ǀKhomxaǂgaosiba omkhâi re ‘khoen’ ǃoa-ai

JESUB ge ǁîb ǁkhāǁkhāsabega gere ǁkhāǁkhā o, matigu ǃgâiǂhôasa nî aoǁnâ ǀgauba, ob ge ge ǂanǃgâ Gaosib haisi-ams hoaǁae ūǃoahe tide ǃkhaisa. (Luk. 10:3, 5, 6) Sida aoǁnâ sîsenni ǃnân ge ǀnî khoena ra ǁaixa ū da tamas ka io ǁgai xūna ra mî. Ama as ge ǁnāti i ǀgaugu ǃnâ ǃkhōǃoahes ge ǀkhomxaǂgaosiba sida aoǁnâ sîsenni ǃnâ ǁgausa ra ǃgom kai.

ǀKhomxaǃnâ khoe-i ge ǂhâsib ǃnâ hâ khoen tsî ǃgomsina ūhâ khoen tsîna ra tsâba tsî ǁnās ǀkha ra hui ǂgao. Xawe da ga aoǁnâ sîsenni ǃnâ khoena ǀkhomxaǂgaosiba ǁgau tama io, o i ge sida ôasasiba aoǁnâ sîsenni ǃnâ nî ǂkhabu. Xawe da ga ǀkhomxaǂgaosiba ga ra omkhâi o, o da ge sida ǀaesa a ûi-ûi ǁkhā tsî sida ôasasiba a ǀgaiǀgai ǁkhā aoǁnâ sîsenni ǃnâ.—1Tes. 5:19.

Mati da sida ǀkhomxaǂgaosiba a omkhâi ǁkhā, ǃgom mâsigu ǃnâ? Hā re î da Jehovab, Jesub tsî apostel Paulub tsîna ǃhoaǃgao tsî ǁîga ǁgae.

JEHOVAB ǀKHOMXAǂGAOSIBA ǁGAE RE

ǀOadisidi kurigab ge Jehovaba ǁîb ǀons ǀuriǀurihesa ge tani. Xaweb ge noxoba a ǃgâi “ganganoǃnân tsî ǂkhaban” tsîna ra dīn ǂamai. (Luk. 6:35) Jehovab ge ǁîb ǃgâisiba ǁîb ǃnūǃnâxasib ǃnâ-ū ra ǁgau. Jehovab ge ra ǂhâba în ‘khoen hoana’ ǃgâiǃō. (1Tim. 2:3, 4) Jehovab ge eloxoresasiba ǃhui hâ xaweb ge khoena kaise ǀgapise ra ǃgôa tsî ǂgao tama hâ în khoena ǁîn ûiba ǂoaǃnâ.—2Pet. 3:9.

Jehovab ge ra ǁnâuǃā matib ǁGâuaba khoena ǃamkuse ǂgī kai hâ ǀgauba. (2Kor. 4:3, 4) ǂGui khoen ge ǂhanu tama xūn tsî ǁgai ǂūb tsîna ǂkhamsisa xu ge ǁkhāǁkhāhe. Tsî nēs ǀkha a ǃgombahe amaba ūǃoasa. Jehovab ge ra māsen ǁîna huisa. Mati da ǁnāsa a ǂan?

ǂÂi re, Jehovab mûǂuis Nineveǁîn ǃoagub ge ūhâ is xa. ǁÎn di tsū ǀgaugu ǂamaib ge Jehovaba Jonaba ge mîba: “Tsî mati ta kha ǁnâi tita ǁnā kai ǃās Ninevesa ǀkhom tide, ǁîs ǃnân ǀguikaidisi tsî ǀgamdisiǀoadisisa [120 000] ǃnā hâ khoena hâsa, mâb a amǀkhā tsî mâb a ǁareǀkhā ǃkhaisa a ǀūna, tsî ǂgui ǀgoan ona?” (Jon. 4:11) Jehovab ge Nineveǁîn gagasise ǃgâise dī tama hâsa ge mûǂan tsî Jonaba ge mîba îb ǁîna ǃkhâi ǀkhomxaǃnâ ǀgaub ǃnâ.

Jehovab khami da ge sida tsîna khoena nî ǀgapi ǃgôa. Jehovaba da ge a ǁgae ǁkhā tsî ǁnān hîna ra ǃgâ da na nî hui.

JESUB ǀKHOMXAǂGAOSIBA ǁGAE RE

Jesub ge ǁîb ǁGûb khami ǁnān hîna ge gagasi ǂhâb ǃnâ hâ îna gere tsâba. “ǂNubideb ge mû, ob ge ǁîna ge ǀkhom, tsau hâ tsî ǁnāxūhe hâ gūn, ǃûi-ao-i ose hân khamin ge ī i amaga.” (Mat. 9:36) Jesub ge ge mûǂan ǁnān hîna ǁîba gere ǃgân ge ǂhumiba ǁkhāǁkhāhe tsî ǃgâi tama ǀgaub ǃnâ gere sîsen-ūhesa ǁîn ǂgomdi ǁkhāǁkhā-aogu xa. Jesub ge ge ǂan i nē khoen ǂgui ǃkharagaǃnâgu ǃgomsin xa nî ǂhanihesa tsî ǁîb haisi-amsa ūǃoa tide ǃkhaisa. Xaweb ge Jesuba gere aiǃgû ǁîna ‘ǂgui xūna . . . ǁkhāǁkhāsa.’—Mrk. 4:1-9.

Khoen ga sida haisi-amsa ūǃoa tama io, o da ge ǂâi tsî nî dîsen tae-i ǃaroman sida haisi-amsa ūǃoa ǂgao tama hâsa. ǀNîn ge ǀnîsi Elobmîsa ǃgâise mû tama hâ tamas ka io Xristeǁîn di ra mîsen khoen ǁgai tanisen ǀgaub xa ǁkhoa o kaihe hâ. Xawe ǀnîn ge ǀnîsi sida ǂgom ǀgaugu xa ǂhumiba mîbahe hâ. Tsî ǀnîn ge ǁîn ǀhûhâsib tsî ǀaokhoen tsîna xun ra hō ǁgâib ǃgao sida haisi-amsa ūǃoa ǂgao tama hâ.

ǀNîn hîna da aoǁnâ sîsenni ǃnâ ra ǀhao-ūn ge sida haisi-amsa ūǃoa ǂgao tama hâ, tsûtsûsa xūnan ge ûib ǃnâ a hōǃâ ǃkhais ǃgao. Kim di ǀon hâ sîsabes ge ra mî: “Sida aoǁnâ ǂharis ǃnân ge ǂgui khoena torob ǃnâ ǂgui xūna ge ǂoaǃnâ. ǁÎn ge ama ǃâubasen-e ūhâ tama hâ hānîǁaeb ǃgao. ǁÎn ge kaise ǁaixasa tsî khoe-e ǂgomǃgâ tama hâ. Nē ǂharis ǃnâ da ge hoaǁae sida haisi-amsa ra mâǃoa khoena ra ǀhao-ū. ǀGui tsē ta ge ge ǁnāǂamhe aoǁnâ ta ra hîna.”

Kimsa mati ǁîs ǀkhomxaǂgaosiba ra ǃkhōǀgara, ǃgâi tamases ra sîsen-ūhe xawe? ǁÎs ge ra mî: “Tita ge ǁgaise ta ga ra hâ ūhe o, o ǂKhoamîdi 19:11 sa ǂâis ǃnâ ra ūhâ, mî rasa: ‘ǁNâuǃāb khoeb dib ra ǁaib âba ǃnūǃnâxa kai.’ Khoen hîna ta ra aoǁnâban di khaoǃhūba ǂans ge ra hui te ǁîn ǃoagu ǀkhomxaǂgaosiba omkhâisa. Hoa khoen hîna ta ra ǀhao-ūn ge ǃkhōǃoa te tama hâ. Xawe ta ge ǃgâi khoena ǁkhā ǂharis ǃnâ a ǀhao-ū ǁkhā.”

Dîsen re, ‘mati ta ga Gaosib haisi-amsa ǃkhōǃoa hâ tita ra aoǁnâba khoen mâsib ǃnâ ta ga hâhâ o?’ Aiǁgause, tae-e da ga dī hâ Jehovab di ǀHûǀguitimî-aon xa da ga ǂhumiba mîbahe hâ o? Sida tsîn ge Gaosib haisi-amsa ǃgâi ǀgaub ǃnâ ga ǃkhōǃoa tama hâ tsî ǀkhomxaǂgaosiba ga ǂhâ hâ. Jesub ǃkhâikhomsa da ga ǂâis ǃnâ ga ra ūhâ o, nau khoena sida ra hâ ūhe ǂgao khami hâ ūsa. O da ge ra ǂkhâǃnâhe ǀkhomxaǃnâ ǀgaub ǃnâ tanisensa nēs ga ra ǃgom i xawe.—Mat. 7:12.

PAULUB ǀKHOMXAǂGAOSIBA ǁGAE RE

Apostel Paulub ge ǀkhomxaǂgaosiba ǁgai ǂūba ūhâ khoena ǃoas tsîna gere ǁgau. Tae-i ǃaroma? ǁÎb ge ǁîb ǃkharu ge ǃnaeǃkhaide ge ǀuru tama hâ i. ǁÎb ge ge mî: “Tita aibe ǃkhāǃkhā-ao tsî ǃgôaǃgonao tsî ǁgâiǀā-ao ge i ta; xawe ta ge ǀkhomxaǂgaosi-e ge hō, ǀūǂamse ta ǁîna ti ǂgomoǃnâsib ǃnâ gere dī amaga.” (1Tim. 1:13) ǁÎb ge ge ǂanǃgâ Jehovab tsî Jesub tsîkha ge ǁîba ǀkhomma a ǁgau ǃkhaisa. ǁÎb ge aitsama gere mûsen ǁnān hînab gere aoǁnâban ǃnâ.

ǀNî ǁaegu aib ge Pauluba ǃgamse ǃnomaǃkhō hâ ǂgom ǀgauga ge ūhâ i khoena gere ǀhao-ū. Matib gere tanisen ǁnāti i mâsib ǃnâ? !Nae!khaidi 17:16 ge ra mî, Atenes ǃnâb hâ, “hîas ge gagas âba ǁîb ǃnâ ge ǁaixa, nētikōses ǃāsa ǁgôatsuiǁgoagu xa ǀoa hâ ǃkhaisab ge mûo.” Paulub ge ǁîb ǁaiba ǃgâi haisi-amsa aoǁnâs ǃnâ-ū ge ǀkharaǀkhara. (ǃNǃkh. 17:22, 23) ǁÎb ge ǁîb aoǁnâ ǀgauga khoen di khaoǃhūgu ǃoa-ai gere ǀkharaǀkhara îb “mâ dommi hoab ai” “ǀnîna ǃgâiǃō” kai.—1Kor. 9:20-23.

Pauluba da ge a ǁgae ǁkhā ǃgâi tama tanisen ǀgaugu tsî ǂhanu tama ǂgom ǀgaugu tsîna da ga aoǁnâ sîsenni ǃnâ ǃgâi ǀgaub ǃnâ ga ra mâi-aiǃâ o, “ǃgâib xa ǃgâi ǂhôa-e” ra ǀkhī-ūb khami. (Jes. 52:7) Dorothy di ǀon hâ ǃgâsas ge ra mî: “Sida aoǁnâ ǂharis ǃnân ge ǂgui khoena ge ǁkhāǁkhāhe Elob karoǂgaoxa tsî a ǀgoraǃgâxa di. Tita ge ǁnāti i khoe-e ra koa Elob ǃnâ i ra ǂgom ǃkhais ǃgao. Xawe ta ge ǁî-e ra ǁgau Elobmîs tae-e Jehova Elob ǀnamxaǃnâ ǀgaugu xa ra mîsa tsî ǁîb mîmâis hānîǁaeb dis xa.”

“ǂKHABABA ǃGÂIB ǀKHA DAN” RE

ǃGamse da nē “ǀuni tsēdi” ǃnâ ra ǂgâ khami da ge a ǃâubasen ǁkhā, aoǁnâba da ra khoen di ǂūgu nî “tsū” ǂgā ǃkhaisa. (2Tim. 3:1, 13) Xawe da ge tā nî mā-am îb khoen ǁgai tanisen ǀgauba sida ǀkhomxaǂgaosib tsî ǂkhîb tsîkha ǂkhabu kai. Jehovab ge nî ǀgaiǀgai da î da “ǂkhababa ǃgâib ǀkha dan.” (Rom. 12:21) Jessica di ǀon hâ aimâba-aos ge ra mî: “Tita ge hoaǁae khoena ra ǀhao-ū ǃgamǃgamsen tama hâna tsî sida haisi-ams tsî sida tsîna ra ǃgôaǁnâna. Nēs ge khoe-e kaise a ǁaixa kai ǁkhā. Khoe-i ǀkha ta nî ǁgamǀhaos aiǃâ ta ge ǃnōsase Jehovab ǃoa ra ǀgore îb hui te î ta nē khoe-e ǁîb khami mû. Nēs ge ra hui te î ta tā ti tsâsigu ai ǂâisa ǂnûi xawe nē khoe-e ta mati nî huis xa ǂâi.”

Hoaǁaes tsîna da ge nî ǂâi mati da sîsenǀhao-ū da ra ǃgâsa-e nî ǂkhâǃnâ ǀgausa. Jessicas ge ra mî: “ǁGai xū-e i ga sida ǀgui-e hōǃâ o, o ta ge ǁnā xū-i xa ǃhoa tama hâ. Xawe ta ge ǃgâi xūn xa ra ǃhoa, aiǁgause aoǁnâ sîsenni ǃnâ da ra hōǃâ ǃgâib xa, tsū xūn ose.”

Jehovab ge ǃgomsin hîna da aoǁnâ sîsenni ǃnâ ra hōǃâna a ǂan. Matikōseb ra ǃgâiaǂgao ǁÎba da ga ra ǁgae o. (Luk. 6:36) Jehovab ge ǁîb ǀkhomxaǂgaosiba ǀamosib kōse nî ǁgau. ǂGomǃgâsiba da ge Jehovab ǃnâ nî ūhâ, ǁîb a ǂan amaga mâǁaeb nî nē ǃhūbaib ǀamsa hau ǃkhaisa. ǁNā tsēs nî hās kōse i ge aoǁnâ sîsen-e kaise a ǁgariǁgarisa. (2Tim. 4:2) A da sida ǁgaumâisa ôasase tsî ǀkhomxaǂgaosib ǀkha dī re “khoen hoan” ǃgao.