ǃNākorobe ǁkhāǁkhāsens ǀkha hui ǁkhā xūn

ELOBMÎSA aitsama ôaǃnâs ǀkha du ǃgomsiba ra hōǃâ? Hoa da ge ǀnîsi ǀnî ǁaegu ai ti ra tsâ. Xawe ǂâi re ǀnî xūn hîna da hoaǁae ra dīna, aiǁgaus ase ǁāsensa. ǁĀsens ge ǁaeb tsî ǁguiǂgāsens tsîna ǂhâhâ xawe da ge kaise ǃgâise ǁnās khaoǃgâ ra tsâ. Elobmîs ǁkhāǁkhāsens tsîn ge khoakhoa da ǁkhā ‘ǁgammi ǀkha ǁā ǃanuǃanusens’ ra tsâ kai khami. (Efe. 5:26) ǀNî xūn hîna hui ǁkhāna kō re:

• ǀApeǁguiba dī re. Elobmîsa aitsâma ôaǃnâs ge Xristeǁîn ǃaroma “ǂhâǂhâsa xūn” di ǀgui tsî a ǁnāxūǃnâhe ǁoa. (Fil. 1:​10, NW) Sadu Elobmîsa aitsâma ôaǃnâs ǀkha ra hui du ǀapeǁguiba du tae-i ǃaroma mû ǁkhā du a ǃkhais tawa mâi tama hâba? Aiǁgause, aiskas ai tamas ka io selfoni ǃnâ?

• ǂHâsib ǃoagu dawas: Tae-e sado a supuba, gaxuse ǀgui xū-e dīsa tamas ka io ǁaeroba sâǃnâsa? Sadu mâsiba du ge a ǂan. ǁNās ǀkha sadu mâsib ǃoagu xūna ǀapeǁgui. ǁKhāǁkhāsens ǁaeb ga hā tsî du ga ǁnāsa dīs turaba ūhâ tama io, o du ge ǀnîsi 10 haigu ǀguiga ǁnāsa a dī ǁkhā. ǃNubu ǁaeroba ǁkhāǁkhāsens ǃnâ-ū du ge ǂgui xūna a ǁkhāǁkhāsen ǁkhā. Tsî īǁkhā as ge tsoatsoa du ga o du ǀnîsi ǀû ǂgao tidesa.—Fil. 2:13.

• ǁAeb aiǃâ mîǁgui tae-e du nî ǁkhāǁkhāsensa. ǁKhāǁkhāsens ǁaeb ai ǀgui du ga ǂâi o tae-e du nî dīsa, o du ge “mâ ǃēs hîa du ūhâs hoasa” ǂhanuse sîsenū tama. (Efe. 5:16) ǀNîsi du ǁkhāǁkhāsen tamas ka io ra ôaǃnâ ǂgao xūna xoamâi re. Tamas ka io dî-e du ga ūhâ os tsîna xoamâi. ǁKhāǁkhāsens ǀams ai du ga hā, os tsîna saora ǃnās ai du a ǁkhāǁkhāsen ǁkhā xūna xoamâi re.

• ǀKharaǀkharana dī. ǂHâǂhâsa as ge mâ wekheb hoaba ǁkhāǁkhāsensa. ǁNās ga īǁkhā hō tama io, o ǀnî hâ tsēs tsî ǁaeb tsîna ǁhûi re wekheb ǃnâ mîǁgui du go hâ is xa.

Amase da ge ǃgâiba ra ǀama Elobmîs ôaǃnâsa da ga mâ wekheb hoaba dī o. Sada ge Jehovaba ǃoa ǀgū, gā-aisiba ǁkhāǁkhāsen tsî ra khoakhoahe.—Jos. 1:8.