Mati du ǂkhîsase nî hâ kaira du ga o?

1-2. Jehovaba mati kaira ǂgomǂgomsa ǃgâsan xa ra tsâ? (Psalmdi 92:​12-14, tsoatsoas ai hâ ai-īsib mû re.)

ǃHŪBAIB ǂhabase hâ khoen ge kairan ga o ǀkharadi ra tanisen. Nē aiǁgaus xa ǂâi re, ǂâihō i du ra ǂgurose du ge sadu ǀhai ǀûba mû o? Khoe-i mû tama hîna du ge ǀnîsi gere ǂgaeǂnûi ǂgao. ǁÎna ǂgaeǂnûis ge ǂâibasen tama hâ ǁkhawan ǂoaxa tide ti. Nē aiǁgaus ge ra ǁgau matikōsen ga khoena dītsâ xawen nî kairasa.

² Sida ǀhomsi ǁGûb ge ǀnî hâ mûǂui ǀgauba ūhâ kaira ra ǃgâsan ǃoagu. (ǂKhm. 16:31) ǁÎb ge ǁîna îsa haidi ǀkha ra ǀgopeǀnō. (Khomai re Psalmdi 92:​12-14 sa.) Tae-i ǃaromab ti ra mî? Gāxuse mā haidi ge îsa ǂnaboga ūhâ. Aiǁgause i ge Japanni ǃnâ haide ǂgui kuriga hâ. Nē haidi ge duisend kurigu xa ǃnāsa ǁaeba hâ tsî kaise a îsa. ǁNās ǁkhās khami i ge kaira ǃgâsana Jehovab aiǃâ ǀō-aisa. Jehovab ge ǀhai ǀûn xa ǃnāsase ra mû. ǁîb ge kairan ūhâ îsa ǀgauga kaise ra ǃgôaǃgâ. ǁÎn ge ǁîba ǂgomǂgomsase ǂgui kuriga ǃoaba hâ tsî ǃgomgu tsî augu ǃnâ ǁîba ge ǃoaba ǀgara.

3. Aiǁgau-e mā re Jehovab mati kairana gere sîsenusa îb ǁîb ǂâisa dīǀoaǀoa.

³ Jehovab ge kaira da ra khami ra ǃgôaǃgâ da.a Jehovab ge kaira ǃgâsana ra sîsenū îb ǁîb ǂâibasensa dīǀoaǀoa. Aiǁgause Saras ge ge kaira hâ i Jehovab xas ge mîbahe o, ǀgôabas nî hōsa tsî i Mesiaba ǁnā suriba xu nî hāsa. (Gen. 17:​15-19) Moseb tsîn ge ge kaira hâ i Jehovab ge sî bi o, îb Israelǁaesa Egipteba xu ǃnora kai. (Eks. 7:​6, 7) Apostel Johaneb tsîn ge ge kaira hâ i Jehovab ge sîsenu bi, o îb koro ǂkhanidi Elobmîs tide xoa.

4. ǂKhoamîdi 15:15 ǃoagu tae-e kairana hui ǁkhā mâǀgaisa ǃgomsinan ga hōǃâ o? (Ai-īsiba mû re.)

⁴ Kaira da ra khami da ge ǂgui ǃgomsina ra hōǃâ. ǀGui ǃgâsas ge ge mî kairasis ge supu tama hâ xawe Jehovab ge a hui du ǁkhā î du ǃgâiaǂgaob ǃgom mâsigu ǃnâ. (Khomai re ǂKhoamîdi 15:15 sa.) Nē ǁkhāǁkhāǃâs ǃnâ da ge nî ǃhoaǃgao kaira khoen tae-e a dī ǁkhāsa în ǃgâiaǂgao. Tsî da ge nî ǃhoaǃgao matin nauna kaira khoena hui ǁkhāsa ǀhaohâb ǃnâ. Hā re î da ǂgurose ǃhaoǃgao kairasis ǃnâ ǃgâiaǂgaos tae-i ǃaroma a ǃgom ǁkhāsa.

KAIRASIS MATI SADU ǂKHÎBA TSĀǀKHĀ ǁKHĀ ǀGAUB

5. Tae-e ǀnî kairana a ǂkhabuǂâi kai ǁkhā?

⁵ Tae-e ǃaroma ǁkhā î du ǂkhabuǂâi? ǀNîsi du ge ra tsûaǂgao ǂguro du gere dī xūna du nēsi dī hō tama hâ o. ǀNîsi du ge ǂkham tsî ǀgaisa du ge i tsēde ra ǁkhore. (Aoǁn. 7:10) ǃGâsas Rubis ge ra mî, ǁîs ge ǀnî ǁaega ra ǂkhabuǂâi. ǁÎs ge ra mî: “ǃNāsa ǁaeba i ge sarana anasa a ǃgomba te tsûb ǃnâ ta hâ amaga. ǀNî ǁaega i ge kausiga anas tsîna a ǃgomba te, ti ǃomgu ra tsû amaga tsî ta ge ǁnās ǀkha ti ǃomga a sîsenū ǁoa. ǂKhari xūrona dīs tsîn ge kaise a ǃgomba te.” ǃGâsab Heroldi Betels tawa gere ǃoabab ge ra mî: “ǀNî ǁaega ta ge ra ǁaixa ǁkhoaxaba te ge i xūna ta ga dī hō tama io. ǂKhamsis ǃnâ ta ge ge ǀgaisa i tsî ta ge sorosi ǂgamǂgamsen ǀhurub xa ge ǁkhoaxabahe i. Naun ge gere mî, ‘Herolda bolsa aoba re o da ge nî dan.’ Nēsisa ta ge bolsa ta nî ao mâsib ǃnâs tsîna hâ tama hâ.”

6. (a) Mâ ǀnî hâ ǃaromadi tsîna kaira ǃgâsana a ǂkhabuǂâi kai ǁkhā? (b) Tae-e kaira khoena nî hui în mîǁgui audosan nî ǃnari tamas ka io ǃnari tidesa? (Nē mâǂuis ǃnâ “ǃNari ǀû-i ta nî?” ti hâ khomaiǃâsa mû re.)

⁶ ǀNîsits ge ra ǂkhabuǂâi naun xats aitsamats gere dī xūna ra dībahe amaga. ǀNîsi du ge khoe-e xu huiba ǂhâhâ ǀnî xūna dīsa. Tamas ka io du ge sadu ǀgôan di ǀgui-i ǀkha ra hâ. ǀNîsi du ge aitsama a ǃnari ǁoa, ǂhâba du ra ǃkhaina sari ǁoa, ǀgai-o tamas ka io du ǃgâise mû tama amaga. ǁNās ge tsûtsûsa. ǁNaetib ase du gere dīhō xūna du ga dīhō tama i, xawe ǂâis ǃnâ ūhâ re Jehovab tsî naun aiǃâ du ge a ǀō-aisa. ǂGomǃgâsiba da ge ūhâ ǁkhā Jehovab sida tsâsiga ra ǁnâuǃāsa. Jehovab ge a ǂan matikōse da ǁîb tsî sida ǃgâsan tsîna a ǀnamsa. ǁNās ge ra ǀō-aisa kai da ǁîb aiǃâ.—1Sam. 16:7.

7. Armagedonsa du sīǃnâ ǁoa ti du ga ǂâi, o du tae-e ǂâis ǃnâ nî ūhâ?

⁷ ǀNîsi du ge ra tsûaǂgao ǂâi du ra o ǀhabese du ûi tide tsî Armagedonsa hâǃâ tidesa. ǁNāti du ga tsâ o tae-e nî hui du? Jehovab ge ǃaromasa ūhâ ǃâub hâsa, nē ǃhūbaibab nî dīkākās aiǃâ. (Jes. 30:18) Xawe ǁîb ǃnūǃnâxasib ge ǂâibasens ose hâ tama. ǁÎb ge ra ǃâubasen în ǂgui khoena ǁîb xa ǁkhāǁkhāsen tsî mîǁgui ǁîb ǀhōsa kaisa. (2Pet. 3:9) ǂKhabuǂâi du ra ǁaeb ai ǂâis ǃnâ ūhâ, ǂgui khoen ge noxopa Jehovab xa nî ǁkhāǁkhāsen ǀams nî hās aiǃâ. ǀNîn ge ǀnisi sadu ǀaokhoe.

8. Kairan ga ǀaesen tamas ka io tsûb ǃnâ hâ, on ǀnîsi tae-e a dī ǁkhā?

⁸ Nēsi da ga ǂkham tamas ka io kaira tsî tsûba hōǃâ, o da ge īǁkhāsib ga hâ o ǃgâi tama xū-e mî tamas ka io dī ǁkhā. (Aoǁn. 7:7; Jak. 3:2) Aiǁgause ǂgomǂgomsa aob Jobi ge ǃgomsinab gere hōǃâo, ‘ǂâikorobese gere ǃhoa.’ (Job. 6:​1-3) ǁNās ǂam-ain ge kaira khoena ǁaedīsasen mî tama xū-i tamas ka ion dī tama hâ xū-e dī ǁkhā, ǀaeb tamas ka io sōǀôan xa ǃaromahe hâse. Xawe kaira tamas ka io da ga ǀaesen oi ge ǂâibasen tama nauna da khoexaǃnâ ǀgaub ǃnâ hâ-ū tidesa tamas ka io hoaǁae nî ǃâubasensa î da naun xa xūna dībahe. Mûǂan da ga o, khoe-e da go ǁgai xū-e mîsa o da ge ǃhaese ǀûbaba nî ǂgan.—Mat. 5:​23, 24.

ǂKHÎBA DU ŪHÂ ǀGARA ǁKHĀ ǀGAUB

9. Tae-i ǃaroma du huiba nî ǂgan? (Ai-īsiga mû re.)

⁹ Nauna xu huiba ūǃoa re. (Gal. 6:2) Tsoatsoas ǃnâ du ge ǁnāsa dīs xa nî ǃgombahe. ǃGâsas Gretels ge ra mî: “ǀNî ǁaega ta ge ǃgombahe huiba ǂgansa ti ǃgâsana ta ra ǂhani khami ta ra tsâ amaga. ǁAeba i ge ge ū i ta ti ǂâiǀgauba tawa tsî ǃgamǃgamsenxase mûǂan huiba ta ǂhâhâsa.” ǂÂis ǃnâ ūhâ re naun ge nî ǃgâiaǂgao mā-am du ga o în hui du. (ǃNǃkh. 20:35) ǃGâiaǂgao du ge nî mû du ga o ǃgâsan ǀnam du tsî ra hui du ǂgaosa.

10. Tae-i ǃaroma du nî ǂâihō ǃgôaǃgâsiba ǁgausa? (Ai-īsiga mû re.)

¹⁰ ǃGôaǃgâsiba ǁgau. (Kol. 3:15; 1Tes. 5:18) Nau khoen ga ǃgâi xūna dība da o da ge ǁîn huiba kaise ra ǃgôaǃgâ. Xawe da ge ǀnî ǁaega ra ǀuru ǁîna gangansa. ǀNomrase da ga ǁîna gangan, o da ge sida ǀhōsana ǃgôaǃgâ-en hâ khami ra tsâ kai. Leahs Betels ai ra ǃoabas, kaira ǃgâsana ra kōǃgâs ge ra mî: “ǀGui ǃgâsas kōǃgâ ta ras ge hoaǁae ra gangan te. ǁÎs ge sîǂkhanirode ra xoaba te. ǁÎs ge ǀoro mîde ra xoa xawe i ge kaise a khoexaǃnâ. Kaise ta ge a ǁkhoaxabahe ǁîs ra xoaba te xūna khomaisa. Nēs ge ra ǃgâiaǂgao kai te mû ta ra o huisi ta ra ǀgaubas ra ǃgôaǃgâsa.”

11. Mati du nauna hui ǁkhā? (Ai-īsiga mû re.)

¹¹ Nauna huisa dītsâ. Naun xa ǂâi tsî du ga dītsâ ǁîna huisa o du ge ǀorose sadu ǃgomsin xa nî ǂâi. Kaira khoena da ge ǃgâi xūna ra ǁkhāǁkhā ǂkhanidi ǀkha ǀgopeǀnō ǁkhā. Khoen ga ǂkhanide khomai tama ion ge xū-e a ǁkhāǁkhāsen ǁoa. ǁKhā ǀgaub ǃnân ge ǂkhamkhoena ǂhâǂhâsa xūna a ǁkhāǁkhāsen ǁoa, sadu ga ǂan du a xūna ǁîna mîba tama io. ǂKhamkhoena du ge dîna dîs ǃnâ-ū ǃgâise a ǂan ǁkhā. Tsî ǁîn xan ga mîba du ǁaeb ai ǂōrisase ǃgâ re. ǁÎna du ge mîba ǁkhā matib ge Jehovaba sadu ûib ǃnâ hui du ǀgaub xa tsî Jehovaba ǁnâuǀnams mati ǁîna ǃgâiaǂgaoba nî māsa. Sadu ǂkham ǀhōsana du ga ǁkhaeǂgao tsî a ǂkhâǃnâ o du ge kaise nî ǃgâiaǂgao.—Psa. 71:18.

12. Jesajab 46:4 ǃnâb Jehovaba tae-e mîmâi hâ kaira khoenab nî dība-e? (Ai-īsiga mû re.)

¹² Jehovab ai ǀgaiba ǂgan. Sorosise tamas ka io du ga emosionelse tsau xaweb ge Jehovaba tātsē “tsâu tamas ka io ǂkhabu tama hâ.” (Jes. 40:28) Jehovaba mati ǁîb toa tama ǀgaiba ra sîsenū? ǀGui ǀgaub ge ǂgomǂgomsa kairana ǀgaiǀgais ǃna-ū. (Jes. 40:​29-31) Jehovab ge ra mîmâi ǁîb ge nî hui du. (Khomai re Jesajab 46:4 sa.) Jehovab ge hoaǁae mîmâib ra-e ra dī. (Jos. 23:14; Jes. 55:​10, 11) ǀGore du ga ob ge Jehovaba ǂhâ du hâ huiba nî mā du. Tsî du ge nî hōǃâ ǁîb matikōse ǀnam du sa tsîs ge nēsa ǃgâiaǂgaoba nî mā du.

13. 2 Korinteǁîn 4:​16-18 ǃoagu da tae-e ǂâis ǃnâ nî ūhâ? (Ai-īsiga mû re.)

¹³ ǂÂis ǃnâ ūhâ kairasis ge nî ǃkharu. ǂAn da ga o hâǃnâ da hâ ǃgom mâsib nî ǀgūǁae ǀamsa, oi ge kaise a supu mâǀgaisa. ǂAn da ge a kairasis tsî ǀaegu tsîn nî ǀamsa. Elobmîs ge ǁnāsa ra mîmâi. (Job. 33:25; Jes. 33:24) ǁNās ǀkha du ge a ǃgâiaǂgao ǁkhā hānîǁaeb ǃnâ du ǃgâi ǂurusib tsî ǀgaib tsîna nî ūhâsa tsî nēsis xa ǃnāsase nî îxasa. (Khomai re 2 Korinteǁîn 4:​16-18 sa.) Xawe nauna tae-e a dī ǁkhā huis ǃaroma?

NAUNA HUI ǁKHĀ ǀGAUB

14. Tae-i ǃaroma i ǂhâǂhâsa kairana sari tsî bel sa?

¹⁴ ǁAeba xu ǁaeb ǀkha kaira ǃgâsana sari tamas ka io bel. (Heb. 13:16) Kaira ǃgâsan ge ǁgaise ra tsâ ǀgurin ǃnāsa ǁaeba ra hâ amaga. ǃGâsab Kamili omsa xu ī ǁoab ge ra mî: “ǁGoasa xu ǃuis kose ta ge oms ǃnâ ǀgui ra hâ. Tsî ta ge nēs ǀkha dī ta nî xū-e ūhâ tama hâ. ǀNî ǁaega ta ge ǂganamǂgāhe hâ kaira xammi khami ra tsâ tsîs ge nēsa kaise ra ǁaixa kai te.” Kairana da ga sari o da ge ǁîna ǂgomǃgâsiba ra ǁgau ǁîn ǂhâǂhâsa tsî a ǀnamhe ǃkhaisa. ǀNî ǁaega da ge kaira khoe-e bel tamas ka io gere sari ǂgao xawe da ge ǁnāsa ge dī tama hâ i. Hoa da ge ǂgui dī xūna ūhâ. ǁNās ǀkha tae-e hui da ǁkhā î da “ǂhâhâsa” xūna dī, ǁnās ge kairana saris tsîna ǃkhōǂgā hâ? (Fil. 1:10) ǀNîsi du ge sadu ǀhaohâb ǃnâ hâ kaira ǃgâsan ǀondi tsî mâ tsē du nî bel tamas ka io sms tsîna a xoamâi ǁkhā. ǁÎna saris tsîna du ge mîǁgui ǁkhā, tsēsa du ge a ǁhûi ǁkhā ǁîna sarisa î du ta ǀuru.

15. Tae-en ǂkhaman tsî kairan tsîna ǀguiba a dī ǁkhā?

¹⁵ ǂKhamkhoe du ase du ge ǀnîsi ǂâi ǁkhā tae-e du nî ǁgams tamas ka io tae-e du nî dīsa ǁîna du ga sari o. Xawe du ge tā nî ǂâiǂhânsen, ǃgâi ǀhōsa du asa du ge nî ǁgau. (ǂKhm. 17:17) Kairan ǀkha ǀhaos aiǃâ tamas ka io ǀhaos khaoǃgâ ǁgam. ǀNîsi du ge ǁî-e ǃgâiba xoasa dî ǁkhā tamas ka io tae-i ge ǁî-e gere âi kaisa ǂkhamsis tsēdi ǃnâ. ǁÎna du ge ǁkhau ǁkhā în sadu ǀkha JW broadcastingsa kō. ǁÎna du ge aitsaman a dī ǁoa xūn ǀkha a hui ǁkhā. Aiǁgause du ge ǁîna hui ǁkhā kōsa selfoni ǃgâise ra sîsensa tamas ka ion ǀasa ǂkhanin ǀhaodi ai ra sîsenūhena ūhâsa. ǃGâsas Kerols ge ra mî: “Sado a ǁoaxaba xūna kaira khoen ǀkha dī re. Kaira ta hâ xawe ta ge ûib ǃnâ ǁkhoaxa xūna ra dī ǂgao. Tita ge ǁama ǃgûs, ǁkhoaxa ǁaeba ǀhōsan ǀkha ūhâs tsî Jehovab ge kuru xūna kōs xa ǃgâibahe.” ǃGâsas Mairas ge ra mî: “Ti ǀhōsadi ǀguis ge a 90 kurixa, ǁîs ge 57 kuriga tita xa a ǁkhara. Xawe ta ge ǃnāsa ǁaeba ra ǀuru ǁîs xa ta a ǂkhamsa, hoaǁaem ǀguiba âi tsî movite ra kō amaga. Tsîm ga ǃgomsina ūhâ om ge ra ǀapemā gu.”

16. Tae-i ǃaroma i a ǃgâi kaira khoena ǀaeǃkhō-omsa ǃoa saosa?

¹⁶ ǀAeǃkhō-ao-e ǃoan ga īo ǁîna sao. Kairana du ge ǀaeǃkhō-omsa ǃoa ī-ū ǁkhā tamas ka io du ge hâ ǁkhā, î du kō î-i ǀaeǃkhō-ao-e ǁî-e ǃgâise ǀaeǃkhō. (Jes. 1:17) ǀAeǃkhō-aob tae-e ra mî ǃkhais tsîna du ge kaira khoe-e a xoamâiba ǁkhā. Kaira ǃgâsas Ruths ge ra mî: “ǀGuri ta ga ǀaeǃkhō-aoba ǃoa-ī ob ge tita ǃgâ tama. ǀAeǃkhō-aogu ge mî ǁkhā, ‘ǀaesen tama du hâ, ǀaeǀaesen du ra’ ti. Xawe ta ga khoe-i ǀkha ī, ob ge ǀaeǃkhō-aoba ǃgâise ra hâ-ū te. Ti ǃgâsana ta ge ra gangan ǁaeba ū tsî ǀaeǃkhō-omsa ǃoa ra ī-ū te na.”

17. Mâ ǀgaugu ǃnâ du kairan ǀkha a aoǁnâ ǁkhā?

¹⁷ ǁÎn ǀkha aoǁnâ. ǀNî kaira ǃgâsan ge omsa xu oms ǀkha aoǁnâs ǀgaiba ūhâ tama. ǁÎna du ge ǁkhau ǁkhā î du ǀguiba trolis ǀkha aoǁnâ tsî du ge stoels tsîna a hau sao ǁkhā î-i ǂnû. Kaira ǃgâsa-e du ge sadu Elobmîs ǁkhāǁkhāsa ǃoa ǁkhau ǁkhā, tamas ka io du ge ǁnā ǁkhāǁkhāsa ǁî-i oms tawa a dī ǁkhā. ǀNî kaira ǃgâsan ge ǁîn oms tawa i ga aoǁnâs ǀhaosa dīhe o aoǁnâ sîsenni ǃnâ supuse a ǁhao ǁkhā. Ti i ga io gu ge ǀhaohâb ǃûi-aoga nēsa nî ǀapeǁgui. Jehovab ge ra ǃgôaǃgâ dī ǁkhā da a-e dī tsî da ga kairana ǀnammi tsî ǃgôasib tsîna ǁgau o.—ǂKhm. 3:27; Rom. 12:10.

18. Tae-e da sao ra ǁkhāǁkhāǃâs ǃnâ nî ǃhaoǃgao?

¹⁸ Nē ǁkhāǁkhāǃâs ge go hōhōǃnâ da Jehovab kairana ǀnam tsî ra ǃgôaǃgâsa. ǀHaohâb ǃgâsan tsîn ge ti ra tsâ. Kairado ǂgui ǃgomsina du ga ūhâ xaweb ge Jehovaba nî hui du î du ǃgâiaǂgao ǀgara. (Psa. 37:25) Kai ǃgâiaǂgaoba du nî hōǃâ ǁaeba ǃoa du ge a mûǂui ǁkhā. Xawe ǀnî ǃgâsan ge ǀkhara ǃgomsina ūhâ. ǁÎn ge omaris khoe-i, ǀgôa-i tamas ka io ǀaesen hâ ǀhōsa-e ra kōǃgâ. ǁÎna mati ǃgâiaǂgao ǀgara ǁkhā? ǁNā dîs ǃereamsa da ge sao ra ǁkhāǁkhāǃâs ǃnâ nî ǃhoaǃgao.