Khomai-aon dîdi

Tae-i ǃaroma i mā-amhe tama hâ Jehovab di ǀHûǀguitimî-aon di ǂkhanina ǀnî hâ internets ǂhawegu ai ǃnaosa?

Sida ǂkhanin marioǃnâse ra māǂuihe ǃkhais ǃgaon ge ǀnîna ra tsâ ǁîn ge nē ǂkhanina ǃnaoǁnâ tsî ǀnî hâ internets ǂhawegu ai a ǃnao ǁkhā di. Xawes ge nēsa sida internets ǂhaweb di Sîsen-ūs xoaǁguiba ǃoagu mā-amhe tama hâ tsî ǂgui ǃgomsina a ǃaroma ǁkhā. ǁNā Sîsen-ūs xoaǁguib ǃoagu î ge khoe-e mā-amhe tama hâ sida “ai-īsigu, internets ai hâ ǂkhanin, jw.org logos, musiki, vidiogu tsî ǁkhāǁkhāǃâdi tsîna ǀnî hâ internets ǂhawegu ai ǀgoragusa. Aiǁgause facebooks, instagrams, twitters tsî Whatsapps tsîna ǃkhōǂgā hâse.” Tae-i ǃaroma i nē ǁgaraga hâ?

Sida internets ai hâ xūn hoan ge a ǂanǃgâsa. ǁNāǁgôa ge Xristeǁîn tsî sida ra mâǃoa khoen tsîn ge sida internets ǂhaweb ai hâ ǂkhanina ra sîsen-ū în khoena gāxaǃnâ. Nē internets ǂhawegu ge ra kuruhe î-i khoen ǃnâ îganǀgēs tsâsiba omkhâi. (Psa. 26:4; ǂKhm. 22:5) ǀNîn ge sida ǂkhanin tsî jw.org logos tsîna ra sîsen-ū ǁamaxū xūna ǁgauǂuis tsî ǁâǁawa gu ǃnâs tsîna ǀnî hâ xūn ǃgao ra sîsen-ū. Sida internets ǂhaweba da ge ǂanǃgâ kai tsî ra ǁkhauba. Îb tā ǃgâi tama ǀgaub ǃnâ sîsen-ūhe. (ǂKhm. 27:12) Xawe da ga khoena ga ra mā-am o în sida ǂkhanina ǀnî hâ internets ǂhawegu ai ǃnao tsî jw.org logosa ǁamaxū xūna ǁgauǂuis ǃgao sîsen-ū. O î ge ǁnâuǃgâ ǃkhaiba sida ǁgūtsâde mâǃoa-aon tsî ǁamaxū-aon ǃoagu ǂkhâǃnâ tide.

Sida ǂkhanina ǀnî hâ internets ǂhawega xu ǃnaoǁnâs ge a ǁkhōǁkhōsa. Jehovab ge ‘ǂgomǂgomsa tsî gā-ai ǃgāgu’ ǀguiga ge ǁgaumâi îgu gagasise ǂûmā da. (Mat. 24:45) ǁNā ‘ǃgāgu’ ge sida ǂhanu internets ǂhawegu—www.jw.org, tv.jw.org tsî wol.jw.org tsîn ǀguina ra sîsen-ū îgu gagasise ǂûmā da. Tsî da ge ǃnona ǂhanu internets ǂhawegu ǀguiga ūhâ ǁâǁawagu ǃgao, JW Language^®, JW Library^® tsî JW Library Sign Language^® i tsîna. Nē ǂhawegu ǁgâuab xa ǀuriǀurihe tama hâ amaga da ge ǁîgu ai ra ǂgomaiǂnûi. Gagasi ǂû-i ga nē internets ǂhawega xu ga ra hā o, o da ge nî mû khomai da ra xūn a ama ǃkhaisa.—Psa. 18:26; 19:8.

Sida ǂkhanina ǀnî hâ internets ǂhawegu hînan khoena ǂgaon ra xūna ra xoa-aib ai ǃnaos ge ǁnāǁgôa hân tsî ra mâǃoa dan tsîna ǃēsa ra mā în Jehovab di ǀapeǂhumis xa ǁgai xūna mî. ǀNî ǃgâsan ge nēs xa ǃaromahe hâse internets ǂnoagun ǃnâ ra ǁhao tsî nēs ǀkhas tsîna Jehovab ǀonsa ra ǁgaiǁgai. Tsî internets ǂhawegu ai ǂnoaguna ūhâs ge hui du tide khoena “tsauraǃnâsib” ǃnâ huisa. (2Tim. 2:23-25; 1Tim. 6:3-5) Ôaǃnâs ǃoagu i ge ama tama hâ internets ǂhawega sida ǀapeǂhumis tsî ǂGaeǂguira soros ǁanigu ǀondi ǃnâ ra ǁkhowa-amhe. Xawe i ge sida ǂGaeǂguira soros ǁaniga nē hâ internets ǂhawegu ai ǃâ-e ūhâ tama hâ.

Khoena da ge jw.org’sa sîsen-ūs ǃnâ-ū ra hui îs ‘ǃgâiǂhôasa’ hoa khoen xa ǁnâuhe. (Mat. 24:14) Internets ai hâ xūna da ge sida aoǁnâ sîsenni ǃnâ ra sîsen-ū. ǂHâba da ge ra în hoa khoena nēsa xu ǀama. Sida internets Sîsen-ūs xoaǁguib ra mî khami da ge khoe-e ǂkhanib tamas ka io ǀnî hâ xū-e emails ǃnâ-ū a sîba ǁkhā tamas ka io ǁîna jw.org’sa ǃoa a ǁnaeǁgau ǁkhā. Khoena da ga sida ǂhanu internets ǂhaweba ǃoa ga ra ǁnaeǁgau o, o da ge ǁîna gagasise ra ǂûmā da ǂhûnumâ khoegu ‘ǂgomǂgomsa tsî gā-ai ǃgāgu’ ǀkha ra ǀhaoǀhao.