‘Nētsē mîǁgui tari-e du nî ǃoabasa’

1. Ama ǂkhîba hōǃâs ǃaroma da tae-e nî dī tsî tae-i ǃaroma? (Jes. 48:​17, 18)

SIDA di ǀhomsi ǁGûb ge kaise a ǀnam da tsî ǂhâba hâ ǃgâiaǂgao da nîsa ûib ǃnâ, nēsi tsî hānîǁaeb ǃnâ. (Aoǁn. 3:​12, 13) ǁÎb ge mâǂoa ra ǁkhāsigu ǀkha ge kuru da xaweb ge ǁnā ǁkhāsiba ge mā da tama hâ ī aitsama ǂgaeǂguisens dība. Tamas ka io tsū-i tsî ǃgâi-i tsîn ǃnâ ǀgorasa kurus diba. (Aoǁn. 8:9; Jer. 10:23) Jehovab ge a ǂan ama ǂkhîba ūhâs ǃaroma da ǁîba ǃoaba tsî ǁîb ǂhanugu ǃoagu nî ûisa.—Khomai re Jesajab 48:​17, 18 sa.

2. ǁGâuaba tae-e da nî ǂgomsa ra ǂhâba xaweb ge Jehovaba tae-e dī?

² ǁGâuab ge ra ǂhâba î da ǂgom Jehovab ose da ama ǂkhîba ūhâ ǁkhāsa tsîn khoena aitsama ǂgaeǂguisen ǁkhā ǃkhaisa. (Gen. 3:​4, 5) ǁGâuab a ǂhûmi-aosa ǁgaus ǃaromab ge Jehovaba khoena ge mā-am în ǁaeroba aitsama ǂgaeǂguisen. Kaise i ge a supu ǃhaese mûsa khoen aitsama ǂgaeǂguisen ǁoa ǃkhaisa. Xawes ge Elobmîsa aogu tsî taradi tsîn xa ra ǃhoa ǂkhî ge īna Jehovaban ra ǃoaba ǃkhais ǃaroma. Jesub Xristub ge nē khoen hoan xa ge ǂkhî-i. ǂGurose da ge nē ǁkhāǁkhāǃâs ǃnâ nî ǁkhāǁkhāsen tae-i ǃaromab ge Jesuba Jehovaba ǃoabasa a ǁhûisa. Tsî da ge nî ǃhoaǃgao tae-i ǃaroma da sida Îb Jehovaba nî ǃoabasa. ǀAms ai da ge ǃaromana nî ǃhoaǃgao sida Jehovaba ǃoabasa ǁhûi hâs diba.

JESUB GE JEHOVABA ǃOABASA GE ǁHÛI

3. ǁGâuaba Jesuba tae-e ge mâi-aiǃâ tsî Jesuba tae-e ge ǁhûi?

³ ǃHūbaib aib ge hâ io, ob ge Jesuba ga mîǁgui hâ ham-eb nî ǃoabasa. Jesub ge ǁāǁnâhes khaoǃgâb ge ǁGâuaba, Jesubab nē ǃhūbaib di gaosiga nî mā ti ge mî, ǁîbab ga ǃoaba o. Jesub ge ǃeream tsî ge mî: “Bēxū te, Satantse! Nēti i ge xoahe hâ: ‘ǃKhūb sa Eloba ǀgoreǀî, î ǁîb ǀguiba ǃoaba.’” (Mat. 4:​8-10) Jesuba tae-i ǃaroma ǁnā mîǁguiba ge dī? Sao ra ǃaromate ǃgaoǃgâ re.

4-5. Tae-i ǃaromab ge Jesuba mîǁgui Jehovaba ǃoabasa?

⁴ Mâǂoa ra ǃaromas Jesub ge Jehovaba ǃoabasa ǁhûis ge ǁîb ǁGûbab ge ǀgaisa ǀnama ūba hâ. (Jhn. 14:31) Tsî Jesub ge Jehovaba ge ǃoaba nēsa dīs a ǂhanu amaga. (Jhn. 8:​28, 29; J.ǂHa. 4:11) ǁÎb ge a ǂan Jehovab a sida di kuru-ao ǃkhaisa, ǂgomǃgâ bi ǁkhā da asa tsîb ǂgui ǃgâi xūna ra māda sa. (Psa. 33:4; 36:9; Jak. 1:17) Jehovab ge hoaǁae Jesub ǀkha amaba gere ǃhoa tsî ūb hâ xūn hoana ge mā bi. (Jhn. 1:14) ǁGâuab ge Jesub khami ī tama, ǁîb ge ge ǃaroma în khoena ǁore tsî ǁō. ǁÎb ge ǂhûmi-ao, kai ǂgaoxa tsî ǁîb xa ǀgui ra ǂâi. (Jhn. 8:44) Jesub ge Jehovaba ǃgâise ge ǂan i tsî ǁGâuab tsîna. ǁÎb ge tāstē ǁGâuab khami ge ī ǂgao tama hâ i tsî Jehovaba ge mâǃoa ǂgao tama hâ i.—Fil. 2:​5-8.

⁵ ǀNî hâ ǃaromas Jesub ge ǁhûibasens, îb Jehovaba ǃoabas ge ǁnāpaxub nî hō ǂgui ǃgâi xūn xab ge gere ǂâi. (Heb. 12:2) Jesub ge ge ǂan i ǂgomǂgomsaseb ga hâ, ob ǁîb Îb ǀonsa nî ǃanuǃanusa. Tsî nî īǁkhā kaisa î-i ǁōb tsî ǁoreb tsîna ūbēhe.

JEHOVAB SIDA XA ǃOABAHESA ANU HÂ ǃAROMAS

6-7. Tae-i ǃaroman ǂgui khoena nētse Jehovaba ǃoaba tama hâ xawe mati iob ǁîba sida xa ǃoabahesa anu hâ?

⁶ ǂGui khoen ge nētse Jehovaba ǃoaba tama hâ ǁîn ǁîb di ǃgâi ǀgauga ǀū amaga. Tsîn ǁîb ge dība nî ǃgâi xūn hoana a ǀū amaga. ǁÎn ge Paulub ge Atenes ǃnâ aoǁnâba khoen khami ge ī-i, Eloba ge ǀū īna.—ǃNǃkh. 17:​19, 20, 30, 34.

⁷ Paulub ge Atenes ǃnâ ge hâ i khoena ge ǁguiǃāba, ‘Elob ra ûib tsî ǀoms tsîn hoana mā’ ǃkhaisa. ǀArob ge ge: ‘ǁÎb ǃnâ da ûi, gon tsî hâ xui-ao.’ Elob ge a kuru-ao, ‘ǁîb ge ǀgui khoeba xu hoaraga ǁaedi ǃhūbaib ai hâde ge ǂnūbi.’ ǁNā-amagab ge ǁîb ǀguiba sada xa ǃoabahesa anu hâ.—ǃNǃkh. 17:​25, 26, 28.

8. Jehovaba tātsē tae-e dī tide? ǁGuiǃā re.

⁸ Jehovab a Kuru-ao, Hoaǀgaixa tsî ǁkhāsib tsîna ūhâ xui-aob ge ǂhâbab hâ xū-e a dī ǁkhā. ǂHâbab ga hâ, ob ge ga ǁgari da hâ î da ǃoaba bi xaweb ge tātsē ǁnā-e dī tide. ǁÎb ge ǂgui ǁgauǁgauna mā da hâ ǁîb hâsa tsîb ge mâ ǀguiǀguibe-i hoa-i âda a ǀnam. ǁÎb ge ra ǂhâba în ǂgui khoena ǁîb di ǀhōsa kai ǀamosib kose. (1Tim. 2:​3, 4) ǁNā-amagab ge Jehovaba sida ra ǁkhāǁkhā î da sida tsîna nau khoena ǁkhāǁkhā ǁkhā, ǁîb nî dī ǂgui ǃgâi xūn xa tsî matib ǁnā-e nî dīsa. (Mat. 10:​11-13; 28:​19, 20) ǀHaohâgab ge mā da hâ ǁîba da a ǃoaba ǃnâ ǁkhā ga tsîb ge huiba ra mā da ǀnamxaǃnâ ǀhaohâb ǃûi-aogu ǃnâ-ū.—ǃNǃkh. 20:28.

9. Mâ ǀgaugu ǃnâb Jehovaba ǁîb ǀnamma hoa khoena ǁgau hâ?

⁹ Jehovab ge ǁîb hâ ǃkhaisa ra ǁgau, ǁîb ǃnâ ǂgom tama hân tsîna ǃgâi xūna mās ǃnâ-ū. Sao ra i xa ǂâi re: Duisende kurigan ge ǂgui khoena mîǁgui hâ ǁîn ǂhanu tsî a tsū xūna aitsâma nî ǁhûi ǃkhaisa Jehovaba ǁnâuǀnams xa. Xaweb ge Jehovaba nēn hoan ǂam-ai hoa khoena ûiba mā hâ tsî ra ǂhâba în ǃgâiaǂgao. (Mat. 5:​44, 45; ǃNǃkh. 14:​16, 17) Jehovab ǃaroman ge ǀhōsan tsî ǀaokhoena ūhâ ǁîna a ǀnamna, ǀgôana ūhâ, sîsen ǁkhā tsîn ge ǃgâiaǂgaoba ǁîn ûib ǃnâ ūhâ ǁkhā. (Psa. 127:3; Aoǁn. 2:24) ǁGauǁgaun ge hâ sida ǀHomsi ǁGûb hoa khoena a ǀnam ǃkhaisa. (Eks. 34:6) Tae-i ǃaroma da Jehovaba ra ǃoabas tsîb mati ǁîba ra ǃoabana ra ǀkhae ǀgauba da ge nēsi nî ǃhoaǃgao.

TAE-I ǃAROMA DA JEHOVABA RA ǃOABA?

10. (a) Tae-i ǃaroma da Jehovaba ra ǃoaba? (Mat. 22:37) (b) Matits ge satsa Jehovab ǃnūǃnâxasiba xu ǃgâiba ǀama? (Psa. 103:​13, 14)

¹⁰ Jesub khami da ge sida tsîna Jehovaba ra ǃoaba ǁîba da ǀgaisa ǀnamma ūba hâ amaga. (Khomai re Mateub 22:37 sa.) Jehovaba ǃoa da ge ra ǀgū ǁîb di ǀgaugu xa da ga ǁkhāǁkhāsen o. Aiǁgause, Jehovab ge sida ǀkha a ǃnūǃnâxa tsî ra ǀûba da. Israelǁîn ge ǁnâuǀnamoǃnâ i, ob ge gere ǀkhoma nî “mâ-i hoa-e ǁî-i ǂkhaba daoba xu, î du daogu tsî dīgu âdo dīǃgâiǃgâi.” (Jer. 18:11) Jehovab ge ǂan tsaraba xu da kuruhe hâsa. (Khomai re Psalmdi 103:​13, 14 sa.) Jehovab xa du ǀûbahe hâ ǁaen xa du ga ǂâiǃgâ, os ǁnāsa ǃaroma tama î du ǁîba ǀamosib kōse ǃoaba ǂgao?

11. Mâ ǀnî ǃaroma na hâ sida ra ǁhûisa sida ǀHomsi ǁGûba ǃoabasa?

¹¹ ǂKhâǃnâhe da ge ra î da Jehovaba ǃoaba ǁnāsa dīs a ǂhanu amaga. (Mat. 4:10) Tsî da ge a ǂan Jehovab ǃoa-ai da ga ǂgomǂgomsa, o i ǂgui ǃgâi xūna nî īsa. Jehovaba da ga ǂgomǂgomsase ǃoaba, o da ge ǁîb ǀonsa ra ǃanuǃanu. Tsî ǁGâuaba ǂhumi-aob ase ra ǁgau tsî sida Îb ǂgaoba ra ǂkhî kai. Tsî da ga nētse ǁhûi Jehovaba ǃoabasa, o da ge ǃâubasensa ūhâ ǁîba ǀamosib kose ǃoabas dība.—Jhn. 17:3.

12-13. Tae-e da Janes tsî Pams tsîra di aiǁgausa xu ra ǁkhāǁkhāsen?

¹² ǂKham da a hîna da ga ǁkhāǁkhāsen o Jehovaba ǀnamsa, ob ge ǁnā ǀnamma ǀgais ǀguisa nî di kai da ra khami. ǁNā î ge ǀgam khoeǃgâgu ra ǀkha ge ī Janes tsî Pam ti ǀon hâra.a Janes ge ge 11 kurixa ī tsîs Pamsa ge 10 kurixa ī, Elobmîsa ra ge ǁkhāǁkhāsen tsoatsoa o. ǁÎra ǁgûra ge Elobmîsa ge ǁkhāǁkhāsen ǂgao tama hâ ī. Xawe ra ge Janes tsî Pam hâra ge mā-am îra Jehovab ǃoaba-aon ǀkha hâ ǀhao. Xawe ra ge ge ǂgaoǀkhā îra Janes tsî Pam hâra kerkhe ǃgû omaris ǀkha mâ sâǁaeb hoaba. Janesa ge ra mî: “Jehovab ǃoaba-aon ge Elobmîsa xu ǁkhāǁkhā te xūn ge ge huite î ta ǁgâiba mâǃoa ti ǀhōsana xu tsî ǀhubuǀhubusen xūn tsî ǁgauoǃnâ xūna xu ǂgōsen.”

¹³ Kuriroga ra ǁkhāǁkhāsen hâs khaoǃgâ ra ge ge Jehovab ǃoaba-ao kai. Ega ra ge ge aimâba-ao kai ǁîra kaira ǁgûra ra gere kōǃgâ xawe. Janes ge ra ǁguiǃā matis ra tsâsa Jehovab xa ra ge dībahe xūn xa: “ǁKhāǁkhāsen ta ge ge Jehovab ǂgomǂgomsase ǁîb ǀhōsana ra kōǃgâsa tsî 2 Timoteub 2:19 ra mî khami ‘ǃKhūb ge ǁîb di khoena a ǂan.’ “ ǃGāsa i ge a Jehovab ǁnān ǁîba ǀnam tsîn nî ǃoaba bi ti ra mîna ra kōǃgâsa.

14. Sida mîdi tsî dīgu tsîna mati Jehovab ǀonsa ra ǁkhauba? (Ai-īsiga mû re.)

¹⁴ ǂHâba da ge ra în nau khoena amaba Jehovab xa ǂan. Sao ra i xa ǂâi re: Sadu ge ǀnîsi khoexaǃnâ, auxa tsî ǀûbaǀnamxa ǀhōsa-e ūhâ. ǀGuitsē du ge ra ǁnâu khoe-i ra mîsa sadu ǀhōsa i a ǁgai tsî ǂhomixa ti. Tae-e du nî dī? ǁÎ-e du ge nî ǁkhauba. ǁKhā ǀgaub ai da ga khoen ǂhomi xūna Jehovab xa ra ǃhoasa ǁnâu, o da ge ǁîb tsî ǁîb ǀons tsîna ra ǁkhauba ǁîna amaba mîbas ǃnâ-ū. (Psa. 34:1; Jes. 43:10) ǁGau da ge ra Jehovaba ǀnam tsî ǁîba ǃoabasa da ra ǁhûisa mî tsî da ra dī xūn ǃnâ-ū.

15. Tae-e Paulub ǀkha ge ī ǀkharaǀkharanab ge ǁîb ûib ǃnâ dīo? (Filipeǁîn 3:​7, 8)

¹⁵ Māsenxa da ge a sida ûigu ǃnâ ǀkharaǀkharana dīsa î da ǃnāsa-e ǁîb ǃoabas ǃnâ dī ǁkhā. Aiǁgause, apostel Paulub ge ǂhâǂhâsa ǃharosa Jodeǁîn ǂgoms ǃnâ ge ūhâ i. Xaweb ge ǁnā ǂgomsa ge ǁnāxū îb Xristub di ǁkhāǁkhāsabe kai tsî Jehovaba ǃoaba. (Gal. 1:14) ǁNās xa ǃaroma-e hâseb ge ǁkhoaxa ǁaeba Jehovab ǃoabas ǃnâ ge ūhâ i tsî aiǂhanuba ge hō Xristub ǀkha ǀhommi ǃnâ ǂgaeǂguisa. ǁÎb ge tātsēs tsîna ge ǃhausen tama hâ i ǁhûib ge sa Jehovaba ǃoabasa. Sida tsîn ge tātsē ǃhausen tide Jehovaba ǃoabasa da ga ǁhûio.—Khomai re Filipeǁîn 3:​7, 8 sa.

16. Tae-e da Julias aiǁgausa xu ra ǁkhāǁkhāsen? (Ai-īsiga mû re.)

¹⁶ Jehovaba ǃoabasa da ga ǂgurose sida ûib ǃnâ mâi, ob ge nî ǀkhae da nēsis tsî hānîǁaeb ǃnâ. Julia ti ǀon hâ ǃgâsas di aiǁgausa ǃgaoǃgâ re. Amabas nî ǁkhāǁkhāsens aiǃâs ge Juliasa kherkeb di koors ǃnâ gere ǁnae. Julias ge ǁnātikōse îsase gere ǁnae tsî î ge ǀgui khoe-e ǁîsa ge ǁkhāǁkhā tsoatsoa matis nî ǁnaesa is mātarehe ǁkhā. Julias ge ǃhaese hoa khoen xa ge ǂanhe tsoatsoa tsîs ge ǂanǂansa ǃkhain tawa gere ǁnae. Nē musiki skolas ra ǂgâ hînas ge ǁîs ǀkha ǀgui klas ǃnâ ge hâ i khoeba Elobmîs xa ge ǃhoa-ūsi tsoatsoa tsî ge ǁguiǃābasi Elob ǀons a Jehova ǃkhaisa. ǁNās khaoǃgâ i ge gaxu ǁae-i tsîna ge ǃkharu tama hâ i tsîs ge Juliasa ǀgam ǃnāra Elobmîsa wekheb ǃnâ gere ǁkhāǁkhāsen. Egas ge Juliasa ge mîǁgui is ǁnae ǀû tsî ǁîs ǁaeb tsî ǁkhāsib tsîna Jehovaba ǃoabas ǃnâ sîsenū. Nē mîǁguib ge ge supu tama hâ i. ǁÎs ge ra mî: “ǂGui khoen ge gere mîba te gâre mîǁguiba ta dī hâsa ti ǀkhaeb, ǁnaes tiba ǁnāxūsa. Xawe ta ge tita ti ûiba gere sîsenū ǂgao î ta Jehovaba ǀoasase ǃoaba.” ǁÎsa nētsē mati ra tsâ nē mîǁguib 30 kuriga ǃkharu hâses ge dīb xa? ǁÎs ge ra mî: “Dâ ta ge ra ǁhûi ta ge sa Jehovaba ǃoabasa. ǂAn ta ge a ǁîb ti ǂgaob ǂhâba hâ xūn hoana nî dīǀoaǀoasa hānîǁaeb ǃnâ.”—Psa. 145:16.

JEHOVABA ǃOABA ǀGARA

17. Nē ǃhūbaib di ǀams ra ǀgū on Jehovaba ǃoabasa ǁhûi hân tsî ǁîba ǃoaba taman tsîna mati ra tsâǀkhāhe?

¹⁷ Nē da ûiǃnâ hâ ǃhūbaib ge ǀgūǁae nî ǀam. Apostel Paulub ge ge xoa: “Ama ǂkhari ǁaerob ǃnâb ge ǁnāb, ǃgoaxa aba nî hā tsî ǀhabe tide.” (Heb. 10:37) Nēsa mati ra tsâǀkhā da? ǃNubu ǁaerob ǀguib ge go ǃgau ǁhûisa Jehovaba ǃoabasa. (1Kor. 7:29) Tsî da ga ǀnai ǁnā mîǁguiba dī Jehovaba ǃoabas diba, o da ge a ǂan ǃgomsina da nî hōǃâsa xawe i nē ǃgomsina ‘ǃnubu ǁaerob’ ǀguiba nî hâsa.

18. Jehovab tsî Jesub tsîna tae-e ra ǂkhâǃnâ da dīsa?

¹⁸ Jesub ge khoena ra ǂkhâǃnâ în ǁîb di ǁkhāǁkhāsabe kai. ǁNās khaoǃgâb ge ra ǂkhâǃnâ nî în aiǃgû tsî ǁîb ǁkhāǁkhāsaben ase hâ. (Mat. 16:24) Jehovaba da ga ǀnai ǂgui kurina ǃoaba, o da ge aiǃgû tsî nî mîǁgui ǁîba ǃoaba ǀgarasa. Kaise ǃgari sîsen-e i ge ǂhâ hâ Jehovaba ǃoaba ǀgarasa. Supu tama i ge hâ xawe da ge a ǃgâiaǂgao ǁkhā tsî ǂgui ǀkhaega nî hō ǁîba da ga ǃoaba ǀgara o nēsis tsîna.—Psa. 35:27.

19. Gene di aiǁgausa xu da tae-e ra ǁkhāǁkhāsen?

¹⁹ ǀNî khoen ge ra tsâ Jehovaban ga ǃoaba on ǁkhoaxa ûiba ūhâ tide ti. ǂKhamkhoe du ga, o du ra tsâ kaise i a ǃgomsa Jehovaba ǃoabasa? ǀGui ǂkham ǃgâsab Gene ti ǀon hâb ge ra mî: “Tita ge gere ǂâi ǁkhoaxa ǁaeba ta ūhâ ǁoasa Jehovab ǃoaba-ao ta a amaga. Tita ǀkha ge kai ǀgôan ǁkhoaxa ǁaeba ūhâ khami î ge gere tsâ. ǁÎn ge aiǁgause, ǁâudīgu, soregu tsî ǃkhamxa vidio gaimde gere ǀhuru. Xawe ta ge tita ti ǁaeba ǀhaodi tsî aoǁnâ sîsenni ǃnâ ǀgui gere sîsenū.” Nē ǂâiǀgauba Gena mati ge tsâǀkhā? “Tita ge nau ǂkhamkhoen gere dī ǁgai xūna ge dī tsoatsoa tsî ta ge ǁaeroba ǁkhoaxa ǁaeba ge ūhâ i. Xawe ta ge ama ǂkhîba ge hōǃâ tama hâ i. ǂÂi tsoatsoa ta ge ge mati ta ǃgâiba gere ǀama ǀgausa Elobmîs ra mî-e ta gere ǁnâuǀnam o tsî ta ge ge mîǁgui Jehovaba ti ǂgaob hoab ǀkha nî ǃoabasa. ǁNāsa xu-i ge ra mûsen Jehovab ge ti ǀgoredi hoate ra ǃeream ǃkhaisa.”

20. Tae-e da nî mîǁgui dīsa?

²⁰ ǀGui Psalmdi xoa-aob ge ge ǁnae: “ǀKhaehe i ge hâ ǁnā-i, ǁî-ets ra ǁhûi tsî ǀgūǀgū-e î-i sa ai-omgu ǃnâ ǁan ǁkhā.” (Psa. 65:4) Hā î da mîǁgui aǃgû tsî Jehovaba ǃoabasa Josuab khami da ge ra mî: ‘Xawe tita tsî ti omaris xasa, sida ge Jehovaba nî ǃoaba.’—Jos. 24:15.