Jehovab di da ge a

1. Hoa xūna tae-i ǃaroma a Jehovab di? (Tsoatsoas ǃnâ hâ ai-īsiba mû re.)

HOA xūn ge a Jehovab di. “ǀHommi tsî ǃhomgu di ǀhommi ge a ǃKhūb, sa Elob di, tsî ǃhūbaib tsî ǁîb ǃnâ hân hoana.” (Deu. 10:14; J.ǂHa. 4:11) ǁNā-amagan ge hoa khoena a Jehovab di, ûin hâs kōse. (Psa. 100:3) ǃHūbaib ǂhawaseb ge Eloba ǃkharagaǃnâgu khoena ge kuru tsîn ge nēn hoana a ǁÎb di.

2. Hamna Elobmîs ǃnâ Jehovab khoen ase a ǂansa?

² Aiǁgause, Psalmdi 135 ge ǂgomǂgomsa ǃoaba-aon Jehovab din hîna ge Israelǁaes di în xa ra mî ‘ūǂuibasenhe’ hâ ǁaes ge di. (Psa. 135:4) Hoseab ǂkhanis tsîn ge ǀnîn hîna ge Israelǁaes di tama hâ în ge nî Jehovab khoe kai di ge mî. (Hos. 2:23) Hoseab kēbos ge ge dīǀoaǀoahe Jehovab ge Israelǁae tama hâ khoena Xristub ǀkhan nî ǂgaeǂguise a ǁhûi o. (ǃNǃkh. 10:45; Rom. 9:23-26) Nē ‘ǃanu ǁaes’ ge a Jehovab di “ǃkhōǂuibasensa ǃhao” ǀō-aisa ǀgaub ǃnâ. Nē ǃgâsan ge ǃanu gagab ǀkha ǂkhauhe hâ tsî ǀhommi ǃnâ ûis ǃâubasensa ûhâ. (1Pet. 2:9, 10) O Xristeǁîn hîna ǃhūbaib ai ûis ǃâubasensa ūhân? Jehovab ge ǁîn tsîna ǁÎb “khoen” ase ra mûǂan hînab ‘ǃkhōǂuibasen’ hâna.—Jes. 65:22.

3. (a) Ham-e Jehovab ǀkha ǀhōsagusisa a ūhâ ǁkhā? (b) Tae-e da nē ǁkhāǁkhāǃâs ǃnâ nî ǃhoaǃgao?

³ Nētsē î ge ‘ǂkhari gūron’ hîna ǀhommi ǃâubasensa ūhân tsî “ǀnî gūn” hîna ǃhūbaib ǃâubasensa ūhân tsîna ‘ǀgui gūsa’ ra kuruǂui hîna Jehovab xa ǁÎb khoen ase a ǂansa na. (Luk. 12:32; Jhn. 10:16) Jehovaba da ge ra gangan nēti ī aiǂhanubab ge mā da ǃkhais ǃaroma. Nē ǁkhāǁkhāǃâs ǃnâ da ge ǀgauga nî mû mati da Jehovaba a gangan ǁkhā ǀgauba nē aiǂhanub ǃgao.

JEHOVAB AI DA GE RA MĀǁNÂSEN

4. Mâ ǀgaub ǃnâ da Jehovaba a gangan ǁkhā tsî Jesuba nēsa mati ge dī?

⁴ Jehovaba da ge ra gangan ǁÎb ai da ga ra māǁnâsen o. Tsî ǁāǁnâs ge ra ǁgau Jehovab di da asa tsî ǁîb ǂâisa da ra dī ǂgaosa. (Heb. 12:9) Jesub tsîn ge nēsa ge dī ǁîb ǁāǁnâs tawab ge Jehovaba ǃoa a mî o: “Ti Elotse, sa ǃgâiǂâisa ta nî dī” di. (Psa. 40:7, 8) Jesub ge ge ǁgauǁgau Jehovab ǂâisab ra dī ǂgaosa, Jehovab ai māǁnâsen hâ ǁaes ǃnâb ge ǃnaehe xawe.

5, 6. (a) Jehovaba Jesub ǁāǁnâsa mati ge ǃkhōǃoa? (b) ǂKhō re, Jehovab mati sida māǁnâsensa ra ǃgôaǃgâ ǀgauba ǀnai da a ǁîb di xawe.

⁵ Jehovaba mati Jesub ǁāǁnâsa ge ǃkhōǃoa? Elobmîs ge ra mî: “Tsî Jesub ge ǁāǁnâhe, ob ge ǁnātimîsi ǁgamma xu ge ǂoaxa, tsî mû, ǀhomgu ge ge ǁkhowa-amsenba bi, tsîb ge Elob Gagaba ǂnabu-i ase ǁgôaxa tsî ǁîb ǂama ra hāse ge mû. Tsî mû, dom-i ge ǀhomma xu ge ǀkhī, nēti ra mî-e: Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.” (Mat. 3:16, 17) Jesub ge ǀnai ǁîb ǀhomsi ǁGûb di i, xaweb ge Jehovaba kaise ge ǂkhî mûsa Jesub ge ǁÎb ǂâisa ǂgaoba xu gere dīsa. ǁNās ǁkhās khamib ge Jehovaba sida māǁnâsensa ra ǃkhōǃoa tsî nî ǀkhae da.—Psa. 149:4.

⁶ Aiǁgause, mûnan-ai re aob hîna go îsa blomde ǁîb ǃhanab ǃnâ a ǂgāb xa. ǀGui tsēs ge ǁîb ǀgôasa ǁîb ǃhanab ǃnâ hâ blomsa ū tsî ǁîba ra mā. Nē blomsa ǀnai ǁîb di tama hâ? Matis ǀnai a ǁîb di xū-e ra mā bi? ǀNamǀnamsa ǁgûb ge nēti ī dîde ga dîsen tama hâ. Xawe nē blomsa ga ǃkhōǃoa hâ ǀnammi hînas ǁîb ǀgôasa ra ǁgaub ase. ǁÎb ge nē blomsa nau blomdi hoadi xa ga ǃgôaǃgâ hâ. ǁNās ǁkhās khamib ge Jehovab tsîna ra ǂkhî sida ga ǁÎb ai ga ra māǁnâsen o.—Eks. 34:14.

7. Maleaxiba mati Jehovab tsâsiba ge ǁguiǃā ǁÎb khoen ǃoagub ūhâba?

⁷ Khomai re Maleaxib 3:16. ǀNai du ga māǁnâsen tsî ǁāǁnâhe tama ga ra io, o nēsa dīs ǂhâǂhâsasiba mûǂan re. ǂAn da as ge hoa da ge ǃnaehe da ge sa xu a Jehovab di. ǂÂi re Jehovab nî ǃgâiaǂgao ǀgausa ǁîb ǂgaeǂguisa da ga ra mûǂan tsî ǁîb ai māǁnâsen tsî ǁÎb ǂâisa ga ra dī o. (ǂKhm. 23:15) Jehovab ge ǁÎba ǂgaoba xu ra ǃoaba khoena a ǂan tsî “ǂâiǂâisenǂkhani-i” ǃnâ ǁîn ǀonde nî xoa.

8, 9. Jehovaba “ǂâiǂâisenǂkhani-i” ǃnâb xoa hâ khoena xu tae-e ra ǂgaoǀkhā?

⁸ Jehovab “ǂâiǂâisenǂkhani-i” ǃnâ sida ǀonsa xoahes ge ǂgui xūna ǃkhōǂgā hâ. Maleaxib ge ge mî î da ‘ǃKhūba [Jehovaba, NW] ǃao tsî ǁîb di ǀons’ tsîna. Nau khoe-e ǃoabas ge nî ǃaroma î-i sida ǀonsa Jehovab ǂâiǂâisens ǂkhanisa xu ǀarihe.—Eks. 32:33; Psa. 69:28.

⁹ Jehovab ai māǁnâsens ge ǁÎb ǂâisa dīs mîmâis tsî ǁāǁnâhes tsîn ǀguina ǃkhōǂgā tama hâ. Nē xūn ge ǃkharu ge xūn ǃâ kai ǁkhā. Jehovab ǀkhāb ai hâs ge ǁÎba ǁnâuǀnamsa ǂgaoǀkhā hâ nēsis tsî hānîǁaeb kōse.—1Pet. 4:1, 2.

ǃHŪBAIB TURAGA XU DA GE RA ǂGŌSEN

10. Tae-i ǀgorasa nî hâ ǁnān hîna Jehovaba ra ǃoaban tsî ǁnān hîna ǁÎba ǃoaba tama hân ǁaegu?

¹⁰ ǃKharu go ǁkhāǁkhāǃâs ǃnâ da ge Kainni, Salomob tsî Israelǁaes tsîn xa goro ǃhoa. Nē khoen hoan ge Jehovaba gere ǃoaba xawe hoase ǁÎb ai ge māǁnâsen tama hâ i. Nē aiǁgaudi ge go ǁgau da î da Jehovab tsî ǂhanu-aisib ǀkhāb ai mâ tsî ǁgai xūna ǃhui. (Rom. 12:9) Maleaxib “ǂâiǂâisenǂkhani-i” xa ǃhoa toa hâ hînab ge Jehovaba ge mî ǀgorasa da nî mûsa “ǂhanu-aib tsî eloxoresab tsîkha ǁaegu, ǁnāb Eloba ra ǃoabab tsî ǁnāb, ǁîba ǃoaba tamab tsîkha ǁaegu.”—Mal. 3:18.

11. Tae-i ǃaroman nau khoena nî mû Jehovab ai da māǁnâsen hâsa?

¹¹ Nēb ge ǀnî hâ ǀgaub hîna da Jehovaba a gangan ǁkhāba ǁÎb khoe da a ǃkhais ǃgao. Gagasise da ra aiǃgû ǃkhais ge ‘ǂhaisase hoa’ khoen xa nî mûhe. (1Tim. 4:15; Mat. 5:16) Dîsen re: ‘Ti ǂgomǂgomsasib Jehovab ǃoagu ta ūhâba khoen xa mûhe î ra? Hoaǁae ta ǃēsa ra ôa Jehovab di ǀHûǀguitimî-ao-i ǀgui-i ase ǂanǂansensa?’ Jehovab ge nî tsûaǂgao ǁîb khoen aseb ǁhûi da hâ hîna da ga ra tao o nau khoena mîbasa ǁÎb di da a ǃkhaisa.—Psa. 119:46; khomai re Markub 8:38.

12, 13. ǀNî ǃgâsana mati Jehovab di ǀHûǀguitimî-aon a ǃkhaisa ra sâu?

¹² ǀNî khoen ge ‘ǃkharagagusiba ǁnān hîna Eloba ra ǃoaban tsî ǁnān hîna ǁîba ǃoaba taman tsîn’ ǁaegu ge mû tama hâ i. Tsî “ǃhūbaib di gagasa” gere ǁgae. (1Kor. 2:12) ǁNā gagab ge ‘sorosi turaga’ gere dīǀoaǀoa. (Efe. 2:3) ǀNîn ge noxoba ǃkhâikhomhen ra xawe ǃhūbaib khoen ana ǀgaub tsî tanisen ǀgaub xa a ǃgâibahe. ǁÎn ge ǂgae tsî ra mû ǃkharu ǃnâsen ǃnubu sarana ra ana Xristeǁî ǀhaode ǃoas tsîna. Tsî Jehovaba ǂan tama khoen khami ǀûna ra ǂkhom tsî dī-unu ǀgaub tsîna ra ǁgae. (1Tim. 2:9, 10) ǁNās ge ra ǃaroma în tā Jehovab khoen ase ǂan-e nau khoen ǀkhan ga ra hâ o.—Jak. 4:4.

¹³ ǀNî ǀgaugu ǃnâs tsînan ge Jehovab di ǀHûǀguitimî-aona ǃhūbaib khoen tanisen ǀgauba ra ǁgae. ǁÎn ǂnā ǀgaub ge Xristeǁî-i nî ī khami ī tama hâ. ǁÎn ge ǁîn ai-īsigu tsî ǃgâi tama xūn tsîna internets ai ra ǃnao. ǁÎn ge ǀnîsi ǀhaohâb ǃûi-aogu xa ǁnamahe tama hâ xawe ǁgai sîsenǂuiba nau ǃgâsan ai a ūhâ ǁkhā hîna ra dītsâna în ǃgâi tanisen ǀgauba ūhâ.—Khomai re 1 Petrub 2:11, 12.

14. Tae-e a ǂhâǂhâsa Jehovab ǀhōsagusisa da ga ra ūhâ ǀgara ǂgao o?

¹⁴ ǃHūbaib ge ‘ǁgansi di turab, mûdi di turab tsî ûib di kaikaisens’ tsîna ra ǂkhâǃnâ. (1Jhn. 2:16) Jehovab di da a amaga da ge ‘eloxoresasib tsî ǃhūbaib di turagu tsîna ǀūxū [ǁnāxū] tsî ǂhanu-aise tsî eloǃaoǃgâxase nē ǃhūbaib ai nî ûi.’ (Tit. 2:12) Sida ǃhoa ǀgaub, ǂû tsî da ra ā xūn, ana da ra xūn tsîn ge khoena nî ǁgau Jehovab ai da māǁnâsen hâsa.—Khomai re 1 Korinteǁîn 10:31, 32.

Î DA ‘HOAN ǂAMAI ǀAEXA ǀNAMGUBA ŪHÂBA GU’

15. Tae-i ǃaroma da nau ǃgâsana khoexaǃnâse tsî ǀnammi tsîn ǃnâ nî hâ ū?

¹⁵ Sida ǀhōsagusis Jehovab ǀkha da ūhâsa gangans ge nau ǃgâsan ǀkha da ra hâ ǀgaub ǃnâ-ū ra ǁgauhe. ǁÎn tsîn a Jehovab di amaga. Nēsa da ga ǀuru tama ga ra io, o da ge hoaǁae sida ǃgâsana khoexaǃnâ tsî ǀnammi ǃnâ nî hâ ū. (1Tes. 5:15) Jesub ge ǁîb saosabena ge mîba: “Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.”—Jhn. 13:35.

16. Mâ aiǁgausa Moseb ǂhanub ǃnâ Jehovab khoen xa ra tsâ ǀgauba ra ǂkhō?

¹⁶ ǃGâsana da ǀhaohâb ǃnâ nî hâ ū ǀgauba ǂkhōs ǃgao hā re î da sao ra ǂkhōsa kō. Jehovab tempeli ǃnâ ge hâ i xūn ge ǃanu ǃoabas ǃgao ǀgui ge hâ i. Moseb ǂhanub ge ge ǁgau mati i nē xūna nî kōǃgâhe ǀgauba tsî î ge nē xūna gere ǁgaiǁgai khoe-e gere ǃgam-e. (Num. 1:50, 51) Jehovab ge nē ûiba ūhâ tama xūna gere ǁkhauba ǃkhais ge ra ǁgau ǁÎb ai māǁnâsen hâ khoenab nî ǁkhaubasa. Jehovab ge ge mî ǁÎb khoena ga: “Tsâǀkhā-i, ǁnā-i mûǃnâdi âba ra tsâǀkhā” di.—Sax. 2:8.

17. Jehovaba tae-e ‘ǃgaoǃgâ tsî ra ǁnâu’?

¹⁷ Kaise a ǂûǂûxa ǃkhais ge Maleaxib ra mîsa Jehovab ‘ǃgaoǃgâ tsî ra ǁnâu’ ǃkhaisa mati da ra hâ ūgu ǀgausa. (Mal. 3:16) Jehovab ge “ǁîb dina a ǂan.” (2Tim. 2:19) ǁÎb ge sida ra dī tsî mî xūn hoana a ǂan. (Heb. 4:13) Jehovab ge sida ǃgâsan ǀkha da ga ǃgâi tama ǀgaub ǃnâ ga ra hâ o, ‘ǃgaoǃgâ tsî ra ǁnâu.’ ǃHaokhoeǃkhōǃoaxa, māxa, ǀûbaxa tsî da ga ra khoexaǃnâ io, o da ge nî ǂan Jehovab ge hoa xūna ra mû di.—Heb. 13:16; 1Pet. 4:8, 9.

“ǃKHŪB [JEHOVAB, NW] GE ǁAES ÂBA ǂHARA [ǁNĀXŪǃNÂ] TIDE XUI-AO”

18. Mati da Jehovaba nî gangan ǁÎb khoe da a ǃkhais ǃgao?

¹⁸ Hoa da ge Jehovaba ra gangan ǁÎb khoe da a ǃkhais ǃgao. Ga-aisiba da ge ǁÎb di da asa da ra mûǂan tsî masenxase ra māǁnâsen o ra mû. “Gamaǃgâ tsî ǂkhaba ǃhaos ǃnâ” da ûi hâ xawe da ge ra ǂgao în khoena mû “ǀauheǁoasase tsî ǂhauǃnâse du nî īga . . . ǃnâ du ǃhūbaib di ǃnân ase ra ǃnâsa.” (Fil. 2:15) ǁGai xūna xu da ge hoase ra ǂgōsen. (Jak. 4:7) Sida ǃgâsana da ge ǀnam tsî nî ǃgôaǃgâ tsî nî mûǂan ǁîn tsîn a Jehovab di ǃkhaisa.—Rom. 12:10.

19. Jehovaba ǁîb dina mati ra ǀkhae?

¹⁹ Elobmîs ge ra mîmâi: “ǃKhūb [Jehovab, NW] ge ǁaes âba ǂhara [ǁnāxūǃnâ] tide xui-ao.” (Psa. 94:14) Nē mîmâis ge nî hâhâ ǃgomsina da ga ra hōǃâ xawe. ǁŌb tsîn ge Jehovab ǀnamma xu a ūbē da ǁoa. (Rom. 8:38, 39) “Ûi da karao, o da kom ǃKhūba [Jehovaba, NW] ra ûibao; tsî ǁō da karao, o da kom ǃKhūba [Jehovaba, NW] ra ǁōbao. O da ge a ǃKhūb [Jehovab, NW] di, ûi da kas, ǁō da kas hoasa.” (Rom. 14:8) Jehovab ǁîb ǂgomǂgomsa ǀhōsana khâisa nî mā tsēsa ǃoa da ge ra mûǂui. (Mat. 22:32) Nēsis tsîna da ge ǂgui ǀkhaega ra hōǃâ. Elobmîs ge ra mî: “ǃGâiǃōs ge hâ ǁnā ǁaes ǃKhūba ǁîn di Elose ūhâs, ǁnā ǁaes, ǁîb ǀumis âb ase ǁhûiǂuibasen hâsa.”—Psa. 33:12.