ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
SEPTEMBERI 7-13
ELOBMÎSA XU HÂ ǂÛǂÛSA MÎDI | EKSODUS 23-24
“Tā khoena sao re”
(Eksodus 23:1) ǂKhaba gom-ets ge ǃkhōǃoa tide îts eloxoresaba tā mâǃgâ, ǂkhaba ǂgā-amao kaits nîse
Hoa amaba du a ǂan?
7 Sadu tsîna a ǃgâiba-e email an tsî sms an tsîna sadu ǀhōsana sîbasa? ǁNās ǀkha du ge sadu tsîna ǀnîsi xū-e du ga ai-īsiǂhôaǂgares ai ǁnâu tamas ka io ga ra khomai o ǀnîsi ra tsâ nē ǂhôa-e khoena mîbasa. Xawe ǁnā sms tamas ka io emailsa du nî sîs aiǃâ, dîsen re: ‘Nē ta ra mî ǂgao ǂhôa-e ama-e? Hoa amaba ta a ǂan?’ Amaba du ga ra ǀū io, o du ge sado īǁkhā î ga ra o ama tama xūna a ǂhôa ǁkhā ǀhaohâb ǁanin ǁaegu. ǁNās ǃaroma hoa amaba du ga ra ǀū io, o nē sms tamas ka io emailsa ǀariǂui re.
8 ǀNîhâ ǁkhōǁkhōsa xū-i ge noxoba hâ ǂâi tamase emails tamas ka io smsa sîsa. ǀNî ǃhūgu ǃnâ i ge sida aoǁnâ sîsen-e mā-am-e tama hâ. Sida mâǃoa-aon ge ǁnās ǀkha ama tama xūna a xoa ǁkhā tsîs ge ǁnāsa sida a ǃao kai ǁkhā tsî ǂhauǃnâxasiba ǃgâsan ǁaegu a khôa ǁkhā. Soviet Unions ǃnâ ge ī xū i xa ǂâi re. KGB di a ǂansa ǀapaǃnamgu ge gere ǂhôa Jehovab di khoen ǁaegu î ge ǀnîna ǃgâsana a gaxaǃnâsa. ǂGuin ge nē ǂhôan ǃnâ ge ǂgom tsî nēs ǀkha Jehovab di ǀapeǂhumisa xu ge doe. Nēs ge ge tsûsa i. Xawe nēn hoan ǂam-ain ge ǀnîna ǀapeǂhumisa ǃoa ge oaǀkhī naun ge hâhâ xawe. ǁÎn ǂgoms ge ge ǂkhabu. (1Tim. 1:19) Nēti i tsūtsūsa mâsiba xu da mati a ǂgōsen ǁkhā? ǁGai xūna ra ǃhoa tamas ka io ra ǂhôa xūna xu da ge nî ūbēsen. Tā gârese tanisen re. Hoaǁae hoa amaba ǂan ǃhoa du nîs aiǃâ.
(Eksodus 23:2) ǂGuibats ge ǂkhabadīǃkhaidi ǃnâ sao tide; tsîts ge ǁkhāti ǂnoaguǃkhai-i ǃnâ ǃhoa tide.
it-1-E 11 ¶3
Aronni
Nēba i ge Aronni di ǃnona ǃnaeǃkhaide Aronna nē tsū xūn di tsoatsoas ase ǁguiǃā tama hâ xaweb ge ǁîba ge mā-am nau khoen xa ǁgarihesa nē ǁgai dīga ǃoa. ǁÎb di ǂguro dīsās ǃnâb ge sao ra mîmāsa ga sao hâ: “ǂGuibats ge ǂkhabadīǃkhaidi ǃnâ sao tide.” (Eks. 23:2) ǁNās khaoǃgâ i ge ǁîb ǀonsa ǃgâi ǀgaub ǃnâ xoadi ǃnâ ra sîsen-ūhe. Tsî Elob ǀgôab ge ǃhūbaib aib ge hâ io Aronni pristersis a ama ǃkhaisa ge mûǂan.—Psa. 115:10, 12; 118:3; 133:1, 2; 135:19; Mat. 5:17-19; 8:4.
(Eksodus 23:3) Tsîts ge ǁkhāti ǀgâsaba mâba tide, ǁîb di ǂnoaguǃkhai-i ǃnâ
it-1-E 343 ¶5
ǂGīsib
ǂHanuoǃnâse tsūdī tamats hâ hîna ǀgoraǃgâ-es ge ǂgīsis ǀkha a ǀgopeǀnōhe ǁkhā. Tsî ǂguin ge nē xūn ǃnâ a ǃâ tsî nēs ge ǀgoraǃgâ-ao-e ǁamaǃkhunis khami ī, i-i tā ǂhanuse ǀgoraǃgâ-e. “ǃNarexū-i ge mû rana ra ǂgī kai.” (Eks. 23:8) “ǀKhaexūb ge gā-ain di mûde ra ǂgī kai.” (Deu. 16:19) Matikōseb ga ǀgoraǃgâ-aoba ǂhanuse ǀgoraǃgâ xaweb ge ǁnā ǁamaǃkhunis xa ǃaromahe hâse ǂhanuoǃnâse a ǀgoraǃgâ ǁkhā. Elobmîs tsîn ge ra mî nē ǂgī kaigus ǁamaǃkhunis ǀguisa ǃkhōǂgā tama xawe tsâsigu tsîna ǃkhōǂgā hâsa. Nēti ra mîse: “ǀGoraǃgâs ǃnâ du ge ǂhanuoǃnâse sîsen tide, ǀgâsaba huis kas, ǀgapi khoeba kōs kas hoas ǀkha.”(Lev. 19:15) Nēn hoan ǂam-aib ge ǀgoraǃgâ-aoba tsâsib tamas ka io khoe-i di ǃkhūsis ai kō tama hâse ǃamkuse gere ǀgoraǃgâ.—Eks. 23:2, 3
Gagasi xūna ǀō-aisase ôaǃnâs
(Eksodus 23:9) “ǃHaokhoebats ge ǁkhāti ǁgâiǀā tide: ǃHaokhoe-i di ǂgaobats a ǂan xui-ao, sadu on kom ǃhaokhoe ge io Egipteǃhūb ǃnâo.
w16.10-E 9 ¶4
“Tā ǀū du a khoe-e ǃgâi dīsa ǀūru re”
4 Jehovab ge Israelǁîna ǃhaokhoena xu ǂgōsen kai tama i tsî ǁîn di ǃgâi dīgu ai gere kō. (Khomai re Eksodus 23:9.) ǁÎn tsîn ge ge ǂan i ‘ǃhaokhoesis mati ra tsâsa.’ ǃGāsis ǃnân nî ūhes aiǃâs tsînan ge Hebreǁîna, Egipteǁîn xa gere ǂkhābē-e ǃhao ǀgoras tamas ka io ǂgoms ǀgoras xa ǃaroma-e hâse. (Gen. 43:32; 46:34; Eks. 1:11-14) Israelǁîn ge ǃhaokhoen ase ǃgâi tamase gere hâ-ūhe xaweb ge Jehovaba gere ǃâubasen în ǃhaokhoena ‘ǁîn ǂûn khami’ hâ-ū.—Lev. 19:33, 34.
(Eksodus 23:20, 21) Mû, tita ge ǀhomǃgāba sa ais aiǃâ ra sî, nē daob aib nî sâu tsi tsî ǁnā ǃās, tita ǂhomi hâs tawab nî ūsī tsiga. 21 ǂAnbasen ǁîb di ais aiǃâ îts ǁîb di domma ǁnâuǀnam, îts ǁîba tā au-auǃnâ. Sadu di ǃûǂamdeb ǀûba du tide amaga, ti ǀons ge ǁîn ǃnāb ǃnâ hâ xui-ao
it-2-E 393
Mixaeli
1. ǁÎb tsî Gabrieli tsîn ǀguin ge ǃanu ǀhomǃgākha ase Elobmîs ǃnâ ra mîhe tsî ǁîb ǀguib ge “ǂamǀhomǃgāb” ase a ǂansa. (Jud. 9) ǂGuro ǃkhais hînas nē ǀonsa ra xoahes ge disiǁî danaǃās Danieli dis tawa, hînab Mixaela hoa ǀhomǃgāgu xa a ǀgapise ra mîhesa. Mixaeli ge “gaosab Danieli khoen” dib ase ge re ǂgaihe,ǀgapi gaosab hîna hoa khoen Danieli di na ra mâbab ases tsîna gere ǂgaihe. (Dan. 10:13, 20, 21; 12:1) Nēs ge Mixaela Israelǁîna ǃgaroǃhūba xu ūǂuisa ǃoa ra ǁnaeǁgau. (Eks. 23:20, 21, 23; 32:34; 33:2) Nēn hoana ǀam kais ǃaroma da ge ra mû Mixaeli hîna a “ǂamǀhomǃgāb ge ǁGâuab ǀkha ǁnâusāgu tsî Moseb di soros ǃaroma gere ǂnoagusa.”—Jud. 9.
Elobmîs khomai ǃâs
(Eksodus 23:1-19) ǂKhaba gom-ets ge ǃkhōǃoa tide îts eloxoresaba tā mâǃgâ, ǂkhaba ǂgā-amao kaits nîse. 2ǂGuibats ge ǂkhabadīǃkhaidi ǃnâ sao tide; tsîts ge ǁkhāti ǂnoaguǃkhai-i ǃnâ ǃhoa tide, îts tā ǂguiba ǂōsenǀî, ǂhanubats nî gama kaise. 3 Tsîts ge ǁkhāti ǀgâsaba mâba tide, ǁîb di ǂnoaguǃkhai-i ǃnâ. 4 Sa khākhoeb di gomab kas, ǁîb di ǁhapuma ra eseli kas hoasats ga ǃoao, ots ge ǁîba hoaragase ǁkhawa nî ūsība bi.5 Satsa ra ǁkhanni di eseli ǃnaob ǃnâ ǁgoe ǃkhaisats ga mûo, ǁnâi ǀhawets nî sa xū-e ǁnāxūsa ǁîb ǃaroma, ǁîbats nî huise? Sats ge nî ǁnāxū i, ǁîb ǃaroma.6 Sa ǃgâsab di ǂhanubats ge gama kai tide ǁîb di ǂnoaguǃkhai-i ǃnâ. 7ǃNūse hâ ǂkhaba ǃkhai-e xu, tsîts ge ǀhapio-i tsî ǂhanu-ai-e ǃgam tide: Eloxoresa-e ta ǂhanu-ai kai tide xui-ao.8 ǁKhātits ge ǃnarexū-e ū tide; ǃnarexū-i ge mû rana ra ǂgī kai tsî ǂhanu-ain di ǃkhaisa ra dabaǃkhuni xui-ao. 9ǃHaokhoebats ge ǁkhāti ǁgâiǀā tide: ǃHaokhoe-i di ǂgaobats a ǂan xui-ao, sadu on kom ǃhaokhoe ge io Egipteǃhūb ǃnâo.10 ǁKhātits ge ǃnani kuriga sa ǃhanaba nî tsoro-ai tsî ǁîb di ūǀkhīna nî ǀhaoǀhaobasen; 11xawe hûǁîb aits ge ǁîba sâ tsî nî ǁgoe kai, în ǀgâsan sa ǁaes dina ǂû, în ǃgau ka xūna ǃaub di ǀguruna ǂû; ǁnās ǁkhās xasets ge ǁkhāti nî dī sa ǂauxûiǂûǃhanab ǀkha tsî sa ǀkherahaidi ǀkha. 12ǃNani tsēdets ge sa sîsenga nî dī, xawe hûǁî tsēs aits ge nî sâ, sa gomab tsî sa eseli tsîkha nî sâga, sa ǃgās di ôab tsî ǃhaokhoeb tsîkha nî ǀomǂnûise. 13 Sado ta gere mîban hoan, ǁîna du ge nî ǃkhōǀgaipe; tsî ǀkhara elogu di ǀons xa du ge ǂâi tide, sa amsa xus ge ǁnâuhe tide. 14 ǃNona ǃnādi kōse du ge kurib ǃnâ kaitsē-e tita nî tsēdība: 15 Kaitsēs ǀkhuruǀkhuruhe tama peregu disats ge nî tsēdī. Hû tsēdi kōsets ge ǀkhuruǀkhuruhe tama peregu xa nî ǂû, mîmā tsi ta go khami, mîmâihesa ǁaeb ai, Abib ǁkhâb ǃnâ; ǁîb ǃnâts ge Egipteba xu doeǂoa amaga, xawen tā ǀkhaiǃnâse ti ais aiǃâ ǂhai. 16Tsî ǃgaos di kaitsēs ǂguro ǂûn sa xūreb din, ǃhanab aits nî tsoro hân disa. Tsî ǀhaoǀhaobasens di kaitsēs kurib di ǀamǂoas ai, sa xūrebats ga ǃhanaba xu ǀhaoǀhaobasen ǃnubai. 17ǃNona ǃnādi kōse gu ge sa aogu hoaga kurib ǃnâ ǃKhūb Elob di ais aiǃâ nî ǂhai. 18 Ti ǁguibas di ǀaobats ge ǀkhuruǀkhuruhe hâ peren ǀkha ǁguiba tide, ǁkhātib ge kaub ti kaitsēs diba ǁgoas kōse hâǁgoa tide. 19 ǂGurosan sa ǃhanab di ǂguro ǂûn dinats ge ǃKhūb, sa Elob di ommi ǃnâ nî ūǂgâ. Piriro-ets ge ǁgûs di dai-i ǃnâ sâi tide.
SEPTEMBERI 14-20
ELOBMÎSA XU HÂ ǂÛǂÛSA MÎDI | EKSODUS 25-26
“ǂHâǂhâsa xūn tabernakeli ǃnâ”
(Eksodus 25:9) Tita aiǁgau-i nē tabernakeli di-e satsa nîra ǁgaus hoas, tsî aiǁgau-i ǁî-i sîsenūxūn hoan di-i nî ī xase, ǁnās ǁkhās xasets ge satsa ǁî-e nî dī.
it-1-E 165
ǃGaeǀhaos di arki
Kurus tsî ǀgaub. ǂGuro xū-i hînab ge Jehovaba Moseba a mîba i ge matib nē tabernakela nî kurus tsî mati i nî mûsens tsîna, nē sîsen i ge kaise kai i ǃkhais ǃaroma. Nē tabernakeli ge 2.5 sentimeterga gaxu, 1.5 sentimeterga ǂhaba tsî 1.5 sentimeterga ge ǀgapi i. Tabernakeli ge akasiahain ǀkha ǂganagaba ge dīhe hâ i tsî ǃhuniǀurib tsîna ge ūhâ i. Nē îsase dīhe hâ ǃhuniǀurib ge hoa xūna ǃamkuse gere mûsen kai. ǀGamǁî ǃâb arki dib ge ǃhuniǀuriba ge ūhâ i xawe nēs ge ǀgapise ge dīhe hâ i tsî hain tsî ǃhuniǀurib ǀguiba ūhâ tama hâ i hoa ǃkhaidi ai. Nē arki ais ai ge mâisa i kha ge ǀgam xerukha hîna ge mâb hoaba ǁîb ǀkhāb ai mâ i tsî i ge hoakha di danade ge ǃgamsa i ǁîkha di ǁgapoga ūǂui hâse. (Eks. 25:10, 11, 17-22; 37:6-9) Nē ǃgū-ais ge “ǀkhommi trons” ase ge ǂansa i.—Eks. 25:17; Heb. 9:5; ǀKHOMMI TRONS di hâ ǃâba mû re.
(Eksodus. 25:21)Tsîts ge ǂkhîbagus di ǃgū-aisa ǂgaes ǂamǃnâ nî ǂnûi, ǀhûǀguitimîs, tita nîra mā tsisats ga ǂgaes ǃnâ ǁguis khaoǃgâ.
it-1-E 166 ¶2
ǃGaeǀhaos di arki
Arki ge ǃanu ǃkhais ase ge ūhâ-e hâ i hîna ge hoa ǃanu xūna ūhâ iba, nēs ge ǀgam ǀuira hîna ge disi mîmāde ūhâ i ra tsîna ge ǃkhōǂga hâ i. (Eks. 25:16) “ǃHuniǀurixapas, manab hâǃnâs tsî Aronni haib ǀom geb” tsîn ge arki ǃnâ ge ǀaro-e xawe ega ǁkhawa ge ūǂui-e Salomob tempeli nî omhes aiǃâ. (Heb. 9:4; Eks. 16:32-34; Num. 17:10; 1Gao. 8:9; 2Kro. 5:10) ǁŌb nîs aiǃâb ge Moseba “ǂhanub di ǂkhanisa” Leviǁî pristerga ge mā, daoǁgaudi ǀkha, mî rase îgu “ǁîsa ǃgaeǀhaos, ǃKhūb di ǂgaes xōǀkhā ǁgui, îs ǁnāpa ǀhûǀguitimî-aose hâ ǁîgu ǃoagu.”—Deu. 31:24-26.
(Eksodus 25:22) O ta ge tita ǁnāpa sa tawa nî sī, tsî ta ge tita sa ǀkha nîra ǃhoa ǂkhîbagus di ǃgū-ais di ǂamǃnâba xu, ǀgam xerukha, ǀhûǀguitimîs di ǂgaes ai hâkha ǁaeguba xu ǁnā xūn, Israeli ôana ta nî satsa mîba kain hoana.
it-1-E 166 ¶3
ǃGaeǀhaos di arki
Jehovab ǀkha ge ǃgaeǀhaosa i. Arki ge Jehovab ǀkha ge ǃgaeǀhaosa i tsoatsoasa xu. Jehovab ge ge mîmâi: “O ta ge tita ǁnāpa sa tawa nî sī, tsî ta ge tita sa ǀkha nîra ǃhoa ǂkhîbagus di ǃgū-ais di ǂamǃnâba xu, ǀgam xerukha, ǀhûǀguitimîs di ǂgaes ai hâkha ǁaeguba xu.” (Eks. 25:22; Lev. 16:2) Samueli ge xoa tsî ge mî Jehovab “xerukha ǁaegu ǁan” hâ di, (1Sam. 4:4) xerukha ge Jehovab di ǂnûǁkhaeba-aose ge hâ i. (1Kro. 28:18) “Tsî Moseb ge tentoms ǀhûs dis ǃnâ ǂgâo, ǁîb ǀkhab nî ǃhoase, ob ge dommi, ǁîb ǀkha ra ǃhoaba ge ǁnâu ǂkhîbagus ǂgaes ǀhûǀguitimîs di ǂgaes ai hâsa xu, ǀgam xerukha ǁaegu. Nētib ge ǁîb ǀkha ge ǃhoa.” (Num. 7:89) Ega kha ge Josuab tsî ǀgapi pristeri Pinehab hâkha Jehovab ǀkha arki ais ai gere ǃhoa. (Jos. 7:6-10; ǂHǂh. 20:27, 28) Xawe ǀgapi pristeri ǀguib ge ǁnā ǃanu ǃkhais ǃnâ ǂgâ tsî arka ge mû, ǀgui tsēsa kurib ǃnâ Jehovab ǀkha ǃhoas ose xawe nē tsēsa tsēdīs ǃaroma.—Lev. 16:2, 3, 13, 15, 17; Heb. 9:7.
Gagasi xūna ǀō-aisase ôaǃnâs
(Eksodus 25:20) Î kha xerukha ǁgabogu âkha ǀgapise ǃā, î kha ǂkhîbagus di ǃgū-aisa ǁîkha di ǁgabogu ǀkha ǃgū-ai, î ra ǁîkha di aira ǃoagu; î ra xerukha di aira ǂkhîbagus di ǃgū-aisǀî kō.
it-1-E 432 ¶1
Xerub
Xeruga ra ǂnûǁkhaeba xūn tsîn ge tabernakeli ǃnâ ge hâ i hîna ge ǃgaroǃhūb ǃnâ hâ iba. Arki di ǀams hoas ai i ge xerugu hîna ǃhuniǀurib ǀkha a kurusaga ge hâ i. ǁÎkha ge danade ǃgam hâse ge mâ i ǃoaba ra khami. Hoakha ge ǀgam ǁgabokha ge ūhâ i hîna ge tabernakela gere ǁkhaubakha. (Eks. 25:10-21; 37:7-9) Tentoma gere ǃgū-ai ūhe sarab tabernakeli ǃnâb tsî ǃanu ǃkhaiba ge kaise ǃanu ǃkhaiba xu gere ǀgora sarab tsîn ge xerugu ai-īsiga ge ūhâ i.—Eks. 26:1, 31; 36:8, 35.
(Eksodus 25:30) Tsîts ge nē tāb ai ǁkhāti hugaǀgui ǁgaupereba ti ais aiǃâ nî ǁgui.
it-2-E 936
ǁGaupereba
Disi ǀgamǀā ǁgauperen ge tāb ai gere māhe kaise a ǃanu ǃkhaib tawa tsî mâǁaeb hoaba gere ǃkhōǃkhunihe ǀasan ǀkha. (Eks. 35:13; 39:36; 1Gao. 7:48; 2Kro. 13:11; Neh. 10:32, 33) Hebreǁî ǁgaupere kurus ge ais di pereb di ra ǂgaihe. Nē mîs ais di hâs ge hâǃkhaib dis tsîna a ǂâibasen ǁkhā (2Gao. 13:23) tsî nēs ǀkhab ge nē ǁgaupereba Jehovab ais ai ge hâ i ǁguiba-i ase. (Eks. 25:30) ǁGaupereb ge “hâhâ ra pereb” (2Kro. 2:4) tsî (Mrk. 2:26) “ǁgauperegu” ases tsîna a ǂansa (Heb. 9:2).
Elobmîs khomai ǃâs
(Eksodus 25:23-40) Tsîts ge ǁkhāti tāba nî dī, akasiahain xa: ǀGam ǂhâkha kōse ab gaxu îb ǀgui ǂhâb kōse ǂhaba, îb ǀgui ǂhâb tsî ǃkhareb kōse ǀgapi. 24Tsîts ge ǁîba ǀui ǃhuniǀurib ǀkha nî ǃkhûǀkhā; tsîts ge ǁkhāti ǃhuniǀurikransa ǁîb ǂnamipe nî dī. 25Tsîts ge ǁîb ǂnamipe ǃkhui-amhai-e nî dī, ǃommi ǂhabab kō-e; tsîts ge ǃhuniǀurikransa nî dī ǁîb di ǃkhui-amhais ǂnamipe. 26Tsîts ge ǁîb ai ǁkhāti haka ǃhuniǀuriǃganuna nî dī; tsîts ge ǃganuna nî ǂnûi ǁnā haka ǁhôagu, ǁîb di haka ǂaidi tawa nî hâgu ai. 27ǃKhui-amhais ǃoa-ain ge ǃganuna nî hâ tanihaigu di ǂgāǃnâxūse, tāb nî tanihese. 28Nē tanihaigats ge akasiahain xa nî dī, tsîts ge ǁîga ǃhuniǀurib ǀkha nî ǃkhûǀkhā; tsî tāb ge ǁîgu ǀkha nî tanihe. 29Tsîts ge ǁkhāti nî dī ǁîb di ǃorede tsî ǁîb di ǀanǀansoade tsî ǁîb di ǂhaba ǃorede tsî ǁîb di ǀgabide, ǁîde xun nî ǂnâde; ǀui ǃhuniǀurib xats ge ǁîna nî dī. 30Tsîts ge nē tāb ai ǁkhāti hugaǀgui ǁgaupereba ti ais aiǃâ nî ǁgui. 31 Tsîts ge ǁkhāti kandelara nî dī ǀui ǃhuniǀurib xa. ǂNauǃgâiǃgâihe hâ xū-i xab ge kandelara nî dīhe, tsî ǁîb di ǃgaos tsî ǁîb di ǁôagu tsîna, ǁîb di ǀgabidi tsî ǁîb ǃhûdi tsî ǁîb di ǃkhādi ge ǁîba xu nî ǀkhī. 32Tsî ǃnani ǁôagu ge ǁîb di ǃnamkha xu nî ǂoaxa: ǃNona ǁôagu kandelari diga ǀgui ǀkhāb âba xu, tsî ǃnona ǁôagu kandelari diga nau ǀkhāb âba xu. 33ǀGui ǁôab ǃnâ di ge ǃnona ǀgabide nî hâ, amandelǂûn khami īde, ǀgui ǃhûs tsî ǀgui ǃkhās tsîra; tsî ǃnona ǀgabidi amandelǂûn khami īde nau ǁôab ai, ǀgui ǃhûs tsî ǀgui ǃkhās tsîra; nēti gu ge ǁnā ǃnani ǁôagu kandelara xu ra ǂoaxaga nî ī. 34Tsî kandelari ǂhanib tawa di ge haka ǀgabide nî hâ, amandelǂûn khami īde, ǁîb di ǃhûdi tsî ǁîb di ǃkhādi ǀkha. 35Tsî i ge ǃhû-e nî hâ ǀgam ǁôakha ǃnagaba xu ra ǀkhīse. ǁNāti i ge nî ī ǃnani ǁôagu, kandelara xu ra ǀkhīgu ǀkha. 36ǁÎgu di ǃhûdi tsî ǁîgu di ǁôagu ge ǁîba xu nî ǂoaxa; ǁîn hoan ge ǀgui ǂnauǃgâiǃgâihe hâ sîsenai-i ǀgui-i ase nî i, ǀui ǃhuniǀurib xa. 37Tsîts ge ǁkhāti hû ǃamamǀaede ǁîba nî dība, î di ǃamamǀaedi âba ǃamamhe, î di ǃnâ ǁîb di ǃnamkha ai. 38ǁÎb di ǁaraǂaoxūn tsî ǁîb di ǀari-ūxūn tsîn ge ǀui ǃhuniǀurib xa nî dīhe. 39ǀGui talens ǀui ǃhuniǀurib ǀkhan ge nî dīhe, nē xapan hoan ǀkha. 40 Kōbasen ǁnâi îts ǁîna dī ǁîn di ai-ība ǃoa, ǃhommi aits ge ǁgauheba.
SEPTEMBERI 21-27
ELOBMÎSA XU HÂ ǂÛǂÛSA MÎDI | EKSODUS 27-28
“Tae-e da pristergu saraba xu a ǁkhāǁkhāsen ǁkhā?”
(Eksodus 28:30) Tsîts ge ǁkhāti ǁkhaib di ǃkhaib ǂhanub dib ǃnâ Urims tsî Tumims tsîra nî ǂnûi, Aronni di ǂgaob ai ra nî hâga, ǃKhūb di ais aiǃâb ga ǂgâ ǃnubai. Nētib ge Aronna ǂhanub Israeli ôan diba hugaǀgui ǂgaob âb ai nî tani ǃKhūb di ais aiǃâ.
it-2-E 1143
Urims tsî Tumims
Elobmîs ôaǃnâ-aon ge ge ǂgom hâ i Urims tsî Tumims tsîn a ǂgui ǃkhaisa. Nēs ge ‘ǂgui ǃanu xūn’ ase Eksodus 28:30 ǃnâ a ǂansa James Moffatt ǂnûiǃkhunis ǃnâ. ǀNîn ge ra mî nēs ge ǃnona ǃâga ge ūhâ i di, ǀguis “î” di xoasas, nausa “hî-î” di tsî ǀnî hâsa xū-e ge xoasa tama hâ i. Nē ǃnona ǂkhanigu ge gere ǂgae-e tsî i ge māsa dîsa gere ǃeream-e xawe xū-e xoasa tama hâ ǂkhanib gere ǂgaehe o, o i ge ǃeream-e ge ǂhâbasa tama hâ i. ǀNîn ge gere ǂâi nē ra ge ǀgam ǀui i di hîna ge ǀgui ǀkhāb ai ǃuri tsî nau ǀkhāb ai ǂnū i de. Nē ǀuira ga aohe o tsî i ga ǀgam ǃuri ǀkhākha ai ǁnā o, os ge nēsa “î” di gere ǂâibasen tsî ǀgam ǂnū ǀkhākha ai i gere ǁnā o, o i ge “hî-î” di gere ǂâibasen tsî ǂnū tsî ǃuri ǀkhākha ai i gere ǁnā o, o i ge “hî-î” di gere ǂâibasen. ǀGui ǃnās aib ge Sauluba pristera a dî o Filisteǁîna ǁnāǂams ǀkhab nî aiǃgû ǃkhaisa ob ge, hî-î di hâ ǃereamsa ge hō. ǁÎb khoegu di ǀguib go ǁore di ǂâi tsîb ge ge mî: “Israeli Elo, Tumimsa mā re.” Saulub tsî Jonatanni tsîn ge ǁnāpa ge hâ i khoena xu ge ūhe, ǁnās khaoǃgân ge khoena ǁîkha ǁaegu nî ǁhûis ge ge i. Nē ǃnaeǃkhais ǃnâ i ge “Tumimsa mā re” di hâ mîs tsî ǀuide aos tsîna a ǃkharagagu xawe i ge nē ǀgam xūn ǁaegu ǃgaeǀhao-e ge hâ i.—1Sam. 14:36-42.
(Eksodus 28:36) Aiǃâts ge ǀuriǃâsa nî dī ǃhuniǀurib ǀguib ǀkha, tsîts ge ǁîs ǃnâ nî xoa segelxoaǂgās ǀkha: ǃANUSIB ǃKHŪB DIB, ti.
it-1-E 849 ¶3
ǃŪs
Israeli ǀgapi pristeri. ǀGapi pristeri Israeli dib ge ǁîb danas ai hâ ǃkhaib ai ǃhuniǀuris khami ǃgupu xūrosa ge uhâ i mî rase “ǃanusib ge Jehovab di.” (Eks. 28:36-38; 39:30) Jehovab di ǂnûǁkhaeba-aob aseb ge ǀgapi pristera hoaǁae gere dītsâ ǁîb di sîsen ǃnâ ǃkhaisa ǃanuse ūhâsa tsî nēs ge nî ǁgau matin nau Israelǁîna ǃanuse nî hâsa Jehovaba ǃoabas ǃnâ. Tsî nēs ge kai ǃgôasib tsîna ra ǁgau hoagu xa a ǀgapi pristeri Jesu Xristub ǃaroma, hîna Jehovab xa ǁgaumâihe hâba.—Heb. 7:26.
(Eksodus 28:42, 43) Îts ǁkhāti lineǀnūsarana ǁîga dība, taotaosa ǃkhais di ǁgans nî ǃgū-aihese; ǁîn ge kamanaba xu ǀkhoedi kōse nî sī. 43Tsî Aronni tsî ǁîb di ôagu tsîgu ge ǁîna nî tani, ǀhûs di tentoms ǃnâ gu ga ǂgâs, altarsa gu ga ǀgūs hoasa, ǃanusib ǃnâ gu nî ǃoabase; î gu tā ǂhanuoǃnâsi-e tani tsî ǁō, ti. Nēs ge ǀamo ǂnûiǂgāse nî ība ǁîb tsî surib âb tsîna, ǁîb khaoǃgâ.
w08-E 8/15 15 ¶17
Jehovaba ǃgôasiba ǁgau re
17 ǀŌ-aisa ǃgôasiba da ge Jehovaba da ra ǃoaba ǀgaub ǃnâ nî ǁgau. Aoǁnâ-aob 5:1 ge nēti ra mî: “Sâu re sa ǂaisa, Elob ommi ǃnâts ga ǂgâ ǃnubai.” Moseb tsî Josuab hâkha ge gere mîbahe î kha ǃanu ǃkhais tawa kha ga sī o ǁharode ǁhû. (Eks. 3:5; Jos. 5:15) Nēsa kha ge ǃgôasiba ǁgaus ǃaroma gere dī. Israeli di pristergu ge hoaǁae lineǀnūsaraba gere ana ǁîgu “taotaosa ǃkhais di ǁgans nî ǃgū-aihese.” (Eks. 28:42, 43) Tsî nēs ge ǁîga taoba xu gere hui altars tawa gu gere ǃoaba o. Hoa pristergu ge gere dītsâ Jehovab daoǁgaude saosa ǃanuse hâs xa.
Gagasi xūna ǀō-aisase ôaǃnâs
(Eksodus 28:15-21) Tsîts ge ǁkhāti ǁkhaib ǃkhai-i ǂhanub di-e nî dī hoan xa ǁkhā dommi ai; efob ra dīhe khamits ge ǁî-e nî dī; ǃhuniǀurib xa tsî ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhaib xats ge ǁî-e nî dī. 16Hakaǁhôaxase i nî ī tsî ǃhonarisa; ǀgui ǂhaob kōse i ge nî gaxu, tsî ǀgui ǂhaob kōse i ge nî ǂhaba. 17Tsîts ge ǁî-e ǃnamǂgāhe hâ ǀuidi ǀkha nîra ǀoaǀoa, haka ǁgaradi ai; ǀgui ǁgaras ge nî sardi tsî ǀguis topa tsî ǀguis karbonkel. Nēs ge ǂguro ǁgarasa. 18Tsî ǀgamǁî ǁgaras ge nî smarag tsî ǀgui safir tsî ǀgui diamant. 19Tsî ǃnonaǁî ǁgaras ge nî ǀgui hiasint tsî ǀgui axats tsî ǀgui ametis. 20Tsî hakaǁî ǁgaras ge nî ǀgui turkoe tsî ǀgui sardoniks tsî ǀgui jaspi; ǁîdi ge ǁgaradi hoadi ai ǃhuniǀurib ǀkha nî hâǂgāhe. 21Tsî nē ǀuidi ge disiǀgamǀa ǀondi Israeli ôagu didi ǀkha nî hâ, ǁîgu di ǀondi ǀkha; ǁgâiǂganxūdi ra xoaǂgāhe khami nî xoaǂgāhe, mâs hoas ǁîs di ǀons ǀkha, disiǀgamǀa ǃhaodi ǃoa.
w12-E 8/1 26 ¶1-3
ǂAn i du a?
Mâpa xu di ǁnā îsa ǀuidi hîna ǀgapi pristeri tawa hâde ra ǀkhī?
IsraelǁÎn ge Egipteba xu a ǂoa o, ob ge Jehovaba ǁîna mîmāde ge mā în ǁnā ǀuide kuru tsoatsoa. (Eks. 28:15-21) Nē pristeri ai nî ǂnû ǀuidi ge nē xūna ge ǃkhōǂgā hâ i robain, topas, sardi, ǃhuniǀurib, turkoes, safir, jaspi, diamants, sardoniks, smarag. Israelǁîna nē ǀuide ū i ge hâ i?
Elobmîs ǁaeb ain ge ǂgui khoena nēti i ǀuide kaise ǂgui marisa gere matare îsa di ge i ǃkhais ǃaroma. Aiǁgausen ge Egypteǁîna kaise ǃnūseba xu nē ǀuide gere hō, nētsē da sada Iranni, Afghanistanni tsî ǀnîsi Indiab ase a ǂan ǃhūga xu. Egipteǁîn di khao ǃkhaidi ge îsa ǀuide gere kuru tamas ka io ge ūhâ i. Egipteǁî ǃkhū hâ khoegu ge nē ǀui khao ǃkhaiga gere mûǂam. Jobi ge ra ǁguiǃā mati gu ge ǁîb ǀhōsaga ǃkharagaǃnâgu xūna gere sîsen-ūsa nē ǀuide ôas ǃnâ. Hoa xūn hîna gere khaohen ǃnâ i ge topas tsî safiri tsîna ǃnāsase gere khaoǂuihe.—Job. 28:1-11, 19.
Eksodus di ǃnaeǃkhaidi ge ra ǁgau matin ge Israelǁîna hoa ǂhâǂhâsa xūna ū tsî a doeǂoasa. (Eks. 12:35, 36) ǁNā-amaga da ge a mî ǁkhā Israelǁîn ge nē ǀuide Egipteǁîna xu a ūsa tsî nē ǀgapi pristerga gere kurubasa.
(Eksodus 28:38) Tsîs ge ǃūs Aronni dis ai nî hâ, îb Aronna tani ǂhanuoǃnâsib ǃanu xūn, ǁnā xūn, Israeli ôan nî khai hân dib, ǁîn nî khai hâ xūn hoan ǃnâ; tsîs ge hugaǀgui ǃūs âb ai nî hâ, ǃKhūb di ais aiǃâb nî ǁîna ǃgâiǃgâise.
it-1-E 1130 ¶2
ǃAnusib
Xamanin tsî ǁîna xu ra hā xūn. ǂGuro aore ǃnaesabe-i gomab, gūs tsî piri-i tsîn di-i ge Jehovab mûǁae ǃanuse gere mûhe tsî ǁkhaubas ase ge matarehe tama hâ i. Nēn ge ǁguibas ase gere sîsen-ūhe tsî ǀnî ǃâgu ge ǃanu pristerga gere māhe. (Num. 18:17-19) ǂGuro ǂûn tsî tiende di tsîn ge ge ǃanu i tsî hoa ǁguibadi hîna gere dīhe di tsî hoa ǀkhaexūn hîna ge altars tawa gere māhen tsîna. (Eks. 28:38) Hoa xūn hîna ge Jehovab ǃoagu ǃanu în ge ǁause tātsēs tsîna ge ūhe tama hâ i. ǀGui aiǁgaus ge tiendes xa hâ ǂhanuba. Aob ga tiendes aseb ra mā ǂgao xū-e ǂnûiǂui xawe i ga ǁîb tamas ka io ǁîb oms khoe-e ǁnā xū-e oms ǃaroma sîsen-ū o, o i ge nē khoe-e Elob ǂhanub hîna ǃanu xūn xa hâba gere khôa. ǂHanub ge gere ǂgaoǀkhā i-i ǁî-e nē xū-i go ǂgan marisa mā-oa tsî noxoba 20 persenti tsîna tsî ǁnās ǂam-ai gūb tsîna gere mā. ǁNās ǀkha i ge Jehovab ǃoagu a ǃanu xūna ǃgôaǃgâsiba gere ǁgau-e.—Le 5:14-16.
Elobmîs khomai ǃâs
(Eksodus 27:1-21) Tsîts ge ǁkhāti altarsa nî dī akasiahain xa; koro ǂhâgu kōses ge nî gaxu tsî koro ǂhâgu kōse ǂhaba (hakaǁhôaxas ge nē altarsa nî ī) tsî ǃnona ǂhâgu kōse ǀgapi. 2Tsîts ge ǁîs di ǁnâga haka ǁhôagu âs ai nî dī, ǁîga xu gu ge ǁnâgu âsa nî ǀkhī; tsîts ge ǂai-i ǀkha ǁîsa nî ǃkhûǀkhā.3Tsîts ge ǁkhāti xapana nî dī, tsaob âsa nî ǃkhōǃoana, ǁkhāti ǁîs di sîsenbē-ūxūn, ǁîs di ǀgapiǃoredi, ǁîs di forkn tsî ǁîs di ǂnomǃorede; ǁîs di sîsenūxūn hoanats ge ǂaib xa nî dī. 4Tsîts ge ǁîsa rostera nî dība, ǂaib xa dīhe hâb, ǂhams khami ība; tsîts ge ǁnā ǂhams khami ī rosteri tawa ǃganuna nî dī ǁîb di haka ǁhôagu tawa.5Tsîts ge ǁîba nî ǁgui altars di ǃgûǂnamipes ǃnagaba xu, îb ǂhams khami ī rostera altars ǁaegub ǃnâ hâ. 6Tsîts ge ǁkhāti altarsa tanihaikha nî dība, tanihaikha akasiahain xa; tsîts ge ǁîkha ǂaib ǀkha nî ǃkhûǀkhā. 7Tsî tanihaikha ge ǃganun ǃnâ nî ǂgāhe, î kha tanihaikha altars di ǃnamkha hoakha ai hâ, tanihes ra hîa.8 Tsîts ge ǁîsa ǃnaon ǀkha nî dī ǃgoaǃnāse; ǁîb ge ǃhommi ai ǁgau tsis ǁkhās khamits ge nî dī.9 Tsîts ge ǁkhāti ai-ommi tabernakeli diba nî dī; ǃkhawagasǀî hâ ǃgū-aiǃkhaigu ai-ommi digu ge nî ǀui ǂgâǃnâguhe hâ lineǃkhai, ǀguikaidisi ǂhâgu kōse ǀgui ǀkhāb ai.10ǁÎgu di ǀgamdisi ǂkhâǃnâhaigu tsî ǁîgu di ǀgamdisi ǂaidi ge nî ǂaib ǀkha dīhe; nē ǂkhâǃnâhaigu di ǂhaoǀurin tsî ǁîn di ǃgae-ūdan âgu ge nî ǀhaiǀuri.11Tsî ǁnās ǁkhās xasen ge ǃgū-aiǃkhain ǀapasǀî hâ ǀkhāb dina nî ǀguikaidisi ǂhâgu kō; ǁîgu di ǀgamdisi ǂkhâǃnâhaigu tsî ǀgamdisi ǂaidi âgu ge ǂaib xa nî dīhe; ǂhaoǀurin ǂkhâǃnâhaigu din tsî ǁîn di ǃgae-ūdan ge nî ǀhaiǀuri. 12Tsî ǂhabasib ai-ommi diba-ū huriǂoasǀî hâ ǀkhāb ain ge ǃgū-aiǃkhaiga nî hâ, korodisi ǂhâgu kōse; ǁîgu di ǂkhâǃnâhaigu ge nî disi tsî ǂaidi âgu ge nî disi. 13Tsî ǂhabasib ai-ommi dib ge aiǂoasǀî hâ ǀkhāb ai nî korodisi ǂhâgu kō. 14Nēti: Disikoroǀa ǂhâgu ǃgū-aiǃkhaigu digu ge ǀgui ǀkhāb ai nî hâ: ǂKhâǃnâhaigu ân ge nî ǃnona, tsî ǂaidi âga nî ǃnona. 15Tsî disikoroǀa ǂhâgu ǃgū-aiǃkhaigu digu ge nau ǀkhāb ai nî hâ: ǂKhâǃnâhaigu ân ge nî ǃnona tsî ǂaidi âga nî ǃnona. 16Tsî dao-ams ai-ommi dis ǃnâb ge ǃgū-aiǃkhaiba nî hâ ǀgamdisi ǂhâgu kōba, ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhaib xa anansîsenai-e, ǂkhâǃnâhaigu ge nî haka tsî ǂaidi âga nî haka. 17ǂKhâǃnâhaigu ai-ommi digu hoagu ge ǀhaiǀuri-anixūn ǀkha nî ǃkhûǂnamipehe; ǂhaoǀuriron âgu ge nî ǀhaiǀuri, tsî ǂaidi âgu ge nî ǂai. 18Gaxub ai-ommi dib ge nî ǀguikaidisi ǂhâgu kō, tsî ǂhabasib nî mâ ǀkhāb hoab ai korodisi tsî ǀgapisib nî koro ǂhâgu kō, ǀui ǀhôahe hâ lineǃkhaib xa; tsî ǂaidi âgu ge nî ǂai. 19Tsî sîsenūxūn tabernakeli din xasa, ǁîn ge sîsenni ân hoab ǃnâ, ā, ǃgaeǁareǀurin âb tsî ai-ommi di ǀurin hoan ge nî ǂaiǀuri.20 Israeli ôana ǁnâi mîmā, în ūhāba tsi ǃanu olib ǀkherab dib xa ǃamamxūsa ǁgâibahe hâba, î di ǃamamǀaede hugaǀgui ǁîb ǀkha ǃamamhe. 21Tentoms ǀhûs dis ǃnâ, ǂgāmâiǃkhaib ǀhûǀguitimîs aiǃâ hâb ǃauga, ǁnāpa gu ge Aronni tsî ǁîb di ôagu tsîga ǁîsa nî ǁāǁā, ǃuisa xu ǁgoas kōse, ǃKhūb di ais aiǃâ; nēs ge ǀamo ǂnûiǂgāse nî ība ǁîn di ǃhaodi hoade Israeli ôan ǃnâ.
SEPTEMBERI 28–OKTOBERI 4
ELOBMÎSA XU HÂ ǂÛǂÛSA MÎDI | EKSODUS 29-30
ǁGuiba-e Jehovaba ǃoa
(Eksodus 30:11, 12) Aiǃâb ge ǃKhūba Moseba ǃhoaǀî tsî ge mî: 12Israeli ôan danakhoegu di ǀgausats ga ǃgôao, kōǂnamipe gu kao, ob ge mâb hoaba ǃKhūba ǂkhîbagumarisa nî mā ǁîb di ǀoms ǂama, ǁîgats ra ǃgôa hîa; tsû-ai-i ǁîga hāǂam tidega, kōǂamhe gu ra hîa.
it-2-E 764-765
Xoaǂgās
Sinaiǃgaroǃhūb ǃnâ. ǂGuro xoaǂgās ge Jehovab mîmās ǃnāga Sinaiǃgaroǃhūb ǃnâ ge hâ i, ǀgamǁî ǁkhâb, ǀgamǁî kurib dib ǃnâ, Egipteba xun ge ǂoas khaoǃgâ. Moseba nēs ǃnâ huis ǃaroma i ge, mâ ǃhaos hoas ǃnâ mûǂam-aoba ge ǁgaumâihe îb ǁîb khoena nē xoaǂgās ǃnâ mûǂam. 20 Kuriga ǃkharu hâ aore khoegu ǀguigu ge torob ǃgao ge ǁhûihe tama hâ i xawen ge hoan hîna ge xoaǂgāsena ǃkhareb sekels diba gere mā, tabernakela sîsen-ūs ǃaroma. (Eks. 30:11-16; Num. 1:1-16, 18, 19) Māsa ǃgôab khoen ge 603 550 kōse gere sī, Leviǁîna ǃkhōǂgā tama hâse, ǁîn ge nē ǃhūba ǀumi tama hâ i amaga. ǁÎn ge tabernakela sîsen-ūs ǃaroma ge matare tama hâ i tsî torob ǃnâ ǁhaosa ge mā-amhe tama hâ i.—Num. 1:44-47; 2:32, 33; 18:20, 24.
(Eksodus 30:13-15) Nēti gu ge nî mā, mâb ǃgôahe hâgu ǃoa ra sīb hoaba: Sekels di ǃkhareba ǃanusib di sekels ǃoa (nē sekels ge a ǀgamdisi gera). Nē ǃkhareb sekels dib ge ǃKhūba ǃkhōkhâiǁguibase nî ība. 14Mâb, ǃgôahe hâgu tawa ra sīb, ǀgamdisi kurigu â-ib tsî ǃnā hâb hoab, ǁîb ge ǃKhūba ǃkhōkhâiǁguibasa nî mā. 15ǃKhū hâb ge ǁîs ǃgâ-ai ǂguina mā tide, tsî ǀgâsab ge nē ǃkhareb sekels dib xa ǀorose mā tide, ǃKhūb di ǃkhōkhâiǁguibasa du ga mâo, sadu di ǀomdi ǃaroma du ǂkhîbagusa nî dīse.
it-1-E 502
ǁGuibas
ǀNî ǁguibadi ge ge ǂhâbasa i nē ǂhanub ǃnāga. Moseb ge Israelǁîn di ǃgôaba gere kō o, o ī ge mâ aore khoeb hoaba ǁguibahe gere mā ǁîb di uîb ǃaroma, “ǃkhare sekelsa ǃanu ǃkhaib ǃaroma.” Jehovab di ǁguiba ge īs ge în ǃgaeǀhaosa ūhâ ǁkhā ga tsî “tentomdi ǃnâ ǀhao.” (Eks. 30:11-16) Jodeǁîn di ǂansabeb Josephusi ǃoagu i ge (The Jewish War, VII, 218 [vi, 6]) nē ǀō-aisa māsa, mâ kurib hoaba gere māhe.—2Kro. 24:6-10; Mat. 17:24; mû re MĀSA di hâ ǃâba.
(Eksodus 30:16) Ots ge marib ǂkhîbagudi diba Israeli ôaga xu nî ū, tsîts ge ǁîba tentoms ǀhûs dis di sîsenni tawa nî mâ; tsîts ge ǁîsa Israeli ôana ǂâiǂâisenxūse nî ība ǃKhūb di ais aiǃâ, sadu ǀomde du ǂkhîbagusa nî dībase.
w11-E 11/1 12 ¶1-2
ǂAn i du a?
Matib ge Jehovab di tempela Jerusalems ǃnâ marisise gere ǂkhâǃnâhe?
ǂGui tempelgu di sîsen an ge mādi xa gere ǂkhâǃnâhe ǃgōsase tiende di xa. Xawe ǀnî hâ ǀgaub mās dib tsîn ge gere sîsen-ūhe. Aiǁgause, tabernakeli gere omhe ǁaeb ǃnâb ge Jehovaba, Moseba ge mîba îb ǃkhare sekelde hoa Israelǁîn hîna ge xoamâihe hâ īn tawa ǀhaoǀhao Jehovaba māsa dības ase.—Eks. 30:12-16.
Nēs ge ge ǁnaetī kai, mâ Jodeǁî-i hoa-e nē ǁguibasa kurib hoaba māsa tempeli ǁguibas ase. Nē ǁguibas ge ge i hînab ge Jesuba Petruba ǁaub amǃnâsa xu ge hā maris ǀkha a matare kaisa.—Mat. 17:24-27.
Gagasi xūna ǀō-aisase ôaǃnâs
(Eksodus 29:10) Tsîts ge gomaba ǀhûs di tentoms ǀgūse nî ūhā; o gu ge Aronni tsî ǁîb di ôagu tsîga ǁîgu di ǃomga gomab di danas ai nî ǁgui.
it-1-E 1029 ¶4
ǃOms
ǃOmna ǁgui-aigus. ǃOmdi ge xūna dīs ǃaroma ǀgui ge sîsen-ūhe tama hâ i xawe khoen ai gere ǁguihe tamas ka io ǀnî hâ xūn ai gere ǁguihe. Tsî nēs ge khoe-i tamas ka io xū-i nî ǂanǃgâhe ǃkhais ǃaroma gere dīhe. Pristergu gere ǁgaumâihe ǁaeb ǃnâ gu ge Aronni tsî ǁîb di ǀgôakha tsîna ǁîgu di ǃomde aore gomab danas ai gere ǁgui. Tsî ǁnāpaxū ǀgam gūn ai gere ǁgui hîna gere ǁguibahena tsî nēs ǀkha gere ǁgau nē ǀgurun ge ǁîgu ǃaroma gere māhe ǃkhaisa, Jehovab di prister kai gu go amaga. (Eks. 29:10, 15, 19; Lev. 8:14, 18, 22) Moseb ge Josuaba ǁîb di ǃkhōǃkhuni-aob ase gere ǁgaumâi o, ob ge ǁîb di ǃomde Josuab di danas ai ge ǁgui hîna ge kaise gā-aisib xa ǀoa hâ iba tsî nēs ǀkha Israelǁîna ǃamkuse ǂgaeǂguiǂui ǁkhā iba. (Deu. 34:9) ǃOmdi ge khoe-i ai gere ǁgui-e ǀkhaeba i nî ǃkhōǃoase. (Gen. 48:14; Mrk. 10:16) Jesub ge ǀnî khoen hînab ge ǂgauǂgaun ai ǁîb ǃomra ge ǁgui. (Mat. 8:3; Mrk. 6:5; Luk. 13:13) ǃAnu gagab tsîn ge ǀnî ǁaegu ai ǃomra ǁgui-aihes ǃnâ-ū gere hō-e.—ǃNǃkh. 8:14-20; 19:6.
(Eksodus 30:31-33) Tsîts ge Israeli ôan ǀkha ǃhoa tsî nî mî: Nēb ge olib ǃanu ǂkhauǀkhās dise nî ība teba sadu di ǃhaodi tawa. 32ǀNî khoe-i xare-i di ǁgans aib ge ǂnâhe tide; sats ge ǁkhāti ǀnîba dī tide, ǁîb dīhe hâ khami, ǁîb a ǃanu amaga, ǁîb ge ǃanuse nî ība du. 33ǁNā khoeb nēti ī ǂkhauxūba ga dīb tsî ga ǁîba ǃhaokhoe-i ai dīb, ǁîb ge nî ǃhūǃnomahe ǁîb di ǁaede xu.
it-1-E 114 ¶1
ǂKhau-e hân, ǂkhau-es
Jehovab ge Moseba a mā ǂhanub ǃnâb ge ǂkhau ūhe ra oli- ra kuruhe ǀgaus tsîna ge mā. Nēs ge ǀō-aisa xūna ge ǃkhōǂgā hâ i, aiǁgause, miren, ǃgâiham kaneli, ǃgâiham kalmub, kasiab tsî olib ǀkherahaidi dib. (Eks. 30:22-25) Kaise i ge ge tsū i khoe-e nē xūna ǀhaoǀhao tsî nē oli-e mā-amsa tama hâ ǃaromas ǃgao sîse-ūsa. (Eks. 30:31-33) Nē oli-i ǀkha ǂkhau-es ge khoe-i ǁgaumâis ǂhâǂhâsasiba gere ǁgau.
Elobmîs khomai ǃâs
(Eksodus 29:31-46) Tsîts ge ǂkharagūb ǀoaǀoas diba nî ū tsî ǁgans âba ǃanu ǃkhais tawa nî sâi. 32Tsî Aronni tsî ǁîb di ôagu tsîgu ge ǁgans nē ǂkharagūb disa nî ǂû, tsî pereb, ǀharus ǃnâ nî hâb, dao-ams ǀhûs di tentoms dis tawa. 33O gu ge ǁnā xūna nî ǂû, ǁîn ǀkha ǂkhîbagusa nî dīhe hâ in, ǃommi âgu nî ǀoaǀoahese tsî khaihe gu nîse; xawe ǃhaokhoe-i ge ǁîn xa ǂû tide, ǁîn a ǃanu amaga. 34Tsî xū-i ga ǃgauo ǁnā ǁgans ǀoaǀoaǁguibadi dis xas karao, ǁnā pereb xas karao, nau ǁgoas kōse, ots ge ǃgau go xū-e ǀaes ǀkha nî khauǃkhū; ǁî-i ge ǂûhe tide, ǃanu i a xui-ao. 35Ots ge Aronni tawa tsî ǁîb ôagu tawa hoan ǃnâ ǁnāti nî dī, tita ge mîba tsî khami: Hû tsēdi kōsets ge ǃommi âga nî ǀoaǀoa. 36Tsîts ge ǁkhāti tsēkorobe gomab ǁoreǁguibas diba nî ǀhami ǂkhîbagudīs ase, tsîts ge altarsa nî ǁore-o kai, ǁîs aits ra dī ǂkhîbagudīs ǀkha; îts ǁîsa ǂkhau, khaihes nîse. 37Hû tsēdi kōsets ge altarsa ǂkhîbagusa nî dība tsî ǁnāti nî khai. Nētib ge ǁnā altarsa ǃanusigu di ǃanusise nî ī: Mâ-i, altarsa ga tsâǀkhā-i hoa-i, ǁî-i ge nî ǃanu. 38Tsî nēs ge altars aits nî ǂhomisa: ǀGam ǁkhaokha ǀgui kurib â-ikha mâ tsēs hoas ai hugaǀgui. 39ǀGui ǁkhaobats ge ǁgoas ai nî ǁāǁā; xawe nau ǁkhaobats ge nî ǁāǁā ǃui-amǁaeb ai. 40Efab di disiǁîǃâs tsampereb dis hîa hinǀguiros di hakaǁîǃâs olib dis ǀkha; tsî ǂnâǁguibas ase hakaǁîǃâs ǀgui hinǀguiros ǂauxûib dib ǁnā ǀgui ǁkhaob tawa. 41Tsî nau ǁkhaobats ge ǀgam ǃuira ǁaega nî ǂhomi; ǁîb ǀkhats ge nî dī ǁgoas di ǂûǁguibas ǀkhas ǁkhās khami tsî ǂnâǁguibas âs ǀkhas ǁkhās khami ǀnamǀnamsa ǁamase. ǀAeǁguibases ra ība ǃKhūba. 42Hâhâ ra khauǁguibases nî ī sadu ǃhaodi ǃnâ tentoms ǀhûs dis di ǁāb tawa ǃKhūb di ais aiǃâ. ǁNāpa ta ge tita sadu ǀkha nî ǀhû, gowaǀkhā du ta nîse ǁnāpa. 43Tsî ǁnāpa ta ge tita Israeli ôan tawa nî sī, khaihen nîse ti ǂkhaisiba xu. 44Tsî tita ge ǀhûs di tentomsa nî khai tsî altars ona. Tita ge ǁkhāti Aronni tsî ǁîb di ôagu tsîga nî khai, tita gu nî pristersîsenǃâsa ǃoabase. 45Tsî tita ge Israeli ôan ǁaegu nî ǁan, tsî tita ge ǁîna Elose nî ība. 46Tsîn ge nî ǂan, tita ge a ǃKhū, ǁîn di Elota a ǃkhaisa, Egipteǃhūba xu ǁîna ge ǂgaeǂguiǂui ta, ǁîn ǁaegu ta nî ǁanga; tita ge ǃKhūta, ǁîn di Elota.