Julib

ǀNî ǃoaba-aon Jehovab din ge kairasis, ǃgâi tama ǂurusib tamas ka io sorosi ǃnubusigu ǀkha ûis mâsigu xa ra tsâǀkhāhe. Nēs ge ǁîna Jehovab aiǃân ǂhâǂhâsa tama khami a tsâ kai ǁkhā. ǁÎn ge ǀnîsi a dîsen ǁkhā, ‘Jehovaba noxopa nî sîsenūte?’ Psalmdi 71 xoa-aob ge ǁkhā mâsiga gere hōǃâ, ǀgaioǃnâseb gere tsâ amaga. ǁÎb ge ge ǀgore: “Ti ǀgaib ga toaxū te, o tā ǁnāxū te re.” (Psa. 71:​9, 18) ǀGaioǃnâseb gere tsâ xaweb ge psalmdi xoa-aoba gere ǂgomǃgâ Elobab ga ǂgomǂgomsase ǃoaba, ob nî huihesa. Nē psalmdi xoa-aob ge ge ǁkhāǁkhāsen, Jehovab ǁnān hîna ǁîn di ǁkhāsiba ra sîsenū tsî ǁîba ra ǃoaban ǀkha a ǂkhîsa. (Psa. 37:​23-25) Kaira du ga, o Jehovab sadu xa ra tsâ ǀgaub xa ǂâi re. ǁÎb ge nî hui du, ǁîba ǂgomǂgomsase ǃoabasa sorosise du ga ǂkhabusa xawe. (Psa. 92:​12-15) Dīhō ǁoats an xa ǂâis xa, dīhō ǁkhāts an xa ǂâi re. w24.10 28 ¶14-16

Gagasise kaiǀoa tama Xristeǁî-i ge ǃnāsa ǁaeba mîǁguiga dīs xa a ǃgombahe. ǃGōsase i ga Elobmîs ǁgara-e ǀkhai i o. Tsîn ge nēs xa ǃaromahe hâse ǁîn ra ǂhâba ǀgaub ai mîǁguiga ra dī. ǀNîn ge ǁgaraga ra ôa, ǁgara-i ga ǀkhai o. Aiǁgause, Korintes ǃnâ hâ Xristeǁîn ge apostel Pauluba gere dî ǁgoatsuiǁgoa elogu ǃgao ra dīhe ǁguibas ǂû-en a ǂû ǁkhās ǁgaragu hâsa. Paulub ge ǁîna ge hui în mûǂan mâ-i hoa-i ‘ǃnorasasiba’ ūhâsa, aitsâma ǁhûibasensa nēs dawa i ga hā o. ǁÎb ge Elobmîs tsoatsoade gere sîsenū, îb ǁîna hui în ǁîn ǃgâiǂâisa ra mā-am mîǁguiga dī tsî tā nauna ǃnôa kai. (1Kor. 8:​7-9) Paulub ge Korintes ǃnâ hâ Xristeǁîna gere ǁkhāǁkhā în Elobmîs xoade ra sîsenūse mîǁguiga dī nau khoen ai dîs tamas ka io ǁgaraga ôas xa. Nēs ǃnâ-ūb ge gere hui nî, în gagasise kaiǀoa hâ Xristeǁî kai. w24.04 5 ¶14

Jonab tsēdi ǃnân ge Nineveǁîna ǃēsa ge ūhâ i în ǃhōbasen. Jesub ge “ǀgoraǃgâs” di khâis xa mî xū-i xa ǂâi re. ǁNās ge ‘ǂkhabana gere dīn’ tsîna nî ǃkhōǂgā. (Jhn. 5:29) ǁNās ǀkha da ge a mî ǁkhā Sodoms tsî Xomoras khoen ǀnîsi ǃâubasensa ūhâ ǃkhaisa. Īǁkhā-e ǀnîn khâisa nî māhesa tsî da sida ǃēsa nî ūhâsa î da ǁîna Jehovab tsî Jesub xa ǁkhāǁkhā. Jehovab ge hoaǁae ‘ǂâide ra ôaǃnâ tsî ǂgaoga ra ǃâitsâ.’ Hānîǁaeb khâis tawa i ga hā, ob ge Jehovaba “mâ-i hoa-e ǁî-i di daogu ǃoa nî” ǀgoraǃgâ. Jehovab ge ǂhâbasa i ga o ǀgaisase nî ǀgoraǃgâ xawe ǂhabâsa i ga os tsîna nî ǀkhomxaǂgao. ǁNā-amaga da ge a mîǁoa khoe-i khâisa hō tidesa, hoa xūna da ga ǀūo. w24.05 5-6 ¶15-16

ǃKharu gere ǁaeb ǃnâ i ge Eloba xu hâ haisi-amsa ǁîb di ǃoaba-aona gere ǀgaiǀgai, ǃgom ǁgaumâiden gere hōǃâ o. Kēbo-aob Jeremiab aiǁgausa kō re. Jehovab ge aoǁnâs ǁgaumâisa a mābi ob ge gere îganǀgē. Jeremiab ge ge mî: “ǃKhū Elotse tita ge a ǃhoa ǁoa, kaise ta ge a ǂkham.” (Jer. 1:6) Tae-e ge huibi îb aoǁnâs ǃaroma ǁkhoaǂgaosiba ūhâ? Elobmîsa xub ge ǀgaiba ge hō. ǁÎb ge ge mî Elobmîs ge “ti ǂgaob ǃnâ khau ra ǀaes ǂkhōgu ǃnâ ǂganamhe hâs ase nî ī.” (Jer. 20:​8, 9) Jeremiab ge ǃgom ǁgaumâisa ūhâ i xawe i ge ǁgaumâiheb ge hâ i haisi-amsa, ǂhâb ge hâ i ǀgaiba gere mābi îb sîsen-e dī. Xristeǁîn ge Elobmîs ǃnâ hâ mîde xu ǀgaiba ra hō. Apostel Paulub ge ge mî, amaba ǁkhāǁkhāsens ǃgâsana nî ǂkhâǃnâsa în “ǃKhuba anu hâse ûi ǁîba ǃgâiba ǀgaus hoas ai . . . în mâ ǃgâi sîsenni hoab ǃnâ ǂûtani.”—Kol. 1:​9, 10. w24.04 14-15 ¶2-4

Abiatari ge Jehovab ǃoa-ai ǂgomǂgomsase hâ tama i tsî Davida gaxaǃnâ. Xaweb ge Sadoka aiǃgû tsî ǂgomǂgomsase Jehovab ǃoa-ai ge hâ. Davidi ge ge ǂan i hoaǁaeb Sadoka nî ǂgomǃgâsa. Adoniab ǀapes ge ǂhaiǂhaihe ob ge Davida, Sadoki, Natanni tsî Beniab tsîna ge ǂgomǃgâ ǁîgu Salomona gao-aob ase nî ǁgaumâisa. (1Gao. 1:​32-34) ǂGomǂgomsa ǃoaba-aogu Jehovab di gu aiǁgause, Natanni tsî ǀnî hâ gao-aogu Davida gere ǂkhâǃnâ gu ǀkhab ge hâ i amagab ge Sadoka ge ǀgaiǀgaihe. Salomonni ge gao-ao kaib ge o, “Abiatari soas ǃnâ Sadoka pristerse ge mâi.”(1Gao. 2:35) Mati du Sadoka a ǁgae ǁkhā? Kaise du a ǀnam ǀgū khoe-i ga ǁhûi Jehovaba ǃoaba ǀûsa, o sadu mîǁguigu ǃnâ ǁgau re ǁhûi du ra sa Jehovab ǃoagu ǂgomǂgomsase hâsa. (Jos. 24:15) Jehovab ge ǀgaib tsî ǁkhoaǂgaosib tsîna nî mā du, î du ǂhanu xū-e dī. Jehovaba ǃoa ǀgore tsî ǁîb ǃoagu a ǂgomǂgomsa ǃgâsan ǀgūse hâ re. Jehovab ge sadu ǂgomǂgomsasiba kaise ra ǃgôaǃgâ tsî nî mādawa-am du.—2Sam. 22:26. w24.07 6-7 ¶16-17

Psalmdi 15: 2 ǃnâ î ge Elob ǀhōsa-e “ǂhauǃnâse ra tanisen-i tsî ǂhanu-aisiba ra sîsenǂui-i” ase ra ǁguiǃāhe. Nē mî ra “tanisen” tsî “sîsenǂui” ti hâ ra ge xū-e dī ǀgarasa ǃoa ra ǁnaeǁgau. Xawe ‘ǂhauǃnâse tanisen’ ǁkhā i da a? Îo, ǀoasa kurusa ūhâ khoe-i ge a ǀkhai. Jehovab ge “ǂhauǃnâse ra tanisen” khoe-i ase ra mû da dītsâ tsî da ga ǁîba ǁnâuǀnam o. Māǁnâsen tsî da ga ǁāǁnâ kaisen, os ge ǁnāsa Elob daob ai hâs di tsoatsoa. Aiǁgaus ase, Elobmîs ǁaeb ǃnâ i ge Israelǁî ǃhaosa xu ǂoaxasa ǂâibasen tama hâ Jehovab ǃhoakhoets asa. ǀNîn ge ǁîba gere ǂgaiǀî, xawen ge “amab tsî ǂhanu ǀgaub” ǃnâ ǁnāsa ge dī tama hâ i. (Jes. 48:1) ǂHauǃnâ ǃhaokhoen asen ga Jehovab xa ūǃoahe ǃkhaisan ga ra ǂkhâba, on ge Israelǁîna Jehovab ǂgaoǀkhāde ǁkhāǁkhāsen tsî gere sao. Nētsē da ga Jehovab ǀkha ǀgū ǀhōsagusisa ūhâ ǂgao, o da ge ǁāǁnâ kaisen tsî ǁîb ǃoaba-aon ase ǂanhes xa ǃnāsase nî dī. Aiǃgû tsî da ge ‘ǂhanu-aisiba nî sîsenǂui’. w24.06 9 ¶4; 10 ¶6

Mâ ǀnî ǀgauga Jehovab māxasiba ra ǁgau? ǀNî aiǁgaude ǃgaoǃgâ re, Jehovab ge ǂhâ da hâ xūna ra mā da. ǀNî ǁaeb ge sida ûiga supu-supu tide xaweb ge ǃnāsa ǁaeba ǂhâ da hâ xūna nî mā da. Aiǁgause, Jehovab ge ra īǁkhā kai î da saran, ǂû-i tsî hâǃkhais tsîna ūhâ. (Psa. 4:8; Mat. 6:​31-33; 1Tim. 6:​6-8) Jehovab ge nē xūna mā da tama hâ, ǁgui-aisaseb ra tsâ amaga ǀgui. Mateub 6:​25, 26 ǃnâ hâ mîde ǃgaoǃgâ. Jesub ge anidi aiǁgaude sîsenū tsî ge mî: “ǁÎn ge tsoro, ǃgao tsî ǃhorosâuǃnâ-ommi ǃnâ sâubasen tama hâ.” Xawe ǃgaoǃgâ re tae-eb ge saorase a mîsa: “Xawen ge Elob xa ra ǂûmāhe.” ǁNāpaxub ge Jesuba ge dî: “Sado kha nē ǀhomaniron xa ǃnāsase ǂhâǂhâsa tama hâ?” Jesuba nēba tae-e gere ǁkhāǁkhā da? Jehovab ga xamanin ǂhâsiga kōǃgâ, o da ge ǂgomǃgâsiba nî ūhâ ǁîb ǂhâ da hâ xūna nî mā dasa. ǀNamxaǃnâ ǁgû-i ǁî-i omarisa ra kōǃgâ khamib ge Jehovab tsîna sida ǀnamdab a amaga ra kōǃgâ.—Psa. 145:16; Mat. 6:32. w24.09 26-27 ¶4-6

ǀHaohâb hui-aob ge ǁāǁnâsa ǃgâsab ǃanu gagab xa ra ǁgaumâihe ba, îb ǀhaohâb ǃûi-aoga ǂgui ǂhâǂhâsa xūn ǀkha hui ǀhaohâb ǃnâ. ǀHaohâb hui-aogu ge Jehovaba a ǀnam khoega tsî ǁîb ǁgaragu ǃoagu ra ûi. ǁÎgu ǃgâsana gu ge kaise a ǀnam. (Mat. 22:​37-39) ǁĀǁnâsa ǃgâsaba tae-e a dī ǁkhā îb ǀhaohâb hui-aose ǁgaumâihe? Elobmîs ge ra mîba da tae-i ǂgaoǀkhān hâsa ǀhaohâb hui-aob ǃaroma. (1Tim. 3:​8-10, 12) ǀHaohâb hui-aob asets ga nauna hui ǂgao, o nē ǂgaoǀkhādi xa ǁkhāǁkhāsen tsî ǃgarise sîsen re îts nē ǀgauga omkhâi. Xawe ǂgurose dîsen re, ‘tae-i ǃaroma ta ǀhaohâb hui-aob ase ra ǃoaba ǂgao? w24.11 15 ¶4-5

ǀNî khoen ge ra mî ǁîn Elobmîsa ǂguiǃnāde ra khomai ti. Xawen amabes ǃnâ Elobmîs ra ǁkhāǁkhā xūn ǃnâ ra ǂgom? Elobmîs ra ǁkhāǁkhā xūn ǃoagu ûi tsîn ǁîn ûiga ra ǀkharaǀkhara? Hî-î. ǃNāsa khoen ge Elobmîs ǀapemāde sao tama hâ. Xawe Jehovab khoen ge Elobmîs xa ǀkhara ti ra tsâ. ǁKhā da a-i hoa-e da ge dītsâ tsî Elobmîs daoǁgaude sada ûigu ǃnâ ra sao-ai. Hoaǁae i ge supu tama Elobmîsa khomai tsî khomai da ra xūna sîsenǂuisa. ǀNî ǁaegu ai da ge Elobmîsa khomais ǁaeba hōs xa a ǃgombahe ǁkhā. Tsî ǀnî ǁaegu ai da ge ǃnoesase khomai ǁkhā tsî ǂâiǃgâs ǁae-e ūhâ tama. Tamas ka io da ge dī ǁkhā da a ǀkharaǀkharan hoan xa ra ǂguibahe. Mâ ǃgomsi-i ǀgui-e du ga ūhâ xawe da ge a sīǃnâ ǁkhā. Jehovab huib ǀkha da ge nēsa a dan ǁkhā. A da aiǃgû tsî mîs dī-ao kai. Elobmîsa da ǃnāsase khomai tsî sida ûigu ǃnâ ra sîsenǂui khami da ge ǃgâiaǂgaoba nî ūhâ.—Jak. 1:25. w24.09 7 ¶15-16

Jehovab ge ǁîb ǃanu gagab ǃnâ-ū ra ǁkhaeǂgao da ǁgai xū-i ga sida ǀkha ī o. Tsûaǂgao kai tsi ra ǃgomsi-ets ga ǃkharuǃnâ ǁaeb ai Jehovaba tsâts ra ǀgauba mîba re. ǁÎb ǀkhats ge hoaǁae ǃhoa ǁkhā. (Psa. 86:3; 88:1) Jehovab ai ǁîb ǃanu gagaba ǂgan ǀgara, ǁîb ge tātsē ǃnōxu tsi tide. ǁKhōǁkhōsa mâsibats hōǃâ tsâ hâ tsîts xū-e dīs ǀgaibats ūhâ tama khami ra tsâ? ǃAnu gagab ge ǁnā ǀgaiba a mā tsi ǁkhā îts aiǃgû tsî Jehovaba ǂgomǂgomsase ǃoaba. (Efe. 3:16) Jehovab ǃanu gagabats ga ǀgores ǃnâ ǂgan toas khaoǃgâts tae-e nî dī? Elob ǃanu gagaba ǃkhōǃoas ǀkha nî hui xūn ǃnâ ǃnāsase ǁhao. Nēs ge ǀhaode hâǃnâs tsî aoǁnâs tsîna ǃkhōǂgā hâ. Elobmîsa tsēs hoasa khomai, nēs ge nî hui tsi ǁîb ǂâiǀgaub xa ǂâiǃgâsa. (Fil. 4:​8, 9) Elobmîs khomaiǃâsats ra khomai khami ǃgaoǃgâ re ǁnān hîna ge ǃgomsina a hōǃân xa. Tsî Jehovab ge ǁîna hui ǀgaub xa ǂâiǃgâ. w24.10 9 ¶12-14

Jehovab tsî ǁîb ǀGôab khami da ge khoena ǀnam. (ǂKhm. 8:31) ǁNā khoen “ǃâubasenoǃnâ” tsî “Elob ose” ûihâna da ge kaise ra ǀkhom. (Efe. 2:12) ǁÎn ǃgomsin xa ǃaroma-e hâsen ge ǃgam ās ǃnân hâ khami a tsâ ǁkhā. Xawe da ge sida ǁîna tsurib ǀkha ra ǂgaeǂûi ǁnā āsa xu. Nēsa da ge Gaosib ǃgâiǂhôasa aoǁnâs ǃnâ-ū ra dī. ǁÎna da ǀnam tsî ra tsâba amaga da ge ra ǁgûtsâ ǃgâiǂhôasa ǁîn ǀkha ǀgoragusa. Nēs xan ga ǁnâu, o i ge ǃâubasensa mā nî tsî nî hui nî în nēsi ûib ǃnâ ǃgâiaǂgao. ǁNās tsîn ge ǁîna ǃēsa nî mā în Elob di ǀasa ǃhūbaib ǃnâ ǀamosib kōse “ama ûiba” ūhâ ǁkhā. (1Tim. 6:19) Khoena da ūba hâ ǀnammi ge ra ǂkhâǃnâ da i da ǁîna ǃkhâikhom eloxoresa ǃhūbaib di hîkākās xa. (Ese. 33:​7, 8) ǁÎna da ge tae-i kai ǁgâiǀkhāb ǁaeb ai nî īsa ra mîba ǂgao. ǂGurose i ge Babilons kaisa nî hîkākāhe. Tsî ǁnāpaxu hoaraga eloxoresa ǃhūbaib tsîna Armagedons tawa.—J.ǂHa. 16:​14, 16; 17:​16, 17; 19:​11, 19, 20. w24.05 16-17 ¶8-9

Paulub ge Xristeǁîna gere ǂkhâǃnâ în ǁaiba Eloba mā. ǁAixasiba da ga Eloba mā o da ge ra mā-am îb ǁîb ǁaeb ai ǂhanu-aisiba hā-ū. Johaneb ti ǀon hâ ǃgâsab ǃgâi tamase ge hâ-ūheb ge ra mî: “Ti ǁaiba ta ge gere ǃkhō-oa î ta tā ǂhanu tama xū-e dī. Nēs ge ge supu tama hâ i. Romeǁîn 12:19 ge ge hui te î ta Jehovab ai ǃâu ǀgara.” ǃGâiba da ge ra ǀama Jehovab ai da ga ǃâu o îb mâsiba ǃgâiǃgâi. ǁNāsa da ga dī o da ge ǂâiǂhânsensa xu ra hā ǃgomsina xu ra ǁkhaubasen, ǃgomsiga aitsama sîsenǂams xa ra ǃaromahe gā. Jehovab ge ra huida ǂgao. ǁÎb ge ra mî ‘ǂhanuoǃnâsiba tida xuba î ta tita ǂhanuǂhanu.’ Jehovab mîmâis “tita ge nî mādawa-am” ti hâsa da ga ūǃoa, o da ge ra ǁgau ǂgomǃgâ da rasa ǁîb ǂhanu ǁaeb ai nē mâsiba nî ǃgâiǃgâisa. w24.11 6 ¶14-15

Noxopa aiǃgû tsî da ge nî dītsâ î-i sorosi ǂhâsiga sada ûib ǃnâ tā ǂguro ǃkhaisa ūhâ. Apostel Paulub ge Xristeǁîna mîba xūna xu da ge nēsa a ǁkhāǁkhāsen ǁkhā. ǁÎb ge Israelǁaes ge ǃgaroǃhūb ǃnâ dī ǁgai xū-e ǃoa ge ǁnaeǁgau, Sinaiǃhommi ǀgūse ge ī xū-i tsîna ǃkhōǂgā hâse. ǁÎb ge Xristeǁîna ge ǃkhaikhom în tā “ǂkhababa tura . . . ǁîn gere tura khami.” (1Kor. 10:​6, 7, 11) Jehovab ge ǁnā Israelǁîna buruxa ǀgaub ǃnâ gere ǂûma xawen ge ge xūǃgunuxa ī. Tsîs ge ǁnāsa ǃgâi tama ǀamǂoasa ge ūhâ i. (Num. 11:​4-6, 31-34) ǃHuniǀurib ǀkha kuru-e hâ tsâuban gere ǃoaba ǁaeb ain ge Israelǁîna ge ǁgau ǂûs, ās tsî ǁkhoaxa ǁaeba ūhâs xan kaise a ǂhâǂhâsabahesa. (Eks. 32:​4-6) Paulub ge Jerusalems tsî Tempeli nî hîkākāhes aiǃâ ge ûi hâ i Israelǁîn aiǁgausa ǃkhâikhoms ase ge mā. Sada tsîn ge nē ǃhūbaib nî hîkākāhe ǁaeb aiǃâ ûi hâ tsî i ge kaise a ǂhâǂhâsa î da Paulub ǃkhâikhomsa ǃgaoǃgâ tsî tā Israelǁaesa ǁgae. w24.12 6 ¶13

Jehovab ge ‘ǂkhîxa Eloba’ tsîb ge ra ǂhâba î da sida tsîna ǂkhî. (1Tim. 1:11) ǁÎb ge ǂgui xūn ǀkha ǀkhae da hâ, î da ǃgâiaǂgaoba ûib ǃnâ ūhâ. (Jak. 1:17) Nē ǂgui ǀkhaegu ǀguib ge, ǃgammeba. Aob tsî taras tsîra ga ǃgamme, o ra ge ra mîmâi ǀnamgu tsîra ǃgôasiba nî ǁgaugusa. Aob tsî taras tsîn ga ǁîra ūbagu hâ ǀnamma ǀgaiǀgai, o ra ge hoa ra ǂkhîba nî ūhâ. Tsûtsûsasen ge ǂgui ǃgamme hâ khoena ǀnammi tsî ǃgôasib tsîna ǁgaugu tama hâ, ǃgammeb tsēs ain ge mîmâi khami. ǁNās xa ǃaromahe hâsen ge ǃgâiaǂgaoba ūhâ tama hâ. Aob ǁîb tarasa mâ ǀgaub ǃnâ nî hâ-ūsab Jehovaba ra ǃâubasen? Jehovab ge aoga ra ǁgui-ai, î gu ǁîgu tarade ǃgôasiba ǁgau. ǃGôasib ge khoena da ra hâ-ū ǀgauba ǃoa ra ǁnaeǁgau. ǁÎb tarasa ra ǃgôa aob ge ǃgâi tsî ǀnamxaǃnâ ǀgaub ǃnâ ra hâ-ūsi.—1Pet. 3:7. w25.01 8 ¶1-2; 9 ¶4-5

ǃGāsase î ge Hebre Xristeǁîna ǃoa hâ sîǂkhanisa ǁnā Xristeǁîna ge hui, hōǃgân nî ǁgâiǀāb ǃaroma. Apostel Paulub ge ǃgâsana ge ǀkhoma în Elobmîsa ǂōrisase ǁkhāǁkhāsen, ôaǃnâ tsî ǃgâise ǁnâuǃā. Nēsa dīs ge nî hui nî în ama tama ǁkhāǁkhāde mûǂan tsî ǁîna xu ǂgōsen. Nēs nî hui nî amaga îs ǁîn ǂgomsa tā ǂhapu. ǁÎnab ge ge ǂkhâǃnâ în ǁîn ǂgomsa ǀgaiǀgai, în Jesub tsî ǂgaeǂguira ǃgâsagu daoǁgausa ǃgâise sao. Tsîb ge Xristeǁîna ge hui în ǁîn mâǀgaisa omkhâi tsî ǃgâi mûǂûiba ǁîn ǃgomsin ǃoagu ūhâ, ǁîna ǃēsa ra māse în ǁîn ǀnamxaǃnâ ǁGûb xa ǁkhāǁkhāhe. Sida tsîn ge nē ǀapemās Elobmîsa xu hâsa nî sîsenū. ǁNāsa da ga dī, o da ge ǂgomǂgomsase nî mâǀgai ǀams kōse.—Heb. 3:14. w24.09 13 ¶17, 19

Elobmîs ǃoagub ge xoremariba ra matarehe î-i ǂkhîbagusa hau. Jehovab mûǂuiba xus ge nēsa ǂoaǃnâhe ge xū-e ra hau-oa. Mâ ǀgaub ǃnâ? ǂÂis ǃnâ ūhâ Adammi tsî Eva hâra ge ǁîra ǀoasa kurusa ūhâ ûiba ge ǂoaǃnâ tsî ǃaruǀî ǀamose ge ûi ǁoa ī. ǁNā-amagas ge xoremarib ǁguibasa ǂoaǃnâhe ge xū-i ǀkha nî ǀguitikō. (1Tim. 2:6) ǁNās ge kai ǀoa hâ khoe-i xa ǀgui nî matarehe, (1) ǀoasa kurusa ūhâ, (2) ǀamosib kōse ǃhūbaib ai ûis ǁkhāsiba ūhâ, (3) tsî māsenxase ǁî-i ûiba sida ǃgao ǁguibas ase nî mā-e. ǃNona ǃaromade ǃgaoǃgâ re tae-i ǃaromab ge Jesuba xoremarib ǁguibasa matare ǁkhā i ǃkhaisa. (1) ǁÎb ge ǀoasa kurusa ge ūhâ i tsî “ǁore-i xare-e” ge dī tama hâ i. (1Pet. 2:22) (2) ǁNās xa ǃaromahe hâseb ge ǀamose ǃhūbaib ai ûis ǁkhāsiba ge ūhâ i. (3) ǁÎb ge māsenxase ǁō tsî ǁnā ûiba sada ǃgao ge mā.—Heb. 10:​9, 10. w25.02 4-5 ¶11-12

ǂGomǃgâ re Jehovab kaise a ǀnam tsi tsî ra ǂhâbasa îts ǁîb omaris ǃâ kai. Nēs ge ama matikō ǃgomsinats ga hōǃâ xawe îts ǁāǁnâhe. Jesub ge ǁîb ǁkhāǁkhāsabega ge mîba: “Amase ta ra mîba go, mostardǃkhomro-i khami ǂkhari ǂgomsa go ga ūhâ tsî nē ǃhommi ǃoa ‘nēpaxu nauǀî gon’ ti mî ob nî gonbēsa. Elob ǃnâts ga ǂgom, ots ge xū-i hoa-e a dī ǁkhā.” (Mat. 17:20) ǁNān Jesub ge mî mîde ge ǁnâun ge ǁîb ǀkha ǀoro kurigu ǀgui ge hâ i. ǁNās ǀkha i ǁîn ǂgomsa ǃaruǀî nî kai ge īs ge. Jesub ge ǁîna ǂgomǃgâsiba ge mā ǀgaisa ǂgomsan ga ūhâ ob Jehovaba ǁîna nî huisa, în ǃgomse ra mûsen ǃgomsina sîsenǂam. Jehovab ge ǁnāsa dīs ǀkha nî hui tsi. Sa ûib ǃnâ i ga xū-e ǁkhae tsi ǁāǁnâhesa, o nēsa sîsenǂams ǃoagu ǃkhaese xū-e dī. Jehovab ai māǁnâsen tsî ǁāǁnâ kaisen. Nēb ge kaise ǃgâi mîǁguib dīts nîba. w25.03 7 ¶18-20

Sida tsîn ge ǃgomsina nî tanihō ǂâi-oa da ga o ûitsama Elob ra hui da ǂgaosa. Sida ǂgomǃgâsiba da ge a ǀgaiǀgai ǁkhā Jehovab nî hui dasa ǃkharu ge ǁaeb ǃnâb ge hui da ǀgauba ǂâiǃgâs ǃnâ-ū. (Jes. 37:​17, 33-37) Jehovab nētsē sida ǃgâsana ra ǂkhâǃnâ tsî ra hui ǀgaub xa jw.orgs ai khomai re. Jehovab ge sado hui ǀgaub xas tsîna ǂâiǃgâ re. Tā ǂâiǂhansen re ǀnîsi du ga kai ǀgaub Jehovab ge sâu du ba ǂâihō tama io. Tae-i ǃaroma? Ī-a ǃkhais ge Jehovab ge ǂgui xūna sadu ûib ǃnâ ge dī. ǁÎb ge ge ǂgae du î du ǁîb ǀhō kai. (Jhn. 6:44) Tae-i ǃaroma du ǁîb ai huiba ǂgan tama î du ǂâihō, ǁîb ge mati sadu ǀgorede ǁnâu-am tsî ǂkhâǃnâ ǀgausa. Tsî ǂhanu ǁaeb ai huiba mā dusa î du ǃgom ǁaegu ǃnâ mâ ǃkharu. ǁNāti ī xūn xa ǂâiǃgâs ge sadu ǂgomǃgâsib Jehovab aiǃgû tsî sado nî huisa ra ǀgaiǀgai. w24.06 21 ¶8

ǁKhā da an hoana da ge nî dī, î da tā Jehovaba ǂkhîoǃnâ kai. Xawe ǁoreb ǃnâ ǃnaehâ khoeda ase i ge a supu ǃâitsâ-e da ga o tsū xū-e dīsa. (Rom. 7:​21-23) ǃÂubasen tama hâse da ge ǃâitsâhe tsî ǃkhaese tsū xū-e a dī ǁkhā. ǂGomǂgomsase da ga Jehovab tsî ǁîb ǀGôab ǃoagu hâ ǀgara, o i ge a ǂhâǂhâsa Jesub ǁnamasa ǁnâuǀnamsa. Mî rasa, ǂkhaikari hâ î tā ǃâitsâb ǃnâ ǁnā. Hoa da ge nî ǃâitsâhe tsî tsū xū-e a dī ǁkhā. Hoa da ge ǃkharagagu ǂkhabusasiga ūhâ. ǃGōsasen ge ǀnî xūna a ǃâitsâ da ǁkhā î da tsū xū-e dī. Aiǁgause, i ge ǀgui khoe-e ǀais di ǃâitsâba ra hōǃâ, ǀnî khoe-i ge ǃanuoǃnâ xun ǀkha ra ǃâitsâhe, ǁnān ge skomolsens tsî ǁgauoǃnâ ǁgoe-ūgub vidiogu tsî ai-īsigu kōs tsîna. Tsî ǀnîn ge sao ra xūn ǀkha ǃgomsiba ūhâ, ǃhaese ǁaixas, ǀgapiǂâixasib tsî khoena ǃaos tsîna. w24.07 14 ¶3; 15

Matib ga ǀnîsi aoba tsâ hâ ǀhaohâb ǃûi-aogu xab ga mā-amhe tama hâ o, ǀhaohâba ǃoa oaǀkhīsa ǃhobasen i hâs khaoǃgâ? ǁÎb ge “ǃnāǂamsa ǃoab xa hapuhe” tsî Jehovabab ǁkhapa ǃoaba tide khami ga tsâ hâ. Tsîb Jehovaba tātsē ǁîba ǀûba tidesa. Tsî î ǀkharaǀkharasens ǃaroma-e a ǀkhaisa. Tae-i tsîna a īǁkhā ǃgâsan ga ǃhobasen hâ ǃgâsaba ǀûba ǂgao tama io? Nēs ge ǁîn ǀhōsagusis Jehovab ǀkhan ūhâsa a tsûtsû ǁkhā. Tae-i ǃaroma? ǁÎn Jehovab ǃhobasen ra na ra ǁgau ǀûbaǀnamxasiba ǁgae tama i tsîn ǁGâuab ǀkhomoǃnâ tsî ǃgariǂgaoxaba ra ǁgae amaga. Tsîn ge aoba nî ǂkhabuǂâi kai Jehovaba ǃoabasa xu.—2Kor. 2:​10, 11; Efe. 4:27. w24.08 17 ¶7, 10-11

Jesub ge ǀnî khoega ge ǁgaumâi î gu ǀhaohâba ǀnî ǀgaugu ǃnâ hui. ǁÎb daoǁgaus ǃnāga i ge ǀhaohâb ǃûi-aoga Jerusalems ǃnâ Paulub, Barnabasi tsî nau gu tsîna ǃnarimâra mûǂam-aogu ase gere sîǂui. (ǃNǃkh. 11:22) Tae-i ǃaroma? ǁKhā ǃaromas ǀhaohâb hui-aogu tsî ǀhaohâb ǃûi-aogu gere ǁgaumâihes î gu ǀhaohâga ǀgaiǀgai. (ǃNǃkh. 15:​40, 41) ǃNarimâra mûǂam-aogu ge kaise ra ǃnarimâ. ǀNî gu ge ǂgui īrga ra ǃnari î gu ǀhaohâga sī sari. Mâ wekheb hoaba i ge ǃnarimâra mûǂam-aoba ǃhoade mā, ǃgâsana omdi ai sari, aimâba-aon ǀhaosa dī, ǀhaohâb ǃûi-aogu ǀkha ǀhaosa ūhâ tsî aoǁnâ sîsen-i ǀhaode ra dī. ǁÎb ge ǃhoadi, ǀkharib kai ǀhaodi tsî ǂkharis kai ǀhaodi tsîna ra aiǂhumi. ǁÎb ge aimâba-aon skola ǁkhāǁkhā, ǁîb ǂkharis ǃnâ hâ aimâba-aon ǀkha ǀō-aisa ǀhaosa ūhâ tsî ǁnān ǂam-ai ǀnî hâ ǂhâǂhâsa xūn tsîna ra kōǃgâ ǁnâub berosa xub ra hōna. w24.10 21 ¶12-13

Jehovab ge kēbo-aob Jeremiaba nētsēs mîde ge mîba. Paulub ge ǁkhā mîde gere sîsenū mîb ge o: ‘ǁÎn di ǁoren xa ǃaruǀî ǂâi tide xui-ao.’ (Heb. 8:12) ǁNāsa amabes ǃnâ tae-e ra ǂâibasen? Elobmîs ǃnâ i ge “ǂâihō” ti hâ mîsa, khoe-i ǃkharuge ǁaegu ǃnâ ge ī xū-i xa ra ǂâi-e ǃoa ǀgui ǁnaeǁgau tama. Xawe i ge xū-e ra dī khoe-e ǃoas tsîna a ǁnaeǁgau ǁkhā. Eloxoresa khoeb Jesub xōǀkhā ge ǃgâuhe hâ îb ge sao rase ge ǂgan: “ǂÂis ǃnâ ūhâ te re Jesutse, sa gaosib ǃnâts ga sīo.” (Luk. 23:​42, 43) ǁÎb ge Jesuba ge ǂgan tama hâ i, îb ǁîb xa ǁnā ǁaeb ai ǂâi. Jesub ǃereams ge gere ǁgau ǁnā khoebab khâisa nî mā ǃkhaisa. ǁNā-amagab ga Jehovaba mî o sada di ǁorenab ge ǂâihō tide ti, oi ge ra ǂâibasen sadab ǀûba tsî xū-e dī tidesa îb ǁkhara da sada di ǁoren ǃaroma hānîǁaeb ǃnâ. w25.02 10-11 ¶14-15

ǁNâuǃāxasib ge Jehovab ǀgaub, ǁîb ǂâibasens, taenab ǀnam tamas ka io ǃhui hâs di ǂansa xu hâ. Dîsen re, ‘Jehovaba ǂans ǃnâ-ū ta mâ mîǁguiga a dī ǁkhā, ǁîba a ǂkhîǂkhî ǁkhā ga?’ (Efe. 5:17) Jehovaba da ga ǂkhîǂkhî ǂgao, o da ge ǀnî ǁaegu ai ǂan da a khoena a tsûtsû ǁkhā. Aiǁgause, ǀnî ǁgûn ge ǁîn ǀgôasa a mîba ǁkhā îs mari-e ūhâ ǃgâsaba ǃgamme, ǁîb gagasise ǂkhabusa xawe. Ama as ge ǁgûn asen ǂhâba hâsa îs ǁîn ǀgôasa ǃgâi ûiba ūhâ. Xawes ge ǁîsa a dîsen ǁkhā: “Nē khoeba nî huite î ta ǀgaisa ǀhōsagusisa Jehovab ǀkha ūhâ ǀgara?” Jehovaba nēs xa mati ra tsâ? ǃEreamsa da ge Mateub 6:33 ǃnâ ra hō. Jesub ge Xristeǁîna ge mîba în ‘ǂgurose Elob Gaosiba ôa.’ Ama as ge sida ǁgûn tsî ǀhûhâsib ǃnâ hâ khoen tsîna da ǃgôasiba ra ǁgausa xawe a ǂhâǂhâsas ge Jehovab ǂgaoba ǃgâiaǂgao kaisa. w25.01 17 ¶9-10

ǂGui khoen ge nētsē sida sîsen-e ra mâǃoa. ǁNā-amaga da ge Jehovab huiba ǂhâ hâ, î da ǃgâiǂhôasa khoena aoǁnâba. (J.ǂHa. 12:17) Tae-i ǃaromats ǂgomǃgâ ǁkhā Jehovab nî hui tsi sa? Jesub ge Johaneb 17ǁî danaǃâs ǃnâ a mî ǀgoresa ǃgaoǃgâ re. Jesub ge Jehovaba ge ǂgan îb ǁîb apostelga kōǃgâ. Jehovab ge ǁnā ǀgoresa ge ǁnâu-am. ǃNaeǃkhaidi ǂkhanis ge ra ǁgau matib ge apostelga hui ǀgauba î gu ôasasib ǀkha aoǁnâ, ǃgôaǃgonhe gu gere xawe. ǁÎb ǀgores ǃnâb ge Jesuba Jehovaba ge ǂgan îb apostelgu ra aoǁnâ ǃgâiǂhôas ǃnâ ǂgomsa ra ǁgaun tsîna kōǃgâ. Nēs ge sats tsîna ǃkhōǂgā hâ. Jehovab ge nētsēs kōse Jesub ǀgoresa ra ǁnâu-am. Tsîb ge apostelgab ge huis ǁkhās khami satsa nî hui. (Jhn. 17:​11, 15, 20) Nē ǃhūbaib ǀams ra ǀgū khami i ge ǀnîsi a ǃgomba da ǁkhā aiǃgû tsî ǃgâiǂhôasa aoǁnâsa. Xawe Jesub ge ǂgomǃgâsiba ra mā da huihe da nîsa î da ôasasib ǀkha nē sîsen-e dī.—Luk. 21:​12-15. w25.03 18 ¶13-14

Elob khoen ge ra “ǃgâiaǂgao” ǁîb ra dība nî xūnan ra ǃgôaǃgâ amaga. ǀGaisa ǂgomsa ra omkhâi amab, ǁkhoaǂgaosiba ra mā da mîmâidi Elobmîs ǃnâ hâdi tsî ǁaposa ǃâubasens hānîǁaeb ǃaroma da ūhâs, Jesub xoremarib ai ǃgaoǃgaosas ge ‘ǃgâi mâsib ǂgaob’ diba ra mā da. Nē xūn xa ǃhoas ge ama ǂkhîba ra mā da. (Psa. 34:8; 133:1-3) ǀNammi tsî ǀguiǃnâxasib Jehovab khoen ǁaegu hâb ge ǀgam mâǂoa ra ǀgaukha gagasi paradais di kha. Nē “ǀguiǃnâxasib” ge ra hui da, î da ǂâi ǁkhā matib ûiba ǀasa ǃhūbaib ǃnâ nî ī ǀgausa. ǁNā ǁaeb ain ge Jehovab ǃoaba-aona nētsēs xan ra hōǃâ ǀnammi tsî ǀguiǃnâxasib xa ǃnāsa-e nî hōǃâ. (Kol. 3:14) Khoe-i ga ama ǂkhîba hōǃâ tsî ūn hân ǀkha ǂâu ǂgao, on ge sida gagasi paradais ǃnâ nî hâ. Mati ǀguin ga khoena Jehovab ǃoaba-aon xa ǂâi, xawen ge ǃgôasib tsî ǃgâi ǀons tsîna ǁîba ra ǃoaban hoan ǀkha ūhâ.—Jes. 65:15. w24.04 21 ¶7-8

Mati da hoase ǃgamme ǂgao ra Xristeǁîna ǂkhâǃnâ tsî a hui ǁkhā? ǀGui ǀgaub ge mî ta ra xūna da ge ǂōrisase nî ǃgaoǃgâ. (Efe. 4:29) Dîsen ǁkhā da ge a: ‘ǁNān ǃgamme ǂgao rana ta ra ǂoeǂoe? ǃGamme tama ǃgâsab tsî ǃgâsas ra ǃhoa ǃkhaisa ta ga mû, o ta ǁîra ra dî-amgu ti ra ǂâi?’ (1Tim. 5:13) ǁNās ǂam-ai da ge tā ǃgamme tama Xristeǁîna nî ǂâi kai xū-i ǁîn ǀkha a tsūsa, ǃgamme taman hâ ǃkhais ǃaroma. Kaise i ge nî ǃgâi î da ǃēde ôa tsî ǃgamme tama Xristeǁîna koa. Mati i nî hā ǀnîsi da ga ǂâi o ǀnî ǃgâsab tsî ǃgâsas tsîn nî ǃgâi ǃgamme khoe-aogu kaisa? Elobmîs ge ra mîba da, î da nau khoen tsâsigu tsîna ǂâis ǃnâ ūhâ. (Rom. 15:2) ǂGui ǃgamme tama khoen ge ǂgao tama, în ǃgamme tama khoen ai mâi-aiǃâ-e ǀnîsin ǂangu tsî nî ǃgammese. ǁNāsan ga ǂgao tama i, o da ge ǁîn mîǁguiga ǃgôasiba nî ǁgau. (2Tes. 3:11) ǀNîn ge naun ai mâi-aiǃâhes di huiba a ǃgôaǃgâ ǁkhā, xawe da ge ǂganhe tama da hâ hîna nēsa dī tide.—ǂKhm. 3:27. w24.05 24-25 ¶14-15

ǃÂubasen tama da hâ ǃgomsin sida ûiga a dawa ǁkhā ǃhūbaib ǃnâ da ge ûi hâ. Kaise da ge ra gangan, Jehova Elob ai da huib ǃaroma ra ǂgomaiǂnûi amaga. ǁÎb ǂkhâǃnâsa da ga hōǃâ, o i ge ǁnāsa ra hōhōǃnâ da Jehovab amase a “ûitsâma” ǃkhaisa. (Psa. 18:46) ǁNāsab mî toa hâs khaoǃgâb ge Davida, Eloba ǃoa ‘ti ǃgareǀuib’ ti ge ǂgai. Tae-i ǃaromab ge Jehovaba ǃgareǀuib ǀkha ǀgopeǀnō? Elobmîs ge Jehovaba “ǃgareǀuib” ǀkha ra ǀgopeǀnō tsî ǁnās ǀkha ra hui da î da ǀnî ǀgaugu ǁîb ūhâga ǁnâuǃā. ǃNāsa ǁaegu ai i ge Jehovab ǃoaba-aona Eloban ga ǁîb buruxa ǀgaugu ǃaroma Elobmîs ǃnâ koa, o ǁîba ǀuib ase ra ǁguiǃā. Deuteronomium 32:4 ge ǂguroǃnās ase Jehovaba “ǃGareǀuib” ase ra ǁguiǃā. ǀGores ǃnâs ge Hanasa ge mî, “khoe-i xare-i ge . . . ǃgareǀuise ī tama, sida Elob khami.” (1Sam. 2:2) Habakuki ge Jehovaba ti “ǃGareǀuitse” ti ge ǂgai. (Hab. 1:12) Psalmdi 73 xoa-aob ge Eloba “ti ǂgaob di ǃgareǀui” ti ge ǂgai. (Psa. 73:26) Jehovab tsîn ge aitsâma ǃgareǀuib ase ra ǁguiǃāsen.—Jes. 44:8. w24.06 26 ¶1, 3

Jehovaba gere ǂkhîǂkhî gaogu ge ǁîba ǂgaob hoab ǀkha gere ǃoaba. Elobmîs ge Josiab xa nēti ra mî: ‘ǁÎb khami ī gao-aob ge ǁîb aiǃâ ge hâ tama hâ i, ǁîb di hoaraga ǂgaob, ǂâis tsî ǀgaib ǀkha ǃKhūba gere ǃoababa.’ (2Gao. 23:25) O Salomob hîna ge ega ǁgai xūna gere dīb? ǁÎb ge Jehovaba ǂgomǂgomsase ge ǃoaba tama hâ i. (1Gao. 11:4) Tsî ǀnî hâ gao-aob ǂgomǂgomsa tama ge hâ îb Abiaba, Elobmîs ge ǁîb xa ra mî, ǁîb ge “ǂgaob hoab ǀkha ǁîb di Eloba ge ǃoaba tama hâ i.”(1Gao. 15:3) Jehovaba ǂgaob hoab ǀkha ǃoabasa tae-e ra ǂâibasen? Jehovaba ǂgaob hoab ǀkha ra ǃoaba khoe-i ge ǁîba i ǃgam ǀnamma ūba hâ tsî ra ǃgôa amaga ra ǃoaba. ǁÎ-i ge Jehovaba ǁnā ǃgam ǀnammi tsî ǃgôasib tsîna ra ūhâba, ǁî-i ûib hoa ǃnâ. w24.07 21 ¶4-5

ǀKhara ǀgaub ge noxopa hâ Jehovab matib sada ǁorena ra ǀûbasa ra ǁguiǃāsa. ǁÎb ge ra ǁguiǃā: “ǃÂus khami ta ge sadu dīsāde ge ǃgombē tsî sadu ǁorena tsamaros khami.” (Jes. 44:22) Jehovab ga ǀûba o i ge ǁîb kai ǃâusa sîsenū tsî sada dīsāde ra ǁkhae khami ī în ǁorena tā mûsen. Nē aiǁgausa tae-e ra ǁkhāǁkhā da? Jehovab ga sada ǁorena ǀûba, o da ge tā nî ǀhapitsâsen sada di ǁoren ǃaroma. Jesub Xristub ǀaob ǃnâ-ū i ge sada surudena hoase ge ǀariǂuihe. Jehovab ga ǁnā ǁorena ǀûba, o i ge ǁnā ǁorena da go dī tama hâ i khami ī. Sada ǁorena xu da ga ǃhobasen, o i ge ra ǁgau Jehovab go ǀûba dasa. Jehovab ga sada ǁorena ǀûba, o da ge ǂgomǃgâsiba ūhâ ǁîb nî ǁkhapa sada ǀhōsa kaisa. Nēs ge nî hui da î da tā kaise ǀhapitsâsen. w25.02 10 ¶11-14

Jehovab ge ra ǂhâba i gu nē komites ai ra ǃoaba ǃgâsaga ǀhaohâba ǃanuse ūhâ. (1Kor. 5:7) Xawe gu ge ra dītsâ nē khoe-e ǃhobasens kōse sī-ūsa. ǁNā khoe-e gu ra hui khami gu ge ra ǃâubasen ǀkharaǀkharana i nî dīsa. Tae-i ǃaroma? ǁÎgu ge Jehovaba ra ǁgae ǂgao, “tsâbaǁhaos tsî ǀkhomxasib xa ǀoa” hâba. (Jak. 5:11) ǃGaoǃgâ re matib ge Apostel Johaneba ǁîb ǃgâsana ǀnamxaǃnâse a hâ-ū ǀgausa. “Ti ǂkhari ǀgôarodo, nēna ta ge sado ra xoaba, ǁore du tidese; tsî i ga khoe-e ǁore, o da ge khoeb hîa ǁGûb tawa ra ǂnoaba daba ūhâ; ǁîb ge Jesub Xristub, ǂhanu-aiba.” (1Jhn. 2:1) Tsûtsûsase i ge Xristeǁî-e ǀnî ǁaegu ai ǃhobasensa ǂgao tama hâ. ǁNāti i ga ī, oi ge ǀhaohâba xū nî ūǂuihe. w24.08 25 ¶19-20

Jehovabats ga ǀnaits gere ǃoaba bi khami ǃoaba tama ī xawe ǂâis ǃnâ ūhâ, ǁîb aiǃâts ǀō-aisa ǃkhaisa. Tā dīts ra xūna nau khoen a dī ǁkhān ǀkha ǀgopeǀnō. Tae-i ǃaroma? Jehovab ge ǀgopeǀnō tama hâ. (Gal. 6:4) Aiǁgause, Marias ge kai marisa ra ǂgan hamham oli-e Jesuba ge mā. (Jhn. 12:​3-5) Xawes ge ǀgâsa ǃoatarasa, ǀgam ǁau mariro ra ge aoǂgā. (Luk. 21:​1-4) Jesub ge nē ǀgam khoera ge ǀgopeǀnō tama hâ i, ǁîb ge mûs ge hoa ra ge ǂgomsa gere ǁgau. Jesub ge ǀoasase ǁîb ǁGûba ge ǁgae, ǁnā-amagats ge ǂgomǃgâsiba ūhâ ǁkhā Jehovab ra mûsa matikōsets ǁîb ǃnâ ǂgomsa ǁgau tsî a ǀnambisa. ǂKhariro i ga xawes ge ǁnāsa ǁîba a ǀō-aisaba. Hoa da ge ǀnî ǁaegu ai ra îganǀgē. Xawe Elobmîs ge nî hui da, î da ǁnāsa sîsenǂam ǁkhā. Jehovab ge amase ǃgâise a ǂan tsi. Jehovab ge kaise ra ǃgôaǃgâ ǁîbats ge ǂgurose sa ûib ǃnâ mâi o tsîb ge nî madawa-am tsi. Jehovab ge ǁîb ǂgomǂgomsa ǃoaba-aon hoana ǀnam tsî ǁîn ǀkha ǁae hâ. w24.10 25 ¶3; 29 ¶17-18