Jehovaba da ūba hâ ǀnammi tsî ǃgôaǃgâsib tsîkha ge nî ǁāǁnâsen kai da

1-2. ǃNaeǃkhaidi 8:27-31, 35-38 ǃnâ i ra ǁgau-e khami i tae-e nē Etiopiaǁî ǀgapiǃgôahesaba ge ǂkhâǃnâ îb ǁāǁnâ kaisen?

XRISTUB di ǁkhāǁkhāsabe-i ase du ra ǁāǁnâhe ǂgao? ǀNammi tsî ǃgôaǃgâsib tsîn ge ǂguina nē mîmâis ǃnâ ge hui. Etiopiab gaosa gere sîsenba ǀgapiǃgôahesab di aiǁgausa ǃoa kō re.

² Etiopiaǁî khoeb ge xoas ge ǁāǁnâs a ǂhâǂhâsa ǃkhaisa a ǁgaubi o, o ge ǁāǁnâ kaisen. (Khomai re ǃNaeǃkhaidi 8:27-31, 35-38.) Tae-e ǁîba ge ǂkhâǃnâ? ǁÎb ge Elobmîsa gere ǃgôaǃgâ, ǁîb ge xoade Jesajab ǂkhanisa xu gere khomai hākunis ai ǂnôase. Tsîb ge Filipuba ǁîb ǀkha a ǃhoa o, ob ge nē khoeba ǃgôaǃgâsiba Jesub ge dība bi xūn ǃaroma ge omkhâi. Xawe nē ǀgapiǃgôahesaba tae-e Jerusalemsa ǃoa gere ôa? ǀNaib ge ǀnamma Jehovaba omkhâiba hâ i amaga. Mati da nēsa a ǂan? ǁÎb Jehovaba Jerusalems ǃnâ ǀnâi sī gere ǃoaba amaga. Nē khoeb ge ǃnae ǃnâb ge ǃoabasa xu ǂoa tsî ǃhaos hîna ama Eloba ra ǃoabasa ǃoa ge doe. Nē ǀnammi Jehovabab ge ūbâ hâ îb ge ge ǂkhâǃnâ bi îb Xristub di ǁkhāǁkhāsabe i ase ǁāǁnâ kaisen.—Mat. 28:19.

3. Tae-e khoe-e a ǁkhae ǁkhā ǁāǁnâ kaisens ǃnâ? (“Tae-e sadu ǂgaogu ǃnâ hâ” di hâ boksisa mû re)

³ Jehovaba du ūba hâ ǀnammi ge nî ǂkhâǃnâ du i du ǁāǁnâ kaisen. Xaweb ge nē ǁkhā ǀnammi tsîna nēsa dīsa xu a ǁkhae du ǁkhā. Matis nēsa a īǁkhā? ǀNî hâ aiǁgaude ǃoa kō re. Sadu di omaris tsî ǀhōsan tsîna du ge kaise a ǀnam ǁkhā tsî a ǂâi ǁkhā ǁîn ǁāǁnâ kaisen du ga o, o nî ǃhui du di. (Mat. 10:37) Tamas ka io du ge ǁnaeti-aina ǀnamma a ūhâba ǁkhā hînab Jehovaba a ǃhuisana. (Psa. 97:10) Tamasa ka io du ge ama tama ǂgomdi ra tsēdi ǁāxasigu ǀkha ge kaikhâi. Nē tsēdi ǀkha a ǃgaeǀhaosa ǃgâiǂâide du ge ǀnamma a ūhâba ǁkhā. Nēs xa ǃaroma-e hâse du ge ǀnîsa xūn hîna Jehovaba ra tsûtsûna a dī ǁkhā. (1Kor. 10:20, 21) Dîs hîna du nî dîsens ge “Tae-i tamas ka io ham-e ta ǃnāsase a ǀnam?”

ǃNĀSA ǀNAMMA DA NÎ ŪHÂBA KHOE-I

4. Tae xū-e nî ǂkhâǃnâ du ǁāǁnâsa ǃoa aiǃgûs ǃnâ?

⁴ ǂGui xūn hîna du a ǀnam tsî ra ǃgôaǃnâna du ge ūhâ. Aiǁgause Jehovab ǀHûǀguitimî-aon ǀkha du Elobmîsa nî ǁkhāǁkhāsens aiǃâ du ge ǀnai Elobmîsa ǃgôaǃgâsiba ge ūba hâ i. Tsî Jesub tsîna ǀnamma ūba hâ. Tsî nēsisa du Jehovab ǀHûǀguitimî-aona a ǂan o, o du ge ǁîn ǀkha ra hâǁae. Xawe nē xūna ǀnams ge ǂâibasen tama hâ Jehovab ǃoa-ai du nî māǁnâsen di. Xawe xū-i hîna nî ǂkhâǃnâ du i ge Jehovaba ǀnamma omkhâibasa. Jehovaba du ga hoa xūn ǂam-ai ǀnam o, o du ge xū-e mā-am tide i i ǁîba ǃoabasa xu ǁkhae du. Jehovaba du ūba hâ ǀnamma du ge ǁâǁnās ǃoa ra ǁnū du tsî nē daob ai hâs ǀkha ra hui du xū-i ase a mû ǁkhā.

5. Mâ dîde da nî ǃhoaǃgao?

⁵ Jesub ge ge mî i da Jehovaba sada ǂgaob hoab, ǀoms hoas, ǁnâuǃāb hoab tsî sada ǀgaib hoab ǀkha ǀnam di. (Mrk. 12:30) Mati da Jehovaba ǁnāti ǀnam tsî ǃgam ǃgôasiba a ūhâba ǁkhā? Jehovab sada ūba hâ ǀnammi xa ǂâiǃgâs ge nî hui da ǁîba ǀnamma omkhâibasa. (1Jhn. 4:19) Mâ ǀgauga a omkhâi-e ǁkhā ǁnā ǀnamma da ga Jehovaba omkhâiba o?b

6. Romeǁîn 1:20 ǃoagub mâba a ǀgui ǀgau hîna da Jehovab xa a ǁkhāǁkhāsen ǁkhā ba?

⁶ Jehovab xa kurus ǃnâ-ū ǁkhāǁkhāsen re. (Khomai re Romeǁîn 1:20; J.ǂHa. 4:11) Hain tsî xamanin tsîn ǃnâ-ū du ra mû ga-aisib xa ǂaiǃgâ re. Sada soros a kurusa ǀgaub xa ǁkhāǁkhāsen re. (Psa. 139:14) Tsî Jehovab ge sada soresa kuru-u kai ǀgaib xa ǂâi re. Nēs ge ǂgui ǀgamîrodi di ǀguisa.c (Jes. 40:26) Nēsa du ga dī o, ob ge sadu Jehovaba ūba hâ ǃgôaǃgâsiba nî kai. Jehovab a ga-ai tsî ǀgaisa ǃkhaisa ǂans ge a ǂhâǂhâsa. Xawe ǀgaisa ǀnamma Jehovaba omkhâibas ǃaroma da ge ǁîb xa ǃnāsa-e nî ǂan.

7. Jehovaba ǀnamma omkhâibas ǃaroma du tae-e nî ǂgom?

⁷ Jehovab ra tsâba du ǃkhaisa du ge nî ǂgomǃgâ. ǀHommi tsî ǃhūbaib tsîn di kuru-aob sado a ǂan tsî ra tsâba ǃkhais ǃnâ du ǂgom tama hâ? Nēs ga ama o, o ǂan re ‘mâ-i hoa-i âda xub ǃnūse hâ tamasa.’ (ǃNǃkh. 17:26-28) ǁÎb ge ‘ǂgaogu hoaga ra ôaǃnâǃganu’ tsîb ge Davib ge Salomoba a mîmâiba khami ra mîba tsi “ǁîbats ga ôao, ob ge sats xa nîra hōhe” di. (1Kro. 28:9) Elobmîsa du nēsi ra ǁkhāǁkhāsenba ǃaromas ge a nē, Jehovab ge ra mî, “tita satsa . . . ge ǂgae” di. (Jer. 31:3) Jehovab dība du hâ xūna du ra ǃgôaǃgâ khamib ge sadu ǀnamma ǁîb ǃoa-ai nî kai.

8. Mati du a ǁgau ǁkha Jehovab ǀnamma du ra ǃgôaǃgâ ǃkhaisa?

⁸ ǀGui ǀgaub Jehovaba da ra ǃgâsa da a ǁgau ǁkhāb ge ǁîba ǃoa ǀgoresa. Jehovaba du ūba hâ ǀnammi ge nî kai ǁîba du ga sadu ǂhânsendi xa ǀgores ǃnâ-ū mîba tsî gangan bi o sadob ra dība xūn ǃgao. Tsîs ge sadu Jehovab ǀkha ūhâ ǀhōsagusisa nî ǀgai ǁîb sadu ǀgorede ra ǃeream ǀgausa du ga mû o. (Psa. 116:1) ǂGomǃgâ tsoatsoa du ge nî ǁîb sado ra tsâba ǃkhaisa. Xawe Jehovab ǀgū ǀhōsa kais ǃaroma da ge ǁîb taen xa ǃgâibahe tsî taena a ǃhuisa ǃkhaisa nî ǂan. Tsî du ge nî ǂan ǁîb tae-e sado xu ra ǃâubasensa. Tsî nē ǂansa da ge Elobmîsa ǁkhāǁkhāsensa xu ǀgui a hō ǁkhā.

9. Mati da a ǁgau ǁkhā Elobmîsa da ra ǃgôaǃgâ ǃkhaisa?

⁹ Elobmîsa ǃgôaǃgâsiba omkhâiba re. Elobmîs ǀguis ge Jehovab tsî ǁîb ǂâibasens tsîn xa amaba ūhâ. Elobmîsa du ra ǃgôaǃgâ ǃkhaisa du ge ǁîsa tsēs hoasa khomais ǃnâ-ū a ǁgau ǁkhā tsî khomai du ra xūna nî ûiǂûi. (Psa. 119:97, 99; Jhn. 17:17) Elobmîsa tsēs hoasa khomais ǃaroma du ǀapeǁguiba ūhâ? Tsî du nē ǀapeǁguiba tsēs hoasa sao tsî Elobmîsa ra khomai?

10. ǀGui mâǂoa ra xū-i Elobmîs di-e a tae?

¹⁰ ǀGui mâǂoa ra xū-i hîna Elobmîs ǃnâ hâ i ge Jesub gere dī xūna ge mû khoena. Nē ǂkhanis ge amaba ǃkhōǂgā hâ hînab Jesuba gere dī xūna ra ǁguiǃāba. Jesub ge mî tsî dī xūn xa da ra ǁkhāǁkhāsen khami da ge ǁîb ǀkha ǀhōsagusisa a omkhâi ǁkhā.

11. Mati da Jehovaba ǀnamsa a ǁkhāǁkhāsen ǁkhā?

¹¹ Jesuba ǀnamsa ǁkhāǁkhāsen re ob ge Jehovaba du ūba hâ ǀnamma nî kai. Tae-i ǃaromasa nēsa? Jesub ǁîb ǁGûb di ǀgauga ra ǁgauǂûi amaga. (Jhn. 14:9) Nēs ǃaroma du ga Jesub xa ǃnāsase ǁkhāǁkhāsen o, o du ge Jehovaba ǁnâuǃā tsî nî ǃgôaǃgâ. Jesub ge ǀgâsan, ǀaesen hân tsî ǃgôaǁnâhe gere khoena ǁgau tsâbaǁhaoxasib xa ǂâi re. Tsî hui ra daoǁgaudi hînab sada ra mādi sada ûiga ǃgâiǃgâis ǃaroma di xas tsîna ǂâi re.—Mat. 5:1-11; 7:24-27.

12. Jesuba du ǀnamma ra omkhâiba khami du tae-e dīsa nî ǂkhâǃnâ-e?

¹² Jesuba da ūba hâ ǀnammi ge nî kai ǁîb ge sada ǁorena ǀûbahes ǃaroma a dība da xū-i xa da ga ǂâiǃgâ o. (Mat. 20:28) Jesub ge māsenxase a ǁōba da ǃkhaisa da ga ǁnâuǃā o, o da ge sada ǁorena xu ǃhobasen tsî ǀûbaba Jehovab dawa a ǂgan ǁkhā. (ǃNǃkh. 3:19, 20; 1Jhn. 1:9) Jesub tsî Jehovab tsîkha du ǀnamma ra omkhâiba khami du ge ǁîkha a ǀnam khoen ǀkha ǀgui nî hâ ǂgao.

13. Jehovaba tae-e ge mā du?

¹³ Jehovab omarisa ǀnamsa ǁkhāǁkhāsen re. Sadu omaris ǁanin tsî ǀhōsan hîna Jehovaba ǃoaba tama hân ge tae-i ǃaroma du ra ǁāǁnâ kaisen ǃkhaisa a ǁnâuǃā ǁoa. Tsîn ge nēs ǃaromas tsîna a māǃoa du ǁkhā. Jehovab ge gagasi omarisa mā dus ǃnâ-ū a hui du ǁkhā. Nē gagasi omaris ǀgūse du ga hâ o, o du ge huib tsî ǀnammi hîna du ǂhâ hâba nî hō. (Mrk. 10:29, 30; Heb. 10:24, 25) Sada omaris ǁanin tsîn ge ega Jehovaba a ǃoaba tsoatsoa ǁkhā.—1Pet. 2:12.

14. 1 Johaneb 5:3 ǃnâ i ra ǁgau-e khami da tae-e Jehovab ǁgaragu xa ra ǁkhāǁkhāsen?

¹⁴ Jehovab ǁgaraga ǀnamma omkhâiba tsî sîsenǂûi re. Jehovab xa da ge ǁkhāǁkhāsens aiǃâ da ge tae-i a ǂhanu tsî tsū ǃkhaisa aitsama gere mîmâi. Xawe da ge nēsi ra mû Jehovab ǀgaugu a ǃgâi ǃkhaisa. (Psa. 1:1-3; khomai re 1 Johaneb 5:3.) Elobmîs daoǁgaudi hîna aogu, taradi tsî ǀgôan xa hâ di xa ǂâi re. (Efe. 5:22–6:4) Nē daoǁgaude du ra sîsenǂûi khami du sadu omaris ûib ra ǃgâiǃgâisen ǀgauba ra mû? ǃGâi khoe kai du ra Jehovab ǁgaragu ǀhōsana ǁhûis xa hâ ga du ga sao o? ǂKhîba du ra hōǃâ? (ǂKhm. 13:20; 1Kor. 15:33) Nē dîdi ǃeream di ge î di hâ.

15. Tae-e da a dī ǁkhā Elobmîs ǁgaraga ûiǂûis ǀkha da ga huiba ǂhâ o?

¹⁵ ǁNaen ai i ge a ǃgomba du ǁkhā Elobmîs ǁgaragu hîna du ra ǁkhāǁkhāsenga saosa. Nēs ǃaromab ge Jehovaba ǁîb ǀapeǂhumis ǃnâ-ū Elobmîs ai ǃgaoǃgaosa ǂkhanina ra mā da hîna tae-i a ǂhanu tsî tsūsa mîǁguis ǀkha ra hui dana. (Heb. 5:13, 14) Nē ǂkhanina da ga khomai tsî ôaǃnâ o, o da ge ǁîn di ǃgâi sîsenǂûiba nî mû tsî nî Jehovab ǀapeǂhumis di ǃâ kai ǂgao.

16. Jehovaba ǁîb khoena mati ra ǂgaeǂgui?

¹⁶ Jehovab ǀapeǂhumisa ǀnam tsî ǂhâǃnâsa ǁkhāǁkhāsen re. Jehovab ge ǁîb khoena ǀhaohâgu ǃnâ ǀgoraǂgā hâ tsî Jesub ge nē ǀhaohâgu di dana. (Efe. 1:22; 5:23) Jesub ge ǂkhari ǃgôab khoega ge ǁhûi i gu ǁîb ge dī kai da sîsen-e mûǂam ǁkhā. Jesub ge nē khoega “ǂgomǂgomsa tsî gā-ai ǃgāb” di ra ǂgai tsî ǁîgu ge gūna gagasise kōǃgâs sîsen-e ǂhâǂhâsase ra mû. (Mat. 24:45-47) ǀGui ǀgaub ǂgomǂgomsa ǃgāb da kōǃgâdab ge ǃgâi aiǁgaude ūhâ aoga ǀhaohâb ǃûi-aogu ase ǁgaumâisa. (Jes. 32:1, 2; Heb. 13:17; 1Pet. 5:2, 3) ǀHaohâb ǃûi-aogu ge sada ǃoa a māsenxa tsî ra ǁkhaeǂgao tsî hui da ǂgao Jehovab ǀgūse hâs ǀkha. Xawe ǂhâǂhâsa xū-i hîna gu a hui du ǁkhā dīsa i ge, nau khoena Jehovab xa ǁkhāǁkhāsa.—Efe. 4:11-13.

17. Romeǁîn 10:10, 13, 14 ǃoagu da tae-i ǃaroma nau khoen ǀkha Jehovab xa nî ǃhoa?

¹⁷ Khoena hui re în Jehovab xa ǁkhāǁkhāsen. Jesub ge ǁîb saosabena ge mîba în khoena Jehovab xa ǁkhāǁkhā. (Mat. 28:19, 20) Nē mîmāsa da ge a ǁnâuǀnam ǁkhā mîmā-e da ge amaga. Xawe Jehovaba da ūba hâ ǀnammi ra kai khami da ge apostel Paulub tsî Johaneb tsîkha khami nî tsâ hîna ge mîkha: “ǀÛ ǁoa khom kom ao, mû tsî khom ge ǁnâun xa ǃhoasa.” (ǃNǃkh. 4:20) ǂGui xūn ge khoe-e Jehovab xa ǁkhāǁkhāsa xu da ra hō ǂkhîba a mā da ǁoa. ǃGâiǂhôas aoǁnâ-aob Filipub ge Etiopiaǁî khoeba Elobmîs amab ǀkha hui tsî ǁâǁnās ǂhâǂhâsiba mûǂan kais khaoǃgâb ge hōǃâ ǂkhîb xa ǂai re. Filipub aiǁgausa ǁgae tsî da ga Jesub mîmās aoǁnâ sîsenni xa hâsa ǁnâuǀnam o, o da ge Jehovab ǀHûǀguitimî-ao kai ǂgao da ra ǃkhaisa ra ǁgau. (Khomai re Romeǁîn 10:10, 13, 14.) Nēs khaoǃgâ du ge Etiopiaǁî khoeb khami nî dîsen: ‘Tare-e ra ǂhani te, ǁāǁnâkaisen ta nîsa?’—ǃNǃkh. 8:36.

18. Mâ dîde da sao ra ǁkhāǁkhāǃâs ǃnâ nî ǃhoaǃgao?

¹⁸ Kaise ǂhâǂhâsa xū-e da ge nî dī ǁāǁnâ kaisen da ga o. Nē mîmâis ge kaise a ǂhâǂhâsa tsî da ge ǃgâise taen hoan nēs ǃnâ a ǃkhōǂgāsa ǃkhaisa nî ôaǃnâ. Tae-e da ǁāǁnâs xa nî ǂan? Tae-e da ǁāǁnâs aiǃâ tsî ǁāǁnâs khaoǃgâ nî dī? Nē dîdi ge sao ra ǁkhāǁkhāǃâs ǃnâ nî ǃhoaǃgaohe.