ǁNaeǁgaudi Sida Xristeǁî ûib tsî aoǁnâ sîsenni ǂkhanib

NOVEMBERI 5-11

ELOBMÎSA XU HÂ ǂÛǂÛSA MÎDI | JOHANEB 20-21

“Nēgu ǂamaits tita ǀnam hâ?”

(Johaneb 21:1-3) Nēn khaoǃgâb ge Jesuba ǁkhawa ǁîb di ǁkhāǁkhāsabega hurirob Tiberias dib tawa ge ǂhai. Tsîb ge nēti ge ǂhaiǂhaisen: ² ǀHû gu ge hâ i nēga: Simon Petrub, tsî Tomab, Didimub ti ra ǂgaiheb, Natanaeli, Kanas Galileab ǃās dib, Sebedeub ôakha, tsî ǀnî ǀgamkha ǁîb ǁkhāǁkhāsabegu dikha tsîga. ³ Ob ge Simon Petruba: ǁAuǃkhō ǃgû ta ra, ti ǁîgu ǃoa ge mî. O gu ge ǁîb ǃoa ge mî: O ge sige sats ǀkha nî ǃgû. O gu ge ǂoa tsî ǁnātimîsi ǂgaus ǃnâ ǂgâ, tsî ǁnā tsuxub ǃnâ xū-i xare-e ǃkhō tama ge i.

(Johaneb 21:4-14) Tsî ǀnai i ge ǁgoa hâ i hîab ge Jesuba hurirob ammi tawa ge mâ i; xawe gu ge ǁkhāǁkhāsabega ǀū ge i, Jesub a ǃkhaisa. ⁵ Ob ge Jesuba ǁîgu ǃoa ge mî: ǀGôago, ǁau-e go ūhâ tama hâ? O gu ge: Hî-î, ti ge ǃeream bi. ⁶ Ob ge ǁîgu ǃoa ge mî: ǂGaus di amǀkhāb ai ǀûisa aoǂui, o go ge nî hō. Tsî aoǂui si gu geo, o gu ge ǁîsa ǃaruǀî ǂgae ǁoa ge i, ǁaun di ǂguisib xa. ⁷ Ob ge ǁnā ǁkhāǁkhāsabeb, Jesub ge ǀnam hâ iba, Petrub ǃoa: ǃKhūb komo, ti ge mî. Ob ge Simon Petruba, ǃKhūb a ǃkhaisab go ǁnâuo, ǂamsarab âba ǃgaesen (ǀōǀkhāb ge hâ i xui-ao), tsî hurirob ǃnâ ge aoǁnâsen. ⁸ Xawe nau ǁkhāǁkhāsabegu ge ǂgaus ǀkha hā tsî ǁaun xa ǀoa hâ ǀûisa hā ge ǂgae, ǃhūba xu gu ge ǃnū tama hâ i xui-ao, ǀgamkaidisi nî ī ǂhâgu kō ǃnūsib ǀguiba. ⁹ Tsî ǃhūb ai gu ge sīo, o gu ge ǂnomǀae-e ge mûǁgoe tsî ǁauro-i tsî pere-i xa ǁî-i ai. ¹⁰ Ob ge Jesuba ǁîgu ǃoa ge mî: ǁNā ǁaun, ǀase go go ǃkhōn xa ūhā re! ¹¹ Ob ge Simon Petruba ǂgâ, tsî ǀûisa ǃhūb ǁga ge ǂgaeǂui kai ǁaun xa ǀoa hâsa, ǀguikaidisi tsî korodisiǃnonaǀan kōse; tsî nētikō ǂguin ge i xawes ge ǀûisa doa tama ge i. ¹² Ob ge Jesuba ǁîgu ǃoa ge mî: Hā î go ǁgoaǂû re. Tsî ǁkhāǁkhāsabegu di ǀguib xaweb ge dītsâ tama ge i, ǁîba: Taritsa? ti dîsa, ǃKhūb a ǃkhaisa gu ge ǂan i xui-ao. ¹³ Ob ge Jesuba hā, tsî pereba ū, tsî ǁîga ge mā, ǁnās ǁkhās khami ǁaun tsîn xa. ¹⁴ Nēs ge ǀnai ǃnonaǁî ǃnās, Jesub ǁkhāǁkhāsabegu âba ge ǂhaisa, ǁō hâna xub ge khâis khaoǃgâ.

(Johaneb 21:15-19) Tsî ǁgoaǂû gu geo, ob ge Jesuba Simon Petrub ǃoa ge mî: Simon, Jonab ôatse, nēgu ǂamaits tita ǀnam hâ? Ob ge ǁîb ǃoa ge mî: Ā, ǃKhūtse, sats ge a ǂan ǀnam tsi ta hâ ǃkhaisa. Ob ge ǁîb ǃoa ge mî: Ti ǁkhaorona ǃûi! ¹⁶ Ob ge ǁkhawa ǀgamǁî ǃnās ai ge mî: Simon Jonab ôatse, ǀnam tets a! Ob ge ǁîb ǃoa ge mî: Ā, ǃKhūtse, sats ge a ǂan, ǀnam tsi ta hâ ǃkhaisa. Ob ge ǁîb ǃoa ge mî: Ti gūna ǃûi! ¹⁷ Ob ge ǃnonaǁî ǃnās ai ǁîb ǃoa ge mî: Simon, Jonab ôatse, ǀnam tets hâ? Ob ge Petruba ge ǃoa, ǃnonaǁî ǃnās aib go: ǀNam tets hâ? ti mî xui-ao, tsî ǁîb ǃoa ge mî: ǃKhūtse, sats kom hoa xūna a ǂano; ots ge a ǂan, ǀnam tsi ta hâ ǃkhaisa. Ob ge Jesuba ǁîb ǃoa ge mî: Ti gūna ǃûi! ¹⁸ Amase, amase ta ra mîba tsi, ǂkhamts ge i ǃnubaits ge sa-aitsama ǃgaesen, tsî ǂgaots raǀî gere ǃgû; xawe kairats kao, ots ge ǃomkha nîra ǀhōǂui, tsî ǀkharab ge ǃgae tsî ǂgao tamats hâǀî nîra ǃgû-ū tsi. ¹⁹ Tsîb ge nēsa ge mî, ǁgaub nîga, mâ ǁō-ai-i ǀkhab nî Eloba ǂkhaiǂkhai ǃkhaisa. Tsî ǁîsa mî tsîb ge: Tita sao! ti ge mîǀî bi.

nwtsty study note Jhn. 21:15, 17

ob ge Jesuba Simon Petrub ǃoa ge mî: Nē ǁgamǀhaos Jesub tsî Petrub tsîkha ǁaegu ge hâ is ge Petrub ge Jesuba ǃnona ǃade a ǀūxūs khaoǃgâ ge i. Jesub ge ǃnona dîde Petruba ǁîb di tsâsigu xa ge dî “ob ge Petruba ge ǃoa.” (Jhn. 21:17.) Jhn 21:15-17 ge ǀgam ǃkharagagu mîra ra sîsen-ū a·ga·paʹo, ǀnammi ti ra ǂâibasens tsî phi·leʹo, hîna tsâsiba ūhâs ti ra ǂâibasens. ǀGam ǃnāra kōseb ge Jesuba Petruba ge dî: ‘tita ǀnamts hâ?’ di. ǀGam ǃnāra kōseb ge Petruba Jesuba ge mîba “ǀnam tsi ta hâ” di. ǀUniga ǃnâsab ge Jesuba ǁkhaba ge dîbi: “ǀnam tets hâ” di. Ob ge Petruba ǁkhaba ge ǃeream î di. Mâǁaeb hoab hînab ge Petruba ǀnam tsi ta a di Jesuba gere mîbas aib ge Jesuba gere mî nē ǀnammi tsî tsâsib nî ǁgari tsi îts ti “gūna” ǃûiǃgâ di. Jesub di ǁkhāǁkhāsabegu ge nēba ‘ti gūn’ ǃoa ra ǁnaeǁgau-e. (Jhn. 21:16, 17; 1Pet. 5:1-3) Jesub ge ǃnona ǃnādi kōse Petruba ge mā-am îb ǃeream ǁîbab a ǀnamsa tsî ǁnāpaxu ǁîba ge mîba îb ǁîb guna ǃûi. Nēs ǃnâ-ub ge Jesuba Petruba ge ǀûba ǃnona ǃnādi hînab ge ǀūxubidi ǃaroma.

nēgu ǂamaits tita ǀnam hâ?: “Nēgu ǂamaits” di hâ mîdi ge ǀguis xa a ǃnasa ǀgaub ǃnâ a ǁnâuǃāhe ǁkhā. ǀNî ôaǃnâs ge nē mîdi ‘titats ǀnam hâ nē ǁkhāǁkhāsabegu xa’? Tamas ka io ‘titats ǀnam hâ nau ǁkhāǁkhāsabegu xa’ di hâ mî ǀgaukha ra ūǃoa. Xawe hoaǃnâ-aixase a ǂansa mîǀgaub ge “nēgu ǂamaits tita ǀnam hâ?” Nēs ge ǁauǃkhō sîsenni tamas ka io ǁauǃkhōs ǀkha ǃgae ǀhaosa ūhâ xūn xa gere ǃhoa nē xoa ǀgoras da ǂâibasens ge: ‘Tita ǀnamts hâ nē ǃhūbaisi xūn xa? ǁNās ga ama o, o ti gūna ǃûi.’ Nē dîs ge a ǂhâǂhâsa Petrub di khaoǃhūba ǃoa da ga kō o. Petrub ge Jesub di ǂguro ǁkhāǁkhāsabe i xaweb ge Jesuba tsoatsoasa xu ǀoasase ge sao tama hâ i. (Jhn. 1:35-42) Xaweb ge ǁîb di ǁauǃkhōsa ǃoa ge oa. ǁAe i ǃkharu hâseb ge Jesuba nē ǁauǃkhō sîsen-e xu Petruba ge ǂgai îb ‘khoeǃkhō-ao’ kai. (Mat. 4:18-20; Luk. 5:1-11) Jesub di ǁōb khaoǃgâb ge Petruba ǁkhawa ge mî ǁîb ǁauǃkhōsa ǃoab ta oa di tsî nau ǁkhāǁkhāsabegu tsîn ge ge saobi. (Jhn. 21:2, 3) Nēbab ge Jesuba Petruba ge a ǁgau ǂhâǂhâsasib ǁaposa mîǁguiba dīs diba: ǁÎb ûib ǃnâb ǁauǃkhō sîsen-e ǂguro nî mâi hîna ǂgui ǁâuna ǃkhōsa ǃkhōǂgā hâna. Tamas ka iob Jesub di gūna gagasise huisa ǂgurose nî mâi?—Jhn. 21:4-8.

ǃnonaǁî ǃnās: Petrub ge Jesuba ǃnona ǃnāde ge ǀūxū, xawe Jesub ge ǃē-e ge mā bi îb ǁîb tsâsiba ǁgâiǂui ǃnona ǃnādi kōse. Petrub ge ǁnāsa a dī o, ob ge Jesuba ge mîba bi îb ǃanu ǃoabasa ǂgurose mâi ǀnî hâ xūn ǃgâ-ai. Petrub tsî ǀnî hâ ǃgâsagu ge Xristub gūna nî ǀgaiǀgai tsî nî kōǃgâ. Nēn ge ǂkhauhesana ge ǃkhōǂgā hâ i, xawen ge gagasi ǂû-e ge ǂhâ hâ i.—Luk. 22:32.

Gagasi xūna ǀō-aisase ôaǃnâs

(Johaneb 20:17) Jesub ge ǁîs ǃoa ge mî: “Tā tsâǀkhā te, ganupe ta ti Îb ǃoa ǃapa tama hâ xuige. Xawe ǃgûsī ti ǃgâsagu ǃoa, î ǁîga mîba; ǃApa ta ra ti Îb ǃoa, tsî sago Îb ǃoa; ti Elob ǃoa, tsî sago Elob ǃoa.”

nwtsty study note Jhn. 20:17

Tā tsâǀkhā te: Grikegowab mîs ge haʹpto·mai di hâs ge sao ra xūn ǃoa ra ǁnaeǁgau “tsâǀkhā” tamas kai o “ǂgae-ai.” ǀNî ǂnûiǃkhuni-aon ge ǁnā mîdi Jesub dide sao rase ge ǂnûiǃkhuni: “Tā tsâǀkhā te.” Jesub ge Maria Magdalenasa ge ǂkhā tama hâ i, ǁîs ge ǁîba a tsâǀkhā o. Jesub ge ǀnî kaikhoedi ge ‘ǁîb ǂaira a ǃkhō’ o, ǁîde ge ǂkhā tama hâ i. (Mat. 28:9) Maria Magdalenas ge gere ǃao Jesub ǀhomma ǃoa nî ǃapasa. ǁÎs ge kaise Jesub ǀkha gere hâ ǂgao tsî ǁnās ǃaroma ge ǃgû kai bi ǂgao tama hâ i. Jesub ge noxobab ǀhomma ǃoa ī tama hâsa gere ǂanǃgâ kaisi ǂgao. ǁNā-amagab ge ǁîsa ge mîba is ǁîb di ǁkhāǁkhāsabega sī ǂanǂan ǁîb khâis xa.

(Johaneb 20:28) Tomab ge Jesuba ge ǃeream: “Ti ǃKhūtse tsî ti Elotse.”

nwtsty study note Jhn. 20:28

Ti ǃKhūtse tsî ti Elotse: “Ti ǃKhūb tsî ti Elob” di hâ ǁgâiǂuisen ra ge ǀnî ôaǃnâ-aon ǃoa-ai Jesub ǃoa ra ǁnaeǁgau xawe Elob xa ra ǃhoa. Xawe ǀnîn ge ra mî Grikegowab mîs ge ra ǁgau nē ǁgâiǂuisens Jesub ǃoa ra ǁnaeǁgau ǃkhaisa. ǁNāti i ga ī xawes ge “ti ǃKhūb tsî ti Elob” di hâ ǁgâiǂuisensa ǁgarab ǂâibasens xa a ǃgāsa kaihe ǁkhā Elobmîs ǃnâ. Jesub ge ǀnai ǁîb ǁkhāǁkhāsabega ge mîba “ǃapa ta ra ti Îb ǃoa, tsî sago Îb ǃoa; ti Elob ǃoa, tsî sago Elob ǃoa.” ǃAroma i ge a ǀkhai Tomab gere ǂgomsa Jesub a hoaǀgaixa Elo ǃkhaisa. (Mû re, study note Jhn. 20:17.) Tomab ge ge ǁnâu Jesub mati ǁîb “Îb” ǃoa ra ǀgoresa, mîb ge o “ǀguise ama-ai Elots.” (Jhn. 17:1-3) Tomab ge “ti Elo” di Jesub ǃoa a mî o, ob ge sao ra-e gere ǂâibasen: ǁÎb ge Jesuba ‘elo-i’ ase gere mû Hoaǀgaixa Elo tamab hâ xawe. (Mû re, study note Jhn. 1:1.) Tamas ka iob ge Tomaba Jesuba Elob ǃgā i ase ge ǂgaiǀî, aiǁgause ǀhomǃgā i hîna Jehovaba ra sîsenba i mûǂuis ǀkha. HebreXoadi tsîn ge ra ǂanǃgâ Jesub Eloba ra ǂnûǁkhaeba ǃkhaisa. Tomab ge ge ǂan i, Elobmîs ǃnaeǃkhaidi tsîn ge ǀhomǃgā-i hîna Jehova Eloba gere ǂnûǁkhaeba-e di gere ǂgai ǃkhaisa. (ǀGopeǀnō Gen. 16:7-11, 13; 18:1-5, 22-33; 32:24-30; ǂHǂh. 6:11-15; 13:20-22.) ǁNā-amagab ge Tomaba Jesuba “ti Elo” di ge ǂgai. Nēs ǃnâ-ūb ge ge ǂanǃgâ Jesub a Jehovab di ǂnûǁkhaeba-ao tsî ǃhoa-aosa.

ǀNîn ge gere mî Grikegowab xoaǀgaub ǃoa-ai ra ge nē ǀgam mîra “ǃKhūb” tsî “Elo” di hâra hoaǀgaixa Eloba ǃoa ǀgui ra ǁnaeǁgau. Xawe nē ǁgarab ǃnâ i ge Grikegowab xoaǀgaub ǀkha a ǀgau ǁkhā. ǀGui xū-i ǃoa ra ǁnaeǁgau mîdi Grikegowab ǃnâ di ge ǃoaǃū hâ ǂnûiǃkhunis ǃaroma a sîsen-ūhe ǁkhā. Aiǁgause, Luk. 12:32 ge ra mî (“ǂkhari gūrodo”) tsî Kol. 3:18–4:1 ge ra mî (“saso taraso,” ‘sago aogo,’ “sadu ǀgôado,” “sago ǁgûgo,” “sadu ǃgādo,” “sago ǀhonkhoego.”) ǁKhā ǀgaub ǃnâs ge ǃoaǃū ǂnûiǃkhunis 1Pet. 3:7 sa ra khomai “sago aogo.” Nē ǁkhāǁkhāǃâs ǃoa-ai da ge ǂhâǂhâsasib Tomab di mîdi di-e ra mû.

Elobmîs khomai ǃâs

(Johaneb 20:1-18) Tsî ǂguro tsēs wekheb dis ais ge Maria Magdalenasa ǃnauǁgoaga, ganupe a ǃkhae hîa ǀhobas tawa hā, tsî ǀuis ǀhobasa xu gababēhe hâ ǃkhaisa ge mû. ² Os ge ǃkhoe, tsî Simon Petrub tsî nau ǁkhāǁkhāsabeb, Jesub ǀnam hâb tsîkha tawa sī, tsî ge mî: ǃKhūban ǀhobasa xu ūbē hâ, tsî sise ge a ǀū, mapan go ǁgui bi ǃkhaisa. ³ Ob ge Petrub tsî nau ǁkhāǁkhāsabeb tsîkha ǂoa, tsî ǀhobas ǃoa ge ǃgû. ⁴ Tsî kha ge ǁî ǀgamkha ge ǀguiǃkhoe, xaweb ge nau ǁkhāǁkhāsabeba Petruba ǃkhoedā tsî ǂgurose ǀhobas tawa ge sī. ⁵ Tsî ǃgamǃgâb ge, ob ge ǃkhaiga ge mûǁgoe; xaweb ge ǂgâ tama ge i. ⁶ Ob ge Simon Petruba saohā bi, tsî ǀhobas ǃnâ ǂgâ, tsî ǃkhaiga ge mûǁgoe; ⁷ tsî aosenǃkhaib, Jesub danas ai go hâ ibab ge nau ǃkhaigu tawa mûǁgoe tama i, tsî ǁîba xamihe hâse ǃkhai-i tawa ǀguri ge mûǁgoe. ⁸ Ob ge nau ǁkhāǁkhāsabeb, ǂguro sī ge ǀhobas tawab ona ǂgâ, tsî mû tsî ge ǂgom. ⁹ Xoasa kha ge ganupe ǂan tama hâ i xui-ao, ǁō hâna xub nî khâi ǃkhaisa. ¹⁰ O kha ge ǁkhāǁkhāsabekha ge ǁaru. ¹¹ Tsîs ge Mariasa ǀhobas ǃauga mâ, tsî gere ā. Tsî ās ra hîas ge ǀhobas ǃnâ ǃgamǃgâ, ¹² tsî ǀgam ǀhomǃgākha ge mûǂnôa, ǃuri sarana ana hâkha, ǀguiba danas ǀkhāb ai tsî nauba ǂaira ǀkhāb ai, Jesub di soros go ǁgoe i ǃkhais tawa. ¹³ Tsî kha ge ǁîs ǃoa ge mî: Tarase, tarexas ra ā? Os ge ǁîkha ǃoa ge mî: Ti ǃKhūban go ūbē, tsî ta a ǀū mapan go ǁgui bi ǃkhaisa amaga. ¹⁴ Tsî nēna mî tsîs ge ǂnano, os ge Jesuba ge mûmâ, xawes ge Jesub a ǃkhaisa ge ǀū i. ¹⁵ Ob ge Jesuba ǁîs ǃoa ge mî: Tarase, tarexas ra ā? Tari-es ra ôa? Os ge ǁîsa ǃhanasîsenaob ti ǂâi tsî ǁîb ǃoa ge mî: ǃGôahesatse sats ga ǁîba tanibē hâo, ǁnâi mîba te re, mapats go ǁgui bisa, î ta ǁîba sī ūbē. ¹⁶ Ob ge Jesuba ǁîs ǃoa ge mî: Mariase! Os ge dabasen tsî ǁîb ǃoa Hebreǁîgowab ǃnâ ge mî: Rabunitse! (ǁNās ge ǁkhāǁkhā-aotse ti mîsa.) ¹⁷ Ob ge Jesuba ǁîs ǃoa ge mî: Tā tsâǀkhā te, ganupe ta ti Îb ǃoa ǃapa tama hâ xuige. Xawe ǃgûsī ti ǃgâsagu ǃoa, î ǁîga mîba; ǃApa ta ra ti Îb ǃoa, tsî sago Îb ǃoa; ti Elob ǃoa, tsî sago Elob ǃoa. ¹⁸ Os ge Maria Magdalenasa ǁkhāǁkhāsabega ge sī ǂhôa, ǃKhūbas go mû, tsî nēnab goro mîba si ǃkhaisa.

NOVEMBERI 12-18

ELOBMÎSA XU HÂ ǂÛǂÛSA MÎDI | ǃNAEǃKHAIDI 1–3

“ǃAnu gagab ge Xristeǁîn ǀhaohâb ai ge ǁhōǂui-e”

(ǃNaeǃkhaidi 2:1-8) Tsî pinkstertsēs ge ǀoa ǃnubai gu ge hoaga ǀguiǂâixase ge ǀhû hâ i. ² O i ge ǃnapetamase ǀhomma xu ǀō-e ge hā, ǀgaisase ra ǃgom ǃgoaxa ǂoa-i ase ī-e, tsî ǂnûǃnâ gu ge hâ i oms hoaragasa ge ǀoaǀoa. ³ Tsîn ge ǁîgu ai ǀgoraǃāsa namdi ǀaes didi xase ge mû; tsî di ge mâb hoab âgu ai ge ǂnû; ⁴ tsî gu ge hoaga ǃAnu Gagab xa ǀoa tsî ǀkhara namdi ǀkha ge ǃhoatsoatsoa, Gagab ge ǃhoaǂuisa mā gu khami. ⁵ Tsî gu ge Jodeǁîga Jerusalems ǃnâ ge ǁan hâ i, eloǃaoǃgâxa aogu hoa ǁaedi, ǀhommi ǃnaga hâdi diga. ⁶ Tsî nē ǀōb ge hāo, os ge ǂnubisa ǀhao tsî ge gongonǃnâhe, mâ-i hoa-i ge ǁî-i gowab ǂûb ǃnâ gu ra ǃhoa ǃkhaisa ǁnâu xui-ao. ⁷ On ge hoana burugâ, tsî buru hâse ge mîǀîgu: Mû, nē ra ǃhoa gu hoaga kha Galileaǁî tamaga? ⁸ Tsî mati da kha ra ǁnâu, mâ-i hoa-i di gowab, sada ge ǃnaeǃnâba gu ra ǃhoa ǃkhaisa?

(ǃNaeǃkhaidi 2:14) Ob ge Petruba disiǀguiǀagu ǀkha khâi tsî ǁîn ǃoa ge mî: Jodeǁî aogo tsî Jerusalems ǃnâ ǁan hâdu hoado, nēsa ǂan î du ti mîde sadu ǂgaedi ǃnâ ǂgâ kai.

(ǃNaeǃkhaidi 2:37, 38) Tsî nēsan ge ǁnâuo, on ge ǂgaogu ǃnâ ge ǃkhāǃganuhe, tsî Petrub tsî nau apostelgu tsîgu ǃoa ge mî: Tare-e da ǁnâi nî dī, aogo, ǃgâsago? ³⁸ Ob ge Petruba ǁîn ǃoa ge mî: ǃHobasen du î-i mâ-i hoa-e ǁāǁnâkaisen Jesub Xristub di ǀons ǃnâ ǁoren ǀûbasa ǃoa, o du ge ǃAnu Gagaba mās ase nîra hō.

(ǃNaeǃkhaidi 2:41) Tsî ǁîb di mîsa māsenxase ge ǃkhōǃoan ge ge ǁāǁnâkaisen, on ge ǁnā tsēs ai ǃnonaǀoadisi nî ī ǀomdi ǂgomsabena ge ǀaroǃnâhe.

(ǃNaeǃkhaidi 2:42-47) Tsîn ge ǁîna ge hâhâ apostelgu di ǁkhāǁkhās ǃnâ, tsî ǀhûhâs ǃnâ, tsî pereb di khôas ǃnâ, tsî ǀgoredi ǃnâ. ⁴³ Tsî mâ ǀoms hoas ge ǃaob xa ge hāǂamhe, tsîn ge ǂgui buruxa dīn tsî saodi tsîna apostelgu di ǃomga xu ge ǃnae. ⁴⁴ Tsî ǂgom hân hoan ge ǀhûpe ge hâ i, tsî hoa xūna gere amǃnâxa kaigu. ⁴⁵ On ge ūn hân tsî ǁîn di xūna ǁamaxū tsî hoan ǃnâ ǁîna gere ǀgora, mâ-i hoa-i ǂhâba hâs ǃoa.⁴⁶ Tsîn ge tsēkorobe ǀguiǂâixase tempeli ǃnâ ge hâ i, omsa xu oms ǁga pereba khôa tsî.⁴⁷ Tsîn ge ǂûna ǃgâiaǂgaob tsî ǀguiǃnâxa ǂgaob ǀkha ǂû, tsî Eloba gere kare; tsîs ge ǁaes hoasa ǃgâi ǂgaob ǀkha ge ǃkhōǃoa. Tsîb ge ǃKhūba tsēkorobe ǃgâiǃō kaihe rana ǀhaohâba ge ǀaroǃnâ.

w86-E 12/1 29 ¶4-5, 7

Māsenxa mādi hîna ǂgaoba ra ǂkhî kaidi

Xristeǁîn ǀhaohâb ge 33ǁî kuri a tsoatsoa o, on ge ǁnā ǀasase ge ǁāǁnâhe ǃgâsana ǀgoragus ǁnaetiba ge ūhâ i. ǁÎn ge ǀguiba ǂû tsî gere ǀgore ǀhao. Tae-i ǃaroma? ǁÎn ge gere ǀgaiǀgaisen în “apostelgu di ǁkhāǁkhās ǃnâ” hâhâ.—ǃNǃkh. 2:41, 42.

Jodeǁîn tsî Jodeǁî tama hâ khoen ge Pinkstertsēs ǃaroma ǀgui Jerusalems ǃoa gere ī. Xawe ǁnān hîna ge Xristeǁî kain ge gaxuse gere hâ ǂgao Jerusalems ǃnâ în ǁîn ǂgomsa ǀgaiǀgai. Nēs ge ǂû-i tsî hâǃkhai-i ǃgomsiba ge ǃaroma. Nē sari-aon ǃnân ge ǀnîna ge hâ i ǂâusa mari-e ge ūhâ tama hâ îna tsî ǀnîna ǂâusa mari-e ge ūhâ i. ǁAerob ǀgaiban ge ǁnān hîna ǃnāsa xūna ūhâna ǁnān hîna ūhâ taman ǀkha nî ǀgoragu ge is ge.—ǃNaeǃkhaidi 2:43-47.

Omde ǁamaxūs tsî ūn hâ xūna ǀgoragusan ge māsen xase gere dī. Khoe-i ge ge ǁgarihe tama hâ i ǁîn xūna ǁamaxū tsî ǀgoragusa xū-e ge ūhâ tama hâ i khoen ǀkha. Nēs ge ǃkhū hâna ǀgâ kais ǃaroma ge dī-e tama hâ-i. Mî-e tama i ge ge hâ i în ǃkhū hâ khoena ǁîn xūn hoana ǁamaxū tsî ǀgâ. Xawe ǃgâsa ǀnamgus ǃgaon ge ūn hâna naun hîna ūhâ taman ǀkha gere ǀgoragu. Nēs ǃnâ-ūn ge Elob Gaosiba xa gere aoǁnâ.—ǀGopeǀnō 2 Korinteǁîn 8:12-15.

Gagasi xūna ǀō-aisase ôaǃnâs

(ǃNaeǃkhaidi 3:15) Xawe ûib di ǂgaeǂgui-aoba du ge ge ǃgam. ǁÎbab ge Eloba ǁō hâna xu ge ǂkhaiǂkhai, ǁî ǃkhais xa ge ge sige a ǀhûǀguitimî-ao.

it-2-E 61¶1

Jesub Xristub

‘Ûib di ǂgaeǂgui-aob.’ ǁÎb ǁGûb di ǀnamma ǁgaus ǃnâ-ūb ge Jesub Xristuba ǁîb ǀoasa ûiba ǁguibas ase ge mā. Nēs tsîn ge ge īǁkhā kai în Xristub di ǃkhōǂuisana ǁîb ǀkha ǀhommi ǃnâ sī ǂgaeǂgui. Tsî ǂguina ǃhūbaib ai ǁan ǁkhā, Gaosib ǂgaeǂguis ǃnāga. (Mat. 6:10; Jhn. 3:16; Efe. 1:7; Heb. 2:5; Mû re XOREMARIB xa.) Nēs ǀkhab ge Jesuba ra ‘ûib di ǂgaeǂgui-ao’ kai hoa khoen ǃaroma. (ǃNǃkh. 3:15) Grikegowab mîs hîna ra sîsen-ūhes ge ra ǂâibasen “ǂam ǂgaeǂgui-aob” di. Aiǁgauses, ge nēs tsîna Moseb ǃoa ra ǁnaeǁgau Israeli di “ǂgaeǂgui-aob” ge i amaga. (ǃNǃkh. 7:27, 35)

(ǃNaeǃkhaidi 3:19) “ǃHausen ǁnâi î du ǃhobasen, sadu ǁoren nî ǀarihese, î gu khoakhoahes di ǁaega hā ǃKhūb di aisa xu.”

cl-E 265 ¶14

Elob hîna a ‘ǀûbaǀnamxab’

¹⁴ Jehovab di ǀûbaxa ǀgaub ge ǃNaeǃkhaidi 3:19 ǃnâ ra mîǃāhe: “ǃHausen ǁnâi î du ǃhobasen, sadu ǁoren nî ǀarihese.” Grikegowab mîs ge ra xū-e “ǀariǂuis tamas ka dīkakas” di ra ǂâibasen. ǀNî ôaǃnâ-aon ǃoa-ais ge nē mîsa xoasa xū-e ǀaris ǀkha a ǀgui. Nēsa mati a īǁkhā? Inki hîna ge ǀorokamǁaeb ǃnâ gere sîsen-ūhe i ge ǂnomdi, xommi tsî ǁgammi ǀkha gere habahe. Khoe-i hîna ǁnā inki ǀkha gere sîsen i ge ǀâ sponsa ū tsî xoa i hâ xū-e ge ǀari ǁkhā i. Nēs ǃoa kōs ǃnâ-ū da ge Johovab di ǀûba ǀnamxasiba a mû ǁkhā. Jehovab ga sada ǁorena ǀûba o, o i ge ǁnā ǀâ sponsab ū tsî sada ǁorena ra ǀariǂuis ǀkha a ǀgui.

Elobmîs khomai ǃâs

(ǃNaeǃkhaidi 2:1-21) Tsî pinkstertsēs ge ǀoa ǃnubai gu ge hoaga ǀguiǂâixase ge ǀhû hâ i. ² O i ge ǃnapetamase ǀhomma xu ǀō-e ge hā, ǀgaisase ra ǃgom ǃgoaxa ǂoa-i ase ī-e, tsî ǂnûǃnâ gu ge hâ i oms hoaragasa ge ǀoaǀoa. ³ Tsîn ge ǁîgu ai ǀgoraǃāsa namdi ǀaes didi xase ge mû; tsî di ge mâb hoab âgu ai ge ǂnû; ⁴ tsî gu ge hoaga ǃAnu Gagab xa ǀoa tsî ǀkhara namdi ǀkha ge ǃhoatsoatsoa, Gagab ge ǃhoaǂuisa mā gu khami. ⁵ Tsî gu ge Jodeǁîga Jerusalems ǃnâ ge ǁan hâ i, eloǃaoǃgâxa aogu hoa ǁaedi, ǀhommi ǃnaga hâdi diga. ⁶ Tsî nē ǀōb ge hāo, os ge ǂnubisa ǀhao tsî ge gongonǃnâhe, mâ-i hoa-i ge ǁî-i gowab ǂûb ǃnâ gu ra ǃhoa ǃkhaisa ǁnâu xui-ao.⁷ On ge hoana burugâ, tsî buru hâse ge mîǀîgu: Mû, nē ra ǃhoa gu hoaga kha Galileaǁî tamaga? ⁸ Tsî mati da kha ra ǁnâu, mâ-i hoa-i di gowab, sada ge ǃnaeǃnâba gu ra ǃhoa ǃkhaisa? ⁹ Sada Partiaǁîda tsî Medeǁîda tsî Elamǁîda tsî Mesopotamiab tsî Judeab tsî Kapadosiaǁîda tsî Pontub tsî Asiab tsîgu di ǁanaoda, ¹⁰ tsî Frigiaǁîda tsî Pamfiliaǁîda tsî Egipteǁîda tsî Libiab, Kireneb tawa ǁgoeb ǀkharigu dida tsî Romes di ǃhaokhoeda, tsî Jodeǁîda tsî Jodeǁî horesada, ¹¹ tsî Kretaǁîda tsî Arabiaǁîda, sada ge ra ǁnâu, sada namdi ǀkha gu Elob di kai dīga ra ǃhoa ǃkhaisa. ¹² Tsîn ge hoana burugâ tsî îganǀgē tsî nē-e nau-i ǃoa ge mî: Tare-e kha nē-e nî ī? ¹³ Tsî naun ge ǃhō tsî ge mî: ǂKhon ǂauxûib xa gu kom go ǀoao. ¹⁴ Ob ge Petruba disiǀguiǀagu ǀkha khâi tsî ǁîn ǃoa ge mî: Jodeǁî aogo tsî Jerusalems ǃnâ ǁan hâdu hoado, nēsa ǂan î du ti mîde sadu ǂgaedi ǃnâ ǂgâ kai. ¹⁵ Nēgu ge ǀhoro tama hâ, sadu ǂâi hâ khami; ǃnonaǁî iri tsēs dib kom nēbao. ¹⁶ Xawe ǁnās ge kēbo-aob Joeli xa ge mîhesa: ¹⁷ Tsî i ge ǀuni tsēdi ǃnâ nîra ī, tib ra Eloba mî, o ta ge tita ti Gagaba ǁgans hoas ai nîra ǁhōǂui, on ge sadu ôagu tsî ôadi tsîna nîra kēbo, o gu ge sadu ǂkhamkhoega īsiga nîra mû, o gu ge kaikhoega ǁhapode nîra ǁhapo. ¹⁸ Tsî ta ge ǁkhāti ǁnā tsēdi ǃnâ ti ǃgāgu tsî ti ǃgādi tsîn ǂama ti Gagaba nîra ǁhōǂui, on ge nîra kēbo. ¹⁹ Tsî ta ge buruxana nîra dī ǀgapise ǀhommi ǃnâ tsî saode ǃnaga ǃhūbaib ai: ǀAob tsî ǀaes tsî ǀanni tsîna. ²⁰ Sores ge ǃkhaenab ǃnâ nîra ǀkhara tsî ǁkhâba ǀaob ǃnâ, ǃKhūb di kai tsî ǂkhaisa tsēs nî hās aiǃâ. ²¹ Tsî i ge nîra ī, mâ-i hoa-i, ǃKhūb ǀonsa ra ǂgaiǀî-i nîra ǃgâiǃō ǃkhaisa.

NOVEMBERI 19-25

ELOBMÎSA XU HÂ ǂÛǂÛSA MÎDI | ǃNAEǃKHAIDI 4–5

ǁÎn ge ‘Elobmîs xa ǁkhoaǂgaosib ǀkha gere ǃhoa’

(ǃNaeǃkhaidi 4:5-13) Tsî i ge nau ǁgoas ai ge ī, o gu ge ǁîn di danakhoegu tsî kaigu tsî xoaǂansabegu tsîga Jerusalems tawa ge ǀhao,⁶ Annab ǀgapipristeri tsî Kajafab tsî Johaneb tsî Aleksanderi tsî ǀgapipristeri ǃhaosa xu ge hâ igu kōse. ⁷ Tsî gu ge ǁîkha ǁaegub ǃnâ mâi tsî ge dî kha: Mâ ǀgaiba xu tsî mâ ǀons ǃnâ kho kha nēsa go dī? ⁸ Ob ge Petruba ǃAnu Gagab xa ǀoa hâse ǁîgu ǃoa ge mî: ǁAes di ǂamsago tsî Israeli di kaigo! ⁹ Sikhom ga nētsē ǃeream kaiheo, ǀaesen hâ khoeb tawa go ī ǃgâidīs ǃaroma, tari-e xub go ǁîba ǂgau ǃkhaisa, ¹⁰ o go sago hoago tsî Israeli ǁaes didu hoado nî ǂan, Jesub Xristub, Nasareǁîb, sadu ge ǃgâub, Elob ge ǁō hâna xu ǂkhaiǂkhaib di ǀons ǃnâ, ā, ǁîba xub ge nēba ǂgause sadu aiǃâ mâ ǃkhaisa. ¹¹ ǁÎb ge ǁnā ǀuib, sadu om radu xa ge ǃharaxūheb xawe ge ǁhôas di danaǀui kaiba. ¹² Tsî ǀnî-i ǃnâs oresa hâ tama hâ, tsî i ǁkhāti ǀnî ǀon-e ǀhommi ǃnaga khoena māhe tama hâ, ǁî-i ǃnâ da nî orehe-e. ¹³ Tsî Petrub tsî Johaneb tsîkha di ǂhauǃnâsiba mû tsî gu ge hōǃâo, ǁkhāǁkhāhe tama tsî ǀūǂam khoekha asa, o gu ge ge buru, mûǂan kha gu ge xui-ao, Jesub ǀkha kha ge hâ i ǃkhaisa.

w08-E 9/1 15, boksis

ǃHoa-e gere mîde xu ǃanu xoas ǃoa—Xoaǀgaub tsî ǂguroǁaeb Xristeǁîn

Apostelga ǀgapi ǁkhāǁkhā-e ge ūhâ tama hâ-i?

ǂGaeǂgui-aogu hîna ge Jerusalems ǃnâ hâ îgu ge ‘Petrub tsî Johaneb tsîkha di ǂhauǃnâsiba mû tsî ge hōǃâ, ǁkhāǁkhāhe tama tsî ǀūǂam khoekha asa, o gu ge ge buru.’ (ǃNǃkh. 4:13) Apostelga amabes ǃnâ ge ǁkhāǁkhāsa tama hâ i? Nēs xas ge The New Interpreter’s Elobmîsa ra mî: “ǁNā mîdi ge tā ǃoaǃūse nî ūhe, Petrub tsî Johaneb tsîkha ge khomai tsî xoa ǁoa isa. Nē ǂgaeǂgui-aogu ge ǀhûhâsib ǃnâ a ǀgapi khoen tsî apostelgu ǁaegu hâ ǃkharagagusiba gere mûǂan.”

w08-E 5/15 30 ¶6

Mâǂoa ra xūn apostelgu di ǃNaeǃkhaidi ǂkhanisa xu

4:13—Petrub tsî Johaneb tsîkha amabes ǃnâ ge ǁkhāǁkhāsa tama hâ i? Hî-î, ǁîkha ge ge ǁkhāǁkhāsa tama hâ i. ǁÎkhâ ge “ǁkhāǁkhāhe tama tsî ǀūǂam khoekha asa” ge hâ i, ǁkhāǁkhā-aogu skoli ǃoa kha ge ī tama hâ i amaga.

(ǃNaeǃkhaidi 4:18-20) O gu ge ǁîkha ǂgai tsî ge mîmā kha, hoaragase kha Jesub ǀons ǃnâ ǃhoa tsî ǁkhāǁkhā tide ǃkhaisa. ¹⁹ O kha ge Petrub tsî Johaneb tsîkha ǃeream tsî ǁîgu ǃoa ge mî: Aitsama ǀgora, ise i Elob aiǃâ a ǂhanu ǃkhaisa, sago Elob ǂamai nî ǁnâuǀnamsa? ²⁰ ǀÛ ǁoa khom kom ao, mû tsî khom ge ǁnâun xa ǃhoasa.

(ǃNaeǃkhaidi 4:23-31) Tsî xūhe kha geo, o kha ge ǁîkha din tawa sī, tsî ǁîna ge ǂhôa, ǀgapipristergu tsî kaigu go mîba kha xūn hoana. ²⁴ Tsî ǁnâun geo, on ge ǀguiǂâixase domma Elob ǃoa ǃhâkhâi tsî ge mî: ǃKhūtse, sats ge a ǁnā Elo, ǀhommi tsî ǃhūbaib tsî hurib tsî ǁîb ǃnâ hân hoana ge dītsa, ²⁵ Davib, sa ǃgāb di amsa xu ge mîtsa: Tare xū-i ǃaroman ra ǀūbena ǂkhupi, tsî di ǁaede ǁau xūna ra ǂâi? ²⁶ ǃHūbaib di gao-aogu ge ra khâi, tsî ǂamsagu ge ra ǀhû, ǃKhūb ǃoagu, tsî ǁîb di Xristub ǃoagu. ²⁷ Amab ǃnân kom sa ǃanu ǀGôab Jesub, sats ge ǂkhauǀkhāb ǃoagu ǀhû hâo, Herodeb tsî Pontiub Pilatub ǀūben tsî Israelǁîn tsîn ǀkha, ²⁸ dīn nîse, sa ǃommi tsî sa ǂâibasens tsîra ge īn nîs ǃoa ǂnûiǂgān hoana. ²⁹ Tsî nēsi, ǃKhūtse, ǁîn di ǁgarisa kō, î sa ǃgāga mā, ǂhauǃnâsib hoab ǀkha sa mîsa ǃhoasa. ³⁰ Sa ǃomma ǂgauǂgaus ǃoa ǀhōǂui, î saodi tsî buruxan tsîna ī kai re, sa ǃanu ǀGôab Jesub di ǀons ǃnâ. ³¹ Tsî ǀgoren geo, os ge ǀhaon ge hâ i ǃkhaisa ge gongonhe, on ge hoana ǃAnu Gagab xa ǀoa, tsî Elob mîsa ǁkhoaǂgaosib ǀkha gere ǃhoa.

it-1-E 128 ¶3

Apostelgu

Xristeǁî ǀhaohâb ǃnâ hâ ǁaxasigu. Pinkstertsēs aib ge ǃanu gagaba a ǁhōǂuihe o, o gu ge apostelga ge ǀgaiǀgaihe. ǂGuro koro xoaǀgoradi Apostelgu di ǃNaeǃkhaidi ǂkhanis didi ge ra ǁgau mati gu ge apostelga ǃao tama hâ isa. ǁÎgu ge ǃgâiǂhôas tsî Jesub khâis xa ǁkhoaǂgaose gere aoǁnâ. ǀNî ǁaegu ai gu ge ǃkhō-oms ǃnâ ǂgāhe, ǂnauhe tsî ǁōb ǀkha ǁgarihe xawe. Pinkstertsēs khaoǃgâ gu ge apostelga kaise ge ôasa i, ǃanu gagab daoǁgaus ǃnāga. Tsî nēs ge ge ǃaroma îb Xristeǁî ǀhaohâba buruxa ǀgaub ǃnâ kai. (ǃNǃkh. 2:41; 4:4) Aoǁnâ sîsenni ge ǂguro Jerusalems ǃnâ ge tsoatsoa tsî ǁnāpaxū Samarias ǃoa ge ǃkharu tsî ega ǃhūbaib ǂhawase.—ǃNǃkh. 5:42; 6:7; 8:5-17, 25; 1:8.

Gagasi xūna ǀō-aisase ôaǃnâs

(ǃNaeǃkhaidi 4:11) ǁÎb ge ǁnā ǀuib, sadu om radu xa ge ǃharaxūheb xawe ge ǁhôas di danaǀui kaiba.

it-1-E 514 ¶4

ǁHôaǀuib

Psalmdi 118:22 ge ra ǁgau ǀuis hîna ge a āxūhes ge ge “ǁhôaǀui” kai. (Heb., roʼsh pin·nahʹ) Jesub ge ǁnā kēbosa ǁîb ǃoa ge a ǁnaeǁgau ‘danaǀuis’ di hâsa. (Gr., ke·pha·leʹ go·niʹas, danaǀui) (Mat. 21:42; Mrk. 12:10, 11; Luk. 20:17) Jesub ge ǁhôaǀuib ase kaise a ǂhâǂhâsa Xristeǁîn ǀhaohâb ǃnâ hîna ǂkhauhesan tsîna ǃkhōǂgā hâna, nēs ge gagasi tempeli ǃoas tsîna ra ǁnaeǁgau. Petrub tsîn ge Psalmdi 118:22 ǃnâ Jesuba ǃoa ge ǁnaeǁgau, ǁgau rasa Jesub a ‘ǁhôaǀuisa’ hîna khoen xa āxūhe hâba xawe Elob xa a ǁhûisaba ‘danaǀuise.’—ǃNǃkh. 4:8-12 tsî 1Pet. 2:4-7 sa khomai re.

(ǃNaeǃkhaidi 5:1) Tsî ǂanǂansa khoeb, Ananiab ti ǀon hâb ge Safiras ǁîb di taras ǀkha ǃhana-e ge ǁamaxū.

w13-E 3/1 15 ¶4

Ananiab tsî Safiras tsîra ge ge ǂhumi, tae-e da ǁîra xu a ǁkhāǁkhāsen ǁkhā?

Ananiab tsî Safiras tsîra ge ǃhū-e ge a ǁamaxū îra ǀasase ge ǁāǁnâhe ǃgâsana hui. Ananiab ge ǁamaxūsa xub ge hō marisa apostelgu ǃoa ge ī-ū tsî ge mî ǁnā marisros ǀguisab ge hōdi. Xawe ǁnās ge ge ama tama hâ i. ǁÎb ge ǀnî marina ge ǃkhō-oabasen. Elob ge nēsa Petrub ǃoa ge ǂhaiǂhai. Tsî Petrub ge Ananiaba ge mîba: “Khoenats ǂhumiba tama, tsîts kom Eloba go ǂhumibao.” ǁNās khaoǃgâb ge Ananiaba ge ǁnā tsî ǁō. ǃNona khamagu khaoǃgâs ge ǁîb taras tsîna ge a hā. ǁÎs ge ge ǀū i tae-i ge Ananiab ǀkha a ī ǃkhaisa. ǁÎs tsîn ge ge ǂhumi tsî ge ǁō.

Elobmîs khomai ǃâs

(ǃNaeǃkhaidi 5:27-42) Tsî ǁîga gu ge ūhāo, o gu ge ǀapeǀhaos aiǃâ ge mâi gu. Ob ge ǀgapipristera ǁîga dî tsî ge mî: ²⁸ ǁKhōse ge ǁnâi sago ǃkhâi tama hâ, nē ǀons ǃnâ go ǁkhāǁkhā tide ǃkhaisa? Tsî mû, o go kom Jerusalems hoaragasa sago ǁkhāǁkhās ǀkha go ǀoaǀoao, tsî go kom nē khoeb di ǀaoba sige ai ūhā ǂgao hâo. ²⁹ O gu ge Petrub tsî nau apostelgu tsîga ǃeream tsî ge mî: Anu i kom ao, Elob nî khoen ǃgâ-ai ǁnâuǀnamhe ǃkhaisao. ³⁰ Elob sada îgu dib ge Jesuba ge ǂkhaiǂkhai, sadu ge ǃgamma, ǁîba ǃgâuhaib ai ǂgā tsî. ³¹ ǁÎbab ge Eloba ǁîb di amǀkhāb ǁôab tawa ge ǀgapiǀgapi, ǂAmkhoese tsî ǃGâiǃōdī-aose, Israelab nî ǃhobasens tsî ǁoren ǀûbasa māse. ³² Tsî sige ge a ǁîb di ǀhûǀguitimî-ao nē mîdi ǂama, tsî ǃAnu Gagab, Elob ge ǁîba ra ǁnâuǀnamna a māb on. ³³ Tsî ǁnâu gu geo, o gu ge kaise ǁaixa tsî ge ǀapeǀape, ǁîga gu nî ǃgam, ti. ³⁴ Ob ge ǀgui Fariseb, Gamaliel ti ǀon hâb, ǂhanuǁkhāǁkhā-aob, ǁaes hoas tawa ǀgapiǃgôahe hâba khâi tsî ge mîmā, apostelgu nî ǂkharirose ǂoa kaihe ǃkhaisa. ³⁵ Ob ge ǁîgu ǃoa ge mî: Israelǁî aogo, ǂanbasen re tare-e go nē khoegu ǀkha ra dī ǂgaosa. ³⁶ ǁAero-i aiǃâb ge Teudaba khâi tsî ǂamkhoeb a ti gere mî, o gu ge hakakaidisi nî ī khoega ge ǂae-ai bi; ǁîb ge ge ǃgamhe tsî ǁîba ge ǁnâuǀnamgu hoagu ge ǀgaruǀgaruhe, tsî ge ǁauxū kai. ³⁷ ǁÎb khaoǃgâb ge Judab, Galileaǁîba, xoamâis di tsēdi ai khâi, tsî ǂgui khoena ǁîb ǃoa ge ǁnāǁgôa kai; ǁîb on ge ge ǁō, tsî hoan ǁîba ge ǁnâuǀnamn ge ge ǀgaruǀgaruhe. ³⁸ O ta ra mîba go: Nē khoegu ǀkha ǀû, î ǁîga ǃgû kai. Nē ǂâibasens tsî nē sîsenni tsîra ga khoena xu hâo, o ra kom nî kāo. ³⁹ Tsî Eloba xu ra ga hâo, o go kom sago ǁîra a hîkākā ǁoao, î go tā ǀnîsi Eloba ra ǃkhamūgo ase hōhe. ⁴⁰ O gu ge ǁîba ǃkhō-am tsî apostelga ǂgai tsî ǂnau tsî ge ǃkhâi gu, Jesub ǀons ǃnâ gu ǃhoa tide ti, tsî ge ǁnāxū gu. ⁴¹ O gu ge ǁîga ǀapemāǃnans di aisa xu ǃgâiaǂgao hâse ge ǃgû, Jesub di ǀons ǃaroma ǃharaxūhesa tsâsa gu ge anuǃgôahe ǃkhais ǃaroma. ⁴² Tsî gu ge ǀû tama ge hâ i mâ tsēs hoasa tempeli ǃnâ tsî omdi tawa ǁkhāǁkhā, tsî Jesub Xristub xa hâ ǃgâiǂhôasa aoǁnâsa.

NOVEMBERI 26–DESEMBERI 2

ELOBMÎSA XU HÂ ǂÛǂÛSA MÎDI | ǃNAEǃKHAIDI 6-8

“ǀAsa Xristeǁî ǀhaohâb ge ra ǃâitsâhe”

(ǃNaeǃkhaidi 6:1) Tsî ǁnā tsēdi ǃnâ, ǁkhāǁkhāsaben ge ǂguiǂguisen ǃnubain ge Grikeǁîna Hebreǁîn ǃoagu ge ǂnoagu, ǁîn di ǃoataradi tsēkorobe ǃoabas ǃnâ ra gāxaǃnâhe amaga.

bt-E 41 ¶17

“Elob nî khoen ǃgâ-ai ǁnâuǀnamhe ǃkhaisao”

¹⁷ Nē ǀasase ge tsoatsoa-e ǀhaohâb ge ǃgomsiba gere hōǃâ. Tae-i ǃgomsiba ge ī? ǀAsase ge ǁāǁnâhe ǁkhāǁkhāsaben ge Jerusalems ǃoa gere sari tsî ǁnāpa gaxuse gere hâ ǂgao. Jerusalems ǃnâ ge hâ i ǃgâsan ge nau ǃgâsana marisise gere hui în ǂhân hâ xūna ǁama ǂûn tsî ǀnî xūn khami. (ǃNǃkh. 2:44-46; 4:34-37) Nēs xa ǃaroma-e hâseb ge ǃgomsiba ge tsoatsoa. “Tsēkorobe” māǂuis ǂû-i dis ǃnân ge Grike ǃoatarade gere “gāxaǃnâhe.” (ǃNǃkh. 6:1) Xawe di ge Hebregowaba gere ǃhoa ǃoatarade nēs xa ge tsâǀkhāhe tama hâ i. ǃHaoǀgoras ge ǁîn ǁaegu ge hâ i. ǀNî xūn ge nēs xa ge ǁkhōǁkhōsa i.

(ǃNaeǃkhaidi 6:2-7) O gu ge disiǀgamǀaga ǂgomsaben hoana ǂgaiǀhao tsî ge mî: Anu tama i kom hâo sige nî Elob mîsa ǁnāxū tsî khoena ǂhâgu ǃnâ ǃoaba ǃkhaisa. ³ ǁNā-amaga ǃgâsago, sadu ǃnâ hû aoga kōǂuibasen, ǃgâi gom-e ūhâga tsî ǃAnu Gagab tsî gā-aisib tsîn xa ǀoa hâga, î du ǁîga nē ǂhâǂhâsa ǃoabas ǃnâ mâi. ⁴ O ge sige ǀgores ǃnâ nî hâhâ tsî mîs di ǃoabas ǃnâ. ⁵ Tsîs ge nē mîsa ǂgomsaben hoana ǃgâiba ge i, on ge ge ǃkhōǂuibasen Stefanub, ǂgoms tsî ǃAnu Gagab xa ǀoa hâ aob, tsî Filipub, tsî Proxorub, tsî Nikanori, tsî Timonni tsî Parmenab tsî Nikolaub, Antioxiaǁî Jodehoresab tsîga. ⁶ ǁÎgan ge apostelga ge mâi-aiǃâ. O gu ge ǀgore tsî ǃomga ge ǁgui-ai gu. ⁷ Tsîs ge Elob mîsa ge khoraǂuisen, tsî ǁkhāǁkhāsaben di ǃgôab ge Jerusalems ǃnâ kaise ge ǂguiǂguisen, tsî kaise ǂgui pristergu on ge ǂgomsa ge ǁnâuǀnam.

bt-E 42 ¶18

“Elob nî khoen ǃgâ-ai ǁnâuǀnamhe ǃkhaisao”

¹⁸ Apostelgu ge ǂGaeǂguira soros ase nē gere khâi ǀhaohâba gere mûǂam. ǁÎgu ge ge mî “anu tama i kom hâo sige nî Elob mîsa ǁnāxū tsî khoena ǂhâgu ǃnâ ǃoaba ǃkhaisa.” (ǃNaeǃkhaidi 6:2) Nē ǃgomsiba ǀam kais ǃaroma gu ge ǁkāǁkhāsabega ge mîba îgu hû ǃgâsaga ǁhûiǂui “ǃanu Gagab tsî gā-aisib tsîn xa ǀoa hâga.” ǁÎgu ge apostelgu xa ge ǁgaumâihe nē “ǂhâǂhâsa ǃoabas” ǃnâ. (ǃNaeǃkhaidi 6:3) Gagasise ǀgaisa ǃgâsagu ge ge ǂhâsa i nē ǃgomsib ge ǂûna ǀgoraǂuis ǀguisa ǃkhōǂgā tama hâ i amaga. Xawe nēs ge marin ǀkha sîsens tsî ǂhâbasa xūna ǁamas tsîna ge ǃkhōǂgā hâ i. ǁHûi-e ge ǃgâsagu hoagu ge Grike ǀonde ge ūhâ i tsî nēs ge nē ǃgomsib xa ge tsâǀkhāhe ǃoatarade ǃgâise gere tsâ kai. Nē ǃgomsiba gu ge ǀgorebas khaoǃgâ gu ge apostelga hû ǃgâsaga ge ǁhûi nē ‘ǂhâǂhâsa ǃoabasa’ ǃaroma.

(ǃNaeǃkhaidi 7:58–8:1) tsî ǃāsa xu ǂhāǂui tsî ge ǀuiǁhom bi. Tsî ǀhûǀguitimî-aogu ge saran âga ǂkhamkhoeb, Saulub ti ǀon hâb di ǂaira tawa ge ǁgui. ⁵⁹ Tsî gu ge Stefanuba ge ǀuiǁhom, ǂgaiǂui tsî ra mîba: ǃKhū Jesutse, ǃkhōǃoa ti gagasa re! ⁶⁰ Tsî ǃhonǁgoa tsîb ge ǃgari dommi ǀkha ge ǂgai: ǃKhūtse, tā ǁîna nē ǁoreba ūhâba ti. Tsî nēsa mî tsîb ge ge ǁō.

8 Tsî Saulub ge ǁîb di ǁōb ǃnâ ǀhûpe ge ǃgâibahe hâ i. Tsî i ge ǁnā tsēs ai kai ǃgôaǃgon-e Jerusalems di ǀhaohâb ǂama ge hā; on ge hoatsama ge ǀgaruǀgaruhe Judeab tsî Samariab ǃhūkha ǃnâ, apostelgu ǀguigu ose.

Gagasi xūna ǀō-aisase ôaǃnâs

(ǃNaeǃkhaidi 6:15) Tsî gu ge ǀapemāǃnans ǃnâ ǂnôagu hoaga ǁîb ai kō tsî ais âba ǀhomǃgā-i di ais axase ge mû.

bt-E 45 ¶2

Stefanub ge “ǀkhommi tsî ǀgaib tsîkha xa” ge ǀoahe hâ i

² Xū-i ge kaise ge ǀō-aisa i Stefanub xa. ǀGoraǃgâ-aogu ge ǁîba gere kō tsî ǁîb ais ge “ǀhomǃgā-i di ais axase” gere mûsen. (ǃNaeǃkhaidi 6:15) ǀHomǃgāgu ge a Jehovab di sîsabega tsî gu ge ǃao tama hâse ǁnāsa ra dī xawe a ǂkhîxa. Stefanub ge ǁnāti i mâsib ǃnâ ge hâ i, ǀgoraǃgâ-aogu tsîn ge ǁnāsa ge mûǂan. ǁÎba tae-i ǃaroma ge ǃnōmsa i?

(ǃNaeǃkhaidi 8:26-30) Tsî i ge ǃKhūb di ǀhomǃgā-e Filipub ǃoa ǃhoa, tsî ge mî: Khâi, î ǃkhawagasǀî ǃgû, Jerusalemsa xu Gasas ǃoa garu ǁgona daob, ǃū-aise ǁgoeb ai. ²⁷ Ob ge khâi tsî ge ǃgû. Tsî mû, Etiopiaǁîb, ǀgapiǃgôahesa ǁuiǃkhōmâi-aob, gao-aos Kandakes Etiopiab dis di ǃgari-aob, ǁîs di ǁuib hoab ǂama ge mâihe hâ ib ge Jerusalems ǃoa ge hā, ǀgoreǀîb nîse. ²⁸ Tsî ǁarub garu hîab ge ǁîb di kunis ai ǂnôase kēbo-aob Jesajab ǂkhanisa gere khomai. ²⁹ Ob ge Gagaba Filipub ǃoa ge mî: ǃGûsī î nē kunisa sao. ³⁰ Ob ge Filipuba ǃgûsī tsî ge ǁnâu, kēbo-aob Jesajabab ra khomai ǃkhaisa, ob ge ge mî: ǁNâuǃāts ra xare khomaits ra-e?

bt-E 58 ¶16

“ǃGâiǂhôasa Jesub” xa ǂhôas

¹⁶ Nētsē da ge hoa da ǁnā aiǂhanuba ūhâ Filipub gere dī sîsenni ǃnâ ǁhaosa. Hoaǁae da ge Gaosib xa ra aoǁnâ khoena da ra ǀhao-ū ǃkhai-i hoa i tawa, aiǁgause ǃnarimâ da ga o. ǂGui ǁaega da ge ǂhauǃnâ khoen ǀkha ra ǀhao. Nēsa da ge a ǃâubasen ǁkhā nē sîsenni ǀhomǃgāgu daoǁgaus ǃnāga ra dīhe amaga în ‘mâ ǃhaoǃnās hoas, tsî ǃhaos hoas, tsî gowab hoab, tsî ǁaes hoasa’ aoǁnâbahe ǁkhā. (J.ǂHa. 14:6) ǀHomǃgāgu daoǁgaus ǃnāgas ge ǃgâiǂhôasa nî aoǁnâhe dib ge Jesuba ge mî. ǃHorob tsî ǀomatsâni di ǂkhōs ǃnâb ge Jesuba ge mî, ǃgaos ǁaeb ge nē ǃhūbaib di ǀamsa “tsî ǃgao ra gu ge ǀhomǃgāga.” ǁÎb ge ge ǀaro tsî ge mî “tsî gu ge hoa ǁgonǁgonǃnâdi tsî ǂkhababa ra dīn ona ǁîb gaosiba xu nîra ǀhaoǀhao.” (Mat. 13:37-41) ǁKhā ǁaeb ai gu ge ǀhomǃgāga ǀhomsi Gaosib ǃnâ nî sī ǁan ǂkhauhesana nî ǀhaoǀhao. Tsî ǁnāpaxū “kai ǂnubis” khoen “ǀnî gūn” dina nî ǀhaoǀhao Jehovab ǁîb ǀapeǂhumis ǃnâ ǂhâba hân hoana.—J.ǂHa. 7:9; Jhn. 6:44, 65; 10:16.

Elobmîs khomai ǃâs

(ǃNaeǃkhaidi 6:1-15) Tsî ǁnā tsēdi ǃnâ, ǁkhāǁkhāsaben ge ǂguiǂguisen ǃnubain ge Grikeǁîna Hebreǁîn ǃoagu ge ǂnoagu, ǁîn di ǃoataradi tsēkorobe ǃoabas ǃnâ ra gāxaǃnâhe amaga. ² O gu ge disiǀgamǀaga ǂgomsaben hoana ǂgaiǀhao tsî ge mî: Anu tama i kom hâo sige nî Elob mîsa ǁnāxū tsî khoena ǂhâgu ǃnâ ǃoaba ǃkhaisa. ³ ǁNā-amaga ǃgâsago, sadu ǃnâ hû aoga kōǂuibasen, ǃgâi gom-e ūhâga tsî ǃAnu Gagab tsî gā-aisib tsîn xa ǀoa hâga, î du ǁîga nē ǂhâǂhâsa ǃoabas ǃnâ mâi. ⁴ O ge sige ǀgores ǃnâ nî hâhâ tsî mîs di ǃoabas ǃnâ. ⁵ Tsîs ge nē mîsa ǂgomsaben hoana ǃgâiba ge i, on ge ge ǃkhōǂuibasen Stefanub, ǂgoms tsî ǃAnu Gagab xa ǀoa hâ aob, tsî Filipub, tsî Proxorub, tsî Nikanori, tsî Timonni tsî Parmenab tsî Nikolaub, Antioxiaǁî Jodehoresab tsîga. ⁶ ǁÎgan ge apostelga ge mâi-aiǃâ. O gu ge ǀgore tsî ǃomga ge ǁgui-ai gu. ⁷ Tsîs ge Elob mîsa ge khoraǂuisen, tsî ǁkhāǁkhāsaben di ǃgôab ge Jerusalems ǃnâ kaise ge ǂguiǂguisen, tsî kaise ǂgui pristergu on ge ǂgomsa ge ǁnâuǀnam. ⁸ Tsî Stefanub ge ǀkhommi tsî ǀgaib tsîkha xa ǀoa hâse buruxan tsî kai saode ǁaes ǃnâ gere dī. ⁹ O gu ge ǀnîgu Libertinǁîgu ti ra ǂgaihe sinagogeb digu, tsî Kireneǁîgu tsî Aleksandriaǁîgu, tsî Silisiab tsî Asiab digu tsîga khâi, tsî Stefanub ǀkha gere ǂnoagu. ¹⁰ Tsî gu ge gā-aisib tsî Gagab Stefanub ra ǃhoaǃnâba mâǃoa ǁoa ge i. ¹¹ ǃNubai gu ge ǀnî khoega ge ǀāǀāǃnâ, nēti ra mîga: Sige ge ge ǁnâu ǃkhāǃkhāmîdeb Moseb tsî Elob tsîkha ǃoagu gere ǃhoa ǃkhaisa. ¹² Tsî gu ge ǁaesa ge ǀāǀāǃnâ tsî kaigu tsî xoaǂansabegu tsîga, o gu ge ǀgaib ǀkha ǃkhō tsî ǀapemāǃnans aiǃâ ge ǂgaeǂguisī bi; ¹³ tsî ǂkhaba ǂgā-amaoga ge mâi, nēti ra mîga: Nē khoeb kom ǀû tamao, ǃkhāǃkhāmîde ǃhoasa, nē ǃanu ǃkhais tsî ǂhanub tsîra ǃoagu. ¹⁴ Nētib ra mî: ǁNā Jesub, Nasareǁîb nî nē tempela khôaǁnâ, tsî ǁnā ǂūga ǀkharaǀkhara, Moseb ge sada a māga, ti ge ge ǁnâu bi xui-ao. ¹⁵ Tsî gu ge ǀapemāǃnans ǃnâ ǂnôagu hoaga ǁîb ai kō tsî ais âba ǀhomǃgā-i di ais axase ge mû.