ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
Julib 6-12
ELOBMÎSA XU HÂ ǂÛǂÛSA MÎDI | EKSODUS 6-7
“Nēsits ge nî mû, Faraob tawa ta nîra dī xū-e”
(Eksodus 6:1) ǃNubaib ge ǃKhūba Moseb ǃoa ge mî: Nēsits ge nî mû, Faraob tawa ta nîra dī xū-e. ǀGaisa ǃomma xub kom ǁîna nîra doe kaio, ā, ǀgaisa ǃomma xub kom ǁîna ǃhūba xu nîra doeǁgaǂuio.
(Eksodus 6:5, 6) ǁNā-amaga mî re Israeli ôan ǁga: Tita ge ǃKhūta, tsî tita ge sado nîra ǂgaeǂguiǂui Egipteǁîn di ǃkhanade xu, tsî tita ge sado nîra ore ǁîn di ǃgāsisa xu, tsî ta ge nîra ore du ǀhōǂuihesa ǁôab ǀkha tsî kai ǀgoraǃgâdi ǀkha. 6 Tsî ta ge tita sado ti ǁaese nîra ǃkhōǃoa, tsî ta ge tita sado Elose nîra ība; o du ge sado nîra ǂan, tita a ǃKhū sadu di Elo, Egipteǁîn di ǃkhanade xu ra ǂgaeǂguiǂui du ta ǃkhaisa.
it-2-E 436 ¶3
Moseb
Israelǁî aogu ǃnâ i ge ǀkharaǀkhara-e ge hâ i. ǁÎgu ge Moseb di ǂansa ge ūǃoa xawen ge ega ǃgom sîsenni mâsiba a hōǃâ tsoatsoa o Faraob ǂgaeǂguis ǃnāga, on ge ǁîb ǃoagu gere ǃgae tsî nēs ge ge dī îb Moseba ǂhapuǂâi hâse Jehovaba ǃoa ǀgore. (Eks. 4:29-31; 5:19-23) Hoaǀgaixab ge ǁîba ge ǀgaiǀgai, Abrahammi, Isaki tsî Jakob hâgab ge mîmâi xū-eb nî dīǀoaǀoa ǃkhaisa ǂhaiǂhais ǃnâ-ū tsî Israelǁaesa sâus tsî mîmâisa ǃhūb ǃnâ kai ǁae kais ǃnâ-ūs tsîna. (Eks. 6:1-8) Israelǁî aogu ge Moseba noxoba ge ǃgâ tama hâ i. Khoeseǁî ǁgaoǁgaosib khaoǃgâb ge ǁîb daoǁgausa gere sao îb ǃamku ǀgaub ǃnâ ǂoa-ū nî.—Eks. 13:18.
(Eksodus 7:4, 5) Xaweb ge Faraoba sakho ǁnâu tide, o ta ge tita ti ǃomma Egipteb ai nîra ǁgui tsî ti ǂnubidi, ti ǁaes, Israeli ôana Egipteǃhūba xu nîra ǂgaeǂguiǂui kai ǀgoraǃgâdi ǀkha.5 ǃNubain ge Egipteǁîna nîra ǂan, tita a ǃKhū ǃkhaisa, ti ǃomma ta ga Egipteb ǂama ǀhōǂuio, tsî Israeli ôana ta ga ǁîn ǁaeguba xu ǂgaeǂguiǂuio.
it-2-E 436 ¶1-2
Moseb
Egipteǁî Faraob aiǃâ. Moseb tsî Aronni tsîn ge elogu di ǃkhams ǃnâ ge ǂhâǂhâsa i. ǃGaidība ra dī pristergu Janeb tsî Jambreb tsîkha hâ hînab ge Faraoba Egipteǁî elogu hoagu ǀgaiba Jehovab dib ǀkha gere ǀnō. (2Tim. 3:8) Aronni ge Moseb daoǁgaus ǃnāga Faraob aiǃâ a dī buruxa dīb ge Jehovab Egipteǁî elogu ǂam-ai ǀgapi ǃkhaisa ge ǁgau, Faraob ge ǃgaridanaxa i xawe. (Eks. 7:8-13) ǃNonaǁî ǁgaoǁgaosib ge hâ o, o gu ge pristergu tsîna mûǂan tsî ge mî “nēb ge Elob di ǀkhunuba.” ǁÎgu ge kaise ǁgai ǀhapide ge hō tsî ǁnās ǀkha Faraob aiǃâ Moseba mâǃoas ǃaroma ge sī ǁoa i.—Eks. 8:16-19; 9:10-12.
ǁGaoǁgaosigu ge tsautsau tsî ǃgariǃgari sîsen-e ra dī. Moseb tsî Aronni tsîn ge disi ǁgaoǁgaosiga ǂanǂans ǃereamsa ge ūhâ i. Nēs ge gere ǁgau Moseb ge Jehovab ǃhoa-aosis mîmāsa gere ǁnâuǀamsa. Jehovab ǀons ge Egipteb ǃnâ ǂanǂanhe tsî gere sîsen-ūhe tsî nēs ge ǀnî Israelǁîn tsî Egipteǁîn tsîna ge tsautsau tsî Faraob tsî ǁîb ǀapemā-aon tsîna ge ǃgari kai. (Eks. 9:16; 11:10; 12:29-39) Egipteǁîn ge ǁîn elogan go mâǃoa di ge ǂâi tama hâ i xawe ge ǂan i Jehovab nē eloga ra ǀgoraǃgâ ǃkhaisa. Disiǁî ǁgaoǁgaosib ge māhe ǁaeb aib ge Moseba “kaise kai ge i Egipteǃhūb ǃnâ Faraob ǃgāgu di mûǁae tsî ǁaes mûǁae.”—Eks. 11:3.
Gagasi xūna ǀō-aisase ôaǃnâs
(Eksodus 6:3) Tsî Tita ge Abrahammi, Isaki tsî Jakob tsîgu tawa ge ǂhai, Elob Hoaǀgaixab ase, xawe ti ǀons ǃKhūb tis ǀkha ta ǁîgu tawa ǂansa tama ge i.
it-1-E 78 ¶3-4
Hoaǀgaixab
Jehovab ge “Hoaǀgaixa Elob” di hâ ǂgaiǀonsa ge sîsen-ū Abrahammab ge Isaki ǃnaes xa hâ mîmâisa a mā o. Nēs ge gere ǂgaoǀkhā îb Abrahamma ǀgaisa ǂgomsa Elob ǃnâ omkhâi nē mîmâisa dīǀoaǀoas ǃaroma. Nēs ge Elob ge Isaki tsî Jakob tsîkha Abrahammi ǀumi-aose a ǀkhae ǁaeb ǃnâs tsîna gere sîsen-ūhe.—Gen. 17:1; 28:3; 35:11; 48:3.
Jehovab ge ega Moseba ǃoa ge mî: “Tita ge Abrahammi, Isaki tsî Jakob tsîgu tawa ge ǂhai, Elob Hoaǀgaixab ase, xawe ti ǀons ǃKhūb tis ǀkha ta ǁîgu tawa ǂansa tama ge i.” (Eks. 6:3) Nēs ge ge ǂâibasen tama hâ i, nē om danagu Jehovab ǀonsa a ǀū di, ǁîgu tsî ǀnî hâ khoen tsîn ge nē ǀonsa hoaǁae gere sîsen-ū amaga. (Gen. 4:1, 26; 14:22; 27:27; 28:16) Genesis ǂkhanis hîna om danagu ûib xa a xoasas ǃnâ i ge “Hoaǀgaixa” di hâ mîsa ǃnani ǃnādi ǀguide ra hō-e xawe Elob ǀons Jehova di hâs ge 172 ǃnāde Hebre xoadi ǃnâ hâ. Om danagu ge “Hoaǀgaixa” di hâ ǂgaiǀonsa gere ǃgôaǃgâ xawe Elob ǀons Jehova di hâs ǂâibasensa ǃgôaǃgâs di ǃēsa ge hō tama hâ i. The Illustrated Bible Dictionary (Vol. 1, p. 572) ge nēs xa ra mî: “Om danagu ge mā-e hâ i ǂhaiǂhais ge hānîǁaeb ǃnâ nî dīǀoaǀoa-e mîmâis xa ge hâ i. Nēs ge gere ǂgaoǀkhā îgu ǁîga ǂgomǃgâsiba mā-e Jehovab ǁkhāsiba ūhâsa ǁîga dīǀoaǀoasa. ǃGarob ǃnâ ge mā-e ǂhaiǂhais ge ge khoexaǃnâ i tsî Jehovab ǁîn ǀkha hâ ǃkhais ge ǁîb ǀons ǃnâ-ū gere mûhe.”—J. D. Douglas, 1980.
(Eksodus 7:1) ǃNubaib ge ǃKhūba Moseb ǃoa ge mî: Mû, tita ge satsa Faraob ǂama Elose ge ǂnûi; tsî Aronni sa ǃgâsab ge sa kēbo-aose nî ī.
it-2-E 435 ¶5
Moseb
Moseb ge taob ǃaroma ge anuoǃnâ tama hâ i. Moseb ge taob ra ǃkhaisa ge ǁgau tsî ǃgâiseb a ǃhoa ǁoa di ge mî. Moseb ge nēba ge ǀkhara i, ǁîb ge 40 kuriga ǃkharu hâse Israelǁîn sâu-aose a māsen amaga. ǁÎb ge Jehovab ǀkha gere ǂnoagu tsî ǁîba ge ǂgan îb tā nē ǁgaumâisa dī. Nēs ge Eloba a ǁaixa kai xaweb ge Moseba ge ǂkhābē tama hâ i tsî ǁîb ǃgâb Aronna ǃhoa-aob ase ge sî. Moseb ge Eloba gere ǂnûǁkhaeba tsîb ge Aronna Moseba gere ǂnûǁkhaeba. Israelǁî-aogu tsî Faraob tsîn ǀkhab ge Moseba ūhâ i ǀhaos tawab ge Eloba ǁîba daoǁgaudi tsî mîmādi tsîna ge mā. Moseb ge nēn hoana Aronna ge mîba îb ǁîba Faraob ǀkha sī ǃhoa. (Eks. 2:23; 4:10-17) Egab ge Jehovaba Aronna Moseb di kēbo-ao di gere ǂgai, Moseb ge Elob xa gere daoǁgauhe amagab ge Aronni tsîna Moseb xa nî daoǁgauhes ge ge i. Moseb ge ǀgaib tsî ǁkhāsib tsîna Faraob ǂam-ai ge mā-e, îb tā Egipteǁî gao-aoba ǃao.—Eks. 7:1, 2.
Elobmîs khomai ǃâs
(Eksodus 6:1-15) ǃAruǀîb ge Eloba Moseb ǃoa ǃhoa tsî ǁîna ǃoa ge mî: Tita ge ǃKhūta. 2 Tsî Tita ge Abrahammi, Isaki tsî Jakob tsîgu tawa ge ǂhai, Elob Hoaǀgaixab ase, xawe ti ǀons ǃKhūb tis ǀkha ta ǁîgu tawa ǂansa tama ge i. 3 Tsî ta ge tita ǁkhāti ti ǃgaeǀhaosa ǁîgu ǀkha ge dī, Kanaanǃhūba ta ǁîga nîra mā ti, ǁnā ǃhūb ǃgûkhoesis âgu dib, ǁîb ǃnâ gu ge ǃhaokhoese hâ iba. 4 Tsî ta ge tita ǁkhāti ǃgaes Israeli ôan, Egipteǁîn xa ǃgāse ra ūhâhen disa go ǁnâu, tsî ta ge ti ǃgaeǀhaos xa go ǂâi. 5 ǁNā-amaga mî re Israeli ôan ǁga: Tita ge ǃKhūta, tsî tita ge sado nîra ǂgaeǂguiǂui Egipteǁîn di ǃkhanade xu, tsî tita ge sado nîra ore ǁîn di ǃgāsisa xu, tsî ta ge nîra ore du ǀhōǂuihesa ǁôab ǀkha tsî kai ǀgoraǃgâdi ǀkha. 6 Tsî ta ge tita sado ti ǁaese nîra ǃkhōǃoa, tsî ta ge tita sado Elose nîra ība; o du ge sado nîra ǂan, tita a ǃKhū sadu di Elo, Egipteǁîn di ǃkhanade xu ra ǂgaeǂguiǂui du ta ǃkhaisa. 7 Tsî ta ge tita sado nîra ūsī ǁnā ǃhūb ǃoa, ǁîb ǂama ta ti ǃomma ge ūkhâib, ǁîba ta nî Abrahammi, Isaki tsî Jakob tsîga māse; tsî tita ge ǁîba sado ǀumi-amǃnâse nîra mā, tita hîa ǃKhūta. 8 Tsîb ge Moseba ǁnāti Israeli ôan ǃoa ge ǃhoa, xawen ge Moseba ǁnâu tama ge i, gagas di ǂōǂōsib ǃaroma tsî karosa ǃgāsis ǃaroma. 9 ǃAruǀîb ge ǃKhūba Moseb ǁga ǃhoa tsî ge mî: 10 ǃGû îts Faraob Egipteb di gao-aob ǁga sī ǃhoa; îb Israeli ôana ǁîb di ǃhūba xu doe kai, ti. 11 Xaweb ge Moseba ǃKhūb aiǃâ ǃhoa tsî ge mî: Mû, Israeli ôan xawen ǃgâ te tama hâ, matib kha ǁnâi Faraoba nî ǃgâ te? ǁNās xōǀkhā ta ge ǃgaohe tama hâ amǁgaukha ūhâ. 12 Tsî ti i ī xaweb ge ǃKhūba Moseb tsî Aronni tsîkha ǀkha ǃhoa tsî ǁîkha mîmāde ge mā Israeli ôan ǃoa tsî Faraob Egipteb di gao-aob ǃoa, Israeli ôana kha nî Egipteǃhūba xu ǂgaeǂguiǂui ti. Moseb tsî Aronni tsîkha ǃhaos di ǂgaekhâib. 13 Nēgu ge danakhoegu mâ ommi ǁîn îgu dib hoab diga: Rubenni di ôagu, ǂguroǃnaesabeb Israeli dib digu ge Henoxi, Palub, Hesronni tsî Karmib tsîga; nēgu ge Rubenni ommi diga. 14 Tsî Simeonni di ôagu ge Jemueli, Jaminni, Ohadi, Jaxinni, Sohari tsî Sauli Kanaanǁîs di ôab tsîga; nēgu ge Simeonni ommi diga. 15 Tsî nēdi ge Levib ôagu di ǀonde, ǁîgu di ǃnaedi ǃoa: Gersonni, Kehati tsî Merarib tsîga. Tsî kurigu Levib ûib digu ge ǀguikaidisiǃnonadisihûǀa kuri ge i.
Julib 13-19
ELOBMÎSA XU HÂ ǂÛǂÛSA MÎDI | EKSODUS 8-9
“ǀGapiǂâixa Faraob ge ǀūǃgâxase Elob ǂâisa ra dī”
(Eksodus 8:15) Tsî Faraob ge mûo, ǁkhawab ǀom ǁkhā ǃkhaisa, ob ge ǂgaob âba ge karokaro, ǁîkhab ǁnâu tidega, ǃKhūb ge mî khami.
it-2-E 1040-1041
ǃGaridanaxasib
Jehovab ge kaise a ǃnūǃnâxa tsî khoena ra mā-am în ûi, ǁōsan anu hâ xawe. (Gen. 15:16; 2Pet. 3:9) ǀNîn ge ge māsenxa i Elob ǀkhomma ǃkhōǃoasa. (Jos. 2:8-14; 6:22, 23; 9:3-15) Xawe ǀnîn ge kaise ge ǃgari Elob tsî ǁîb khoen ǃoagu. (Deu. 2:30-33; Jos. 11:19, 20) Jehovab khoe-e ǃgaridanaxasisa xu ǁkhae tama hâ amagab ge ǁîn ǂgaoga ra ǃgari kaise a ǂansa. ǃGaridanaxa khoenab ga ǁkhara ǁaeb ais ge nēsa ǁîb ǀgaiba ra ǁgau tsî ǁîb ǀonsa ra kaikai.—Eks. 4:21; Jhn. 12:40; Rom. 9:14-18.
(Eksodus 8:18, 19) O gu ge ǃgaidī-aoga ǁkhāti ǁnās ǁkhās xase ge dī nū-aidi âgu ǀkha, ǀûitsibena gu nî ǀkhī-ūga; xawe gu ge ǁkhā tama ge i. Nētin ge ǀûitsibena khoen tawa tsî ǀgoan tawa ge hâ i. 19 ǃNubai gu ge ǃgaidī-aoga Faraob ǃoa ge mî: Nēb ge Elob di ǀkhunuba. Xaweb ge Faraoba ǂgaob âba ge karokaro, ǁîkhab ǁnâu tidega, ǃKhūb ge mî khami.
(Eksodus 9:15-17) Nēsi ta tita ti ǃomma go ǀhōǂui xuige, sats tsî sa ǁaesa ta nî ǂhīǁō-i ǀkha ǂnause, tsî ǃhūbaiba xu du nî hîkākāhese. 16 Tsî amase, ǁîs ǃaroma ta ge tita go ǂkhaiǂkhai tsi, ti ǀgaiba ta nî sa tawa ǁgauga, ti ǀons nî ǃhūbaib hoab ai ǂhôahega. 17 Ganupets ga ǁî-aitsama ǀgapiǀgapiseno, ti ǁaes ǃoagu, ǁînats doe kai tidese.
it-2-E 1181 ¶3-5
Eloxoresasib
Jehovab ge mâ mâsib hoaba ra sîsen-ū în eloxoresa khoena ǀūǃgâsib ǃnâ ǁîb ǂâisa dī. Eloban ga mâǃoa xaweb ge ǁîb ǃoaba-aona ǁîn ǂhauǃnâsib ǃaroma ra sâu tsî ra dī în ǁîb ǂhanu-aisiba ǂanǂan. (Rom. 3:3-5, 23-26; 8:35-39; Psa. 76:10) Nēs ge ǂKhoamîdi 16:4 tawa ra ǁguiǃā-e mî rase: “ǃKhūb ge xūn hoana ǁîb ǂûb ǃaroma ge dī, ā, eloxoresab ona tsēs ǂkhabab dis ǁga.”
Moseb tsî Aronni tsîkhab ge Jehovaba Faraoba ǃoa ge sî îgu ǁîba Israelǁîn ǃgāsisa xu nî orehe ǃkhaisa sī ǂgan. Elob ge nē Egipteǁî ǂgaeǂgui-aoba ge eloxoresa kai tama hâ i xawe ge mā-am bi îb ûi tsî ge dī îb Faraoba aitsama eloxoresa khoeb ase mûsen hîna ǁōsa anu hâba. Jehovab ge nēsa a dība ǃaromas ge Eksodus 9:16 tawa ra hō-e: “ǁÎs ǃaroma ta ge tita go ǂkhaiǂkhai tsi, ti ǀgaiba ta nî sa tawa ǁgauga, ti ǀons nî ǃhūbaib hoab ai ǂhôahega.”
Disi ǁgaoǁgaosigu hîna ge Egipteǁîn ǂam-ai hâ îgu ge Faraob tsî ǁîb toroǃkham-aogu tsîn hîkākā-es tawa ge ǀam tsî nēs ge Jehovab di ǀgaiba ge ǁgau. (Eks. 7:14–12:30; Psa. 78:43-51; 136:15) Kuriga ǃkharu hâse di ge ǁaede noxoba nēs xa gere ǃhoa tsî tsî i ge nēs ǃnâ-ū Elob ǀonsa ǃhūbaib ǂhawase gere ǂanǂan-e. (Jos. 2:10, 11; 1Sam. 4:8) Jehovab ga Faraoba ǀnai ǃgam hâ o, o i ge ǁîb ǀgaiba ga ǁgausen tama hâ tsî ǁîb khoena sâus tsîna ga ī tama hâ.
Gagasi xūna ǀō-aisase ôaǃnâs
(Eksodus 8:21) Ti ǁaesats ga doe kai tama io, mû, o ta ge tita habagusa ǀanina nîra sî sa ai tsî sa ǃgāgu ai tsî sa ǁaes ai, tsî sa omgu ǃnâ, o gu ge Egipteǁîn di omga nē habagus ǀkha nîra ǀoa, tsî ǁnā ǃhūb ǁîb ain hâb ona.
it-1-E 878
ǀÛitsiben
ǁApoǁapo i ge a ǀkhai hîna hakaǁî ǁgaoǁgaosib Egipteǁîn ǂam-ai ge hā xoxon di ǀonsa ra ǁguiǃā-e, nēsa xun ge Gosenǃhūb ǃnâ ge hâ i Israelǁîna ge sâu-e. (Eks. 8:21, 22, 24, 29, 31; Psa. 78:45; 105:31) ʽA·rovʹ di hâ xoxos ge ǃkharagaǃnâgu ǀûitsiben ǀondi ǃnâ ra ǂgai-e.
ǀÛitsiben di hâ mîs ge ǀawaǃaogowab ǃnâ ǃkharagaǃnâgu ǀgīnade ǃkhōǂgā hâ. Tare ǀgīnadi ge xamanin tsî khoen tsîn di ǀaoba ra ā. ǀGīnan ge ǂunin ase xamanin tsî khoen tsîn di sorodi ǃnâ ra hâ. ǁNās ǀkhan ge ǀûitsibena Egipteǁîn tsî ǁîn xamanin ǂam-ai kai ǃgomsiba ge hā-ū tsî ǀnî ǁaegu ai ǁōba ge ǃaroma.
(Eksodus 8:25-27) ǃNubaib ge Faraoba Moseb tsî Aronni tsîkha ǂgai tsî ge mî: ǃGû, îts sadu Eloba nē ǃhūb ǃnâ ǁguiba! 26 Ob ge Moseba ge mî: ǁÎs ge anu tama hâ ǁnāti i nî dīhe ǃkhaisa. ǀNîsi da ga Egipteǁîn di ǁgaidība ǃKhūb sida Eloba ǁguiba xui-ao; mû, Egipteǁîn di ǁgaidība da ga ǁîn di mûdi aiǃâ ǁguibao, ǀuiǁhomn kha tide sida? 27 Îts ǃnona tsēdi daob kōse ǃgaroǃhūb ǃnâ ǂgâ kai da, î da ǃKhūb sida Eloba ǁguiba, ǁîb nî mîmā da khami.
w04-E 3/15 25 ¶9
Mâǂoa ra ǂâidi Eksodus ǂkhanisa xu
8:26, 27—Moseba tae-i ǃaroma ge mî Israeli ǁguibadi “Egipteǁîn tawa a ǁgai” di? Egipteǁîn ge ǂgui ǃkharagagu xamanina gere ǃgôaǃgâ. ǁGuibadi xa i ge ǃhoahe o, os ge nēsa Moseba ge ǁgari îb Israelǁîna Jehovaba sī ǁguibasa mā-amhesa ǂkhâǃnâ.
Elobmîs khomai ǃâs
(Eksodus 8:1-19) ǁNās khaoǃgâb ge ǃKhūba Moseb ǃoa ge mî: Faraob tawa ǂgâ îts ǁîb ǃoa mî: Nētib ra ǃKhūba mî: Ti ǁaesa doe kai, îs tita ǃoaba! 2 Tsî ǁîna doe kaisats ga ǂkhāo, o ta ge tita sa ǃhūb ǀkharib hoaba ǁgūtsiǁgūben ǀkha nîra ǂnau. 3 Ob ge Nylǃāba ǁgūtsiǁgūben xa nîra ǀoa; ǁîn ge ǃapa tsî sa ommi ǃnâ nîra sī, tsî sa ǁomǃnâ-oms ǃnâ, sa kharob ai; ǁkhāti sa ǃgāgu di omdi ǃnâ, tsî sa ǁaes ai tsî sa ǁganomdi ǃnâ tsî sa ǀhomamǃoregu ǃnâ. 4 Tsîn ge ǁgūtsiǁgūbena nîra hā sa ai tsî sa ǁaes ai tsî sa ǃgāgu hoagu ai. 5ǃAruǀîb ge ǃKhūba Moseb ǃoa ge mî: Aronna mîba: ǃOmmi âtsa ǀhōǂui ǀkharus âts ǀkha ǃāgu kaigu ǂama tsî ǃāgu ǂama tsî ǀaudi ǂama, îts ǁgūtsiǁgūbena Egipteǃhūba hāǂam kai. 6 Ob ge Aronna ǃommi âba ge ǀhōǂui Egipteb di ǁgamgu ǂama; on ge ǁgūtsiǁgūbena hā ǃapa tsî Egipteǃhūba ge ǃgū-ai. 7 ǃNubai gu ge ǃgaidī-aoga ǁnās ǁkhās xase ge dī ǁîgu di nū-aidi ǀkha; o gu ge ǁgūtsiǁgūbena Egipteǃhūb ǂama ge hā kai. 8 Ob ge Faraoba Moseb tsî Aronni tsîkha ǂgai tsî ge mî: ǀAexase ǀgore kho re ǃKhūb ǃoa, îb ǁîba nē ǁgūtsiǁgūbena tita tsî ti ǁaesa xu ūbē; o ta ge ǁaesa nî doe kai, îs ǃKhūba ǁguiba. 9 Xaweb ge Moseba Faraob ǃoa ge mî: Îts satsa tita ǂamai ǃgôasiba ūhâ! Mâ ǁaeb ai ta tita sats tsî sa ǃgāgu tsî sa ǁaes tsîdo nî ǀgoreba, nē ǁgūtsiǁgūben nî satsa xu tsî sadu omga xu ūbēhega, Nylǃāb ǀguib ǃnân nî ǃgaus kōse? 10 Ob ge ǁîba: ǁAri, ti ge mî. Ob ge ǁîba: As ī sa mîsa ǃoa, ǂants nîga ǀnîb xareb ǃKhūb sida Elob khami ī tama ǃkhaisa, ti ge mî. 11 Nētin ge ǁgūtsiǁgūbena satsa xu tsî sadu omde xu tsî sa ǃgāga xu tsî sa ǁaesa xu nîra ǂgō; on ge Nylǃāb ǀguib ǃnâ nîra ǃgau. 12 ǃNubai kha ge Moseb tsî Aronni tsîkha Faraoba xu ge ǂoa; ob ge Moseba ǃKhūb ǃoa ge ǂgai, ǁnā ǁgūtsiǁgūben Faraob ǂamab ge hā kain ǃaroma. 13 Ob ge ǃKhūba Moseb di mîs ǃoa ge dī; on ge ǁgūtsiǁgūbena ge ǁō omgu ǃnâ, tsî ai-omgu ǃnâ tsî ǃhanagu ai. 14 On ge ǁîna ge ǀhaoǀhao ǃâdi ǃnâ ob ge ǃhūba ge ǀō. 15 Tsî Faraob ge mûo, ǁkhawab ǀom ǁkhā ǃkhaisa, ob ge ǂgaob âba ge karokaro, ǁîkhab ǁnâu tidega, ǃKhūb ge mî khami. ǃNonaǁî tsûtsû-ais: ǀÛitsiben. 16 ǃAruǀîb ge ǃKhūba Moseb ǃoa ge mî: Aronna mîba: Sa ǀkharusa ǀhōǂui îts ǃhūb di tsaraba ǂnau, îb ǀûitsibe kai Egipteǃhūb hoaragab ǃnâ. 17 O kha ge ǁnāti ge dī: Aronni ge ǃommi âba ǀhōǂuio ǀkharus âb ǀkha tsî ǃhūb di tsaraba ǂnauo, on ge ǀûitsibena ge ǂgui khoen tawa tsî ǀgoan tawa; tsarab ǃhūb dib hoab ge ge ǀûitsibe kai Egipteǃhūb hoaragab ǃnâ. 18 O gu ge ǃgaidī-aoga ǁkhāti ǁnās ǁkhās xase ge dī nū-aidi âgu ǀkha, ǀûitsibena gu nî ǀkhī-ūga; xawe gu ge ǁkhā tama ge i. Nētin ge ǀûitsibena khoen tawa tsî ǀgoan tawa ge hâ i. 19 ǃNubai gu ge ǃgaidī-aoga Faraob ǃoa ge mî: Nēb ge Elob di ǀkhunuba. Xaweb ge Faraoba ǂgaob âba ge karokaro, ǁîkhab ǁnâu tidega, ǃKhūb ge mî khami.
Julib 20-26
ELOBMÎSA XU HÂ ǂÛǂÛSA MÎDI | EKSODUS 10-11
“Moseb tsî Aronni tsîkha ge ǁkhoaǂgaosiba ra ǁgau”
(Eksodus 10:3-6) Nēti kha ge Moseb tsî Aronni tsîkha Faraob tawa ǂgâ tsî ǁîb ǃoa ge mî: Nētib ra ǃKhūb, Hebreǁîn di Eloba mî: Matikōsets kha ra ǂkhā ti ais aiǃâ ǃgamǃgamsensa? Ti ǁaesa doe kai, îs tita ǃoaba! 4 Ti ǁaesa doe kaisats ga ǂkhāo, mû, o ta ge tita ǁari ǂhomna nîra ūhā sa ǃhūb ǀkharib ǃnâ. 5 On ge ǁîna ǃhūb di aisa nîra ǃgū-ai, ǃhūb nî mûhe ǁoas kōse; on ge ǃgau go xūna nî hapu, ǃnareb xa du ǃgaubahe tsî ǁnākhaobahe hâna; on ge ǁkhāti hain hoana nîra hapu, ǃaub ai du ra ūǀkhībahena. 6 On ge sadu omga nîra ǀoaǀoa, tsî sa ǃgāgu di omgu hoaga, tsî Egipteǁîn hoan di omga: ǁÎn ge sadu îgu tsî sadu îgu di îgu tātsē mû tama hâ ge ina, ǁnā tsēs, ǁîs ai gu ge ǃhūbaib ai hâsa xu nētsēs kōse. Tsîb ge unusen tsî Faraoba xu ge ǂoa.
w09-E 7/15 20 ¶6
Jesuba ǁgae tsî ǁkhoaǂgaosib ǀkha aoǁnâ re
6 Moseb ge ǁgau ǁkhoaǂgaosib xa ǂâi re Faraob ǀkhab ge ǃhoa o, ǁîb ge elob ase gere mûhe, sores elob Rab ôab ase. ǀNîsib ge ǁîb tsîna nau Faraogu khami ǁîb ai-īsiga gere ǃoaba. Faraob ge ǂhanuga ge ūhâ i tsî ǂhâbab ra ǁaeb hoab ai nē ǂhanuga gere dawa. ǃGaridanaxa Faraob ge nau khoen xa tae-eb nî dīsa mîbahesa ge ǁnaetī tama hâ i. Moseb hîna a ǃgamǃgamsenxab ge nē khoeb ǀkha sī gere ǃhoa ǁkhoreǁare-e tamab ge hâ i xawe. Moseba tae-e ge aimûǀgaru? ǁGaoǁgaosiga. Tsî tae-eb gere ǂgaoǀkhā? ǁÎb ge gere ǂgao în Faraob ǃgān ǂguina ǃnorakaihe. Moseba ǁkhoaǂgaosiba ge ǂhâ hâ i? Îo.—Num. 12:3; Heb. 11:27.
(Eksodus 10:24-26) ǃNubaib ge Faraoba Moseba ǂgai tsî ge mî: ǃGû î du ǃKhūba ǃoaba, sadu di gūn tsî sadu di goman ǀguin ge nî ǃgorohe; ǁkhātin ge sadu di ôarona nî ǃgû sadu ǀkha. 25 Ob ge Moseba ge mî: Ots ge satsa ǁkhāti ǂāǁguibadi tsî khauǁguibadi tsîde sida ǃomǁae nî mā, ǃKhūb sida Eloba da nî ǁguibade. 26 ǁKhātin ge sida ǀgoana sida ǀkha nî ǃgû tsî ǀgui ǃū-i xare-i ge ǃgorohe tide, ǁîn xa da nî ū xui-ao ǃKhūb sida Eloba da nî ǃoabaga; sida a ǀū xui-ao, mâ xū-i ǀkha da ǃKhūb sida Eloba nîra ǃoaba ǃkhaisa, ǁnāpa da nî sīs kōse.
(Eksodus 10:28) Tsîb ge Faraoba ǁîb ǃoa ge mî: ǃGû tita xu! ǂAnbasen îts ǃaruǀî ti aisa tā ǁkhawa mû; ti aisats ga ǁkhawa mû tsēs hoas aits nîra ǁō xuige!
(Eksodus 11:4-8) ǃAruǀîb ge Moseba ge mî: Nētib ge ǃKhūba ge mî: Tsuxuǃgâb di ǁaeb ai ta ge tita Egipteba nîra ǃgûǃnâǃganu; 5 o gu ge ǂguroǃnaesabegu Egipteb ǃnâ hâgu hoaga nîra ǁō, Faraob di ǂguroǃnaesabeb, trons âb ai ga ǂnû hâba xu ǃgās, ǁkhamis tawa ra hâs di ǂguroǃnaesabeb kōse, tsî mâ ǂguroǃnaesabegu ǀgoan digu hoagu tsîna. 6 Os ge kai ǃausa nîra hâ Egipteǃhūb hoab ǃnâ, ǁîs khami īs tātsē hâ tama ge hâ i tsî ǁkhāti ǃaruǀî ǁnāti īse hâ tidesa. 7 Xawe Israeli tawa i ge ari-i xare-e ǁî-i namsa gongon tide, khoena xu goman kōse; ǂan du nîga, ǃKhūb Egipteǁîn tsî Israelǁîn tsîn ǁaegu ǀgora-e ra dī ǃkhaisa. 8 ǁNāǃnubai gu ge nē sa ǃgāgu hoaga ti tawa ǁgôaxa tsî nîra ǃhonǁgoa ti aiǃâ, mî raǃâ: Doeǂoa du re sats tsî ǁnā ǁaes satsa ra saos tsîdu hoado; tsî ǁnās khaoǃgâ ta nî ǂoa. Tsîb ge Faraoba xu ǀgaisa ǁaib ǃnâ ge ǂoa.
it-2-E 436 ¶4
Moseb
ǁKhoaǂgaosib tsî ǂgoms hîna a ǂhâbasas Faraob aiǃâ sīs ǃaroma. Jehovab ǀgaib tsî ǃanu gagab tsîn ǃnâ-ū ǀgui kha ge Moseb tsî Aron hâkha māhe kha ge mîmâisa ge dīǀoaǀoa hō. Faraob ommi xa ǂâi re, tsâǀkhāhe ǁoa ǂgaeǂgui-aob ǁnā ǁaeb diba. ǀGapiǂâixa Faraob hîna aitsama a elob ge, ǁîb ǀapemā-aogu, toroǃkham-aogu tsî ǃgāgu tsîn ǀkha hâ. ǂGomdi ǂgaeǂgui-aogu tsî ǃgaidī-aogu tsîn ge Moseb mâǃoa-aon ǁaegu ge hâ i. Nē aogu ge Faraoba xu ra saose ge ǀgaisa i ǁnā ǃhūb ǃnâ. Nē xūn hoan ge Faraoba i Egipteǁî elogu ǃoa-ai nî hui amaga ge hâ i. Moseb tsî Aronni tsîkha ge Faraob aiǃâ ǀgui ǃnās ǀguisa ge sī tama hâ i xawe ǂgui ǃnāde tsî Faraob ǂgaob ge hoaǁae ǃgaris ǀguisa gere hî, ǁîb ǃgôaǃgâsa Hebreǁî ǃgāgab ge ǁîb ǂgaeǂguis ǃnāga gere ūhâ ǂgao amaga. ǁKhaisaǁî ǁgaoǁgaosiba kha ge ǂhôas khaoǃgâ kha ge Moseb tsî Aronni tsîkha Faraob aisa xu ge aoǂuihe tsî khoeseǁî ǁgaoǁgaosib khaoǃgâ kha ge ge mîmā-e i kha Faraob aiǃâ sīsa tā ǁkhawa dītsâ.—Eks. 10:11, 28.
Gagasi xūna ǀō-aisase ôaǃnâs
(Eksodus 10:1, 2) ǁNās khaoǃgâb ge ǃKhūba Moseb ǃoa ge mî: ǂGâ Faraob tawa, tita ge ǂgaob âba go karokaro, tsî ǃgāgu âb di ǂgaogu ona, nē saode ta nî ǁîn ǁaegu ǂnûiga, 2 tsî sadu nî sadu ôan tsî sadu ôan di ôan di ǂgaedi aiǃâ ǃhoabase, Egipteb ǃnâ ta ge dī xū-e, tsî ti saodi, ǁîn ǁaegu ta ge ǂnûide, ǂan du nîse tita a ǃKhū ǃkhaisa.
w95-E 9/1 11 ¶11
ǀHûǀguitimî-aon ǂhumi Elob ǃoa-ai
11 Israelǁîn noxoba Egipteb ǃnâ hâ hînab ge Jehovaba Moseba Faraoba ǃoa ge sî tsî ge mî: “ǂGâ Faraob tawa, tita ge ǂgaob âba go karokaro, tsî ǃgāgu âb di ǂgaogu ona, nē saode ta nî ǁîn ǁaegu ǂnûiga, tsî sadu nî sadu ôan tsî sadu ôan di ôan di ǂgaedi aiǃâ ǃhoabase, Egipteb ǃnâ ta ge dī xū-e, tsî ti saodi, ǁîn ǁaegu ta ge ǂnûide, ǂan du nîse tita a ǃKhū ǃkhaisa.” (Eks. 10:1, 2) ǁNâuǀnamxa Israelǁîn ge ǁîn ǀgôana Jehovab dīgu xa nî mîba. Tsîn ge ǁîn ǀgôan tsîna ǁîn ra hō ǀgôana nēs xa nî mîba, ǁnās ǀkha i ge nēsa suriba xu surib ǀkha gere dī-e. Tsî i ge Jehovab dīga hoa khoen xa nî ǂâihō-es ge. Nētsēs tsînan ge ǁgûna ǁîn ǀgôana Jehovab xa ǁkhāǁkhās di ǃereamsa ūhâ.—Deu. 6:4-7; ǂKhm. 22:6.
(Eksodus 11:7) Xawe Israeli tawa i ge ari-i xare-e ǁî-i namsa gongon tide, khoena xu goman kōse; ǂan du nîga, ǃKhūb Egipteǁîn tsî Israelǁîn tsîn ǁaegu ǀgora-e ra dī ǃkhaisa.
it-1-E 783 ¶5
Eksodus
Jehovab ge kai ǀgaiba ra ǁgause ǁîb ǀonsa ǀgapiǀgapi tsî Israelǁîna ge sâu. Moseb ge Israelǁîna ǂĀxahuriba xu ǁnaetsanade ra ǁnaese ge ǂgaeǂguiǂûi, ǁîb ǃgâsas Miriams ge tambourina ǁîs ǃomra ǃnâ ūhâse hoa kaikhoede gere daoǁgau, ǁîdi tsîna tambouringa ūhâse ra ǂnāse. (Eks. 15:1, 20, 21) Israelǁîna ǁîn khākhoena xu ǀgorahes ge ge tsâǀkhā-e. Egipteba xun ge ǂoa o, on ge ǃgomsiba hōǃâsa ge mā-amhe tama hâ i ǁîn khākhoen ǃomǁae. (Eks. 11:7) Eksodus ǃnâ i ge Faraob ge ǂĀxahurib ǃnâ ǁîb toroǃkham aogu ǀkha a hîkākā-e ǃkhaisa mîhe tama hâ xawe i ge Psalmdi 136:15 tawa ra mî Jehovab ge “Faraoba toroǂnubis âb ǀkha ǂĀxahurib ǃnâ ge ǂhāǂgā.”
Elobmîs khomai ǃâs
(Eksodus 10:1-15) ǁNās khaoǃgâb ge ǃKhūba Moseb ǃoa ge mî: ǂGâ Faraob tawa, tita ge ǂgaob âba go karokaro, tsî ǃgāgu âb di ǂgaogu ona, nē saode ta nî ǁîn ǁaegu ǂnûiga, 2 tsî sadu nî sadu ôan tsî sadu ôan di ôan di ǂgaedi aiǃâ ǃhoabase, Egipteb ǃnâ ta ge dī xū-e, tsî ti saodi, ǁîn ǁaegu ta ge ǂnûide, ǂan du nîse tita a ǃKhū ǃkhaisa. 3 Nēti kha ge Moseb tsî Aronni tsîkha Faraob tawa ǂgâ tsî ǁîb ǃoa ge mî: Nētib ra ǃKhūb, Hebreǁîn di Eloba mî: Matikōsets kha ra ǂkhā ti ais aiǃâ ǃgamǃgamsensa? Ti ǁaesa doe kai, îs tita ǃoaba! 4 Ti ǁaesa doe kaisats ga ǂkhāo, mû, o ta ge tita ǁari ǂhomna nîra ūhā sa ǃhūb ǀkharib ǃnâ. 5 On ge ǁîna ǃhūb di aisa nîra ǃgū-ai, ǃhūb nî mûhe ǁoas kōse; on ge ǃgau go xūna nî hapu, ǃnareb xa du ǃgaubahe tsî ǁnākhaobahe hâna; on ge ǁkhāti hain hoana nîra hapu, ǃaub ai du ra ūǀkhībahena. 6 On ge sadu omga nîra ǀoaǀoa, tsî sa ǃgāgu di omgu hoaga, tsî Egipteǁîn hoan di omga: ǁÎn ge sadu îgu tsî sadu îgu di îgu tātsē mû tama hâ ge ina, ǁnā tsēs, ǁîs ai gu ge ǃhūbaib ai hâsa xu nētsēs kōse. Tsîb ge unusen tsî Faraoba xu ge ǂoa. 7 O gu ge ǃgāgu Faraob diga ǁîb ǃoa ge mî: Mâ ǁaeb kōseb kha nēba ǁnoase nî ība da? A ge khoega doe kai î gu ǃKhūb, ǁîgu di Eloba ǃoaba! Ganupets xare ǂan tama hâ, Egipteb hîǀhuruhe hâsa? 8 ǃNubai kha ge Moseb tsî Aronni tsîkha ǁkhawa Faraob ǃoa ge ūhāhe, tsîb ge ǁîkha ǃoa ge mî: ǃGû î du ǃKhūb, sadu Eloba ǃoaba! Tarina ǁnān ǃgû nîna? 9 Ob ge Moseba ge mî: Sida ge nî ǃgû sida ǂkhamn tsî sida kaikhoen tsîn ǀkha, sida ôagu tsî sida ôadi ǀkha; sida gūn tsî sida goman tsîn ǀkha da nî ǃgû, kai tsē-i ǃKhūb di-e da nî ūhâ xui-ao. 10 ǃNubaib ge ǁîkha ǃoa ge mî: ǃKhūb ab sadu ǀkha ǁnāti hâ, sadu tsî sadu ǂkham ǀgôarona ta nî doe kais ǁkhās axase; mûbasen, sadu ais aiǃâb ǂkhababa hâ xuige! 11 Ī tide ǃkhais, sa aogo ǁnâi ǃgû î go ǃKhūba sī ǃoaba; nēs ge ǂgan go hâsa! Tsî kha ge Faraob di aisa xu ge doeǁgaǂuihe. 12 ǃNubaib ge ǃKhūba Moseb ǃoa ge mî: ǃOmmi âtsa ǀhōǂui Egipteǃhūb ǂama ǂhoms ǃaroma, în Egipteǃhūb ǂama hā, în ǃhūb di ǁhaona ǃû, ǃnareb xa ge ǃgauhe hâ in hoana. 13 Ob ge Moseba ǀkharus âba Egipteǃhūb ǂama ge ǀhōǂui, ob ge ǃKhūba aiǂoas di ǂoaba ǁnā ǃhūb ǃnâ ge hā kai, ǁnā tsēs hoasa tsî ǁnā tsuxub hoaba; o i ge ǃnauǁgoaga ge i, aiǂoas di ǂoab ra ǂhomna ūhā ǃkhaisa. 14 On ge ǂhomna Egipteǃhūb hoab ǂama hā tsî ge ǁgoe, Egipteǁîn di ǀkharigu hoagu ai, kaise ǂguise; nēti ī ǂhomn, ǁîn khami īn ge tātsē hâ tama ge hâ i, tsîn ge nēs khaoǃgâ ǁnāti īse hā tide. 15 ǃHūb hoab di aisan ge ge ǃgū-ai, ǃhūb ge ǃkhaes kōse; on ge ǃhūb di ǁhaon hoana ge ǂûtoa, tsî haidi di ǂûn, ǃnareb xa ge ǃgauhe hâ ina; o i ge ǃam xū-i xare-e ǃgau tama ge i haidi ai tsî ǃaub di ǁhaon on ai Egipteǃhūb hoaragab ǃnâ.
Julib 27–AUGUSTUB 2
ELOBMÎSA XU HÂ ǂÛǂÛSA MÎDI | EKSODUS 12
“Pasxab ge Xristeǁîn amsi a ǂhâǂhâsa”
(Eksodus 12:5-7) Tsî du ge ūo ǁkhaoba nî ū, aoreb, ǀgui kurib â-ib, gūn xas kas, pirin xas kas hoasats ge ǁîba nî ū. 6 Tsî du ge ǁîba nî sâu, disihakaǀaǁî tsēs nē ǁkhâb dis kōse, tsî mâ ǀhûs Israeli ǀhaohâb dis hoas ge ǁîba nî ǂā, ǁnā ǀgam ǃoera ǁaegu. 7 On ge ǀaob xa ū tsî ǁîba dao-ams di ǃnamamhaikha tawa tsî ǀgapise hâb tawa nî ǂkhau, ǁnā omgu, ǁîgu ǃnân nî ǂû bigu tawa.
w07-E 1/1 20 ¶4
“ǂKhîb xa du ge nî ǀoa-e”
4 Jesub ge 33ǁî kuri Nisan 14 ai ge ǁō. Israeli ǃnâ i ge Nisan 14 ai Pasxaba gere tsēdī-e. Mâ kurib hoaban ge omarina ǁnā tsēs ai ǂnao-o ǁkhaoba gere ǂûǀhao. ǁNās ǀkhan ge gere mûǂan ǁkhaob di ǀaob ge ǂhâǂhâsa isa, Israelǁaes di ǂguroǃnaesabega sâusa ǁōba xu, Egipteǁîn ǂguroǃnaesaben ge ǃgamhe o Jehovab ǀhomǃgāb xa Nisan 14, 1513ǁî kurib ǃnâ. (Eks. 12:1-14) Pasxaǁkhaob ge Jesuba gere ǂnûǁkhaeba, Paulub ge nēs xa ge mî: “Pasxaǁkhaob on ge sada ǂābahe xuige, ǁnāb ge a Xristu.” (1Kor. 5:7) Pasxaǁkhaob ǀaob khami i ge Jesub ǀaoba ǂgui khoen orehes ǃaroma hâ.—Jhn. 3:16, 36.
(Eksodus 12:12, 13) Tita ge nē tsuxub ǃnâ Egipteǃhūba nîra ǃgûǃnâǃganu tsî Egipteǃhūb ǃnâ hâ ǂguroǃnaesabegu hoaga nîra ǂnau, khoena xu ǀgoan kōse; tsî ta ge tita ǀgoraǃgâsa nîra hî, hoa elogu Egipteǁîn digu tawa, tita hîa ǃKhūta. 13 Tsî ǁnā ǀaob ge sado saose nî ība, ǁnā omgu hîa du nî hâǃnâgu tawa, ǁnā ǀaoba ta ga tita mûo, o ta sado nîra ǃgû-īǀkhā xui-ao, tsî i ge ǁnora-ai-i xare-e sadu ǃnâ hâ tide ǁgaoǁgaosib ǃoa, Egipteǃhūba ta nîra ǂnau ǃnubai.
it-2-E 583 ¶6
Pasxab
Pasxab tsēs ǀnî xūn ge Jesub xa ge dīǀoaǀoahe. ǁNān di ǀguis ge Egipteǃhūb ǃnâ ge hâ i omdi ai hâ ǀaob ge ǂguroǃnaesabena ge ǁkhauba Jehovab ǀhomǃgāba xu. Paulub ge ǂkhauhesa Xristeǁîna ǂguroǃnaesaben ǀhaohâb tawa di gere mî (Heb. 12:23) tsî Xristuba ǁîn di sâu-aob ase ǁîb di ǀaob ǃnâ-ū. (1Tes. 1:10; Efe. 1:7) Pasxaǁkhaob ǃnâ i ge ǂkhō-i xare-e khôahe tide. Kēbo-e i ge ge Jesub ǂkhōn khôahe tidesa tsîs ge ǁnāsa ǁîb ǁōb ai ge dīǀoaǀoa-e. (Psa. 34:20; Jhn. 19:36) Pasxab Jodeǁîn ge kuriga gere tsēdīb ǃnâ-ūb ge ǂhanuba ǃgoaxa xūn di somma ra mā tsî Jesuba ǃoa gere ǁnaeǁgau ‘Elob di ǁKhaoba.’—Heb. 10:1; Jhn. 1:29.
(Eksodus 12:24-27) ǁNā-amaga nē ǃkhaisa ǃkhōǀgaipe sadu tsî sadu di ôan tsîdo, ǂnûiǂgābahe du hâ xū-i ase ǀamosib kōse. 25 Tsî i ge nîra ī, ǁnā ǃhūb ǃKhūb nîra mā dub ǃnâ du ga sīo, ǁîb ge mî khami, o du ge nē ǃoabasa nîra ǃkhōǀgaipe. 26 Tsî i ge nîra ī, sadu di ôan ga sadu ǃoa mîo: Mâ ǃoaba-e du nēpa ūhâ? 27 O du ge nî mî: Pasxaǁguibas ǃKhūb dis ge nēsa, Egipteb ǃnâ Israeli omga ge ǃgû-īǀkhāba, Egipteǁînab ge gere ǂnau tsî sida omgab ge ǃnoraǃnora ǃnubai. ǃNubais ge ǁaesa ǃgamǃgâ tsî ge ǃhonǁgoa.
w13-E 12/15 20 ¶13-14
‘Nēs ge a ǂâiǂâisen sadu ǃaroma’
13 ǀGôan gere kaikhâi khamin ge ǁgûna ǁîna Jehovab ǃoa-ai ǂhâǂhâsa xūna gere ǁkhāǁkhā. ǁNān di ǀguis ge Jehovab ǁîb di ǃoaba-aona ra ǁkhauba ǃkhaisa. ǀGôan ge gere ǁkhāǁkhāsen Jehovab ǁgôatsuiǁgoa elo tama hâ ǃkhaisa. Jehovab ge a ama Elo hîna ǁîb ǃoaba-aon ǃnâ ǃgâiǃgâibasensa ūhâba tsîb ge ǁîna ra ǁkhauba. ǁNāsab ge ge ǁgau Israelǁî ǂguroǃnaesabenab ge ǁkhauba o ‘Egipteǁînab gere ǂnau’ o. ǂGuroǃnaesabenab ge ge sâu.
14 Xristeǁî ǁgûn ge mâ kurib hoaba ǁîn ǀgôana nē Pasxab ǂâibasensa ǁguiǃāba tama hâ. Sadu tsîna sadu ǀgôana ǁkhā xū-e ra ǁkhāǁkhā Jehovab ǁîb khoena ra ǁkhauba ǃkhaisa? ǁApoǁapo i du ra sadu tsîn ra ǂgomǃgâsa Jehovab ǁîb khoena ra ǁkhauba ǃkhaisa? (Psa. 27:11; Jes. 12:2) ǁNāsa du ge ǁkhoaxa ǁgamǀhao ǀgaub ǃnâ nî dī. Nēsa dī re sa omarisa gagasise omkhâis ǃaroma.
Gagasi xūna ǀō-aisase ôaǃnâs
(Eksodus 12:12) Tita ge nē tsuxub ǃnâ Egipteǃhūba nîra ǃgûǃnâǃganu tsî Egipteǃhūb ǃnâ hâ ǂguroǃnaesabegu hoaga nîra ǂnau, khoena xu ǀgoan kōse; tsî ta ge tita ǀgoraǃgâsa nîra hî, hoa elogu Egipteǁîn digu tawa, tita hîa ǃKhūta.
it-2-E 582 ¶2
Pasxab
Disi ǁgaoǁgaosigu hîna ge Egipteǁîn ǂam-ai hâ igu ge Egipteǁî ǁgôatsuiǁgoa elogu ǀgoraǃgâsa gere ǁgau, ǃgōsase disiǁî ǁgaoǁgaosib, ǂguroǃnaesabeb ǁōb disa. (Eks. 12:12) ǁGōb ge Ra elob ǃaroma kaise ge ǂhâǂhâsa i, ǁnā-amaga Pasxaǁkhaob di ǀaoba oms aisi ǁhōsa Egipteǁîn xa ǃgôaoǃnâsib ase ga mûhe hâ. ǁGōb tsîn ge ge ǂhâǂhâsa i, ǁnās ǀkha i ge ǁgōb ǂguroǃnaesabe-e hîkākāhesa Osiris eloba kaise ga tsûaǂgao kai hâ. Faraob tsîn ge Rab ǀgôab ase gere ǀgoreǀî-e. Faraob ǂguroǃnaesabeb ǁōb ge ǁnā-amaga Rab tsî Faraob tsîkha ǂkhabusasina ga ǁgau hâ.
(Eksodus 12:14-16) Tsî nē tsēs ge sado ǂâiǂâisenxūse nîra ība, tsî du ge ǁîsa ǃKhūba kaitsēse nî tsēdība; ǁîsa du ge nî tsēdī, sadu di ǃhaodi ǃnâ, ǀamo ǂnûiǂgā-i ase. 15 Hû tsēdi kōse du ge ǀkhuruǀkhuruhe tama perega nî ǂû; ǂguro tsēs ai du ge ǀkhuruǀkhurupereba nî dībē sadu di omga xu; ǀkhuruǀkhuruhe hâ-e ga ǂguro tsēsa xu hûǁî tsēs kōse ǂû-i hoa-i, ǁnā-i di ǀoms ge nî ǃhūǃnomahe Israela xu. 16 Tsî ǂguro tsēs ai i ge ǃanu ǀhû-e nîra hâ; ǁkhāti du ge ǃanu ǀhû-e nî ūhâ hûǁî tsēs ai; sîsen-i xare-i ge ǁîs ai dīhe tide; xawe mâ ǀoms hoas xa nî ǂûhe-i, ǁî-i ǀgui-i ge sadu xa a ǁāǁāhe ǁkhā.
it-1-E 504 ¶1
ǂGaiǀhûtsēs
ǀŌ-aisa xū-i nē “ǃanu ǂgaiǀhûtsēs” di i ge nē tsēs ai i ge khoe-e tātsē ge sîsen tama hâ i. ǂGuro tsî hûǁî tsēs ǀkhuruǀkhuruhe tama peregu dis ge ‘ǃanu ǂgaiǀhûtsēs’ ase ge ǂansa i tsî Jehovab ge nēs xa ge mî: “Sîsen-i xare-i ge ǁîs ai dīhe tide; xawe mâ ǀoms hoas xa nî ǂûhe-i, ǁî-i ǀgui-i ge sadu xa a ǁāǁāhe ǁkhā.” (Eks. 12:15, 16) “ǃAnu ǂgaiǀhûtsēs” ai gu ge pristerga ǁguibade Jehovaba gere dība, nēs ge ge ǂkhāsa tama hâ i. (Lev. 23:37, 38) Nē ǁaeb ǃnân ge khoena sâs ǀguisa ge hî tama hâ i xawe gagasises tsîna gere ǀama. Mâ wekheb hoaban ge khoena sâtsēs ai gere ǀhao, ǃoaba tsî daoǁgauhes ǃaroma. Tsîn ge ǁnāpaxū khomai tsî Elobmîsa gere ǁguiǃā, sinagogegu ǃnâ i ge ega gere dī-e khami. (ǃNǃkh. 15:21) Khoen ge sâtsēs tsî “ǃanu ǂgaiǀhûtsēs” ai ge sîsen tama hâ i xawe nē tsēs ai gere ǀgore tsî Elob kurus xa gere ǂâiǃgâ.—ASSEMBLY di hâ ǃâba mû re.
Elobmîs khomai ǃâs
(Eksodus 12:1-20) Tsîb ge ǃKhūba Moseb tsî Aronni tsîkha ǃoa Egipteǃhūb ǃnâ ǃhoa tsî ge mî: 2 Nē ǁkhâb ǁkhāb ge sakho ǁkhâgu di danase nî ība; ǁîb ge ǁkhâgu kurib digu di ǂgurose nî ība du. 3ǃHoa ǀhaohâb Israeli dib hoab ǃoa î kho mî: Disiǁî tsēs nē ǁkhâb dis ai, ab mâb hoaba ǁkhaoba ūba ǁgûgu di omga, ǀgui ǁkhaoba ǀgui omma. 4 Tsî ǀgui ommi ga ǁnā ǀgui ǁkhaoba ǂkharibao, a kha ǁîb tsî ǁîb di ǀgūkhoeb ommi âb ǀgūse hâb tsîkha ǁîba ūbasen, ǀomdi di ǀgaus ī khami, mâ-i hoa-i nî ǂû ǁkhās kōse, ǁkhaob ī khami du ge nî ǃgôa. 5 Tsî du ge ūo ǁkhaoba nî ū, aoreb, ǀgui kurib â-ib, gūn xas kas, pirin xas kas hoasats ge ǁîba nî ū. 6 Tsî du ge ǁîba nî sâu, disihakaǀaǁî tsēs nē ǁkhâb dis kōse, tsî mâ ǀhûs Israeli ǀhaohâb dis hoas ge ǁîba nî ǂā, ǁnā ǀgam ǃoera ǁaegu. 7 On ge ǀaob xa ū tsî ǁîba dao-ams di ǃnamamhaikha tawa tsî ǀgapise hâb tawa nî ǂkhau, ǁnā omgu, ǁîgu ǃnân nî ǂû bigu tawa. 8 On ge ǁgansa ǁnā tsuxub ǁkhāb ǃnâ ǀaes tawa amhe hâse nîra ǂû, ǀkhuruǀkhuruhe tama peregu ǀkha; au ǁharen ǀkhan ge nî ǂû bi. 9 Orase du ge ǁîb xa ǂû tide, ǁkhāti ǁgam-i ǃnâ sâihe hâse tā ǂû bi; xawe ǀaes tawa amhe hâse, danas âba tsî tîra âba tsî ǃnāxūn âba. 10 Tsî du ge ǁkhāti xū-e ǃgau tide ǁgoas kōse; tsî ǁgoas kōse ga ǁîb xa ǃgau-i, ǁî-e du ge ǀaes ǀkha nî khauǃkhū. 11 Tsî du ge nēti nî ǂû bi: Sadu kamanagu ge ǃgaehe hâse, sadu ǁharodi ge sadu ǂaidi tawa tsî sadu ǀkharus ge sadu ǃomǁae nî hâ; tsî du ge ǁîba ǃhaese nî ǂû; ǃKhūb di Pasxab komo. 12 Tita ge nē tsuxub ǃnâ Egipteǃhūba nîra ǃgûǃnâǃganu tsî Egipteǃhūb ǃnâ hâ ǂguroǃnaesabegu hoaga nîra ǂnau, khoena xu ǀgoan kōse; tsî ta ge tita ǀgoraǃgâsa nîra hî, hoa elogu Egipteǁîn digu tawa, tita hîa ǃKhūta. 13 Tsî ǁnā ǀaob ge sado saose nî ība, ǁnā omgu hîa du nî hâǃnâgu tawa, ǁnā ǀaoba ta ga tita mûo, o ta sado nîra ǃgû-īǀkhā xui-ao, tsî i ge ǁnora-ai-i xare-e sadu ǃnâ hâ tide ǁgaoǁgaosib ǃoa, Egipteǃhūba ta nîra ǂnau ǃnubai. 14 Tsî nē tsēs ge sado ǂâiǂâisenxūse nîra ība, tsî du ge ǁîsa ǃKhūba kaitsēse nî tsēdība; ǁîsa du ge nî tsēdī, sadu di ǃhaodi ǃnâ, ǀamo ǂnûiǂgā-i ase. 15 Hû tsēdi kōse du ge ǀkhuruǀkhuruhe tama perega nî ǂû; ǂguro tsēs ai du ge ǀkhuruǀkhurupereba nî dībē sadu di omga xu; ǀkhuruǀkhuruhe hâ-e ga ǂguro tsēsa xu hûǁî tsēs kōse ǂû-i hoa-i, ǁnā-i di ǀoms ge nî ǃhūǃnomahe Israela xu. 16 Tsî ǂguro tsēs ai i ge ǃanu ǀhû-e nîra hâ; ǁkhāti du ge ǃanu ǀhû-e nî ūhâ hûǁî tsēs ai; sîsen-i xare-i ge ǁîs ai dīhe tide; xawe mâ ǀoms hoas xa nî ǂûhe-i, ǁî-i ǀgui-i ge sadu xa a ǁāǁāhe ǁkhā. 17 Î du ǁnâi ǀkhuruǀkhuruhe tama perega ǃkhōǀgaipe, ǁnā tsēs ǁkhās ai ta ge tita sadu di ǂnubide Egipteǃhūba xu nîra ǂgaeǂguiǂui xuige; ǁnā-amaga du ge nē tsēsa nî ǃkhōǀgaipe sadu di ǃhaodi ǃnâ ǀamo ǂnûiǂgā-i axase. 18 ǂGuro ǁkhâb di disihakaǀaǁî tsēs ǁkhâb dis ai du ge ǃuia ǀkhuruǀkhuruhe tama perega nî ǂû, ǁnā ǁkhâb di ǀgamdisiǀguiǀaǁî tsēs kōse ǃuia. 19 Hû tsēdi kōse a-i ǀkhuruǀkhurupere-i xare-e tā hōhe sadu omgu ǃnâ; ǀkhuruǀkhuruhe hâ-e ga ǂû-i hoa-i di ǀoms ge Israeli di ǀhûsa xu nîra ǃhūǃnomahe xuige, ǃhaokhoe-i karao, ǃhūb ǃnaesabe-i karao. 20 Sadu ge xū-i ǀkhuruǀkhuruhe hâ-e ǂû tide; sadu di ǁanǃkhaidi hoadi ǃnâ du ge ǀkhuruǀkhuruhe tama perega nî ǂû.