Oktoberi

ǀHaohâb ǃûi-aogu, ǁnâub komites, ǃnarimâra mûǂam-aogu tamas ka io ǂGaeǂguira soros tsîn ge daoǁgaude ra mā da î da Jehovaba ǃoaba ǁkhā. Xawe da ge ǀnîsi ǁîgu ra mā daoǁgaude ǁnâuǃā tama hâ. ǀNîsi da ge nē daoǁgaudi mati sada a tsâǀkhā ǁkhā ǀgaus xa ǀgui a ǂâi ǁkhā. Īǁkhāsib ga hâ, o da ge ǁnā daoǁgaude go mā ǃgâsagu ǃnubusigu ai a kō ǁkhā. ǂGoms ǃnâ da ga ǃgû, o da ge ǂgomǃgâsiba ūhâ Jehovab ǁîb ǀapeǂhumisa ra daoǁgausa. ǁNās ǀkha da ge ǃkhaese ra ǁnâuǀnam ǃgâi mûǂui ǀgaub ǀkha. (Heb. 13:17) Daoǁgaude da ga sao, o da ge a ǂan ǀhaohâb ǀguiǃnâxasib ǃnâ nî hâ ǀgarasa. (Efe. 4:​2, 3) Jehovab ai da ge ra ǂgomaiǂnûi, ǀoasa kurusa ūhâ tama aogu ǃnâ-ūb ra daoǁgauda sa tsî da ga ǁîga ǁnâuǀnam ob ge nî ǀkhae da. (1Sam. 15:22) ǂGomǃgâ da ge ra Jehovab, ǂhâbasa î ga o daoǁgaude nî ǀkharaǀkharasa. w25.03 23-24 ¶13-14

Kaise da ge ǀō-aisa ǁaeb ǃnâ ûi hâ. Mâtsēs hoasa da ge ra mû, mati i Elobmîs kēbode ra dīǀoaǀoahe ǀgausa. Aiǁgause da ge ra mû, “ǃkhawagas di gao-aob” tsî “gao-aob ǀapas dib” tsîn mati ra ǃkham ǀgausa, mâp hoab ǃhūbaiba ra ǂgaeǂgui ǂgao amaga. (Dan. 11:40) Mû da ge ra matis ǃgâiǂhôas Elob Gaosib disa ǃhūbaib ǂhawase ra aoǁnâhe ǀgausa tsîn miliundi khoena ra ǁhûisa în Jehovaba ǃoaba. (Jes. 60:22; Mat. 24:14) ǂÂuna gagasi ǂûna da ge “ǂhanu ǁaeb ai” ra hō. (Mat. 24:​45-47) Jehovab ge aiǃgû tsî ra hui da î da ǁnâuǃā ǂhâǂhâsa xūn ǀgūǁae nî īna. (ǂKhm. 4:18) ǂGomǃgâ ǁkhā da ge a kai ǁgâiǀāb ga tsoatsoa, o da ǂhâ da hâ xūna nî ǂansa î da ǂgomǂgomsase mâǀgai tsî ǀguiǃnâxase nē ǃgom ǁaeb ǃnâ mâǃkharu ǁkhā. Xawe da ge nî mûǂan ǀnî xūn hâsa sida a ǀūna hānîǁaeb ǃnâ nî īna. w24.05 8 ¶1-2

Psalmdi xoa-aob ge mîǁgaiǁgais xa ra ǃhoa. Mîǁgaiǁgaisa tae-e ra ǂâibasen? Nēs ge khoe-i xa ama tama ǂhôana ǃhoasa ǃoa ra ǁnaeǁgau, khoe-i ǃgâi ǀonsa a ǁgaiǁgai ǁkhā-e. Psalmdi 15:3 ge ra hōhōǃnâ da Jehovab ǃhaokhoen ǁîn ǁanǁare-aona tsūdī tamas ka io mîǁgaiǁgai tamasa. (Psa. 15:1) Nēsa tae-e ǃkhōǂgā hâ? ǂÂibasen tamase da ge khoe-e a mîǁgaiǁgai ǁkhā, ǁî-i xa da ga ǃgâi tama xūna mî o. Aiǁgaus ase da ge sao ra aiǁgaudi xa a ǂâi ǁkhā: (1) ǃgâsas ge aimâba-aos ase ra ǃoaba ǀû, (2) ǃgamme hâ khoe-aogura ge Betels tawa ra ǃoaba ǀû tamas ka io (3) ǃgâsab ge ǀhaohâb ǃûi-aob tamas ka io hui-aob ase ra ǃoaba ǀû. Nēs ge ǃgâi tamase nî ǁnâusen ǃgâsana du ga mîba o, nē ǃgâsan ge tsū xūnan ge dī amaga a ǃoaba ǀû ti. Sada a ǀū ǃaromadi ge ǀnîsi hâ, tae-i ǃaroman ge ǁîna a ǃoaba ǀûsa. Jehovab tentommi ǃnâ a ǃhaokhoe-i ge “ǀgūkhoe-i â-i ǃoagu ǂkhabadī tama-i, ǀgūkhoe-i â-e ǃgôaǁnâ tama-e.” w24.06 11 ¶11-13

Jehovaba da ūba hâ ǃaoba da ga ǀgaiǀgai ǂgao, o da ge mîǁguihe da ga dī ǁae-i hoa-i ai nî ǂâi, tae-i Jehovaba nî ǂkhîǂkhîsa. Elobmîs ǃnaeǃkhaidets ra khomai o dîsen re, ‘ǁnāpa ta ga hâhâ, o ta ga mâ mîǁguiba ūhâ?’ Aiǁgause, mûnan-ai re sadu ra ǁnâu hîna gu nē disi dana ǂgaeǂgui-aoga Israelǁaesa ra mîbasa ǁîn Kanaanǁîna ǃkham dan tidesa, Jehovab ge mîmā ǃhūba gu ǃkhē toa hâs khaoǃgâ. ǁNā ǃnuriba ǂgom tsîts ga khoesi ǃaob ǃnâ māǁnâsen hâ? Tamas ka io i ga sa ǀnammi Jehovabats ūba hâba a ǀgaisa khoena ǃaos xa? Hoa Israelǁaes khoen ge Josuab tsî Kaleb amaba ra ǃhoasa ge ǂgom tama hâ i. ǁNās ge ge ǃaroma îb Jehovaba mā-am tama i, în ǁnā Israelǁîna mîmâisa ǃhūb ǃnâ ǂgâ.—Num. 14:​10, 22, 23. w24.07 10 ¶7

Kēbo-aob Hoseab taras Gomers ge Hoseaba ǀnî hâ aob ǃaroma ge ǀgora xu. Īǁoa ī ge i ǁîs nî ǀkharaǀkharasensa? Jehovab khoen ǂgaogu ǃnâ ra mûb ge Hoseaba ge mîba: “ǃGû, î ǁkhawa sī sa tarasa ǀnam, ǀnî khoeba ǀnam tsîs ra ǃgamekhôa xawe. Sadu ge ǃKhūb Israeli khoena ǀnams ǁkhās khami, ǀnî elon ǁga dabasen tsî draiben di narude a ǀnam.” (Hos. 3:1; ǂKhm. 16:2) ǃGaoǃgâ re Hoseab taras ge noxopa ǀgaisa ǁore-e gere dī. Xaweb ge Jehovaba Hoseaba ge mîba îb ǁîsa ǀûba tsî ǁîb taras ase ū-oa. ǁÎb aiǁgausa ra sîsenūseb ge Jehovaba ǁîb khoena gere ǁkhāǁkhā ǂgao matib ǁîb xa ra tsâsa. Kaise ǁgai xūnan gere dī xawes tsîn hoan ǃnâb ge noxopa ge ǀnam nî ī. ǁÎb ge ǁîb kēbo-aoga ǃnākorobe gere sî în hui-e în ǀkharaǀkharana ǁîn ûigu ǃnâ dī. Nē aiǁgaus ge ra ǁkhāǁkhā da Jehovab ‘hoa’ xūna khoe-i xa a ǂansa. Tsîb ǁîba ǀgaisa ǁore-e ra dī khoe-e nî huisa î-i ǃhobasen. w24.08 10 ¶7

Jode Xristeǁî kai gen ge kai ǀkharaǀkharana gere dī tsî nēs ge ge supu tama hâ i. Jodeǁîn ge Jehovab ǁhûisa khoen ase ge ǂansa i. ǂGui kurinas ge Jerusalemsa ge ǂhâǂhâsa ǃkhai i, Jerusalemsa gere ǂnûǁkhaeba gao-aob ge ǁnāpaxu gere ǂgaeǂgui. Hoa ǂgomǂgomsa Jodeǁîn ge Moseb ǂhanuga gere sao, ǁîn ǂgaeǂgui-aon gere ǁkhāǁkhāna. ǁNā ǁkhāǁkhādi ge ǂûs, aorekhoe sorosa ǃgaos xa hâ ǂâiǀgaugu tsî matin nau ǃhaodi ǀkha nî hâ ǀgaus xa gere ǁkhāǁkhā. Jesub ǁōb khaoǃgâb ge Jehovaba tempeli tawa gere dīhe ǁguibade ge ūǃoa tama hâ i. ǁNā-amaga î ge Jodeǁî kai ge Xristeǁîna ge supuba tama hâ i ǁîn ǃoaba ǀgauba dawasa. (Heb. 10:​1, 4, 10) ǀGaisa ǂgomsa ge ūhâ i Xristeǁîn, Apostel Petrub khamin ge nē ǀkharaǀkharana dīs xa ge ǃgombahe ī. (ǃNǃkh. 10:​9-14; Gal. 2:​11-14) ǁÎn ǀasa ǂgoms ǃaroman ge ǁnā Xristeǁîna Jodeǁî ǂgaeǂgui-aogu xa gere ǁgâiǀāhe. w24.09 9 ¶4

Jehovab ga ǁîb khoena ǁgaumâi-e mā, ob ge ra ǃâubasen în nē sîsen-e ǃgâi ǀgaub ǃnâ dī. (1Kor. 14:33) Aiǁgause, Elob ǂâis ge îs ǃgâiǂhôasa ǃhūbaib ǂhawase aoǁnâhe. (Mat. 24:14) Jehovab ge Jesuba aiǂhanuba ge mā îb ǁnā sîsen-e daoǁgau. Jesub ge ge kōǃgâ îs ǁnāsa ǃgâi ǀgaub ǃnâ dīhe. ǂGurokham ǁaeb Jerusalems ǃnâ i ge apostelgu tsî kai-aogu tsîna ǀhaohâb ǃûi-aose gere ǂnûǁkhae. ǁÎgu ge hoa ǀhaohâgu nî sao-ai mîǁguiga gere dī. (ǃNǃkh. 14:23) ǀHaohâgu ge ǃkharagagu ǃkhaidi ǃnâ tsoatsoahe khami gu ge ǀhaohâb ǃûi-aoga mâ ǀhaohâb hoab ǃnâ, ǃgâsana nē mîǁguiga gere ǂanǂan. (ǃNǃkh. 15:2; 16:4) ǃGâsan ge nē daoǁgaude gere ǁnâuǀnam amaga i ge ‘ǀhaohâga ǂgoms ǃnâ ǀgaiǀgaihe tsî ǃgôab ǃnâ tsēkorobe gere ǀarosen.’—ǃNǃkh. 16:5. w24.04 8 ¶1

Nisan 16 nî ǁgoaga di ge ǃgubis tarekhoede Jesub ǀhobasa ǃoa ge ī. (Luk. 24:​1, 10) Hā re î da kō tae-i ge Maria Magdalenas ǀkha a īsa. ǀHobas tawas ge sī, oi ge Jesub sorosa ge ǀkhai i tsîs ge Petrub tsî Johanneb tsîkha sī ge mîba. Nē ǀgam aokha ge ǀhobasa ǃoa ge ǃkhoe tsîs ge Mariasa ge sao kha. Nē khoekha ge mû Jesub soros a ǀkhaisa ǀhobas ǃnâ, o kha ge omsa ǃoa ge oa. Xawe Marias ose, ǀhobas tawas ge hâ tsî gere ā ǀūs ge ī amaga Jesub ǁnāpa hâsa. ǁÎb ǃaromas ra āsa mû tsîb ge gere ǁkhaeǂgaosi ǂgao. Marias aiǃâb ge ǂhai tsî ǀgui ǃgupu xū-e ge dī ǁîsa ge kaise ǂkhâǃnâ-e. ǁÎsab ge ge mîba îs Jesub di ǃgâsaga ǃoa ī tsî kaise ǂhâǂhâsa haisi-amsa sī mîbagu. ǁÎs ge sī ga mîba gu hâ Jesub ǁkhapa ûitsama ǃkhaisa.—Jhn. 20:​17, 18. w24.10 13 ¶7

Moseb ge kēbo-ao, ǀgoraǃgâ-ao, Israelǁîn ǂgaeǂgui-ao tsî ge xoa-ao i. ǁÎb ge Israelǁaesa Egipteb ǃnân ge hâ i ǃgāsisa xu ge ǂoa-ū tsî ǂgui buruxa dī gu Jehovab dī ga ge mû. Jehovab ge ge sîsenū bi îb ǂguro koro ǂkhanidi Elobmîs ǃnâ hâ di, Psalmdi 90 tsî ǀnîsi Psalmdi 91 tsîna xoa. ǁÎb ge ǀnîsi Jobi ǂkhanis tsîna ge xoa. ǁŌb nîs aiǃâb ge Moseba 120 kurixab ge ī hîna Israelǁaesa ge ǂgaiǀhao îb ǂâiǂâiǃnâ nî Jehovab ge dība nî xūn xa. ǂGuin ge Jehovab ge dī buruxa dīna ge mû tsî matib ge Egipteǁîna a ǁkhara ǀgausa. (Eks. 7:4) Mûn ge ge Jehovab ge ǀapa huriba ǀgora ǀgausa tsîn ge ǂnâsa ǃhūb ai ge ǃgû. Tsîn ge ge mû matib ge Jehovaba Faraob tsî ǁîb toro ǂnûbisa a hîkākā ǀgausa. (Eks. 14:​29-31) Tsîb ge Jehovaba ǁîna ǃgaroǃhūb ǃnâ ǃûi tsî gere kōǃgâ. (Deu. 8:​3, 4) Israelǁaes ge ǀgūǁae mîmâisa ǃhūb ǃnâ ga ǂgâ hâ, ǁnā-amgab ge Moseba ǁōb nîs aiǃâ ǁîna gere ǂkhâǃnâ. w24.11 8-9 ¶3-4

Nēs ge ǀnî hâ ǃkharagagusib ǃKhūb ǃui ǂûs tsî Galileab tawa ge ī ǃnaeǃkhais ǁaegu hâba. Jesub ge ǃui ǂûs tawa a mî i ge ǂkhari ǃgôab khoen ǀguina ǃkhōǂgā hâ. Xawe Galileab ǃnâb ge mî mîdi ge ǂgui khoena ǃkhōǂgā hâ. Jesub ge Galileab ǃnâ gere ǃhoa-ū khoen ge ǂû-i ǀgui-e ge ǂhâba hâ i. Jesub ge ǁîna gere hui în ǁnâuǃā ǃnāsa xūn hâsa ǂû-i xa, ǀamo ûiba a mā nî ǁkhā-e. Jesub tsîn ge ge mî ǁnān ǀuniga tsēs ai ra ǁōn khâisa hō tsîn ǀamosib kōse a ûi ǁkhāsa. ǁÎb ge ǃKhūb ǃui ǂûs tawa ǂkhari ǃgôarob khoen xa ǀgui gere ǃhoa. ǁÎb ge Galileab ǃnâ hoa khoen nî hō ǀkhaeb xa gere ǃhoa. w24.12 11 ¶10-11

Jehovab ge ǂkhabaxa khoena ǃhui hâ. (Psa. 11:5) Jehovab ge ǃgōsase ǃhui hâ aogu ga ǁîgu tarade ǂnauo. (Mal. 2:16) ǁÎb tarasab ga ǃgâi tamase hâ-ū, ob ge Jehovab ǀkhab ūhâ ǀhōsagusisa a ǁgaiǁgai ǁkhā. Jehovab ge ǁîgu ǀgoredi tsîna ǃgâ tide. (1Pet. 3:7) ǀNî aogu ge ǁaixasa ǀgaub ǃnâ ǁîgu tarade ra tsûtsû xūna ra mî. Xawe Jehovab ge ǁaib, ǁaixasib, ǃaugub tsî ǃkhāǃkhāxasib tsîna ǃhui hâ. (Efe. 4:​31, 32) Aob ǁîb taras ǀkha ǃgâi tama ǀgaub ǃnâ ra ǃhoab ge ǁîb ǃgammeb ǀguiba ǁgaiǁgai tama hâ xawe Jehovab ǀkhab ūhâ ǀhōsagusis tsîna. (Jak. 1:26) Nēs ge ǁgauoǃnâ ǁgoe-ūgub vidiogu tsî ai-īsiga ra kō aob xa a mî ǁkhā. ǁÎb ge Jehovab ǀkhab ūhâ ǀhōsagusisa ra ǁgaiǁgai tsî tarasa ǃgôasiba ǁgau tama hâ. Jehovab ge ra ǂhâba î gu aoga ǁîgu taradi ǃoagu ǂgomǂgomsase hâ. ǁÎb taras ǃoagu ǂgomǂgomsa aob ge tātsēs tsîna ǀai tide, ǁnā i xab ge ǂâis tsîna dī tide. Jesub ge ge mî, aob ga turaxa ǀgaub ǃnâ ǀnî hâ tarasa kō, ob ge ǀnai “ǂgaob âb ǃnâ” ǃgamme khôa hâ.—Mat. 5:​28, 29. w25.01 9 ¶6-8

Elobmîs ge ra mî Jehovaba ra ǃoaba khoen ǂhanu-aise ra mûhesa. Nēs ge ra ǂâibasen ǁîb ǁore da ga, o da xū-e nî mataresa ǂgaoǀkhā da tama hâsa. Nēsab ga dī xaweb ge Jehovaba noxopa ǁîb ǂhanu-ai ǁgaraga ra ǃkhōǀgara. ǁÎb ge ǂhanu-aise ra mû da xawe nēsa da anu hâ ǃkhâis ǃaroma ǀguis ose. Jehovab ge māsenxase ra ǀûba ǂgomsa da ra ǁgau amaga ǁîb tsî Jesub ge mā xoremarib ǃaroma. (Rom. 3:24) Mati da ǃgâiba ra ǀama Jehovab ga ǂhanu-ai khoen ase mû da o? ǀNîn ge ǀnai nēsa xu ra ǀama ǁîn ǁhûiǂuihe hâ în Jesub ǀkha sī ǀhommi ǃnâ ǀguiba ǂgaeǂgui tsî Elob ôa kai amaga. (Tit. 3:7; 1Jhn. 3:1) ǁÎn ǁorenab ge ge ǀûba. ǁÎn ge tātsē ǁore tama hâ i, khami i ge ge ī-i. ǁNā-amagan ge Gaosiba ra ǀûmi. (Rom. 8:​1, 2, 30) Nau ǂhanu-ain ge ǀamosib kōse ǃhūbaib ai nî ûi. Jehovab ge ǁîn ǁorena ge ǀûba tsîn ge ge ǁîb di ǀhōsa kai.—Jak. 2:​21-23. w25.02 5 ¶17; 7 ¶18

ǀGui ǃnaeǃkhais xa ǂâi re, apostel Petrub ge Jehovab ǂâiǀgauba ǁgae tama hâ iba. Jesub ge ǁîb apostelga ge mîba Jerusalemsa ǃoab nî ī ūhe ǃkhaisa tsîb ǂgomdi ǂgaeǂgui-aogu xa ǃkhōsis ǃnâ ūhe, tsâ tsî nî ǁō ǃkhaisa. (Mat. 16:21) Petrub ge ge ǂan-i Jesub a mîmâisa Mesia ǃkhaisa, Elob khoena nî oreba. ǁNā-amaga i ge ǀnîsi Petruba ge ǃgomba i, ǂgomsa Jehovab nî mā-am ǃkhaisa îb Jesuba ǃgamhe. (Mat. 16:16) ǁNā-amagab ge Petruba Jesuba ǃoa ge mî: “Ab Eloba ǀkhomxa tsi, îs nēsa tā sats ǀkha ī.” (Mat. 16:22) Jesub tsî Petrub tsîn ge nē-i xa ge hō gu tama hâ i. Petrub ǂâiǀgaub ge Jehovab dib ǀkha ǀgui tama hâ i ǃkhais ǃaroma. Petrub ge tsūse ge ǂâibasen tama hâ i xaweb ge Jesuba ǁîb ǀapemāsa ge ūǃoa tama hâ i. Tae-e da ra ǁkhāǁkhāsen? Jehovab ǂâibasen tama ge īs ge îb Jesub ûiba sâuhe. Nē ǃnaeǃkhais tawab ge Petruba ǀō-aisa xū-e ge ǁkhāǁkhāsen, Elob ǂâiǀgauba ǁgaesa. w25.03 9 ¶5-6

Sado tsûaǂgao hâ ǂgomǃgâ du hâ khoe-i xa du ge tsûtsûhe tamas ka io gāxaǃnâ ǃkhais ǃaroma? ǂÂis ǃnâ ūhâ re khoe-i xa du ga matikōse ǁgaise hâ ūhe xaweb ge sadu ǀhomsi ǁGûba a ǀnam du. Khoe-i xa du ga gāxaǃnâ-e, o i ge Davidi mîdi nētses xoas ǃnâ ra hō-e te a ǁkhaeǂgao du ǁkhā. ǀGui ǂkhanib ge ra mî: “ǂGaogu an khoaǂkhusan ge ǁaegu ai xū-en ūhâ tama khami ra tsâ.” Jehovaba nēti ra tsâna mati ra hui? Jehovab ge ‘sida ǀgūse’ hâ. ǁÎb ge mamasa i tamas ka io dadasa i khami ī, ā ra ǀgôa-e ǃkhōǂgā tsî ra ǁkhaeǂgao-e. ǃGoma da ga ǃkharuǃnâ, khoe-i xa da ga gāxaǃnâ-e tamas ka io ǁnaxuhe, ob ge Jehovaba sida tsûba ra hōǃâ tsî ǁkhā ǁaeb ai nî hui da. ǁÎb ge turaba ūhâ sida ǁkhaeǂgaosa tsûaǂgao da ga o tsî da ga xū tamase tsâ o. ǂGui xūnab ge ra māda mûǂui ǁkhā da a na, hui da ra na î da nēsi da ra ǃkharuǃnâ ǃgomsina mâǀgai.—Jes. 65:17. w24.12 23 ¶13-14

ǀHaohâb ǃûi-aogu ge nētsē ǂgomǃgâsiba ūhâ Jehovab ǁîgu ra dī ǃgâi sîsen-e mû tsî ra ǃgôaǃgâsa. ǃGâsana gagasise ǂkhâǃnâ, ǁkhāǁkhās tsî aoǁnâs ǂamai gu ge ǂgui ǀhaohâb ǃûi-aoga oms sîsen-i tsî tsūkeǃgâb sîsen-i ǀkhas tsîna ra hui. ǀNîgu ge ǀaesen hâ ǃgâsana sari tamas ka io ǀaeǃkhōs komites ǀkha ra sîsenǀhao. Nēti-i sîsenni ǃaroma ra māsen ǀhaohâb ǃûi-aogu ge a ǂan ǀhaohâb a Jehovab disa. ǁNās xa ǃaromahe hâse gu ge ǀhaohâb ǃûi-aoga ǃgarise ra sîsen tsî ǀoasa ǂgomǃgâsiba ūhâ Elob nî mādawa-amgusa dī gu ra xūn ǃaroma. (Kol. 3:​23, 24) Hoa khoen ge ǀhaohâb ǃûi-ao kai tide xawe da ge hoa da xū-e Jehovaba a mā ǁkhā. Sida Elob ge kaise ra ǃgôaǃgâ ǁkhā da a-i hoa-e da ga dī tsî ǁîba ǃoaba o. Nēsi da ga kaise mā tama i xaweb ge ǁîba māsenxase da ga ǃhūbaib ǂhawase ra dīhe sîsen-i ǃaroma mā o ra mû. Tsîb ge ra ǃgâiaǂgao tsûtsû da go khoe-e da ga ǀûba o. ǂGomǃgâsiba ūhâ re Jehovab ra ǃgôaǃgâsa dī ǁkhā du a xūna. ǁÎb ge ǁnās ǃaroma ǀnam du tsî nî mādawa-am du.—Luk. 21:​1-4. w24.06 23 ¶12-13

Salomonni khomaiǃâs ǃnâ i ge ra ǁgauhe tae-i, Jehovab ǃoaba-ao-i hoa-i ǀkha a īǁkhāsa. ǁÎ-i ge ǀgaisa ǁoreba dī toa tsî a mî ǁkhā ǃâubasen tama i hâ hîna î ge nē xū-e “ǃkhaese” īsa. Xawe i ge ǂâi-oa i ga o ǀnîsi nî mû gâre mîǁguiga i ge dīsa ǁore-i nîs aiǃâ. ǀNîsi i ge ǃgâi tama ǀhōsana ǁhûi, ǃgâi tama xūna kō, ǃgâ tsî Xristeǁîn ǃaroma ǃgâi tama ǃkhaina ǃoa gere ǃgû. ǀNîsi i ge ǀgore ǀû, Elobmîsa khomai ǀû, ǀhaode ǃoa īǀû tamas ka io aoǁnâ sîsenni tsîna ge dī ǀû. ǂKhamkhoeb ǂKhoamîdi ǃnâ ra mîheb khami i ge nē ǁoreba ‘ǀūǃgâsib’ ǃnâ ge ī tama hâ i. Xawe ǂgui ǁgai mîǁguigu hînab ge dī gu ge ge ǁore kaibi. Tae-e da nēsa xu ra ǁkhāǁkhāsen? ǁOreba xu ǀgui da ge ǂgōsen tide xawe da ge ǁoreba a ǃaroma ǁkhā xūna xus tsîna nî ǂgōsen. Nēsab ge Salomona tae-i ge ǂkhamkhoeb tsî ǀai-aos ǀkha a ī toas khaoǃgâ ge ǁguiǃā.—Mat. 5:​29, 30. w24.07 16 ¶10-11

Nē ǁuiba a tae? Nē i ge ûiga ra sâu Gaosib ǃgâiǂhôasa aoǁnâsa. (2Kor. 4:1) ǂGoasūde a tae? ǂGoasūdi ge Elob ǃoaba-aon hîna ǃgâiǂhôasa nauna ra mîba na ra ǂnûǁkhaeba. Paulub tsēdi ǃnâ i ge ǁamaxu-aoga ǂgoa-i ǀkha kurusa xapana gere sîsen-ū, î gu ǀō-aisa xūna tani ǃnâ ǁkhā aiǁgause ǂû-i, xûi-i tsî mari-i tsîna. ǁNās ǁkhās khamib ge Jehovaba sida ǀō-aisa haisi-ams ǃgâiǂhôas dis ǀkha ǂgomǃgâ hâ. Jehovab huib ǀkha da ge ǂhâ da hâ ǀgaiba a ūhâ ǁkhā, nē haisi-amsa ǂgomǂgomsase aoǁnâsa. ǀNî ǁaegu ai da ge khoen xa aoǁnâ sîsenni ǃnâ mâǃoahesa a ǃao ǁkhā. Mati da ǁnā ǃaoba a dan ǁkhā? Aoǁnâ sîsen-e dīsa gu ge ǂkhāhe o gu ge apostelga ǀgore, ǀgores xa ǂâiǃnâ re. ǃAo tsî gu ge ge aoǁnâ ǀû tama hâ i xawe gu ge sao rase Jehovaba ge ǂgan î gu hui-e, tsî ǁkhoaǂgaosib ǀkha ǃhoa. Jehovab ge ǁkhā ǁaeb ai ǁîgu ǀgoresa ge ǃeream. (ǃNǃkh. 4:​18, 29, 31) Khoena ǃaos ga ǀnî ǁaegu ai ǂâiǂhansen kai tsi, o ǂgan re Jehovaba î du sadu ǀnammi khoena du ūba hâba ǀgaiǀgai. Î du tā ǃao ǁîna ǃgâiǂhôasa mîbasa. w24.04 16 ¶8-9

Jehovaba da ūba hâ ǀnammi ge ra ǂkhâǃnâ da, î da ǁîb ǀonsa ǃanuǃanu. ǁNās ǀkha da ge nauna ǁGâuab ge Jehovab xa mî ama tama ǂhûmi ǂhôana ra mî-unuba ǂgao. (Gen. 3:​1-5; Job. 2:4; Jhn. 8:44) Aoǁnâ sîsen-e da ga dī, o da ge ǁkhoaǂgaose ǁnān hîna ra ǃgâna amaba sida Elob Jehovab xa ra mîba. Hoa khoen Jehovab di mâǂoa ra ǀnammi xa nî ǂansa da ge ra ǂhâba. Tsîb ǁîba ǂhauǃnâsib tsî ǂhanu-aisib tsîn ǃna ra ǂgaeǂguisa. ǀGūǁaeb ǁîb Gaosiba hoa ǃgomsina ǀam kai tsî ǂkhîb tsî ǃgâiaǂgaob tsîna khoesiba nî māsa. (Psa. 37:​10, 11, 29; 1Jhn. 4:8) Jehovab ǃgâi ǀonsa da ga aoǁnâ sîsenni ǃnâ ǁkhauba, o da ge ǁîb ǀonsa ra ǃanuǃanu. Kaise da ge ra ǃgâiaǂgao Jehovab ǃoaba-aon ase da nî dī xūna da ra dī amaga. w24.05 18 ¶12

‘ǃHaokhoeǃkhōǃoaxasibats’ ge ra ǁgau naunats ga ǃgâi xūna dība o, sa ǀgū ǀhōsan, ǃauga hân tsîna. (1Pet. 4:9) ǀNî ǁnaeǁgaus ge ǃhaokhoeǃkhōǃoaxa-aoba saorase ra ǁguiǃā: “ǁÎb oms dao-ams tsî ǁîb ǂgaob ge mâ ǃhaokhoe-i hoa-i ǃaroma nî ǁkhowa-amsa.” Dîsen re, ‘ǃhaokhoeǃkhōǃoaxasiba ta ra ǁgau, ti ǀhaohâba ra sari khoe-i ǃoagu?’ (Heb. 13:​2, 16) ǃHaokhoeǃkhōǃoaxa-aob ge ǃgâin ǀguina sari-aon ǃoagu ra ǁgau. Aiǁgause, ǀgâsa khoen, sari hâ ǃhoa-aob tsî naun ǃgarise sîsen tsî ǃgâsana ra ǂkhâǃnân, ǃnarimâra mûǂam-aob tsî ǁîb taras khami.—Gen. 18:​2-8; ǂKhm. 3:27; ǃNǃkh. 16:15; Rom. 12:13. w24.11 21 ¶6

Nē oxae ǂkhamkhoedi xa hâ ǂkhōs ǃnâb ge Jesuba disi oxae khoedi xa ra ǃhoa, hîna ge ǃgamme-aoba sī gere ǃâude. (Mat. 25:​1-4) ǁÎdi hoadi ge gere mûǂui mati di ǃgamme-aoba ǃgamme ǁâudība ǃoa nî saosa. Jesub ge korode gā-ai oxae khamkhoedi ase ra ǁguiǃā tsî nau korode gâredi ase. Gā-ai oxaedi ge ge aiǂhomisa ī. ǁÎdi ge ǁkhā di as kōse ge ǂhomisa ī tsî ǃgamme-aoba ge ǃâu, ǁîb ge tsuxub ǃnâ a hā xawes tsîna. ǁîdi ge oli lamde ge hau sao î di ǃkhaeb ǃnâ mû ǁkhā. ǁÎdi ge ǀnî hâ oli-i tsîna xabadi ǃnâ ge ūhâ i, ǀnîsib ga ǃgamme-aoba a ǃonkhao o. ǁNās ǀkha di ge ge aiǂhomisa i, î-i ǁîdi lamde tā khauǀû. (Mat. 25:​6-10) ǃGamme-aob ge hā, o di ge gā-aide ǃgamme ǁâudīb ǃnâ ǁîb ǀkha ge ǂgâ. ǁNās ǁkhās khamin ge ǂkhauhesan ǂkhaikarihâ tsî ǂgomǂgomsase Xristub hās kōse ra hâna, ǁîn mādawa-amsa nî hō. Tsî ǃgamme-aob Jesuba ǁîb ǀhomsi Gaosib ǃnâ nî ǁhao.—J.ǂHa. 7:​1-3. w24.09 21 ¶6

ǂÂi da gao, matis nē ǃgâiǂhôasa ǂgui khoena ra huisa, os ge nēsa ra ǂkhâǃnâ da î da aiǃgû. Mâ kurib hoaban ge ǂguin ǃgâiǃgâibasensa ra ǁgauna Jesub ǁōb ǂâiǂâisensa hâǃnâ tsî Elobmîsa ra ǁkhāǁkhāsen. ǂGuin ge ǁāǁnâhe tsî sida ǀkha ǀguiba aoǁnâ sîsenne ra dī. ǀŪ da ge a matikō khoen ǃgâiǃgâibasensa aoǁnâ sîsenni ǃoagu nî ǁgausa. Xawe da a ǂans ge Jehovab ge kai ǂnubis khoena ra ǀhaoǀhao kai ǁgâiǀāba nî ûiǃkharuna. (J.ǂHa. 7:​9, 14) Jehovab ge a ǃgaos di mûǂam-ao tsîb ge ǂgomǃgâsiba ūhâ ǂgui khoen noxopa ǃgâi ǂhôasa nî ūǃoasa, ǁnās ǀkha da ge ǃgâi ǃaromasa ūhâ aiǃgû tsî aoǁnâ ǀgarasa. (Luk. 10:2) Jesub ama ǁkhāǁkhāsaben ge ôasase ǃgâiǂhôasa ra aoǁnâ. Aiǁgause apostelgu ge ǁkhoaǂgaosib tsî ôasasib ǀkha gere aoǁnâ tsîn ge khoena, ‘Jesub ǀkha gere hâgu ase ge ǂan gu i.’ (ǃNǃkh. 4:13) Sida tsîn ge ǁkhoaǂgaosib tsî ôasasib tsîn ǀkha aoǁnâ sîsen-e ra dī ǂgao, ǀamǂoas ge khoen tsîn ge nî mû Jesuba da ra ǁgaesa. w25.03 18 ¶15; 19 ¶17-18

Elobmîs ge ra ǁkhāǁkhā da, Jehovab ǁnān xū tamase ra mûhena ra ǃgaoǃgâsa. Aiǁgause, Jehovab ge kēbo-aob Samuela ge sî, îb Isaib ǀgôaga xu ǀguiba gaob ase ǁhûi. Isaib ge 8 ǀgôaga xu 7 ǀgôagu ǀguiga ge ǂgai tsî Davida ge ǂgai tama hâ i, ǂkham-i ge ī amaga. Xawe Jehovab ge Davida ge ǁhûi hâ i. (1Sam. 16:​6, 7, 10-12) Jehovab ge ge ǂan-i Davidi a hamsa. ǁÎb ge ge ǂan-i nē khoeb kaise a ǀnambisa. Jehovab ge ǀnai sats ǀkhab ǁae hâ ǀgausa a ǁgau ǀgaub xa ǂâi re. ǁÎb ge ǃgâi ǀapemāsa sa mâsib xa nî mā tsi. (Psa. 32:8) Nēs ge ra ǁgau, ǁîb satsa ǃgâise ǂansa. (Psa. 139:1) Jehovab ǀapemāsats ga sîsenǂui tsî mû o matib ra hui tsi ǀgausa, ots ge a ǂgomǃgâ ǁkhā Jehovab sats ǀkha ǁae hâsa. (1Kro. 28:9; ǃNǃkh. 17:​26, 27) Jehovab ge ǁîba ǃoaba tsîts ra ǁnâuǀnambi ǀgaus ǁgūtsâde ra mû. ǁÎb ge sa ǃgâi ǀgauga ra mû tsî nēs ǀkha ra sa ǀhōsa kai ǂgao.—Jer. 17:10. w24.10 25-26 ¶7-9

Ama as ge Jehovabats ǀnamsa tsîts nauna ra hui ǂgaosa. Tae-e a hui tsi ǁkhā îts nē sîsen-e dī ǂgao? ǂÂi re matikōsets nî ǃgâiaǂgaosa ǃgâsana huisa. Jesub ge ge mî: ‘Mās ge ǃkhōǃoas ǃgâ-ai ǀkhaesa.’ (ǃNǃkh. 20:35) Jesub ge mîb gere xū-e gere dī. ǁÎb ge kai ǃgâiaǂgaoba gere hōǃâ naunab gere hui amaga. Markub 6:​31-34 di aiǁgau-i xa ǂâi re Jesub ge ǂkhî-i sa nauna huis ǃaroma. Jesub tsî ǁîb apostelgu tsîn ge ge tsau hâ-i. ǃNōsa ǃkhai-e ǃoa gu ge ge garu ī, i gu sī sâ. Xawe i ge kai ǂnubis khoena ǁîgu aiǃâ ǁnāpa ge sī, Jesub xa ra ǁkhāǁkhāhe ǂgaose. Hî-î, tib ge ga mî hâ ǁîb tsî ǁîb apostelgu tsîn ge sâ tsî gu nî ǂû ǁae-i tsîna ūhâ tama hâ-i amaga. Tamas ka iob ge Jesuba ǁnā kai ǂnubis khoena ga sîbē hâ, ǀgui tamas ka io ǀgam Elobmîs amanab ge ǁîn ǀkha ǀgoragu toas khaoǃgâ. Xawe ǀnammi xab ge ǁgarihe amagab ge ǁîna ǁkhāǁkhā “ǃuitsoatsoa” i ges kōse.—Mrk. 6:35. w24.11 16 ¶9-10

ǁGûdo, sadu ǀgôa-e hui re î-i ǀgauga ôa nauna Elobmîs xa mîbasa. (Rom. 10:10) Nau khoena Elobmîs xa ǁkhāǁkhāsats ge ǀō-e ra ǀhuru xū-i ǀkha ǀgopeǀnō ǁkhā. ǂGurose i ge ǁkhāǁkhāsen ra khoe-e supu ǁnae-amde nî ǁkhāǁkhāsen. ǁAeb ra ī khami i ge ra supu nē ǀō-e ǀhurusa. ǁKhā ǀgaub ai i ge ǂkhamkhoe-e supu tsî ǀguiǃupu ǀgaub ai a aoǁnâ tsoatsoa ǁkhā. Aiǁgauseb ge skol ǀhōsa-e a dî ǁkhā: “ǂAn its go i, ǂansa ūhâ khoen ge ǃaub ǃnân ra mû ǀguruna xu kurun ra xūna ra ǁgae. ǀKhī ta îxa vidioroba ǁgau tsi.” Kuruhe i ge? ti hâ ǃâba xuts ga vidioba ǁgau toa, ots ge ǀnîsi a mî ǁkhā: “ǂAnsa ūhâ khoen ga koahe ǁgaen ra xūn ǃaroma o matits ra ǂâi, ham-e koasa nî hō ǂhunumâ xū-i ǃaroma?” Nēti ī ǀguiǃupu ǀgaubab ga sîsenū, o i ge ǁî-i skol ǀhōsa-e ǀnîsi ǃnāsase Jehovab xa nî ǁkhāǁkhāsen ǂgao. w24.12 19 ¶17-18

ǁOreb tsî ǁōba xu ǃnora kai das ǃaromab ge Jehovaba, Jesuba xoremarib ase ge mā da. Xawe mati i ǀgui ǀoasa khoeb ǁōba ǂgui khoena ǁoreb tsî ǁōba xu ra ore? Apostel Paulub ge ge ǁguiǃā: “ǀGui khoeb di ǁnâuǀnamoǃnâsib ǃaroman ge hoana ǁore-ao kai khamin ge ǀgui khoeb di ǁnâuǀnamxasiba xu hoa khoena Elob ǀkha ge ǂhanu-ai kaihe.” (Rom. 5:19; 1Tim. 2:6) ǀNî mîdi ǃnâb ge Pauluba gere mî, hoa khoen ǁore-ao tsî nî ǁōsa, ǀgui ǀoasa khoeb ge Eloba ǁnâuǀnam tama hâ i amaga. ǁNā-amaga i ge ǀgui ǁnâuǀnamxa ǀoasa kurusa ūhâ khoeba ge ǂhâbasa i îb ǃnoraǃnora da. Tae-i ǃaromab ge Jehovaba mā-am tama hâ i, în Adammi ôan hîna ge ǁnâuǀnamna ǀamosib kōse ûi? ǀOasa kurusa ūhâ tama khoen ǃaromas ge nēsa ga ǃgâi ǀgau hâ xūna ǃgâiǃgâisa. Xawe Jehovab ǀoasa ǂhanu-aisib ǃoagus ge nēsa ga ǂhanu tama hâ. Adammi ge tātsē tsū ǁōre-e dī tama i tsî i ge ǁîb ǀgôana ǀoasa kurusa ūhâ tama i khami i ga mûsen hâ amaga. w25.01 21 ¶3-4

Apostel Paulub ge ge ǂan-i ǀgūǁaeb nî ǃgamhesa. Xaweb ge ǁîb ûibab gere ûiǀgaub xa kaise gere ǃgâiaǂgao. ǁÎb ge ǂâi-oa tsî ge mî: “ǃGâi ǃkhamsa ta ge ǃkham, ǃgûsa ta ge dītoa tsî ǂgomsa ta ge sâubasen.” (2Tim. 4:​6-8) Paulub ge ǃgâi mîǁguiba ge dī îb ǁîb ûib hoab ǀkha Jehovaba ǃoaba tsîb ge ge ǂan-i Elob nēs ǀkha nî ǂkhîsa. Sida tsîn ge ǃgâi mîǁguiga ra dī ǂgao, î da Jehovab mā-amsa hō. Nēsa da mati a dī ǁkhā? Paulub ge ǁîb tsî nau ǂgomǂgomsa Xristeǁîn xa ge mî: “ǂGomsa xu da ge ûi hâ, xawe mû da rana xus ose.” “ǃGû” ti hâ mîs ge Elobmîs ǃnâ ǀnî ǁaega khoe-i ǁî-i ûiba ra ûi ǀgauba ǃoa ra ǁnaeǁgau. Jehovab ǃnâ ǂgomsa ūhâ khoe-i ge ǁîb tae-e ra ǂgaoǀkhāsa ǂâis ǃnâ ra ūhâ mîǁguiba i ga dī o. ǁÎb ge ǂgomǃgâsiba ūhâ Jehovab Elobmîsa xu ra mā bi ǀapemādeb ga sao, ob nēsi ǃgâi ûiba nî ūhâsa tsî hānîǁaeb ǃnâ nî mādawa-amhesa.—Psa. 119:66; Heb. 11:6. w25.03 20 ¶1-2

Elob ǃanu gagab huib ǀkhan ge ǂguin hîna ge ǂkhabaxa tamas ka io ǂhauǃnâ tama ina ǁîn ûib ǃnâ ǀkharaǀkharana ge dī. (Jes. 65:25) ǁÎn ge ǃgarise ge sîsen în ǁîn ǁgai ǁnaedīga ǀû. (Efe. 4:​22-24) Elob khoen ge noxoba ǀoasa kurusa ūhâ tama tsî aiǃgû tsî nî dīsā. Xaweb ge Jehovaba ‘hoaraga khoena’ ge ǀhaoǀhao hîna ǁîba ǀnam tsî a ǀnamguna. Tsîn ge ǁnās xa ǃaromahe hâse ama ǀnammi tsî ǀguiǃnâxasib tsîna ūhâ. (Tit. 2:11) Nē buruxa xū-eb ge Hoaǀgaixa Elob ǀguiba a dī ǁkhā. ǁÎb mîdi ge hoaǁae ra ama kai. (Jes. 55:​10, 11) Gagasi paradais ge ǀnai nēsi hâ. Jehovab ge ǀō-aisa ǃgâsana ge kuru. ǁÎb khoen ǁaegu da ge ǂkhîb tsî ǃgâiaǂgaob tsîna nē ǂkhabaxa ǃhūbaib ǃnâ hō ǁkhā. (Psa. 72:7) Nēs ǃaroma da ge ǁkhā da as kōse ǂgui khoena ra hui ǂgao în sida Xristeǁî ǃgâsan di ǃâ kai. Nēsa da ge a dī ǁkhā ǁkhāǁkhsabedīs sîsenni ai da ga sida ǂâisa ǂnûi o.—Mat. 28:​19, 20. w24.04 23 ¶13, 15

Jesub ge Jehovaba ǁîb ǂâis hoas ǀkha ge ǀnam-i. Jesub ge ge ǂan-i tae-eb ra ǂgaoǀkhāhesa Jehovab xa dīb nîse. Tsîb ge ge mîǁgui hâ i îb nēsa dī, ǂan-i ge ī xawe ǃgommab nî tsâsa ǂhanu xū-e dīs ǃaroma. Jesub ge ǁîb Îba ra ǂkhîǂkhî xū-i ai ǂâisa a ǂnûi amagab ge ge mā-am tama hâ i, î-i ǀnî hâ xū-e ǁîb ûib ǃnâ ǂhâǂhâsa. Petrub tsî nau apostelgu ge ǀō-aisa aiǂhanuba ge ūhâ i, Jesub ǀkha hâ tsî ǁîba xu ǁkhāǁkhāsensa. Petrub ge ǁîb ǂguro sîǂkhanisa xoa, ob ge Xristeǁîna ge mîba în ǁkhā ǂâis ǀkha ǁâtanisen Xristub ǁkhāb khami. (1Pet. 4:1) Petrub ge torob ǃnâ ra sîsenūhe mîs xa gere ǃhoa “ǁâtanisen” tib ge mî o. Xristeǁîn ga ǁkhāǁkhāsen o în Jesub gere ǂâi khami ǂâi, on ge ǂhân hâ xuna nî ūhâ în tsū xū-e dīs di turaba ǃkhamǃoa.—2Kor. 10:​3-5; Efe. 6:12. w25.03 8-9 ¶1-3

Tae-ets nau khoe-i xa a ǁkhāǁkhāsen ǁkhā? ǀGaisa tsâsigats nē khoe-e nî omkhâibas aiǃgâ î ge a ǂhâǂhâsa, îts ǀnî hâ xūn tsîna nē khoe-i ǀkha ǃhoaǃgao. Aiǁgaus ase, nau khoe-i ûib ǃnâ ra sīǃnâ ǂgao tsî ra mîǁguibasen xūna. Matis nau khoe-e ǃamkuse a ǂan ǁkhā? ǀGui ǀgaub ge dîna dî tsî ǂōrisase ǃgâsa. Hoa ro ge tsâ ro ra ǀgaub xa ǂhauǃnâse ǃhoa tsî nî ǃeream. (Jak. 1:19) ǁNāsa dīs ǃaroma ro ge a mîǁgui ǁkhā, i ro xūna ǀguiba dī saro ǁgamǀhaosa nî supusupuna. Aiǁgaus ase ǀguipa ǂûǀhao, khoen hâ ǃkhain dawa ǃgû tsî xūna ǀguiba dī. ǀHōsan tsî ǀaokhoen tsîn ǀkha hâ ǀhaos ǃnâ-ū ro ge ǃgâise nî ǂangu. ǃAruǀî mîǁgui re îts xūna dī, ǁgau nî na mati i nau khoe-e ǃkharagagu mâsigu tsî ǃkharagagu khoen ǁaegu ra tanisen ǀgausa. w24.05 27-28 ¶6-7

ǀGūǁae da ge kaise ǃgom ǁaega nî hōǃâ. Nēs ge nî ǂgaoǀkhā î da ǃnāsase Jehovab ai ǂgomaiǂnûi ǀnais xa. Elobmîs ǃnaeǃkhaidi tsî Jehovab ǃoaba-aon nētsē ǃkharuǃnâ hâ xūna khomai re. Nēn xa khomais ge nî hui da, matib ge Jehovaba ǁîb ǃoaba-aona ra ǂkhâǃnâ ǀgausa mûsa. Nē khomaiǃâdi xa ǃgamse ǂâiǃgâ re. ǁNāna dīs ge nî hui da Jehovaba sada ǃgareǀuise dīsa tsî da ge sada ǃgâsan hoana ǀgaiǀgai ǁkhā. Aiǁgaus ase Jesub ge Simona, Kefab ti ge ǂgai, nēs ge “ǃhaob” di ǃkhareb ti ra ǂâibasen. (Jhn. 1:42) Jesub ge gere mî, Petrub ǀhaohâb ǃnâ ǁkhaeǂgao tsî ǂgomsa nî ǀgaiǀgaisa. ǀHaohâb ǃûi-aogu ge “kai ǃgareǀuib sommi” ase īgu khami ra ǁguiǃāhe. Nēs ge ra ǂâibasen ǁîgu ǀhaohâb ǃnâ hân hoana ra ǁkhaubasa. (Jes. 32:2) Ama as ge ǀhaohâb ǃnâ hâ ǃgâsan hoan, Jehovab ǀgaugan ga ǁgae o ǃgâiba ra ǀamasa. w24.06 28 ¶10-11

Jehovab ge ǂgomǂgomsase ūǃoa gao-aogu ge ǁîb ǂhâba hâ ǀgaub ai ǁîba gere ǃoaba bi. ǂGomǂgomsa tama ge hâ i Gao-aogu ge Jehovaba ǁnāxū tsî ǂhumi elona ge ǃoaba tsoatsoa. (1Gao. 21:​25, 26; 2Kro. 12:1) ǀGoreǀîsa tae-i ǃaroma Jehovaba kaise ge ǂhâǂhâsaba? ǀGui ǃaromas ge gao-aob ge aiǂhanuba ge ūhâ i, îb khoena hui în Jehovaba ǂhanu ǀgaub ai ǃoaba. ǀNî hâ ǃaromas ge khoen ga ama tama elona ǃoaba on ge ǁgai ǁorena ra dī tsî khoena ǃgâi tama ǀgaub ǃnâ ra hâ-ū. (Hos. 4:​1, 2) Tsî gao-aogu Israels digu tsî Israelǁîn ge Jehovab ai ge māǁnāsen hâ i. ǁNā-amagan ge Jehovab ǃoagun ge ǂgomǂgomsa tama io tsî ama tama elona gere ǃoaba o, gere ǀai tamas ka io gere ǃgamme khôa. (Jer. 3:​8, 9) Khoe-i ga ǀai tamas ka io ǃgamme khôa, o i ge ǁî-i ǃgamme hâ khoe-i di ǂgaoba ra khôa. ǁKhā ǀgaub ai i ge māǁnâsen hâ ǃoaba-ao-i Jehovab di-e ǂgomǂgomsa tamase i ga hâ tama io, Jehovaba kaise tsûtsû tsî ra tsûaǂgao kai.—Deu. 4:​23, 24. w24.07 22-23 ¶12-15