Augustub

ǀGore da ge ra în ǃnāsa khoena mîba nî da ra xūna ǃgâ tsî nēsi sida ǀkha Jehovaba ǀguiba ǃoaba. Tae-e ǁnān sida ǃkhâikhomsa ǃgâ taman ǀkha nî ī? ǀNîsi Jehovab ǂâis ge în ǁnān ǁîb ǃnâ ǂgomsa ra ǁgau tsoatsoana sâuhe, Babilons kais di hîkākāhesan ra mû ǁaeb ai. ǁNās ǀkha i ge kaise a ǂhâǂhâsa î da nēsi ǁîna nē ǃkhâikhoms xa mîba. Nēsi da ǁîna ra mîba xūn ge ǂâi-oan nî xū-e ra mā nî, ǁnā ǁaeb ga hā o. (Ese. 33:33.) Īǁkhā i ge a nē ǃkhâikhoms sida xun ge ǁnâus xan ǂâiǃgâ tsîn nî ǂkhâǃnâhesa, Jehovaba sida ǀkha ǀguiba ǃoabasa ǃonkhao-i nîs aiǃâ. Filipis ǃnâ ge ǃkhōsis ǃnâ ǂnôa-i khoeb hîna ge “ǁkhōǁkhōsa ǃhūǂgubi-i” khaoǃgâ Jehovaba ǃoaba tsoatsoab, khamin ge ǀnîna ǀnîsi Babilons kais di hîkākāhesan ga mûǂan, o Jehovaba nî ǃoaba tsoatsoa.—ǃNǃkh. 16:​25-34. w24.05 17 ¶9-10

Apostel Paulub ge Hebre Xristeǁîna a sîba sîǂkhanisa xus tsîna da ge ǀnîhâ ǂhâǂhâsa xū-e ra ǁkhāǁkhāsen. ǀNîn ge aiǃgû tsî Jehovab ǀkhan ge omkhâi ǀhōsagusisa ge ǀgaiǀgai tama hâ i. ǁÎn ge ǁkhapa “dai-e ǂhâba tsî ǀgaisa” ǂû-e ge ǂgao tama hâ i. (Heb. 5:12) ǁÎn ge Jehovab ge ǀhaohâb ǃnâ-ū gere ǁkhāǁkhā nî ǀasa xūna ge ūǃoa tama hâ i. (ǂKhm. 4:18) Aiǁgause ǂgui Jodeǁîn ge noxoba aiǃgû tsî Moseb ǂhanuba gere sao, Jesub ge ǁîb ǁguibas ǃnâ-ū nēsa ǀam kai xawe. (Tit. 1:10) Nē sîǂkhanis tsîn ge Xristeǁîna ge hui în mûǂan Jehovab, Jesub ge ǂnûiǂgā ǀgaub ǃnâ-ū ǃoabas a ǃgâisa. Nēs tsîn ge ǁîna ge hui în aiǃgû tsî aoǁnâ.—Heb. 10:​19-23. w24.04 6 ¶15

Adammi tsî Evas tsîn ge Jehovaba ǁnâuǀnamoǃnâ o i ge biliundi khoena ge ǁō. Nē khoena tae ǃaubasen-e ūhâ? ǀOro ǃgôab ǂhauhesan (144 000) Xristub di sao-aon ge khâisa nî hō tsî ǁō tidese ǀhommi ǃnâ sī nî hâ. (J.ǂHa. 14:1) ǂGui ǃgôab ǂgomǂgomsa-aogu tsî taradi Jehovaba ge ǀnam īn ge ‘ǂhanu-ain di khâisa’ nî hō, ǁîn ge ǀamosib kōse nî ûi ǃhūbaib ai. Tsî ǂhanu-aise nî hâ Xristub di ǀoadisi kurigu di ǂgaeǂguis ǃnaga tsî ǀuniga ǃâitsâs ǃnâs tsîna. (Dan. 12:13; Heb. 12:1) ǁNā ǁaeb ai i ge “ǂhanuoǃnân” hîna Jehovaba noxopa ǃoaba tsâ taman tsî ‘ǁgai xūna’ gere dīn tsîna ǀkharasen tsî ǂgomǂgomsase Jehova Eloba nî ǃoaba. (Jhn. 5:29; Luk. 23:​42, 43) Xawen ge ǀnî khoena kaise ge eloxoresa i tsîb ge Jehovaba ge mîǁgui ǁînab tātsē khâisa mā tidesa.—Luk. 12:​4, 5. w24.05 2 ¶3; 5 ¶15; 6 ¶17

Khoe-i ga Jehovab xa ūǃoahe ǂgao, oi ge “ǂgaob â-i ǀkha amaba” nî ǃhoa. (Psa. 15:2) Nēs ge ǂhumi tama is xa ǃnāsa-e ǃkhōǂgā hâ. Jehovab ge ra ǂhâba î da, mî tsî da ra dī xūn ǃnâ ǂhauǃnâsiba ǁgau. (Heb. 13:18) Nēs ge a ǂhâǂhâsa, “ǀhôagao khoeb ge ǃKhūb mûǁae a ui-uisa, xawe ǂhauǃnâ khoebab ge ra ǂgomǃgâ.” (ǂKhm. 3:32) Nān ‘amaba ǂgaob’ ǃnâ ra ǃhoan ge, khoen xan ra mûhe ǁaeb ai ǀgui ǁnâuǀnam tama. Xawe ǀgurin ga hâ ǁaeb ais tsîna ra ǁnauǀnam.ǁÎn ge ǀhôagaose tanisen tama. ǀHôagao khoe-i ge Jehovab ǁgaragu hoaǁae ǂhanu tama ti a ǂâi tsoatsoa ǁkhā. (Jak. 1:​5-8) ǁÎ-i ge ǂhâǂhâsa tama ti i ra ǂâi xūn ǃnâ Jehovaba a ǁnauǀnamoǃnâ tsoatsoa ǁkhā. ǁNâuǀnam tama i hâ amaga i tsū xū-e ī tamasa i ga mû, o i ge ǁnās ǂam-ai aiǃgû tsî ǁgai xūna dī tsoatsoa ǁkhā. ǁÎ-i ge Eloba i ra ǃoaba ti a tsâ ǁkhā, xaweb ge Jehovaba ǁî-i ǃoabasa ūǃoa tide. (Aoǁn. 8:11) Sada ge hoa xūn ǃnâ ra ǂhauǃnâ ǂgao. w24.06 10 ¶7-8

Jehovab khoen ge Elobmîs ǃnâ hâ amaba ǀnam. Sida ǂgoms ge ǁnā amab ai a ǃgaoǃgaosa. (Rom. 10:17) ǂGomǃgâ da ge ra Xristeǁî ǀhaohâb ge Jehovab xa ǂnubihesa tsî ‘amab di ǂkhâǃnâ tsî ǃgaoǃgaosa.’ (1Tim. 3:15) ǁGâuab ge ra ǂhâba î da Elobmîs tsî ǀapeǂhumîsa xu da ra hō daoǁgaude ǂgomǃgâ ǀû. (Efe. 4:14) ǀGūǁaeb ge ǁGâuaba ǀgaisa ama tama ǂhûmi ǂhôana nî sîsenū i di hoa ǁaede Jehovaba mâǃoa. (J.ǂHa. 16:​13, 14) ǃÂubasen ǁkhā da ge a ǁGâuab ǀgaisase nî dītsâsa îb Jehovab khoena ǂgaeǂhapu. (J.ǂHa. 12:9) ǁNā-amaga i ge ǂhâǂhâsa î da ǁkhāǁkhāsen ǀgorasa mûsa amab tsî ǂhûmi xūn ǁaegu î da amaba ǁnâuǀnam. (Rom. 6:17; 1Pet. 1:22) Nēs ge a ǂhâǂhâsa kai ǁgâiǀāba da ga ûiǃkharu ǂgao o. w24.07 8 ¶1-3

Jehovab ge Israelǁaesa ǂhanuga mā, on ge ge mîmâi ǁnā ǂhanugan nî ǁnâuǀnamsa. Jehovab tsîn ge ge mîmâi ǁnā ǂhanugan ga ǁnâuǀnam ob nî ǁkhauba tsî ǀkhae nîsa. Xawen ga ǁîb ǂhanuga ǁnâuǀnamoǃnâ tamas ka ion ga ǁhûibasen nau eloga ǃoabasa, ob ge ǁîna ǁkhauba tide. Xawe nēs ge ge ǂâibasen tama hâ i Jehovab ge ǁnāxuǃgâ nî ti. ǁÎn Elob Jehovaba ǃoan ge ga “oahā” hâ tsîn ge ǁîb domma ga ǃgâ hâ. (Deu. 30:​1-3, 17-20) ǀNî mîdi ǃnân ge ga ǃhobasen hâ. ǁNātin ga dī hâ ob ge Jehovaba ǁîn ǀgūse hâ tsî ǁkhawa ga ǀkhae nî hâ. Jehovab ǁhûiǂûisa ǁaes ge ǃnākorobe ǁîba gere mâǃoa. ǁNās xa ǃaroma-e hâsen ge ǃgomma gere tsâ. Jehovab ge gere hui ni în ǁkhawa ǁîba ǃoaba. Jehovab ge ǃnākorobe ǁîb kēbo-aoga gere sî, î gu khoena hui în ǃhobasen tsî ǁkhawa ǁîba ǁîn ǂgaob hoab ǀkha ǃoaba.—2Gao. 17:​13, 14. w24.08 9 ¶4-5

Hebre Xristeǁîn, Jerusalems tsî Judeab ǃnâ gere hân ge ǂgui ǃgomsina gere hōǃâ. Xristeǁî ǀhaohâb ge tsoatsoas khaoǃgân ge Xristeǁîna ǀgaisase gere ǁgâiǀāhe. Xristub saosaben ge 20 kuriga ǃkharu tsî ǃâtsūǀkhāb tsî ǀâsib tsîna gere hōǃâ. (ǃNǃkh. 11:​27-30) Xristeǁîn ge 61ǁî kurib ǃnâ ge ǁgâiǀāhe tama hâ i, hānîǁaeb ǃnân nî ǁgâiǀāhe khami. ǁNā ǁaeb ǃnân ge sîǂkhanisa Apostel Pauluba xu ge hō, ǀgūǁae nî ī xūn ǃaroma gere aiǂhuminisa. Hebreǁî sîǂkhanis ge ǃgâi ǁaeb ai ge sîhe, Xristeǁîn gere hōǃâ ǂkhîb hâhâ tide amaga. Paulub ge ǁnā Xristeǁîna ǃgâi ǀapemāsa ge mā, ǁîna nî huisa în hā nî kai ǁgâiǀāba mâiǀgai. w24.09 8 ¶1-2

ǃGomsina da ga hoǃâ ob Jehovaba amase ra ǁgau sida ǃgâsan ǃnâ-ūb ǀnamda sa. ǁÎn ge sida sari tsî tsâ da ra ǀgauba da ra ǁgâiǂuisen ǁaeb ai ra ǃgâ. ǃGâsan ge Elobmîs xoasa khomai tamas ka io sida ǀkha a ǀgore ǁkhā. (Rom. 15:4) ǀNî ǁaeb ai i ge ǃgâsa-e Jehovab ǂâiǀgaub xa a ǂâiǂâi da ǁkhā. Tsîs ge nēsa a hui da ǁkhā ǃnomsase mâǀgaisa. ǃGâsan ge ǀnî ǁaegu ais tsîna ǀnî ǀgaugu ǃnâ a hui da ǁkhā aiǁgause, ǂû-e mādas tsîna. ǀNî ǁaegu ai da ge huiba aitsama ǃgâsana xu nî ǂgan. (ǂKhm. 17:17) Xawen ge a ǀū mati da ra tsâs tamas ka io tae-e da ǂhâ hâsa. (ǂKhm. 14:10) ǂÂiǂhansents ga ǁaeb ai ǃgâi ǀhōsan ǀkha ǃhoa tsî ǁîna tsâts ra ǀgauba mîba. Tae-i satsa a hui ǁkhās tsîna ǁîna mîba. ǀNîsits ge ǀgū ǀhōsa-i asets ra mû ǀhaohâb ǃûi-aob ǀkha a ǃhoa ǁkhā. ǀNî ǃgâsadi ge kaise ǃgâise ra tsâ gagasise ǀgaisa Xristeǁî ǃgâsadi ǀkha di ga ǃhoa o. w24.10 10 ¶15-16

ǂGui khoen ge ra dītsâ ǁîn soros ǃgao a ǃgâi ǂûna ǂûsa tsî ǀnî hâ xūn tsîna dīsa în gaxuse ûi ǁkhā. ǁÎn ge a ǂan nē xūn hoanan ga dī xawen ǀguitsē kaira tsî nî ǁōsa. Xawen ge ǀnîsi a tsâ ǁkhā ǁîn ǀamosib kōse ûihō tidesa. Jesub ge ge mî īǁkhā ī asa khoen “ǀamo ûiba” nî hōsa, Johaneb 3:16 tsî 5:24 ǃnâ ī ra ǁgau khami. Jesub ge pere-i tsî ǁau-i tsîna buruxa ǀgaub ǃnâ ǂgui khoena ge ǂûmā. Xawe Jesub ge saora tsēs ai Kapernaums ǃnâ gere sao-aibi khoena a mîba xū-i ge ge ǂoaǂamsa i. ǁÎb ge ǁîna ge mîba ǁō hânab khâisa nî māsa tsîn ǀamosib kōse nî ûisa. (Jhn. 6:​39, 40) Jesub mîdi ge ra ǁgau ǁnān ǁō ge nab khâisa nî māsa tsî du hoa do ǀamosib kōse nî ûisa. w24.12 8 ¶1-2

World Health Organizations ge ǃnuriba ge māǂui ǁgauraba, ǂgui-aogu ǁîgu tarade ǂnau tsî ra mîǁgaiǁgaisa. Nēti ī xūna ra dī aogu ge khoen ais ai tarade ǃgôasib ǀkha ra hâ-ū xawe oms ai ǁîde ǁgaise ra hâ-ū. Tae-i ǃaroma gu ǀnî aoga ǁîgu tarade ǃgâi tamase ra hâ-ū? ǂKhabadīb ǁnaetiga ge ūhâ ī dadasab xa gu ge ǀnîsi kaikaihe hâ tsî ǁnās ǀkha ra ǂâi nēti ī ǀgaub a ǃgâi ti. ǀNî aogu ge ǁîgu di tarade ǃgâi tamase ra hâ-ū, ǃhaoǃnâsi ǁnaetib ase. Nēti ī aogu ge ǀnîsi ra tsâ ǁîgu ge tarade ǁgaise nî hâ-ū, is ǂan ǁîb a “ama aorekhoe” ǃkhaisa. Tsî gu ge ǀnîga ǁkhāǁkhāhe tama hâ, î gu tsâgu ra ǀgauba ǃkhōǃnomǃnom, ǁaib tsîna. ǀNî gu ge ǁgauoǃnâ ǁgoe-ūgub vidiogu tsî ai-īsigu tsîna ra kō tsî ǃgâi tama mûǂûiba tarekhoedi tsî ǁgoe-ūgub xa ra omkhâi. ǂAnsa ūhâ khoen ge ǀaro tsî ge mî, Koronas ǁaeb ǃnâ gu ge ǂgui-aoga ǁîgu tarade ǃgâi tamase ge hâ-ū tsoatsoa. Xaweb ge aoba tātsēs tsîna ǁîb tarasa mâ i ga ǃaroma xawe ǁgaise hâ-ū tide. w25.01 8 ¶2-3

“ǃKhūb sa Elobats ge nî ǀnam sa ǂgaob hoab ǀkha, sa ǀoms hoas ǀkha, sa ǀgaib hoab ǀkha tsî sa ǁnâuǃāb hoab ǀkha.” (Luk. 10:27) Jesub ge ge ǃgāsa kai nē i ge ǂhâǂhâsa i ǃkhaisa Moseb ǂhanub ǃnāga. ǃGaoǃgâ re Jehovaba da ūba hâ ǀnammi ge ǂgaoba xu hâ turagu, tsâsigu tsî tsâǀgaub tsîna ǃkhōǂgā hâ. Jehovaba da ge ū da hâ xūn hoan tsî sida ǁkhāsib hoab ǀkha nî ǀnam. Nēs ge sida tsâsigu, ǀgaib tsî turagu tsîn hoana ǃkhōǂga hâ tsî mati da ra ǂâiǀgaub tsîna. Ama as ge tātsē da Jehovab ǂâiǀgauba ǀoasase ǁnâuǃā tidesa. Xawe da ge ‘Xristub ǂâisa’ a ǁnâuǃā ǁkhā. ǁÎb Îbab ge ǃamkuse a ǂan tsî ǁîb ra ǂâi khami ǂâi tsî ǁîba ǀoasase ra ǁgae.—1Kor. 2:16. w25.03 8 ¶1

Jesub ge ǀoasa kurusa ge ūhâ i Adammi khami, Adammi nî ǁores aiǃâ. (1Kor. 15:45) ǁNā-amagab ge Jesuba ǁōb ge o, Adammi ge ǂoaǃnâ ûib ǂûba ge matare oa ǁkhā i. (Rom. 5:19) ǁNās ǀkhab ge Jesuba ge ‘ǀûniga Adam i.’ ǂHâbasa tama i ge ge hâ i ǀnî hâ ǀoasa kurusa ūhâ khoe-i hā tsî Adammi ge ǂoaǃnâ-e nî matare-oasa. Jesub ge “ǀgui ǁguibasa ǀamosib kōse . . . ge ǁguiba.” (Heb. 7:27; 10:12) Mâ ǃkharagagusiba ǂkhîbagus ǁguibas tsî xoremarib tsîn ǁaegu hâ? ǂKhîbagus ǁguibas ge Elob ǁîb tsî khoen ǁaegu nî hâ ǃgâi ǀhōsagusis ǃaroma ra dīhe xū-e ǃoa ra ǁnaeǁgau. Xoremarib ǁguibasa matares ge ra īǁkhā kai în ǁore-aona ǂkhîbagusa Elob ǀkha ūhâ. Nē matares ge Jesub di ǃgomǀgausa ǀaoba ra ǂnûǁkhaeba hîna ge sada ǃgao a māheba.—Heb. 9:14. w25.02 5 ¶12-13

Jehovaba ûitsama khoeb ase mûs ge nî hui da î da sida ǃgomsina ǃgâi ǀgaub ǃnâ mû. Mâ ǀgaub ǃnâ? ǃGomsina da ga ūhâ o da ge tae-i ǂhâǂhâsas ai sida ǂâisa nî ǂnûi. ǁGâuab ge ra mî ǃgomsina da ga ūhâ o da Jehovaba nî ǁnâxū ti, ǁnā-amga i ge sadu ǃgomsina ra sîsenǂam ǀgauba Jehovaba ra tsâǀkhā. (Job. 1:​10, 11; ǂKhm. 27:11) Sida ǃgomsin ǂamai da ga ǂgomǂgomsase Jehovab ǃoagu hâ ǀgara o da ge ra ǁgau Jehovaba da a ǀnamsa tsî ǁgâuaba ǂhûmi-aob ase ra ǁgausa. ǂHanuba ra mâǃoa du? Mari ǃgomsina du ra hōǃâ? Sadu aoǁnâ sîsen-e ǃgâi tamase ra ūǃoahe tamas ka io du ǀkhara ǃgomsi-e ūhâ? Ti i nî īs ga o ǂâi-oa re, sadu di mâsib ge ǃēsa ra mā du î du Jehovab ǂgaoba ǂkhîǂkhî. ǂÂis ǃnâs tsîna ūhâ re, Jehovab ge tātsē mā-am tide sadu ǁkhā du as ǂamai nî ǃâitsâhe ǃkhaisa. ǁÎb ge ǀgaiba nî mā du î du mâǀgai. w24.06 22 ¶9

ǂAn i du a mâ xūn xa du supuse ra ǃâitsâhesa? ǁKhōǁkhōsa i ge a sida ǂkhabusasiga da ga kōǃkharu tsî ǂâi o, ǀgaisa da a tsî da tātsē ǁore-e dī tide ti. (1Jhn. 1:8) ǂÂis ǃnâ ūhâ re Paulub ge ge mî, ‘Elob di gagab xa ra ǂgaeǂguihen’ tsîn ge ǁoreb ǃnâ nî ǁnā ǂkhâikarin ga hâ tama io. (Gal. 6:1) ǂHauǃnâ-ūsen da ge nî tsî da ge nî ǂanǃgâ mâpa da a ǂkhabusasa. (2Kor. 13:5) ǃNāsase ra ǃâitsâ da xūna da ga ǂanǂûis khaoǃgâ da tae-e nî dī? ǃGarise sîsen tsî da ge ǁnā ǃâitsâna nî ǃkhamǃoa. Aiǁgause, Elobmîs ǁaeb ǃnâ i ge ǃās ǂnamipe hâ mîrigu di heksa ge ǂkhabusa ǃâ-i. ǁNā-amaga gu ge ǂgui ǃûi-aoga heks tawa gere mâ i gu ǃāsa ǁkhauba. ǁNās ǁkhās khami sida ǂkhabusasiga da ge nî ǃgaoǃgâ, î da ǃâitsâna ǃkhamǃoa ǁkhā.—1Kor. 9:27. w24.07 15 ¶5-7

Nētsēs mîs ǃnâ ra mîhe ǃgâi sîsengu ge ǃgâiǂhôasa aoǁnâs tsîna ǃkhōǂgā hâ. ǁNā-amaga da ga Elobmîsa khomai tsî ǂâiǃgâ, oi ge sida di ǂgoms Jehovab ǃnâ da ūhâsa ra ǀgaiǀgaihe. Tsî da ge ǃgāsase ra ǁnâuǃā tae-i ǃaroma i a ǂhâǂhâsa î da Gaosib xa aoǁnâ. Elobmîs khomaisa xu da ga ǀama ǂgao, o da ge tā nî ǃnoe tsî ǁaeba nî ū. Nēs ge Elobmîsa ǃamkuse ǁnâuǃās ǀkha nî hui da. Xoasa du ga khomai tsî ǁnâuǃā tama i, o tā ǃkhaesa khomai ǃkharu re. Xawe Watch Tower Publications Index tamas ka io Ôaǃnâs ǀkha ra hui ǂkhanib Jehovab di ǃoaba-aon tib ǃnâ xoas ra ǁguiǃāhe ǀgauba ôaǃnâ re. Sadu ǁaeb ǀkha du ga ǁkhāǁkhāsen, o du ge ǂgomǃgâsiba Elobmîs ǃnâ ra ǀgaiǀgai. (1Tes. 5:21) ǃNāsa ǂgomǃgâsiba du ra ūhâ khami du ge nî ǃgâibahe, ǁkhāǁkhāsen du ra xūna naun ǀkha ǀgoragusa. w24.04 15 ¶4-5

ǁÎb ge “ǃgâi tsî a ǀûbaǀnam” tib ge Davida ge mî. (Psa. 86:5) Mixab ge ge xoa: “Sats khami ī Elo-i ge a ǀkhai. Sats ge ǁorena ra ǀûba tsî ûiǃgau hân sa ǁaes din di ǃûǂamsa ǁkhara tama hâ.” (Mix. 7:18) Jesajab ge ge xoa: “An eloxoresana ǁîn daoga ǁnāxū tsî ǂkhabadī-aona ǁîn ǂâide. An ǁîna ǃKhūb ǃoa ǃhobasen, îb ǁîna ǀkhomma mā tsî sada Elob ge ǁîna ǃnāǂamsase nî ǀûba.” (Jes. 55:7) Jehovaba ǁgaes ǃaroman ge Korintes ǀhaohâba ge mîbahe în ǃhobasen ge khoeba ǀûba tsî ǀnambin asa ǁgaubi tsîn oaǀkhīb hâ ǃkhais xa a ǂkhîsa. ǁNā daoǁgausa sao-ais ǃnâ-ūb ge ǀhaohâba ge ǁgau ǁîn hoa xūn ǃnâ a “ǁnâuǀnamxa ǃkhaisa.” ǀOro ǁkhâgab ge ǀhaohâba xu ūǂûihe hâ i xaweb ge ge ǃhobasen. ǁNā-amaga î ge ge ǂhâbasa tama hâ i î gu ǀhaohâb ǃûi-aoga gaxuse ǃâu ǁîba ǀhaohâba ǃoa oaǀkhī kaisa. w24.08 17-18 ¶12-13

Kai ǀkharaǀkharan nî hâ ǁaeb ǃnâ da ge ûi hâ. ǀGūǁaeb ge Jesuba ǃhūbaib ai hâ khoen hoana nî ǀgoraǃgâ. Jesub ge tae-i ǀgoraǃgâs ǁaeb aiǃâ nî īsa ra mîba da. ǁÎb ǁkhāǁkhāsabe gab ge “ǁgauǁgau-e” ge mā, ǁîb hās “ǃhūbaib di ǀunisa nî ǁgauǁgausa.” (Mat. 24:3) Nē ǂkhōs ge Mateub 24ǁî tsî 25ǁî danaǃâ ra ǃnâ xoahe hâ. Xawe du ge ǃgûǀhao ra ǂkhōdi tsîna Markub 13ǁî danaǃâs tsî Lukab 21ǁî danaǃâs ǃnâ a hō ǁkhā. Jesub ge ǃkhâikhom ra haisi-amsa nē ǂkhōdi ǃnâ-ū ra mā da. Nē ǂkhōdi ge gūn tsî pirin gā-ai tsî gâre oxae ǂkhamkhoedi tsî talendi tsîn xa hâ. Mâ ǂkhōs hoas ge ra hui da, î da ǁnâuǃā khoe-i ǁî-i ra tanisen ǀgaub ǃoagu nî ǀgoraǃgâhesa. w24.09 20-21 ¶3-4

Jesub ǃgâi aiǁgaus xa ǂâi re, ǁîb ge hoa xūna ǁîb ǁGûb tsî khoen tsînab a ǀnam amaga gere dī. ǁNā ǀnammi ge ge ǁgaribi îb ǃgarise sîsen tsî khoen xa ra kōǁnâhe sîsenan tsîna dī. (Mat. 20:28; Jhn. 13:​5, 14, 15) ǃGasa go ǀnammi xa go ga ǂkhâǃnâhe, ob ge Jehovaba nî ǀkhae go tsî nî hui go i go sago gagasi mîǁguiga sīǃnâ aiǁgause ǀhaohâb hui-aob ase ǁgaumâihesa. (1Pet. 5:5) ǃHūbaib khoen ge ǁnān ǁîn a ǂhâǂhâsa ti ra ǂâin xa a ǃgâibahe. Xawe Jehovab ǃoaba-aon ge ǁnāti ī tama. ǃGâsab Jesub nau khoena ǀnam khami a ǀnammi ge ǁîb ǃgâsana gaoǂam ǂgao tide, tamas ka io naun xa ǂhâǂhâsab a ti mûhe ǂgao tide. ǃGâsab ga nau khoen xab a ǂhâǂhâsa ti hâ ǂâiǀgauba ūhâ tsîb ga ǁgaumâihe o ǀhaohâb hui-aob ase, ob ge ǃgamǃgamsenxa sîsena dī ǂgao tide. ǁÎb ge nî ǂâi kaiseb a ǂhâǂhâsa ti ǀnî sîsengu ǃaroma.—Jhn. 10:12. w24.11 15 ¶6-7

ǃHūbaib ǂhawase da ge ǃnāsa ǃgâsaga ǂhâhâ nēti ī “māde” ūhâ ga. (Efe. 4:8) ǁĀǁnâsa ǃgâsats ga o, “ǁnāsa dīs di ǁkhāsibats” ūhâ? (ǂKhm. 3:27) Māsenxa its a ǀhaohâb hui-aob ase ǁgaumâihesa? ǀNaits ga ǀhaohâb hui-ao o, māsenxa its a ǃgâsana ǀhaohâb ǃûi-aob ase ǃoabasa? ǀKharaǀkharanats sa ûib ǃnâ dī hâ its Gaosib aoǁnâ-aon skoli ǃaroma xoaǂgāsen? ǁNā skoli ge nî ǁkhāǁkhā tsi its ǃnāsase Jesub xa sîsen-ūhe. Nē xūnats dīhō ǁoa khamits ga tsâ o, Jehovaba ǃoa ǀgore re. ǁÎb ǃanu gagaba ǂgan re its huihe mâ ǁgaumâi i hoa-i māhets ra i ǃnâ. (Luk. 11:13) ǃGarise ra sîsen ǃgâsagu Jesub ge ‘mādi’ ase a ǁgaumâi gu ge ra ǁgau Jesub ǀuniga tsēdi ǃnâ ra ǂgaeǂguisa. (Mat. 28:20) Kaise da ge ra ǃgôaǃgâ ǀnamxaǃnâ tsî māxa Gao-aoba da ūhâsa, ǁîb ge ǂan tae-e da ǂhâhâsa tsî ǃgâsaga ra māda î da huihe. w24.10 23 ¶16-17

Tae-e Elob khoen ra hōǃâ tsûb tsî ǂâiǂhansendi ǀkha nî ī? Amase “aiǃâ ge hâ i ǂōǂōsigu ge ǀuruhe” tsî Elob aisa xu nî sâuhe. (Jes. 65:16) Jehovab ge sida ǃgomsiga nî ūbē tsî da ge ǁnā tsûba ǂâihō tide. Xristeǁî ǀhaode hâǃnâs ge kaise sâsasiba ra mā da. Tsî î ge ra hui da ǃnomsase nē ǁgai ǃhūbaib ǃnâ hâsa. Sida ǃgâsan tsîna da ge ra hui în ǁîn tsîna ǃnomsasib, ǀnammi, ǂkhîb, khoexaǃnâsib tsî tsamtsiǃnâsib tsîna hōǃâ. Nēn hoan ge gagab di ǂûn ǃâ. (Gal. 5:​22, 23) Kaise da ge ra ǃgôaǃgâ Jehovab ǀapeǂhumis di ǃâ da asa. Nē gagasi paradais ǃnâ ra hâ ǀgaran ge nî mû matib Eloba ǁîb mîmâis “ǀasa ǃhūbaib tsî ǀasa ǀhommi” dis tsîna nî dīǀoaǀoa ǀgausa. w24.04 22 ¶9-10

Dî-amgus ge a ǁkhoaxa ǁkhā, ǃgammeb ǃnâ ī a ǀam ǁkhā ǃkhais ǃgao. ǁÎra ǃgammeb tsēs ai ra ge Jehovab ǃoa-ai ra mîmâi ǀnamgu tsîra nî ǃgôagu ǃkhaisa, ǁîra ǁōb tsēs kōse. Mîǁgui-e da nî dīs aiǃâ da ge nē ǁkhōba ǃgâise nî ǂâiǃgâ. ǁNās ge ǁkhāti a ama, ǃgammeb mîǁguiba ra ga dī o. Dî-amgus ǁaeb ǃnâ ra ge khoera ǃgâise ǂangu tsî ǃgâi mîǁguiba nî dī. ǀNî ǁaegu ai ra ge ra mîǁgui îra ǃgamme tamas ka io ra ge ra mîǁgui îra dî-amgusa ǀamǀam. Mîǁgui ra ga îra dî-amgusa ǀamǀam, os ge ǁnāsa ǂâibasen tama tsū xū-e ra go dī ti. ǁNās ge ra ǂâibasen dî-amgus go ǁîs ǂâibasensa a dīǀoaǀoasa, nēs ge go hui î ra ǃgâi mîǁguiba dī. Kaise i ge a ǂhâǂhâsa, ǃgamme tama khoe-i ǂâis ǃnâ ni ūhâsa, ǀgam khoen ra dî-amgusa î ra ǂanǂui ǃgamme ǂgao ra rasa. ǁNās ge ra ǂâibasen, ǃgammets tide tits a ǂan khoe-ets dî-am tide ǃkhaisa. w24.05 26-27 ¶3-4

ǂKham Xristeǁîn ge ǀnî ǁaega ǂgomǃgâsiba ūhâ tama ǁîn ǂgomsa ǁkhaubasa. ǀNî ǁaegu ain ge a tao ǁkhā xūn ge ǃhūbaib ai hā ǀgausan ga ǁguiǃā kaihe o. Tae-i ǃaroma? ǁGauǃnâ-aon ge evolusiba amab ase a ǁguiǃā ǁkhā. ǁGûn ase du mati sadu ǀgôana a hui ǁkhā în ǂgomǃgâsiba ūhâ ǁîn ra ǂgom xūn a ama ǃkhaisa? ǂGomǃgâsiba sadu ǀgôa-i ǃnâ omkhâi kai re, Elob ǃnâ i ra ǂgomsa taos ge ǂhâbasa tama hâ. ǂGuin kurus ǂansa ūhân ge ra ǂgom xūn ge ǁnāti ǀgui hā tama isa. Nēti ī ǂansa ūhâ khoen ge ra mûǂan ǁgauǁgaun hâsa gā-ai khoe-i ge nē buruxa xūna kuru ǃkhaisa. Nēs xa ǃaromahe hâsen ge evolusib ǁkhāǁkhāsa ūǃoa tama hâ. ǀGui xū-i sadu ǀgôa-e nî hui-e î-i ǁî-i ǂgoms tsî ǁkhoaǂgaosib tsîna ǀgaiǀgais ge ǁgauǁgauna ôasa, tae-i ǃaroma i ûib ge kuruhes ǃnâ ra ǂgomsa. w24.12 18 ¶14-15

Jesub ge ǂgomǃgâsiba ge ūhâ i ǀnî khoen ǃgâiǂhôasa nî ǃgâsa. Nēs tsîn ge ǁîba ge hui îb aiǃgû tsî ǃgâiaǂgaob ǀkha aoǁnâ sîsen-e dī ǀgara. Aiǁgause ǀgui kuribab ǁāǁnâhe toa hâs khaoǃgâb ge Jesuba ge aoǁnâ tsoatsoa tsîb ge ǁîba ge mûǂan ǂguin ge māsenxase ǃgâiǂhôasa gere ǃgâsa. ǁÎb ge nē aoǁnâ sîsen-e ǃgaos ǀkha ge ǀgopeǀnō. (Jhn. 4:35) Kuriba ǃkharu tsîb ge Jesuba ǁîb ǁkhāǁkhāsabega ge mîba: “ǃGaos ge a kai.” (Mat. 9:​37, 38) Tsîb ge ǁkhapa ega ge ǀgomǀgomǃgao: “ǃGaos ge a kai. . . .ǁNā-amaga ǃKhūb ǃgaos dib ǃoa ǀgore, îb sîsenaoga ǃgaos âb ǃoa sî.” (Luk. 10:2) Jesub ge ǂgomǃgâsiba ge ūhâ ǀgara ǀnî khoen nî ǃgâiǂhôasa ǁnâu ǂgaosa. ǁNās ǀkhab ge gere ǃgâiaǂgao nē aoǁnâ sîsen-e dīsa. Jesub ge ǁîb ǁkhāǁkhāsabegu tsîna ge hui î gu ôasase hâ ǀgara aoǁnâ sîsenni ǃnâ nēs ǃgâi ǀamǂoasa a ūhâ ǁkhā amaga. w25.03 18-19 ¶15-16

Jehovab ge sida sâuǃkhai. Kai ǀuis khoe-e ǀgaisa ǂoaba xu ra ǁkhauba khamib ge Jehovab tsîna ra sâu da ǃgom ǁaega da ga hōǃâ o.  ǁÎb ǀkha da ūhâ ǀhōsagusisa ǁkhaubas ǀkhab ge ra hui da tsî ra hōhōǃnâ da, xū-i xare-i nēsi da ra hōǃâ i ǀamosib kōse tsûtsû da tidesa. ǁNās xa ǃnāsa-i tsînab ge ra mîmâi: Hānîǁaeb ǃnâb xū-i xare-i ǂâiǂhansen tamas ka io ǃgoma ra tsâ kai da i hoa-e nî ūbesa. (Ese. 34:​25, 26) ǀGui ǀgaub Jehovab ǁkhaubasa xu da ǃgâiba ǀama ǁkhāb ge, ǁîba ǃoa ǀgoresa. ǀGore da ga ob ge Jehovaba “ǂkhîb Elob dib” sida ǂgaogu tsî ǂâidi tsîna ra ǁkhauba ba ra mā da. (Fil. 4:​6, 7) Jehovab ge hoaǁae sada nî hui. Tsî da ge a ǂgomǃgâ ǁkhā, ǁîb a sida “ǀamo ǃgareǀui” amaga. (Jes. 26:​3, 4) ǁÎb ge hoaǁae ǁîb mîmâide dīǀoaǀoa, sada ǀgorede ǁnâu tsî ǂhâ da hâ ǂkhâǃnâsa nî mā da. Jehovab ais tsîna da ge ǂgomǃgâ ǁkhā, hoaǁaeb ǁîb ǃoaba-aon ǃoagu ǂgomǂgomsa amaga. (2Sam. 22:26) ǁÎb ge tātsē dī da ra xūna ǀuru tide tsîb ge hoaǁae nî mādawa-am da.—Heb. 6:10; 11:6. w24.06 27 ¶4-6

Xūna xu da ge nî ǂgōsen ǃaroma ǁkhā a na î da Jehovaba da ūba hâ ǀnamma tā ǂkhabu kai. ǃGâi tama ǀhōsan tsî ǃkhūsisa xus tsîna da ge nî ǂgae-oasen. Mûǂan da ga xūn hâsa Jehovaba da ūba hâ ǀnamma ra ǂkhabu kaina, o da ge ǃkhae ǁaeb ǃnâ ǃgarise sîsen tsî ǀkharaǀkharana nî dī, în nē xūna tā Jehovaba da ūba hâ ǀnamma ǂoaǃnâ kai da. (Mat. 5:​29, 30) Tā da ge nî mā-am îb sida ǂgaoba ǀgorasen. Jehovaba da ra ǃoaba ǃkhais ǃaroma i ǁgai xūna sida tsâǀkhā tide ti da ge a ǂâi tsoatsoa ǁkhā. Aiǁgause du ge ǀnîsi kaise ǃkhai tsî ǂoaxa tsēs ai ǃauga hâ. Oms ai du ra sī khami du ge ǀgamma ra hau masinsa ra ǃam. Nē ǀgamma hui-i nî dao-amsa du ga ǁkhobamsase ǁnāxū o? ǃKhai ǂoab ge omsa ǃkhaese nî ǃkhaiǃkhai. Tae-e da ra mî ǂgao? Nēsa da ge Jehovab ǀkha da ūhâ ǀhōsagusis ǀkha a ǀgōpeǀnō ǁkhā. Jehovab ǃoa ǀgūǀgū da ǁkhā xūn xa da ge ǃnāsa-e nî dī. ǃKhai ǂoaba da oms ǃnâ ǂgâxasa mā-am tide khami da ge tā, nî mā-am î-i ǃhūbaib xūna Jehovab ǀkha da ūhâ ǀhōsagusisa ǂkhabu kai tsî sida ǂgaoga tā ǀgora.—Efe. 2:2. w24.07 21 ¶6-7

Jesub ge ǁgaise hâ ūhe tsî ǀgaisa tsûb tsîna ge hōǃâ. ǁÎb ge ǃkharuǃnâ tsûba da ge tātsē a ǁnâuǃā ǁoa. ǁîb ge hoaǁae ǀnamxaǃnâ tsî ǂgomǂgomsase Jehovab ǃoa-ai ge hâ, kai ǃgommab gere hōǃâ xawe. ǁNā soldagu nî ǁkharahesa ǂgans xab ge ge ǀgore Jehovaba ǃoa, “ti îtse ǁîna ǀûba re, tare-en ra dīsan a ǀū xuige!” (Luk. 23:34) Jehovaba da ga ǂgan îb ǁgaise ra hā-ū da khoena hui, os ge ǁnāsa ra hui da î da ǃnomsase hâ tsî tā ǁnātikōse ǁaixa. ǀŪ da ge a matiko ǂhanuoǃnâsiba da nî hōǃâsa nē eloxoresa ǃhūbaib nî ǀams aiǃgâ. Tae-i ǀgui-e da ga ǃkharuǃnâ xawe da ge Jehovaba ǃoa ǀgoresa tā nî ǀûsen. Aiǃgû tsî da ge Jesub ge ǂhanuoǃnâsiba mâǃoa ǀgauba nî ǁgae tsî Elobmîs lapemādi tsîna nî sîsen-ū. ǁNāti da ga dī o da ge ǂgomǃgâ ǁkhā Jehovab nî ǀkhae dasa.—1Pet. 3:​8,9. w24.11 6 ¶16; 7 ¶17, 19

Jehovab ge hoa tanisen ǀgauga ūǃoa tama hâ, ǁîb ge ǁōreba ǃhui hâ. (Psa. 5:​4-6) Jehovab ge ra ǂgaoǀkhā da î da ǁîb mîmādi Elobmîs ǃnâ hâde ǁnâuǀnam. Jehovab ge ǃâubasen tama hâ î da ǀoasa kurusa ūhâ. (Psa. 130:​3, 4) ǁNās ǀkhab ge Eloxoresa khoen ‘Elob ǀkhomma ǁgauoǃnâ ûib ǃnâ ra dabana’ ūǃoa tama. (Jud. 4) Elobmîs ge ra mî, “eloxoresa khoen” Elob torob Armagedons tawa nî dīkākāhesa. (2Pet. 3:7; J.ǂHa. 16:16) Jehovab ge ǂhâba tama ǀgui khoe-i tsîn nî dīkākāhesa. Elobmîs ge ǃgāsase ra ǁgau, ǁîb ra ǂhâbasa în ‘hoana ǃhobasen.’ (2Pet. 3:9) Jehovab khami gu ge ǀhaohâb ǃûi-aoga a ǃnūǃnâxa ǁore-ao-e gu ga hui o, î-i ǃhobasen tsî ǁkhapa Jehovaba ǃoa ǀgū. w24.08 26 ¶1-2

Jehovab khami da ge sida tsîna khoena da ǀnam amaga nî mā. Aiǁgause du ǂû-i tsî saran ǂhâsiba ūhâ ǃgâsa-e a ǂan? Jehovab ge sado a sîsenū ǁkhā î du ǁî-e ǂhâ-i hâ xū-i ǀkha hui. Jehovab ǃoaba-aon ge a ǂansa tsūkēǃgâb ǃnâ hâ khoenan ra huisa. Aiǁgause, Koronas ǁaeb ǃnân ge ǃgâsana ǂûn, saran tsî nau ǂhâǂhâsa xūn tsîna ǂhâsib ǃnâ ge hâ i khoen ǀkha ge ǀgoragu. ǂGuin tsîn ge mari-e māsenxa mādi ǃnâ-ū ǃhūbaib ǂhawase ra dīhe sîsengu ǃaroma gere mā. ǁNās ge gere hui în ǃhūbaib ǂhawase hâ ǃgâsan, ǂhâsib ǃnâ hâna hui-e. ǁNā ǃgâsan ge Hebreǁîn 13:16 ǃnâ hâ mîde gere sao-ai: “ǃGâidīs tsî ūts hâ xūna naun ǀkha ǀgoragusa tā ǀuru, nēti ī ǁguibadi ǃnâb Eloba ǃgâiǃgâibasensa ūhâ xuige.” w24.09 27 ¶6-7

Sao ra mâsib xa ǂâi re. Sîsen-ets ge ra ôa îts sa omarisa kōǃgâ. ǀGam sîsen kha ǁaeguts ge a ǁhûi ǁkhā. Hoa xūna ôaǃnâ re: “Mâǃnôa sîsen-e? Matikō gaxusets sîsenni ǃnâ nî hâ? Matikō gaxusets nî ǃnari îts sîsenni tawa sī?” Hoa mâsi kha ǃnâ i ge Xristeǁî-e nē sîsen-e a dī ǁkhā. ǀNîsits ge ǂguro sîsenni xa a ǃgâibahe satsa a ǁkhoaxaba sîsen-ets nî dī amaga tamas ka iots ǀgapise nî matare-e amaga. ǀNî xūn tsîn ge hâ ǂâiǃgâts nîna nē mîǁguibats nî dīs aiǃâ. Aiǁgause, nē sîsen-e Xristeǁî ǀhaode xu a hâ bē kai du ǁkhā? Nē sîsen-e nî ǃaroma î du sadu omaris gagasi ǂhâsiga kōǃgâ ǀû? Nē dîde dîsens ge nî hui du “ǂhâǂhâsa xūna” ǂgurose mâisa, ǁnās ge Jehovaba ǃoabas tsî sadu omaris gagasi ǂhâsiga ǂgurose kōǃgâsa. ǁNāpaxuts ge ǀams ai Jehovab nî ǀkhae mîǁguiba dī ǁkhā. w25.01 17 ¶11-13

Nau khoen ga ǃgâi tamase hâ-ū tsi xawets ge ǂgomǃgâsiba ūhâ ǁkhā Jehovab a ǀnam tsi tsî ra ǃgôaǃgâ tsisa. Xū tamasets ga tsâ o ǂâis ǃnâ ūhâ re, Jehovab ge sats ǃnâ ǃgâiba ge mû tsî ǁîb ǃoa ge ǂgae tsi. (Jhn. 6:44) ǁÎb ge hoaǁae ra hui tsi ǂgao ǁîb kaise a ǀnam tsi amaga. Jehovab ra tsâ ǀgauba da ge a ǁkhāǁkhāsen ǁkhā Jesub aiǁgausa ǃgaoǃgâs ǃnâ-ū. ǃHūbaib aib ge hâ i, ob ge Jesuba nau khoen xa gere ǃgôaǁnâhe khoena, khoexaǃnâsiba gere ǁgau. (Mat. 9:​9-12) ǀGui tarekhoes ǀaoǂnāba ge ǀaesen hâ īs ge ǂgauǂgauhes nî ǃkhaisas gere ǂgom amaga Jesub saraba ge tsâǀkhā. Ob ge Jesuba ǁîsa ǁkhaeǂgao tsî ǁîs ǂgoms ǃaroma ge koa. (Mrk. 5:​25-34) Jesub ge ǀoasase ǁîb ǁGûba gere ǁgae. (Jhn. 14:9) ǂGomǃgâ ǁkhāts ge a Jehovab aiǃâts a ǀō-aisasa tsîb ge sa ǃgâi ǀgauga ra mû, ǁnās ge ǂgoms tsî ǁîbats ūba hâ ǀnammi tsîna. w24.10 7 ¶4-5

ǁÎb ûib ǃnâb ge Davida ā kaibi gere ǃgom mâsiga gere hōǃâ. ǂGui khoen xab ge ge ǃhuihe hâ i. ǁÎb ǀhōsan tsî omaris ǁanin tsîn ge ǁîb ǃoagu ge ǂgomǂgomsa tama hâ i tsî gere dītsâ tsûtsûbisa. (1Sam. 19:​10, 11; 2Sam. 15:​10-14, 30) ǀGuiǃnās aib ge ǃgom mâsigab ge ǃkharuǃnâ o, saora xū-e ge xoa: “ǃOab xa ta ge ǂkhabu hâ; ti kharob ge mâ tsuxub hoaba ti āb xa ra ǀâ.” (Psa. 6:6) Davidi ûib ge ǃgom i xaweb ge ge ǂan i Jehovab a ǀnambi ǃkhaisa. Xoab ge ge: ‘Jehovab ge ti āsa go ǁnâu.’ (Psa. 6:8) Nētsēs mîdi ge ra ǃgāsa kai Jehovab kaise a ǀnam dasa tsî ǁae hâsa mati da ra tsâs xa. Davidi ge ge mî Jehovab ǁîb ǁgamroga xapas ǃnâ ǀhaoǀhao hâ ǃkhaisa. Davidi ge ge ǂgomǃgâ hâ i Jehovab ra ǃgaoǃgâ tsî ǁîb tsûba ra ǂâihō ǃkhaisa. ǂGomǃgâsibab ge ge ūhâ i, ǁîb di ǀhomsi ǁGûb ǁîb ǃgomsiga ra mûǂan ǃkhaisa tsî matib nē ǃgomsigu xa ra tsâ kaihe ǀgausa. w24.12 22 ¶11-12