ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib

OKTOBERI 5-11

ELOBMÎSA XU HÂ ǂÛǂÛSA MÎDI | EKSODUS 31-32

“ǁGôatsuiǁgoaǃoabasa ǁhâxū re”

(Eksodus 32:1) Tsî ǁaes ge mûo Moseb ra ǀhawe ǃhomma xu ǁgôaxas ǀkha ǃkhaisa, os ge ǁaesa Aronni tawa ǀhû tsî ǁîb ǃoa ge mî: Khâi, îts eloga dība da re, sida ais aiǃâ ra ǃgûga. Nē Moseb, ǁnā aob Egipteba xu ge ǂgaeǂguiǂui dab xasa da ge a ǀū, tare xū-i xab go hāǂamhe ǃkhaisa.”

w09-E 5/15 11 ¶11

ǁNâuǃāb ǃnâ kai re, Jehovab di tsēs go ǀgū xuige

¹¹ Elobmîsa xu da ra ǁkhāǁkhāsen xūna ûiǂuis ge kaise ǀnî ǁaegu ai a ǃgomba da ǁkhā, sada mâsib xa ǃaromahe hâse. Aiǁgauseb ge Jehovaba Israelǁîna Egipteba xu a ǃnora kai o, on ge Moseb ǀkha ge ǂnoagu tsoatsoa tsî nēs ǀkha Jehovaba gere ǃâitsâ. Tae-i ǃaroma? ǁÎn ge ān nî ǁgam-e ūhâ tama hâ i ǃkhais ǃaroma. (Eks. 17:1-4) ǀGam ǁkhâkha ǃkharu tsîn ge ǁîna Jehovab ǀkha ǃgaeǀhaosa ge dī ‘hoa mîdi Elob dide’ ǁnâuǀnamsa xawen ge Elob ǂhanub ǁgôatsuiǁgoaǃoabas xa hâba ge ǁnâuǀnamoǃnâ. (Eks. 24:3, 12-18; 32:1, 2, 7-9) Nēsa ra ǂâibasen ǁîn ge Moseb ge Horeb ǃhommi aib gere ǁkhāǁkhāhe amaga a ǀhape o, o gere ǃao di? ǁÎna ǀnîsi gere ǂâi Amaleki ge ǁkhawa nî ǁnāǂam nî di tsî Israelǁîn ge huiose nî tsâ Moseb ose di? (Eks. 17:8-16) Nēs ge a īǁkhā xawe Israelǁîn ge ge ǁnâuǀnamoǃnâ i. (ǃNǃkh. 7:39-41) Paulub ge Xristeǁîna ge ǂkhâǃnâ în ǁgūtsâ, în tā Israelǁîn ge dī xū-e dī mîmâisa ǃhūb ǃnâ ǂgâsan gere ǃao o.—Heb. 4:3, 11.

(Eksodus 32:4-6) Ob ge ǁîde ǃomǁaeb âna xu ū tsî beitels ǀkha ǁîba xoa tsî ǂnâhe hâ tsâuba ge dī. On ge ǁîna ge mî: Nēgu ge sa eloga, Israeltse, Egipteǃhūba xu ge ǂgaeǂuiǃapa tsiga. ⁵ Tsî Aronni ge mûo, ob ge altarsa ge ǂnubiba bi; tsî Aronni ge ǂgaiǂui tsî ge mî: ǁAris ge nî ǃKhūb di kaitsē. ⁶ On ge sao ra tsē ǃnauǁgoaga khâi tsî khauǁguibade ge ǁguiba tsî ganganǁguibadi tsîna; ǃnubais ge ǁaesa ge ǂnû, ǂû tsîn nî āse, ǁnās khaoǃgân ge ge khâi ǀkhōn nîse.

w12-E 10/15 25 ¶12

Eloba ǁnâuǀnam tsî ǁîb mîmâide xu ǀama re

¹² Jehovab ge ǁîb ge mîmâi ǃgaeǀhaosa ge dīǀoaǀoa tsoatsoa, tentomdi tsî pristergu tsîna ǂnūbis ǃnâ-ū, în ǁore-aona nēs ǃnâ-ū ǁîba ǃoa ǀgū ǁkhā. Israelǁîn ge Elob ǃoa-ain māǁnâsen hâ ǃkhaisa ge ǀūru tsî ‘Israeli di ǃAnub tsîna ge tsûtsû.’ (Psa. 78:41) Aiǁgause, Moseb daoǁgaude Sinai ǃhommi ai ra hō hînan ge Israelǁîna ge ǃnūǃnâxa tama hâ i tsî Elob ǃnâ ge ǂgom ǀû tsoatsoa, Moseb ge ǁnāxūǃnâ nî di ǂâi hâse. ǃHuniǀuri tsâub ai-īsiban ge kuru tsî khoen ǃoa ge mî: “Nēgu ge sa eloga, Israeltse, Egipteǃhūba xu ge ǂgaeǂuiǃapa tsiga.” (Eks. 32:1, 4) Jehovaba ǃoa hâ ǁaxasiban ge ge dī tsî ǁîn ge kuru ai-īsiba ǃoa ǁguibade gere dī. Jehovab ge nēsab ge mû o, o Moseba ge mîba: “ǃHaesen ge go ǁgôa ǁnā daob, tita ge ǁîna mîmāba xu.” (Eks. 32:5, 6, 8) ǁNās khaoǃgân ge Israelǁîna mîmâi-e Jehovaba ǃoa dī tsî ega nēsa gere khôa.—Num. 30:2.

(Eksodus 32:9, 10) ǃAruǀîb ge ǃKhūba Moseb ǃoa ge mî: Nē ǁaesa ta go kō, tsî mû, ǁîs ge a ǂnîxaǃao ǁae. ¹⁰ Tsî nēsi ǁnâi mā-am te, îb ti ǁaiba ǁîn ǂama ǂhubi, î ta ǁîna hapu; o ta ge tita satsa nî kai ǁae kai.

w18.07 20 ¶14

“Ham-e Jehovab ǀkhāb ai hâ?”

¹⁴ Nē ǁaes ge ge ǂan i Jehovab mûǁae i ge tsū isa ǀkhara elo-e ǃoabasa. (Eks. 20:3-5) Xawe ǃhae ǁaeb ǃnân ge tsâuba ge ǃoaba tsoatsoa. Nēti i ǃgāsa ǁnâuǀnamoǃnâsiba ǁgaus ǃnâ-ūs ge nē ǁaesa ge ǂâi hâ i, noxoban Jehovab ǀkhāb ai hâ di. Aronni tsîn ge nē tsâuba ǃoabasa “kai tsē-i ǃKhūb [Jehovab, NW]” di-i di ge ǂgai. Jehovaba mati ge tsâ? ǁÎb ge ǀapexūheb hâ khami ge tsâ. Jehovab ge Moseba ge mîba nē khoen ge “ǁgao hâ” di ‘tsîn ge ǃhaese go ǁnā ǁgôa daob, tita ge ǁîna mîmāba xu.’ ǁÎb “khau ra ǁaib” ǃnâb ge Jehovaba nē ǁaesa gere dīkākā ǂgao.—Eks. 32:5-10.

Gagasi xūna ǀō-aisase ôaǃnâs

(Eksodus 31:17) ǁÎs ge tita tsî Israeli ôan tsîda ǁaegu saose nîra i ǀamosib kōse; ǃKhūb ge ǃnani tsēdi ǃnâ ǀhommi tsî ǃhūbaib tsîkha ge dī, tsî hûǁî tsēs aib ge sâ tsî ge khoakhoasen amaga.

w19.12 3 ¶4

“Mâ xū-i hoa-i ge ǁî-i di ǁaeba ūhâ” sîsens ǁaeb tsî sâs ǁaeb

⁴ Jehovab tsî Jesub tsîkha ǃgarise sîsens xa ra mā da aiǁgaude ra ǂâibasen sâ ǁoa da a di? Hî-î. Jehovab ge tsau tama hâ ǁnās ǃaromab ge xū-eb ga dī toa o, sâsa ǂhâ tama hâ. Elobmîs ge ra mî Jehovab ge ǀhommi tsî ǃhūbaib tsîna kuru toa o, ob ge “sâ tsî ge khoakhoasen” di. (Eks. 31:17) Nēs ge ra ǂâibasen Jehovab ge sîsen ǀû tsî kurub ge xūna ǃoa kō tsî ǂkhîba a hōsa. Jesub ge ǃhūbaib aib ge hâ io ǃgarise gere sîsen, xaweb ge noxoba ǁaeba ǁamaǂûi tsî sâ tsî ǁîb ǀhōn ǀkha ǂûǀhaode gere ūhâ.—Mat. 14:13; Luk. 7:34.

(Eksodus 32:32, 33) Tsî nēsi ǁnâi ǁîna ǁoreba ǀûba; tsî ǁnā tamas ka io, ǁnâi tita ǀari re ǁnā ǂkhanis hîats ge xoasa xu. ³³ ǃNubaib ge ǃKhūba Moseb ǃoa ge mî: ǁÎ-i hîa tita ǃoagu ra ǁore-i, ǁî-e ta ge ti ǂkhanisa xu nî ǀari.

w87-E 9/1 29

Khomai-aon dîdi

Khoe-i di ǀons ga ǂâiǂâisens di ǂkhanis ǃnâ xoa mâihe o, o i ge ǂâibasen tama hâ ǁî-i ǀamo ûiba nî ǃkhōǃoa di. Israelǁîna ǃkhōǂgā hâ xū-i xab ge Moseba Jehovaba ge ǂgan: “Tsî nēsi ǁnâi ǁîna ǁoreba ǀûba; tsî ǁnā tamas ka io, ǁnâi tita ǀari re ǁnā ǂkhanis hîats ge xoasa xu.” Ob ge Jehovaba ǃeream tsî ge mî: “ǁÎ-i hîa tita ǃoagu ra ǁore-i, ǁî-e ta ge ti ǂkhanisa xu nî ǀari.” (Eks. 32:32, 33) Jehovab ga ǁnā khoe-i hîna ǃgâi ǀgaub ǃnâ ǁîba ra ǃoaba-e ǂâiǂâisens di ǂkhanis ǃnâ xoamâi, xawe i ge ǁnā khoe-e a ǁore tamas ka io a ǁnâuǀnamoǃnâ ǁkhā. Tsîs ga ǁnāsa ī o, ob ge Jehovaba ǁî-i di ǀonsa ûib di ǂkhanisa xu nî ǀariǂui.—J.ǂHa. 3:5.

Elobmîs khomai ǃâs

(Eksodus 32:15-35) Ob ge Moseba unusen tsî ǃhomma xu ge ǁgôaxa ǀgam xoa-aixūra ǀhûǀguitimîs dira ǃomǁae ūhâse; nē xoa-aixūra ge ǁîra ǀkhākha hoakha ge xoa-aihe hâ i; ǀgui ǀkhāb ai tsî nau ǀkhāb âra ge xoa-aihe ge hâ i. ¹⁶ Tsî nē xoa-aixūra ge Elob di sîsen ge i; xoas ge ǁkhāti Elob ǂûb di xoa ge i, xoa-aixūra ǃnâ xoaǂgāhe hâǃâ. ¹⁷ Tsî Josuab ge ǁaes di domma ǁnâuo, dân ra hîa, ob ge Moseb ǃoa ge mî: Torob ǀō-i kom ǁgoeǃkhais ǃnâ hâo. ¹⁸ Ob ge ǁîba ge mî: Dans ǂgai-i di dom tama i ge, tsî i ge ǁkhāti dāhes ǂgai-i di dom tama; ǃnādi ai ǁnaes di domma ta kom tita ra ǁnâuo. ¹⁹ Tsî i ge ge ī, ǁgoeǃkhaisab ge ǀgūo, tsî tsâub tsî ǂnās tsîrab ge mûo, ob ge Moseb di ǁaiba ge khâi tsîb ge xoa-aixūra ǃomǁaeb âba xu aoǁgui, tsî ǃhommi ǃgaos tawa ǁîra ge khôaǂkhū. ²⁰ Tsîb ge ǁnā tsâub ǁîn go dība ū tsî ǀaes ǀkha ge khauǃkhū bi tsî ge ǂkhūǂkhū bi, tsao kaib ges kōse tsî ǁgam-i ai tsoro bi tsî Israeli ôana ge āsi bi. ²¹ Ob ge Moseba Aronni ǃoa ge mî: Tare-es nē ǁaesa dī tsi hâ, ots nētikō kai ǁore-e ǁîs ǂama go hā kai? ²² Ob ge Aronna ge mî: Ab ǁaib ti ǀhonkhoets diba tā khâi; sats ge nē ǁaesa a ǂan ǂkhabab ǃnâs ǁgoe ǃkhaisa. ²³ Nētin ge ǁîna tita ǃoa ge mî: Eloga dība da re, sida ais aiǃâ ra ǃgûga. Nē Moseb, ǁnā aob, Egipteǃhūba xu sida ge ǂgaeǂguiǃapab xasa da a ǀū, tare xū-i xab go hāǂamhe ǃkhaisa? ²⁴ O ta ge tita ǁîn ǃoa ge mî: ǃHuniǀuri-e ga ūhâ-e a-i ǁî-e ǂgaeǁnâ, î-i tita ǁî-e mā; o ta ge ǀaes ǃnâ ǁî-e ge aoǂgā, ob ge nē tsâuba ge ǀkhī. ²⁵ Tsî Moseb ge mûo, ǁaes go ǃkhau ǃkhaisa, (Aronni ge ǁîna go ǃkhau kai ǃharaxūs ǁîn di mâǃoasaben dis ǃoa) ²⁶ ob ge Moseba ǁgoeǃkhais di dao-ams ǃnâ mâ tsî ge mî: ǃKhūb di-i hoa-e a-i tita ǃoa hā! O gu ge Levib ôagu hoaga ǁîb tawa ge ǀhao. ²⁷ Ob ge ǁîgu ǃoa ge mî: Nētib ra mî ǃKhūb Israeli di Eloba: Ab mâb hoaba ǁîb di gôaba ǃgae kamanab âb ai. ǃGûǃnâǃganu î go ǁkhawa oa ǀgui ǁāba xu nau ǁāb kōse ǁgoeǃkhais ǃnâ, îb mâb hoaba ǃgam ǁîb di ǃgâsaba tsî mâb hoaba ǁîb di ǀhōsaba tsî mâb hoaba ǁîb di ǀgūkhoeba! ²⁸ O gu ge Levib ôaga Moseb di mîs ǃoa ge dī. O gu ge ǁnātsē ǁaes xa ǃnonaǀoadisi nî i khoega ge ǁnā. ²⁹ Moseb ge nēti mî xui-ao: Nētsē sago di ǃomga ǃKhūba ǀoaǀoaba, mâb hoab nî ī ǁîb di ôab ǃoagu, tsî ǁîb di ǃgâsab ǃoagu, tsî i ge nî ī, nētsēb nî ǁîba ǀkhaeba sago ǂama mā ǃkhaisa. ³⁰ Tsî i ge sao ra tsē ge ī, ob ge Moseba ǁaes ǃoa ge mî: Sadu ge kai ǁore-ai-e go ǁore, xawe ta ge tita ǃKhūba ǃoa nî ǃapa, ǀnîsi ta nî sadu ǁoreba ǀûba kai. ³¹ Nētib ge Moseba ǃKhūb ǃoa oa tsî ge mî: Nē ǁaes ge kai ǁore-ai-e go ǁore, ǃhuniǀuri-elogan go dībasens ǀkha. ³² Tsî nēsi ǁnâi ǁîna ǁoreba ǀûba; tsî ǁnā tamas ka io, ǁnâi tita ǀari re ǁnā ǂkhanis hîats ge xoasa xu. ³³ ǃNubaib ge ǃKhūba Moseb ǃoa ge mî: ǁÎ-i hîa tita ǃoagu ra ǁore-i, ǁî-e ta ge ti ǂkhanisa xu nî ǀari. ³⁴ Xawe ǃgû îts nē ǁaesa sī ǂgaeǂgui tita ge mîba tsiǀî; mû, ti ǀhomǃgāb ge sa ais aiǃâ nîra ǃgû; xawe tsēs ti ôaǃnâs dis ai ta ge tita ǁîn di ǁoreba ǁîn tawa nî ôa. ³⁵ Nētib ge ǃKhūba nē ǁaesa ge ǁnora, ǁnā tsâuban ge dībasen amaga, Aronni ge dība.

OKTOBERI 12-18

ELOBMÎSA XU HÂ ǂÛǂÛSA MÎDI | EKSODUS 33-34

“Jehovab mâǂoara ǀgaugu”

(Eksodus 34:5) Ob ge ǃKhūba ǃâus ai ǁgôaxa tsî ǁnāpa ǁîb tawa ge sī mâ; tsîb ge ǁîba ǃKhūb di ǀonsa ge ǂgaiǂui.

it-2-E 466-467

ǀOns

Hoa xūn kuruhe hân ge ra ǁgau Jehovab hâsa xawe ǁnās ge ǁÎb di ǀonsa ǁgau tama hâ. (Psa. 19:1; Rom. 1:20) Khoe-e Jehovab ǀonsa ǃamkuse ǂans ge kaise ǂgui xūna ǃkhōǂgā hâ. (2Kro. 6:33) Xawe nēs ge Jehovaba ǂans, ǁÎb ǂâibasens tsî ǁÎb di ǀgaugu tsîna ǂansa ǃkhōǂgā hâ, Elobmîs ǃnâ i xoamâihe hâse. (ǀGopeǀnō re 1Gao. 8:41-43; 9:3, 7; Neh. 9:10.) Nēsa da ge Moseb di aiǁgaus ǃnâ ra mû hînab ge Jehovaba ǃamkuse ǀons ais tsîna ǂan iba. (Eks. 33:12) Moseb ge kaise kai aiǂhanuba ge ūhâ i Jehovab di ǀgaugu tsî ǁÎb di ǀons ra ǂhôahesa ǁnâusa. (Eks. 34:5) ǁNā xūn hoan ge Jehovab di ǀons ǀguisa ge ǂanǂan tama hâ i, xawe ǁîb di ǀgaugu tsî matib īsa gere ǁgau. “ǃKhūtse, ǃKhūtse Elots ǀkhomxaǂgaoxa tsî ǀkhomxaǃnâts, ǃnūǃnâxa tsî ǃgâidīb tsî amab tsîkha ǃnâ a kaits. ǃGâidība ra sâuts, ǂgui ǀoadisi ǃhaodi kōse, ǂhanuoǃnâsib tsî ǃûǂams tsî ǁoreb tsîna ra ǀûbats; ǀhapixa-e ǀhapiose ūhâ tamats, ǁgûgu di ǂhanuoǃnâsiga ra ôaǃnâts, ǃnonaǁî tsî hakaǁî ǃhaos kōse.” (Eks. 34:6, 7) ǁNās khamis ge Moseb di ǁnae-amsa nēti i mîde ge ūhâ i: “Tita ge ǃKhūb di ǀonsa nî ǂgaiǂui xuige.” Tsîb ge ra mî matib ge Jehovaba Israelǁaesa hâ-ū tsî ǁîb di ǀgauga a ǁgausa.—Deu. 32:3-44.

(Eksodus 34:6) Tsî ǃKhūb ge ǁîb ais aiǃâ ǃgû-īo, ob ge ǁîba ge ǂgai: ǃKhūtse, ǃKhūtse Elots ǀkhomxaǂgaoxa tsî ǀkhomxaǃnâts, ǃnūǃnâxa tsî ǃgâidīb tsî amab tsîkha ǃnâ a kaits.

w09-E 5/1 18 ¶3-5

Jehovab ge ra mâi-aiǃâsen

ǂGuro xū-i hînab Jehovaba ra mâi-aiǃâsen ū i ge “ǀkhomxaǂgao tsî ǀkhomxa ǃKhūb asa.” (6ǁÎ ǁaraǃās) ǀNÎ ôaǃnâ-ao i ǃoagu i ge Hebregowab mîs ǀkhomxaǂgaoxa di hâsa ǀkhomxasib hînab ǁgûba ǁîb di ǀgôana ra ǁgauba ǃoa ra ǁnaeǁgau. Nē mîs ǀkhomxaǂgaoxa di hâs ge khoe-i hîna nau khoena ra ǀkhom tsî hui-e ǃoa ra ǁnaeǁgau. Amabes ǃnâb ge Jehovaba ǂhâba hâ, i da ǂan ǁîb nî kōǃgâ da ǃkhaisa, ǁgûn ra ǁîn di ǀgôana kō khami hîna ǀkhomxaǂgaosib tsî ǃgam ǀnamma ra ǁgauna.—Psa. 103:8, 13.

Tsîb ge Jehovaba ǁkhawa ra mî ǁîb a ǃnūǃnâxasa. (6ǁÎ ǁaraǃās) Jehovab ge ǁîb di ǃhūbaib di ǃoaba-aon ǀkha ǁaixas ǀguise di tama hâ i. Xaweb ge kaise ǁîn ǀkha a ǃnūǃnâxa tsî ǂâu hâ ǁaeba ra mā nî în dī-ūnusen ǁkhā.—2Pet. 3:9.

Jehovab ge aiǃgû tsî ra mî ǁîb a ǀnammi xa ǀoa hâ, ǃnūǃnâxa tsî ama ǃkhaisa. (6ǁÎ ǁaraǃās) ǀNamxaǃnâ, ǂgomǂgomsa ǀnammi ge kaise ǂoaǂamsa ǀgaub hînab Jehovaba ǁîb tsî ǁîb ǃoaba-aon ǁaegu ūhâba, hîna kaise a ǀgaisaba. (Deu. 7:9) Jehovab ge noxoba a amab di Elo. Jehovab ge a gaxaǃnâhe ǁoa tsî naun tsîna gaxaǃnâ tama hâ. Amab di Elob a ǃkhais ǃaroma da ge ǂgomǃgâsiba a ūhâ ǁkhā ǁîb da mî tsî dī xūn ǃnâ tsî nēs ge ǁîb hānîǁaeb xa mîmâi hâ xūn tsîna ǃkhōǂgā hâ.—Psa. 31:5.

(Eksodus 34:7) ǃGâidība ra sâuts, ǂgui ǀoadisi ǃhaodi kōse, ǂhanuoǃnâsib tsî ǃûǂams tsî ǁoreb tsîna ra ǀûbats; ǀhapixa-e ǀhapiose ūhâ tamats, ǁgûgu di ǂhanuoǃnâsiga ra ôaǃnâts, ǃnonaǁî tsî hakaǁî ǃhaos kōse.

w09-E 5/1 18 ¶6

Jehovab ge ra mâi-aiǃâsen

ǀNî hâ amab hînab Jehovaba ǂhâba hâ i da ǂans ge, ǁîb ge sîda ǁorena ra ǀûba dīsā da ga o. (7ǁΠǁaraǃās) Jehovab ge hoaǁae a ǂhomisa ǁore-aona ǀûbasa. (Psa. 86:5) Jehovab ge tsū xūna ǂgao tama hâ. Tsîb ge ra mî tsūdī ra khoe-i nî ǁnamahesa, i-i dī-ūnusen ǁkhā. (7ǁÎ ǁaraǃâs) ǃAnu tsi ǂhanu-ai Elob ge ǃhobasen ǂgao tama khoena ǁnāti ǀgui ǁnāxū tide xawe nî ǁkhara. Nētsēs tamas ka io ǀgūǁaeb ǃnâ i ge ǁîn di dīga tsū xūn ǃnâ nî ǂgā nî.

Gagasi xūna ǀō-aisase ôaǃnâs

(Eksodus 33:11) Tsîb ge ǃKhūba aisa xu ais ǃoa Moseb ǀkha gere ǃhoa, ǀhōsa-i ǁî-i di ǀhōsa-i ǀkha ra ǃhoa khami; ǁnās khaoǃgâb ge ǁkhawa ǁgoeǃkhais ǃoa ge oa; xawe ǃgāb âb, Josuab, Nunni ôab, ǂkham khoeb, ge tentoms ǁaeguba xu ǂgō tama ge hâ i.

(Eksodus 33:20) Tsîb ge ǁîba ǃaruǀî ge mî: Sats ge ti aisa a mû ǁoa; khoe-i xare-i ge tita mû tsî ûi tide xui-ao.

w04-E 3/15 27 ¶5

Mâǂoa ra xūn Eksodus ǂkhanisa xū

33:11, 20—Matib ge Jehovaba Moseb ǀkha ǃhoa? Nē ǃhoa ǀgaub ge ǀgam ǀgauga ūhâ. Moseb ge Jehovab di ǂnûǁkhaeba-aob ǀkha gere ǃhoa tsî Jehovab di daoǁgaude ge ǃkhōǃoa. Xawe Moseb ge Jehovaba ge mû tama hâ i ‘khoe-i ǁîba a mû ǁoa tsî noxoba a ûiǁoa ǃkhais ǃaroma.’ Tsî Jehovab ge aitsama Moseb ǀkha ge ǃhoa tama hâ i. Galateǁîn 3:19 ge nēti ra mî “tsîb ge ǀhomǃgāgu xa mâba-aob di ǃomǁaeba xu ge ǂnûiǂgāhe.”

(Eksodus 34:23, 24) Sadu ǃnâ hâ aoregu hoagu ge ǃnona ǃnādi kōse kurib ǃnâ ǂamgao-aob ǃKhūb, Israeli Elob di ais aiǃâ nî ǂhai. ²⁴ ǀŪbeǁaede ta ga tita sa ais aiǃâba xu, ūn hâna xu doeǁgaǂui tsî sa ǃhūb ǀkhariba haraharao, o i ge khoe-i xare-e sa ǃhūba tura tide, sats ra ǃgûǃapa hîa, ǃKhūb sa Elob di ais aiǃâts nî ǃnona ǃnādi kōse kurib ǃnâ ǂhaise.

w98-E 9/1 20 ¶5

Dītsâ re ī du ǂgurose nî hâ xūna ǂgurose mâi

ǃNona ǃnāde kurib ǃnâ gu ge aorese ī Israelǁîgu tsî ǂgomhoresagu hoaga Jehovab aiǃâ gere ǂhai. Nēs gere ǂâibasens ge hoa omaris gere gagasi ǂûna xu ǀama ǃkhaisa. Tsî ǀnî omaridi danagu ge ǁîgu ǀgôan tsî taradi tsîna gere sao kai. Xawe ham-e ǁîn di omdi xūna gere kōǃgâ hoa omaris gere ī o? Jehovab ge nēti ge mîmâi: “Khoe-i xare-e sa ǃhūba tura tide, sats ra ǃgûǃapa hîa, ǃKhūb sa Elob di ais aiǃâts nî ǃnona ǃnādi kōse kurib ǃnâ ǂhaise.” (Eks. 34:24) Nēn hoana dīs ǃaroman ge Israelǁîna kai ǂgomsa ge ǂhâ hâ i ǂgurose gagasi xūna mâis ǃnâ tsîn ǁîn di omdi xūna ǂoaǃnâ tidesa. Jehovaba ǁîb di mîmâisa ge dīǀoaǀoa khoen xūna ǁkhaubas ǃnâ? Amabes ǃnâb ge ǁnāsa ge dīǀoaǀoa.

Elobmîs khomai ǃâs

(Eksodus 33:1-16) ǃAruǀîb ge ǃKhūba ge mî Moseb ǃoa: ǃGû îts nēpa xu doeǃapa, sats tsî ǁnā ǁaes, Egipteǃhūba xuts ge ǂgaeǂguiǃapasa, ǁnā ǃhūb, hîa ta Abrahammi, Isaki tsî Jakob tsîga ge nūbab ǃoa mî raǃâ: Sa ǃkhomma ta ge tita nîra mā bi. ² Tsî tita ge ǀhomǃgā-e sa ais aiǃâ nîra sî tsî ta ge nîra doeǁgaǂui Kanaanǁîn, Amorǁîn, Hetiǁîn, Perisiǁîn, Hiviǁîn tsî Jebusǁîn tsîna, ³ ǁnā ǃhūb, daib tsî danib tsîkha ra dâuǃnâba ǃoa; tita ge sadu ǁaegu doeǃapa tide, ǂnîxaǃao ǁaedu a amaga, î ta ga ǀnîsi daob ai tā hapu du, ti. ⁴ Tsî ǁaes ge nē tsū mîsa ǁnâuo, on ge ge ǃoa; tsî khoe-i xare-i ân ge ǁî-i anixūna ana tama ge hâ i. ⁵ Ob ge ǃKhūba Moseb ǁga ge mî: Israeli ôana mîba: ǂNîxaǃao ǁaedu ge sado, ǀgui mûsǀapirob ǀguib kōse ta ga sadu ǁaegu doeǃapao, o ta ge ga hîkākā du; ǁnâi sadu di anixūna sado xu ǁguiǁnâ, o ta ge tita nî ǂan, tare xū-e ta nî dī ǃkhaisa. ⁶ On ge Israeli ôana anixūn âna ǁî-aitsama ge ǀâǀhanasen, Horeb ǃhomma xu aiǃâb ǁga. ⁷ Ob ge Moseba tentomsa ū tsî ǁgoeǃkhais ǃauga ge ǂnaumâi si, ǃnūse ǁgoeǃkhaisa xu ra ǂgōǃâ; tsîb ge ǁîsa ǀhûs di tentoms ti ge ǂgai. Tsî i ge ge ī, mâ-i ǃKhūba ra ôa-i hoa-i ge tentoms ǁgoeǃkhais ǃauga hâs ǃoa ǂoa ǃkhaisa. ⁸ Tsî i ge ge ī, Moseb ge tentoms ǃoa ǂoao, os ge ǁaes hoasa mâ, tsî mâ-i hoa-i ge ǁî-i tentoms dao-ams ǃnâ ge sī mâ, tsî Moseba ge kōǃgon, tentoms ǃnâb ge ǂgâs kōse. ⁹ Tsî i ge ge ī, Moseb ge tentoms ǃnâ ǂgâo, os ge ǀnanuǂkhâǃnâsa ǁgôaxa tsî tentoms di dao-ams ǃnâ sī ge mâ, tsîb ge ǁîba Moseb ǀkha gere ǃhoa. ¹⁰ Tsî ǁaes ge ǀnanuǂkhâǃnâsa tentoms di dao-ams ǃnâ mûmâ, os ge ǁaes hoasa khâi tsî ge ǃgamǃgâ mâ-i hoa-e tentoms â-i di dao-ams ǃnâ. ¹¹ Tsîb ge ǃKhūba aisa xu ais ǃoa Moseb ǀkha gere ǃhoa, ǀhōsa-i ǁî-i di ǀhōsa-i ǀkha ra ǃhoa khami; ǁnās khaoǃgâb ge ǁkhawa ǁgoeǃkhais ǃoa ge oa; xawe ǃgāb âb, Josuab, Nunni ôab, ǂkham khoeb, ge tentoms ǁaeguba xu ǂgō tama ge hâ i. ¹² Tsî Moseb ge ǃKhūb ǃoa ge mî: Mû, sats ra mî tita ǃoa: Nē ǁaesa ǂgaeǂguiǃapa, xawets ge ǂan kai te tama hâ, tari-ets nî sîǀkhā te ǃkhaisa, tita ge ǀons ǀkha nîra ǂgai tsi, tsî ǁkhāti, Sats ge ti mûǁae ǀkhomma go hō, tits go mî xawe. ¹³ ǁNâi ǀkhomma ta ga sa mûǁae hō hâ io, o ta ra ǀgore, a ta ǂan sa daoba, î ta satsa ǂan, tare xū-i ǃaroma ta ǀkhomma sa mûǁae go hō ǃkhaisa; îts kōkō nē ǃhaos a sa ǁae ǃkhaisa. ¹⁴ Ob ge ǁîba ge mî: Ti aisa kha nî ǃgûǀkhā tsi, sâ kai tsi ta nîga? ¹⁵ Ob ge ǁîba ge mîǀî bi: Sa ais ga ǃgûǀkhā da tama io, ǁnâi tā nēpa xu doeǃapa kai da re! ¹⁶ Mati i kha ǁnâi nî mûǂanhe, ǀkhomma ta sa mûǁae go hō ǃkhaisa, tita tsî sa ǁaes tsîda, nēs tawa i ga ī tama io, sats ra ǃgûǀkhā da ti? Nēti da ge tita tsî sa ǁaes tsîda nî ǃkhōǂuihe, mâ ǁaes ǃhūbaib ai hâs hoasa xu.

OKTOBERI 19-25

ELOBMÎSA XU HÂ ǂÛǂÛSA MÎDI | EKSODUS 35-36

“ǁKhāsiba ūhâs Jehovab sîsen-e dīsa”

(Eksodus 35:25, 26) Tsî taradi gā-ai ǂgaob â-idi hoadi ge ǃomgu âdi ǂûgu ǀkha gere ǀhôa; tsî di ge ǀhôahesa xūn, ǀhomǂhoan tsî purpurǀapan tsî îǀapan tsî ǀui ǃuri ǃkhain tsîna gere ūhā. ²⁶ Tsî taradi, gā-aisib xa ǂgaogu âde ǁgarihe hâdi hoadi ge piriǀûna gere ǀhôa.

w14-E 12/15 4 ¶4

Māsenxa khoe-eb ge Jehovaba ra ǀkhae

Jehovaba ge ǃgâise gere tsâ kai xū-i ge khoen gere mā ǁguibadi ose xawe māsenxa ǂgaoba hîna aitsamaba xū ama ǃoabasa gere ǂkhâǃnâ-e. Tsîn ge ǁîn di ǁaeb tsîna gere sîsen-ū Jehovab ǃaroma. Hoa ǂansa ūhâ tarekhoedi ge ǁîdi ǃomdi ǀkha gere sîsen dis ge ǃnaeǃkhaisa ra mî. “Taradi, gā-aisib xa ǂgaogu âde ǁgarihe hâdi hoadi ge piriǀûna gere ǀhôa.” Tsî nēs ǂam-aib ge Jehovaba Besaleela gā-aisib tsî ǁnâuǃāb tsîna hoa xūn ǃaroma ge mā. Jehovab ge Besaleeli tsî Oholiab hâkha hoan ǂam-ai a kai gā-aisiba ge mā īkha nē sîsen-e dī ǁkhā.—Eks. 35:25, 26, 30-35.

(Eksodus 35:30-35) ǁNās khaoǃgâb ge Moseba Israeli ôan ǃoa ge mî: Mû, ǃKhūb ge ǀons ǀkha ge ǂgai Besaleeli, Uri ôab, Huri ôab, Judab ǃhaos diba. ³¹ Tsî Elob Gagab ge ǁîba gā-aisib, ǁnâuǃāb tsî ǂans tsîn ǀkha ge ǀoaǀoa mâ sîsenai-i hoa-i ǃoa, ³² ǁnâuǃāxa sîsennab nî ǂâiǂâisenǂuise, sîsenni nîga ǃhuniǀurib, ǀhaiǀurib tsî ǂaib ǃnâ. ³³ Tsî ǁāǁāǁkhāsa ǀuiǃgaos ǃnâ, ǂnûiǂgāb nîga, tsî ǁāǁāǁkhāsa haiǃgaos ǃnâ; mâ ǁnâuǃāxa sîsenǃnôa-i hoa-i ǃnâb nî sîsenga. ³⁴ ǁÎb ge ǁkhāti naugab nî ǁkhāǁkhā ǃkhaisa ǂgaob âb ǃnâ ge mā bi, ǁîb tsî Oholiab, Ahisamaxi ôab, Danni ǃhaos dib tsîkha. ³⁵ ǁÎb ge ǁîkha ǂgaob di gā-aisib ǀkha ge ǀoaǀoa; dī kha nîse mâ sîsenni sîsen ǁkhā ao-i dib hoaba, ā, hoan xa sîsen ǁkhā ao-i dib hoaba; tsî ǀhommiǂhoaba ra anan-i diba, tsî purpurǀapab tsî îǀapab tsî ǀui ǃuri ǃkhaiba ra anan-i dib hoab tsîna; dī kha nîse mâ sîsenni hoab tsî ǂâiǂâisenǂui kha nîse, mâ ǁnâuǃāxa xūreb hoaba.

w11-E 12/15 18 ¶6

ǂGomǂgomsa khoen ǀnai ge ûi hâ in, ǃanu gagab xa ǁnūhe hâse

⁶ Besaleeli di aiǁgaus ge Jehovab di gagab ra sîsen ǀgausa ra ǁgau. (Khomai re Eksodus 35:30-35.) Besaleeli ge ge ǁgaumâihe hâ i, ib tabernakeli ǃnâ hâ xūna îsase kuru. ǁÎba hoa ǂansab ge ūhâ i nē sîsen-e dīsa? Īǁkhā i ge a ūb ge hâ isa xawe ǁîb gere dī sîsen-i ge steende Egiptena kurubasa ge ǃkhōǂgā hâ i. (Eks. 1:13, 14) Xawe matib nēsisa Besaleela nē kai sîsen-e nî dī toa? Jehovab ge aiǃgû tsî Besaleela gā-aisib ǁnâuǃās diba ge mā, ib hoa sîsenna dīǀoaǀoa ǁkhā tsî aiǁgause ǃomman ǀkha ra sîsen-e xūn tsîna kuru hō ǁkhā. Mâ sîsen-i hoa-i hînab ge Besaleela gere dī i ge ǃanu gagaba ge ǃkhōǂgā hâ i. Tsî ǁnās tsîn ge a ama Oholiab xa. Besaleeli tsî Oholiab hâkha ge ǀnîsi kaise ǂgui xūna ge ǁkhāǁkhāsen nē sîsen-e xū tsî ǁnās ǀkha nau khoen tsîna gere ǁkhāǁkhā matin nî sîsen ǃkhaisa. Îo, Jehovab ge ǁîkha di ǂgaogu ǃnâ ge ǂgā ikha nauna ǁkhāǁkhā.

(Eksodus 36:1, 2) ǃNubai gu ge Besaleeli tsî Oholiab tsî mâ aob gā-ai ǂgaob â-ib hoaba gere sîsen, ǃKhūb xa gā-aisib tsî ǁnâuǃāb tsîkha ge māhegu, ǂan gu nîga, mati gu nî sîsenni ǃanusib ǃoabas dib hoaba dī ǃkhaisa ǃKhūb ge mîmān hoan ǃoa. ² Moseb ge Besaleeli tsî Oholiab tsî gā-ai ǂgaob â-i aob hoaba ǂgai xui-ao, ǃKhūb xa gā-aisiba ǂgaob âb ǃnâ ge māheb, ǂgaob âb xa ge ǁgariheba, sîsenni tawa hā tsîb nî ǁîba dīse.

w11-E 12/15 19 ¶7

ǂGomǂgomsa khoen ǀnai ge ûi hâ in, ǃanu gagab xa ǁnūhe hâse

⁷ ǀGui ǂoaǂamsa xū i hîna da ra mû i ge Besaleeli tsî Oholiab hâkha di sîsen-i ge hoaǁae ge hâhâ. Tsî ǁîkha ge kuru xūn ge noxoba 500 kurin khaoǃgâ gere sîsen-ūhe. (2Kro. 1:2-6) Nētsēs di kuru-aogu khami kha ge Besaleeli tsî Oholiab hâkha ǁîkha sîsen-e ge xoaǃgao tama hâ i tsî ǁnās ǀkha ge koasen tama hâ i. Hoa koas ge Jehovaba ǃoa gere ī.—Eks. 36:1, 2.

Gagasi xūna ǀō-aisase ôaǃnâs

(Eksodus 35:1-3) ǃNubai gu ge Besaleeli tsî Oholiab tsî mâ aob gā-ai ǂgaob â-ib hoaba gere sîsen, ǃKhūb xa gā-aisib tsî ǁnâuǃāb tsîkha ge māhegu, ǂan gu nîga, mati gu nî sîsenni ǃanusib ǃoabas dib hoaba dī ǃkhaisa ǃKhūb ge mîmān hoan ǃoa. ² Moseb ge Besaleeli tsî Oholiab tsî gā-ai ǂgaob â-i aob hoaba ǂgai xui-ao, ǃKhūb xa gā-aisiba ǂgaob âb ǃnâ ge māheb, ǂgaob âb xa ge ǁgariheba, sîsenni tawa hā tsîb nî ǁîba dīse. ³ O gu ge ǁîga Moseb di ais aiǃâba xu ǀhaoǀhaoǁguibas hoasa ge ū, Israeli ôan xa ge ūhāhesa ǃanusib ǃoabas di sîsenni ǃoa, ǁîb nî dīhega; tsîn ge gorose mâ ǁgoas hoas ai ǁîba māsenxase ǁguibade gere ūhāba.

w05-E 5/15 23 ¶14

Jehovab di ǀgauga ǂan tsoatsoas

¹⁴ ǂGurose gagasi xūna mâi re. Israelǁaes ge gere dītsâ ī-i tā ǁîn di sorosi ǂhâsiga ūn hâ gagasi xūna ǁgaiǁgai. Israelǁîn di ûigu ge hoaǁae ǃhūbaib di ǂhâsigu ai nî mâihe tamas ge ge ī. Tsî Jehovab ge ǀguri hâ ǁaeba gere mâi hîna hoatsama gagasi xūn ai ge ǃgaoǃgaosa ība, ǁnās ge ama Eloba ǃoabasa ǃkhōǂgā hâ. (Eks. 35:1-3; Num. 15:32-36) Tsî i ge mâ kurib hoaba ǁaeba gere ǁguiǂuihe hîna ǃanu gagasi ǀhaode gere dīheba. (Lev. 23:4-44) ǁAeb tsînan ge gere ǁguiǂui hînan ge gangansa hoa ǃgâi xūn Jehovab ge dīna gere māsa tsî hoatsama Jehovab di ǀonsa koasa gere mā. ǂGaob hoab ǀkhan Jehovaba ra ǃoaba khab ge ǁîn ǀnammi tsî ǃaoǃgâxasib tsîna nî kai tsîs ge nēsa ǁîna nî hui în ǁÎb daob a hâhâ. (Deu. 10:12, 13) Hoa daoǁgaudi hîna ge Jehovab xa gere māhe di ge nētsēs tsîna ǁîb di ǃoaba-aona ra hui.—Heb. 10:24, 25.

(Eksodus 35:21) Tsîn ge ge hā, mâ khoe-i, ǂgaob â-i xa ra ǁgarihe-i hoa-i tsî mâ-i, gagas â-i xa ge māsenxa kaihe-i hoa-i tsîn ge ǃKhūb di ǀhaoǀhaoǁguibas, ǁnā sîsenni, ǀhûs di tentoms tawa nî dīheb dis tsî ǁîs di ǃoabas hoas dis tsî ǃanu saran disa ge ūhā.

w00-E 11/1 29 ¶1

Māsenxa mās ge kai ǂkhîba ra hau

Mûnanai re matis ge Israelǁaesa gere tsâsa. Kurigan ge ǃgāsis ǃnâ ǃgomma gere tsâ tsî ǁnās ǀkha xū-e ūhâ tama khami gere hâ-ūhe o. Xawen ge nēsisa ge ǃnora tsî hoa xūna ge ūhâ i. Xawe ǁnā xūna xu ǀgoras xan ge mati gere tsâ? ǀNîsin ge gere tsâ ǁîn di xūn a ǃkhaisa tsîn aiǂhanuba ūhâsa, ǁnā xūna ūsaosa. Xawen ge a mîbahe o in marisise ǃanu ǃoabasa ǂkhâǃnâ, on ge hoase ǁnāsa ge dī. Tsî nēs ǀkhan ge ge ǀuru tama hâ i nēn ūhâ xūn hoan Jehovab xa īǁkhā kaihe hâsa. Hoan ge ūn ge hâ i xūna Jehovaba gere mā aiǁgause ǀhaiǀurib, ǃhuniǀurib tsî ǀgurun tsîna. Māsenxa ǂgaogan ge ge ūhâ i. ǁÎn di ǂgaogu ge nēn hoana ge dī kai nî. ǁÎn di gagab ge ge ǂkhâǃnâ nî. Nēn hoanan ge ǂhâban hâ amaga, ge dī tsî kaise gere ǃgâiaǂgao Jehovaba ǂkhâǃnâsa.—Eks. 25:1-9; 35:4-9, 20-29; 36:3-7.

Elobmîs khomai ǃâs

(Eksodus 35:1-24) ǃNubaib ge Moseba ǀhaohâb Israeli ôan dib hoaba ǀhaoǀhao tsî ǁîn ǃoa ge mî: Nēdi ge ǁnā mîde, ǁîdi xab ge ǃKhūba mîmāde, khoe-i nî ǁîde dī ǃkhaisa: ² ǃNani tsēdi ǃnâb ge sîsenna nî dīhe, xawe hûǁî tsēs ge sado ǃanuse nî ība, sâb ǃKhūb dib di sâtsēse; ǁîs ai ga sîsen-i hoa-i ge nî ǃgamhe. ³ ǀAe-e du ǂhubi tide mâ ǁanǃkhai-i sadu di-i hoa-i ǃnâ sâtsēs ai. ⁴ Aiǃâb ǃoab ge Moseba Israeli ôan di ǀhaohâb hoab ǃoa ǃhoa tsî ge mî: Nēs ge ǁnā mîs ǃKhūb ge mîmāsa, mî raǃâ: ⁵ ǁNān ū du hân xa ǃKhūba ǀhaoǀhaoǁguiba-e ūba, mâ-i māsenxa ǂgaob â-i-i hoa-e a-i ǃKhūba ūhāba ǀhaoǀhaoǁguiba-i ase: ǃHuniǀurib, ǀhaiǀurib, ǂaib, ⁶ ǀhommiǂhoab, purpurǀapab, îǀapab, ǀui ǃurilineǃkhain tsî piriǀûn; ⁷ ǀapaǀapahe hâ bairakhōn, ǃâukhōn tsî akasiahain; ⁸ olib ǃamamǀaes dib, ǃgâihamxūn ǂkhauǀkhās din tsî ǃgâihamxūn ǀanǀans din, ⁹ sardoniksǀuidi tsî ǀuidi efob ǃnâ nî ǂnûihedi tsî ǁkhaixūb didi tsîna. ¹⁰ Tsî gā-ai ǂgaob â-i-i sadu ǃnâ hâ-i hoa-e a-i hā, î-i ǁnā sîsenni, ǃKhūb ge mîmāba dī: ¹¹ Tabernakeli tentoms tsî ǃgū-ais âsa tsî ǁîs di ǃkhō-ūdan tsîna tsî ǁîs di ǃnaona, tsî ǁîs di daoǁkhaedi tsî ǁîs di ǂkhâǃnâhaiga tsî ǁîs di ǂaide; ¹² ǂgaes tsî ǁîs di tanihaiga, ǂkhîbagu-ais tsî ais di ǂgāmâiǃkhaiba; ¹³ tāb tsî ǁîb di tanihaiga tsî ǁîb di sîsenūdan hoana tsî ǁgauperega; ¹⁴ tsî kandelari ǃamamxūs diba tsî ǁîb di sîsenūdan tsî ǁîb di ǃamamǀaedi tsî olib ǃamamxūs tsîn diba; ¹⁵ tsî ǀanǀanaltarsa tsî tanihaikha âsa, tsî ǂkhau-olib tsî ǃgâihamxūb di ǀanǀansîsenaiba tsî ǂganais tabernakeli dao-ams disa; ¹⁶ tsî khauǁguibas di altarsa, tsî ūs nî hâ ǂaib rostera, tsî ǁîs di tanihaikha, tsî ǁîs di sîsenūdan hoana; khōsenǃoreba ǂais âb ǀkha; ¹⁷ ai-ommi di ǂgāmâiǃkhaiga; ǁîb di ǂkhâǃnâhaiga tsî ǁîb di ǂaidi, tsî ǂganais ai-ommi di dao-ams dis; ¹⁸ tsî ǀuridan tabernakeli dina tsî ai-ommi di ǂgāmâiǀuride tsurigu ân ǀkha; ¹⁹ ǃoabas saran ǃanusib ǃnâ nî sîsenūhena, ǃanu saran Aronni din tsî ǁîb ôagu di saran tsîna, pristersîsenǃâsa gu nî ǃoabase. ²⁰ ǃNubaib ge Israeli ôan di ǀhaohâb hoaba Moseb di aisa xu ge ǃgûǂoa. ²¹ Tsîn ge ge hā, mâ khoe-i, ǂgaob â-i xa ra ǁgarihe-i hoa-i tsî mâ-i, gagas â-i xa ge māsenxa kaihe-i hoa-i tsîn ge ǃKhūb di ǀhaoǀhaoǁguibas, ǁnā sîsenni, ǀhûs di tentoms tawa nî dīheb dis tsî ǁîs di ǃoabas hoas dis tsî ǃanu saran disa ge ūhā. ²² Nēti gu ge aoga taradi ǀkha ge hā, māsenxa ǂgaob â-i-i hoa-e; tsîn ge ǂguis karadi, ǃganudi, ǀkhunuǂnûidadi tsî ǃaob ǁgāxūn, ǃhuniǀurixūǃnôan hoana gere ūhā, tsî mâ khoeb, ǃKhūba ǃhuniǀurigongonǁguiba-e ge ǁguibab hoab ge ǁnāti ge dī. ²³ Tsî mâb ǁîb tawa ǀhommiǂhoab tsî purpurǀapab tsî skarlakǀapab tsî ǀui ǃuri ǃkhaib tsî piriǀûn tsî ǀapaǀapahe hâ ǂkharagūkhōn tsî ǃâukhōn tsîna ge hōheb hoab ge ǁîna ge ūhā. ²⁴ Tsî ǀhaoǀhaoǁguiba-i ǀhaiǀurib tsî ǂaib tsîkha di-e ge ǁguiban hoan ge ǁîsa ǀhaoǀhaoǁguibase ǃKhūba ge ūhāba; tsî akasiahain, hîa ge ǁîn tawa hōhen hoanan ge ǁîna ǃoabas di sîsenni hoab ǃoa ge ūhā.

OKTOBERI 26–NOVEMBERI 1

ELOBMÎSA XU HÂ ǂÛǂÛSA MÎDI | EKSODUS 37-38

“Tabernakeli altardi tsî nēs ama ǃoabas ǃnâ ra ǀhuru ǃâ-i”

(Eksodus 37:25) Tsîb ge ǀanǀanaltarsa ge dī akasiahain ǀkha; ǀgui ǂhâb ge kōb âsa ge i tsî ǀgui ǂhâb ǂhabasib âsa, hakaǁhôaxa, tsî ǀgam ǂhâkha ǀgapisib âsa; ǁîsa xu gu ge ǁnâgu âsa ge ǀkhī.

it-1-E 82 ¶3

Altars

ǀAnǀanaltars. ǀAnǀanaltars ge akasiahain ǀkha ge kuruhe hâ i tsî ǀgapises tsî ǀkhāgu ais tsîna ǃhuniǀurib ǀkha ge kuruhe hâ i. ǃHuniǀurib ǃâ-i ge ǀgapises tsîna ge hâ i. Nē altars ge 44.5 sentimeterga ge ǂhaba i tsî 89 sentimeterga ge gaxu i tsî haka “ǁnâgu” tsîna ge ūhâ i. ǀGam ǃgubu ǃhuniǀurikha hîna ge akasiahain ǀkha a kurusa haiga gere ǃkhōmâikha tsîn ge ge hâ i. Nē ǀgam ǃgubu ǃhuniǀurikha ge altars ǃnāga gere ǂgā-e. (Eks. 30:1-5; 37:25-28) ǀŌ-aisa ǃgâihamxū-i ge ǀgam ǃnāra tsēs ǃnâ nē altars ai gere khau-e, ǁgoagas tsî ǃuis tsîna. (Eks. 30:7-9, 34-38) ǀAesa ra ǃkhōmâi xū-i ge ǃgâihamxūna ǀanǀans ǃaroma gere sîsen-ūhe tsî i ge ǁkhā ǀgauba ǀanǀanaltars ǃnâs tsîna gere sîsen-ūhe. (Lev. 16:12, 13; Heb. 9:4; J.ǂHa. 8:5; ǀgopeǀnō re, 2Kro. 26:16, 19.) ǀAnǀanaltars ge tabernakeli ǃnâ ge hâ i, ǃanun di ǃanub aiǃâ, ǁnās ǀkha i ge nēsa “ǀhûǀguitimîs di ǂgaes aiǃâ” di a ǂansa.—Eks. 30:1, 6; 40:5, 26, 27.

(Eksodus 37:29) Tsîb ge ǁkhāti ǃanu ǂkhau-oliba ge dī, tsî ǀanǀanxūna, hoan xa ǃgâi ǃgâihamxūn xa, ǂkhauxūkuru-aob di sîsenni ǃoa.

it-1-E 1195

ǃGâihamxūn

ǃGaroǃhūb tabernakeli ǃnâ gere sîsen-ūhe ǃgâihamxūn ge kaise ǀō-aisa xūn hînan ge ǀhaohâb ǃnâ hâ khoena a māna xu ge kuruhe. (Eks. 25:1, 2, 6; 35:4, 5, 8, 27-29) Jehovab ge Mosebab tae-eb nē ǃgâihamxūn ǃnâ nî ǂgāsa ra mîba hîna ge mî: “Ūbasen ǃgâihamxūn tsî miretsāb tsî oniksi tsî galbanni tsîn, nē ǃgâihamxūn tsî ǃanu wiroki ona, î-i mâ-i hoa-e ǀguri hâ. Tsîts ge ǁîna xu ǃgâihamsîsenni ǂkhauxūb diba nî dī, ǂkhauxūkuru-aob di sîsenni ǃoa habahe tsî ǀkhaiǀkhā tsî ǃanuba. Tsîts ge ǁîna nî ǃhûtsautsau, tsîts ge ǁîn xa nî ǁgui ǀhûǀguitimîs aiǃâ tentoms, ǁîs ǃnâ ta nî sadu tawa sīs ǃnâ, hoan xa ǃanu xūse du ge ǁîba nî ūhā.” Jehovab ge ǁîna nē ǃgâihamxūn ǂhâǂhâsasiba ǁgaus ǃaroma ge mî: “ǁNā khoeb nēti īna kara dīb, ǁînab nî ǃkhapase, ǁîb ge nî ǃhūǃnomahe ǁîb di ǁaede xu.”—Eks. 30:34-38; 37:29.

(Eksodus 38:1) Tsîb ge ǁkhāti khauǁguibas di altarsa ge dī akasiahain xa; koro ǂhâgu kōses ge gaxusib âsa ge i, tsî koro ǂhâgu kōse ǂhabasib âsa, haka ǁhôagu xa, tsî ǃnona ǂhâgu kōse ǀgapisib âsa.

it-1-E 82 ¶1

Altars

Tabernakeli altars. Tabernakeli ge kuruhe o, o i ge ǀgam altara tsîna ǁnāpa ge kuru. Khauǁguibadi altars ge akasiahain ǀkha ge kurusa i tsî ǀgapiseb tsî ǃnāgas tsîn hoana ge ǁkhowa-amsa i. Nēs ge 2.2 meterga ge ǂhaba i tsî 1.3 metergu gaxusiba ge ūhâ i, haka ǁnâga hoa ǀkhāgu ai ūhâse. Hoa ǃkhaidi ge ǀhaiǀurib ǀkha ge ǃgū-aisa i. Tsî ǀhaiǀurib ge altars ǃnāga ǂganaga ge hâ i. Haka ǂhaba ǃhuniǀurigu tsîn ge ge hâ i tsî ǁkhā ǀurigu ge gere sîsen-ūhe altarsa ǃkhōmâis ǃaroma. Nēs ge gere ǂâibasen ǀgam ǀkhāga altars digu gere ǁara-e ǃkhaisa tsî i ge nē ǀuriga hoa ǀkhākha ai gere ǁgausen. ǂGui khoen ge ǃkharagaǃnâgu ǂâi ǀgauga nēs xa ge ūhâ tsî ǀnîn ge ra mî ǀgam ǂhaba ǀurikha ge ge hâ i di hîna ge ǀuriga gere ǃkhōmâikha, nē ǀurikha ge altars ǃaugab ai ge hâ i. ǀHaiǀurib ǀkha i ge xūna ge kuruhe hâ i hîna ge xamani-i ǀaoba ǂnâs ǃnâ gere sîsen-ūhena tsî ferkhegu ge ǁgan-i ǃaroma gere sîsen-ūhe tsî i ge ǀaesa ra ǃkhōmâi xūn tsîna ge hâ i.—Eks. 27:1-8; 38:1-7, 30; Num. 4:14.

Gagasi xūna ǀō-aisase ôaǃnâs

(Eksodus 37:1) Nētib ge Besaleela ǂgaesa ge dī akasiahain xa: ǀGam ǂhâkha tsî ǃkhare ǂhâb kōb ge gaxusib âsa ge i, tsî ǀgui tsî ǃkhare ǂhâb kō ǂhabasib âsa, tsî ǀgui ǂhâb tsî ǃkhare ǂhâb kō ǀgapisib âsa.

(Eksodus 37:10) Tsîb ge ǁkhāti tāba ge dī akasiahain xa; ǀgui ǂhâb kōb ge gaxusib âba i, tsî ǀgui ǂhâb ǂhabasib âba, tsî ǀgui ǂhâb tsî ǃkhare ǂhâb kō ǀgapisib âba.

(Eksodus 37:25) Tsîb ge ǀanǀanaltarsa ge dī akasiahain ǀkha; ǀgui ǂhâb ge kōb âsa ge i tsî ǀgui ǂhâb ǂhabasib âsa, hakaǁhôaxa, tsî ǀgam ǂhâkha ǀgapisib âsa; ǁîsa xu gu ge ǁnâgu âsa ge ǀkhī.

it-1-E 36

Akasiahain

Akasiahais ge ǂgui gaxu ǁkhūga ūhâ hîna ǁnâuga xu ra khōraǂuisen ga. Nē ǁnâugu ge ǀnî hâ haidi ǁnâugu ǀkha ra ǀhaoǀhaosen tsî ǃkharagaǃnâgu haidi ǀkha ra ǀhao, nēs ge ra ǁguiǃā tae-i ǃaroma i Elobmîs ǃnâ shit·timʹ di hâ mîsa ǃnāsase ra sîsen-ūhesa. Akasiahais ge 6 sa xu 8 meterga gaxuse ra kai xawe ǃnāsase ǃgaro hai-i khami ra mûsen. Nē hais ge tsaura ǂaboga ūhâ tsî ǃhuni ǁkhoaxase ra ham blomde ūhâ hîna ǂû-e ra tanide. Tsî ǃgari haib tsîna ūhâ hîna xoxoron xa a ǂû-e ǁoaba. Nē hais ūhâ xūn ge ge ǃaroma is nē haisa tabernakeli tsî tabernakeli ǃnâ hâ xūn tsîna kuru-ūhe. Nē hais ge sao ra xūna kurus ǃaroma gere sîsen-ūhe, ǃgaeǀhaos arki (Eks. 25:10; 37:1), ǁgaupereb tafels (Eks. 25:23; 37:10), altars (Eks. 27:1; 37:25; 38:1), xūn ra tani ūhe ǁhâgu (Eks. 25:13, 28; 27:6; 30:5; 37:4, 15, 28; 38:6), ǂkhâǃnâhaigu gordyngu ǃaroma tsî ǃgū-ais (Eks. 26:32, 37; 36:36), hoa tabernakela gere ǂkhâǃnâhaigu (Eks. 26:15; 36:20) tsî hoa xūna ra ǀhaoǀhao haigu tsîna (Eks. 26:26; 36:31).

(Eksodus 38:8) Tsîb ge ǀanǀanaltarsa ge dī akasiahain ǀkha; ǀgui ǂhâb ge kōb âsa ge i tsî ǀgui ǂhâb ǂhabasib âsa, hakaǁhôaxa, tsî ǀgam ǂhâkha ǀgapisib âsa; ǁîsa xu gu ge ǁnâgu âsa ge ǀkhī.

w15-E 4/1 15 ¶4

ǂAn i du go i?

Nētsē hâ spieldi khami i ge ǃkharu ge ǁaeb spielde ge ī tama hâ xawe di ge ǁnāde kaise ǀō-aisa xūn ǀkha ge kuruhe hâ i. ǂGuro ǃnās hîna i spielde Elobmîs ǃnâ ra mîhe di ge tabernakeli ge kuruhe o. Kaikhoedi ge spielde ge mā, i-i ǀō-aisa ǀhaiǀuri xapasa kuruhe tsî ǁîs nî mâi-e ǃkhaib tsîna. (Eks. 38:8) Spieldi ge gere tsuni-e i-i sîsen-ūhe ǁkhā.

Elobmîs khomai ǃâs

(Eksodus 37:1-24) Nētib ge Besaleela ǂgaesa ge dī akasiahain xa: ǀGam ǂhâkha tsî ǃkhare ǂhâb kōb ge gaxusib âsa ge i, tsî ǀgui tsî ǃkhare ǂhâb kō ǂhabasib âsa, tsî ǀgui ǂhâb tsî ǃkhare ǂhâb kō ǀgapisib âsa. ² Tsîb ge ǁîsa ǀui ǃhuniǀurib ǀkha ge ǃkhûǀkhā ǃnāb ǃnâ tsî ǃaugab ai; tsîb ge ǁîsa ǃhuniǀurikransa ge dīǂnamipe. ³ Tsîb ge ǁîsa haka ǃhuniǀuriǃganuna ge ǂnâba haka ǁhôagu âs tawa, o ra ge ǀgam ǃganura ǀgui ǃnammi âs tawa hâ ge i, tsî ǀgam ǃganura nau ǃnammi ai. ⁴ Tsîb ge tanihaiga ge dī akasiahain xa, tsîb ge ǁîga ǃhuniǀurib ǀkha ge ǃkhûǀkhā. ⁵ Tsîb ge tanihaiga ǃganun ǃnâ ge ǂgā ǂgaes di ǃnamkha tawa, ǂgaes nî tanihega. ⁶ Tsîb ge ǁkhāti ǃgū-ais ǂkhîbagus disa ǀui ǃhuniǀurib xa ge dī: ǀGam ǂhâkha tsî ǃkhare ǂhâb kōb ge gaxusib âsa ge i, tsî ǀgui ǂhâb tsî ǃkhare ǂhâb kō ǂhabasib âsa. ⁷ Tsîb ge ǁkhāti ǀgam xerukha ge dī; ǃhuniǀurib xa ǂnauǃgâiǃgâihe hâ sîsenni xab ge ǁîkha ge dī, ǀgam ǀkhākha ǃgū-ais ǂkhîbagus dis dikha xu. ⁸ ǀGui xeruba nē ǀkhāb di ǀamsa xu tsî nau xeruba nau ǀkhāb di ǀamsa xu; ǃgū-ais ǂkhîbagus disa xu kha ra ǀkhī khamib ge xerukha ge dī, ǀgam ǀamra âsa xu. ⁹ Tsî xerukha ge ǁgabokha hoakha ǀgapise ra ǃāǂuise ǁîkha di ǁgabokha ǀkha ǃgū-ais ǂkhîbagus disa ge ǃgū-ai; tsî ǁîkha di aira ge ǃoagu ge hâ i; aira xerukha dira ge ǃgū-ais ǂkhîbagus disǀî ge hâ i. ¹⁰ Tsîb ge ǁkhāti tāba ge dī akasiahain xa; ǀgui ǂhâb kōb ge gaxusib âba i, tsî ǀgui ǂhâb ǂhabasib âba, tsî ǀgui ǂhâb tsî ǃkhare ǂhâb kō ǀgapisib âba. ¹¹ Tsîb ge ǁîba ǀui ǃhuniǀurib ǀkha ge ǃkhûǀkhā; tsîb ge ǃhuniǀurikransa ge dīǂnamipe bi. ¹² Tsîb ge ǁîb tawa ǁkhāti ǃkhui-amhai-e ge dī, ǃommi a ǂhabas kōse, tsîb ge ǃhuniǀurikransa ge dī ǃkhui-amhais ǂnamipe. ¹³ Tsîb ge ǁkhāti haka ǃhuniǀuriǃganuna ge ǂnâ ǁîb tawa; tsîb ge haka ǃganuna haka ǁôagu tawa ge ǂnûi, ǁîb di haka ǂaidi tawa hâga. ¹⁴ ǃKhui-amhais ǃoagun ge ǃganuna ge hâ i, tanihaigu di ǃkhaise, tāb nî tanihega. ¹⁵ Tsîb ge ǁkhāti tanihaiga akasiahain xa ge dī tsî ǁîga ǃhuniǀurib ǀkha ge ǃkhûǀkhā, tāb nî tanihese, ¹⁶ tsîb ge sîsenūdan tāb ai nî hâna ge dī, ǁîb di ǃoredi tsî ǁîb di ǀanǀanxapadi tsî ǁîb di ǂhaba ǃoredi tsî ǁîb di āǀgabidi tsîdi, ǁîde xu nî ǂnâhede, ǀui ǃhuniǀurib xa. ¹⁷ Tsîb ge ǁkhāti kandelara ge dī ǀui ǃhuniǀurib xa. ǂNauǃgâiǃgâihe hâ xū-i xab ge nē kandelara ge dī, tsî ǁîb di ǃgaos tsî ǁîb ǁôagu tsîna; ǁîb di ǀgabidi tsî ǁîb ǃhûdi tsî ǁîb di ǃkhādi tsîdi ge ǁîba xu nî ǀkhī. ¹⁸ ǃNani ǁôagu ge ǁîb di ǃnamkha xu ge ǂoaxa: ǃNona ǁôagu kandelari diga ǀgui ǀkhāb âba xu, tsî ǃnona ǁôagu kandelari diga nau ǀkhāb âba xu. ¹⁹ ǀGui ǁôab ǃnâ di ge ǃnona ǀgabide ge hâ i, amandelǂûn khami īde, ǀgui ǃhûs tsî ǀgui ǃkhās tsîra; tsî ǃnona ǀgabidi amandelǂûn khami īde nau ǁôab ai, ǀgui ǃhûs tsî ǀgui ǃkhās tsîra; nēti gu ge ǁnā ǃnani ǁôagu kandelara xu ge ǂoaxaga ge ī i. ²⁰ Tsî kandelari ǂhanib tawa di ge haka ǀgabide ge hâ i, amandelǂûn khami īde, ǁîb di ǃhûdi tsî ǁîb di ǃkhādi ǀkha. ²¹ Tsî i ge ǃhû-e nî hâ ǀgam ǁôakha ǃnagaba xu ra ǀkhīse. ǁNāti i ge nî ī ǃnani ǁôagu, kandelara xu ra ǀkhīgu ǀkha. ²² ǁÎgu di ǃhûdi tsî ǁîgu di ǁôagu ge ǁîba xu ge ǂoaxa; ǁîn hoan ge ǀgui ǂnauǃgâiǃgâihe hâ sîsenai ge i, ǀui ǃhuniǀurib xa. ²³ Tsîb ge hû ǃamamǀaede ǁîba ge dība, ǁîdi di ǃanuǃanuxūn tsî ǁîdi di ǀariǀarisoadi ge ǀui ǃhuniǀurib ǀkha ge dīhe hâ i. ²⁴ ǀGui talens ǀui ǃhuniǀurib dis xab ge ǁîba ge dī ǁîb di xapan hoan ǀkha.