ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
Augustub 3-9
ELOBMÎSA XU HÂ ǂÛǂÛSA MÎDI | EKSODUS 13-14
“Mâhō, î du ǃgâiǃōb ǃKhūb dība mû”
(Eksodus 14:13, 14) Ob ge Moseba ǁaes ǃoa ge mî: Tā ǃao, î du mâhō, î du ǃgâiǃōb ǃKhūb dib nētsēb nî sadu tawa dība mû; nē Egipteǁîn nētsē du go mûn, ǁîna du ge ǁkhawa mû tide ǀamosib kōse xuige. 14 ǃKhūb ge sado nîra ǂnoaba tsî sadu ge nîra ǃnō.
w13-E 2/1 4
Moseb ge ǂgomsa ge ūhâ i
Moseb ge ge ǀū i Jehovab nî ǀapa huriba ǀgorasa Israelǁîna ǂoa kais ǃaroma. Xaweb ge ǂgomsa ge ūhâ i Jehovab xū-e nî dīsa ǁîb khoena ǁkhaubas ǃaroma. Tsîb ge Moseba nau Israelǁîn ǁîb khami nî ǂgomsa ge ǂhâba hâ i. Tsî da ge ra khomai: “Tā ǃao, î du mâhō, î du ǃgâiǃōb ǃKhūb dib nētsēb nî sadu tawa dība mû.” (Eks. 14:13) Moseba dan ib ge nau Israelǁîn di ǂgomsa ǀgaigais ǃnâ? Îo, Elobmîs ge Moseb tsî Israelǁîn xa sao ra-e ra mî: “ǂGomsa xun ge ǀApahuriba ǂnâsa ǃhūb axase ge ǃgûǃganu.” (Heb. 11:29) Moseb ǂgoms ge ǁîb ǀguiba ge hui tama hâ i xawe ǁîba xu ǁkhāǁkhāsen an hoan tsîna ge hui.
(Eksodus 14:21, 22) Tsî Moseb ge ǃommi âba hurib ǂama ǀhōǂuio, ob ge ǃKhūba huriba ge bē kai ǃgom ǂoab aiǂoas dib ǀkha ǁnā tsuxub hoaba, tsî huriba ge ǂnâ kai tsî ǁgamga ge ǀgoraǃā. 22 On ge Israeli ôana hurib ǁaegub ǃnâ ge ǂgâ ǂnâsab ai; o gu ge ǁgamga ǁîna ǂnubiǂgoagu axase ge ība ǁîn di amǀkhāb tsî ǁîn di ǁareǀkhāb ǁôab ai.
Hoaǀgaixa xawe nau khoen xa ra ǂâi
13 Khomai re Eksodus 14:19-22. Mûnanai re Faraob ǃkham-aogu tsî ǀApahurib ǁaegu du mâsa. Tsîb ge Eloba xū-e ra dī. Tsîs ge ǃâusa ǀgui ǀkhāb Egipteǁîn disa ra ǃkhaeǃkhae. Xawe i ge sadu ǀkhāba ǃnâba ūhâ. Tsîts ge ra mû Moseb ǁîb di ǃomma ra ǀhōǂui hurib ǃoa tsîs ge ǁnāpaxū ǀgaisa ǂoasa ra ǃgom tsoatsoa hîna hurib tawa daoba ra ǁkhowa-amsa. Saogu rase du ge sadu, sadu omaris tsî ǀgurun tsîna ǂnâsa ǃhūb ai ra ǃgû tsoatsoa nau khoen ǀkha ǀhao hâse. Tsîts ge ǁnā ǁaeb ai xū-e ra hōǃâ. Hurib ge kaise a ǂnâsa tsî ǁnās ǀkha ra supu kai ǃgû ǃkharusa. Kaise ǂau khoen tsîn ge nau ǀkhāba ǃoa a ǃkharu ǁkhā.
(Eksodus 14:26-28) Ob ge ǃKhūba Moseb ǃoa ge mî: ǀHōǂui ǃommi âtsa hurib ǂama; î gu ǁgamga Egipteǁîn ǂama oa, kunidi ân ǂama tsî ǃgapi-aogu ân ǂama. 27 Ob ge Moseba ǃommi âba ge ǀhōǂui hurib ǂama; ob ge huriba ǁgoas ra ǁgoa hîa ǀgaib âb ǃnâ ǁkhawa ge oa; on ge Egipteǁîna ǁîba ge ǁhâǃoa, ob ge ǃKhūba Egipteǁîna hurib ǁaegub ǃnâ ge ǂhāǂgā. 28 ǁGamgu ge oa, o gu ge kunidi tsî Faraob ǂnubis di ǃgapi-aogu tsîn, ǁîna hurib ǃnâ ge saona ge ǃgū-ai xui-ao; o i ge ǀgui-i xare-i âna ǃgau tama ge i.
w09-E 3/15 7 ¶2-3
Jehovaba du ge tā nî ǀuru
Egipteǁîn ǃgomma ra hōǃâ hînan ge Israeǀǁîna nau ǀkhāb ai ge sī. Moseb ge nēsi ǁîb di ǃomma ǀApahurib ǃoa ra ǀhōǂui. Tsî ǁnā ǁaeb aib ge Jehovaba hurib ǁgam-e ra ǁnā kai. Miliundi xa ǃnāsa ǁgammi ge Faraob tsî ǁîb ǃkham-aoga ra āǁō kai. ǀGuib tsîn ge ûi tama ge hâ i. Israelǁîn ge ge ǃnōra.—Eks. 14:26-28; Psa. 136:13-15.
Nē ǁaxasib ge ī o, os ge ǁnāpa ge ǀgūse hâ i ǁaesa ge ǃao tsoatsoa. (Eks. 15:14-16) Hakadisi kurigu khaoǃgâs, ge Raxas Jerixoǁîsa ǀgam Israelǁîkha ǃoa ge mî: “Nē ǃhūb di ǁanǂgāsaben hoan go sadu di ais aiǃâ go tsuni ǃkhaisa. Sida ge go ǁnâu xui-ao, matib ǃKhūba ǂĀxahurib di ǁgamga ge ǀari kai ǃkhaisa sadu di ais aiǃâ, Egipteba xu du ge ǃgûǂoa ǃnubai.” (Jos. 2:9, 10) ǀŪbeǁaes tsîn ge ge ǀuru tama hâ i matib ge Jehovaba ǁîb khoena a sâusa. Isrealǁaes ge ǂgui ǃaromade ge ūhâ i ǁîba ǂâihōs dide.
Gagasi xūna ǀō-aisase ôaǃnâs
(Eksodus 13:17) Tsî i ge ge ī, Faraob ge ǁaesa doe kaio, ob ge Eloba ǁîna Filisteǁîn di ǃhūba-ū gau daob ǀkha ǂgaeǂgui tama, ǁîb a ǀgū xawe: Nētib ra Eloba mî xui-ao: Îs ǁaesa tā ǃhausen ǃkhamman ga mûo, în tā Egipteb ǃoa oa.
it-1-E 1117
Kai daob
ǃKharu ge ǁaeb ǃnâ i ge kai daogu tsî ǁamaxu ai-e ra daogu tsîna kai ǃādi gaosidi di tsîna Filistes ǃnâ gere ǀhaoǀhao. (Num. 20:17-19; 21:21, 22; 22:5, 21-23; Jos. 2:22; ǂHǂh. 21:19; 1Sam. 6:9, 12; 13:17, 18; Mû re GAOSIB DAOGU di hâ ǃâba.) Egipteba xu ge Filisteǁî ǃā ra Gasas tsî Askelons hâra ǃoa gere ī daob ge Megidos kōse gere ī tsî kai daob ase ge ǂanhe i. Nē daob ge Hasors kōse gere ī tsî Galileab huriba xu gere ǃkharu, Damaskusa ǃoa ra īse. Filistiaba xu gere ī daob ge ge ǃnūbu i Egipteba xu mîmâisa ǃhūba ǃoa īs ǃaroma. Xawe Jehovab ge Israelǁîna ǀnî hâ daob ǃnâ-ū ge daoǁgau în tā Filisteǁîn xa ǁnāǂam-e.—Eks. 13:17.
(Eksodus 14:2) Israeli ôana mîba în oa, în ǁgoe Pi-Hahirots aiǃâ, Migdols tsî hurib tsîra ǁaegu, Baal-Sefons aiǃâ, ǁîs ǃoa-ai, î du ǁgoe hurib amǃgâ.
it-1-E 782 ¶2-3
Eksodus
ǀApahuriba mâpa ge ǀgora Israelǁîn nî ǃkharu hō ǁkhāse? Etams tawan ge sī o “ǃgaroǃhūb ǀams tawa” ob ge Eloba Moseba ge mîmā “în ǁgoe Pi-Hahirots aiǃâ . . . hurib amǃgâ.” Nēs ge ge ǃaroma îb Faraoba ǂgom Israelǁîn ge gere ‘ǂnâsen mâ’ di. (Eks. 13:20; 14:1-3) Khoen hîna ge el Haj daoba gere sîsen-ūn ge nēsa “ǂgōs” ase ǀgui ge mû tama hâ i xawe “oaǀkhīs” ase gere mûhe. Suez ǃāb ǃnâ hâ soab tawan ge sī o, on ge Israelǁîna ǁîn ǃgû ǀgauba gere dawa tsî Jebel ʽAtaqah ǃāb ǀkhāba ǃoa gere ī. Israelǁaes khami kai ǁaes ge ǀawas ǀkhāba xun ga ǁnāǂamhe o, o ǂoa ǃkhai-e ge ūhâ tama hâ i, hurib ge ǁîn daob ǃnâ hâ i amaga.
Jodeǁîn ǁnaetīgu ge nēsa ra ǁgau. (Pi-Hahirotsa mû re.) Nēs ge ǂhâǂhâsase Elobmîs ǃnâ ra ǁgau-e xawe ǂanǂansa ǁkhāǁkhā-aon ge nēsa ǁgau tama hâ. (Eks. 14:9-16) Nēs ge ra ǁgau huriba ǃâus ge kaise ǃgū isa hurib ǃnâ hâ soaba xu ǁnās ǀkha i ge Faraob ǃkham-aona Israelǁîna ge ǁnāǂam hō tama hâ i.—Eks. 14:22, 23.
Elobmîs khomai ǃâs
(Eksodus 13:1-20) ǃNubaib ge ǃKhūba Moseb ǁga ǃhoa tsî ge mî: 2 Hoa ǂguroǃnaesabega tita khaiba; Israeli ôan ǃnâ ǁgûs ǁhāsa ra ǁkhowa-ammi hoab, khoen xas kas, ǀgoan xas kas hoasa, ǁîb ge a ti. 3 ǃAruǀîb ge Moseba ǁaes ǃoa ge mî: ǂÂi du re ǁnā tsēs, ǁîs ai du ge Egipteb ǃgāsis di omma xu ǃgûǂoas xa; ǃKhūb ge sado ǀgaisa ǃommi ǀkha ǁnāpa xu ǂgaeǂguiǂui xuige, ǁnā-amaga i ge ǀkhuruǀkhuruhe hâ-e ǂûhe tide. 4 Nētsē du ge ra ǃgûǂoa Abib ǁkhâb ai. 5 Tsî i ge nîra ī, ǃKhūb ga satsa ǁnā ǃhūb Kanaanǁîn, Hetiǁîn, Amorǁîn, Hiviǁîn tsî Jebusǁîn dib ǃnâ ūǂgâo, ǁnā ǃhūb sa îgab ge nūbaba, ǁîgab nî ǁîba māse, ǁnā ǃhūb, daib tsî danib tsîkha ra dâuǃnâba, ots ge nē ǃoabasa nē ǁkhâb ǃnâ nî dī. 6 Hû tsēdi kōsets ge ǀkhuruǀkhuruhe tama perega nî ǂû, tsî hûǁî tsēs aits ge ǃKhūba kaitsē-e nî tsēdība. 7 Hû tsēdi kōse gu ge ǀkhuruǀkhuruhe tama perega nî ǂûhe, tsî ǀkhuruǀkhuruhe hâ-i ge sa tawa mûhe tide, ā ǀkhurupere-i xare-i ge sa tawa mûhe tide sa ǃhūǀkharigu hoagu ǃnâ. 8 Tsîts ge sa ôaba nî ǂanǂan ǁnā tsēs ǁkhās ai, mî rase: Nēs ra ī, ǃKhūb ge tita Egipteba xu ta ge doeǂoa ǃnubai dī-ū ǃkhais ǃaroma. 9 Tsîs ge ǁîsa saose nî ība tsi sa ǃommi ai tsî ǂâiǂâisenxūse sa mûra ǁaegu, ǂhanub ǃKhūb dib nî sa oms ǃnâ hâga, ǃKhūb ge satsa ǀgaisa ǃommi ǀkha Egipteba xu ǂgaeǂguiǂui amaga. 10 ǁNā-amaga nē ǂnûiǂgāsa ǃkhōǀgaipe, mîmâisa ǁaeb ai, kurikorobe. 11 Tsî i ge ǁkhāti nîra ī, ǃKhūb ga satsa Kanaanǁîn di ǃhūb ǃnâ ūǂgâ, sa îgab ge nūba khami, tsîb ga ǁîba satsa māo, 12 ots ge ǃKhūba nî khaiba ǁhāsa ra ǁkhowa-am-i hoa-e; ǁkhāti mâ ǂguroǃnaesabe-i ǀgoan di-i ūts nî hâ-i hoa-e; aoregu ge ǃKhūb dise nî i. 13 Xawe esels di ǃnaesabe-i hoa-ets ge ǁkhao-i ǀkha nîra ore; ǁî-ets ga ore tama io, ǁnâi ǃaoba khôa i; xawe khoe-i di ǂguroǃnaesabegu sa ôagu digu hoagats nî ore. 14 Tsî ī i kao, sa ôab ga ǁari dî tsi tsî: Tare-e nē-e? ti mîo, ots ge ǁîb ǃoa: ǃKhūb ge ǀgaisa ǃommi ǀkha Egipteba xu, khobosis omma xu ge ǂgaeǂguiǂui da, ti nî mî. 15 Ī i kom geo, Faraob ge karokarosen tsî doe kai dasa ǂkhāo, ob ge ǃKhūba ǂguroǃnaesabegu Egipteǃhūb ǃnâ hâgu hoaga ge ǃgam, khoeb di ǂguroǃnaesabeba xu ǀgoan di ǂguroǃnaesabeb kōse: ǁNā-amaga ta ge mâ aore-i, ǁhāsa ra ǁkhowa-am-i hoa-e ǃKhūba ra ǁguiba; xawe ǂguroǃnaesabeb ti ôan dib hoaba ta ra ore. 16 Tsîs ge ǁîsa sa ǃommi ai hâ saose nî ī tsî sa mûra ǁaegu hâ ǂâiǂâiǃnâxūse: ǃKhūb ge sada ǀgaisa ǃommi ǀkha Egipteba xu ǂgaeǂguiǂui amaga. 17 Tsî i ge ge ī, Faraob ge ǁaesa doe kaio, ob ge Eloba ǁîna Filisteǁîn di ǃhūba-ū gau daob ǀkha ǂgaeǂgui tama, ǁîb a ǀgū xawe: Nētib ra Eloba mî xui-ao: Îs ǁaesa tā ǃhausen ǃkhamman ga mûo, în tā Egipteb ǃoa oa. 18 Ob ge Eloba ǁaesa ǂĀxahuriba-ū garu daob ǃgaroǃhūb dib ǀkha ge ǂgaeǂguiǂnamipe; tsî Israeli ôan ge korokorobese Egipteǃhūba xu ge doeǂoa. 19 Tsîb ge Moseba Joseb di ǂkhōga ge ūǃgû; ǁîb ge Israeli ôana ǃgom nū-e nū kai tsî: Elob ge sado ǂanǂansase nîra ôaǀkhā, xuige ti ǂkhōga ǁnâi nēpa xu ūǃgûǃapa! ti ge mî. 20 Nētin ge Sukotsa xu ge dāǁnâ; tsîn ge Etams ǃnâ ge sī ǁgoe, ǃgaroǃhūb ǀams tawa hâsa.
Augustub 10-16
ELOBMÎSA XU HÂ ǂÛǂÛSA MÎDI | EKSODUS 15-16
“Jehovaba ǁnaetsanadi ǃnâ-ū koa re”
(Eksodus 15:1, 2) ǃNubain ge Moseb tsî Israeli ôan tsîna nē ǁnaetsanasa ǃKhūba ǁnaeba tsî ǃhoa tsî ge mî: A ta ǃKhūba ǁnaeba, kaiseb ǀgapiǀgapihe hâ xuige. Hāb tsî ǃgapi-aob âb tsîkhab go hurib ǃnâ aoǂgā. 2 ǃKhūb ge a ti ǀgai tsî ti am, tsîb ge a ti ǃgâiǃō; ǁîb ge a ti Elo xui-ao ta ge ǁîba nî koa; ǁîb ge a ti îb di Elo xui-ao ta ge ǁîba nî kaikai.
w95-E 10/15 11 ¶11
Tae-i ǃaroma da nēsi ama Eloba nî ǃao?
11 Jehovab ge Egipteǁî toroǃkham-aoga a ǃgam o, ob ge ǁîb ǃoaba-aon ǁaegu ge ǀgapiǀgapisen tsî ǁîb ǀonsa hoase ge ǂanǂan. (Jos. 2:9, 10; 4:23, 24) ǁÎb ǀons ge ǀgaioǃnâ ama tama elogu Egiptegu ǁaegu ge ǂanǂanhe hîna ge ǁîgu ǃoaba-aona sâu hō tama hâ iga. ǁÎn di elogu tsî toroǃkham-aogu tsîn ai ǂgomaiǂnûis ge ǁîna ge ǂkhabuǂâi kai. (Psa. 146:3) Israelǁîn ge ge ǂkhâǃnâ-e în Jehovaban ǃaoǃgâsiba ūba hâ ǃkhaisa ǁgau ǁnaetsanadi ǃnâ-ū.
(Eksodus 15:11) ǃKhūtse, tari-e sats khami ī elogu ǃnâ? Tari-e sats khami ī, sats ǃanusib ǃnâ ǂkhaisats, koatsanadi ǃnâ ǃaoǃaosats, buruxana ra dītsa?
(Eksodus 15:18) ǃKhūb ge ǀamose tsî hugaǀgui nîra gaosîsen.
w95-E 10/15 11-12 ¶15-16
Tae-i ǃaroma da nēsi ama Eloba nî ǃao?
15 Moseb ǀkha da ga hâ hâ o, o da ge sida tsîna ga mî hâ: “ǃKhūtse, tari-e sats khami ī elogu ǃnâ? Tari-e sats khami ī, sats ǃanusib ǃnâ ǂkhaisats, koatsanadi ǃnâ ǃaoǃaosats, buruxana ra dītsa?” (Eks. 15:11) ǁNā mîdi ge ǃkharu ge ǁaeba xu nēsis kōse ra ǁnâu-e. ǀUniga ǂkhanis Elobmîs dis ǃnâb ge apostel Johaneba ǂgomǂgomsa ǃoaba-aon Elob dina ra ǁguiǃāba mî rase: ‘Tsîn ge Moseb Elob ǃgāb di ǁnaetsanas tsî ǁKhaob di ǁnaetsanasa gere ǁnae.’ Nē ǂoaǂamsa ǁnaetsanasa ge tae-i? “Kai tsî buruburuxa gu ge sa sîsenga, ǃKhūtse, Hoaǀgaixa Elotse; ǂhanu-ai tsî ama-ai gu ge sa daoga, ǃanun di Gao-aotse! Tari-e kha satsa ǃao tide, ǃKhūtse, tsî sa ǀonsa ǂkhaiǂkhai tide? Sats ǀguits a ǃanu xui-ao.”—J.ǂHa. 15:2-4.
16 Nētsēs tsînan ge Eloba ǃnōrasase ra ǃoaba khoena hâ ǁîb ge kuru xūn ǃoa ǀguis ose xawe ǁîb di mîmādi ǃoagus tsîna. Hoa ǃhaodi khoen ge gagasise ge ǃnoraǃnorahe tsî nē ǀurixa ǃhūbaiba xu ge ǀgorasen tsîn ge Elob di ǂhanu-ai mîmādi ǃoagu ge ûi tsoatsoa. Kurigu ra ī khamin ge ǂgui khoena nē ǂhanuoǃnâ ǃhūbaiba xu ge ǂoa tsî ǃanu ǂhanu-ai ǀapeǂhomis Jehovab ǃoaba-aon ǀkha ǀguiba ra ǃoaba. Elob ga nē ǀurixa ǃhūbaib tsî ǂhumi ǂgomdi tsîna ga ra dīgāgā o, on ge ǁîb di ǃoaba-aona ǀamosib kōse ǂhanu-ai ǀasa ǃhūbaib ǃnâ nî ûi.
(Eksodus 15:20, 21) Os ge Miriams, kēbo-aos Aronni ǃgâsasa ǃkhomǃkharurusa ǃomǁae ge ū; o di ge taradi hoade ǂoa tsî ǁîsa ge sao ǃkhomǃkharurudi tsî dâ-aidi tsîdi ǀkha. 21 ǃNubais ge Miriamsa ǁîde ge ǃeream: ǃKhūba ǁnaeba so re, kaiseb a ǀgapi xuige. ǁÎb kom hāb tsî ǁîb di ǃgapi-aob tsîkha hurib ǃnâ go aoǂgāo! ti.
it-2-E 454 ¶1
Musik-i
Israelǁîn hîna gere ǁnaen ge ǂguro, ǀgamǁî tsî ǃnonaǁî domgu ǃnâ gere ǁnae hoana ǀguiba. Xoadi ge nēsa ǃereams ase ra ǁguiǃā. (Eks. 15:21; 1Sam. 18:6, 7) Nē ǁnae ǀgauba da ge psalmdi a xoasa ǀgauba xu a mû ǁkhā, Psalmdi 136 khami. ǀGam koor ra hîna ge Nehemiab ǁaeb ǃnâs tsî Jerusalems mirgu dī-ūnus ǃnâ hâ i ra ge nē ǁnae ǀgauba ra ǁguiǃā.—Neh. 12:31, 38, 40-42; AMDI di hâ ǃâba mû re.
it-2-E 698
Kēbo-aos
Miriams ge a ǂguro khoe hîna Elobmîs ǃnâ kēbo-aos ase a ǂansa sa. Elob ge ǁîs ǃnâ-ū ǁîb haisi-amde gere ǂhôa, ǁnaetsanade ra sîsen-ūse. (Eks. 15:20, 21) ǁÎs tsî Aronni tsîn ge Moseba ǃoa ge mî: “Sim ǃnâ-ūs tsînab ǃhoa tama hâ?” (Num. 12:2) Jehovab ge aitsama Mixab ǃnâ-ū ge mî ǁîb ge “Moseb, Aronni tsî Miriams” tsîna a sîsa Israelǁaesa ǃoa Egipteba xub gere ǂoa-ū nî o. (Mix. 6:4) Miriams ge Elob xa sîsen-ūhes di aiǂhanuba ūhâ i xawes ge Moseb xa ǀgapi ǀhōsagusisa Elob ǀkha ge ūhâ tama hâ i. ǃGâises ge tanisen tama hâ io, os ge Elob xa ge ǁhara-e.—Num. 12:1-15.
Gagasi xūna ǀō-aisase ôaǃnâs
(Eksodus 16:13) Tsî i ge ǃui-amǁaeb ai ge ī, ǃnabarin ra hā tsî ǁgoeǃkhaisa ra ǃgū-ai ǃkhaisa, tsî sao ra tsēs aib ra ǀauba ǁgoe ǃkhaisa ǁgoeǃkhais ǂnamipe.
w11-E 9/1 14
ǂAn i du go i?
Tae-i ǃaromab ge Eloba ǃnabaride ǁhûi Israelǁîna ǃgaroǃhūb ǃnâ ǂûmāsa?
Israelǁîn ge Egipteba xu gere ǂoa o, ob ge Eloba ǀgam ǃnāra ǃnabaride ǁîna ǁgan-i ase ge mā.—Eks. 16:13; Num. 11:31.
ǃNabaridi ge ǂkhariro anide hîna 18 sentimeterga a gaxu tsî 100 xramma a ǃgom. Nē anidi ge ǃnāsase Asiab tsî Europi tsîn ǃnâ ra hō-e. Kaise ra doemā anidi ge i amaga di ge saob ǃnâ Afrikab tsî Arabiab tsîn ǃnâ ra hō-e. ǁAeba xu ǁaeb ǀkhan ge Mediterranean hurib tsî Sinaib tsîn ǂam-ai gere ǁkhana.
The New Westminster Dictionary of the Bible di hâ ǂkhanis ǃoagu i ge “ǃnabaride kaise ǃgâise ra ǁkhana tsî ǂoaba ra sîsen-ū xawe ǂoab mâsib ga ǃgâi tama io tamas ka io di ga anide ga ra tsau o, o di ge anide ǃhūb ai sī ra ǁnā.” ǁKhanas ǀkha di nî aiǃgûs aiǃâ di ge aibe ǃhūb ai ǀgui tsēs tamas ka io ǀgam tsē ra gere sâ, nēs ǀkha di ge supuse gere ǃkhō-e hō. ǃKharu ge ǁaeb ǃnân ge Egipteǁîna 3 miliuns xa ǃnāsa ǃnabaride kurib hoaba gere sîǂui.
Hoa ǀgam ǃnāra hinan ge Israelǁîna ǃnabaride a ǂûs ge ǃopaǁaeb ǃnâ ge hâ i. ǃNabaridi ge ǃnāsase Sinaib tawa gere ǁkhana xaweb ge Jehovaba gere ǃaroma ib ǂoaba ǃnabaride Israelǁîn ra hâ ǀkhāba ǃoa ǃgom-e.—Num. 11:31.
(Eksodus 16:32-34) ǃAruǀîb ge Moseba ge mî: Nēs ge ǁnā mîs ǃKhūb ge mîmāsa: ǁÎ-i xa ǀgui xapa-e ǀoaǀoa, sadu suriba nî sâubaheba, mûn nîse nē pereb, sado ta gere ǂû kaiba nē ǃgaroǃhūb ǃnâ, Egipteba xu ta ge ǂgaeǂguiǂui du ǃnubai. 33 ǁKhātib ge Moseba Aronni ǃoa ge mî: Xapa-e ū îts Manab xa ǀgui gomer-e ǂgā; îts ǁî-e ǃKhūb di ais aiǃâ ǂnûi sadu di ǃhaode i nî sâubahega. 34 ǃKhūb ge Moseba mîmā khamib ge Aronna ǁî-e ǀhûǀguitimîs aiǃâ ge ǂnûi, sâuhe i nîga.
w06-E 1/15 31
Khomai-aon dîdi
Egipteba xun ge orehes khaoǃgân ge Israelǁîna ǂû-i xa gere ǃgae. ǁNā-amagab ge Jehovaba ǁîna manaba ge mā. (Eks. 12:17, 18; 16:1-5) Moseb ge Aronni ǃoa ge mî: “Xapa-e ū îts Manab xa ǀgui gomer-e ǂgā; îts ǁî-e ǃKhūb di ais aiǃâ ǂnûi sadu di ǃhaode i nî sâubahega.” ǃNaeǃkhais ge ra mî: “ǃKhūb ge Moseba mîmā khamib ge Aronna ǁî-e ǀhûǀguitimîs aiǃâ ge ǂnûi, sâuhe i nîga.” (Eks. 16:33, 34) Aronni ge aibe gere ǃâu manabab xapab ǃnâ nî ǂgās aiǃâ îb Moseba ǂgae-e dībasen tsî ǀuixoa-aixūra ǁnāpa ǂgā.
Elobmîs khomai ǃâs
(Eksodus 16:1-18) Tsî Elimsa xun ge dāǁnâo, ob ge ǀhaohâb Israeli ôan dib hoaba ǃgaroǃhūb Sinni, Elims tsî Sinaib tsîra ǁaegu ǁgoeb ǃnâ ge sī, disikoroǀaǁî tsēs ǀgamǁî ǁkhâb dis ai, Egipteǃhūba xun ge doeǂoa hâ is khaoǃgâ. 2 Ob ge ǀhaohâb Israeli ôan dib hoaba Moseb tsî Aronni tsîkha ǃoagu gere ǀara ǃgaroǃhūb ǃnâ. 3 On ge Israeli ôana ǁîkha ǃoa ge mî: Ae, î da ga Egipteǃhūb ǃnâ ǁō hâ i ǃKhūb di ǃomma xu, ǁgansūdi tawa da ǂnôa hîa, pereb xa da ra ǂûǁâ hîa! Sakho kom sida nē ǃgaroǃhūb ǃnâ ge ǂgaeǂguihāo, nē ǀhaohâb hoaba kho nî ǃâǁō kaise. 4 ǃNubaib ge ǃKhūba Moseb ǃoa ge mî: Mû, tita ge sado ǀhomma xu pereb xa nîra ǀapi kaiba; os ge ǁaesa ǃgûǂoa tsî nîra tsēkorobe ǀhaoǀhaobasen, mâ tsēs hoas di ǀgausa; î ta tita ǁîna ǃâitsâ, isen ti ǂhanub ǃnâ nî ǃgûsa, isen ǁîb ǃnâ ǃgû tidesa. 5 Tsî i ge ǃnaniǁî tsēs ai nî ī, ūhân nî xūnan kara ǂhomio, on ge ǃhonarisase tsēkoroben ra ǀhaoǀhaosa xu nî ǀhaoǀhao. 6 ǃNubai kha ge Moseb tsî Aronni tsîkha Israeli ôan hoan ǃoa ge mî: ǃUi-amǁaeb ai du ge nî ǂan, ǃKhūb ge sado Egipteǃhūba xu ǂgaeǂguiǂui ǃkhaisa; 7 tsî ǁari du ge ǃKhūb di ǂkhaisiba nîra mû, ǃKhūb ǃoagu du ra ǀara ǃkhaisab ge ǁîba go ǁnâu amaga. Okha, tari khom a sikhoma, o du sikhom ǃoagu ra ǀara? 8 ǃAruǀîb ge Moseba ge mî: ǃKhūb ga sado ǃui-amǁaeb ai ǁgans xa ǂû kaio, tsî ǁgoaǁaeb ai pereb xa ǁâ kaio, o i ge nîra ī sadu di ǀaraǃkhaidi, ǁîb ǃoagu du go ǀaradeb ǃKhūba go ǁnâu amaga. Okha, tari khoma sikhoma? Sadu di ǀaraǃkhaidi ge sikhom ǃoagu hâ tama hâ, tsî di kom ǃKhūb ǃoagu hâo. 9 Ob ge Moseba Aronni ǃoa ge mî: Israeli ôan di ǀhaohâb hoab ǃoa mî: ǀGūǀgūsen ǃKhūb di ais aiǃâ, ǁîb ge sadu di ǀaraǃkhaide go ǁnâu xuige. 10 Tsî i ge ge ī, Aronni Israeli ôan di ǀhaohâb ǃoa ra ǃhoa hîa, tsî ǁîn ra ǃgaroǃhūbǀî ūnusen hîa, mû, ob ge ǂkhaisib ǃKhūb diba ǀnanus ǃnâ ge ǂhai. 11 ǁKhātib ge ǃKhūba Moseb ǃoa ge mî: 12 Tita ge ǀaraǃkhaidi Israeli ôan dide go ǁnâu, ǃhoa ǁnâi îts ǁîna mîba: ǀGam ǃuira ǁaegu du ge ǁgans xa nîra ǂû, tsî ǁgoas ai du ge pereb xa nîra ǁâ, o du ge nî ǂan, tita ǃKhūta a sadu di Elo ǃkhaisa. 13 Tsî i ge ǃui-amǁaeb ai ge ī, ǃnabarin ra hā tsî ǁgoeǃkhaisa ra ǃgū-ai ǃkhaisa, tsî sao ra tsēs aib ra ǀauba ǁgoe ǃkhaisa ǁgoeǃkhais ǂnamipe. 14 Tsî ǁgoe hâ ǀaub ge bēo, mû o i ge ǂkhari ǃgupu xūro-i ǃhūb ai ǁgoe-e ǃgomdan khami ī-e, ǃgaroǃhūb ai ge hâ i. 15 Tsî Israeli ôan ge ǁî-e mûo, on ge nē-e nau-i ǃoa: Tare-e? ti ge mî, tare xū-i a ǃkhaisa ǀū tsî. Ob ge Moseba ǁîna ǃoa ge mî: Nēb ge ǁnā pereb, ǃKhūb ra sado ǂû kaiba. 16 Nēs ge mîs ǃKhūb go mîmāsa: A-i mâ-i hoa-e ǀhaoǀhaobasen, ǂû ǁkhā i as kōse, mâ dana-i hoa-e ǀgui gomera ǀhaoǀhaoba, sadu ǀomdi di ǀgausa ǃoa; a-i mâ-i hoa-e tentoms â-i ǃnân hâs kōse ū. 17 On ge Israeli ôana ǁnāti dī tsî gere ǀhaoǀhaobasen, ǀgui-i ge kaise tsî nau-i ge ǀorose ge ū. 18 Xawe gomeri ǀkhan ge ǀguiro, o i ge ǁnā-i, kaise ǀhaoǀhaobasen go hâ i-e, xū-e ǃnā tama, tsî ǁnā-i ǀorose ǀhaoǀhaobasen go hâ i-e xū-e tôasi tama ge hâ i, mâ-i hoa-i ge ǂû ǁkhā i as kōse ge ǀhaoǀhaobasen.
Augustub 17-23
ELOBMÎSA XU HÂ ǂÛǂÛSA MÎDI | EKSODUS 17-18
“ǃGamǃgamsenxa aogu ge nau aoga ǁkhāǁkhā tsî sîsen-e ra ǀgoragu”
(Eksodus 18:17, 18) Ob ge ǀuiǁgûb Moseb diba ǁîb ǃoa ge mî: Dīts ra ǃkhai-i ge ǃgâi tama hâ. 18 Hoaragasets ge nî dāhe, sats tsî nē ǁaes sa ǀkha hâsa; nē ǃkhais ra ǃgomdā tsi, ǀgurits kom satsa ǁîsa dī ǁoao.
w13-E 2/1 6
Moseb ge a ǀnamxaǃnâ khoe
Moseb ge Israelǁîna ǀnamma ge ǁgau. ǁÎn ge ge mûǂan Jehovab ra Moseba sîsen-ūsa ǁîb khoena daoǁgausa, ǁnās ǃaroman ge Moseb tawa ǃkharagagu ǃgomsin ǀkha gere sī. Khomai da ge ra: “Os ge ǁaesa ǁgoasa xu ǃuis kōse Moseb aiǃâ ge mâ i.” (Eks. 18:13-16) Mûnanai re matikōse i ge ǃgom isa Moseba ǁaeba xu ǁaeb ǀkha Israelǁîn ǃgomsin tsî ǂâiǂhansende ǃgâsa. Moseb ge ǀnammi a khoena huis xa gere ǂkhî kai-e.
(Eksodus 18:21, 22) Îts ǁaes hoas ǃnâ mûǂuibasen ǁkhā khoegu, Eloba ra ǃaoga, ǂhauǃnâ khoega, xūǃgunuxasiba ra ǁkhanga: ǁÎga mâi ǁîn ǂama ǀoadisin di danakhoese, kaidisin di danakhoese, korodisin di danakhoese, disin di danakhoese. 22 Î gu nē ǁaesa ǂhanuǂhanu mâ ǁaeb hoab ai; î-i ǁnâi ī, î gu kai ǁhōgu hoaga sa tawa ūhā, î gu ǂkhari ǁhōgu hoaga ǂhanuǂhanu; îts ǁnâi ǁî-aitsama supusupubasen, î gu sa ǀkha tani.
w03-E 11/1 6 ¶1
ǂGomǃgâsib ge a ǂhâǂhâsa ǂkhîsa ûib ǃgao
Nē aogu ge Elosi ǀgauga gere ǁgau ǂgomǂgomsa ǃharode gu nî hōs aiǃâ. ǁÎgu ge ra ǁgau Eloba gu ra ǃaoǃgâ ǃkhaisa tsî ǁîba ǂkhîoǃnâ kaise ra ǃaosa. Hoa khoen ge ge mûǂan nē aogu ǁîgu ǁkhāsib ǃnâ hân hoana ra dītsâ ǃkhaisa Elob ǁgaraga ǁnâuǀnams ǃaroma. ǀHôakao mari kuriba gu ge ge ǃhui hâ i, nēs ge ǀgaiba gere mā gu igu tā ǂhanuoǃnâ xūna dī. Khoen ǁîgu ǃnâ ūhâ ǂgomǃgâsiba gu ge ge ǁgaiǁgai ǂgao tama hâ i, ǁîgu ǂhâsiga ǂgurose mâis ǃnâ-ū.
(Eksodus 18:24, 25) Ob ge Moseba ǀuiǁgûb âb di domma ǁnâu tsî ǁîb goro mî xūn hoana ge dī. 25 Ob ge Moseba Israeli hoaba xu ǁkhā khoega ūǂuibasen tsî ǁîga ǁaes ǂama danakhoese ge mâi; ǀoadisin di danakhoese, kaidisin di danakhoese, korodisin di danakhoese tsî disin di danakhoese.
w02-E 5/15 25 ¶5
ǂHauǃnâsib ge ǂhanu-ai khoena ra ǂgaeǂgui
Moseb ge ge ǃgamǃgamsenxa i. Nau khoena ǁîn ǃgomsin ǀkha huisa xub ge tsau hâ io, ob ge ǁîb ǀuiǁgûb Jetroba ge mîba bi îb, ǂansa ūhâ aogu ǀkha ǁîb sîsenga ǀgoragu. ǁÎb ǃnubusiga mûǂan tsîb ge Moseba nēsa ge ūǃoa. (Eks. 18:17-26; Num. 12:3) ǃGamǃgamsenxa ǃgâsab ge ǃao tama hâ nau ǃgâsaga aiǂhanuga māsa tsî ǁnās ǀkhas tsîna ǃao tama hâ ǁîgu ǁgaumâide nau ǃgâsagu ǀkha ǀgoragusa. (Num. 11:16, 17, 26-29) Xaweb ge ǁîga ra hui igu gagasise ǀgai. (1Tim. 4:15) Sida tsîna ǁnāti a ī ǁkhā?
Gagasi xūna ǀō-aisase ôaǃnâs
(Eksodus 17:11-13) O i ge ge ī, Moseb ra ǃommi âba ǀhōkhâi hîab ge Israela ge ǀgaisa i; xawe ǃommab ra ǃgamǃgam hîab ge Amaleka ge ǀgaisa i. 12 Xawe ǃomkha Moseb dikha ge ǃgom amaga kha ge ǀui-e ū tsî ǁîb ǃnaga ǁgui tsî ǁî-i ai ge ǂnûi bi, tsî kha ge Aronni tsî Huri tsîkha ǃomkha âba ge ǂkhâkhâi, ǀguib nē ǀkhāb ai tsî naub nau ǀkhāb ai, ǁnāti kha ge ǃomkha âba ge ǁapo, sores ge ǂgâs kōse. 13 Nētib ge Josuaba Amaleki tsî ǁaes âba ǁîb gôab di ǀāb ǀkha ge ǂnaudan.
w16.09-E 6 ¶14
“Î kha sa ǃomkha tā ǃopo”
14 Aronni tsî Huri tsîkha ge Moseb di ǃomkha ge ǂkhâkhâi. Sada tsîn ge nētsē sida ǃgâsana a hui ǁkhā. Mâna? ǁNān hîna kaira hân, ǀaesen hân, omaridi xa ra ǁgâiǀā-en tamas ka io ge ǀnamsabe-e ǁōb ǃnâ a ǂoaǃnân. ǂKhamkhoen hîna ǂhanuoǃnâ xūna dīsa ra ǁgari-en tamas ka io nē ǃhūbaib ǃnâ ǃgâi ǀonsa ôabasensa ra ǁgari-en tsîna da ge a hui ǁkhā. (1Tes. 3:1-3; 5:11, 14) Nau khoen ǃnâ du ǃgâiǃgâibasensa ūhâ ǃkhaisa du ge Gaosib ǀHû-ommi, aoǁnâ sîsenni ǃnâs, ǂûǀhao du ra hîna tsî ǁâǁawab ǃnâ-ū du ra ǃhoa hînas tsîna a ǁgau ǁkhā.
(Eksodus 17:14) ǃNubaib ge ǃKhūba Moseb ǃoa ge mî: Nēsa ǂâiǂâisenǃkhaise ǂkhani-i ǃnâ xoa îts ǁîsa Josuab ǂgaera ǃnâ ǁgui: Amaleki xa ǂâisa ta ge tita ǀhommi ǃnagaba xu nîra ǃhūǃnomasi, ti.
it-1-E 406
ǂHanugu
Nē xoadi Moseb didi ge ge ǃgâi tsoatsoasa ge ūhâ i, Elob xa ge ǂkhâǃnâ-e, ǂhanuga ge ūhâ tsî ama ǃoabas nî dī-e ǀgaus di ǁgaraga ge ūhâ i. Moseb ge tsoatsoasa xu ge Israelǁîn di ǂgaeǂgui-ao kai ǂgao tama hâ i, Moseb ge ǂguro Jetrob ge mîba bi xū-e ge ūǃoa tama hâ i. (Eks. 3:10, 11; 4:10-14) Jehovab ge Moseba nē ǀgaiba ge mā, îgu Faraob ǃgaidī-aogu tsîna ǂanǃgâ nē ǀgaib Jehovaba xu ra ǀkhīsa. (Eks. 4:1-9; 8:16-19) Moseb ge aitsamaba xu ge ǃhoa-ao tsî xoa-ao kai ǂgao tama hâ i. Elob mîmāde ǁnâuǀnam tsî ǃanu gagab huib ǀkhab ge Moseba ge ǂkhâǃnâ-e îb ǂgurose ǃhoa tsî ǁnāpaxū Elobmîs ǂhanugu ǃâ-e xoa.—Eks. 17:14.
Elobmîs khomai ǃâs
(Eksodus 17:1-16) ǁNās khaoǃgâb ge ǀhaohâb Israeli ôan dib hoaba ǃKhūb di mîmās ai ǃgaroǃhūb Sinna xu tsēdaogu ân ǃoa ge doe tsîn ge Refidims tawa sī ge ǁgoe. ǁNāpa i ge ǁgam-i ǁaes nî ā-e ge ǀkhai i. 2 ǃNubais ge ǁaesa Moseb ǀkha ǂnoagu tsî: ǁGam-i xa kho mā da î da ā! ti ge mî. Ob ge Moseba ǁîn ǃoa: Tarexa du tita ǀkha ra ǂnoagu? Tare xū-i ǃaroma du ǃKhūba ra ǃâitsâ? ti ge mî. 3 Tsî ǁaes ge ǁnāpa ǁgam-e ǁgâo, os ge ǁaesa Moseb ǃoagu ǀara tsî ge mî: Tarexats ǁnâi Egipteba xu ge doeǃapa kai da, tita tsî ti ôan tsî ti ǀgoan tsînats nî ǁgâǁō kaise? 4 Ob ge Moseba ǃKhūb ǃoa ǂgai tsî: Tare-e ta nî nē ǁaes ǀkha dī? ǂKhari ǁaerob ǀguib kōse, on ge nî ǀuiǁhom te, ti ge mî. 5 ǃNubaib ge ǃKhūba Moseb ǃoa ge mî: ǃGûsī ǁaes di ais aiǃâ, îts Israeli di kaiga ūǃgû, îts sa ǀkharus, ǁîs ǀkhats ge Nylǃāba ǂnausa sa ǃomǁae ū îts ǃgû! 6 Mû, tita ge ǁnāpa sa ais aiǃâ Horeb ǃnâ hâ ǃhaob ai nîra mâ, ots ge ǃhaob ai nî ǂnau, o-i ge ǁgam-e nî ǀkhī, ǁaes nî ā-e. Ob ge Moseba Israeli kaigu di ais aiǃâ ǁnāti ge dī. 7 Ob ge ǁnā ǃāsa Masa tsî Meriba ti ge ǂgai Israeli ôan di ǂnoagus ǃaroma, tsî ǃKhūba ǃâitsâ tsîn ge ǃKhūba hâba sida ǁaegu, tamas ka io ǀkhaib a? ti a mî amaga. 8 ǃNubaib ge Amaleka hā tsî Israeli ǀkha ge ǃkham Refidims ǃnâ. 9 Ob ge Moseba Josuab ǃoa ge mî: Khoega ūǂuiba khom îts satsa ǃgûǂoa îts Amaleki ǀkha ǃkham; o ta ge tita ǁari ǃnoms di ǀgapisib ai nî mâ, ǀkharus Elob disa ti ǃomǁae ūhâǃâ. 10 Ob ge Josuaba Moseb ge ǁîba mîmā khami dī tsî Amaleki ǀkha ge ǃkham; o gu ge Moseb, Aronni tsî Huri tsîga ǃnoms di ǀgapib ai ge ǃapa. 11 O i ge ge ī, Moseb ra ǃommi âba ǀhōkhâi hîab ge Israela ge ǀgaisa i; xawe ǃommab ra ǃgamǃgam hîab ge Amaleka ge ǀgaisa i. 12 Xawe ǃomkha Moseb dikha ge ǃgom amaga kha ge ǀui-e ū tsî ǁîb ǃnaga ǁgui tsî ǁî-i ai ge ǂnûi bi, tsî kha ge Aronni tsî Huri tsîkha ǃomkha âba ge ǂkhâkhâi, ǀguib nē ǀkhāb ai tsî naub nau ǀkhāb ai, ǁnāti kha ge ǃomkha âba ge ǁapo, sores ge ǂgâs kōse. 13 Nētib ge Josuaba Amaleki tsî ǁaes âba ǁîb gôab di ǀāb ǀkha ge ǂnaudan. 14 ǃNubaib ge ǃKhūba Moseb ǃoa ge mî: Nēsa ǂâiǂâisenǃkhaise ǂkhani-i ǃnâ xoa îts ǁîsa Josuab ǂgaera ǃnâ ǁgui: Amaleki xa ǂâisa ta ge tita ǀhommi ǃnagaba xu nîra ǃhūǃnomasi, ti. 15 Ob ge Moseba altarsa ge ǂnubi, tsîb ge ǁîsa ǃKhūb ge a ti ǃkhau, ti ge ǂgai. 16 Nētib ra mî xui-ao: ǃOmmi ǃKhūb di trons ai hâs kōseb ge ǃKhūb di toroba Amaleki ǃoagu nîra hâ, ǃhaosa xu ǃhaos kōse.
Augustub 24-30
ELOBMÎSA XU HÂ ǂÛǂÛSA MÎDI | EKSODUS 19-20
Disi mîmādi tsî sadu
(Eksodus 20:3-7) ǀKhara elogats ge Ti aiǃâ ūhâ tide. 4 ǃGaoǂuihesa īsi-i kas, ǀnî īsi-i kas hoasats ge dībasen tide, ǀgapise ǀhommi ǃnâ hân di-i karao, ǃnaga ǃhūbaib ai hân di-i karao, ǃhūbaib ǃnaga hân di-i karao, ǃhūbaib ǃnaga ǁgam-i ǃnâ hân di-i karao; 5 ǁîn aiǃâts ge ǃhonǁgoa tsî ǁîna ǃoaba tide; tita ǃKhūta sa Elota ge tauxa Elota, ǁgûgu di ǁorena ra ôaǃnâ ta ǀgôan tawa ǃnonaǁî tsî hakaǁî ǃhaos kōse, tita ǁkhan hân disa; 6 tsî ta ge ǀkhomxaǂgaosiba ra dī ǂgui ǀoadisin, tita ǀnam hân tsî ti mîmāde ra dīn dis tawa. 7 ǃKhūb sa Elob ǀonsats ge ǁause ǂgaiǀhuru tide: ǃKhūb ge ǁnān, ǀons âba ǁause ra ǂgaiǀhuruna ǀhapiose ūhâ tide xui-ao.
w89-E 11/15 6 ¶1
Disi mîmāde sadu ǃaroma tae-e ra ǂâibasen?
ǂGuro haka mîmādi ge sada Jehovab ǃoagu ūhâ ǃereamde ra ǁgau. (ǂGurose) ǁÎb ge ra ǂgao i da ǀō-aisase ǁîb ǀguiba ǃoaba. (Mat. 4:10) (ǀGamǁîse) ǁÎb ǃoaba-aon ge ai-īsiga ǃoaba tide. (1Jhn. 5:21) (ǃNonaǁîse) Jehovab ǀonsa da ge ǂhanu tsî ǃgâi ǀgaub ǃnâ nî sîsen-ū. (Jhn. 17:26; Rom. 10:13) (Hakaǁîse) Sada ûib hoaba da ge gagasi xūna dīs ai nî mâi. Nēs ge ra ī ǁkhā kai i da ǀgapiǃgôasensa xu sâ.—Heb. 4:9, 10.
(Eksodus 20:8-11) Sâtsēs xa ǂâi îts ǁîba khai! 9 ǃNani tsēdets ge sîsen tsî nî dīxūn âts hoana dī; 10 xawe hûǁî tsēs ge a ǃKhūb sa Elob di sâtsē, ǁîs aits ge sîsen-i xare-e dī tide, sats karao, sa ôab karao, sa ôas karao, sa ǃgāb karao, sa ǃgās karao, sa ǀgoa-i karao, sa ǃhaokhoe-i, sa ǁāgu ǃnâ hâ-i karao: 11 ǃNani tsēdi ǃnâb ge ǃKhūba ǀhommi tsî ǃhūbaib tsîkha ge dī xui-ao, hurib tsî ǁîb ǃnâ hân hoana, tsîb ge ǁîba hûǁî tsēs ai ge sâ: ǁNā-amagab ge ǃKhūba sâtsēsa ǀkhae tsî ge khai.
(Eksodus 20:12-17) Saob tsî saos tsîrats ge nî ǃgôa, î di sa tsēde ǃnūǃnūhe ǃKhūb, sa Elob nî mā tsi ǃhūb ǃnâ. 13 ǃGamts ge tide. 14 ǃGamebats ge khôa tide! 15 ǃNarits ge tide. 16 ǂKhabasets ge sa ǀgūkhoeba ǂgā-am tide. 17 Sa ǀgūkhoeb ommats ge tura tide; sa ǀgūkhoeb tarasats ge tura tide tsî ǁîb ǃgāb kas, ǁîb ǃgās kas, ǁîb gomab kas, ǁîb eseli kas tsî sa ǀgūkhoeb di-i kas hoasa.
w89-E 11/15 6 ¶2-3
Disi mîmāde sadu ǃaroma tae-e ra ǂâibasen?
(Koroǁîse) ǀGôan ga ǁîn ǁgûna ǁnâuǀnam o, os ge omarisa ra ǀguiǃnâxa tsî nēs ǀkha Jehovab ǀkhaeba ra ūhâ. Nē ǂguro mîmās ge ǂoaǂamsa ǃâubasensa ra mā da. “ǃGâibahets nîse” ǀguis ose xawets “nî ǂomxase ǃhūbaib ai ûise.” (Efe. 6:1-3) ǀUni tsēdi ǃnâ da ûi hâ o i ge nē mîmāde ǂkhamkhoena ra hui în ǁîn tsîna ǃâubasensa ūhâ ǁkhawan ǁō tidesa.—2Tim. 3:1; Jhn. 11:26.
ǀNammi hîna da sida ǀgūkhoena ūba hâb ge nî hui da i da tā ǁgai xūna dī, nē ra saose (ǃNaniǁîse) ǃgam, (Hûǁîse) ǀai, (ǁKhaisaǁîse) ǃnari tsî (Khoeseǁîse) ǂhumiba ǃhoa. (1Jhn. 3:10-12; Heb. 13:4; Efe. 4:28; Mat. 5:37; ǂKhm. 6:16-19) Xawe tae-e ra ǂkhâǃnâ da? (Disiǁî) mîmās hîna xūǃgūnaxasib xa hâs ge ra ǂâiǃâiǃnâ da Jehovab ra ǂgaoǀkhā da ǃkhaisa i da hoaǁae xūna ǂhanu ǃaromas ǃgao dī.—ǂKhm. 21:2.
Gagasi xūna ǀō-aisase ôaǃnâs
(Eksodus 19:5, 6) Nēsi ǁnâi ti domma du ga ôasase ǁnâuǀnamo tsî ti ǃgaeǀhaosa ǃkhōǀgaipeo, o du ge ǁaedi hoadi ǃgâ-ai ti dise nîra ī, ǃhūbaib hoaragab a ti xui-ao. 6 O du ge tita pristersi gaosise tsî ǃanu ǁaese nîra ība. Nēdi ge mîdi, Israeli ôanats nî ǃhoa-ūde.
it-2-E 687 ¶1-2
Pristergu
Xristeǁî Pristergu. Jehovab ge Israelǁîna ge mîmā ǁnā ǃgaeǀhaosan ga ūhâ ǀgara o, on ge ǁîba “pristersi gaosise tsî ǃanu ǁaese nîra ība.” (Eks. 19:6) Xawe Aronni surib pristergu ge hānîǁaeb pristergu hās kōse ǀgui ge hâ. (Heb. 8:4, 5) Nēs ge ǂhanub ǃgaeǀhaos di ǀams tsî ǀasa ǃgaeǀhaos di ǂnûiǂgās kōse ǀgui ge hâ. (Heb. 7:11-14; 8:6, 7, 13) ǀŌ-aisase i ge ǂgurose Israelǁîgu ǀguiga gere ǁhûihe igu pristergu ase Elob mîmâisa Gaosib ǃnâ sī ǂgaeǂgui tsî i ge ǁnās khaoǃgâ nau ǁaede gere sao.—ǃNǃkh. 10:34, 35; 15:14; Rom. 10:21.
ǂKhari ǃgôab Jodeǁîn ǀguin ge Xristuba ge ūǃoa, ǁaes ge nēs ǀkha ama ǁanin gaosib di pristergu tsî ǃanu ǁaes tsîna ra kuruǂûina ge mā ǁoa i. (Rom. 11:7, 20) Israelǁîn ge Elob ǃoagu ǂgomǂgomsa tama hâ i amagab ge Eloba sao ra-e ge mî ǁîb kēbo-aob Hoseab ǃnâ-ū: “ǂAns ǁîn tawa ǀkhai amaga; ǂansats satsa aoxū hâ amaga ta ge tita sats ona ge aoxū, ti pristersets ǃoaba te tidega; ǂhanub sa Elob dibats ge satsa ǀuru amaga ta ge tita ona sa ôana ge ǀuru.” (Hos. 4:6) Jesub ge ǃhūbaib aib hâ hîna nē ǂhanub ǃnāga ge hâ i tsî ge mûǂan Aronni surib pristergu ǀgaiba ūhâsa. Tsîb ge ǂgauǂgaub ge khoena ge mîmā în pristerga ǃoa ī tsî ǂhâbasa ǁguibasa sī dī.—Mat. 8:4; Mrk. 1:44; Luk. 17:14.
(Eksodus 20:4, 5) ǃGaoǂuihesa īsi-i kas, ǀnî īsi-i kas hoasats ge dībasen tide, ǀgapise ǀhommi ǃnâ hân di-i karao, ǃnaga ǃhūbaib ai hân di-i karao, ǃhūbaib ǃnaga hân di-i karao, ǃhūbaib ǃnaga ǁgam-i ǃnâ hân di-i karao; 5 ǁîn aiǃâts ge ǃhonǁgoa tsî ǁîna ǃoaba tide; tita ǃKhūta sa Elota ge tauxa Elota, ǁgûgu di ǁorena ra ôaǃnâ ta ǀgôan tawa ǃnonaǁî tsî hakaǁî ǃhaos kōse, tita ǁkhan hân disa.
w04-E 3/15 27 ¶1
Mâǂoa ra ǂâidi Eksodus ǂkhanisa xu
20:5—Jehovaba tae-i ǃaroma ‘ǁgûgu di ǁorena ǀgôan tawa ra ôaǃnâ’? Kaihâ kurina i ga khoe-e sīǃnâ o, o i ge ǁî-i ra dī tsî tanisen ǀgaub ai a ǀgoraǃgâhe ǁkhā. Xawe Israelǁaes ge ama tama eloga ǃoaba tsoatsoa o, os ge nēsa sao ra surib ai sîsenǂuiba ge ūhâ i. ǂGomǂgomsa Israelǁîn tsîn ge nēsa gere hōǃâ tsî i ge ǁaes ge ǁîn ǂgomsa kōǃgâ tama hâ i amaga gere ǃgom ǂhauǃnâsiba ūhâ ǀgarasa.
Elobmîs khomai ǃâs
(Eksodus 19:1-19) ǃNonaǁî ǁkhâb ǃnâ, Israeli ôan ge Egipteǃhūba xu doeǂoas khaoǃgâ, ǁnā tsēs ǁkhās ain ge ǃgaroǃhūb Sinaib ǃnâ ge sī. 2 Refidimsa xun ge doeǂoa xui-ao, tsîn ge ǃgaroǃhūb Sinaib dib ǃnâ sī tsî ǁnāpa ǃgaroǃhūb ǃnâ ge ǁgoe; tsîb ge Israela ǁnāpa ǁnā ǃhommi ǃoa-ai ge ǁgoe. 3 Ob ge Moseba Elob ǃoa ge ǃapa. Ob ge ǃKhūba ǁîba ǁnā ǃhomma xu ǂgai tsî ge mî: Nētits ge satsa Jakob omma nî mîba tsî Israeli ôana nî ǂhôa: 4 Sadu ge ge mû Egipteǁîna ta ge dī-ū ǃkhaisa; mati ta ge tita sado ǃariǃkhās di ǁgabogu ai tani tsî sado ti ǃoa ūhā ǃkhaisa. 5 Nēsi ǁnâi ti domma du ga ôasase ǁnâuǀnamo tsî ti ǃgaeǀhaosa ǃkhōǀgaipeo, o du ge ǁaedi hoadi ǃgâ-ai ti dise nîra ī, ǃhūbaib hoaragab a ti xui-ao. 6 O du ge tita pristersi gaosise tsî ǃanu ǁaese nîra ība. Nēdi ge mîdi, Israeli ôanats nî ǃhoa-ūde. 7 Ob ge Moseba hā tsî kaigu ǁaes diga ǂgai tsî nē mîdi hoade ǁîga ge mâi-aiǃâ, ǃKhūb ge ǁîba mîmā hâ ide. 8 ǃNubais ge ǁaes hoasa ǀgui ǃeream tsî ge mî: ǃKhūb goro mî xūn hoan, ǁîna da nî dī. Ob ge Moseba ǁaes di mîde ǃKhūba ge ūsība. 9 Ob ge ǃKhūba Moseb ǃoa ge mî: Mû, tita ge sa tawa nî sī ǁau ǀnanu-i ǃnâ, ǁaes nî ǁnâuga, sa ǀkha ta ra ǃhoa hîa tsî ǀamosen nî sats ona ǂgomse. Moseb ge ǁaes di mîde ǃKhūba ǂhôa xui-ao. 10 ǁKhātib ge ǃKhūba Moseb ǃoa ge mî: ǃGûsī ǁaes tawa îts ǁîna khai, nētsē tsî ǁari în saran âna ǁā. 11 În ǂhomisen hâ ǃnonaǁî tsēs ai: ǃNonaǁî tsēs aib ge ǃKhūba ǁaes hoas di mûdi aiǃâ nî ǁgôaxa xuige Sinaiǃhommi ai. 12 Îts ǁaes ǂnamipe ǃhara-e dī, mî raǃâ: ǃÛisen î du ǃhommi ai tā ǃapa, î du ǀams âba tā tsâǀkhā; ǃhomma ga tsâǀkhā-i hoa-i ge ǂanǂansase nî ǃgamhe xuige. 13 ǃOm-i xare-i xa i ge tsâǀkhāhe tide, xawe i ge ǂanǂansase nîra ǀuiǁhomhe tamas ka io ǂanǂansase nîra ǁkhâuǃganuhe; ǀgoa-i karao, khoe-i karao, ǁî-i ge ûi tide; bairaǁnâb ga ǂause ǀō-o, on ge ǃhommi ai nîra ǃapa. 14 ǃNubaib ge Moseba ǃhomma xu ge ǁgôaxa ǁaes ǃoa, tsîb ge ǁaesa ge khai; on ge saran âna gere ǁā. 15 Ob ge ǁaes ǃoa ge mî: ǂHomisen hâse hâ ǃnonaǁî tsēs kōse, î du tarasa tā ǀgū. 16 Tsî i ge ǃnonaǁî tsēs ai ge ī, ǁgoas ge ǁgoao, o gu ge ǃgurugu tsî napagu tsîga ǃhommi ai ge hâ i, tsî ǃgom ǀnanu-i tsî ǀō-i kaise ǃgari xâiǁnâb di-e; ǁaes hoas, ǁgoeǃkhais ǃnâ hâs ge ǃhuris kōse. 17 Ob ge Moseba ǁaesa ǁgoeǃkhaisa xu Eloba ge ǂgaeǂguiǃoa; on ge ǃhommi ǃgao ge mâ. 18 Ob ge Sinaiǃhommi hoaragaba ge ǀan, ǃKhūb ge ǁîb ai ǁgôa amaga, ǀaes ǃnâ; tsî ǀanni âb ge ǁganommi dib axase ge ǃapa, tsî ǃhommi hoab ge kaise ge ǀkhū. 19 Tsî xâiǁnâb di ǀōb ge ǀō-o tsî kaise ǀgaisao, ob ge Moseba ge ǃhoa, tsî Elob ge ǁîba ǃgarise ge ǃeream.
Augustub 31–Septemberi 6
ELOBMÎSA XU HÂ ǂÛǂÛSA MÎDI | EKSODUS 21-22
“Jehovab ûiba ra mû khami ûiba mû re”
(Eksodus 21:20) Tsî khoe-i ga ǁî-i di ǃgāb kas, ǁî-i di ǃgās kas hoasa hai-i ǀkha ǂnauo, ǁî-i ǃommi ǃnâb ra ǁōs kōse, o i ge ǂanǂansase nî ǀkhaohe.
it-1-E 271
ǂNauhes
Hebreǁî ǀhonkhoeb ge ge mā-amhe hâ i ǁîb ǃgā-e ǂnausa ǁnâuǀnam tama i ga ra io. Xawe i ga ǃgā-e ǁnā ǂnau-es ǃnâ ǁō o, o i ǀhonkhoeba gere ǁhara-e. ǃGā i ga ǀgui tamas ka io ǀgam tsēra ǂnaus khaoǃgâ ga ra ûi o, os ge nēsa ra ǁgau ǁîb go khoe-e ǃgam ǂgao tama hâ i ǃkhaisa. ǁÎb ge aiǂhanuba ge ūhâ i ǃgā-e ǁharasa ǃgā-i ge ǁîb mari i amaga. Khoeb ge ǁîb di a xū-e ge hîkākā ǂgao tama hâ i, nēs ǃnâ-ūb nî ǂoaǃnâ amaga. ǃGā-i ga ǀgui tamas ka io ǀgam tsēra khaoǃgâ ǁō o, os ge nēsa ge ǁgau tama hâ i ǂnausa xu i go ǁōsa tamas ka io i go ǁî-i ǁōba ǀnî hâ xū-i xa a ǃaromahesa. ǁNā-amagab ge ǀhonkhoeba ǃgā-i ge ǀgui tamas ka io ǀgam tsēra khaoǃgâ gere ǁō o, o ge ǁharahe tama hâ i.—Eks. 21:20, 21.
(Eksodus 21:22, 23) Tsî aogu ga ǂnoagu tsî gu ga ǀgamǀkhā hâ tara-e ǂnauo, ǀgôaro-i ra ǁgôas kōse, xawe ǁōǁōsa ǂkhôa-i ga hâ tama io, ob ge ǂanǂansase nî ǁkharahe, taras di aob nî ǁîba ǁgui-ai khami, tsîb ge ǁîsa ǂhanuǂhanu-aogu ǃommi ǃnâ nî mā. 23 Xawe ǁōǁōsa ǂkhôa-i ga hâo, ots ge nî mā ǀomsa ǀoms ama
lvs-E 95 ¶16
Ûiba du Elob ra ǂgao khami ra ǃgôaǃgâ?
16 Mâ khoe-i hoa-i ûib ge Jehovab mûǁae a ǂhâǂhâsa. Noxoba ǃnae tama ǀgôaro i tsînab ge ra ǃgôaǃgâ. Moseb ǂhanub ǃnāga i ga khoe-e ǀgamǀkhā khoesa tsûtsû tsî i ga ǁîs tamas ka io ǀgôa-e ǁō o, o i ge nē khoe-e ǃgam-ao i ase gere mûhe. Khoe-i ge nēsa ǂâibasens ǀkha dī tama hâ i xawe i ge khoe-e ge ǁō tsî i ge ûib ǃaroma nî matarehes ge ge i. (Khomai re Eksodus 21:22, 23.) Elob ǃoagu i ge noxoba ǃnae-e tama hâ ǀgôa-e ûitsama khoe-i ǀkha a ǀgui. Nēsa ǂâis ǃnâ ūhâse, ǁîba ǀgôa-e āǁnâs xa mati ra tsâ? ǁÎba mati ra tsâ miliundi ǀgôan noxoba ǃnae-e tama hân kurib hoaba ra ǃgamhe o?
(Eksodus 21:28, 29) Tsî gomab ga ao-i kas, tara-i kas hoasa ǃkhāo, ǁō i nîs kōse, ob ge gomaba ǂanǂansase nî ǀuiǁhomhe, tsî ǁgans âb ge ǂûhe tide, xawe ǀhonkhoeb ǁnā gomab dib nî ǀhapio. 29 Xawe gomab ga aibe ǃkhāxa hâ i, tsî ǀhonkhoeb âb ga hōhōhe hâ i, tsîb ga sâu bi tama hâ i tsîb ga ao-i kas tara-i kas hoasa ǃgamo, ob ge ǁnā gomaba nî ǀuiǁhomhe tsî ǀhonkhoeb âb ge ǁkhāti nî ǃgamhe.
w10-E 4/15 29 ¶4
Jehovab ge ǂhâba hâ i da ǃnorasases tsî sâusases tsîna hâ
ǀNî ǃâgu ǂhanub digu ge xamanin xa ǃaroma-e hâ tsûba ǃoas tsîna gere ǁnaeǁgau. Gomab ga khoe-e ga ra ǃkhā tsî nēs ǃnâ-ū ǃgam o, ob ge nē gomab ǀhonkhoeba gomaba gere ǃgam. Nē ǁgan-eb ge ǂû tamas ka io nau khoen ai ǁamaxū ǁoa i amagab ge gere ǂoaǃnâ. Xawe i ga ǀhonkhoeba gomab khoe-e tsûtsû hâs khaoǃgâ ǁîba ǁnāti ǀgui hâmā kai os. O i ge tae-e gere ī? ǁKhā gomab ga ega khoe-e ga ra ǃgam o, o i ge gomab tsî ǀhonkhoeb tsîkha gere ǃgam-e. Nē ǂhanub ge gere dī în hoa khoena ǁîn xamanina ǃûi.—Eks. 21:28, 29.
Gagasi xūna ǀō-aisase ôaǃnâs
(Eksodus 21:5, 6) Xawe ǃgāb ga ǂhause: Ti ǀhonkhoeb tsî ti taras tsî ti ôana ta ǀnam hâ xui-ao ta ǃgûǂoa ǂgao tama ti a mîo; 6 ob ge ǀhonkhoeb âba elogu ǃoa nî ūsī bi, ǁnās khaoǃgâb ge ǁîba, ǁāb tawas kao, ǁāb di hais tawas kao, ūsī; ob ge ǀhonkhoeb âba ǂoro-i ǀkha ǂgaes âba nî ǃkhāǃganu, ob ge ǀamose nî ǃoaba bi.
w10-E 1/15 4 ¶4-5
Tae-i ǃaroma du Elob ai nî māǁnâsen?
4 Xristeǁî māǁnâsens ge kaise a ǂhâǂhâsa. Nēs ge ǁgui-ais ǀguisa hî tama. Māǁnâsensa xu da mati ra ǀama? Hā re i da kō khoe-i ǀkha ǃgaeǀhaosa dīsa xu da ra ǀama ǀgausa. ǀGui aiǁgaus ge ǀhōsagusisa. ǃGâi ǀhōsagusisa da ga ūhâ ǂgao o, o da ge khoe-i ǀhōsa kais di ǃereamde nî ǂanǃgâ. Nēs ge ǃgaeǀhaosa ǃkhōǂgā hâ, sadu ǀhōsa-e kōǃgâs di ǃereamsa du ge nî tani. Mâǂoa ra ǀhōsagusis hîna Elobmîs ǃnâ ra ǁguiǃāhes ge Davib tsî Jonatanni ǁaegu ge hâ i. ǁÎkha ge ǀhōsagusis ǃgaeǀhaos tsîna ge dī. (Khomai re 1 Samueli 17:57; 18:1, 3.) Nē ǀhōsaguside da ǃnāsase mû tama hâ xawe i ge ǂgui ǀhōsaguside ra ǀgai, khoen ga ǃgaeǀhaode ūhâ tsî ǁî-i ǀhōsa-e kōǃgâs di ǃereamsa tani o.—ǂKhm. 17:17; 18:24.
5 Elob ge Israelǁîna a mā ǂhanub ge ǀnî hâ ǀhōsagusisa ra ǁguiǃā hînan ge khoena gere ǀamasa ǃgaeǀhaosa dīs ǃnâ-ū. ǃGā-i ga hoase ga ra ǁî-i ǀhonkhoeb di kai ǂgao o, o i ge hâhâ ra ǃgaeǀhaosa gere xoaǃgao. ǂHanub ge gere mî: “Xawe ǃgāb ga ǂhause: Ti ǀhonkhoeb tsî ti taras tsî ti ôana ta ǀnam hâ xui-ao ta ǃgûǂoa ǂgao tama ti a mîo; ob ge ǀhonkhoeb âba elogu ǃoa nî ūsī bi, ǁnās khaoǃgâb ge ǁîba, ǁāb tawas kao, ǁāb di hais tawas kao, ūsī; ob ge ǀhonkhoeb âba ǂoro-i ǀkha ǂgaes âba nî ǃkhāǃganu, ob ge ǀamose nî ǃoaba bi.”—Eks. 21:5, 6.
(Eksodus 21:14) Xawe khoe-i ga ǁî-i ǀgūkhoe-e ǂanapega sîsenūo, ǁî-e i nî gāxaǃnâsib ǀkha ǃgamse, ots ge ǁî-e ti altarsa xu nî ūbē, ǁō i nîga.
it-1-E 1143
ǁNâb
Eksodus 21:14 tawa hâ ǃnaeǃkhais ge ra ǁgau pristergu tsîn gere ǃgam-esa khoe-e gu gere ǃgam o tamas ka io i ge altars di ǁnâga ūsa ǃgam-ao-e ge sâu tama hâ i.—ǀGopeǀnō re 1Gao. 2:28-34.
Elobmîs khomai ǃâs
(Eksodus 21:1-21) Nēgu ge ǁnā ǂhanugu, ǁînats nî mâi-aiǃâga: 2 Hebreǁî ǃgābats ga ǁamao, ob ge ǁîba ǃnani kuriga nî ǃoaba tsi; xawe hûǁîb ǃnâb ge ǁause ǃnora hâse nî ǃgûǂoa, xū-i ama tama, 3 ǁîb soros ǀguis ǀkhab ga hā hâ io, ob ge ǁîb soros ǀguis ǀkha nî ǃgûǂoa; ǃgame hâ aob kao, os ge tarasa ǁîb ǀkha nî ǃgûǂoa. 4 ǀHonkhoeb âb ga tara-e mā bi hâ io, tsîs ga ǁîba ǀgôagu tsî ǀgôadi tsîna ǁoraba hâ io, os ge tarasa ǀgôan âs ǀkha nî ǀhonkhoeb di; ob ge ǁîb soros ǀguis ǀkha nî ǃgûǂoa. 5 Xawe ǃgāb ga ǂhause: Ti ǀhonkhoeb tsî ti taras tsî ti ôana ta ǀnam hâ xui-ao ta ǃgûǂoa ǂgao tama ti a mîo; 6 ob ge ǀhonkhoeb âba elogu ǃoa nî ūsī bi, ǁnās khaoǃgâb ge ǁîba, ǁāb tawas kao, ǁāb di hais tawas kao, ūsī; ob ge ǀhonkhoeb âba ǂoro-i ǀkha ǂgaes âba nî ǃkhāǃganu, ob ge ǀamose nî ǃoaba bi. 7 Tsî khoe-i ga ǁî-i ôasa ǃgāse ǁamaxūo, os ge ǁîsa ǃgûǂoa tide ǃgāgu ra ǃgûǂoa khami. 8 ǀHonkhoeb âs ga ǁîsa sora tsîb ga ǃgame si tama io, ob ge nî xore kai si; ǃhao ǁaes tawab ge ǁamaxū si ǁkhā tama nî i, îǂhôa tamaseb ge ǁîsa sîsenū hâ i amaga. 9 Xawe ǁîb di ôabab ga ǃgame kai sio, ob ge ǀgôadi di ǂhanuba nî sîsenū si. 10 Tsî ǀkharasab ga ūbaseno, xaweb ge nēs ona ǁîs di ǂû-i tsî ǁîs di ǃgū-ai xū-i tsî ǁîs di ǃgamesurudeba tôatôa tide. 11 Tsî nē ǃnona xūnab ga dība si tama io, os ge ǁause nî ǃgûǂoa marin ose. 12 Khoe-e kara ǂnau-i, ǁō i nîs kōse, ǁî-i ge ǂanǂansase nî ǃgamhe. 13 Xawe ǁî-e i ga ôa-am tama hâ io, tsî Elob ga ǁî-e ǃomǁaeb â-i ǃnâ ǂgâ kai hâ io, o ta ge tita satsa ǃkhai-e nî ǂnûiba ǁî-i ǃoab nî ǁhâ-e. 14 Xawe khoe-i ga ǁî-i ǀgūkhoe-e ǂanapega sîsenūo, ǁî-e i nî gāxaǃnâsib ǀkha ǃgamse, ots ge ǁî-e ti altarsa xu nî ūbē, ǁō i nîga. 15 ǁGûb kas, ǁgûs kas hoasa ga ǂnau-i, ǁî-i ge ǂanǂansase nî ǃgamhe. 16 Tsî khoe-e ga ǀâ-i, ǁî-e i ga ǁamaxū hâs kas, ǁî-i ǃomǁae i ga hōhe hâs kas hoasa, ǁî-i ge ǂanǂansase nî ǃgamhe. 17 Tsî ǁgûb kas, ǁgûs kas hoasa ga ǀâxare-i, ǁî-i ge ǂanǂansase nî ǃgamhe. 18 Tsî aore khoegu ga ǃkhamo, tsî ǀguib ga nauba ǀui-i ǀkhas kas, ǃoms ǀkhas kas hoasa ǂnauo, xaweb ga ǁō tama i tsîb ga kharob ai ǁgoeo, 19 ǁkhawab ga khâi tsîb ga ǀkharus ǀkha ǃās daob ai ǃgûo, ob ge ǁnāb ǁîba ge ǂnauba nî ǀhapio; nēs ǀguisa dī tsîb nî tôasib hâna matare bi tsî hoaragase nî ǂgau kai bi. 20 Tsî khoe-i ga ǁî-i di ǃgāb kas, ǁî-i di ǃgās kas hoasa hai-i ǀkha ǂnauo, ǁî-i ǃommi ǃnâb ra ǁōs kōse, o i ge ǂanǂansase nî ǀkhaohe. 21 Xawe ǀgui tsēs kōses kas, ǀgam tsēra kōses kasab ga ûio, ob ge ǀkhaohe tide, ǁîb di marib a amaga.