Septemberi

Xristeǁî ǀoasasiba sīǃnâs ǃgao da ge tā sîsens ǀguisa nî dī xawe nî aiǃgû ǁî-e ǃkhōǀgarasa. Nēs ge ra ǂâibasen î da tā hoaǁae ǂgomǃgâsen. (1Kor. 10:12) ǁNās ǀkha da ge aitsama “ǃâitsâsen” tsî ǀkharaǀkharana nî dī ǀgara. Koloseǁîna ǃoab ge xoa sîǂkhanis ǃnâb ge Pauluba ra ǁgau, mati da aiǃgû tsî ǀoasasib ǃnâ nî kai ǀgausa. Nē Xristeǁîn ge ǀoasasib ǃnâ kai hâ i xaweb ge Pauluba ǁîna gere hōhōǃnâ, în tā nē ǃhūbaib khoen di ǂâiǀgaugu xa ǂgaeǂhapuhe. (Kol. 2:​6-10) ǁNās ǀkhab ge Epafraba ǀhaohâb ǃnâ hâna gere ǀgoreba în ǀams ai “ǁaposase” mâ tamas ka io kai. (Kol. 4:12) Tae-e da nēsa xu ra ǁkhāǁkhāsen? Paulub tsî Epafrab tsîkha ge ge ǂan-i Xristeǁî ǀoasasib aitsama ǁguiǂgāsens tsî Elob ǂkhâǃnâs tsîna ǂgaoǀkhā hâsa. ǁÎkha ge gere ǂhâba în Koloses Xristeǁîna, Xristeǁî ǀoasasib ǃnâ mâǀgara ǃgomsinan ga hōǃâ xawe. w24.04 6-7 ¶16-17

Jehovaba ǃaos ge ra ǂâibasen ǁîba da kaise ǀnam tsî tātsē ǁîba tsûtsû ǂgao tamasa. ǃGâise da ge nî ǁkhāǁkhāsen î da ǃgâin tsî tsûn, ǂhûmib tsî amab ǁaegu ǀgorasa kuru. Tsî ǁnās ǃnâ-ū Jehovab xa ūǃoahe. (ǂKhm. 2:​3-6; Heb. 5:14) Khoena da ga ǃnāsase Jehovab ǂam-ai ǃao, o da ge ama tama xūna ǂgom ǁkhā, Jehovab amaba ra mâǃoana. Aiǁgause, 12 danaǂgaeǂgui-aogu Israelǁaes di ga ǃgaoǃgâ re. Sīǂûihe ge ga i gu Jehovab Israelǁaesa mîmâiba hâ ǃhūba sī ǃkhē. Disi ǃkhē-aogu ge Kanaanǁîn ǁanǂgāsabena kaise gere ǃao Jehovaba gu ūba hâ ǀnammi ǂam-ai. ǁÎgu ge Israelǁaesa ge mîba: “ǁNā khoen ǃoagu da ge sada ǁkhāsi-e ūhâ tama, ǁîn sada xa a ǀgaisa xui-ao.” (Num. 13:​27-31) Khoesi mûǂui ǀgauba xūn ge Kanaanǁîna kaise ge ǀgaisa i Israelǁaes xa. Xawe khoe-i Israelǁaes ǁîs khākhoen xa nî danhe ti gere mî î ge Jehovab xa ge ǂâi tama hâ i. w24.07 9 ¶5-6

ǂGomǃgâ ǁkhā î da a Jehovab ga khoena ǀgoraǃgâ, ob hoaǁae ǂhanu mîǁguiga nî dīsa? Îo, Abrahammi tsîn ge ti ge ǁnâuǃā. Jehovab ge hoaǁae a ǂhanu-ai, gā-ai, ǀkhomxaǂgao tsî ‘hoa ǃhūbaiba ra ǀgoraǃgâ.’ ǁÎb ge ǁîb ǀGôaba ge ǁkhāǁkhā tsî ge mā-am îb hoa khoena ǀgoraǃgâ. (Jhn. 5:22) Jehovab tsî Jesub tsîkha ge hoa xūna a ǂan khoen ǂgaob ǃnâ hâna. (Mat. 9:4) ǁÎkha ge khoena kha ga ǀgoraǃgâ, o hoaǁae “ǂhanu xū-e nî dī.” ǁNās ǀkha da ge hoaǁae Jehovab tsî ǁîb ra dī mîǁguigu ǃnâ nî ǂgomǃgâ. Mûǂan da ge ra sida ge a ǀgoraǃgâ ǁoa xaweb ge ǁîba a ǀgoraǃgâ ǁkhā. (Jes. 55:​8, 9) ǁNā-amaga da ge Jehovab tsî ǁîb ǀGôab tsîkha ra ǂgomǃgâ ǀgoraǃgâs tawa i ga hā o. Tsî da ge a ǂan sida Gao-aob Jesub, hoaǁae ǁîb ǁGûb ǂhanu-aisib tsî ǀkhomxaǂgaosib tsîna nî ǁgaesa.—Jes. 11:​3, 4. w24.05 7 ¶18-19

Hauǃnâ ǂgaoba ūhâs xa da ge Jesub ge ǂguroǃnās ase Natanaela a ǀhao-ū ǃnaeǃkhaisa xu, xū-e ra ǁkhāǁkhāsen. Filipub ge ǁîb ǀhōsab Natanaela Jesuba ǃoa a sī-ū, oi ge kaise ra mâǂoa xū-e ge ī. Jesub ge Natanaela ǂguroǃnās ase ǀhao-ū xaweb ge sao ra mîde ge mî: “Nē ǃgôaxab ge ama Israelǁîb, gāxaǃnâsi-e ūhâ tamaba.” (Jhn. 1:47) Jesub ge Natanaeli ǃnâ a mû xū-i ge kaise ge ǀō-aisa i. Natanaeli ge sada khami ǀoasa kurusa ge ūhâ tama hâ i. Xaweb ge ǀhôagao tama i tsî hoan ǃnâ ge ǂhauǃnâ i. Jesub ge ǁnā-e Natanaeli xa kaise gere ǃgôaǃgâ tsî ǁîba nēs xa ge koa. Psalmdi 15 ǃnâ hâ ǂgaoǀkhādi ge nau khoena da ra hâ-ū ǀgauba ǃkhōǂgā hâ. Psalmdi 15:3 ǃoagu i ge Jehovab tentommi ǃnâ hâ ǃhaokhoe-e: ‘Nams ǀkha mîǁgaiǁgai, ǀgūkhoe-i ǃoagu ǂkhabadī tsî ǀgūkhoe-e ǃgôaǁnâ tama.’ Sada namsa da ga ǃgâi tama ǀgaub ǃnâ a sîsenū, o da ge nau khoena a tsûtsû ǁkhā.—Jak. 1:26. w24.06 10 ¶7, 9; 11 ¶10

Aoǁnâ sîsenni ǃaroma du ga ǃgâise aiǂhomisen, o du ge naun ǀkha du ga ǃhoa ǁaeb ai ǁkhoaǂgaosiba nî ūhâ. Jesub ge ǁîb ǁkhāǁkhāsabega ge hui, î gu aiǂhomisen aoǁnâ sîsenni ǃnâb ǁîga nî sîs aiǃâ. (Luk. 10:​1-11) Jesub ge ǁkhāǁkhāgu xūna gu ge sîsen-ū amaga gu ge ǂgui ǃgâi xūna ge dī ǁkhā i tsî nēs ge ǁîga ge ǃgâiaǂgao kai. Mati da aoǁnâ sîsenni ǃaroma nî aiǂhomisen? Tae-e da ra mî ǂgaos xa da ge nî ǂâi tsî da ge ǁnāpaxu ǃgâi tsî ǁnâuǃāxa mîde ra sîsen-ūse a ǃhoa ǁkhā. ǀGam tamas ka io ǃnona ǀgaugu khoen nē haisi-amsa nî ǃkhōǃoagu xa da ge nî ǂâi tsî mati da nî ǃereams tsîna. Tsî da ge khoen ǀkha da ga ǃhoa o, ǀnom tsî ǃgâi ǀgaub ǃnâ ǃhoa ǁkhā. w24.04 16 ¶6-7

Hoan xa ǂhâǂhâsa ǃaromas ǃgâiǂhôasa da ra aoǁnâbas ge Jehovab tsî ǁîb ǃanu ǀonsa da a ǀnam amaga. Sida aoǁnâ sîsen-e da ge Jehovaba da ra ǃoaba ǀgaub ase ra mû, ǁîba da a ǀnam amaga. ǂGaoba xu ǃkhō-am tsî da ge ra mî: Sida ǃKhū tsî Elotse, Sats ge anu hâ ǂkhaisib, ǃgôasib tsî ǀgaib tsîna ǃkhōǃoasa. Naun ǀkha da ga Jehovab ge “hoaraga xūna kuru” tsî ûiba mādas xa ǀgoragu, o da ge ǁîba ǂkhaisib tsî ǃgôasib tsîna ra ǁgau. Jehovaba da ge sida ǀgaiba ra mā ǁaeb, ǁkhāsib tsî ū da hâ xūna da ga aoǁnâ sîsenni ǃnâ ǀoasase sîsenūo. (Mat. 6:33; Luk. 13:24; Kol. 3:23) Jehovaba da a ǀnam amaga da ge ǁîb xa ra ǃhoa. ǂKhâǃnâhe da ge ra nauna Jehovab ǀons xa mîbasa tsî tae-es da ǂâibasens tsîna. w24.05 17 ¶11

Jehovab ge nēsi ǂkhîb tsî ǂkhîǂâixasib tsîna ra mā da tsîb ge ǀamo ûib tsîna hānîǁaeb ǃnâ nî mā da. Sida ǃâubasensa da ge Jehovab ǃnâ a ūhâ ǁkhā ǂgomǃgâsiba ūhâse ǁîb turab tsî ǀgaib tsîna ūhâsa sida mādawa-amsa. ǁNā ǂgomǃgâsib ge ra hui da î da aiǃgû tsî ǁîba ǁkhāda a-i hoa-e sida ǃoabas ǃnâ mā. ǂGomǂgomsa ǃoaba-aon Elob din ge ǃkharu ge ǁaeb ǃnâ dī khami. Nēsab ge Timoteub tsîna ge dī. (Heb. 6:​10-12) Timoteub ge ǀgaisa ǂgomsa ge ūhâ i Elob nî hui bi ǃkhaisa. (1 Tim. 4:10) ǁNā-amagab ge Jehovab tsî naun ǃaroma ǃgarise gere sîsen. Tae-eb gere dī? Apostel Paulub ge ǁîba ge ǂkhâǃnâ îb aoǁnâ sîsenni tsî ǀhaohâb ǃnâ ǃgâi ǁkhāǁkhā-ao kai. Paulub ge ge mîba bi îb ǃgâi aiǁgause ǁîb ǀkha ǀguiba ra ǃoaba ǃgâsana ība, ǂkhaman tsî kairan tsîn hoan ǃgao. ǁÎb ge ǃgom ǁgaumâidi tsîna ge māhe hâ i. Nēs ge ǀgaisa xawe ǀnamxaǃnâ ǁnâmasa ǂhâ ge hâ i khoena māsa ge ǃkhōǂgā hâ i. (1Tim. 4:​11-16; 2Tim. 4:​1-5) ǀNî ǁaegu ain ge nauna Timoteub gere dī sîsen-e ge mû tama hâ i, xaweb ge ge ǂan i Jehovab nî mādawa-am bisa.—Rom. 2:​6, 7. w24.06 22-23 ¶10-11

Jehovab ǁaes gere ǁnâuǀnamoǃnâ bi, ob ge ǁîb kēbo-aoga gere sî. Î gu khoena ǃkhâikhom tsî mîba tae-i nî īsa dī-unusen taman ka io tsî ǁîn tsîna gere mî-unuba. Jehovab ge Jeremiaba sao ra-e ge mîba îb Israelǁîna mîba: “ǂGomoǃnâ Israelse tita ǃoa oa re . . tita ge ǀkhomxaǂgao tsî ta ge ǀamose sadu ǀkha ǁaixa tide . . ǀhapixa du a tsî du ge ǃKhūb, sadu Elob ǃoagu khâikhâisen ǃkhaisa ǂanǃgâ re.” (Jer. 3:​12, 13) Jehovab ge Joela sao ra xū-e khoena ge mîba kai: “Xawe nēsi sa ǂgaob hoab ǀkha tita ǃoa ǃhobasen.” (Joe. 2:​12, 13) Sao ra xū-eb ge Jesajaba ge mî kai: “ǁĀsen! ǃAnuǃanusen! Ti mûǁaeba xu sadu ǁorena ūbē; ǂkhabadība ǀû!” (Jes. 1:​16-19) Esekieli ǃnâ-ūb ge Jehovaba ǁîb khoena ge dî: “Tita kha ǂkhaba khoe-i di ǁōb ǃnâ ǃgâiǃgâibasen-e ūhâ, xawe ta ra ǂgaos ge ǁî-i ga ǁî-i tsū daoga xu dabasen tsî ûi ǃkhaisa . . . Tita ge khoe-i di ǁōb ǃnâ ǃgâiǃgâibasen-i xare-e ūhâ tama hâ. . . ǁNā-amaga, ǃhobasen, î du ûi.” (Ese. 18:​23, 32) Jehovab ge amabes ǃnâ ra ǃgâiaǂgao khoen ga ǁîn ǁorena xu ǃhobasen o. ǁÎb ǂhâba hâ amaga în khoena ǀamosib kōse ûi. w24.08 9 ¶5-6

Jehovab ge ǁîb ǃoaba-aon hoana ǂhân hâ gagasi ǂûn hoana ra mā tsîb ge ǁîna daoǁgau tsî ra ǁkhauba. Jehovab ge mâ khoe-i hoa-e Elobmîsa khomais ǃēsa mās ǃnâ-ū ra ǁgau, ǁîb ǀgora-e ūhâ tamasa. Elobmîs ge ǂgurose ǃnona gowagu ǃnâ ge xoahe: Hebre, Aramaiki tsî Grike gowab tsî ga. Elobmîs ge xoaǃnâhe gowaba khomai ǁkhān ǀguina ǀgū ǀhōsagusisa Jehovab ǀkha ūhâ ǁkhā, ǁnā gowaba khomai taman xa? Hî-i, tātsēs tsîna. (Mat. 11:25) Jehovab ge ǁkhau da tama î da ǁîb ǀhōsa kai, ǀgapi ǁkhāǁkhāsensa da ūhâ tsî da ǂguro gere ǃhoahe gowagu Elobmîs di ga ǂan amaga. Jehovab ge ǂhâba hâ în ǃhūbaib ǂhawase hâ khoen hoana ǁîb gā-aisiba xu ǃgâiba ǀama. Nēs ge ǀgapi ǁkhāǁkhāsensa ūhân ǀguina ǃkhōǂgā tama. Elobmîs ge ǂgui gowagu ǃnâ ǂnûiǃkhunihe hâ în ǂgui khoena ǃhūbaib ǂhawase ǁnāsa xu ǃgâiba ǀama. Tsî ǁkhāǁkhāsen matin ǁîb ǀkha ǀhōsagusisa a omkhâi ǁkhā ǀgausa.—2Tim. 3:​16, 17. w24.06 6-7 ¶13-15

Jodeǁîn hîkākās Jesub ge mîmâis ge gere ǀgū. Xawen ge ǁnā Xristeǁîna ǃgau hâ ǁaeba ge sîsenū ǁkhā ī, în aiǂhumisen ǁîn ǂgoms tsî mâǀgais tsîna omkhâisa. (Heb. 10:25; 12:​1, 2) ǀGūǁae da ge Hebreǁîn gere hōǃâs xa ǃnāsa ǁgâiǀāba nî hōǃâ. (Mat. 24:21; J.ǂHa. 16:​14, 16) Hā re î da Jehovab ge ǁnā Xristeǁîna a mā ǀapemāde ǃhoaǃgao, sida tsîna a hui ǁkhāde. Apostel Paulub ge ǃgâsana ge ǂkhâǃnâ în Elobmîsa khomai tsî ǂâiǃgâ. (Heb. 5:14–6:1) Hebreǁî xoade sîsenū tsîb ge Pauluba ge ǁguiǃā Xristeǁîn ge Jehovaba gere ǃoaba ǀgaub ge ǃgâi isa, Jodeǁîn ge Jehovaba gere ǃoaba ǀgauba xu. Paulub ge Xristeǁîna ge ǂkhâǃnâ în Elobmîsa ǂan tsî ǃgâise ǁnâuǃā, în ǂhanu tama ǁkhāǁkhāde xu ǂgōsen. w24.09 8-9 ¶2-3; 10 ¶6

Jesub ǁkhāǁkhāsabegu ge ǂkhâǃnâhesa ge ǂhâ hâ i. Tae-i ǃaroma? ǀNîgu ge ǁîgu omdi, omaridi tsî ǂharugu ǃkhaiga ge ǁnāxu î gu Jesuba sao. (Mat. 19:27) ǀNî gu ge khoen xa ǃgâi tamase gere hâ-ūhe Jesub di ǁkhāǁkhāsabe kai gu ge o. (Jhn. 9:22) Māsenxase gu ge nē ǁguibade dī tsî ǃgoma gere hōǃâ, ǂgomǃgâ gu ge amaga Jesub a mîmaisa Mesia ǃkhaisa. (Mat. 16:16) Jesub ge ǃgamhe o gu ge kaise tsûaǂgao tsî ge ǂkhabuǂâi, ǀū gu ge ī amaga tae-i nî īsa. Jesub ge ge ǁnâuǃā tsū tama i ge hâ īsa, ǁîb ǁkhāǁkhāsabega tsûaǂgaosa ǁîb ge ǁō o. Tsîb ge ge ǂan i ǁîgu ǂkhabuǂâis ge ǂkhari ǂgoms xa ǃaromahe tama hâ isa. ǁNā-amagab ge khâisab ge hō tsēs ai ǁîb ǀhōsana ge ǂkhâǃnâ tsoatsoa. Aiǁgauseb ge Maria Magdalenas aiǃâ ge ǂhai, ǀhobas tawas ǂnû tsî ra ā hîna. (Jhn. 20:​11, 16) Nē ǀgam ǁkhāǁkhāsabe kha Emmaus ǃoa ge garu īkha tawas tsînab ge ge ǂhai. Tsîb ge Apostel Petrub tawas tsîna ge ǂhai. w24.10 13 ¶5-6

Sadu ǀgôa-e hui re î-i nauna ǁguiǃāba tae-i ǃaroma i Kuru-aob ǃnâ ra ǂgomsa. Sadu ǀgôa-e huis ǃaroma i ge Jongmense vra—Skepping of evolusie? ti hâ khomaiǃâde jw.orgs ai a hō ǁkhā. O i ge sadu ǀgôa-e a ǁhûi ǁkhā mâ ǁguiǃā ǀgauba i ra ǁnâuǃāsa tsî i mati nauna a hui ǁkhāsa în ǁnâuǃā Kuru-aob hâsa. ǂKhâǃnâ nî re în ǀguiǃupu tsî ǁnâuǃāxa ǀgaub ǃnâ ǁîn ǂgomsa ǁguiǃā. Tsî i ga khoe-e hâ o nē xū-i xa ra ǃhoa ǂgao-e, a-i ǁî-i ǀkha ǁgamǀhaosa ūhâ. Aiǁgause i ga ǁî-i skol ǀhōsa-e mî o: “Tita ge mû ta ra xūn ǃnâ ǀgui ra ǂgom, tātsē ta ge Eloba mû tama hâ.” O i ge ǂkham Xristeǁî-e aiǁgause a mî ǁkhā: “Mûnan-ai re ǃgarob ǃnâts ge ra ǃgû dorpa xu ǃnūse. Tsîts ge tsauba ra hō îxase ǀguidi ǀkha omhe hâba. Matits nî ǂâi? ǁNā tsaub ge khoe-i xa ge omhe. ǁNā i ge a ama sida ǃhubaib tsî hoa ûitsama xūn xa, khoe-i ge nēn hoana ge kuru.” w24.12 18 ¶16

Hoa da ge daoǁgausa ǂhâ hâ î da ǂhâǂhâsa mîǁguiga dī. Nē daoǁgaude da ge ǃgōsase ǀhaohâb ǃûi-aogu tsî gagasise ǀgaisa ǃgâsana xu ra hō. ǁÎn ga sida xa ǁkhara o da ge nî ǂâi ǁîn ǀapemādi nētsē a hui da ǁoasa. Jehovab ge ra ǂhâba î da ǁkhara ǃgâsana xu ǁkhāǁkhāsen. ǁÎn ge sida xa gaxuse ûihâ tsî ǂâuna ǁaeba ge ūhâ i în ûib xa ǁkhāǁkhāsen tsî gā-ai mîǁguiga dī. Elobmîs ǁaeb ǃnâb ge Jehovaba ǂgomǂgomsa ǁkhara ǃgâsaga gere sîsenū, î gu ǁîb khoena ǂkhâǃnâ tsî daoǁgau. Aiǁgause Moseb, Davidi tsî Apostel Johaneb tsîn khami. ǁÎgu ge ǃkharagagu ǁaen ai ge ûihâ i tsî ǁîgu di mâsigu ge ge ǃkharagagu-i. ǁŌgu nîs aiǃâ gu ge gā-ai ǀāpemāde ǂkhamkhoena ge mā. Hoa ǃnona aogu ge Jehovaba ǁnâuǀnams di ǂhâǂhâsasib xa ge ǃhoa. Nēsi da ga ǂkham tamas ka io kairas tsîn hoan ǃnâ da ge ǃgâiba ra ǀama ǁîgu ǁnamade xu.—Rom. 15:4; 2Tim. 3:16. w24.11 8 ¶1-2

Noaxi tsēdi ǃnâb ge Eloba khoena ge mîba în tā ǀaoba ǂû. (Gen. 9: 3, 4) Jehovab ge Israelǁaes tsîna ge mîba în tā ǀaoba ǂû. Khoe-i hîna ǀaoba ra ǂû-i ge nî “ǃgamhe.” (Lev. 7: 27, NW) Jesub ge Jodeǁîna ge mîba în Elob mā hâ ǁgaragu hoaga ǁnâuǀnam. (Mat. 5:​17-19) ǁNā-amaga i ge a mîhe ǁoa ǁîb gere ǂhâbasa în Jodeǁîna ǁîb sorosa ǂû tamas ka io ǁîb ǀaoba ā. Jesub ge aiǁgauna gere sîsenū khoen ǀkhab gere ǃhoa o. ǁKhā xū-eb ge Samaritanǁî tarekhoes ǀkhab ge ǃhoa o ge dī: “ǁNā ǁgam-i tita ra ǁî-e mā-i ge ǁî-i ǃnâ nî dâu ra ǀau kai, ǀamo ûib kōse.” (Jhn. 4:​7, 14) Jesub ge ge mî tama hâ i Samaritanǁî tarekhoes ǁnā ǀausa xu ǀguis ga ǁgamme ā, o ǀamo ûiba nî hōsa. ǁNās ǁkhās khami i ge Kapernaums ǃnâb ge Jesuba gere ǃhoa-ū khoena ǁîb di sorosa ǂû tsîn ga ǁîb ǀaoba ā, on ǀamo ûiba nî hō ti ge ǂâibasen tama hâ i. w24.12 9 ¶4-6

Jehovaba ra ǃoaba aogu ge nî ǂanbasen î gu tā ǃhūbaib ǃgâi tama ǂâiǀgaub tarekhoedi dib xa tsâǀkhāhe. Tae-i ǃaroma? ǀGui ǃaromas ge khoe-i ge ǂâi i ra xūn xa ǃgâi tamase ra tanisen kaihe. Paulub ge ǂkhauhesa Xristeǁîn Romes ǃnâ ge hâ îna ge ǃkhâikhom în “tā nē ǃhūbaib xa gaoǂāmhe.” (Rom. 12:​1, 2) Paulub ge Romeǁîna nē sîǂkhanisa xoaba, on ge ǁnā ǀhaohâb ǃnâ ge hâ i ǃgâsana kurina ǀnai ge Xristeǁî ī. Paulub mîdi ge ra ǁgau, ǀnîn ge ǁîn ǂnamipe ge hâ i ǂâiǀgaub xa tsâǀkhāhe hâ isa. ǁNā-amagab ge ǁîna ge ǂkhâǃnâ în ǁîn ǂâiǀgaub tsî tanisen ǀgaub tsîna dawa. Xristeǁî-aogu tsîn ge nētsē ǁnā ǁnamasa a sîsenū ǁkhā. Tsûtsûsase gu ge ǀnî aoga ǃhūbaib di ǂâiǀgaub xa tsâǀkhāhe tsî ǁîgu tarade ǁgaise ra hâ-ū. w25.01 9 ¶4

ǀHaohâb ǃûi-aogu ge nētsē ǂgui xūna ra dī, ǃgâiǂhôasa gu ge ra aoǁnâ. (2Tim. 4:5) ǃGâi aiǁgause gu ge ī ôasase aoǁnâ sîsen-e dīs ǃnâ. Sida ǂkharis ǃnâ gu ge aoǁnâ sîsen-e ra kōǃgâ tsî gu ge ra hui da î da ǃgâise aoǁnâ tsî ǁkhāǁkhā. ǀKhomxaǂgao tsî ǀkhā-e ǁhûi tama ǀgoraǃgâ-aos tsîna gu ge ī. Khoe-i ga ǀhaohâb ǃnâ ǀgaisa ǁoreba dī, o gu ge ǀhaohâb ǃûi-aoga ǁî-e ra hui î-i ǁî-i ǀhōsagusisa Jehovab ǀkha ǁkhapa omkhâi. ǁKhā ǁaeb ai gu ge ǀhaohâba ǃanuse ra ūhâ. (1Kor. 5:​12, 13; Gal. 6:1) Hoan ǂamai gu ge ǃûi-aogu ase a ǂansa. (1Pet. 5:​1-3) ǃGâise aiǂhumisa ǃhoadi, Elobmîs ai ǃgaoǃgaosade gu ge ra mā. ǃGarise gu ge ra dītsâ î gu hoa khoena ǀhaohâb ǃnâ ǂan tsî ǁîna omdi ai sari. ǀNî ǀhaohâb ǃûi-aogu ge salga om tsî ra dī-ūnu, ǀkharib kai ǀhaode aiǂhomi tsî ǀaeǃkhōdi ǀkha ra sîsen komites ǃâ. Tsî ǀae-oms ǃnâ ǁgoe ǃgâsana ra sari nau ǁgaumâidi xōǀkhā. ǀHaohâb ǃûi-aogu ge ǃgarise ra sîsen sida ǃaroma. w24.10 20 ¶9

Elobmîs ge ra mî xoremarib ge matarehe amaga da ge ge ǃnoraǃnorahe. Apostel Petrub ge nēsa sao rase ra ǁguiǃā: “ǁÎn ge hîkākāhe ra xūn hîa ǀhaiǀurib tsî ǃhuniǀurib tsîn khami ge ī tama hâ i, xawe du ge ǃgomǀgausa ǀaob Xristub, ǂnao-o tsî ūo ǁkhaob dib ǀkha ge orehe.” (1Pet. 1:​18, 19) Xoremarib ǁguibas ge ge ǃaroma î da ǁoreb tsî ǁōba xus tsîna ǃnora kaihe, hîna ǂgui ǃgomsiga ra ǃaroma ga. (Rom. 5:21) ǁNā-amaga da ge Jehovab tsî Jesub ge dība da xūna kaise ra ǃgôaǃgâ, ǃgomǀgausa ǀaob ge a ǃnoraǃnora da amaga. w25.02 5 ¶15-16

Mati da ǃâitsâb tsî ǁoreb tsîna nî mâǃoa? ǃGaoǃgâ re, tae-e da a ǁkhāǁkhāsen ǁkhāsa ǂKhoamîdi 7ǁî danaǃās ǃnâ ra ǃhoaǃgaohe ǂkhamkhoeba xu. ǁÎb ge ǀai-aos ǀkha ge ǀai 22ǁî ǁaraǃās ge ra mîba da nē ǂkhamkhoeb ge ‘ǃnoesase’ ǁîsa a saosa. ǃKharu go ǁaraǃādi ra ǁgau khamib ge ǁîba, ǃgâi tama mîǁguiga ge dī hîna ge supu kai ga îb ǁore. Tae-eb ge nē ǂkhamkhoeba dī ǀgaisa ǁorebab nî dīs aiǃâ? ǂGuroseb, ge ǃui karab ai “tarekhoes ra hâ ǁhôas ǀgūse ǃkharu tsî ǁîs hâǃkhaisǀî garu daob ai” ge ǃgû. Tsîb ge ǁîs omsa ǃoa ge ǃgû. (ǂKhm. 7:​8, 9) Nē tarekhoesab ge mû xaweb ge ge tawasen tama hâ i. ǁÎs xa ǁoahesab ge ge mā-am tsî dīs ge ǁguibadi xas ra ǃhoa hîna gere ǃgâ. ǁÎs ge gere ǂhâba îb ǁîs a ǃgâi khoe ti ǂâi. (ǂKhm. 7:​13, 14, 21) Nē gâre xūnab ga dī tama hâ, ob ge nē ǃâitsâna mâǃoa tsî ga ǁore tama hâ. w24.07 16 ¶8-9; 19 ¶19

Jehovab ge tsū ǁorena dī tsî ǃhobasen tamana mā-am tama hâ în ǀhaohâb ǃnâ hâ ǀgara. ǀNîn ge a ǂâi ǁkhā Jehovab a ǀkhomxaǃnâ amagab nî mā-amsa î-i ǃhobasen tama khoe-e ǀhaohâb ǃnâ hâ ǀgara. Xawe Jehovab ge ǁnāti ī ǀgaub ǃnâ ǀkhomxaǂgaosiba ǁgau tama. Jehovab a ǀkhomxaǃnâ xaweb ge hoa ǀgauga ūǃoa tama. ǁÎb tsū tsî ǂhanu tama xūna ra mû ǀgaub ge dawa tama. (Jud. 4) Jehovab ga ǃhobasen tama ǁore-ao-e mā-am î-i ǀhaohâb ǃnâ hâ ǀgara, os ge ǁnāsa ga ǀkhomxaǃnâ tama hâ, ǀhaohâb ǃnâ hân hoan nî tsûtsûhe amaga. (ǂKhm. 13:20; 1Kor. 15:33) Noxopa da ge ra ǁkhāǁkhāsen Jehovab ǂgao tamasa î-i ǀgui î xare-e dīkākāhe. ǁÎb ge ǁkhāb as kōse khoena ra sâu ǂgao. ǁÎb ge ǀkharaǀkharasen tsî ǁîn ǀhōsagusisa ǁîb ǀkha ra ǃgâiǃgâi ǂgao khoena ǀkhomma ra ǁgau. (Ese. 33:11; 2Pet. 3:9) ǁNā-amagab ge khoeba Korintes ǃnâ ǃhobasen tsî ǁîb ǀgauga dawa, ob ge Jehovaba apostel Pauluba ge daoǁgau îb ǀhaohâba ǁguiǃāba în ǁnā khoeba ǀûba tsî ǁkhoreǁhare. w24.08 17 ¶7; 18-19 ¶14-15

Gūn tsî pirin xa hâ ǂkhōs ǃnâb ge Jesuba ge mî, ǁîb khoena ǃgâiǂhôasan ra ūǃoas ǃoagu nî ǀgoraǃgâsa tsî nî kōsa matin ǁîb di ǂkhauhesa ga ra ǂkhâǃnâ ǀgausa. (Mat. 25:​31-46) “Kai ǂōǂōsib” ǁaeb ǃnâb ge ǁîba nî kō ǁîn a gūn tamas ka io pirisa Armagedons aiǃâ. (Mat. 24:21) ǃÛi-aob gūna pirina xu ra ǀgora khamib ge Jesuba ǁnān ǂkhauhesa ga ǂgomǂgomsase ra ǂkhâǃnâna, ǂkhâǃnâ tama hâna xu nî ǀgora. Elobmîs ge ra mî Jesub ga Jehovaba ǀgoraǃgâba, ob hoaǁae khoena ǂhanu-aise nî ǀgoraǃgâsa. (Jes. 11:​3, 4) ǁÎb ge khoen tae-e ra dīs, ǂâis tsî mîsa ra ǃgaoǃgâ. Nēs ge matin ǂkhauhesa ǃgâsaga ra hâ-ū ǀgaub tsîna ǃkhōǂgā hâ. (Mat. 12:​36, 37) Jesub ge nî ǂan ham-i ǂkhauhesagu tsî ǁîgu sîsenni tsîna gere ǂkhâǃnâsa. ǀGui ǂhâǂhâsa ǀgaub khoe-i Xristub di ǃgâsaga a ǂkhâǃnâ ǁkhā ǀgaus ge aoǁnâ sîsen-e dīsa. w24.09 20-21 ¶3-4

Xū-e da ga ǀū, o da ge Elobmîs tae-e nēs xa ra mîsa nî ôaǃnâ. Aiǁgause, ǂkhamkhoe-i Jehovab ǁî-i ǀkha ǁae tama ti ra ǂâi-i xa ǃgaoǃgâ re. Nē dîsab ôaǃnâ tamase nî ǁnāxū tsî nî ǂâi Jehovab ǁîb ǀkha ǁae tama ti? Hî-î, ǁîb ge Elobmîsa nî ǁkhāǁkhāsen tsî Jehovab amase ra ǂâiǀgauba nî ôaǃnâ. Elobmîsa da ga khomai, oi ge Jehovab sida ǀkha ra ǃhoa khami ī. Elobmîsa khomais xa da ge ǃnāsa-e nî dī, Jehovab sida dîde nî ǃereamsa da ga ǂhâba o. Xoade da ge nî ôaǃnâ, î da ǁnā dîdi ǃereamde hō. Nēsa dīs ǃaroma da ge Elobmîs ai ǃgaoǃgaosa ǂkhanin ǃnâ ôaǃnâde nî dī. (ǂKhm. 2:​3-6) Jehovaba ǃoa ǀgore tsî da ge nî ǂgan, îb hui da sida dîdi ǃereamte hōsa. Elobmîs tsoatsoadi tsî sida mâsib ǀkha hui da ǁkhā ǃgāsasib tsîna da ge nî ôa. w24.10 25 ¶4-5

Jehovab ge ǁîb a ǂhâǂhâsa ti ra ǂâi ǃgâsab ra dī xūna tātsēs tsîna ǀkhae tide. (1Kor. 10:​24, 33; 13:4) ǀNî ǁaegu ai gu ge Jesub ǀkha ge ǀgū ǀhōsagusisa ūhâ i ǃgâsagu tsîna ǀnî ǁgaumâite gere ǂhâba. Xawe gu ge ǃgâi tama ǂâiǀgauba ge ūhâ i. ǂÂi re Jakobub tsî Johaneb tsîkha ge dī xū-i xa. ǁÎkha ge Jesuba ge ǂgan îkha ǀō-aisa ǁgaumâisa ǁîb Gaosib ǃnâ hō. Jesub ge ge koakha tama hâ i, nē ǀō-aisa mâǃkharos ǂhâba kha geres ǃaroma. Hoa 12 apostelgab ge ge mîba: “Sago xu ga ǂgaeǂgui-ao ǂgaob hoab ge nî hoan di ǃoaba-ao kai. Tsî ǂguro ǂgaots ka ots ge nî hoan di khobo kai.” (Mrk. 10:​35-37, 43, 44) ǃGâsagu hîna ǃgâi ǂkhâǃnâsa ūhâ gu nauna huisa, gu ge ǀhaohâba ǂgui ǃkharagagu ǀgaun ai nî hui.—1Tes. 2:8. w24.11 15-16 ¶7-8

Mîǁguiga da ga dī ob ge ǀnamma nî hui da, î da “nau-i” tsâsiga ǂgurose mâi tsî ǃgamǃgamsenxa. (1Kor. 10:​23, 24, 32; 1Tim. 2:​9, 10) ǁNās ge nî ǂkhâǃnâ da, î da nau khoena ǀnammi tsî ǃgôasib tsîna ra ǁgau mîǁguiga dī. Kaise a ǂhâǂhâsa mîǁguiba du ga dī, o kō re tae-e du nî dīsa î du nē mîǁguiba sîsenǂui ǁkhā. Jesub ge ge ǁkhāǁkhā da, î da mari-i ‘ǂganǀgauba ǃgôa’ tsî kō xū-e da nî dīs aiǃâ. (Luk. 14:28) ǃGaoǃgâ re ǁaeb, sîsenū du nî xūn tsî ǁguiǂgāsens hîna du ǂhâ hâsa î du mîǁguiba sîsenǂui ǁkhā. ǀNisi du ge sadu omaris ǁanin ǀkha a ǃhoa ǁkhā î du kō ǁîn mati sadu mîǁguiba ra ǂkhâǃnâ ǀgausa. Tae-i ǃaroma i nē ǀgaub ǃnâ ǀapeǁguisa a ǂhâbasa? Nēs ge a hui du ǁkhā, î du mûǂan sadu mîǁguib ǀkharaǀkharana ǂhâhâsa. Tamas ka io i ǀnî hâ mîǁguiba dīsa a ǂhâbasa ǃkhaisa. Sadu omaris ǁanin ra mî xūna du ga ǃgâ, on ge māsenxase sadu ǀkha ǀguiba a sîsenǀhao ǁkhā î du nē mîǁguiba sîsenǂui. w25.01 18-19 ¶14-15

Jesajab ge ǀaro tsî ra mî, ǃaromasa da ūhâsa î da “ǃgâiaǂgao” gagasi paradais ǃnâ. Nē gagasi paradais ge Jehovab di kurus ǃâ. (Jes. 65:​18, 19) ǁNā-amaga da ge buru tama Jehovab sida ra sîsenūsa, î da khoena hui în nē ǃhūbaib di ǀapeǂhumide ǁnāxu Elob xa hâ amaba ǁkhāǁkhā tamate. Tsî ǁîna hui în sida gagasi paradais ǃâ kai. Amab ǃnâ da hâ amaga da ra hōǃâ ǀkhaegu ǃgao da ge kaise a ǂkhî. ǂKhâǃnâhe da ge ra î da nauna nē ǀkhaegu xa mîba. (Jer. 31:12) Kaise da ge ra ǃgôaǃgâ tsî da ge a ǂkhî gagasi paradais ǁanǂgāsaben ase da ūhâ ǃâubasens ǃaroma. Elobmîs ge ra mîmâi ‘omde om tsî da ǁîdi ǃnâ nî ǁan . . . draibeǃhanaga ǂgā tsî ǁîgu ǂûna nî ǂûsa.’ Jehovab xa da nî “ǀkhaehe” amaga. ǃNorasa tsî ǃgâi ûib ǂâibasensa ūhâbab ge ra mîmâiba da. Mâ ǀguiǀguibe khoe-i hoa-i di ǂhâsigab ge a ǂan tsîb ge “ûitsaman hoana ǂhâban hân ǀkha [nî] ǁâǁâ.”—Jes. 65:​20-24; Psa. 145:16. w24.04 22-23 ¶11-12

Jehovab ge sida ǃgareǀui ǁkhā, ǀoasase da ga ǁîb ai ǂgomaiǂnûi o. ǂGomǃgâ da ge ra ǁîba da ga ǃgom ǁaegu ǃnâ ǁnâuǀnam, o da ǃgâiba nî ǀamasa. (Jes. 48:​17, 18) ǁÎb ǂkhâǃnâsa da ra hōǃâ khami i ge ǁîb ǃnâ da ūha ǂgomǃgâsiba nî kai. Jehovab ge kai ǀuis tamas ka io ǃhommi ǀgui ǃkhais ai ra mâǀgarab khami ra mâǀgara. Jehovab tanisen ǀgaub tsî ǂâibasens tsîn ge dawa tama. (Mal. 3:6) Adammi tsî Eva hâra ge Jehovab ǃoagu a khâikhâisen, ob ge Jehovaba khoesibab ūba hâ ǂâibasensa ge dawa tama hâ i. Apostel Paulub ge xoa khamib ge Jehovaba “ǁî-aitsama a ǀūxūsen ǁoa.” (2Tim. 2:13) Tae-i ǀgui-i ga ī tamas ka io naun ra dī xūn xa ǃaromahe hâseb ge Jehovaba tātsē ǁîb ǂâibasensa dawa tide. Jehovab tātsē dawa tama amaga da ge a ǂan, ǁîb ǃgom ǁaegu ǃnâ nî hui dasa tsî ǁîb mîmâisa nî ǃkhōǀgara ǃkhaisa.—Psa. 62:​6, 7. w24.06 27-28 ¶7-8

Dî-amgu ro ra ǁaeb ǃnâ i tae-e nî hui mîǁguisa, ǃgamme ro nîs tamas ka io ro ǃgamme tidesa? Kaise ǃgâise ǂangu re. Īǁkhā i ge a ǀnaits ge ǀnî xūrona ǂan isa ǁnā khoe-i xa dî-amguro nîs aiǃâ. Xawets ge nēsi ǃēsa ūhâ, îts ǁnā khoe-i ‘îsasib ǂgaoba xu hâba’ ǂan. Dî-amguro ra ǁaeb ǃnâts ge ǁnā khoe-i Jehovab ǀkha ūhâ ǀhōsagusis, ûiǀgaub tsî ǂâiǀgaub xas tsîna ǃnāsase ra ǁkhāǁkhāsen. ǁAeb ra ǃkharu khamits ge ǁnā khoe-i xa saora dîde a ǃeream tsoatsoa ǁkhā: ‘Sîma ǀnamgu, tanigu tsî a kōǃgâ gu ǁkhā?’ (ǂKhm. 31:​26, 27, 30; Efe. 5:33; 1Tim. 5:8) ‘Sîma ǁaeba ra ǁamaǂui tsî hâ nî ǂhâsiga ra kōǃgâ? Supu-e ǁî-i ǃnubusiga kō ǃkharusa?’ (Rom. 3:23) ǂÂis ǃnâ ūhâ re, ǂanguro ra ǁaeb ai: Saro ǀgui xūn xa ǃgâibahes ge ǂhâbasa tama xawe mati ro saro ǃkharagagu ûiǀgauga ra sîsenǀhaos ge a ǂhâǂhâsa. w24.05 27 ¶5

Gao-aob Davida ǀgaisa ǁore-e ge dī. Xaweb ge kēbo-aob Natana a mîba bi o, Jehovab ra tsâ ǀgausa ǁîb ǁoren xa, ob ge Davida ǃgamǃgamsenxase ge ǃhobasen. (Psa. 51:​3, 4, 17) Gao-aob Hiskiab tsîn ge Jehovab ǃoa-ai ge ǁore. (2Kro. 32:25) Davidi khamib ge Hiskiaba ǃgamǃgamsen tsî ge ǃhausen. (2Kro. 32:26) Nēn hoan ǂam-aib ge Jehovab xa ǂgomǂgomsa gao-aob ase ge mûhe, “ǃKhūba a ǃgâibana” gere dība. (2Gao. 18:3) Tae-e da ra ǁkhāǁkhāsen? ǃHobasen da ge nî sida ǁorena xu tsî nî ǁkhaubasen î da tā ǁkhā ǁorena ǁkhāba dī. Mati da nî dī ǀhaohâb ǃûi-aogu xa da ga ǁnamahe o sida ǂkhariro a ti ra ǂâi xū-i ai? Tā da ge Jehovab xa da ǀnamhe tama ti nî tsâ tsî gu ǀhaohâb ǃûi-aoga sida ǃoagu hâ ti. ǃGâi gao-aogu Israels di gu tsîn ge ǁnamahe tsî gere ǂgōǀauhe. (Heb. 12:6) ǁNamahe da ga, o da ge (1) ǃgamǃgamsenxase nî ūǃoa, (2) ǂhâbasa ǀkharaǀkharana dī tsî (3) nî aiǃgû î da Jehovaba sida ǂgaob hoab ǀkha ǃoaba. Sida ǁorena xu da ga ǃhobasen ob ge Jehovaba nî ǀûba da.—2Kor. 7:9, 11. w24.07 21 ¶8; 22 ¶9, 11

ǁOre-ao i ge ǃhobasen tama ī ga īo ǀhaohâba xu nî ūǂuihe, ǁî-i ǀhaohâb ǃûi-aogu huiba ūǃoa ǂgao tama hâ amaga. (2Gao. 17:​12-15) ǁÎ-i tanisen ǀgauba xu-i ge ra ǁgau Jehovab ǁgaraga i ǁnâuǀnam ǂgao tama hâsa. (Deu. 30:​19, 20) ǂAnǂans ge ra dīhe mî rasa ǁî-i Jehovab ǃoaba-ao tamasa. Nē ǂanǂans ge ǁî-e taotaos ǃaroma dīhe tama hâ. Xawe i ge ǀhaohâba ra hui în Elobmîs daoǁgausa hōhōǃnâhe mî rasa, î du ǁî-i xare-i ǀkha tā “habagu tsî ǁkhāti ǂûs xawesa” dī. (1Kor. 5:​9-11) ǁNā daoǁgaus ge ǃaromas ǃgao māhe hâ. Apostel Paulub ge ge xoa: “ǂKhari khūkhū-i ge ǀâpereb hoaba ra khū kai.” (1Kor. 5:6) Nē ǃhobasen tama ǁore-ao-i ga ǁî-i ǁoreb ǃgao ǀhaohâba xu ūǂuihe tama ī, on ge nau ǃgâsana a ǂâi ǁkhā ǂhâbasa tama ī hâsa Jehovab ǂhanu-ai ǁgaraga ǁnâuǀnamsa.—ǂKhm. 13:20; 1Kor. 15:33. w24.08 27 ¶3-4

Jehovab khami da ge toa tama ǀgaiba ūhâ tama tsî da ge nauna ǀgaiba a mā ǁoa ǁîb ra dī khami. Xawe da ge ǁîba a ǁgae ǁkhā sida ǀgaiba sîsenū tsî nauna huis ǃnâ. Aiǁgause da ge kaira ǃgâsana hui tamas ka io ǀaesen hâna ǁîn omde ǃanuba tsî xūna ǁamaba ǁkhā. Tamas ka io da ge māsenxase sala ǃanu tsî khôa hâ xūna a kuru hui ǁkhā. ǂÂis ǃnâ ūhâ re sadu ra mî xū-i ge nau khoena a ǂkhâǃnâ ǁkhā. Sadu xa khoahesa xu ǃgâiba a ǀama ǁkhā khoe-i xa du ǂâi ǁkhā? ǁKhaeǂgaosa ǂhâ hâ khoe-e du a ǂan? Ti i nî īs ga o ǁnā khoe-e ǂanǂan re ǁî-e du ra tsâbasa. ǁÎnats ge sari, bel, karkisa xoaba, e-mailsa sîba tamas ka io smsa xoaba ǁkhā. Tā mî du nî xūn xa ǂâiǂhansen. ǂGaoba xu hâ ǀoro mîdi ge ǀnîsi sadu ǃgâsa i ǂhâhâ xū-e, i-î ǂgomǂgomsase hâ ǀgara tsî ǁnā mâsib xa ǃgâise tsâ.—ǂKhm. 12:25; Efe. 4:29. w24.09 28 ¶8-10

ǀHaohâb hui-aob asets ga nēsi ǃoaba, ots ge ǀnîsi ǃgarise ge sîsen îts ǂhâbasa ǀgauba ūhâ tsî ǀhaohâb ǃûi-ao kai. Nē ‘ǃgâi sîsen-ets’ ra sīǃnâ ǂgao? ǀHaohâb ǃûi-aob sîsen-e tae-e ǃkhōǂgā hâ? ǁÎb ge ǃgâi aiǁgausa aoǁnâ sîsenni ǃnâ ǁgau, ǃgâsana gagasise ǂkhâǃnâ, ǁkhāǁkhā tsî ǁîn ǂgomsa Jehovab ǃnâ ra ǀgaiǀgai mî tsîb ra dī xūn ǃnâ-ū. ǁNās ǃaromas ge Elobmîsa ǃgarise ra sîsen ǀhaohâb ǃûi-aoga “mādi” ase ra ǁguiǃā. (Efe. 4:8) ǃGâsaba tae-e a dī ǁkhā, îb ǀhaohâb ǃûi-aob ase ǃoaba? ǀHaohâb ǃûi-aob ase ǃoabas ge sîsenne hōs ǀkha ǀgui tama hâ. ǃNāsa ǁaebats ga sîsen-e ôa, ots ge ǁnā sîsenni ǂansa nî ūhâ. ǀHaohâb ǃûi-ao kais ge ǁnāsa xu ra ǀkhara xawe ǀhaohâb ǃûi-ao kaits ga ots ge ǁkhāǁkhās tamas ka io aoǁnâs xa ǃnāsa ǂansa nî ūhâ. ǀHaohâb ǃûi-ao kai ǂgaots ga ots ge Elobmîs ǃgaoǃgaodi hîna 1 Timoteub 3:​1-7 tsî Titub 1:​5-9 ǃnâ hâ te nî sīǃnâ. w24.11 20 ¶1-3