ǃNari ǀû-i ta nî?

Sadu tsîna ǁnāti ī mâsib ǃnâ hâ? Ti i ga io tae-e nî hui du î du ǂanǂui ǃgâise du noxopa a ǃnari ǁkhāsa?

ǀNî ǃhūgu ǃnân ge ǁkhara kurigu ǃnâ hâ khoena ǀaeǃkhō-ao-e xū mā-amsa nî hō ǃnari ǂgaon ga o. ǁNā ǃhūgu ǃnâ ra hâ ǃgâsan ge ǃhūb ǂhanuba ra ǁnâuǀnam. (Rom. 13:1) ǁNāti ī ǂhanuba ūhâ tama ǃhūb ǃnâ du ga hâ xawes tsîna i ge hui du ǁkhā daoǁgaude sao tsî noxopa du ǃgâise a ǃnari ǁkhāsa ǂan.

SADU ǃNARIS ǁKHĀSIBA ǃGAOǃGÂ

ǁKhara kurina ūhâ khoen ǃaroma hâ ǀapeǂhumis ge ra mî în sao ra dîde dîsen:

• ǃGomsiba ta ūhâ daob ǁgauǁgaude mûǃā tamas ka io ǃuia mûsa?

• ǃHaese ta ti danasa a dawa ǁkhā î ta spilde kō tsî supuse mûsen tama audodi tsî ǀnî xūn tsîna mû?

• ǃHaese ta noxopa xūna a dī ǁkhā, aiǁgause ti ǂaisa ta petrole xū briksa ǃoa a ī ū ǁkhā?

• ǂAuse ǃnari tsî ta nēs ǀkha nau ǃnari-aona ra ǂhani?

• Nē ǁaeb ǃna ta audo tsukeǃgâ-e ga ǃaroma hâ mâsiba ǃnâ hōsen tsâ hâ tamas ka ios ti audosa tsû hâ mâ hâ xūn ǃnâ ta ra ǃnariǂgâ amaga?

• Ti ǃnari ǀgaub ǃaroma ta ǀapaǃnamgu xa ge ǂgaeǁnâhe?

• ǃNari ta ra hîna ta ge ǁom tsâ hâ i?

• Ti ǃnaris ǁkhāsiba a ǂkhabu kai ǁkhā sōǀôana ta ra ā?

• Ti omaris ǁanin tamas ka io ǀhōsana ti ǃnari ǀgaub xan ra ǂâiǂhansensa ge mîba te?

ǀGui tamas ka io ǀgam dî ra du ga î ti ǃeream o du ge ǀnîsi nē ǁaeb ǃna ǀkharaǀkharana nî dî. Aiǁgause du ge ǀorose ǃnarisa nî mîǁgui, ǃgōsase ǃuia. ǁAeba xū ǁaeb ǀkha kō mati du ra ǃnarisa. Sadu omaris ǁanin tamas ka io ǀhōsana du ge a dî ǁkhā în miba du sadu ǃnari ǀgaub xan mati ra ǂâisa. ǀNisi du ge ǃgâise ǃnarisa ra ǁkhāǁkhā ǀapeǁguigu ǃnâ ǁhao ǁkhā. Xawe ǀgapiga hâ dîde xū du ga ǀgams xa ǃnāsade î ti ǃeream, oi ge ǀnîsi nî ǃgâi î du ǃnari ǀû.a

ELOBMÎSA MATI HUI DU ǁKHĀ Î DU ǃGÂI MÎǁGUIBA DĪ?

ǃGom ǁkhā i ge a mûǃāsa ǂguro du ge ǃgâise gere ǃnari khami du nēsisa ǃnari tama hâsa. Tsî du audosa ǃnari ǀûs xa ǂâi tamas ka io ǃhoa ǂgao tama ǁgaise i ra tsâ kai du amaga. Elobmîsa mati a hui du ǁkhā i du ǃgāsase ǂâi tsî ǃgâi mîǁguiba dī. ǀGam xūna ra ǃgaoǃgâ re.

ǃGamǃgamsenxase hâ ǀgara. (ǂKhm. 11:2) Kaira da ra khami i ge sida mûǀgaub, ǁnâu ǀgaub, spieran tsî sorosise ǃâisens tsî gons ǁkhāsiba ra ǂkhabu. Aiǁgause ǃnāsa khoen ge kain ga o ǀnî sorosi ǂgamǂgamsen ǀhuruga ra ǀhuru ǀû, tsû ǁkhān a amaga. ǁKhā ǂâis ge audosa ǃnaris tawa a sisenūhe ǁkhā. ǃGamǃgamsen hâ khoe-i ge ǁî-i ǃaroma i ǃnorasa tamasa i ga mû o nî ǃnari ǀû. (ǂKhm. 22:3) Tsî nau khoen ga ǁîn ǂâiǀgauba a mî, oi ge ǃgamǃgamsenxa khoe-e nî ǃgâ. ǀGopeǀnō re 2 Samueli 21:​15-17 sa.

Khoe-i ǁōba da ge ǃaroma ǂgao tama. (Deu. 22:8) Audos ge ǁai xū-e ǃaroma ǁkhā, ǃgâises ga ǃnari-e tama io. ǃGâise i a ǃnari ǁoa hîna ra ǃnari khoe-i ge aitsâma a ǃgamsen ǁkhā. Tamas ka io nau khoe-e a ǃgam ǁkhā tsî i ge ǁî-e nau khoe-i ǁōb ǃaroma a ǀhapixa ǁkhā.

Tā ǂâi nau khoen ǃgôasiba ǁgau du tidesa ǃnari ǀû du ga o. Jehovab ge ǀnam du tsî ǂkhî sadu ǃnūbusiba du ga mûǂan, ǃgamǃgamsen tsî nau khoen ǂurusib xa ǂâi o. ǁÎb ge ra mîmai hui dub nîsa î du aiǃgû tsîb ge nî ǁkhaeǂgao du. (Jes. 46:4) ǁÎb ge tātsē ǁnāxuǃgâ du tide. ǁÎba ǂgan î du gā-aisib tsî Elobmîsa xū du ra hō ǀapemade sîsenu ǃnari ǀû ǂgaos mîǁguiba du ga dī o.