. Sida ǃgâiaǂgaob ai da ge ǀaro ǁkhā, ǀgauga da ga ôa o nauna da nî mā ǀgausa tsî ǁnāsa dī ǀgara o. ǃGâi tama i hâ Jehovab ge nēti ī ǀgaub ǃnâ a kuru da o? (Psa. 139:14) Nau khoena ra mā khoen a ǂkhî tis Elobmîsa ra mîba da amaga da ge supuse a ǁnâuǃā ǁkhā, tae-i ǃaromab Jehovaba ‘ǂkhîb di Elo’ ǃkhaisa. (1Tim. 1:11) ǁÎb ge ge ǂguro i nauna ge māpa tsî khoe-i tsîn ge Jehovab xa ǃnāsase a māǁoa. Jehovab ǃaroma da ge “ǁîb ǃnâ ûi, gon tsî hā xui-ao.” (ǃNǃkh. 17:28) Amase “mâ ǃgâi tsî dīǀoaǀoasa mās hoas” ge Jehovaba xu ra hā. (Jak. 1:17) Hoa da ge ǀnîsi māsa xu ra hā ǃgâiba ra hōǃâ ǂgao. Nēsa da ge Jehovab māsenxasiba ǁgaes ǃnâ-ū dī ǁkhā.—Efe. 5:1. w24.09 26 ¶1-4

ǀNî ǀhaohâb hui-aogu ge ra tsâ ǁîgu tātsē ǀhaohâb ǃûi-aob ase ǁgaumâihe tidesa. ǁÎgu ge ra tsâ ǀnî hâ ǂgui ǀgauga gu nî omkhâisa i gu ǁnā ǁgaumâisa hō. Xawe ǂâis ǃnâ ūhâ re Jehovab tamas ka io ǁîb ǀapeǂhumis ge ǃâubasen tama hâ îts nē ǀgauga ǀoasase ǁgauǂui. (1Pet. 2:21) Jehovab ǃanu gagab ge nî huitsi nē ǀgauga omkhâis ǀkha. (Fil. 2:13) Sîsenǂam ǂgaots ra ǀgaubats ūhâ? Jehovaba ǃoa ǀgore. ǁNāts ra omkhâi ǂgao ǀgaub xa ôaǃnâsa dī tsî ǀhaohâb ǃûi-aogu di ǀguib ai huiba ǂgan ǁnāsa sîsenǂuis ǃaroma. Aiǃgû tsî ǀgauga ôa ǁnā mîǁguiba sīǃnâsa. Jehovaba ǂgan îb huitsi ǁîba ǃoaba ǀgara tsî ǀhaohâb ǃnâ ǃnāsa-e dīsa. (Jes. 64:8) Jehovab ge dīts ran hoan ǃnâ nî ǀkhae tsi îts ǀhaohâb ǃûi-aob ase ǁgaumâihesa sīǃnâ. w24.11 25 ¶17-18

Tā da ge ǂgui kuriga da Jehovaba ǃoaba hâ amaga, ǁîb xa ǀûbahesa da anu hâ khami nî tsâ. Ama as ge Jehovab ra ǃgôaǃgâsa ǁîba da ge dība xūna. ǁÎb ge ǁîb ôaba xū-e ǂgan oa tamase ge mā da. Sida ra dība bi ǃgâi xūnab nî matare-oa da amagas ose. ǁNā-amaga î ge ǂhanu tama hâ, Jehovaba da ǂgui xūna dība hâ amaga da ǁîb xa ǀûbahesa anu hâ ti ǂâisa. Ti da ga ǂâi, o i ge ra ǂâibasen xoremariba da ǂhâ tama hâ ti. (Gal. 2:21) Apostel Paulub ge ge ǂan i, Elob xa ǀûbahesab anu tama hâsa. Tae-i ǃaromab ge Jehovaba ǃgarise gere sîsenba? Nēsa dīs ǃnâb ge ge ǁgau, Jehovab ǃgâisib tsî ǀkhomxasibab ra gangansa. (Efe. 3:7) Paulub khami da ge Jehovaba ôasase ra ǃoaba, ǁîb ǀkhoma da anu hâsa ǁgaus ose xawe ǃgôaǃgâ da rasa ǁgaus ǃaroma. w25.01 27 ¶5-6