Novemberi

ǀHaohâb ǃûi-aogu ge Jehovaba ǁgae tsî ǁnā-i ǀhaohâba xu ūǂuihe hâ-i ǃoagu ǀkhomxasiba ra ǁgau. Aiǁgause Jehovab ge ge ǃâu tama hâ is Israelǁaesa ǃhobasen ǁînab nî huis aiǃâ. ǁÎb ge kēbo-aoga ǁîna ǃoa gere sî ǃhobasenan nîs aiǃâ. Jehovab ge kēbo-aob Hoseaba ge mîba îb ǁîb kaikhoesa ǀûba tsî ǁîsa ū-oa tsū ǁorebas ge dī xawe. Nēs ǃnâ-ūb ge Jehovaba ǁîb khoena ra ǁkhāǁkhā ǁîb a ǀkhomxaǃnâsa. (Hos. 3:1; Mal. 3:7) ǁNās ǁkhās khami gu ge ǀhaohâb ǃûi-aoga Jehovaba ǁgaes ǃnâ-ū ra ǂhâba, î-i ǁore-ao-e ǀhaohâba ǃoa oaǀkhī tsî gu ge ǁî-e ra supusupuba ǁnāsa dīsa. Jesub ge kā hâ ǀgôab xa a ǃhoa ǂkhōs xa ǂâi-oa re. ǁGûb ge ǀgôabab ge mû, o “ǃkhoeǃoa bi, ǁnam bi tsî ge ǁoa bi.” (Luk. 15:20) ǁGûb ge ge ǃâu tama hâ îb ǀgôaba ǀûbaba ǂgan. Xaweb ge ǁgûba ǀgôaba ǃoa ge ǃkhoe, ǁîbab a ǀnam amaga. w24.08 28 ¶7-8

Nētsēs xoas ge ra ǁgau Jehovab ge ǁîb gā-aisiba ǁîba ǃoa ǀgui ūbasen tama. ǁÎb ge māsenxase naun ǀkha ra ǀgoragu. Jakobub tsîn ge ge mî, Jehovab ga gā-aisiba mā ob ge “māǂgaoxase tsî ǀkhomxaǃnâse” ra mā. ǁÎb ge ǂgao tama ǁgaise da nî tsâsa, ǁîb daoǁgausa da ga ǂgan o. Jehovab ge ra ǂhâba î da ǂgan. (ǂKhm. 2:​1-6) Mati da nēsa nî dī? Mati da Jehovaba ǁgae tsî sida gā-aisiba a ǀgoragu ǁkhā? (Psa. 32:8) Jehovab khoen ge ǂgui ǃēde ūhâ în ǁkhāǁkhāsenan ra xūna naun ǀkha ǀgoragu. Aiǁgause da ge ǃnāsa ǁaeba ǀasase aoǁnâ sîsen-e dī tsoatsoa hâ ǃgâsana ra ǁkhāǁkhā. ǀHaohâb ǃûi-aogu ge ǃnūǃnâxase ǀhaohâb hui-aogu tsî ǁāǁnâsa ǃgâsagu tsîna ra hui, î gu ǁkhāǁkhāsen mati gu ǁîgu ǁgaumâide ǀhaohâb ǃnâ nî dīsa. Oms tsî dī-unus sîsenni ǃnâ ǂansa ūhâ ǃgâsan ge nauna ra hui în Jehovab ǃoabas ǃnâ ra sîsen-uhe omna om. w24.09 28-29 ¶11-12

ǀHaohâb ǃûi-ao kai ǂgao ra ǃgâsab ge nî ‘ǂnao-o’ tsî ǃgâi ǀonsa nî ūhâ ǀhaohâb ǃnâ, ǁîb ǃgâi tanisens ǃaroma tsî tā ǃaroma-e nî ūhâ ǁîba tsū xū-e ǂgari-amsa. (1Tim. 3:2) ‘ǁÎb ge hoaraga ǀhûhâsib khoen xa nî ǃgôahe.’ ǂGomoǃnân ge sa Xristeǁî ǂgomsa a mîǁgaiǁgai ǁkhā xawen ge tā ǃgâi ǃaroma-e nî ūhâ sa ǂgomǂgomsasib tsî tanisensa dîsens ǃnâ mâisa. (Dan. 6:​4, 5) Dîsen re, ‘ǃgâi ǀonsa ta ǀhaohâb tsî ǀhûhâsib ǃnâs tsîna ūhâ?’ ‘Naun ǃnâts ge ǃgâin’ ǀguina ra ôa tsî ǁîna ra koa ǁîn ǃgâi ǀgaugu ǃaroma. (Tit. 1:8) ǃGâiaǂgaos tsînats ge ra hî xūnats ga nauna dība o, khoe-i ǃâubasen tamana. Nē ǀgauba mati ǀhaohâb ǃûi-aogu ǃaroma a ǂhâǂhâsa? ǁÎgu ge ǃnāsa ǁaeba ra sîsenū, ǀhaohâb ǃgâsan tsî ǁîgu ǁgaumâidi tsîna kōǃgâsa. (1Pet. 5:​1-3) Matikōse i ga sîsen-e ǂgui xawe gu ge ǃgâiaǂgaob ǀkha nauna ra hui.—ǃNǃkh. 20:35. w24.11 20 ¶3; 21 ¶4-5

ǀHaohâb hui-aogu ge ǂhâǂhâsa sîsen-e ǀhaohâb ǃnâ ra dī. Apostel Paulub ge nē ǂgomǂgomsa ǃgâsaga gere ǃgôaǃgâ. Aiǁgause, Filipis ǃnâ hâ Xristeǁînab ge sîǂkhanisa xoaba, ob ge ǃgōsase ǀhaohâb hui-aoga, ǀhaohâb ǃûi-aogu ǀkha ge tawede. (Fil. 1:1) Nēsi gu ga ǂkham tamas ka io kaira xawe gu ge ǂgui ǁāǁnâsa ǃgâsaga kai ǃgâiaǂgaoba ra hōǃâ, ǀhaohâb hui-aogu ase ǃoabasa. Aiǁgause Devani ge ge 18 kurixa i ǀhaohâb hui-aob aseb ge ǁgaumâihe o. Xawe Luisi ge 50 kurixab ges khaoǃgâ ǀgui ǀhaohâb hui-aob ase ge ǁgaumâihe. ǁÎba mati ra tsâ ǀhaohâb hui-aose ǃoabasa? ǁÎb ge ra mî: “Kaise ta ge ra ǃgâiaǂgao ti ǃgâsana ǀhaohâb ǃnâ nēti ī ǀgaub ǃnâ sîsenbasa. ǁÎn ge ǀnamma ge ǁgaute. Nēsi ta ge tita tsîna ti ǀnamma ǁîna a ǁgau ǁkhā.” ǂGui ǀhaohâb hui-aogu ge ǁnāti ra tsâ. ǁĀǁnâsa ǃgâsats ga tsits ga noxoba ǀhaohâb hui-aob ase ǃoaba tama i, ots ǁnā-e sīǃnâ ǁkhāts a xū-i ase mîmâi ǁkhā? w24.11 14 ¶1-3

Gao-aob Hiskiab Judab dib ge 39 kurixab a hîna ǀgaisase ge ǀaesen. Jesajab ge Jehovab haisi-amsa Hiskiaba si ge mā, mî rasa ǁîb ǀaeb xa ǃaromahe hâseb nî ǁō ǃkhaisa. (2Gao. 20:1) Hiskiab ge nēsa ǁnâu ob ge kaise ge tsûaǂgao tsî gere ā. Jehovabab ge huib ǃaroma gere ǀkhoma. Jehovab ge Hiskiab ǀgoresa ǁnâu tsî ǁîb ǁgamroga mû, ob ge kaise ǁgaise gere tsâ Hiskiab ǃaroma. Tsî ge mîba bi: “Tita ǃKhūta, ge sa ǀgoresa ǁnâu tsî sa ǁgamrona go mû. Tita ge nî ǂgauǂgau tsi.” Jesajab ǃnâ-ūb ge Jehovaba ǀkhomxaǂgaosiba ge mîmâi Hiskiaba ǁîb ûiba ǂoaǃnâ tidesa tsîb Jerusalemsa nî huisa Asiriaǁîna xu. (2Gao. 20:​4-6) Tae-e du dī ǁkhā ǂgauhe ǁoa ǀaeba du ga ūhâ o? Jehovaba tsâ du ra ǀgauba mîba. ǁÎb ge nî ǃgâ ā du ka xawes tsîna. Elobmîs ge ra mîba da: ‘ǁGûb ǀkhomxaǂgaosigu dib, Elob hoa ǂgaoǂgaoǃnâs dib’ nî ǁkhaeǂgao da ǃkhaisa sida ǃgomsigu ǃnâ-ū.—2Kor. 1:​3, 4. w24.12 24 ¶15-17

Kai ǃgâiaǂgaob ge nî ī, khâisa māhe hâna ǁkhoreǁharesa. Mûnan-ai re matits Jehovab xa ǂgui xūna ǁîb kurusa xu nî ǁkhāǁkhāsen ǀgausa. (Psa. 104:24; Jes. 11:9) Jehovaba da ge tsûaǂgao kai tide tsî ǀûbaba ǂan tamase ǁîba nî ǃoaba. Hānî ǀkhaegats “ǁaerob di ǁkhoab” ǀkha nî ǃkhōǃhuni? (Heb. 11:25) Tātsēs tsîna. Hānîǁaeb ge kaise nî ǁkhoaxa, nē ǃhūbaib ǃnâ da ūhâ xūn xa. ǂÂis ǃnâ ūhâ Paradais xa da ge ǁhapos ǀguisa dī tama hâ xawe nēs ge nî ama ī. Nēs ge Jehovab ge ǁîb Ôaba ǁguibas ase mā da o ge īǁkhā. w25.01 29 ¶12

Hebreǁîn ǂkhanis ge ǂgui khoen Jehovab ǃnâ gere ǂgoman xa ra ǃhoa. Nēn di ǀguib ge Moseba, ǁîb ge mâǂoa ra ǂgomsa ge ūhâ ī. (Heb. 3:​2-5; 11:​23-25) Moseb ge aiǃgû tsî Elob ǃnâ gere ǂgomǃgâ. ǁNās ge ge ǂhanu xū-i dīsa Jehovab ge lsraelǁîna ǂûn tsî ǁgammi tsîna ǃgāro ǃhūb ǃnâ gere mā xui-ao. (Eks. 15:​22-25; Psa. 78:​23-25) Moseb ge ǀgaisa ǂgomsa ge ūhâ ī, xaweb ge ǀgui kuriba Jehovab ge lsraelǁîna Egipteba xu ǂgaeǂgui ǂûis khaoǃgâ ge îganǀgē tsoatsoas, Jehovab ǁaesa ǁgan-e nî mā ǃkhais xa. ǁÎn ge ǁnātikōse ge ǂgui i, 600 000 xa ǃnāsa aogu, taradi tsî ǀgôan tsîna tsî i ge ǂû-i xare-e ǃgāro ǃhūb ǃnâ ge ǀkhai-i. Jehovaba mati ǁîn hôana ǂâuna ǁgan-e ga mā hâ? ǃEream tsîb ge Jehovaba Moseba ge dî “Ob kha ǃKhūb di ǃomma ge ǃnubu?” (Num. 11:​21-23) ǀNî mîdi ǃnâb ge Jehovaba, Moseba gere mîba ‘tita ge mî ta hâ xū-i hoa-e a dī ǁkhā.’ w25.03 26 ¶1-2

ǂHanu-e mî da ga o kai ǁgammi dâus tawa ge ī xū-i hoa-i hānîǁaeb ǃnâ nî ī xū-e ra ǂnûǁkhaebasa? Hî-î. Tae-i ǃaroma? Elobmîs nēti-i xū-i xa xū-e mî tama hâ amaga. Ama-as ge Jesub ge Noaxi di tsēde ǁîb hās ǀkha a ǀgopeǀnōsa. Xaweb ge ge mî tama hâ i Noaxi tsēdi ǃnâ ge ī xūn kai ǂâibasensa nētsē ūhâsa. Jehovab ge arki dao-amsa aiǁgause a ǂganam khami. (Mat. 24:​37-39) Noaxa tae-e ge dī Jehovab ǃkhâikhoms haisi-amsab ge ǁnâu o? ǁÎb ge ge ǁgau ǂgomsab ūhâsa arka oms ǃnâ-ū. (Heb. 11:7; 1 Pet. 3:20) ǁKhā ǀgaub ain ge ǃgâiǂhôas Elob Gaosib disa ra ǁnâu khoena ǂgomsa nî ǁgau dīn ra xūn ǃnâ-ū. (ǃNǃkh. 3:​17-20) Petrub ge Noaxa ‘ǂhanu-aisib di aoǁnâ-aob’ ti ge ǂgai. Nētsē da ge ǃhūbaib ǂhawase ra dīhe aoǁnâ sîsenni ǃnâ ra ǁhao. ǁKhoaǂgaosib ǀkha da ge ǁnāsa ra dī. Matikōse da ga ǃgarise dītsâ xawe da ge ǃhūbaib ai hâ khoen hoana aoǁnâba hō tide ǀams nî hās aiǃâ. w24.05 9-10 ¶4-5

ǁNā-amaga da ge ǀgauna ra ôa î da Jehovab ǀhōsana khoexaǃnâsib tsî ǃgôasib tsîna ǁgau. (Rom. 12:10) Mati? ǀGui ǀgaub Psalmdi 15:4 ǃnâ ra ǃhoaǃgaoheb ge Jehovab tentommi ǃnâ da ga ǃhaokhoe ǂgao o da ge “hoaǁae mîmâis âna ra dīǀoaǀoa mâtikōse i ga ǃgom xawe.” Mîmâi da hâ xū-e da ga dīǀoaǀoa tama i, o da ge nau khoe-e tsûtsû ǁkhā. (Mat. 5:37) Aiǁgaus ase Jehovab ge ra ǃâubasen, în ǁîb ǃhaokhoena ǃgammeb di mîǁguiba dīǀoaǀoa. ǁÎb ge ra ǃgâiaǂgao ǁgûn ga ǀgôanan mîmâiba hâ xūna ga dīǀoaǀoa o. Elob tsî sida ǀgūkhoen tsîna da ūba hâ ǀnammi ge nî hui da î da sida mîmâide dīǀoaǀoa. ǀNî hâ ǀgaub Elob ǀhōsana da ǃgôasiba ǁgau ǁkhāb ge, ǃhoakhoeǃkhōǃoaxasiba ǁîna ǁgau tsî māxasa. (Rom. 12:13) Sida ǃgâsan ǀkha da ga ǁkhoaxa ǁaeba ūhâ, o da ge ǁîn tsî Jehovab tsîn ǀkha da ūhâ ǀhōsagusisa ra ǀgaiǀgai. ǁNās ǂam-ai ǃhoakhoeǃkhōǃoaxasiba ǁgaus ǃnâ-ū da ge Jehovaba ra ǁgae. w24.06 12 ¶15-16

Jehovab ge amaba ǃgamǃgamsenxana ra ǂhaiǂhaiba. (Mat. 11:25) ǃGamǃgamsenxasib ǀkha da ge amaba ǁkhāǁkhāsens huiba ge ūǃoa. (ǃNǃkh. 8:​30, 31) ǁNā-amaga da ge nî ǂanbasen î da tā ǀgapiǂâixa. ǂNīsa da ga o da ge ǂâi tsoatsoa ǁkhā sada mûǂûigu ǂhanusa, Elobmîs ǃgaoǃgaodi tsî Jehovab ǀapeǂhumisa xu ra hā daoǁgaudi xa. ǃGamǃgamsenxase da ga hâ ǀgara ǂgao, o da ge nî mûǂan xū tama da hâsa Jehovab ǀkha da ga ǀgopeǀnōsen o. (Psa. 8:​3, 4) Jehovaba ǃoa ǀgore tsî da ge a ǂgan ǁkhā îb hui da, î da aiǃgû tsî ǃgamǃgamsenxasiba ūhâ ǀgara tsî ǁkhāǁkhāhe ǁkhā. Jehovab ge nî hui da î da ǁîb ǂâiǀgauba ǃgôaǃgâ, Elobmîs tsî ǁîb ǀapeǂhumis tsîna xu da ra ǁkhāǁkhāsena sida ǂâiǀgaub ǂam-ai. Elobmîsa du ra khomai ǁaeb ai ǃgaoǃgâ re, Jehovab tae-i ǃaroma ǃgamǃgamsenxasiba ǀnam tsî ǀgapiǂâixasiba ǃhui hâsa. ǁKhā du as kōse dītsâ tsî ǃgamǃgamsenxase hâ ǀgara re, ǀapeǂhumis ǃnâ du ga aiǂhanu ga hō o. w24.07 10 ¶8-9

Jesub ge 1919 xu ǂkhauhesa ǃgâsaga ra sîsen-ū, î gu aoǁnâ sîsen-e aiǂhomi tsî daoǁgausa Elobmîsa xu ǁîb saosabena ǂhanu ǁaeb ai mā. (Luk. 12:42) ǃGāsa i ge a Jehovab nē sîsen-e ra ǀkhaesa. (Jes. 65:​13, 14) ǃGâise da ga aiǂhomihe tama hâ, o da ge Jesub ǁgaumâi da hâ sîsen-e ga dīho tama hâ. (Mat. 28:​19, 20) Aiǁgause i ga aoǁnâ ǃnâ da nî ǂkharide ǁgaumâihe tama hâ, o i ge mâ khoe-i hoa-e ǂhâba i hâ ǁaeb ai ǂhâba i hâ ǃkhais ai ga aoǁnâ hâ. Tsî i ge ǀnî ǃkhaide ǂguiǃnāde ga sîsen-e ǃnâ-e hâ ǃkharagagu aoǁnâ-aon xa. ǀNî ǂkharidi tsâǀkhāhe tama hîna. ǃAmku ǀgaub ǃnâ aiǂhomîhesa xu da ǃgâiba a ǀama ǁkhā ǀgaub xa du a ǂâi ǁkhā? ǃHūbaib aib ge hâ ī, ob ge ǁîb saosabena aiǂhomi khamib ge Jesuba nētsēs tsîna Elob khoena ra aiǂhomi. w24.04 8-9 ¶2-4

Kainni ge Adammi tsî Evas ǂguro ǀgôa ge ība. ǁÎra xu ge ǃnae ǀgôan hoan khamib ge ǁoreba ǁîra xu ge ǀûmi. Kainni ge ǁnā ǁoreba xu ge ǃkhō-oasen tama hâ i. Elobmîs ge ra mî: “ǁÎb di sîsengu ge ge ǂkhaba ī.” (1Jhn. 3:12) ǁNā-amagab ge ǀnîsi Jehovaba “Kainni tsî ǁîb di ǁguibasa ge ǂhara.” ǁÎb di ǂuba ǀkharaǀkharas xab ge “kaise ge ǁaixa tsîb ge ai-īsib âba ge ǀkhara.” Jehovaba sao rase tae-e ge dī? ǁÎb ge Kainni ǀkha ge ǃhoa. (Gen. 4:​3-7) ǃGaoǃgâ re Jehovab ge ǃgâi ǀgaub ǃnâ Kainni ǀkha ge ǃhoa. Tsî ge mîba bi ǀkhaeheb nîsa ǃgâi xūnab ga dī o. Jehovab ge Kainni tsîna ge ǃkhâikhom, ǁîb ǁaib nî ǃaromasa îb ǁgai xū-e dī. Tsûtsûsaseb ge Kainna ge ǃgâ ǂgao tama hâ i. ǁÎb ge ge mā-am tama hâ i îb Jehovaba huibi îb ǃhobasen. ǁNā ǃereams khaoǃgâb ge Jehovaba ǀû nau ǁore-aona huis ǀkha în ǃhobasen? Tātsēs tsîna o. w24.08 10 ¶8

ǁÎb ge Israelǁaesa ge ǂâiǂâiǃnâ ǃgâi hānîǁaeban nî ūhâ ǃkhaisa. Jehovab ǀkhaeb ǀkhan ge Israelǁîna, ǁîb ge mîmâiba nî ǃhūb ǃnâ ga hâhâ. ǁNā ǃhūb ge kaise ge îsa ī tsî ǃhanas ǃaroma ge ǃgâi i. Moseb ge sao rase ǁîna ge ǁguiǃāba: “ǃKhūb sadu Elob ge . . sadu ǂnubi tama kai tsî îsa ǃāde ūhâ ǃhūba nî mā du. Omdi ge sadu ǂgā tama hâ ǃgâi xūn xa nî ǀoa, tsî sadu khao tama tsaudi tsî draibeǃhanagu tsî ǀkherahaidi sadu ǃhana taman tsîna nî ūhâ.” (Deu. 6:​10, 11) Moseb ge Israelǁîn tsîna ge ǃkhâikhom nē îsa ǃhūb ǃnân ga hâ ǀgara ǂgao, on ge Jehovab ǃkhâikhomde nî ǁnâuǀnam. Moseb ge ge mîba nî în “ûiba ǁhûi” Jehovaba ǃgâs ǃnâ-ū tsî ǁîb ai ǂae. (Deu. 30:20) Xawes ge Israelǁaesa Jehovaba ge ǁnâuǀnam tama hâ i. ǁAeb ra ī khamib ge Jehovaba ge mā-am în Asiriaǁîn tsî Babilonǁîn xa danhe tsî ǃkhōsis ǃnâ ūhe.—2Gao. 17:​6-8, 13, 14; 2Kro. 36:​15-17, 20. w24.11 9 ¶5-6

ǂGui khoen ge nētsē ra mî “Jesub ǃnân ra ǂgomsa” tsîn ge ǁîba hui-aob ti ra ǂgai. (Jhn. 6:29) ǁNās xa i ge ǃnāsan Galileab ǃnâ ge hâ îna ǂgurose Jesub ǃnâ gere ǂgom. Xawen ge ega ǁîb ǃnâ ge ǂgom ǀû. Tae-i ǃaroma? ǂGui khoen ge Jesuba ǁîb gere mā ǂû-i ǃaroma ǀgui gere sao. ǁÎn ge gere ǂhâba îb ǂgauǂgau nî, ǂû-e mâ nî tsî ǁnâu ǂgaon gere xūn ǀguina mîba nî. Xaweb ge Jesuba ǃgāsase ge ǁgau ǁîb ge ǃhūbaiba ǃoa hā tama hâ isa îb ǁîna ǂhân hâ xūn ǀguina mā. ǁÎb ge ǃhūbaiba ǃoa ge hā îb ǁîna ǁkhāǁkhā tae-en nî dīsa în ǁîb ama saosabe kai. ǁÎb ǁkhauǂuis “tita ǃoa hā” ti hâsa ūǃoa tsîn ge ǁîb ra ǁkhāǁkhā xūn hoana nî ǁnâuǀnam.—Jhn. 5:40; 6:44. w24.12 12 ¶12-13

Tae-e aoga a hui ǁkhā î gu ǃgâi tama tanisen ǀgauba ǀû? Jesuba gu ge a ǁgae ǁkhā. Jesub ge ǃgamme tama hâ i xaweb ge ǁîb ǁkhāǁkhāsabega gere hâ-ū ǀgaus ge a ǃgâi aiǁgau, mati gu aoga ǁîgu tarade a hâ-ū ǁkhā ǀgausa. Aiǁgause ǂâiǃgâ re aogu tae-e a ǁkhāǁkhāsen ǁkhāsa, Jesub ge ǁîb di apostelgu ǀkha ǃhoa tsî ǁîga gere hâ-ū ǀgauba xu. Jesub ge ǁîb apostelga hoaǁae ǃgâi ǀgaub tsî ǃgôasib ǃnâ gere hâ-ū. ǁÎb ge ǁîga tātsē ǁgaise ge hâ-ū tama hâ i. ǁÎgu xab ge ǀgaiba ūhâ i xaweb ge ǁîb ǀgaiba ge sîsenū tama hâ i, îb ǁîga ǂkhabusase tsâ kai tamas ka io ǁîba ǃao. ǃGamǃgamsenxaseb ge ǁîga xūna gere dība. (Jhn. 13:​12-17) ǁÎb ǁkhāǁkhāsabegab ge ge mîba: “Tita ǃoa hā re tsau hâ tsî ǃnao-aihe hâdu hoado, o ta ge tita nî khoakhoa du.” (Mat. 11:​28-30) Jesub ge ge tsauraǂgaoxa i. Tsauraǂgaoxa khoe-i ge ǂkhabusa tama hâ. Nēti ī khoe-i ge ǀgaisa tsî ra ǃkhōǃnomǃnomsen. ǃKhāǃkhā-eb ga ob ge nēti ī khoeba ǃnomsase hâ tsî ǁîb tsâsiga ra ǃkhō-oa. w25.01 10 ¶10-11

Nē ǃhūbaib ǀams ra ǀgū khami î ge mari ǃgomsiga nî ǁgaiǂoa. ǀNîsi da ge sida sîsenni tsî ūda hâ xūn tsîna a ǂoaǃnâ ǁkhā. ǀNîsi da ge hâ da ra ǃkhaisa xu doe ǁkhā. Tsîs ge nēsa a ǃgomba da ǁkhā sida ǂhâsiga kōǃgâs ǃnâ. Tae-e nî hui da mîǁguiga da ga dī o, ǁgausa Jehovab ǃnâ da ra ǂgomǃgâsa? Kaise î ge a ǂhâǂhâsa î da sida ǂhâsigu xa Jehovab ǀkha ǃhoa. Nēs kaise nî hui da amaga. ǁÎba ǂgan îb gā-aisiba mā du, î du ǃgâi mîǁguiga dī, ǃnomsase hâ tsî tā “ǂâiǂhansen” sadu mâsigu ǃnâ. (Luk. 12:​29-31) Aiǃgû re ǁîba ǀkhomasa î du huihe tsî ū du hân ǀkha ǂâu. (1Tim. 6:​7, 8) Mari ǃgomsin ǀkha a hui du ǁkhā khomaiǃâde ôaǃnâ re. ǂGuin ge ra mî vidiogu tsî jw.orgs ai hâ khomaiǃâdi ge ǁîna a huisa mari ǃgomsin ǀkha. w25.03 28-29 ¶10-11

Jehovab ǁae ge īb ge îb nau ǃhaodi khoena ǁîb khoen ase ūǃoa. Jehovab ge apostel Petruba ge daoǁgau îb Korneliuba aoǁnâba. Korneliub ge ǂguro Jodeǁî tama ge hâ îba Xristeǁî kai ge ba. Jodeǁîn ge Jodeǁî taman ǀkha ge hâ ǀhao tama hâ i. ǁNā-amagab ge Petruba ǁîb ǂâiǀgauba ga tawa hâ, îb nēsi Jodeǁî taman tsîna aoǁnâba. Petrub ge mûǂan o Jehovab ge mati Jodeǁî taman xa gere ǂâisa ob ge ǁîb ǂâiǀgauba ge tawa. ǁNā-amagab ge sî-eb ge o,‘ǃhaese ge ī’. (ǃNǃkh. 10:​28, 29) Korneliub tsî ǁîb omaris tsînab ge ge aoǁnâba tsîn ge ge ǁāǁnâhe. (ǃNǃkh. 10:​21-23, 34, 35, 44-48) Kurina ǃkharu tsîb ge Petruba Xristeǁîna ge ǂkhâǃnâ în “ǀguiǂâixa.” (1Pet. 3:8) Jehovaba da ga ǁgae, o da ge a ǀguiǂâixa ǁkhā sida ǃgâsan ǀkha, Elobmîs ǃnâ da ra ǁkhaǁkhāsen khami. w25.03 9-10 ¶7-8

Khoen ǂâiǀgaub ge Jehovab ǂâiǀgauba ra mâǃoa. (ǂKhm. 17:15) ǁNā-amaga î ge ǂhâǂhâsa î da ǃgâi tama ǂâiǀgauba mûǂan tsî ǂgōsen. Paulub ge Hebre Xristeǁîna ge mîba în ǁîn Xristeǁî ǀgauba ǃgâiǃgâi tsî da ge sida tsîna ǁkhā xū-e nî dī. Nēs ge ra ǂâibasen Elobmîsa da ge ǃgâise nî ôaǃnâ î da Jehovab ǂâiǀgauba ǃgâise ǂan. ǁĀǁnâhe da gas khaoǃgâs tsîna da ge nēsa nî dī ǀgara. Matikōse da ga gaxuse amab ǃnâ hâ xawe da ge hoa da Elobmîsa tsēkorobe ôaǃnâ tsî nî khomai. (Psa. 1:2) Tsēkorobe Elobmîsa ôaǃnâs ge sida ǂgomsa nî ǀgaiǀgai. Paulub ge ge mî Hebre Xristeǁîn ge nē ǀgauba nî ūhâ.—Heb. 11:​1, 6. w24.09 10 ¶7-8

ǀGū ǀhōsagusisa da ga Jehovab ǀkha ūhâ, oi ge nî supu ǁîb ǃoa-ai ǂgomǂgomsase hâsa. ǁNāsab ge Josefa ge hōǃâ. ǁÎb ge ǀgaisase ge ǂkhā îb tā ǀai. Elob ge ǁîb ǃoagu ge ama i tsîb ge ǁîba ge ǂkhîoǃnâ kai ǂgao tama hâ i. (Gen. 39:9) Jehovab ǀkha ǀgū ǀhōsagusisa ūhâs ǃaroma da ge ǁaeba dī tsî nî ǀgore ǁîb ǃoa tsî ǁîb mîsa nî ǁkhāǁkhāsen. Sida ǀhōsagusis ge ǁnās ǀkha nî kai. Josefi khami da ga ǀgū ǀhōsagusisa Jehovab ǀkha ūhâ, o da ge Eloba ra ǂkhîǂkhî xū-i hoa-e nî dī ǂgao. ǁNān hîna Jehovab a ûitsama Elosa ra ǀurun ge supuse ǁîba xu ra hâbē. ǃGaoǃgâ re tae-i ge Israelǁaes ǀkha ǃgaroǃhūb ǃnâ īsa. ǁÎn ge ge ǂan i Jehovab a ûitsamasa xawen ge ge îganǀgē tsoatsoa ǁîn ǂhâsigab nî kōǃgâ ǃkhaisa. (Eks. 17:​2, 7) ǁNās xa ǃaromahe hâsen ge Elob ǃoa-ai ge khâikhâisen. Amase da ge ǁîn ǁnâuǀnamoǃnâ tanisen ǀgauba xu ra ǂgōsen ǂgao, nēs ge sida aiǁgause īb.—Heb. 3:12. w24.06 24 ¶14-15

Nē ǃhūbaib ǀams ge kaise a ǀgū ǁnā-amaga da ge ra ǃâubasen ǃgomsiga da nî hōǃâsa ā kai da ra na. Jehovab ge ra mû ā da ga o tsî ra tsûaǂgao. ǁÎb ge a ǀnam da, ǂgomǂgomsase da ǁîb ǃoagu ra hâ amaga tsûb ǃnâ-ū tsîb ge sida ǁgamroga ra ǂâihō. ǁNā-amaga da ge ǃgom tsî au mâsiga da ga ǃkharuǃnâ, o sida ǂgaoga Jehovab ai ra ǁhōǂui ǂgao ǀgores ǃnâ. Hoaǁae da ge ǃgâsan ǀhaohâb ǃnâ hân ǀgūse nî hâ tā da ge nî ǀguriǀgurisen. Tsî da ga Elobmîsa khomai ǀgara, o da ge ǁkhaeǂgaosa Elobmîsa xu nî hō. ǂGomǃgâ ǁkhā da ge a, ǂgomǂgomsase da ga ǃgomsina mâǃkharu ob Jehovaba nî mādawa-am da ǃkhaisa. Tsî ǁnās ge îsa mîmâis tsîna ǃkhōǂgā hâ, ǁîb ge sida ǁgamrona nî ǀombē ā da rana tsûb ǃaroma. (J.ǂHa. 21:4) ǁNās khaoǃgâ da ge ā da ga, o ǃgâiaǂgao da ra amaga ǀgui nî ā. w24.12 20 ¶3; 25 ¶19

Jehovab ge ǁîb ǃkhō-am-aoda ase ge ǁgaumâi da tsîb ge ge mîmâi hui dab nîsa î da ǁkhoaǂgao. (Jes. 43:​10, 11) ǃGaoǃgâ re haka ǀgaugu ǃnâb mati ǁnāsa ra dīsa. ǂGurose, Jesub ge ǃgâiǂhôasa da ga aoǁnâ ǃnās hoasa sida ǀkha hâ. (Mat. 28:​18-20) ǀGamǁîse, Jehovab ge ǀhomǃgāna ge ǁgaumâi în hui da. (J.ǂHa. 14:6) ǃNonaǁîse, Jehovab ge ǁîb ǃanu gagaba hui-aob ase mā da hâ, î-i sida di ǂâidi ǃnâ ǁkhāǁkhāsen da ge xūna ǂâi-oa kai. (Jhn. 14:​25, 26) Hakaǁîse, Jehovab ge sida ǃgâsana mā da hâ î da ǁîn ǀkha ǀguiba sîsen. Jehovab tsî sida ǀnamxaǃnâ ǃgâsan ǂkhâǃnâs ǀkha da ge ǂhâ da hâ xūn hoana ūhâ, î da nē aoǁnâ sîsenni ǃnâ ǁkhoaǂgaose aoǁnâ ǀgara. Xawe ǀoro khoena du ga oms ai ǀhao-u ǃkhais xa du ga ǂkhabuǂâi, o dîsen re: ‘Ti ǂkharis ǃnâ hâ khoena nēsi mâpa hâ?’ (ǃNǃkh. 16:13) ‘Sisenni tamas ka io ǁamaxū ǃkhaib tawan hâ?’ ǁNās ga īo du ge ǀnîsi ǃnāsa khoena ǃgangu ǃnâ aoǁnâs ǃnâ-ū ǀhao-ū ǁkhā. w24.04 17 ¶10-11

ǃGame-aots ga tsîts ga ǀhaohâb ǃûi-aob ase ǁgaumâihe ǂgao, os ge sa omaris tsîna ǃgâi aiǁgause nau khoen aiǃâ nî ī. ǁNās ǀkhab ge ǁîb “ommi ǂûba” nî ǂgaeǂgui hō. Nēs ge ra ǂâibasen sa omarisats ǀnamxaǃnâ ǀgaub ǃnâ kōǃgâ tsî ǁîna ǃgâi mîǁguiga nî dībasa. ǁNās tsîn ge ra ǂâibasen sa omaris ǀkha omaris ǃoabasa dī, aoǁnâ sîsenni ǃnâ ǁhao tsîts ǀhaodi tsîna nî hâǃnâsa. Nēsa tae-i ǃaroma a ǂhâǂhâsa? Apostel Paulub ge ge dî: ǁGûb asets ge ‘ǀgôan xa ǃgôahe tsî nî ǁnâuǀnamhe.’ (1Tim. 3:4) ǁÎnats ge ǀnamxaǃnâ ǀgaub ǃnâ nî ǁkhāǁkhā. ǂHâbats ge ra în ǁîna nau ǀgôan khami ǀhuru tsî âi. Xawets ge ǁîn tsîna nî ǁkhāǁkhā în ǁnâuǀnam tsi, nau khoena ǃgôasiba ǁgau tsî ǃgâi ǀgaub ǃnâ tanisen. Sats ge ǁgūtsâ tsî ǀgôana nî ǁkhāǁkhā în Jehovab ǀkha ǀgū ǀhōsagusisa omkhâi, Elobmîs ǂgaoǀkhādi ǃoagu ûi tsî ǁāǁnâs mîǁguiba dī. w24.11 22 ¶10-11

Aoǁnâ sîsen-e du ǃnāsase ra dī khami du ge nî mûǂan Jehovab ra hui du sa. Tsî i ge ǁîb ǃnâ du ūhâ ǂgomǃgâsiba nî ǀgai. (1Kor. 3:9) ǂÂis ǃnâ ūhâ, Jehovab ge sadu ra dī xūna nau khoen ra dīn ǀkha ǀgopeǀnō tama hâ. ǁÎb ge a ǂan matikōse du ǁîba ǀnamsa. ǁÎb ge ra ǂkhî mûb ga o, matikōse du xoremarib di ǀkhaeba ra ǃgôaǃgâsa. (1Sam. 16:7; Mrk. 12:​41-44) Xoremarib ge māhe amaga ǀgui da ge sida ǁorena ǀûbahe, Jehovab ǀkha ǀgū ǀhosagusisa ūhâ tsî hānîǁaeb ǃnâ ǀamose ûis ǃâubasens tsîna ūhâ. Hoaǁae da ge Jehovab ūba da hâ ǀnamma ǃgôaǃgâsiba nî ǁgau, hîna ge nē kai ǀkhaega īǁkhā kai ga. (1Jhn. 4:19) Dītsâ tsî da ge Jesub tsîna nî ǃgôaǃgâ, ǀnam dab a amaga ge ǁōba daba. w25.01 31 ¶16-18

ǃGaoǃgâ re Elobmîs ge tae-e Psalmdi 73 xoa-aob xa a mîsa. ǁÎb ge Jehovaba ǃoaba tama khoen hîna ge ǃgâi ǂurusib, ǃkhūsib tsî ǃgomsinan ūhâ tama khami gere ǁgausena ge mû. (Psa. 73:​3-5, 12) ǁÎn ǁkhoaxase ra ûi ǀgaubab ge mû, ob ge Jehovaba ǃoabas mîǁguib ge ǃgâi tama hâ-i ti gere tsâ. ǁÎb ge “tsēs hoasa” nē xūn xa gere ǂâiǂhansen. (Psa. 73:​13, 14) Matib ge nē ǃgâi tama ǂâiǀgauba sîsenǂam? Nē psalmdi xoa-aob ge Jehovab tempela ǃoa ge ī. (Psa. 73:​16-18) Jehovab khoen ǁaegub ge ǃgāsase ge ǂâi ǁkhā i. ǁÎb ge ge mûǂan, khoen ge ǃgâi ûiban ūhâ khami gere mûsen xawe ǃâubasensa ūhâ tama hâ isa. ǁNās xab ge ǁîba ge ǂâiǂhansen ǀû, ǂgomǃgâb ge amaga Jehovaba ǃoabas a ǃgâi mîǁguisa. ǁÎb ge ge mîǁgui aiǃgû tsîb Jehovaba nî ǃoaba ǀgarasa.—Psa. 73:​23-28. w24.10 27 ¶11-12

Jehovab ge ge ǁhûi da î da ǁîb di ‘ǀhûǀguitimî-ao’ kai. (Jes. 43:​10-12) ǂGui kuriga ǃkharu tsîs ge ǂGaeǂguira sorosa sao rase sîǂkhanis ǃnâ ge mî: “Kai aiǂhanub hoa da ūhâ ǁkhāb ge Jehovab ǃoaba-aon ase ǂgaihesa.” Tae-i ǃaroma? Sao ra aiǁgausa ǃgaoǃgâ re. Sadu ǃoagub ga ǁhōba ǁkhopa-am-e o du ge khoe-i hîna a ǂhauǃnâ-e sadu di ǃkhō-am-ao-i ase nî ǁhûi. Nē khoe-i ge ǃgâi ǀonsa dībasen hâ tsî i ge ǁî-i ra mî xu-e a ǂgomǃgâhe ǁkhā. ǁÎb ǀhûǀguitimî-aon ase ǁhûidas ǃnâ-ūb ge Jehovaba ra ǁgau, sidab ǃgâise a ǂansa tsîb ra ǂgomǃgâ dasa amaba da ǁîb xa nî mîsa. Kai aiǂhanub ase da ge ǁîb ǃoaba-aose ǂanhesa ra ǃgôaǃgâ tsî ǁnās ǀkha mâǃēs hoasa sîsenū tsî ǁîb ǀonsa ra ǂanǂan. Tsî ra ǁgau ǁîb xa ge mîhe ǂhûmi xūn ama tamasa. Nēsa dīs ǃnâ-ū da ge ra ǁgau amabes ǃnâ da ǁîb ǀhûǀguitimî-aosa.—Rom. 10:​13-15. w24.05 18 ¶13

Nauna huis ge Jesuba ǂkhîba ge mā. Jesub ge ǃnāsa-e ge dī ǁnā kai ǂnubis khoena ǁkhāǁkhāsa. ǁÎn sorosi ǂhâsigab ge ge kōǃgâ. Buruburuxa ǀgaub aib ge ǂû-e ge mā nî tsî ǁîb ǁkhāǁkhāsabega ge ǂgan, î gu nē ǂûna ǀgoraǂui. (Mrk. 6:41) Nēs ǃnâ-ūb ge ǁîb ǁkhāǁkhāsabega ge ǁkhāǁkhā, mati gu nauna nî hui ǀgausa. ǁÎgu tsînab ge ge ǁgau nēti ī sîsengu a ǂhâǂhâsa ǃkhaisa. ǂÂis ǀguisa dī re mati gu ge apostelga ǂkhî isa, buruburuxa ǀgaub aib ge Jesuba khoena ǂûmasa, “mâ ǀguiǀguibe khoe-i hoa-i ge ǂû tsî ǂâu” hâse a ǁâs kōse. (Mrk. 6:42) Nēs ge a ǀgui aiǁgau Jesub ge mati naun ǂhâsiga ǁîb di gu aiǃâ a mâi ǀgausa. Jesub ge ǃhūbaib aib ge hâ io, ǁîb ûi kurib hoaba nau khoena gere hui. (Mat. 4:23) Jesub ge kaise ge ǂkhî i nau khoena ǁkhāǁkhā tsî ǁîn ǂhâsiga kōǃgâsa. w24.11 16 ¶10-11

“ǀUni tsēdi” ra ǁgaiǂoa khami da ge ǃnāsa ǃēde nî ūhâ ǂhâsib ǃnâ hâ ǃgâsana huisa. Sida ǃgâsana da ge ǁkhaeǂgao tsî ǀnammi tsîna ǁgau ǁkhā. ǀGui ǀgaub ǁnāsa da a dī ǁkhāb ge ǁkhoreǁharesase nauna sali tawa tsâ kaisa. ǁNā-amaga da ge sada ǃgâsan ga ǀhaode hâǃnâ, o ǁîna ǀnam-e, khoakhoahe tsî ǁkhaubahen ra khami ra tsâ kai ǂgao. ǀHaohâb ǃûi-aogu ge ǃgâsan ǃgomǁae gan ga hōǃâ o ra ǁkhaeǂgao. Tsūkēǃgân tamas ka io ǀaeb khoraǂuisens ga hâ, o gu ǀhaohâb ǃûi-aoga ǃkhaese huiba ra ǀapeǁgui în ǃgâsana hui-e. ǀHaohâb ǃûi-aogu tsîn ge ǃgâsana gagasi huiba ra mā. ǃGâsan ge ǃnorasase nî tsâ ǀhaohâb ǃui-aob ai huiba ǂansa, ǁîb ga khoexaǃnâse ǃhoa, ǃgâ tsî ǁîna ga ǁnâuǃā tsâ o. ǁNāti ī ǀgauga ūhâs ge nauna ǀnammen hâ khami ra tsâ kai. Nēs ge ǁîn tsîna ra tsâ kai în Elobmîs ai ǃgaoǃgaohe hâ daoǁgaus ǀhaohâb ǃui-aoba xu ra hāsa ūǃoa.—1Tes. 2:​7, 8, 11. w24.06 29 ¶12-13

Tā da ge nî ǂâi Elob a Hoaǀgaixa amagab tsâsina ūhâ tamasa. Khoenab ge tsâsin ǀkha ge kuru. Elobmîs ge ra mî ǁîb īsib ǃnâ da kuruhe hâsa. ǁNās ge ra ǂâibasen Jehovab tsîn tsâsina ūhâ ǃkhaisa. Elobmîs ge ra ǁguiǃā ǁîb tsîn ra ‘tsûtsûhesa.’ (Psa. 78:​40, 41) ǂÂis ǀguisa di re matikō ǃnādeb ge Jehovaba tsûtsûhesa, ǁîb Ôab ǃkhāǃkhāhe tsî eloxoresa khoen xa ra ǃgamme ǀgausab ge mûo. Xoremarib ge ra ǁkhāǁkhā da Jehovab kaise a ǀnam da ǃkhaisa, sida di ǀaokhoen tamas ka io ǃgâi ǀhōsa-i ǃgâ-ai. (Rom. 8:​32, 38, 39) ǂGomǃgâsiba da ge ūhâ sida a ǀnamsens ǃgâ-aib Jehovaba a ǀnam da ǃkhaisa. ǀAmosib kōse du ra ûi ǂgao? Jehovab ge ǁnāsa sadu xa ǃnāsase ǂhâba hâ. Sadu ǁoren nî ǀûbahe sadu ra ǂhâba? Jehovab ge ǁnāsa sadu xa ǃnāsase ra ǂhâba. ǁÎb ra ǂgaoǀkhās ge ǁîb ǀō-aisa ǀkhaeba ūǃoa, ǂgomsa ǁgau tsî ǁnâuǀnamsa. Jehovab ge xoremariba ǀō-aisa ǀkhaeb ase ge mā da tsî da ge nēs ǃnâ-ū ǁîb ūba da hâ ǀnamma ra mû.—Aoǁn. 3:11. w25.01 22-23 ¶8-9

ǀNî ǁaegu ai da ge hoa da mû, ǁnâu tsî tsâ da ra ǀgaub ai ǃgaoǃgaohe hâse mîǁguiga ra dī. Mû tsî da ra ǁnâu xūn ge hoaǁae ǂhanu tama hâ. Mû, ǁnâu tsî tsâ da ra ǀgaub ai ǃgaoǃgaohe hâse da ga mîǁguiga dī, o da ge Jehovab ǂgaoǀkhā da tama xūna a dī ǁkhā. (Aoǁn. 11:9; Mat. 24:​37-39) Sida ǂgoms ai ǃgaoǃgaohe hâ mîǁguiga da ga dī, o da ge “ǃKhūba a ǃgâiba” mîǁguiba ra dī. Elob ǀapemāsa da ga sao, os ge nēsa ama ǂkhîba nî mā da. (Psa. 16:​8, 9; Jes. 48:​17, 18) ǂGoms ǃnâ da ga ǃgû ǀgara, o da ge ǀamo ûiba nî hō. (2Kor. 4:18) Mati da a ǂan ǂgoms tamas ka io mû da ra xūn ǃoagu da ra ǃgûsa? Sao ra dîde dîsens ge hui da ǁkhā: Tae-e ra hui te mîǁguiba dīsa? Mû da ra xūn ai da ra ǂgomǃgâ ti mîǁguiba dīsa? Tamas ka io Jehovab ǀapemādi xa da ra daoǁgauhe? w25.03 20-21 ¶3-4

Hoa da ge xū-e nî dī, în nauna gagasi paradaisa ǃoa ǂgaehe. Nēsa dīs ǃaroma da ge Jehovaba nî ǁgae. ǁÎb ge khoena ǁgari tama hâ în Jehovab ǀapeǂhumis ǃâ kai, xaweb ge ǃgâi ǀgaub ǃnâ khoena ǁîb ǃoa ra “ǂgae.” (Jhn. 6:44; Jer. 31:3) ǃGâi ǂgaoga ūhâ khoen hîna Jehovab ǀnammi tsî ǁîb ǃgâi ǀgaugu xa ra ǁkhāǁkhāsenan ge aitsama ǁîb ǃoa ra ǂgaehe. Mati da sida ǃgâi ǀgaugu tsî tanisen ǀgaugu ǃnâ-ū khoena gagasi paradaisa ǃoa nî ǂgae? ǀGui ǀgaub ge sida ǃgâsana ǃgâise ǀnammi ǃnâ hâ-ūsa. ǀAsa khoen ga sida ǀhaohâb ǀhaode hâǃnâ tsoatsoa, o da ge ra ǂhâba în saora mîdi aibekam ǁaeb Korinteǁîn ge mîde mî: ‘Amaseb ge Eloba sadu ǁaegu hâ.’ (1Kor. 14:​24, 25; Sax. 8:23) ǁNā-amaga da ge nētsēs mîs ǃnâ hâ ǀapemāsa nî sao ǀgara. w24.04 23-24 ¶16-17