Jehovab ra hui da ǀgaus î da mâǀgai

1. Tae-i ǃaroma da mâǀgaisa ǂhâ hâ? (1 Petrub 5:10)

ǀUNIGA tsēdi ǃnâ da ge hoa da ǃkharagagu ǃgomsiga ūhâ, ǁnā-amaga da ge Jehovab khoen ase mâǀgaisa ǂhâ hâ. ǀNîn ge gaxuse ǀaesen hâ. ǀNîn ge ǁîn ǀnamsabena ǁōb ǃnâ ge ǂoaǃnâ. Tsîn ge ǀnîna ǁîn omaris ǁanin tamas ka io ǂhanub xa ra mâǃoahe. (Mat. 10:​18, 36, 37) ǂGomǃgâsiba du ge ūhâ ǁkhā mâ ǃgomsi-i ǀgui-e du ga ūhâ xaweb Jehovaba nî hui dusa î du mâǀgai.—Khomai re 1 Petrub 5:10 sa.

2. Tae-e ra hui da î da mâǀgai?

² Mâǀgais ge ra hui da î da sida ǃâubasensa ǃkhōǀgara, ǃgomsiga hōǃâ, ǁgaiǀāhe tamas ka io da ga ǃâitsâheo. Xristeǁî-i ase mâǀgais ge sida xu hâ tama xawe Jehovaba xu ra hā, ‘ǃnāǂamsa ǀgaiba’ ra mā da ba. (2Kor. 4:7) Nē ǁkhāǁkhāǃâs ǃnâ da ge haka xūna nî ǃhoaǃgao hîna nî hui dana î da mâǀgai. Mā dab hâ xūna xu da ǀama ǁkhā ǀgaub xas tsîna da ge nî ǁkhāǁkhāsen.

ǀGORES

3. ǀGoresa tae-i ǃaroma a buruxa ǀkhae?

³ Jehovab ge buruxa xū-e ge mā da, hui da ǁkhā-e î da mâǀgai. ǀOasa kurusa da ūhâ tama xaweb ge ge īǁkhā kai î da ǁîb ǀkha ǃhoa. (Heb. 4:16) Nēs xa ǂâi re: Jehovab ǀkha da ge mâǁae-i hoa-i ai a ǃhoa ǁkhā. Hoa gowagu ǃnâb ge a ǁnâu da ǁkhā, mâ ǃkhai-i hoa-i ai, ǀguri da ga hâ tamas ka io tronkes ǃnâs tsîna. (Jon. 2:​1, 2; ǃNǃkh. 16:​25, 26) ǂÂiǂhansen tsî da ga tae-e da nî mîsa ǀū xaweb ge Jehovaba tae-e da ra mî ǂgaosa ra ǁnâuǃā. (Rom. 8:​26, 27) Amase ǀgores ge buruxa ǀkhaeba.

4. Tae-i ǃaroma da a mî ǁkhā mâǀgais Jehovab ǂâisa?

⁴ ǁÎb di mîs ǃnâ-ūb ge Jehovaba ra ǂgomǃgâ kai da “mâ xū-i hîa da ga ǁîb ǂâis ǃoa ǂgan-i hoa-eb nî ǁnâu-am da ǃkhaisa.” (1Jhn. 5:14) Jehovaba da a ǂgan ǁkhā îb hui da î da mâǀgai? Îo. ǁÎb di ǂâis ge î da aiǃgû tsî mâǀgai. ǁNāsa da mati a ǂan? Jehovab ge ra mî ǁîb ǃoa da ga ǂgomǂgomsase hâ, ob ǁGâuaba ǃereamsa nî māsa. (ǂKhm. 27:11) Jehovab ge ra mî ‘ǂgaob hoab ǀkha ǁîb ai ra ǂgomaiǂnûinab ǀgaiba nî māsa.’ (2Kro. 16:9) ǁNā-amaga da ge ǂgomǃgâsiba a ūhâ ǁkhā Jehovab ǀgaib tsî turab tsîna ūhâsa îb hui da î da mâǀgai.—Jes. 30:18; 41:10; Luk. 11:13.

5. ǀGoresa mati ǃnomsasiba ra mā da? (Jesajab 26:3)

⁵ Elobmîs ge ra mî Jehovaba ǃoa da ga ǀgore ob ‘ǂkhîb Elob dib, ǁnâuǃāb hoaba ǃnā hâba sada ǂgaogu tsî ǂâide nî sâusa.’ (Fil. 4:7) Nēsa da ge kaise ra ǃgôaǃgâ. Jehovaba ǃoaba tama khoen tsîn ge ǃgomsiga ūhâ, ǂguin ge ǃkharagagu xūna ra dī în ǃnomsase hâ tsî ǁîn ǃgomsiga ǀuru. Aiǁgaus asen ge ǀnîna ra dītsâ în hoa xūna ǁîn ǂâide xu ūbē în ǃnomsase tsâ. Khoen ga ǁnāti-i xūna dī tsî ǁîn ǂâide ǃkhō-oa ǁoa, on ge demonan xa ǂgaeǂhapuhe ǁkhā, nēs ge kaise ǁkhōǁkhōsa. (ǀGopeǀnō re Mateub 12:​43-45 sa.) Jehovab ǀgores ǃnâ-ū ra mā ǂkhîb ge a kai, khoen ǁîn ǂâide ǀkhaiǀkhaiǃnâs ǃaroma ra dī xūn xa. Jehovaba ǃoa da ga ǀgore o da ge ra ǁgau ǁîb ai da hoase ra ǂgomǃgâsa tsîb ǁîba ǀam tama ‘ǂkhîba’ nî mā dasa. (Khomai re Jesajab 26:3 sa.) ǀGui ǀgaub Jehovab ǂkhîba ra mā dab ge ǁkhaeǂgaosa ra mā da xoade ǂâihōsa. Nē xoadi ge ra hōhōǃnâ da mâtikōseb ǀnamdasa tsî ra hui da ǂgaosa tsî nēs ge ǃnomsase ra tsâ kai da.—Psa. 62:​1, 2.

6. Mati du sadu ǀgorede a ǃgâiǃgâi ǁkhā? (Ai-īsiba mû re.)

⁶ Tae-e du a dī ǁkhā? ǃGomsiga du ga ūhâo, “ǃKhūb ai sa ǃgomga ǃnao” î Jehovaba mîba mati du ra tsâsa îb ǂkhîba mā du. (Psa. 55:22) ǂHâ du hâ gā-aisiba ǂgan re îb hui du î du ǂan tae-e du nî dīsa. (ǂKhm. 2:​10, 11) Tā ǀuru re Jehovaba ǀgores ǃnâ gangansa. (Fil. 4:6) Tsēs hoasab ra hui du î du mâǀgai ǀgaub xa ǂâi tsî ǁîb huib tsî mādub ra ǂkhâǃnâs ǃaroma gangan bi re. Tā mā-am î-î ǃkharuǃnâ du ra xūna Jehovab ra mā du ǀkhaega mûsa xu ǁkhae du.—Psa. 16:​5, 6.

ELOBMÎS

7. Elobmîsa ǁkhāǁkhāsensa mati a hui da ǁkhā î da mâǀgai?

⁷ Jehovab ge ǁîb di mîsa ge mā da î da mâǀgai. Elobmîs ge ǂgui xoade ūhâ ǂgomǃgâsiba ra mā da te Jehovab ǂkhâǃnâsa da ūhâsa. ǀGui aiǁgausa ǃgaoǃgâ re. Mateub 6:8 ge ra mî: “Sadu Îb ge a ǂan tae-e du ǂhâ hâsa ǂgan du nîs aiǃâ.” Jesub ge ǁnā mîde ge mî tsîb ge Jehovaba hoa da xa ǃgâise a ǂan. ǁNā-amaga da ge ǂgomǃgâsiba a ūhâ ǁkhā ǃgomsiga da ga hōǃâ ob Jehovaba a ǂansa tsî nî hui dasa. Elobmîs ge îxa mîmâidi xa ǀoa hâ, ǂhâ da hâ ǀgaiba mā da ǁkhā te î da ǃgom ǁaegu ǃnâ mâǀgai.—Psa. 94:19.

8. (a) Elobmîsa tae-i ǀapemāsa ra mā da î da mâǀgai? (b) Tae-e hui da ǁkhā î da Elobmîs daoǁgaude ǂâihō?

⁸ Elobmîs daoǁgaudi ge a hui da ǁkhā î da mâǀgai. ǁNā ǀapemādi ge ǂhâ da hâ gā-aisiba mā da ǁkhā î da ǃgâi mîǁguiga dī. (ǂKhm. 2:​6, 7) Aiǁgaus ases ge Elobmîsa ra mîba da î da hānîǁaeb ǃnâ nî ī xūn xa ǂâiǂhansen ǀû tsî Jehovab ai tsēs hoasa ǂgomaiǂnûi. (Mat. 6:34) Elobmîsa da ga tsēs hoasa khomai tsî ǂâiǃgâ, o î ge nî supu Elobmîs ǀapemāde ǂâi-oasa mîǁgui-e dī tsî da ga ǃgomsigu ǃnâ mâǀgai ǂgao o.

9. Elobmîs khomaiǃâde Jehovab huib ǃnâ da ūhâ ǂgomǃgâsiba mati ra ǀgaiǀgai?

⁹ Elobmîs ǃnâ da ge sida khami ī khoen ûigu xa ra khomai, Jehovaba ǂgomǃgâ tsî ge huihena. (Heb. 11:​32-34; Jak. 5:17) Jehovab ge ǁîna hui ǀgaub xa da ga ǂâiǃgâ, o da ge sida ǂgomsa ra ǀgaiǀgai Jehovab sida nî huisa ǁîb sida “ǁhaiǁhâǃkhai tsî a sida ǀgai, ama hâ a hui-aoba, ǃgomgu ǁaeb ǃnâ.” (Psa. 46:1) Jehovab ǃoaba-aon ge ǁîb ǃnâ ǂgomsa ǁgau ǀgaub xa da ga ǂâiǃgâ tsî aiǃgû tsî ǁîba ǃgom ǁaegu ǃnâ ǃoaba ǀgara, o da ge ra ǂkhâǃnâhe î da ǁkhā xū-e dī.—Jak. 5:​10, 11.

10. Elobmîsa du mâ ǀgaugu ǃnâ sîsenū ǁkhā îs hui du?

¹⁰ Tae-e du a dī ǁkhā? Elobmîsa tsēs hoasa khomai tsî hui du ǁkhā xoade xoamâi re. ǀNîn ge Tsēkorobe xoasa ôaǃnâ ti ǀon hâ ǂkhanis ǃnâ māsa xoas tsî khomaiǃâs tsîna tsēs hoasa ra khomai. Tsîs ge nēsa tsēs ǃnân nî ǂâiǃgâ xū-e ra mā nî. Nēs ge Mariaa ti ǀon hâ ǃgâsasa ge hui, ǁîs di ǀaesen hâ ǁgûra gere kōǃgâsa. ǁÎs ǁgûra ge ǀgui ǁaeb ai kankersa ge hōǃnâhe. ǁÎs ge ra ǁguiǃā: “ǁGoas hoasa ta ge Tsēkorobe xoasa ôaǃnâ ǂkhanis ǃnâ māhe hâ xoasa gere khomai tsî ǃgamse gere ǂâiǃgâ, nēs tae-e ra ǁkhāǁkhā tesa. Nēs ge tsēs hoasa ra hui te î ta Jehovab tsî ǁîb ge ǁîb mîsa xu ǁkhāǁkhā te xūn xa ǂâiǃgâ, ti ǃgomsin xas ose.”—Psa. 61:2.

JEHOVAB MĀ DU HÂ ǃGÂSAN

11. ǀGuri da ǃgomsigu ǃnâ mâǀgai tamasa mati ra ǂkhâǃnâ da?

¹¹ Jehovab ge ǃhūbaib ǂhawase hâ ǃgâsana mā da hâ. ǂÂis ǃnâ da ge nî ūhâ “nau ǂgomsaben ǃhūbaib ai hân hoan tsîn ra ǁnāti ī tsâgu ǃnâ ǃkharu ǃkhaisa” tsî da ǀguri hâ tamasa. (1Pet. 5:9) ǁNās ge ra ǂâibasen ǂgomǃgâsiba da ūhâsa, mâ mâsi-i ǀgui-e da ga hōǃâ xawen naun tsîna ǁkhā ǃgomsiba hōǃâ tsâ hâsa. Tsîn ǂgomǂgomsase Jehovab ǃoa mâǀgai hâsa. ǁNā-amaga da ge ǂgomǃgâsaiba ūhâ mâǀgai ǁkhā da asa.—ǃNǃkh. 14:22.

12. Sada ǃgâsana mati hui da ǁkhā tsî tae-e da ǁîna dība ǁkhā? (2 Korinteǁîn 1:​3, 4)

¹² Sida ǃgâsan ge ǂkhâǃnâ da ǁkhā î da mâǀgai, ǁîn ra mî tsî dī xūn ǃnâ-ū. Apostel Paulub ge ǁnāsa ǃgâsana xu ge hōǃâ. ǁÎb sîǂkhanidi ǃnâb ge ǁîba ge hui ǃgâsan ti ǀonde ge xoamâi. Oms ǃkhōsis ǃnâb ge hâ i ǁaeb ǃnâ ge ǁîba gere sarina tsîb ge ǁîna ge gangan. Nē ǃgâsan ge Pauluba, ǁkhaeǂgao, ǂkhâǃnâ tsî ǂhâb hâ huiba ge mā. (Fil. 2:​25, 29, 30; Kol. 4:​10, 11) Nētsēs tsîna da ge sida ǃgâsana ǁkhaeǂgao tsî a hui ǁkhā ǃgomsinan ga hōǃâo tsî da ge ǁîna ǁkhā ǀgaub ǃnâ hui ǁkhā, ǂhâsib ǃnân ga hâo.—Khomai re 2 Korinteǁîn 1:​3, 4 sa.

13. Tae-e Mayasa ge hui îs mâǀgai?

¹³ Russiab ǀapaǃnamgu ge 2020 Maya ti ǀon hâ ǃgâsas omsa sī ge ôaǃnâ tsîs ge ǁnâuǃgâ ǃkhaib tawa ǁîs ǂgomsa sī gere ǁkhauba. Mayas ge ra mî ǁîs ǃgâsan ge kaise nē ǃgom ǁaeb ǃnâ ǂkhâǃnâsisa. ǁÎs ge ra mî: “ǂAn ta ge ge ī ti ǃgâsan kaise ǀnam tesa tsîn a ti omaris ti ǁanisa. Titan ge dība xūn ǃnâ-ū ta ge ǀgaisa ǂgomǃgâsiba ūhâ.”

14. Tae-e nî hui da î da sida ǃgâsan ra mā da huiba xu ǀama? (Ai-īsiba mû re.)

¹⁴ Tae-e du a dī ǁkhā? ǃGomsiga du ga ǃkharuǃnâ, o i ge a ǂhâǂhâsa sadu ǃgâsan ǀkha hâ ǀhaosa. Tā ǀhaohâb ǃûi-aogu ai huiba ǂgansa xu ǃkhō-aosen. ǁÎgu ge “ǀgaisa ǂoab ǃnâ sâuǃkhaise nî ī; ǀgaisa ǀnanub ǃnâ ǃgareǀuise.” (Jes. 32:2) ǂÂis ǃnâ ūhâ re sadu ǀkha ǀguipa ra ǃoaba ǃgâsan tsîn ǃgomsiga ra hōǃâsa. ǂHâsib ǃnâ hâ khoe-e du ga huio du ge nî ǃgâiaǂgao tsîs ge nēsa nî hui du î du mâǀgai.—ǃNǃkh. 20:35.

SADA ǃÂUBASENS

15. Hānî ǃâubasensa mati Jesuba ge hui tsî sada ǃâubasensa mati ra hui da? (Hebreǁîn 12:2)

¹⁵ Jehovab ge mâǀgais ǀkha ra hui da ǃâubasensa ge mā da. (Rom. 15:13) ǂÂi-oa re ǃâubasens ge Jesuba hui ǀgausa îb mâǀgai, ǀgaisa ǃgomab ge ǃhūbaib ai gere tsâ tsēs ai. (Khomai re Hebreǁîn 12:2 sa.) Jesub ge ge ǂan i ǂgomǂgomsaseb ga hâ, ob nî ǁgausa ǁGâuab ge Jehovab xa a mî xūn hoan ge ǂhumi isa tsîb Jehovaba ǃgôahesa anu hâsa. Jesub ge gere mûǂui ǀhomma ǃoa oa, Gao-oa kai tsî ǂhauhesan ǀkha ǀguipa ǂgaeǂuisa. ǁNās ǁkhās khami î ge sida ǃâubasens ǀamose ǃhūbaib ai ûis tisa ra hui da î da mâǀgai, ǁGâuab ǃhūbaib ai da ra hōǃâ ǃgomsigu ǃnâ.

16. ǃÂubasensa ǀgui ǃgâsasa mati ge hui îs mâǀgai, ǁîsa xu du tae-e ra ǁkhāǁkhāsen?

¹⁶ Gaosib ǃâubasens ge Russiab ǃnâ hâ ǃgâsas Anna ti ǀon hâsa hui ǀgauba ǃgaoǃgâ re. ǁÎs aob ge ǃkhōhe tsî tronkes ǃnâ ge ū ǀgarahe îb ǁkharaheb nî ǁaeba ǃâu. Annas ge ge mî: “ǃNāsa ǁaeba ta ge Jehovaba ǃoa ra ǀgore ǁîb ge mā te ǃâubasens ǃaroma tsî ta ge hānî ǃâubasens xa ra ǂâi, nēs ge ra hui te î da tā kaise ǂkhabuǂâi. ǁNâuǃā ta ge ra nēs ǀam tamasa. Jehovab ge ǁîb khākhoena nî dīkākā tsî sada nî mādawa-amsa.”

17. Jehovab mā da hâ ǃâubasensa da ra ǃgôaǃgâsa da mati a ǁgau ǁkhā? (Ai-īsiba mû re.)

¹⁷ Tae-e du a dī ǁkhā? ǁAeba ū î ǂâiǃgâ Jehovab mîmâiba du hâ îsa hānîǁaeb xa. Mûnan-ai re ûib ǀasa ǃhūbaib ǃnâ mati nî īsa tsî ǀkhaegu hîna du nî ûhâ gu xa. Nēsi da ra hōǃâ ǃgomsigu ge “ǂkhari tsî ǁaerob” dis ǀguisa ī. (2Kor. 4:17) ǁKhā du a î hoa-e dī î sadu ǂgomsa naun ǀkha ǀgoragu. ǂÂi re mâtikōse î Jehovaba ǃoaba tama khoena a ǃgombasa. ǁÎn tsîn ge ǂgui ǃgomsina ūhâ xawen ge Jehovab mîmâi hâ buruxa xūna a ǀū. ǁÎna du ga ǀoro xūna mîba xawe du ge ǁîna ǂkhâǃnâ ǁkhā, în Jehovab Gaosib tsî ǁîb mîmâidi xa ǂan ǂgao.

18. Tae-i ǃaroma da Jehovab mîmâidi ǃnâ ǂgomǃgâsiba ūhâ?

¹⁸ ǂGui ǃgomsiga hōǃâ tsîb ge ǂgomǂgomsase hâs khaoǃgâb ge Joba sao rase Jehovaba ge mîba: “ǂAn ta ge a hoa xūna dīs ǁkhāsibats ūhâsa tsî-i dī ǂgaots ra xū-e khoe-i xa ǃkhomǃnâhe ǁoasa.” (Job. 42:2) Jobi ge ge ǁkhāǁkhāsen xū-i Jehovaba ǁkhae tidesa îb ǁîb mîmâide dīǀoaǀoa. ǁNāsa ǂâisǃnâ ūhâs ge ra hui da î da mâǀgai. Aiǁgaus ase mûnanai re gaxuse ǀaesen hâ tarekhoes hîna kaise ǂkhabuǂâi hâsa, ǂgui dokter gu ǁîsa ǂgauǂgau ǁoa amaga. Xawes ge ǂansa ūhâ tsîs ra ǂgomǃgâ dokteri xa ǁîs ǃgomsiba ra ǁguiǃābahe tsîs ge ǃnomsase ra tsâ, nēs ǁaeba nî ūsas a ǂan xawe. Nēsas a ǂan amaga î ge a supu ǁîs ǀaeb ǃnâ mâǀgaisa, ǀgūǁaes nî ǂgausas a ǂan xui-ao. ǁKhā ǀgaub ǃnâ da ge sada tsîna nî mâǀgai, Elob mîmâis paradais dis nî dīǀoaǀoahesa da ra ǂgomǃgâ xui-ao.

19. Tae-e da ǂhâ hâ î da mâǀgai?

¹⁹ Mû da go khamib ge Jehovaba ra hui da î da sida ǃgomsin ǃnâ mâǀgai, ǀgores, sida ǃgâsan tsî ǃâubasens ǃnâ-ū. ǁKhā da a-î hoa-e da ga dī tsî Jehovab ra mā da xūna sîsenū, ob ge nî hui da mâ ǃgomsi-i ǀgui-e da ga hōǃâ xawe. Tsî da ge nî mâǀgai, ǁGâuab tsî ǁîb ǁgai ǃhūbaib nî ūbēhes kōse.—Fil. 4:13.