Sadu Elobmîs khomaisa du a ǁkhoaxa kai ǁkhā ǀgaugu

Josuab ge Elob ǂhanuga ra khomai; Jerixos di ǂnubiǂgoagu ge ra ǁnā xawe î ge Raxabs di omsa ra hâhâ, Josuab ge ǀgores ǃnâ ǁîb ǃomga ǀgapise ra ūhâ

JOSUAB ge kaise ǃgom mâsib ǃnâ ge hâ i. ǁÎb ge Israelǁaesa ǃgâi tama mâsib ǃnâ mîmâisa ǃhūba ǃoa ge daoǁgau. Jehovab ge ǁîba ǂkhâǃnâ tsî ge mîba: “ǁNâi ǀgaisas ǀguisa hî, îts îbe ǃgâiǂâixa î ǂan, îts dī ǁnā ǂhanub. Îts ǁîs xa ǂâiǂâisen tsēa tsî tsuxuba, ǂan tsîts nî dīse ǁîs ǃnâ xoahe hân hoan ǃoa; ǁnāǃnubaits ge sa daoga nî ǃgâiǃgâ kai, tsîts ge ǁnâuǃāxase nî sîsen xuige.”—Jos. 1:7, 8.

“ǀUni tsēdi ǃnâ gu ǃgom ǁaega” nî hâ amaga da ge sida tsîna ǃgomsina ra hōǃâ. (2Tim. 3:1) Josuab khami da ge sida tsîna a ǃgâiǃō ǁkhā Jehovab di ǀapemāde da ga ra sao o. Elobmîsa da ge tsēs hoasa nî khomai tsî ǁîs ǀapemāde ǃgomsina da ga ra hōǃâ ǁaeb ǃnâ nî sîsen-ū.

ǂGui khoen ge ǃgâi ǁkhāǁkhāsen-ao taman hâ amaga Elobmîsa ôaǃnâs xa supubahe tama hâ. Elobmîsa ôaǃnâs a ǂhâǂhâsa amaga “Nēna dītsâ re” di hâ boksisa kō re. ǁNāpa du ge ǃgâi ǀgauga nî hō hîna sadu ôaǃnâsa nî ǁkhoaxa kai ga.

“ǂGaeǂgui te re sa mîmādi di daob ai, ǁî ǃkhais ǃnâ ta turaba ūhâ” dib ge psalmdi xoa-aoba ge mî. (Psa. 119:35) Elobmîsa ôaǃnâsa xu da ge kaise nî ǀama. ǀKhaega hōǃâs ǃgao da ge gagasi xūna nî ôaǃnâ.

Josuab khami da ge sida tsîna ǁae-e mîmâisa ǃhūba ǃoa ǂgaeǂgui tama hâ xawe da ge ǃgomsina ra hōǃâ. Josuab khami da ge Elobmîsa ôaǃnâ tsî sida ǃgâiǃōsib ǃgao a xoasa xūna nî ǃgaoǃgâ. Nēsa da ga ra dī o, ob ge sida daoba nî ǂhanu tsî da ge nî gā-ai.

NĒNA DĪTSÂ RE

ǀGore re, Elobmîsa du nî ôaǃnâs aiǃâ. Elobmîs ge hoaǀgaixa Elob di ǂâide ǃkhōǂgā hâ tsî ǁîb ge ra ǂhâba î da ǁîb mîs ǃnâ xoasa mîde xu ǃgâiba hō. ǀNî mîdi ǃnâ Elobmîsa da ga ra khomai o, o da ge ǁîb huiba nî ǂgan î da ǁîb mîsa ǁnâuǃā. Tsî khomai da ra xūna nî ǂâiǃgâ tsî sida ûib ǃnâ nî ûiǂui.—Esr. 7:10.
Sao ra dîna, dîsen re Elobmîs tsî Elobmîs ai a ǃgaoǃgaosa ǂkhanina du ra khomai hîna. ‘Nē ta go khomai ǃâba tae-e Jehovab xa ra ǁkhāǁkhā te? Nēsa mati hoaraga haisi-ams Elobmîs ǃnâ hâsa ra mâǂoa kai? Mati ta nē xūna a sîsen-ū ǁkhā î ta nau khoena hui?’
ǂÂiǃgâ re, khomai du go xūna. Khomai ǀû tsî ǂâi re. Nē xūna mati ra tsâ kai te? Tae-i ǃaroman nēti ra tsâ kai te? Matin ti ûib ǃnâ ge ī xūn, nēsis tsî ti hānîǁaeb ǀkha ra ǃgûǀhao? Mati ta nē Elobmîs tsoatsoadi tsî ǀapemādi tsîna ti ûib ǃnâ a sîsen-ū ǁkhā? (Job. 23:5; Psa. 49:3) Kō re, î du mû tae-i ǃaromab Jehovaba ǁîb ǃoaba-aona ǀō-aisa ǁnaeti-e xu ǂgōsensa ra ǃkhâikhomsa. Tamas ka io ǃkharagaǃnâgu dīgu tae-e a ǃaroma ǁkhā ǃkhaisa.—Deu. 32:28, 29.
Sadu mûnan-ais ǁkhāsiba sîsen-ū re, xūna ra ǁguiǃā ǃâ-e du ga ra khomai o. Aiǁgause, mûnan-ai re, matib ge Joseba ǁîb ǃgâsagu xa Ismaelǁîgu ai ǁamaxūhe ǀgauba. (Gen. 37:18-28) Tae-e du ra mû, ǁnâu tsî ra ham? Nē khoegu hoagu mâsib ǃnâ mâisen re. Tae-e gu gere ǂâi tsî tsâ? ǁNāti dîsens ge sadu ôaǃnâsa ǂâibasens xa nî ǀoa kai.
ǁKhāǁkhāsens ǃgao hâ sîsen-ū xūna sîsen-ū re, sadu ôaǃnâsa nî ǃgâi kaina. Nē sîsen-ū xūn hîna sadu gowab ǃnâ hâna ǂan re, internets ǂhaweb ai hân tsî ǁgâisan tsîna. Tā tao re, huiba ǂgansa nē xūn mati ra sîsen ǀgausa nau ǃgâsana xu. Watch Tower Publications Index tamas ka io Research Guide for Jehovah’s Witnesses ge nî hui du ǂgui ǃhoaǃâdi ǀkha tsî Elobmîs ǁaraǃādi mati ra ǁguiǃāhe ǀgaub tsîn ǀkha. New World Translation of the Holy Scriptures di khaosǀkhāb ai hâ appendixde sîsen-ū re sadu gowab ǃnâ i ga ra hâ o. Nē ǃâb ge kaise ǂûǂûxa ǃgāsasiba ūhâ ǃhūǂhaweb, ǂgaekhâib, marin ge mati ǃgom i ǀgaub tsî ǁîn ǀnōb tsîn xa.
Mâǂoa ra ǂâide ǃkhōǀhao re, nēs ge nî hui du î du ǂâihō tae-e du goro ôaǃnâsa. ǃGâi as ge nē xūna khoen ǀkha ǀgoragusa. Xū-e hâ-e aoǁnâ sîsenni ǃnâ du a sîsen-ū ǁkhā-e? Nē ǀgaub ǃnâ du ge mâǂoa ra ǂâidi ǀguide sadu ǂâis ǃnâ ūhâ tide. Xawe du ge ǁkhāǁkhāsen du go xūna nau khoen ǀkha ra ǀgoragu ǁîn ǃgâib ǃgao.