Desemberi

Jesub ǁkhāǁkhāsabegu ge Elobmîs ǃnâ gere ǂgom tsî ǁkhā gu a i hoa-e gere dītsâ î gu Jehovaba ǁnâuǀnam. (Jhn. 17:6) Xawe gu ge ge ǁnâuǃā tama hâ i tae-i ǃaromab ge Jesuba ǁore-aob khami a ǃgamhesa. Jesub ge ge ǂan-i ǁîb ǁkhāǁkhāsabegu ǂgomsa ūhâsa tsî gu Jehovaba a ǀnamsa. Xaweb ge ge mûǂan ǁîgu xoade ǃgâise nî ǁnâuǃāsa. (Luk. 9:​44, 45; Jhn. 20:9) ǁNā-amagab ge ǁîga ge hui î gu ǁnâuǃā tae-e gu ra khomaisa Elobmîs ǃnâ. ǃGaoǃgâ re matib ge ǁnāsa a dīsa, ǀgam ǁkhāǁkhāsabekhab ge Emmaus ǃoa garu daob ai ǀhao-ū o. Jesub ge ǁkhā ǁaeb ai ge mîba gu tama hâ i, ǁîb a hamsa xaweb ge dîna gere dî. Tae-i ǃaroma? ǀNîsib ge gere ǂhâba, î gu ǁîba mîba mati gu ra tsâ ǀgauba tsî gu ge ǁnāsa ge dī. ǁÎgu ge Jesuba ge mîba ǃâubasen gu ge hâ isa Jesub nî gao-ao kaisa Israeli ǃnâ tsî ǁîna nî ǂgaeǂguisa Romeǁîn ose. (Luk. 24:​18-27) Jesub ge xoade ge sîsenū îb nē khoega hui î gu ǁnâuǃā ǂgui kēbodi dīǀoaǀoahe hâ ǃkhaisa. ǁKhā ǃuis aib ge nau ǁkhāǁkhāsabegu ǀkha ge ǀhao tsî ǁîgu tsîna ge ǁguiǃāba nē kēbodi tae-e ra ǂâibasensa.—Luk. 24:​33-48. w24.10 14 ¶9-10

Jesub ge ǁîb ǀhomsi ǁGûba xu ge ǁkhāǁkhāsen tae-eb nî dīs tsî tae-eb nî mîsa. Jesub aiǁgausa ǁgaes ǃnâ-ūs ge Jehovab ǀapeǂhomisa ǁkhāǁkhāsen da ra xūn tsî daoǁgaudi tsîna Elobmîs ai ra ǃgaoǃgao. (2Tim. 3:​16, 17) ǃNās hoasa da ge ra hōhōǃnâhe î da Elobmîsa khomai tsî khomai da ra xūna ûiǂui. ǃGâiba da ge ra ǀama Elobmîs ai ǃgaoǃgaosa ǂkhanin sida dina xu da ga ǁkhāǁkhāsen o. Aiǁgause da ge Elobmîs ǁkhāǁkhāde a ǀgōpeǀnō ǁkhā, sida ǀapeǂhomisa xu da ra hō daoǁgaudi ǀkha. Elobmîs ai ǃgaoǃgaosa daoǁgaude da ga mû, o i ge Jehovab ǀapeǂhomis ǃnâ da ūhâ ǂgomǃgâsib ra ǀgai. (Rom. 12:2) Jesub ge “ǃgâiǂhôas Elob Gaosib disa” gere aoǁnâ. (Luk. 4:​43, 44) Jesub ge ǁîb ǁkhāǁkhāsaben tsîna gere mîmā în Gaosib xa aoǁnâ. (Luk. 9:​1, 2; 10:​8, 9) Nētsēn ge Jehovab ǀapeǂhomis ǃnâ hân hoana Gaosib haisi-amsa ra aoǁnâ, mâpa ǀguin ga hâ xawes tsîna. w24.04 9 ¶5-7

Aiǃgû tsî ǂgomǃgâsiba Jehovab ǀapeǂhumis di daoǁgaudi ǃnâ ūhâ re. Jehovab ge Moseb tsî Josuab tsîna gere sîsenū îkha ǁîb daoǁgaude Israelǁaesa ǃoa mâǃkharu. (Jos. 1:17) Israelǁaes ge nē khoekha Jehovab xa ǁgaumâihe hâ hîna daoǁgaude ra mā kha ase gere mû, ob ge Jehovaba ǁîna gere ǀkhae. ǂGui kuriga ǃkharu tsî i ge Xristeǁî ǀhaohâba a ǂnūbikhâihe, o gu ge 12 Apostelga daoǁgaude gere mā. (ǃNǃkh. 8:​14, 15) Ega i ge 12 apostelgu ǂam-ai ǀnî hâ ǀhaohâb ǃûi-aogu tsîna ge ǁgaumâihe Jerusalems ǃnâ. Nē ǂgomǂgomsa khoega xu gere hā daoǁgauden gere sao, “o gu ge ǀhaohâga ǂgoms ǃnâ ge ǀgaiǀgaihe tsî ǃgôab ǃnâ tsēkorobe gere ǀarohe.” (ǃNǃkh. 16:​4, 5) Sida tsēdi ǃnâb ge Jehovaba ra ǀkhae da ǁîb ǀapeǂhumisa xu ra hā daoǁgaude da ga sao o. w24.07 10 ¶10

Jehovab ge kaise Gao-aob Davida ge ǀnam ī. “Ti ǂgaob ǃoa hâ khoeb” tib ge ge ǂgaibi. Xaweb ge Davida kaise ǁgai xūna ge dī, aiǁgause ǃgamme khôa tsîb ge khoe-e ge ǃgam. Moseb ǂhanub ǃoagub ge Davida ǁōb ǁkharaba ge anu hâ i. (Lev. 20:10; Num. 35:31) Xaweb ge Jehovaba Davida gere hui ǂgao îb ǃhobasen. ǁÎb kēbo-aob Natana ge sî îb Gao-aoba sari, noxopab ge ǁîb ǁorena xu ǃhobasen tama hâ ī hîna. Natani ge aiǁgausa ge sîsenū îb Davida hui, îb ǁnâuǃā ǀgaisa ǁorenab ge dī ǃkhaisa. Davidi ge ge mûǂan kaiseb ge Jehovaba a tsûtsûsa tsîb ge ge ǃhobasen. (2Sam. 12:​1-14) Psalmsab ge ge xoa ǁgau rasa matikōseb ge ǃhausensa. (Psa. 51) ǂGui khoen ǁore gen ge nē Psalms xa ge ǁkhaeǂgaohe ǁîsan ra khomai hîna tsîn ge ge ǃhobasen. Kaise da ge ra ǃgôaǃgâ Jehovab ge ǀnamxaǃnâ ǀgaub ǃnâ Davida hui ǀgaus xa. w24.08 10 ¶9

ǂGui khoen ge nî ǃkhō-am ǀgôana kaikais kai sîsen-e ǃkhōǂgā hâsa. Sadu ga ǁgû, o du ge ǃgarise ra sîsen î du nē ǀgôan ǂgomsa ǀgaiǀgai. Tsîb ge Jehovaba sadu ǀkha a ǂkhî. (Deu. 6:​6, 7) Sadu ǀgôa-i ra kai khami i ge ǁî-e dîna a dî tsoatsoa ǁkhā sadu ǂgom ǀgaub xa. Aiǁgause, Jehovaba tae-i ǃaroma ǂhâba tama hâ î da ǀnî xūna dī. Tsoatsoas ai du ge ǀnîsi a ǂâiǂhansen ǁkhā sadu ǀgôa-i dîn ǃaroma. ǀNîsi du ge a ǂâi tsoatsoa ǁkhā sadu ǀgôa-i ge nē dîna ra dî, ǁî-i ǂgoms Jehovab tsî Elobmîs ǃnâ ǂkhabusa amaga. Xawe ama as ge ǀgôan ra kai khamin ge dîna nî dî în ǁîn ǂgomsa ǀgaiǀgai. (1Kor. 13:11) ǃAo du nî ǃaroma i ge a ǀkhai. Nē dînan ga dî o du ge nē ǁaeba sîsenū tsî a ǁkhāǁkhā nî ǁkhā în ǃgamse ǂâi tsî ǁnās ǃnâ-ū ǁîn ǂgomsa Elob tsî Elobmîs ǃnâ ǀgaiǀgai. w24.12 14 ¶1-2

Hebre Xristeǁîn ge ǀgaisa ǂgomsa ge ǂhâhâ i, în ûiǃkharu ǁkhā ǁgâiǀāb ga Judeab ǃnâ hā o. (Heb. 10:​37-39) Jesub ge ǁîb sao-aona ge ǃkhâikom, Jerusalems ga toroǂnubidi xa xāǂgāhe on ǁîsa xu nî ǂoasa. ǁÎb ǀapemās ge hoa Xristeǁîna ǃoa ge hâ i, nēsin ga Jerusalems ǃnâ hâ tamas ka io Jerusalems ǃauga hâ xawe. (Luk. 21:​20-24) Toroǂnubis gere ǁnāǂam nî, on ge khoena mīrga ūhâ ǃāsa ǃoa gere ī în ǁkhaubahe. ǁNā-amaga î ge ǃkhomga ǃoa īsa ǃgâi tama ǀapemās khami gere mûsen tsîn ge ǁnās ǀkha ǀgaisa ǂgomsa ge ǂhâhâ ī în Jesuba ǁnâuǀnam. Hebre Xristeǁîn ge ǂgomǃgâsiba ge ǂhâhâ ī, Jesub gere sîsenū ǃgâsaga ǁnâuǀnamsa. ǂGaeǂguira ǃgâsagu ge daoǁgausa ge mā matin ǁnā ǃāsa xu nî ǂoas tsî matin ǁnāsa nî dīsa.—Heb. 13:17. w24.09 10 ¶9-10

ǃHūbaib aib ge hâ i, ob ge Jesuba ǁîb Îb xab ge ǂgaoǀkhāhe xūna ǂōrisase ge dī. (Jhn. 17:4) Xaweb ge Jesuba ge ǂâi tama hâ i ǁîb ǀguib Jehovab ra ǂgaoǀkhā xūna a dī ǁkhāsa. ǃHūbaib aib ge ǃnona tsî ǃkhare kurina aoǁnâ, ob ge nauna gere ǁkhāǁkhā. Jesub ge ǁîb ǁkhāǁkhāsabega gere ǂgomǃgâ. ǃEreamsab ge ge mā gu î gu ǃgâiǂhôasa aoǁnâ. Jesub ge ǁîb ǁkhāǁkhāsabega gere ǁnama îb hui gu xaweb ge nēsa ǃgâi ǀgaub ǃnâ gere dī. ǁNā-amagab ge ǁîga ge hui î gu amaba ǂan ǁîga ǁnamas ǃnâ-ū. (Luk. 24:​25-27; Jhn. 20:27) ǁÎgu tsînab ge ge mîba î gu Jehovab khoena kōǃgâs ai ǂâisa ǂnûi, mari-e kurus ais ose. (Jhn. 21:15) ǁÎgab ge ge ǂâiǂâiǃnâ î gu tā Jehovab ǃoabas ǃnâ naun ǀkha ǀgopeǀnōsen. (Jhn. 21:​20-22) Ū gu ge hâ i ǃgâi tama ǂâiǀgaub tsînab ge ge mî-unuba gu tsî ge hui gu î gu mûǂan Gaosib haisi-ams ai gu ǁîgu ǂâisa nî ǂnûisa. ǃNǃkh. 1:​6-8. w24.10 15-16 ¶13-14

Jehovaba da ga ǁnâuǀnam o da ge ǀamose a ûi ǁkhā. Israelǁaes ge mîmâisa ǃhūb di ǂgâ-ams tawa mā i, khami da ge sida tsîna Jehovab mîmâisa ǀasa ǃhūbaib di ǂgâ-ams aiǃâ mā. (Jes. 35:1; Luk. 23:43) ǁGâuab tsî ǁîb demongu ge ǁnāpa hâ tide. (J.ǂHa. 20:​2, 3) Ama tama ǂgomdi ge hâ tide Jehovab xa ǂhumiba ra ǁkhāǁkhāde. (J.ǂHa. 17:16) Khoesi ǂhanugu ge ǁîn ǃnāga hâ khoena ǁgâiǀā tide. (J.ǂHa. 19:​19, 20) Jehovab ge mā-am tide î-i khoe-e paradais ǃnâ ǃgomsina ǃaroma. (Psa. 37:​10, 11) Hoa khoen paradais ǃnâ nî hân ge Jehovab ǂhanu-ai ǂhanuga nî ǁnâuǀnam tsî i ge ǂkhîb tsî ǀguiǃnâxasib tsîna nî hâ. Hoa khoen ge ǀnamgu tsî nî ǂgomǃgâgu. (Jes. 11:9) ǁNā ǁaeba ǃoa da ge ra mûǂûi tsî Jehovaba da ga ǁnâuǀnam, o da ge paradais ai 100 kurin ǀguiga hâ tide xawe ǀamosib kōse.—Jhn. 3:16. w24.11 9 ¶7

Nētsēs xoas ǃnâ hâ kēbos ge sida ûi hâ ǁaeb ǃnâ ra dīǀoaǀoahe. Gaosib haisi-ams ge 1 000 xa ǃnāsa gowagu ǃnâ jw.orgs internets ǂhaweb ai hōhe ǁkhā. ǁNās xa ǃaromahe hâse î ge ǃnāsa khoen ǃhūbaib ai hâna ǃgâiǂhôas Elob Gaosib disa a ǁkhāǁkhāsen ǁkhā. Xawe, Jesub tsîn ge ǁîb saosabega ge mîba: “Hoa . . . ǃādi ǃnâ go sîsengu ǀkha toa,” tidesa tamas ka io mâ khoe-e hoa-e aoǁnâba hō tidesa ǁîb nî hās aiǃâ. (Mat. 10:23; 25:​31-33) Jesub mîdi ge sida tsēs ǃaroma a ama. ǂGui khoen ge nētsē sida hārase a aoǁnâ ǁoa ǃādi ǃnâ ra hâ. ǁNās ǂam-ai i ge ǂgui ǀgôarona mâ kamab hoaba ra ǃnaehe. ǁKhā da a-i hoa-e da ge ra dītsâ î da mâ “ǁaes, ǃhaos, gowab tsî khoen” hoana ǃgâiǂhôasa aoǁnâba. (J.ǂHa. 14:6) Ama-as ge ǃgâiǂhôas Gaosib disa da hoa khoen ǀkha ǀgoragu hō ǁkhā tidesa ǀams nî hās aiǃâ. w24.05 10 ¶6-7

Jesub ge ǁîb mîde gere sîsenū, îb nau khoena ǁkhaeǂgao tsî ǂkhâǃnâ. ǁÎb ge ǁîb saosaben ǀkha ǁgaise ge ǃhoa tama hâ i. (Luk. 8:​47, 48) Nēs ge kaise ǃgâi aiǁgausa Xristeǁî aogu ǃaroma. Jesub ge aoga ge mîba, î gu ǂgomǂgomsase ǁîgu taradi ǀkha hâ. ǁÎb Dadab ge mî xū-eb ge ge ǃkhō-am mîb ge o, aob ge “taras ǀkha nî ǃgaeǁarehe.” (Mat. 19:​4-6) Grike gowab mîs “ǃgaeǁarehes” ge nēba ra ǂâibasen “ǂae” ti. ǁNā-amagab ge ǃgammeba aob tsî taras ǁaegu ǁnātikōse nî ǀgaisa ǂaeǀhao ra hâ khami. Khoe-i ga ǁî-i ǃgamme hâ khoe-e ra tsûtsû xū-e dī, o ra ge hoa ra nē xū-i xa nî tsâǀkhāhe. Aob ga ǁîb tarasa ǃgamse ǀnam, ob ge ǁgauoǃnâ ǁgoe-ūgub vidiogu tsî ai-īsigu tsîna kō tide. “Hārebeoǃnâ xūna” kōsa xub ge nî ǂgōsen. (Psa. 119:37) Jobi khamib ge nî mîmai îb tātsē ǀnî hâ tarekhoesa tā ǃgâi tama turaga ūhâ ǂâiǀgaub ǀkha kō.—Job. 31:1. w25.01 10 ¶12-13

Khoen ge ǃkharagagu xūna ra ǂâibasen, mîn ga o ‘ǀûba tsi ta ge go’ ti. Jehovab ǀoasa kurusa ūhâ tama khoena ra ǀûba ǀgaub ge sada ra ǀûbagu ǀgauba xu ra ǀkhara. Khoe-i ge Jehovab ra ǀûba ǀgaub ǃnâ a ǀûba ǁoa. Psalmdi xoa-aob ge Jehovab xa saora-e ge mî: “Xawe sats tawas ge ǀûbasa hâ, sats nî ǃaoǃgâhe ǁkhāse.” (Psa. 130:4) Jehovab tawas ge ama “ǀûbasa” hâ. ǁÎb ge ra ǁgauda ama ǀûbas tae-e ra ǂâibasensa. Hebreǁî xoadi ge ǀûbab xa hâ mîsa ra sîsenū, nēs ge Jehovab ǀûbasa ǃoa ra ǁnaeǁgau tsî khoen ra ǀûba ǀgaub ǃoagu a sîsenūhe ǁoa. Jehovab ga khoe-e ǀûba, o i ge ǁî-i ǁoreba ra ǀariǂuihe. Tsî da ge noxoba Jehovab ǀkha ǀgū ǀhōsagusisa a ūhâ ǁkhā. Kaise da ge ra ǃgôaǃgâ Jehovab hoase hoaǁae ra ǀûba dasa. w25.02 8 ¶1-3

Aoǁnâ da ga tsîn ga khoena ǃgâ tama i xawe da ge sida mîǁguiba ra sīǃnâ. Tae-i ǃaroma? Jehovab tsî ǁîb ǀGôab ǂgan da hâ xū-e da ge ra dī, ǁnās ge aoǁnâsa. ǃHoa-ū da nî khoe-e da ga ǀhao-ū tama i tamas ka io i ga sida haisi-amsa ūǃoa-e tama i xawe da ge ǃgâiaǂgaoba a ūhâ ǁkhā. Sida ǀhomsi ǁGûba da ra ǂkhîǂkhî ǃkhaisa da a ǂan amaga. (ǂKhm. 27:11) Nau ǃgâsa-i ga ǃgâiǃgâibasensa ūhâ khoe-e ǀhao-ū os tsîna da ge a ǃgâiaǂgao ǁkhā. ǃKhē xu ǂgō-ommi ge sida sîsen-e kā hâ ǀgôa-e da ra ôas ǀkha ra ǀgōpeǀnō. ǂGuin ge ǁnā ǀgôa-e ǃkharagagu ǃkhaigu ai ôas ǀkha ra hui. ǀGôa-i ga hō-e on ge hoana ra ǃgâiaǂgao. ǁNās ǁkhās khami i ge ǀhaohâb ǃnâ hân hoana ǀasase ra ǂgâxana ra hui. ǀHaohâb ǃnâ hân hoan ge ǂhâ-e hâ in hoa khoena aoǁnâba. Tsî ǃgâiaǂgao ǀasa khoe-i ga ǀhaode hâǃnâ tsoatsoa o. w24.04 18 ¶13-14

Hānîǁaeb ǃnâ nî ī xūna ǃoa da ge ra mûǂui. Jehovab mâxōǀkhās ǀkha da ge ra ǃâubasen matin ǂguina amaba kai ǁgâiǀāb aiǃâ nî ūǃoasa. Kaises tsîna da ge ra ǂkhî matin ǂguina ǁGâuab ǃhūbaiba xu ǂoaxa tsî Jehovaba nî ǃoabasa. Nēsi da ge dī da nî sîsen-e ūhâ. Kai aiǂhanub ge ǃgâiǂhôasa ǃhūbaib ǂhabase aoǁnâsa. Xawe da ge ǁkhā ǁaeb ai aiǃgû tsî khoena nî mîba ǀgūǁae-i tae-e nî īsa. Khoen ge nî ǁnâu nē eloxoresa ǃhūbaib di ǀams ǀgūǁae nî hāsa. ǀNammi ge ra ǂkhâǃnâ da ǃgâiǂhôasa aoǁnâsa tsî hoan ǂam-ai Jehovab tsî ǁîb ǃanu ǀonsa ǀnamsa. Aoǁnâ ǀgara da ge nî māsenxasib, ǁgariǁgarisasib tsî ǁkhoaǂgaosib tsîn ǀkha Jehovab “ǂâu-i ge go” ti nî mîs kōse. w24.05 19 ¶14-16

ǃGamheb nî ǃuis aiǃâb ge Jesuba, Petrub tsî nau apostelgu tsîna ǂhâǂhâsa xū-e ge ǁkhāǁkhā ǃgamǃgamsenxasib xa. Apostelgu ge kaise ge buru hâ i, mû gu ge o Jesub ǃgā-i ra dī sîsen-e ra dī ǃkhaisa. Jesub ge ǁîb ǂam saraba ǁhû tsî handuba ǁîb khamanâb ai ge ǃgae, ǁgamm-e xapas ǃnâ ǁhō tsî ǁîgu ǂaide ge ǁā tsoatsoa. (Jhn. 13:​4, 5) Jesub ge hoa 12 apostelgu di ǂaide ge ǁā. Nēs ge ǀnîsi gāxu ǁaeba ge ū, Judab Iskariob ǁîba ge ǀapexub ǂaidi tsînab ge ge ǁā. Jesub ge ǃgamǃgamsenxase nē sîsenni hoa-e ge dī. ǃNūǃnâxasib ǀkhab ge Jesuba ge ǁguiǃā: “ǁNâuǃā go ra tare-e ta goro dī ǃkhaisa? Sago ge tita ‘ǁKhāǁkhā-aotse’ tsî ‘ǃKhūtse’ ti ra ǂgai tsîs ge ǁnāsa a ǂhanu, ǁî ta a amaga. Tita, sago di ǃKhū tsî ǁKhāǁkhā-aota go sago di ǂaide ǁās ǁkhās khami go ge sago tsîna ǂaide nî ǁābagu.”—Jhn. 13:​12-14. w25.03 10 ¶9-11

Nē ǃhūbaib ge Jehovab ǀgūse hâ ǀgarasa ra ǃgom kai. ǂGuin ge Elob a ûitsama ǃkhaisa ūǃoa tama hâ. ǃNāsa ǁaeba i ge Jehovab ra ǂgaoǀkhā xūna ūǃoa tama khoena ǃgâi ûiba ūhâ. ǁNāsa da ga mû os ge sida ǂgomsa ra ǃâitsâhe. Elob ûitsama ǃkhaisa da ǂnoagu tama xawe da ge ǀnî ǁaega a îganǀgē ǁkhā sidab a hui ǁkhāsa. Psalmdi 73 xoa-aob tsîn ge ǁkhā xūn xa gere ǂâi. ǁÎb ǂnamipe hâ khoen Elob ǂhanuga ūǃoa tama i tsî noxopa ǃgâi ûiga ūhâsan ge ge mû. Nēs xa ǃaromhe hâsen ge gere îganǀgē Eloba ǃoabas a ǃgâi ǃkhaisa. (Psa. 73:​11-13) Tae-e Psalmdi xoa-aoba ge hui îb ǁîb ǂâiǀgauba dawa? Jehovaba ra ǀurun ǀkha i tae-e nî īsab ge ge ǂâiǃgâ. (Psa. 73:​18, 19, 27) ǁÎb ge Jehovaba ǃoabasa xu ra hâ ǃgâib xas tsîna ge ǂâiǃgâ. Sida tsîn ge Jehovab ge mā da ǀkhaegu xa a ǂâiǃgâ ǁkhā. w24.06 25 ¶16-17

Elobmîs ǁaeb ǃnân ge ǀnîna ǀgâsa ǃgâsana mari-e ǀkhupi tsî gere ǂgaoǀkhā în ǁîna ǁnān go ǀkhupi maris xa ǃnāsase matare-oa. ǀGoraǃgâ-aogu tsîn ge ǁamaǃkhunimari-e ǃkhōǃoa tsî ǀhapiokhoena ǂhanu tama ǀgaub ǃnâ gere ǀgoraǃgâ. (Ese. 22:12) Kaise i ge a ǂhâǂhâsa î da mari-i ǃoagu da ūhâ tsâsiga ôaǃnâ. Dîsen re: ‘ǃNāsa ǁaeba ta mari-i tsî tae-e da a ǁama ǁkhās xas tsîna ra ǂâi? Mari-e ta ga ǀkhupi o da ge ǂause ra ū mā-oasa, ǁî-i mari-e ǂhâ tama ti ta ra ǂâi amaga? Mari-e ūhâsa ǂhâǂhâsa ta a khami ra tsâ kaite xawe i-a ǃgom nau khoena māsa? ǃGâsana da mari-en ūhâ ǃkhais ǃgao ra ǀgoraǃgâ? ǃGâsan ǂgui mari-e ūhâ amaga ta ra mî ǁîn mari-e ǃnāsase a ǀnamsa, Jehovab xa? Mari-e ūhâ khoen ǀkha ǀgui da ra hâ ǀhao tsî ǀgâsan ǀkha ǁae tama? Sida ǀhōsagusisa da ge ǁkhauba ǁkhā, mari-e ǀnamsa xu ǂgōsens ǃnâ-ū. Nēsa da ga dī, ob ge Jehovaba tātsē ǁnāxuǃnâ da tide. w24.06 12-13 ¶17-18

ǃÂitsâna xu ǂgōsens ǃaroma da ge ǂhanu turaga nî omkhâi. ǁKhāǁkhāsen da ga “tsū xūna ǁkhan” tsî “ǃgâina ǀnamsa,” o da ge sida mîmâisa nî ǀgaiǀgai ǂhanu xū-e dī tsî ǁoreba a ǃaroma ǁkhā mâsiga xu ǂgōsensa. (Amo. 5:15) ǂHanu turaba ūhâs ge nî supuba da ǃâitsâhe da ga ǁaeb ai tsî da ge nēsa xūs tsîna nî ǁkhaubasen. Gagasi ǁaxasigu ǃnâ da ge nî ǁhao. Xristeǁî ǀhaode hâǃnâ tsî da ga aoǁnâ, o da ge ǀgaisa turaba ra omkhâi Jehovaba ǂkhîǂkhîsa. Tsî ǁnās ǀkha ǃâitsâhe tide ǁgai xūna dīsa. (Mat. 28:​19, 20; Heb. 10:​24, 25) Elobmîsa khomai, ôaǃnâ tsî ǂâiǃgâs ge nî hui da, ǃgâina ǀnam tsî ǁgaina ǁkhansa. (Jos. 1:8; Psa. 1:​2, 3; 119:​97, 101) ǂÂi oa re Jesub ge ǁîb ǁkhāǁkhāsabe ga ge mîba: “ǀGore, î go tā ǃâitsâb ǃnâ ǁnā.” (Mat. 26:41) ǁÎba da ge ǃēsa ra mā, îb hui da î da mîǁgui ǁîba ǂkhîǂkhîsa.—Jak. 4:8. w24.07 17-18 ¶14-16

Jehovaba ǁgae re nauna du ga ǁkhāǁkhā o. Jehovab ge ǁîb gā-aisiba ū-oa tamase nau khoen ǀkha ra ǀgoragu. ǁNās ǁkhās khami da ge sida ǂans tsî gā-aisib tsîna ǁkhāǁkhā da ra khoen ǀkha māsenxase ra ǀgoragu. Tā da ge sida gā-aisiba nî ǃkhō-oa, naun sida ǃkhaisa nî ūsa da ra ǃao amaga. ǀNî ǁaega da ge ra ǂâi sida tsîn ge ǁkhāǁkhāhe tama hâ i tsî da nauna ǁkhāǁkhā tide ti. ǁNāti ī ǂâiǀgaub ge Jehovab ǃoaba-aon ǁaegu hō-e ǁoa. Xawe da ge ǂan da a xūn hoana nau khoen ǀkha ra ǀgoragu tsî ǁkhā da an hoana dī tsî ra ǁkhāǁkhā nî. (1Tes. 2:8) ǂHâba da ge ra “în ǁîna ǃaruǀî nauna ǁkhāǁkhā.” (2Tim. 2:​1, 2) Hoa da ga naun ǀkha sida gā-aisiba ǀgoragu, o da ge hoa da gā-ai tsî nî ǂkhî. w24.09 29 ¶12-13

Sats ga mâǂoa ra ǁkhāsibats ūhâ tama ti ga ǂâi, o tā ǂkhabuǂâi re. Ama as ge sats ǀnî hâ ǀgaugu tamas ka io ǁkhāsiga ūhâsa ǀhaohâba huis ǃnâts sîsenū ǁkhā ga. ǂÂi re Paulub ge tae-e a mîsa 1 Korinteǁîn 12:​12-30 ǃnâ tsî Jehovaba ǂgan re îb huitsi îts mû nēs mati ra tsâǀkhā tsisa. Paulub mîdi ge ra ǃgāsa kai sats nau ǃoaba-aon Jehovab din khami ǀō-aisa tsî ǂhâhe hâsa ǀhaohâb ǃnâ. Nēsi dī ǁkhāts ana dī, Jehovaba ǃoaba tsî sa ǃgâsana huisa. ǂÂis ǃnâ ūhâ re, ǀhaohâb ǃûi-aogu satsa ǂâis ǃnâ nî ūhâ tsî dī ǁkhāts a ǁgaumâide nî mā tsisa. (Rom. 12:​4-8) Hoa Xristeǁîn ge Jehovaba ǀgū, naun ǀkha xūna ǀgoragus ǃnâ ǃgâiaǂgao tsî Jehovaba ra ǂkhîǂkhî ǀgaub ǃnâ nî ûi. w24.11 17 ¶12-13

Hanas ge ǃgomsina gere hōǃâ, ǃoa tsî gere ā kaisī na. Hannas aob ge ǀgam tarara ge ǃgamme hâ i tsî i ge ǁnā-e ge ǃgomsi ī. ǁÎs aob nau taras Peninas ge ǁîsa ge ǃhui hâ i. ǁNās ǂam-ais ge Hanasa ǀgôa-e ge ūhâ tama hâ i xawes ge Peninasa ǂgui ǀgôana ge ūhâ i. (1Sam. 1:​1, 2) Peninas ge Hanasa gere ǃhō ǀgôanas ge hō ǁoa-i ǃkhais ǃaroma. Mati du ga tsâ hâ sadu ga ǁnā mâsib ǃnâ hâhâ o? Hanas ge ǁnātikōse gere tsâǀkhāhe is ‘ā tsî ǂû tama i’ tsîs ge kaise gere tsûaǂgao. (1Sam. 1:​6, 7, 10) Hanasa mati ge ǁkhaeǂgaohe? ǀGui xū-i hîna ge huisi i ge ama ǃoabas ra dīhe ǃkhaiba ǃoa īsa, tabernakela. ǁNāpas ge Jehovaba ǀkhoma tsî ge mî: ‘Sa ǃgāta di ǀkhomǀkhomsasiba kōǀî tsî ta ǀuru te re.’ (1 Sam. 1: 11) ǁÎs ra tsâ ǀgauba ǁnâuǃā, ǁîs ǀgoresa ǃeream tsîb ge ega ge huisi is ǀgôana hō ǁkhā.—1Sam. 1:​19, 20; 2:21. w24.12 21 ¶5-7

Xoremarib tsîn ge ra ǁkhāǁkhā da Jesub khoena kaise ra tsâbasa, ǃgōsase ǁnān hîna ǁîba ra saona. (Jhn. 13:1) Aiǁgause Jesub ge ge ǂan i ǀnî xūn ǃhūbaib aib ge dīn ge kaise ǃgom isa. ǃGōsaseb nî tsûtsûsa ǁōba ǁōsa. Xaweb ge Jesuba nē ǃgom xūn hoana ge dī. Jehovab xab ge ǁgaumâihe amaga ǀguis ose xawe ǃgōsase khoenab a ǀnam amaga. Jesub ge kai ǀnammab khoena ūba hâsa ge ǁgau, ǁîna aoǁnâba, ǁkhāǁkhā tsî huis ǃnâ-ū. ǁŌb nî tsēs ais tsînab ge Jesuba ǁîb ǁkhāǁkhāsabega ǁkhāǁkhā, ǂkhâǃnâ tsî gere ǁkhaeǂgao. (Jhn. 13:​12-15) Jesub ge kai tsûb ǃnâb ǃgâuhaib ai mā-i xawe ǁîb xōǀkhā ge ǃgâumâihe hâ i eloxoresa khoeba ǃâubasensa ge mā. Tsî ǁîba ge mîba ǁîb ǀkhab paradais ǃnâ nî hâ ǃkhaisa. ǁÎb Mamas tsînab ra tsâbasab ge ge ǁgau tsî Johaneba ge ǂgan îb ǁîsa kōǃgâ. (Luk. 23:​42, 43; Jhn. 19:​26, 27) ǁNās ǀkha i ge Jesub ǃgam ǀnamma ǁîb ǁōb ǃnâ-ū ǀgui ge ǁgauhe tama hâ i xawe ǁîb ûi ǁaeb hoaba ǃhūbaib ai. w25.01 23 ¶11

Elobmîs ge aiǁgausa ra sîsenū tsî ra hui da, î da ǁnâuǃā ama ǀûbasa xu ra hā ǃnorasasiba. ǀOasa kurusa da ūhâ tama hâ amaga da ge a “ǁoreb di ǃgā.” Xaweb ga Jehovaba ǀûba da, o da ge ǃgān “ǁoreba xu ǃnoraǃnorahe” hân khami ī. (Rom. 6:​17, 18; J.ǂHa. 1:5) Jehovab sada ǁorena ǀûba hâsa da ga ǂan, o da ge ǃnoraǃnorahe hâ ǃgān khami a ǂkhî. Xoremarib ǁguibas Jehovab ge ǁîb ôab ǃnâ-ū mādas ge ra ǂgauǂgau da. (1Pet. 2:24) ǁOre da ga, o da ge Jehovab ǀkha da ūhâ ǀhōsagusisa ra khôa. Xoremarib ǁguibas ǃnâ-ūb ge ra ǀûba da tsî da ge ǁkhapa ǀgū ǀhōsagusisa ǁîb ǀkha ūhâ ǁkhā. ǁKhōǁkhōsa ǀaeba xu ra ǂgauǂgauhe khoe-i ra ǂkhî khami da ge sada tsîna ra ǂkhî, Jehovab ǀkha da ūhâ ǀhōsagusis ga ǃgâiǃgâihe tsî da ga ǁîb xa ūǃoahe o. w25.02 11 ¶16; 13 ¶17

Talendi xa hâ ǂkhōs ǃnâb ge Jesuba ǀgam ǂgomǂgomsa ǃgākha xa ra ǃhoa tsî ǀguib hîna ge ǂgomǂgomsa tama hâ īb xa. (Mat. 25:​14-30) Nē ǀgam ǂgomǂgomsa ǃgākha ge ǂkhauhesa Xristeǁîna ra ǂnûǁkhaeba. Tsî ǀhonkhoeb Jesub ge ǁîna ra ǁkhau, “hā i tita ǀkha ǃgâiaǂgao!” ǁÎn mādawa-amsan ge ra ǃkhōǃoa, ǁnās ge ǀhommi khâisa. Nēs ge ǂguro khâis ase a ǂansa. (Mat. 25:​21, 23; J.ǂHa. 20:5) ǁGai tsî ǀopesa ǃgāb ge ǃkhâikhoms ase ǂkhauhesana a ība. Mâǀgaub ǃnâ? ǁÎn ge tā nî ǀopesa xawe ǃgarise nî sîsen. Talendi xa hâ ǂkhōs tsî oxae khamkhoedi xa hâ ǂkhōs ǃnâb ge Jesuba ge aimûǀgaru tama hâ i ǂkhauhesan nî ǀopesasa. Xaweb ge gere ǁguiǃā tae-i nî hāsa ǁîn ôasasiban ga ǂoaǃnâ o. ǁÎn ge ‘ǂgaihe tsî ǃkhōǂuibasenhe’ tide tsîn ge ǀhomsi Gaosib ǃnâ ǂgâsa mā-amhe tide. w24.09 22 ¶10; 23 ¶12-13

Hoa da ge sida ǂhâsigu tsî omaris tsîna ra kōǃgâ ǂgao. (Aoǁn. 7:12; 1Tim. 5:8) Sîsen-e dīsa da ga ǁhûi, o da ge ra ǂâi matikō mari-e da nî kurusa. Matikō mari-e da nî kurus xa ǀgui da ga ǂâi, o da ge mû da ra xū-i xa ra daoǁgauhe. ǂGoms ǃnâ da ga ǃgû, o da ge ǂâis ǃnâ nî ūhâ nē sîsenni mati Jehovab ǀkha da ūhâ ǀhōsagusisa a tsâǀkhā ǁkhāsa. Dîsen ǁkhā da ge a: ‘Jehovaba nē ǃnôa sîsen-e ra ūǃoa? Tamas ka io Jehovab ǃhui hâ xūna nî dī kai te?’ (ǂKhm. 6:​16-19) ‘ǀHao te hâǃnâ, aoǁnâ sîsen-e dī tsî ta aitsâma Elobmîs ôaǃnâsa nî dī hō? Matikō gaxuse ta ti omarisa xu nî hâ bē?’ Sîsen-e hōs a ǃgom xawe da ga ǁnā dîde î ti a ǃeream, o i ge kaise nî gā-ai î da ǁnā sîsen-e tā ūǃoa. ǂGoms ǃnâ da ga ǃgû, o da ge Jehovaba da ra ǂgomǃgâsa ra ǁgau mîǁguiba nî dī, ǁîb sida ǂhâsiga nî kōǃgâsa.—Mat. 6:​33, Heb. 13:5. w25.03 21 ¶5-6

Dītsâ da ge nî î da sida ǃgâsana Jehovab xan ra mûhe ǀgaub ǃnâ mû. Nēsa da ge ra dī ǁîn ra dī ǃgâi xūn ai sida ǂâisa ǂnûis ǃnâ-ū. Tsî da ge ǁîn ǀoasa tama kurus ai kō tama hîna ǀgūǁae nî bēsa. ǁNâusāguna da ge ‘ǀkhomxaǃnâ tsî khoexaǃnâ’ ǀgaub ǃnâ ra sîsenǂam ǂgao. ǁNāpaxu i ge khoen hîna nēti ī ǀgaub ǃnâ ra hâ-ūhe ǂgaona nî nē paradais di ǃâ kai ǂgao. A da aiǃgû tsî ǃgôaǃgâsiba gagasi paradaisa ǁgau re. Khoakhoahe tsî ǃnomasase ra tsâ ǂgao khoe-i hoa-i ge gagasi paradais ǃnâ nî ǂgâxa tsî ǁîsa tātsē ǁnāxu tide. Xawe ǂanbasen re ǁGâuab ge ǁkhāb a xū-i hoa-e ra dī îb nēsa xu nanabē da. (1Pet. 5:8; J.ǂHa. 12:9) Tā da ge nî mā-ambi îb nēs ǃnâ dan. Hā re î da ǃgarise sîsen tsî sida îsa, ǃanu tsî ǃnomsa gagasi paradaisa ǁkhauba. w24.04 24-25 ¶18-19

ǁGûdo Elobmîs ǃnâ hâ gao-aogu aiǁgaude du ge a sîsenū ǁkhā, î du sadu ǀgôana hui în turaba omkhâi Jehovaba ǃoabasa. Hui nî re în ǁnâuǃā, Jehovaba gere ǃoaba gao-aogu ge ǁnā gu ǁîb xa gere ūǃoahe ga. Tsî nau khoen tsîna gere hui ga în Jehovaba ǃoaba. Sadu ǀgôana ǁkhāǁkhā re mî tsî du ra dī xūn ǃnâ-ū, în mûǂan xūn hîna ra hui du na î du Jehovab ǀgūse hâ. Aiǁgause, Elobmîsa ǁkhāǁkhāsens, ǀhaode hâǃnâs tsî aoǁnâs tsîn khami ǁnān a ǂhâǂhâsa xūn ûib dina. ǀGôan ge ǁîn tsîna Jehovab ǀkha ǁîn ǀhōsagusisa omkhâi tsî nî ǃoaba bi ǁîn ra ǂhâba amaga. Tān ge Jehovaba nî ǃoaba ǁîn ǁgûn ra Jehovaba ǃoaba amaga. Nētin ga tsâ tama ion ge ǂâi ǁkhā Jehovaba ǃoabas ǂhâǂhâsa tama hâ ti. Tamas ka ion ge Jehovaba nî ǃoaba ǀû. Khoe-i ga Jehovaba ǃoaba ǀû, o i ra ǂâibasen ǁnā khoe-i tātse ǁkhāba Jehovab ǀhōsa kai tide ti? Hî-i, ǁî-i ge ǃhobasen tsî Jehovaba ǃoa oaǀkhī ǁkhā tsî ǁkhāba ǃoaba bi ǁkhā. ǁNāsa dīs ǃaroma i ge nē khoe-e nî ǃgamǃgamsenxa tsî ǀhaohâb ǃûi-aogu ra mā huiba nî ūǃoa. (Jak. 5:14) Jehovab ǀhōsa kais ge hoa ǁgūtsâdi dītsâ da ra di ǂam-ai a ǀō-aisa. w24.07 24-25 ¶18-19

Matits Jehovaba dî-amgus ǁaeb ǃnâ ǃgôasiba nî ǁgau? Tsâsigu ra ǀgai khamits ge nau khoe-i xa ǃnāsase nî ǂgae-e. Tae-e nî huitsi îts Jehovaba ǂkhîǂkhî tide xūna xu ǂgōsen? ǀAiba ūhâ ǃhoa ǀgaub, ǀguri hâs tsî ǀhorosa xu ǂgōsen. (Efe. 5:3) Nē xūn ge sorosise ǁgoe-ūgus turaba ǀgaiǀgai ǁkhā tsî ǂhanu xūna dīsa nî ǃgom kai. Tae-i ǃaroma ro ǃnākōrobe ǃhoaǃgao tama, tae-e ro nî dīsa Jehovaba ǃgôasiba ǁgausa dî-amgu ro ra ǁaeb ǃnâ? (ǂKhm. 22:3) Saro ǀnammi ra ǀgai khami ro ge a mîmâi ǁkhā, i ro ǀnî ǃgâi ǀgaugu ǃnâ ǀnamma ǁgaugu. Xawe i ga saro ǁgoe-ugus turaga ǀgai, o i ge kaise ni ǃgom gā-ai mîǁguiga dīsa nau khoe-i xa. (ǀG.ǁna. 1:2; 2:6) ǀNamma ǁgaugus ge ǃkhō-oasensa ra ǃgom kai tsîts ge Jehovaba ra ǂkhîoǃnâ kai xūna a dī ǁkhā. (ǂKhm. 6:27) ǁNā-amaga ǀnai Jehovab daoǁgaudi tsî taena ro nî dīs tsî dī tides tsîna ǃhoaǃgao.—1Tes. 4:​3-7. w24.05 29 ¶10-11

ǂHâba da ge ra în nauna ǂan sada ǃoan hoaǁae huib ǃaroma a ǀkhī ǁkhā ǃkhaisa, ǃgōsase ǃgom ǁaegu ǃnâ. (ǂKhm. 17:17) Tae-e da a dī ǁkhā, î da naun xa ǂgomǃgâhe ǁkhā? ǁKhā da a-i hoa-e da ge ra dītsâ î da Jehovaba tsēs hoasa ǁgae. Aiǁgaus ase, dī da ra mîmâide da ge ra ǃkhōǀgara tsî ǁaeb ai ra hâ ǂgao. ǀHaohâba mati ǃgâiba ra ǀama ǀhaohâb ǃûi-aogan ga ǂgomǃgâ o? ǃGâsan ga ǂan o ǀhaohâb ǃûi-aogan ga ǂhâsiban ūhâ ǁaeb ai ǁkhami ǁkhāsa, os ge ǁnāsa nî hui în ǀorose ǂâiǂhansen. ǃGâsan tsîn ge ǀnammhe hâse ra tsâ ǀhaohâb ǃûi-aogu māsenxase ra hui nî ǂgao tin ga ǂan o. ǀHaohâb ǃûi-aogu ga ǁîgu ǁnamasa Elobmîs ai ǃgaoǃgaosa ǂkhanin, ǂgomǂgomsa tsî gā-ai ǃāba xu ra hâna sîsenū tsî ǁîgu ǂâiǀgauba xu aitsâma ǃhoa tama i, on ge ǃgâsana ǁîga nî ǂgomǃgâ. ǃGâsan ga ǀhaohâb ǃûi-aoba xū-e ǂanǃgâsib ǃnâ mîba tsîb ga ǁnā-e naun ǀkha ǀgoragu tama i, ob ge ǂgomǃgâhe ǁkhāb asa ra ǁgau. w24.06 30 ¶14-15

Nētsē da ge a ǃâubasen ǁoa îb Jehovaba ū da hâ ǃgomsin hoana ūbē. Xawe da ge ǂgomǃgâsiba ūhâ hoaǁaeb nî hui da tsî ǁkhaeǂgao da ǃkhaisa. (Psa. 41:3) ǁÎb di ǃanu gagab ǃnâ-ūb ge Jehovaba ǀgaib, gā-aisib tsî ǂkhîba ra māda nē ǃgomsigu ǂam-ai. (ǂKhm. 18:14; Fil. 4:13) Tsîb ge ra ǁkhaeǂgao da ǃâubasensa mā das ǃnâ-ū, hānîǁaeb ǃnâ i tātsē ǀaesen hâ khoe-e hâ tidesa. (Jes. 33:24) Sida tsîn ge ǁkhaeǂgaosa a hō ǁkhā Jehovab mîdi Elobmîs ǃnâ hâde da ga ǃgâ o. ǃGâi tamase da ga tsâ, o di ge Elob mîdi ǁkhaeǂgao tsî a hui da ǁkhā î da ǃnomsa. (Rom. 15:4) Afrikab westes ǃnâ ra hâ ǃgâsas ge kankersas ge hōǃnâhe, o gere ā. ǁÎs ge ra mî: “ǀGui xoas ǂkhâǃnâte ras ge Jesajab 26:3 sa. ǁNā xoas ge ra hōhōǃnâ te Jehovab ǃnomsase tsâ kai da tsî nî hui dasa, î da mâ ga hâ ǃgomsi-i hoa-e ûiǃkharu.” Elobmîs xoasa hâ sado ra ǂkhâǃnâsa ǃgom mâsiga du ga ǃkharuǃnâ o? w24.12 24 ¶17-18

Jehovab tsîn ge ǁnāti ra tsâ ǁnān ǁîba ra ǃoaba ǀûn xa. ǀHaohâb ǃûi-aogu ge ǁkhā xū-e ra dī Jehovaba ǁgaes ǃnâ-ū. ǁÎgu ge ra ǂhâba în kā hâ gūna ‘oaǀkhī.’ (Luk. 15:​22-24, 32) ǁOre-ao-i ga oaǀkhī ob ge Jehovab, Jesub, ǀhomǃgān tsî hoa ǀhaohâb tsîna ra ǃgâiaǂgao. (Luk. 15:7) ǃGāsa î ge a Jehovab, ǃhobasen tama hân ǀhaohâb ǃnâ nî hâsa ǂgao tamasa. Xaweb ge ǃhobasen tama hâna ra hui ǂgao, ǁîb ge ra ǂhâba în oaǀkhī. ǃGaoǃgâ re matib Jehovaba ǃhobasen ra ǁore-aon xa ra tsâsa. Hoseab 14:4 ge ra mî: “ǁÎn di ǂhanuoǃnâsiga ta ge nî ǂuruǂuru, ti ǂgaob hoab ǀkha ta ge ǁîna māsenxase nî ǀnam; ti ǁaixasib ge ǁîna xu bē amaga.” Jehovab mati nēs xa ra tsâsa gu ǀhaohâb ǃûi-aoga ǂan, amaga gu ge khoe-i ǃhobasens ǁgauǁgaude ra ǃgaoǃgâ. Nē mîdi ge ǁnān hîna ge Jehovaba a ǃoaba ǀûna ǂgomǃgâsiba a mā ǁkhā ǁîb xan a ǀnamhesa. Tsîb amase ǂhâba hâsa în oaǀkhī. w24.08 28 ¶8-9

ǀNî ǁaegan ge khoena ganganxa tama dība nî da ra xūn ǃaroma. ǀNî ǁaegu ai da ge sida ǁaeb, ǀgaib tsî ū da hâ xūn tsîna a sîsenū ǁkhā nauna huisa. Xawen ge ǀnî ǁaega hui nî da go ǀgaub xa ǁae tama. ǁNās ga ī o da mati nî ǂgōsen î da tā sida ǃgâiaǂgaoba ǂoaǃnâ tamas ka io ǁaixa? Sida khoena xūna ra dība o da ra hōǃâ ǃgâiaǂgaob ge khoen ǃgôaǃgâsib ai ǃgaoǃgaosa tama hâ. (ǃNǃkh. 20:35) Noxopa da ge ǃgâiaǂgaob ǀkha a mā ǁkhā naun ga ǃgôaǃgâsiba ǁgau tama i xawe. Tae-e a hui da ǁkhā? ǂÂis ǃnâ ūhâ re nau khoena da ga mā, o da ge Jehovaba ra ǁgae. ǃGâi xūna da ge khoena a dība ǁkhā ǁîn ga ǃgôaǃgâ tama ī xawe. (Mat. 5:​43-48) Jehovab ge ra mîmâi xū-e ‘hō-oasa ǃâubasen’ tamase da ga mā, o da “kai mādawa-amsa” nî hōsa. (Luk. 6:35) Tā ǁgaise tsâ re khoen ga hoaǁae gangan du tama io. ǂÂis ǃnâ ūhâ re Jehovab ge nî mādawa-am du ǃgâi xūn hîna du ǁîna ra dīban ǃaroma ‘ǃgâiaǂgaoxa mā-ao’ du a amaga.—ǂKhm. 19:17; 2Kor. 9:7. w24.09 29 ¶14-16