Sadu gagasi mîǁguiga du ge a sīǃnâ ǁkhā

1. ǂGuina mâ ǃgomsiba ge hōǃâ?

GAGASI mîǁguiba du dītsâ hâ xawe nēsa sīǃnâs ǀkha ǃgomsiba ge ūhâ i?b ǁNāti î ga ī, o du ge ǂâis ǃnâ nî ūhâ ǀuri du hâ tamasa. Aiǁgause, Filipi ge ǃnāsase ǁîb ǀgoresa gere ǃgâiǃgâi ǂgao. Xaweb ge ǀgores ǃaroma ǁaeba ǁamaǂuis ǀkha ǃgoma gere hōǃâ. Erikas ge mîǁguiba ge dī, îs aoǁnâ sîsenni ǀhaodi tawa ǁaeb aiǃâ sī ǁkhā. Xawes ge hoaǁae ǀhoadi ǃgao gere ǃonkhao. Tomab ge ǂgui ǃnāde gere dītsâ Elobmîsa khomai toasa. ǁÎb ge ra mî: “Elobmîsa khomais ǃnâ ta ge ǁkhoaba ge hō tama hâ i. ǃNona ǃnāde ta ge ge dītsâ xawe ta ge Levitikub kōse ǀgui ge khomai.”

2. Tae-i ǃaroma da ǂkhabuǂâi tide gagasi mîǁguiga da ga sī ǃnâ tama io?

² Mîǁguiba du ga ūhâ o hîna du sīǃnâ tama hâba, o tā ǂkhabuǂâi. ǂKhari mîǁguib tsîna sīǃnâs ge ǃnāsase ǁaeb tsî ǃgarise sîsens tsîna ǂgaoǀkhā hâ. Sadu mîǁguiba du ra sīǃnâ ǂgao ǃkhais ge ra ǁgau, Jehovab ǀkha du ūhâ ǀhōsagusisa du ra ǃgôaǃgâsa. Tsî du sadu ǁkhāsib ǃnâ hâ-i hoa-e ǁîba ra mā ǂgaosa. Jehovab ge sadu di dītsâde ra ǃgôaǃgâ. Ama as ge sadu a mā ǁkhā xū-i xab ge ǃnāsa-e ǂgao ǀkhā tama hâ. (Psa. 103:14; Mix. 6:8) Sadu di mîǁguigu ge nî ǁnâuǃāxa i, mâsib ra ǂgaoǀkhā khami. Mîǁguiba du go ǁhûi toa o, o du tae-e a dī ǁkhā ǁî-e sīǃnâs ǃaroma? Hā re î da ǀnî ǀapemāde ǃhoaǃgao.

ǂKHÂǃNÂS GE ǂHÂǂHÂSA

3. ǀGaisa turaba ūhâsa tae-i ǃaroma a ǂhâǂhâsa?

³ Kaise î ge a ǂhâǂhâsa sadu mîǁguiba sīǃnâs ǃaroma ǀgaisa turaba ūhâsa. Mîǁguib ǃgao du ga ǀgaisa turaba ūhâ, o du ge ǃgarise nî sîsen ǁî-e sīǃnâs ǃaroma. ǁNāsa da ge ǂoab hîna ǂgauba ǁî-i ra ī ǂgao ǃkhaisa ǃoa ra ǂhāb ǀkha a ǀgopeǀnō ǁkhā. ǂOab ga ǃgom ǀkhara, os ge ǁîb di ǃkhais tawa nî sī. Tsî ǀgaisa ǂoas ǀkhab ge ǀnîsi, ǁaeb ais tsîna a sī ǁkhā. ǁNās ǁkhās khami ǀgaisa turaba da ga ūhâ, o da ge sida mîǁguiga a sīǃnâ ǁkhā. ǃGâsab Davidi El Salvadors ǃnâ ra hâb ge ra mi: “ǀGaisa turaba da ga ūhâ, o da ge sida mîǁguiga a sīǃnâ ǁkhā. Tsîts ge ǃgarise ra sîsen. Xū-ets ge mā-am tama hâ î-i sā mîǁguiba sīǃnâsa xu ǂhani tsi.” Tae-e du a dī ǁkhā, î du ǀgaisa turaba ūhâ ǁkhā?

4. Tae-e da a ǀgoreba ǁkhā? (Filipeǁîn 2:13) (Ai-īsiba mû re.)

⁴ Turaba ǀgorebas. ǁÎb di ǃanu gagab ǃnâ-ūb ge Jehovaba ǀgaisa turaba a mā du ǁkhā, î du sadu mîǁguiba sīǃnâ. (Khomai re Filipeǁîn 2:13 sa.) ǀNî ǁaegu ai da ge mîǁguiga ra dī, ǁî-e da nî dīsa da a ǂan amaga. Xawe da ge ǁî-e sīǃnâs di turaba ǀnîsi ūhâ tama hâ. Nēs ge Norina ti ǀon hâ ǃgâsas Ugandab ǃnâ ra ǁans ǀkha ge ī. ǁÎs ge mîǁguiba ge dī, Elobmîs ǁkhāǁkhāsa tsoatsoas diba. Xawes ge ǀgaisa turaba ge ūhâ tama hâ i. Tsî ǁnās ǀkha ǃgâi ǁkhāǁkhā ao tamas hâ khami gere tsâ. Tae-e ǁîsa ge hui? ǁÎs ge ra mî: “Jehovaba da ge tsēs hoasa gere ǀkhoma, îb turaba māte Elobmîs di ǁkhāǁkhāsa dīsa. Ti ǀgoredi ǀkha sîsenǀhao tsî ta ge ǁkhāǁkhā da ra ǀgauba ge ǀāǀā. ǀNî ǁkhâgu khaoǃgâ ta ge ti turab ge kaisa ge mû. ǁNā kurib ǃnâ ta ge 2 Elobmîs ǁkhāǁkhāte ge tsoatsoa.”

5. Tae-i xa da nî ǂâiǃgâ hîna nî hui da-e sida mîǁguiba sīǃnâsa?

⁵ Jehovab ge dība du xūn xa ǂâiǃgâs. (Psa. 143:5) Apostel Paulub ge Jehovab ge ǁîb ǃoa a ǁgau ǃgâisib xa gere ǂâiǃgâ. Tsî nēs ge ǁîba turaba ge mā, îb ǃgarise Jehovaba sîsenba. (1Kor. 15:9, 10; 1Tim. 1:12-14) ǁKhā ǀgaub ǃnâ du ga Jehovab ge dība du xūn xa ǂâiǃgâ, o du ge turaba nî ūhâ sadu mîǁguiga sīǃnâsa. (Psa. 116:12) Kō re tae-i ge ǃgâsas hîna Honduras ǃnâ ra hâsa a huisa, îs ǁîs di mîǁguib aimâba-aos disa sīǃnâ ǁkhā. ǁÎs ge ra mî: “Jehovab a ǀnamte ǀgaub xa ta ge ge ǂâiǃgâ. ǁÎb di khoena ǃoab ge ge ǀkhī-ūte. Tita ǀkha ǁae tsîb ge ra ǃûite. ǁNāti-i xūn xa ǂâiǃgâs ge ǁîba da ūba hâ ǀnamma ge ǀgaiǀgai. Tsî ǀgaisa turaba ge māte.”

6. Mâ xū-e sida turaba a ǀgaiǀgai ǁkhā?

⁶ Mîǁguiba sīǃnâs ǀkhaegu xa ǂâis. Kō re tae-i ge Erikas hîna go ǀnai, a ǃhoaǃgaohesa a huisa îs ǀhaodi tawa ǁaeb aiǃgâ sī. ǁÎs ge ra mî: “Mûǂan ta ge ge ǂgui xūna ta ra ǂoaǃnâsa, aoǁnâ sîsenni ǀhaos tawa ta ga ǁaeb aiǃâ sī tama io. Xawe ǁaeb aiǃâ ta ga sī, o ta ge ǃgâsana a tawede ǁkhā. Tsî ǁîn ǀkha a hâ ǀhao ǁkhā. Huite nî ǀapemādi tsîna ta ge a hō ǁkhā. Î ta ti aoǁnâ sîsen-e ǃgâiǃgâi tsî ǁî-i ǃnâ ǃgâiaǂgao.” Erikas ge ǁîs ǂâisa ǁaeb ai sīsa xu ra hā ǀkhaeb ai ge ǂnûi. Tsîs ge ǁnāsa ge huisi îs ǁîs mîǁguiba sīǃnâ. Sadu ǂâisa du mâ ǀkhaegu ai a ǂnûi ǁkhā? Elobmîsa khomais tsî sadu di ǀgorede ǃgâiǃgâis ga sadu mîǁgui o. Nēs mati Jehovaba ǀkha du ūhâ ǀhōsagusisa nî ǀgaiǀgai ǀgaub xa ǂâi re. (Psa. 145:18, 19) Xristeǁî ǀgauba ǃgâiǃgâis ga sadu mîǁgui, o naun ǀkha du ūhâ ǀhōsagusisa i nî ǃgâiǃgâi ǀgaub xa ǂâi re. (Kol. 3:14) Sadu mîǁguiba du ra sīǃnâ ǃaromade du tae-i ǃgao xoaǁnâ tama hâ? ǁAeba xu ǁaeb ǀkha ǁnā du go xoaǁnâ xūna kōǃgâ re. Tomasi hîna go ǀnai a ǃhoaǃgaoheb ge ra mî: “ǃAromade ta ga ūhâ o, ti mîǁguiba sīǃnâsa. Os ge ǁnāsa nî hui te î ta tā ǀûsen.”

7. Tae-e Juliob tsî ǁîb kaikhoes tsîna ge hui îra ǁîra mîǁguiba sīǃnâ?

⁷ Mîǁguiba sīǃnâs ǀkha nî hui dun ǀkha hâ ǀhao re. (ǂKhm. 13:20) Kō re tae-i ge Juliob tsî ǁîb taras tsîna a huisa, î ra ǃnāsase aoǁnâ sîsenni ǃnâ dī ǁkhā. ǁÎb ge ra mî: “Sîm di mîǁguiba nî ǂkhâǃnâ ǀhōsanam ge ge ǁhûi. Tsîm ge mîǁguiba ǁîn ǀkha ge ǀgoragu. ǃNāsan ge ǀnai ǁnāti-i mîǁguiba ge sīǃnâ. ǁNā-amagan ge sîma ǃgâi ǀapemāde ga mâǁkhā hâ. Sîm ǀhōsan tsîn ge ge dî, sîm mîǁguigu mati ra aiǃgûsa. ǂKhâǃnâsam gere ǂhâ, on ge gere ǂkhâǃnâ mi.”

TURAB GA ǀKHAIS

8. Tae-e a īǁkhā ǂkhâǃnâhe da ga ǁaeb ai ǀgui da mîǁguib ai a sîsen o? (Ai-īsiba mû re.)

⁸ Ama as ge sida hoada ge turaba da ūhâ tama hâ tsēde ūhâ. Nēsa ra ǂâibasen sida di mîǁguib ai da a sîsen ǁoasa? Hî-i. Hā re îda ǁguiǃā. ǂOab ge ǂgauba ǁî-i ra ǃgom ǀkhāb hoab ǃoa a ǂgā ǁkhā. Xawe ǂoab di ǀgaib ge a ǃkharagagu. ǀNî ǁaegu ai ǀgaisa tsî nau ǁaegu ai ǂkhabusa. Xawe nēsa ra ǂâibasen ǃnari-aob ǂgauba ǁîs di ǃkhaisa ǃoa a ī-ū ǁoasa? Hî-i. Aiǁgause, ǀnî ǂgaugu ǃaromats ge haiga nî sîsenū îb ǂgauba aisǀkhā ī ǁkhā. ǁNās ǀkhab ge ǂgauba ra ǃnari khoeba nē haiga a sîsenū ǁkhā. Sida ra ǂkhâǃnâ xū-i ge ǂoab ǀkha a ǀgopeǀnōhe ǁkhā. ǀNî ǁaega ǀgaisa ǀnî ǁaega ǂkhabusa. ǀNî tsēde da ge sida mîǁguigu ai sîsens turaba ūhâ tama hâ. Sida di mîǁguiba da ga ǂkhâǃnâhe hâse da ga tsâ, o ǀgui a dī. O da ge ǁnāsa ǀnîsi sīǃnâ ǁkhā hō tide. ǂGausa ra ǃnari khoe-i ǀnî hâ ǀgauga sîsenū tsî ī-i ra ǃkhais tawa ra sī khami. Da ge sida tsîna a dītsâ ǁkhā sida mîǁguiga sīǃnâsa. Nēs ge amase supu tide xawe du ge kaise nî ǃgâiaǂgao ǁnā mîǁguiba du ga sīǃnâ o. Tae-e da a dī ǁkhās xa, hā re î da saora dîsa ǃhoaǃgao.

9. Mîǁguib ai da nî sîsen ǀgara, ǁî-e sīǃnâs turaba da ga ūhâ tama i xawe? ǁGuiǃā re.

⁹ Jehovab ge ra ǂhâba, î da ǂgaoba xu ǃoaba bi. Tsî ǁnāsa māsenxase dī. (Psa. 100:2; 2Kor. 9:7) ǁNāsa ra ǂâibasen î da gagasi mîǁguib ai sîsen ǂhâba tama da ga ī xawe? Apostel Paulub di aiǁgausa kō re. ǁÎb ge ge mî: “Xawe ta ge ti sorosa ǀgaisase ǃâi tsî ra ǃgādī.” (1Kor. 9:25-27) Paulub ge ge ǁgarisen îb ǂhanu xū-e dī, ǀkhara xūnab gere dī ǂgao xawe. Jehovaba Paulub ge dī xūn ǀkha ge ǂkhîǂâixa ī? Jehovab ge kaise ge ǂkhî-i. Tsî Pauluba ǁîb di dītsâdi ǃaroma ge ǀkhae.—2Tim. 4:7, 8.

10. Mati da ǃgâiba ra hō sida mîǁguib ai da ga sîsen o turaba da ga ūhâ tama ī xawe?

¹⁰ ǁKhā ǀgaub ǃnâ Jehovab ge a ǂkhîǂâixa mûb ga o, sida di mîǁguib ai da ra sîsensa turaba da ūhâ tama hâ xawe. ǁÎb ge ra ǃgâiaǂgao ǂan-i a amaga, ǁnā xū-e da a ǀnam ǃkhais ǃgao da nē-e dī tamasa. Xawe ǁîba da a ǀnam amaga. Jehovab ge Pauluba a ǀkhae khamib ge sida ǁgūtsâdi tsîna nî ǀkhae. (Psa. 126:5) Tsî Jehovab di ǀkhaeba da ra hōǃâ khami da ge turaba nî hōǃâ tsoatsoa. Luciana ti ǀon hâ ǃgâsa Polandi ǃnâ ra ǁans ge ra mî: “ǀNî ǁaegu ai ta ge aoǁnâ sîsen-e ǃoa ī ǂgao tama hâ, ǃgōsase tsau hâse ta ga tsâ o. Xawe aoǁnâ ta ga o ta ra hōǃâ ǃgâiaǂgaob ge a kai ǀkhae.” Hā re î da nēsi kō, tae-e da a dī ǁkhāsa turaba da ga ūhâ tama io.

11. Jehovaba mati a hui da ǁkhā, î da ǃkhō-oasensa ǀgaiǀgai?

¹¹ ǃKhō-oasensa ǀgorebas. ǃKhō-oasens ge tsâsigu tsî dī du ra xūna xu ǃkhō-oasensa ǃkhōǂgā hâ. ǂGui ǁkhaegu ais ge ǁnāsa ra ǂâibasen ǁgai xū-e dīsa xu ǃkhō-oasensa. Xawe ǃkhō-oasens tsîn ge ǂhâbasa î-i ǃgâi xū-e dīsa ǂkhâǃnâ da. ǃGōsase xū-i ga ǃgom tamas ka io da ga turaba ūhâ tama io. ǂÂis ǃnâ ūhâ re, ǃkhō-oasens tsîn ge gagasi ǂūb di ǃâ. ǁNā-amaga Jehovaba ǂgan re, îb ǃanu gagab ǀkha hui du, î du nē ǂhâǂhâsa ǀgauba omkhâi. (Luk. 11:13; Gal. 5:22, 23) Davidi hîna da go ro ǃhoaǃgaob ge ra ǁguiǃā ǀgores ge mati a huibisa. ǁÎb ge aitsama Elobmîsa ǃnāsase gere ôaǃnâ ǂgao. ǁÎb ge ra mî: “Jehovaba ta ge gere ǂgan, îb huite ǃkhō-oasensa omkhâisa. ǁÎb huib ǀkha ta ge ǃgâise Elobmîsa ǁkhāǁkhāsens ti ǀapeǁguib ǀkha ge tsoatsoa. Tsî hoaǁae ǁî-e gere dī.”

12. Aoǁnâ-aob 11:4 ǃnâ da mâ ǀapemāde ra hō gagasi mîǁguigu xa?

¹² Tā hānî ǃgâi ǁaeba ǃâu. Nē ǃhūbaib ǃnân ge xūna hoaǁae ǃgâi tide. Nēn nî ǃgâisa da ga ǃâu, o da ge sada mîǁguiba sīǃnâ tide. (Khomai re Aoǁnâ-aob 11:4 sa.) Dayniel ti ǀon hâ ǃgâsab ge ra mî: “Tātsē î ge ǀoasase a ǃgâi mâsiba hâ tide. ǃGâi mâsiba da ge ra kurubasen tsoatsoas ǀguisa da ga dī o.” Paul ti ǀon hâ ǃgâsab Ugandab ǃnâ ra hâb ge ǀkhara ǃaromasa ra mā, tae-i ǃaroma da mâiǂûi tidesa: “ǃGom mâsiga da ga hōǃâ xawe da ga tsoatsoa, o da ge Jehovaba ǃaromasa ra mā îb ǀkhaeda.”—Mal. 3:10.

13. ǂKhari mîǁguigu ǀkha tsoatsoasa tae-i ǃaroma a ǃgâi?

¹³ ǂKhari xūrona dīs. Turaba da ūhâ tama hâ khami da ge a tsâ ǁkhā, sida mîǁguib kaise a ǃgomsa sīǃnâs ǃaroma. Sadu ga di a tsâ, o du ǀnîsi ǁnā mîǁguiba ǂkhari ǃârogu ǃnâ a dī ǁkhā? ǀNîsi du ga mîǁgui o gagasi ǀgauga omkhâisa. O tae-i ǃaroma du ǂkhari ǃârogu ǃnâ dī tsoatsoa tama hâ? Elobmîsa khomais di mîǁguiba du ga ūhâ, o tae-i ǃaroma du ǁîsa khomais di ǀapeǁguiba ǃnuburose ūhâ tama hâ? Tomasi hîna go ǃhoaǃgaoheb ge ǃgoma gere hōǃâ, Elobmîsa kurib ǃnâ khomai toasa. ǁÎb ge ra mî: “Mûǂan ta ge ge kaise a ǃkhaebate ǀgaub ǃnâ ta gere khomaisa. Tsî ta ge ge mîǁgui, î ta ǁkhawa dītsâ. Xawe ta ge ge ǀapeǁgui î ta ǀoro danaǃâde tsēs hoasa khomai. Î ta ǁîdi xa ǂâiǃgâ ǁkhā. ǁNās xa ǃaromahe hâse ta ge gere ǃgâiaǂgao Elobmîsa khomaisa.” Tomab di ǃgâiaǂgaob ge ǀarosen khamib ge gaxurose ge khomai tsoatsoa. Tsî ǁnās ǃnâ-ūb ge ēga hoa Elobmîs ge khomai toa.c

TĀ MÎǁGUIBA RA ǃGOMǃGOM XŪN XA ǂKHABUǂÂI

14. Tae-e sida mîǁguiba sīǃnâsa a ǃgomǃgom ǁkhā?

¹⁴ Tsûtsûsase matikōse da ga turaba a ūhâ tsî xū-e ga dī ǂgao xawe da ge noxoba ǃgomsiba a hōǃâ ǁkhā. Aiǁgause, ǃâubasen tama da hâ “mâsib” ge sida ǁaeb hîna da mîǁguib ai nî sîsenna a ū ǁkhā. (Aoǁn. 9:11) ǂKhabuǂâi kai da ǁkhā a ǃgomsiba da ge a hōǃâ ǁkhā. Tsî da ge nēs xa ǀgaioǃnâse nî tsâ. (ǂKhm. 24:10) ǀOasa kurusa da ūhâ tama hâ amaga, da ge a dīsā ǁkhā. Tsîs ge nēsa a ǃaroma ǁkhā, î da sida mîǁguiba tā sīǃnâ. (Rom. 7:23) Tamas ka io da ge tsau hâse ǀgui a tsâ ǁkhā. (Mat. 26:43) ǃGom tsēsa da ga hōǃâ, o tae-e a hui da ǁkhā?

15. Mîǁguiba ra ǃgom kai xūn ga hâ xawe da tae-i ǃaroma ǀûsen tide? ǁGuiǃā re. (Psalmdi 145:14)

¹⁵ ǂÂis ǃnâ ūhâ re, mîǁguiba du ga sīǃnâ tama i. Os ge ǁnāsa ǂâibasen tama î da ǀûsen. Elobmîs ge ra mî, ǁaeb xu ǁaeb ǀkha da ǃgomsiga nî hōǃâsa. Xawes ge ǃgāsa kais tsîna ra di, Jehovab huib ǀkha da a khâimâ ǁkhāsa. (Khomai re Psalmdi 145:14 sa.) Filip ti ǀon hâ ǃgâsab, hîna go ǀnai a ǃhoaǃgaoheb ge ǃgâiǃâsa nē ǀgaub ai ra ǁguiǃā: “Ti ǃgâiǃâs ge matikō ǃnāde ta ra ǁnās ai ǃgaoǃgaohe tama hâ. Xawe matikō ǃnāde ta ra ūkhâisens ai hâ.” Davidi hîna go ǀnai a ǃhoaǃgaoheb ge ra mî: “Tita ge ǃgomsigu tsî ǁgai tsēdi tsîna ǃâitsâgu ase mû tama hâ. Xawe Jehovaba da ǀnamma nî ǁgau ǃēs ase ra mû.” ǃGomsina du ga hōǃâ xawe du ga aiǃgû o, o du ge ra ǁgau Jehovaba du ra ǂkhîǂkhî ǂgaosa. Jehovab ge kaise ra ǂkhî, mûb ga o dītsâ da rasa sida di mîǁguiba sīǃnâsa.

16. ǃGomsiga hōǃâsa tae-e ra ǁkhāǁkhāda?

¹⁶ Mîǁguiba ra ǃgomǃgom xūna xu ǁkhāǁkhāsens. ǁÎ-i ra ǃaroma xū-i xa ǂâi tsî saora dîde dîsen re: ‘Xū-e ta a dawa ǁkhā, î ta tā ǁkhawa ǁnāti-i ǃgomsi-e hōǃâ?’ (ǂKhm. 27:12.) ǀNî ǁaega î ga sadu mîǁguiba sīǃnâsa ǃgom io. Os ge ǁnāsa ra ǁgau nēs tae-i ǃaroma a īǁoasa. Nēs sadu ǀkha ra īsa du ga mû, o sadu mîǁguib xa ǁkhawa ǂâi re. ǀNîsi i a ǁnâuǃāxasa ǁî-e du a sīǃnâ ǁkhā ǃkhais ǃaroma.d Sīǃnâ ǁkhā du a mîǁguiba du ga dīho tama i, ob ge Jehovaba ǁgaiǃnâ xū-i ase mû du tide.—2Kor. 8:12.

17. Tae-i ǃaroma da ǀnai da ge sīǃnâ xūna ǂâis ǃnâ ni ūhâ?

¹⁷ ǀNai du go sīǃnâ xūna ǂâis ǃnâ ūhâ re. Elobmîs ge ra mî: ‘Elob ge ǂhanuoǃnâ tama hâ. Sadu sîsenneb nî ǀuruse.’ (Heb. 6:10) ǁNā-amaga du ge sadu tsîna tā nî ǀuru. ǀNai du go sīǃnâ xūn xa ǂâi re. Nēsi î ga Jehovab ǀkha ǀhōsagusisa omkhâis, naun ǀkha ǁîb xa ǃhoas tamas ka io ǁāǁnâ kaisensa. ǀNai du ge aiǃgû tsî gagasi mîǁguiga sīǃnâ khami du ge nēsis tsîna sadu di gagasi mîǁguiga a sīǃnâ ǁkhā.—Fil. 3:16.

18. Tae-e da ǂâis ǃnâ nî ūhâ sīǃnâ ǂgao da ra xūn ai da ga sîsen ǁaeb ai? (Ai-īsiba mû re.)

¹⁸ Jehovab huib ǀkha du ge, sīǃnâ ǂgao du ra xūna a sīǃnâ ǁkhā. ǂGaub ai ra sîsen khoegu ǁîgu ra ǃnariba ǃkhais tawa ra sī khami. Xawe ǂâis ǃnâ ūhâ re, ǂguin hîna ǂgaugu ai ra sîsengu ge ǂgaub ra ǃgû ǀgaub xa a ǃgâibahe. ǁKhā ǀgaub ai, hoaǁae Jehovab ra hui du ǀgausa mû re. Tsî ǁnās ge nî hui du î du ǃgâiaǂgao, sīǃnâ ǂgao du ra xūn ai du ga sîsen ǁaeb ai. (2Kor. 4:7) ǀÛsen tama du ga io, o du ge kai ǀkhaeba nî ūhâ.—Gal. 6:9.