ǂGoms ǃnâ ǃgû ǀgara

1. Apostel Pauluba tae-i ǃaroma ge ǂkhî hâ i ǁîb ûibab ge ûi ǀgaub xa?

APOSTEL Paulub ge ge ǂan-i ǀgūǁaeb nî ǃgamhesa. Xaweb ge ǁîb ûibab gere ûiǀgaub xa kaise gere ǃgâiaǂgao. ǁÎb ge ǂâi-oa tsî ge mî: “ǃGâi ǃkhamsa ta ge ǃkham, ǃgûsa ta ge dītoa tsî ǂgomsa ta ge sâubasen.” (2Tim. 4:​6-8) Paulub ge ǃgâi mîǁguiba ge dī îb ǁîb ûib hoab ǀkha Jehovaba ǃoaba tsîb ge ge ǂan-i Elob nēs ǀkha nî ǂkhîsa. Sida tsîn ge ǃgâi mîǁguiga ra dī ǂgao, î da Jehovab mā-amsa hō. Nēsa da mati a dī ǁkhā?

2. ǂGoms ǃnâ ǃgûsa tae-e ra ǂâibasen?

² Paulub ge ǁîb tsî nau ǂgomǂgomsa Xristeǁîn xa ge mî: “ǂGomsa xu da ge ûi hâ, xawe mû da rana xus ose.” (2Kor. 5:7) Pauluba tae-e gere ǂâibasen? “ǃGû” ti hâ mîs ge Elobmîs ǃnâ ǀnî ǁaega khoe-i ǁî-i ûiba ra ûi ǀgauba ǃoa ra ǁnaeǁgau. Jehovab ǃnâ ǂgom tama hâ khoen ge ǁîn mîǁguiga mû, ǁnâu tsî tsân ra ǀgaub ai ǃgaoǃgaohe hâse ra dī. Xawe Jehovab ǃnâ ǂgomsa ūhâ khoe-i ge ǁîb tae-e ra ǂgaoǀkhāsa ǂâis ǃnâ ra ūhâ mîǁguiba i ga dī o. ǁÎb ge ǂgomǃgâsiba ūhâ Jehovab Elobmîsa xu ra mā bi ǀapemādeb ga sao, ob nēsi ǃgâi ûiba nî ūhâsa tsî hānîǁaeb ǃnâ nî mādawa-amhesa.—Psa. 119:66; Heb. 11:6.

3. ǂGoms ǃnâ ǃgûsa mâ ǀamǂoasa ūhâ? (2 Korinteǁîn 4:18)

³ ǀNî ǁaegu ai da ge hoa da mû, ǁnâu tsî tsâ da ra ǀgaub ai ǃgaoǃgaohe hâse mîǁguiga ra dī. ǂHâǂhâsa mîǁguiga da ga mû tamas ka io ǁnâu da ra xūn ai ǀgui ǃgaoǃgaohe hâse dī, os ge ǁnāsa ǃgomsiga a ǃaroma ǁkhā. Tae-i ǃaroma? Mû tsî da ra ǁnâu xūn ge hoaǁae ǂhanu tama hâ. Mû, ǁnâu tsî tsâ da ra ǀgaub ai ǃgaoǃgaohe hâse da ga mîǁguiga dī, o da ge Jehovab ǂgaoǀkhā da tama xūna a dī ǁkhā. (Aoǁn. 11:9; Mat. 24:​37-39) Sida ǂgoms ai ǃgaoǃgaohe hâ mîǁguiga da ga dī, o da ge “ǃKhūba a ǃgâiba” mîǁguiba ra dī. (Efe. 5:10) Elob ǀapemāsa da ga sao, os ge nēsa ama ǂkhîba nî mā da. (Psa. 16:​8, 9; Jes. 48:​17, 18) ǂGoms ǃnâ da ga ǃgû ǀgara, o da ge ǀamo ûiba nî hō.—Khomai re 2 Korinteǁîn 4:18 sa.

4. Khoe-e mati a ǂanǂui ǁkhā tae-i xa i ra daoǁgauhesa mîǁguiba i ga dī o?

⁴ Mati da a ǂan ǂgoms tamas ka io mû da ra xūn ǃoagu da ra ǃgûsa? Sao ra dîde dîsens ge hui da ǁkhā: Tae-e ra hui te mîǁguiba dīsa? Mû ta ra xūn ai ta ra ǂgomǃgâ ti mîǁguiba dīsa? Tamas ka io Jehovab ǀapemādi xa ta ra daoǁgauhe? Jehovab ǀapemādi ai da mati a ǂgomǃgâ ǁkhā ǀgauba da ge nî ǃhoaǃgao, sao ra mâsigu ǃnâ: Sîsen-e da ga ôa, ǃgamme ǂgao da ga tsî ǀapeǂhumis ga daoǁgaude māda o. Mâ mâsib hoab ǃnâ da tae-e dī tsî ǃgâi mîǁguiga nî dīsa da ge nî ǃhoaǃgao.

SÎSEN-E DA GA ÔAS

5. Tae-e da ǂâis ǃnâ nî ūhâ sîsen-e da ga ôa o?

⁵ Hoa da ge sida ǂhâsigu tsî omaris tsîna ra kōǃgâ ǂgao. (Aoǁn. 7:12; 1Tim. 5:8) ǀNî sîsenan ge ǃgâise ra mātare. ǀNî sîsen-aon ge ǂâuna mari-e ra mātara-e în omaridi ǂhâsiga kōǃgâ tsî ǀnî mariro-e ǂnûibe ǁkhā. Xawe ǀnî sîsenan ge tsēkorobe maris ǀguisa ra mātare. Sîsen-e dīsa da ga ǁhûi, o da ge ra ǂâi matikō mari-e da nî kurusa. Matikō mari-e da nî kurus xa ǀgui da ga ǂâi, o da ge mû da ra xū-i xa ra daoǁgauhe.

6. Sîsen-e da ga ôa, o da mati ǂgoms ǃnâ nî ǃgû? (Hebreǁîn 13:5)

⁶ ǂGoms ǃnâ da ga ǃgû, o da ge ǂâis ǃnâ nî ūhâ nē sîsenni mati Jehovab ǀkha da ūhâ ǀhōsagusisa a tsâǀkhā ǁkhāsa. Dîsen ǁkhā da ge a: ‘Jehovaba nē ǃnôa sîsen-e ra ūǃoa? Tamas ka io i Jehovab ǃhui hâ xūna nî dī kai te?’ (ǂKhm. 6:​16-19) ‘ǀHao te hâǃnâ, aoǁnâ sîsen-e dī tsî ta aitsâma Elobmîs ôaǃnâsa nî dī hō? Matikō gaixuse ta ti omarisa xu nî hâ bē?’ (Fil. 1:10) Sîsen-e hōs a ǃgom xawe da ga ǁnā dîde î ti a ǃeream, o i ge kaise nî gā-ai î da ǁnā sîsen-e tā ūǃoa. ǂGoms ǃnâ da ga ǃgû, o da ge Jehovaba da ra ǂgomǃgâsa ra ǁgau mîǁguiba nî dī, ǁîb sida ǂhâsiga nî kōǃgâsa.—Mat. 6:​33, khomai re Hebreǁîn 13:5 sa.

7-8. Suid Amerikab ǃnâ ra hâ ǃgâsaba mati ǂgoms ǃnâ ge ǃgû? (Ai-īsiba mû re.)

⁷ Javieria Suid Amerikab ǃnâ ra hâb ge ge mû, matikōse i a ǂhâǂhâsasa ǂgoms ǃnâ ǃgûsa. ǁÎb ge ra mî: “Kai aiǂhanuba ta ge ge ūhâ i ǂgui mari-e kuru tsî ǁnāsa xu ǃgâiba ǀamasa.” Xaweb ge Javiera aimâba-aose gere ǃoaba ǂgao. ǁÎb ge ra mî: “Sîsen kōǃgâ-aob xa ta ge ge dîǃnâhe. Dîǃnâhe ta nîs aiǃâ ta ge Jehovaba ǃoa ge ǀgore, ǁîb tae-i tita a ǃgâibasa a ǂan amaga. Sîsenni tawa ta ge ǃnāsa aiǂhanuga gere ǂhâba tsî kai mari-i tsîna gere kuru. Xawe ta ge ge ǂgao tama hâ i, î-i nē sîsen-e Jehovab xa ǂhâǂhâsa.”

⁸ Javieri ge ra mî: “Dîǃnâs tawab ge sîsenni kōǃgâ-aoba ge mîba te, ǁaeba xu ǁaeb ǀkha ta gaixu īrga nî sîsensa. ǃNomsa ǀgaub ǃnâ ta ge ǁîba ge mîba nēsa ta a dī ǁoasa. Ti ǃoabasa i a ǂhani ǁkhā amaga.” Javieri ge ge mîǁgui, ǁnā sîsen-eb ūǃoa tidesa tsîb ge 2 wekhekha khaoǃgâ ge aimâba-ao kai. Javieri ge ǁaeroba ǃkharu tsî ǀoasa tsēsa sîsen-e tama sîsen-e ge hō. ǁÎb ge ra mî: “Jehovab ge ti ǀgorede ge ǁnâu-am tsî ge hui te î ta aimâba-aose ǃoabas ǀkha nî hui te sîsen-e hō. Kaise ta ge ra ǃgâiaǂgao, Jehovab ge ǁîba ǃoabas ǀkha a hui te ǁkhā sîsen-e mātesa. Tsî ta nēs ǃnâ-ūs tsîna ti ǃgâsana a hui ǁkhāsa.”

9. Tresob aiǁgausa xu da tae-e ra ǁkhāǁkhāsen?

⁹ Tae-e da nî dī mûǂan da ga o nē sîsenni ǃgâi tama hâsa tamas ka io i ga ǃgom kai o Jehovab ǀgūse hâsa? Tresor ti ǀon hâ ǃgâsab Kongob ǃnâ ra hâb aiǁgausa ǃgaoǃgâ re. ǁÎb ge ra mî: “Nē ǀasa sîsen-e ta ge hoaǁae gere ǂhâba. ǂGuro ta ge ūhâ i sîsenni xa ta ge kaise gere matare-e tsîn ge khoena ǂhâǂhâsa khoe-i ase gere mû te.” Xawe Tresob ge ǁaeba xu ǁaeb ǀkha ǀhaode gere ǂoaǃnâ, gaixu īrgab gere sîsen amaga. ǀNî ǁaegu ai i ge ǁîb sîsenǁare-aona ǁgâiba gere mā bi îb khoena ǂhumiba. Tresob ge nē sîsen-e gere ǁnāxū ǂgao xawe gere ǂâiǂhansen ǀnî hâ sîsen-eb hō tidesa. Tae-e ǁîba ge hui? ǁÎb ge ra mî: “Habakuki 3:​17-19 ge ge hui te, î ta ǁnâuǃā ǁnā sîsen-e ta ga ǂoaǃnâ xaweb Jehovaba nî kōǃgâ tesa. ǀAms ai ta ge ǁnā sîsen-e ge ǁnāxū. ǂGui sîsen mā-aon ge ra ǂâi khoe-i ǁî-i di sîsen-e ǂgurose nî mâisa, ǁî-i omaris tsî gagasi ûib xa. Kaise ta ge ra ǃgâiaǂgao, Jehovab tsî ti omaris tsîn ǀkha ta ūhâ ǀhōsagusisa ta ge ǁkhaubasa. Kuriba ǃkharu tsîb ge Jehovaba ǃgâi sîsen-e hōs ǀkha ge hui te, î ta ti ǂhâsiga kōǃgâ ǁkhā tsî ǃnāsa ǁaega gagasi ǁaxasigu ǃnâ ǁhao. Sida ûib ǃnâ da ga Jehovaba ǂgurose mâi, o da ge ǀnîsi ǂkhari mari-e a ūhâ ǁkhā xaweb ge ǁîba nî kōǃgâ da.” Jehovab ǀapemādi tsî mîmâidi tsîna da ga ǂgomǃgâ, o da ge ǂgoms ǃnâ da ra ǃgû ǀgarasa ra ǁgau mîǁguiga nî dī. Tsîb ge ǁîba nî ǀkhae da.

ǃGAMME ǂGAO DA GAS

10. Mâ xūn ai ǃgaoǃgaohe hâse da ǃgamme ǂgao da ra khoe-e a ǁhûi ǁkhā?

¹⁰ ǃGammeb ge Jehovaba xu hâ ǀkhaeba tsî î ge tsū tama hâ ǁnāsa ǂhâbasa. ǃGâsas ga ǃgamme ǂgao os ge ǃgâsab ra mûsen, tanisen ǀgaub, dībaseni hâ ǀons, mari-eb ra sîsenū ǀgaub. Tamas ka io matib ǁîb omarisa ra kōǃgâ ǀgaub tsîb ra tsâ kaisi ǀgaub xas tsîna a ǂâiǃgâ ǁkhā.b Nē xūn hoan ge kaise a ǂhâǂhâsa. Xawe nēn xa ǀguis ga ǂâi, os ge mûs ran ai ǃgaoǃgaohe hâse nî ǃgû.

11. ǃGamme ǂgao da ra khoe-e da ga ǁhûi, o da mati nî ǁgau ǂgoms ǃnâ da ra ǃgûsa? (1 Korinteǁîn 7:39)

¹¹ Jehovab ge kaise ra ǂkhî, ǃgâsan ga ǁîb ǀapemāsa sao o ǃgamme ǂgaon ra ǁaeb ai. Aiǁgause ǁîn ge ra ǃâu î-i “ǂkhamkhoesis” tsâsiga ǃkharu soregus xan nî ǂâis aiǃgâ. (1Kor. 7:36) ǁÎ-i ge ǃgōsase ra ǃgaoǃgâ î-i ǃgamme ǂgao i ra khoe-e ǃgâi ǀgaugu Jehovab ra ǂgaoǀkhā da ga ūhâ. (ǂKhm. 31:​10-13, 26-28; Efe. 5:33; 1Tim. 5:8) Jehovaba ǃoaba tama khoe-i ga ǁî-i ǃnâ ǃgâiǃgâibasensa ǁgau xawe i ge ǁî-e sore tama hâ. “ǃKhūb ǃnâ ǀgui ǃgamme” ti hâ ǀapemāsa i ra sao amaga, 1 Korinteǁîn 7:39 ǃoagu. (Khomai re.) ǁÎn ge nēsa ra dī Jehovab ǁîn ǂhâsiga nî kōǃgâsan a ǂan amaga.—Psa. 55:22.

12. Rosas aiǁgausa xu du tae-e ra ǁkhāǁkhāsen?

¹² Rosas, Kolombiab ǃnâ ra hâ aimâba-aos aiǁgausa ǃgaoǃgâ re. ǁÎs ǀkha ra sîsen khoeb Jehovaba ǃoaba tama hâb ge ǁîs xab a ǃgâibahesa ge ǁgau. Rosas tsîn ge ǁîb xa ge ǃgâibahe. ǁÎs ge ra mî: “ǁÎb ge ǃgâi khoe-i ase gere mûsen tsî khoena ǀhûhâsib ǃnâ gere hui, ǃgâi khoeb ase gere ǁgausen. ǁÎb ge kaise khoexaǃnâse gere hâ-ū te. Tsîb ge ǀguitsē ta ga ǃgamme, ob ti aoba nî ūhâsa ta gere ǂhâba ǀgauga ge ūhâ i. Xaweb ge Jehovaba ge ǃoaba tama hâ i. Kaise î ge ge ǃgom i ǁîba mîbasa ǂgao bi tama ta hâsa. ǁNā ǁaeb ai ta ge kaise gere ǀguritsâsen ǃgamme ǂgao ta gere amaga. Xawe ta ge Jehovab ǀapeǂhumis ǃnâ khoe-e ge hō tama hâ i.” Xawe Rosas ge mûs ra xūn ai ǀgui ǂâisa ge ǂnûi tama hâ i. ǁÎs ge gere ǂâi nē khoeb ǀkhas ga soregu, os nēsa mati ǁîs Jehovab ǀkha ūhâ ǀhōsagusisa nî tsâǀkhā ǀgausa. Rosas ge hoase nē khoeba xu ge ǂgae-oasen tsî gagasi ǁaxasigu ǃnâ ge ǀhabe ǀgara. Tsîs ge ǁaeroba ǁnās khaoǃgâ Gaosib aoǁnâ-aon skola ǃoa ge ǁkhauhe nēsis ge ǀō-aisa aimâba-aos ase ra ǃoaba. Rosas ge ra mî: “Jehovab ge ǃgâiaǂgao kai te ra ǂgui ǀkhaega ge mā te.” Hoaǁae i ge supu tama hâ, Jehovab ra ǂgaoǀkhā da xū-e dīsa ǃgōsasets ga ǀgaisa tsâsiga nēs ǃoagu ūhâ o. Xawe da ga Jehovab ǂâiǀgaub xa daoǁgauhe, o da ge ǃgâiba nî ǀama.

ǀAPEǂHUMIS GA DAOǁGAUDE MĀ DAS

13. Mati da a tanisen ǁkhā daoǁgaude da ga ǀapeǂhumisa xu hō o?

¹³ ǀHaohâb ǃûi-aogu, ǁnâub komites, ǃnarimâra mûǂam-aogu tamas ka io ǂGaeǂguira soros tsîn ge daoǁgaude ra mā da î da Jehovaba ǃoaba ǁkhā. Xawe da ge ǀnîsi ǁîgu ra mā daoǁgaude ǁnâuǃā tama hâ. ǀNîsi da ge nē daoǁgaudi mati sada a tsâǀkhā ǁkhā ǀgaus xa ǀgui a ǂâi ǁkhā. Īǁkhāsib ga hâ, o da ge ǁnā daoǁgaude go mā ǃgâsagu ǃnubusigu ai a kō ǁkhā.

14. Tae-e nî hui da î da ǀapeǂhumisa xu ra hā daoǁgaude sao? (Hebreǁîn 13:17)

¹⁴ ǂGoms ǃnâ da ga ǃgû, o da ge ǂgomǃgâsiba ūhâ Jehovab ǁîb ǀapeǂhumisa ra daoǁgausa. ǁNās ǀkha da ge ǃkhaese ra ǁnâuǀnam ǃgâi mûǂui ǀgaub ǀkha. (Khomai re Hebreǁîn 13:17 sa.) Daoǁgaude da ga sao, o da ge a ǂan ǀhaohâb ǀguiǃnâxasib ǃnâ nî hâ ǀgarasa. (Efe. 4:​2, 3) Jehovab ai da ge ra ǂgomaiǂnûi, ǀoasa kurusa ūhâ tama aogu ǃnâ-ūb ra daoǁgauda sa tsî da ga ǁîga ǁnâuǀnam ob ge nî ǀkhae da. (1Sam. 15:22) ǂGomǃgâ da ge ra Jehovab, ǂhâbasa î ga o daoǁgaude nî ǀkharaǀkharasa.—Mix. 7:7.

15-16. Tae-e ǃgâsaba ge hui îb ǂgoms ǃnâ ǃgû ǀgara māheb ge daoǁgausa saosab gere îganǀgē xawe? (Ai-īsiba mû re.)

¹⁵ Sao ra aiǁgaus ge ra ǁgau, mati da ǂgoms ǃnâ nî ǃgûsa, ǀapeǂhumis ra mā daoǁgaude da ga sao o. Perub ǃnâ i ge Spanjeb gowaba ra ǃhoa-e xawen ge khoena ǀnî hâ gowagu tsîna ra ǃhoa. Nē gowagu di ǀguib ge Quechua. ǂGui kurigan ge Quechua gowaba ra ǃhoa ǃgâsana ǁnā gowaba ra ǃhoa khoena aoǁnâ ǂkharis ǃnâ gere ôa. Xawe î ge ǃkhūb ǂhanub ǂgaoǀkhādi ǀkha ī nî ǃgûǀhaose ǀkharaǀkharana ge dīhe nē khoena ôas ǃaroma. (Rom. 13:1) Nēs xa ǃaromahe hâsen ge ǀnîna gere tsâ nēs aoǁnâ sîsen-e nî ǂhanisa. ǃGâsan ge nē daoǁgaude a ǁnâuǀnam, ob ge Jehovaba ǁîna ge ǀkhae tsîn ge Quechua gowaba ra ǃhoa khoena ge ǀhao-ū.

¹⁶ Kevin ti ǀon hâ ǀhaoǃhâb ǃûi-aob Quechua gowaba ra ǃhoab ge nēs xas tsîna gere ǂâiǂhansen. ǁÎb ge ra ǁguiǃā: “Tita ge gere ǂâi, ‘mati da Quechua gowaba ra ǃhoa khoena nî ǀhao-ū?’ Xawe ta ge ǂKhoamîdi 3:5 xa ge ǂâi tsî Moseb xa ge ǂâi tsoatsoa. Jehovab ge ǁîba ǁnâuǃā tamab hâ daoǁgausa ge mā. Tsî Moseba ge mîba Israelǁaesab Egipteba xu ǀaba huriba ǃoa daoǁgau. Nēs ge Egipteǁîna xun ǃkhoebē ǁoa khami gere mûsen. Xaweb ge Moseba ge ǁnâuǀnam tsîb ge Jehovaba buruburuxa ǀgaub ǃnâ ge sâu nî.” (Eks. 14:​1, 2, 9-11, 21, 22) Kevinni ge ge māsenxa i ǃkharagagu ǀgaugu ǃnâ sī aoǁnâsa. ǀAmǂoasa ge tae-i? ǁÎb ge ra mî: “Jehovab xa da ge ǀkhaehe ǀgaus xa da ge ge buru. ǂGuro da ge aoǁnâ sîsenni ǃnâ gaixuse gere ǃgû tsî da ge ǀgui tamas ka io ǀgam Quechua gowaba ra ǃhoa khoena gere ǀhao-ū. Nēsi da ge Quechua gowaba ra ǃhoa khoen ra ǁan ǃnâ ǃkhaib ǃnâ ǀgui aoǁnâ sîsen-e ra dī. Tsîs ge nēsa ge ǃaroma î da ǃgâi ǁgam ǀhaode ūhâ, ǁkhawa saris ǃēde ūhâ tsî Elobmîs ǁkhāǁkhāde tsoatsoa. Nēsi î ge ǂgui khoena sida ǀhaode ra hâǃnâ.” Amase ǂgoms ǃnâ da ga ǃgû ǀgara, ob ge Jehovaba hoaǁae nî ǀkhae da.

17. Nē ǁkhāǁkhāǃâs ǃnâ du go tae-e ǁkhāǁkhāsen?

¹⁷ ǃNona mâsiga da ge go ǃhoaǃgao, mati da ǂgoms ǃnâ a ǃgû ǀgara ǁkhā ǀgaub xa. Jehovab ra ǂgaoǀkhādas ǃoagu da ge mîǁguiga nî dī. Aiǁgause, muvina kōs, sâǁaeb ǃnâ da tae-e nî dīs, ǀgapi ǁkhāǁkhāsensa da ga ǁhûis tsî ǀgoana kaikais tawa î ga hā o. Mâ mîǁguib hoab ǃnâ da ge tā mû da ra xūn xa ǀgui nî daoǁgauhe. Xawe Jehovab ǀkha da ūhâ ǀhōsagusis, ǁîb ǀapemās tsî ǁîb mîmâis kōǃgâ dab nîs ai nî ǂgomaiǂnûi. Nēsa da ga dī, o da ge “ǃKhūb sida Eloba ǀamos kōse ǃoaba tsî nî ǁnâuǀnam.”—Mix. 4:5.