ǁNaeǁgaudi Sida Xristeǁî ûib tsî aoǁnâ sîsenni ǂkhanib
SEPTEMBERI 3-9
ELOBMÎSA XU HÂ ǂÛǂÛSA MÎDI | JOHANEB 1-2
Jesub ge ǁîb ǂguro buruxa dība ra dī
(Johaneb 2:1-3) Tsî ǃnonaǁî tsēs ai i ge ǃgameǁâu-e ge dīhe Kanas tawa Galileab ǃnâ; tsîs ge Jesub îsa ǁnāpa ge hâ i. 2 Tsîb ge Jesub ona ǁîb di ǁkhāǁkhāsabegu ǀkha ǃgameǁâus ǃoa ge ǁkhauhe hâ i. 3 Tsî ūn ge hâ i ǂauxûi-i ge toaǀkhā nîo, os ge Jesub îsa ǁîb ǃoa ge mî: ǂAuxûi-en kom ūhâ tamao.
w15-E 6/15 4 ¶3
Xritsub—Elob di ǀgaib
3 Jesub ge ǃgameb ǁaxasib tawa Kanas, Galileab ǃnâ ǁîb di ǂguro Buruxa dība ge dī. ǃGameb ǃgao ge sī hâ i khoen ge ǀnîsi ge ǂgui i. Tsî i ge xûi-e ge toa. ǁNā ǁaxasib tawa ge sī hâ i khoen ǁaegu î ge Jesub ǁgûs, Marias tsîna ge hâ i. ǁÎs ge ǀnîsi kuriga ǁîs ǀgôab hîna hoan xa a ‘ǀGapib Ôab’ nî dīǀoaǀoa buruxa kēbodi xa gere ǂâi. (Luk. 1:30-32; 2:52) ǁÎsa gere ǂgom ǁîb noxoba kai buruxa xūna nî dīsa? Xawe hâ a ǃkhais ge Jesub tsî ǁîb ǁgûs Marias tsîn ge ǀasase ge ǃgame khoera kaise gere tsâba tsî ǁîra taob ǃnâ ge xū ǂgao tama hâ i. Jesub ge ge ǂan i, ǃhaokhoeǃkhōǃoaxasib kaise a ǂhâǂhâsa ǃkhaisa. ǁNās ǀkhab ge ǁîba 380 litergu ǁgamme ‘ǂauxûi-i’ ǃnâ ge dawa. (Khomai re Johaneb 2:3, 6-11.) Jesuba ge ǂgaoǀkhāhe nē buruxa dība dīsa? Hî-î. ǁÎb ge khoena gere tsâba tsî nēs ǃnâ-ū ǁîb ǁGûb hîna a māxaba gere ǁgae.
(Johaneb 2:4-11) Ob ge Jesuba ǁîs ǃoa ge mî: Tare-e ta sas ǀkha ǁae hâ, tarase? Ti iri kom ganupe hā tamao. 5 Os ge ǁgûsa ǃgāgu ǃoa ge mî: Mîba gob ga xū-i hoa-e dī re. 6 Tsî di ge ǁnāpa ǃnani ǁgamxapade ge mâ i, Jodeǁîn ǃanuǃanusens di ǁnaetiba ǃoa, mâs hoas ǀgam tamas ka io ǃnona nî ī emerga ǃkhōǂgā ǁkhāde. 7 Ob ge Jesuba ǁîgu ǃoa ge mî: ǁGamxapade ǁgam-i ǀkha ǀoaǀoa! O gu ge ǁîde ams kōse ge ǀoaǀoa. 8 Ob ge ǁîgu ǃoa ge mî: Nēsi xuri î go ǂûǂhûiǂui-aoba ūsība! O gu ge ge ūsī. 9 Tsî ǂûǂhûiǂui-aob ge ǁgam-i, ǂauxûi kai go-e tsâtsâo, (ǂan tamab go hâ i mapa xu i hâsa; xawe ǃgāgu ǁgam-e go xuri gu ge ge ǂan i), ob ge ǂûǂhûi-aoba dî-amaoba ǂgai, 10 tsî ǁîb ǃoa ge mî: Mâ khoe-i hoa-i ge aibe ǃgâi ǂauxûi-e ra mā, tsî ākhanun kao, o i ge ǁkhoa tama-e ra māhe; xawets kom satsa ǃgâi ǂauxûi-e nēsis kōse go sâuo. 11 Nē tsoatsoas saodi disab ge Jesuba Kanas Galileab dis tawa ge dī, tsîb ge ǁîb ǂkhaisiba ge ǂhaiǂhai. Tsî gu ge ǁkhāǁkhāsabegu âba ǁîb ǃnâ ge ǂgom.
jy-E 41 ¶6
Jesub ge ǁîb ǂguro buruxa dība ra dī
Nēb ge Jesub di ǂguro buruxa dība. ǁÎb ǁkhāǁkhāsabegu ge nē dība a mû o, o î ge ǁîgu ǂgomsa ge ǀgaiǀgaihe. ǁNās khaoǃgâ î ge Jesub, ǁîb ǁgûs tsî ǁîb ǃgâsan tsîna Kapernaums, Galileab ǃnâ hâs ǃoa ge ī.
Gagasi xūna ǀō-aisase ôaǃnâs
(Johaneb 1:1) Tsoatsoas ǃnâs ge mîsa ge hâ i, tsîs ge mîsa Elob tawa ge hâ i, tsîs ge mîsa Elo ge i.
nwtsty study notes Jhn. 1:1
Mîs: Tamas ka io “ǁgauǁgaus.” Grikegowab, ho loʹgos. Nē mîs ge Jhn. 1:14 tsî J.ǂHa. 19:13 ǃnâs tsîna ra sîsen-ūhe. Johaneb ge ge mî Jesub ǀguib nē ǂgai ǀons aiǂhanuba ǃoaǂui hâ di. Nē ǂgai ǀonsab ge Jesuba ǃhūbaib aib nî hās aiǃâs, ǃhūbaib aib ge hā os tsî ǀhomma ǃoab ge oa os tsîna gere sîsen-ū. Jesub ge ge Elob di ǃhoa-ao-i tsî haisi-amdi tsî daoǁgaudi tsîna nau ǀhomǃgāgu tsî khoen tsîna gere mîba. ǁNās ǀkha da ge a mî ǁkhā Jehovab ge khoen ǀkha Jesub ǃnâ-ū gere ǃhoasa.—Gen. 16:7-11; 22:11; 31:11; Eks. 3:2-5; ǂHǂh. 2:1-4; 6:11, 12; 13:3.
tawa: Tamas ka io “ǀkha.” Nē xoaǀgoras ǃoagus ge nē mîs pros di hâsa ǀguiba tamas ka io ǀhōsagusis ǃoa ra ǁnaeǁgau. Xawe nēs tsîn ge ǁkhawa ǃkharagagusiba ǃoa ra ǁnaeǁgau, aiǁgause Mîs tsî Elob tsîn ǁaegu.
tsîs ge mîsa ge Elo i: Tamas ka io “Mîs ge elob khami ge ī-i.” Johaneb ge “Mîs” di ǀgauga gere ǁgau (Grikegowab mîs ho loʹgos; study notesa mû re Mîs), ǁnāb ge Jesub Xristuba. ǂGuro ǃnaesabeb ase hîna ge hoa xūna ǁîb ǃnâ-ū a kuruheb ge a Jesub hîna a “ǀō-aisa” tamas ka io “elo-i khami ība.” ǂGui ǂnûiǃkhunidi ge “Mîs” Hoaǀgaixa Elob ǀkha a ǀguise ra ǁguiǃā. Johaneb ge ǃgâi ǃaromade ge ūhâ i mîsa, “Mîs” Hoaǀgaixa Elob ǀkha ǀgui tama hâsa. ǂGuro xoaǀgoras tsî sao ras tsîn ge ra ǁgau “Mîs” ge “Elob tawa hâ” isa. Tsî Grikegowab mîs the osʹ ge ǃnona ǃnāde 1 tsî 2ǁî ǁāraǃā ra ǃnâs tsîna hâ. ǂGuro tsî 2ǁî ǃâdi ǃnâs ge the osʹ di hâ mîsa Grikegowab xoaǀgoradi ǃnâ hâ xawe 2ǁî xoaǀgoras ǃnâ a ǀkhai. ǂGui xoa-aogu ge ra mî the osʹ di hâ mîs ge ǂguro xoaǀgoras ǃnâ ǀkhai i ǃkhais ge a ǀō-aisa di. Xawe î ge nē xoaǀgoras ǃnâ the osʹ di hâ mîsa Hoaǀgaixa Eloba ǃoa ra ǁnaeǁgau. Xawe ǀnî mîdi ǃnâ, nē xoaǀgoras di xoa ǀgaub ǃoagus ge the osʹ di hâ mîsa “Mîs” di ǀgauga ra ǁguiǃā. ǁNās ǀkha î ge ǂgui Elobmîs ǂnûiǃkhunide ǀapaǃaogowab, Fransi tsî Duits gowab ǃnâs tsîna New World Translations ǁkhās khami ǂnûiǃkhunihe hâ, aiǁgause “Mîs” a “ǀō-aisa” tamas ka io “elo-i khami isa.” Nē ǂâis ǀkha a ǀguiǃnâxasen ge Johaneb ǃGâiǂhôas ǂkhanisa ge Sahidic tsî Bohairic ǂkhari gowagu ǃnâ gere ǂnûiǃkhuni khoena the·osʹ di hâ mîsa Jhn. 1:1 tawa ǀnî hâ di ge ǂnûiǃkhuni. Nē ǂnûiǃkhunidi ge “Mîs” di ǀgauga ge ǁguiǃā tsî gere mî ǁîb Elob khami īsa xaweb ǁÎb ǁGûb ǀkha ǀguitikō tama hâsa. Nē ǁaraǃās ǀkha ǀguiǃnâxases ge Kol. 2:9 sa Xristuba ‘Elosib dib hoab sorose’ ge ǁguiǃā. Tsî 2Pet. 1:4 ǃoagu î ge Xristub ǂkhauhesana nî ‘elosi ǂūsib ǃnâ amǃnâxa.’ Tsî Septuaginti ǂnûiǃkhunidi ǃoagus ge Grikegowab mîs the·osʹ di hâsa a ǀgui Hebregowab mîs “Elob” ʼel tsî ʼelo·himʹ di hâs hîna “Hoaǀgaixab; ǀGaisab” di ra ǂâibasens ǀkha. Nē Hebregowab mîdi ge Hoaǀgaixa Elob, ǀnî hâ elogu tsî khoen ǃoagus tsîna ra ǁnaeǁgauhe. (Mû re study note Jhn. 10:34.) Mîsa “elob” tamas ka io “ǀgaisa elob” di ǂgais ge Jes. 9:6 ǃnâ hâ kēbos hîna Mesiab hîna “Kaisib” di nî ǂgaihe (Hoaǀgaixab ose) tsîb ge ǁîba nî ‘ǀAmo ǁGû’ ī ǁîn hînab nî ǂgaeǂguin ǂam-ai. ǁKhoaǂgaosib di ǁgûb Jehovab hîna “ǃKhūb ǂnubidi” dib ge nēn hoana nî dīǀoaǀoa.—Jes. 9:7.
(Johaneb 1:29) ǀGuitsēb ge Johaneba Jesuba ǁîb ǃoa mûǃgoaxa tsî ge mî: Mû, nēb ge a Elob ǁKhao, ǃhūbaib di ǁoreba ra ūbēba!
nwtsty study note Jhn. 1:29
Elob ǁKhaob: Jesub ge ǁāǁnâhe tsî ǁGâuab xa a ǃâitsâhes khaoǃgâb ge Johaneb ǁĀǁnâ-aoba ǁîba ‘Elob ǁKhaob’ ase ge mâi-aiǃâ. Nē mîs ge Jhn. 1:36 ǃnâ ǀgui hâ. (Mû re App. A7.) Jesuba ǁkhaob ǀkha ǀgopeǀnōs ge a ǃgâi aiǁgau. Elobmîs ǃnâ i ge ǁkhaoba ǁoreb ǁguibas ase mās tsî Elob xa ūǃoahes ǃnâ gere sîsen-ūhe. Nēs ge Jesub ǁîb ǀoasa ûiba khoesib ǃaroma hā nî ǁguiba ǁgauǁgaus ase ge ī-i. Nē mîs “Elob ǁkhaob” di hâs ge ǂgui ǀgaugu ǃnâ ra sîsen-ūhe Elobmîs ǃnâ. Johaneb ǁĀǁnâ-aob ge Hebrexoade ge ǂan i tsî i ge ǁnās ǀkha ǁîb mîde ǂgui ǀgauga ǃoa a ǁnaeǁgau ǁkhā, aiǁgause: aore ǁkhaob hînab ge Abrahamma Isaki ǃkhais ǃnâ gere ǁguibab (Gen. 22:13), Pasxab ǁkhaob hîna ge Egipteb ǃnâ Israelǁaes gere ōrehe o, o a ǂāheb (Eks. 12:1-13) tamas ka io aore ǁkhaob hîna ge Jerusalems ǃnâ Elob altars ai ǁgoas tsî tsūxub tsîna gere ǁguibaheb (Eks. 29:38-42). Johaneb ge ǀnîsi Jesajab kēbosa ǂâis ǃnâ ge ūhâ i, hînab ge Jehovaba “mû ti ǃgāb” di a ǂgaiba ‘ǁkhao-i khami ge ǂāǃnaob ǃoa a ǂgaeǂguiheba.’ (Jes. 52:13; 53:5, 7, 11) Apostel Petrub ge ǁîb ǂguro sîǂkhanis hînab ge Korinteǁîn ǃoa a xoas ǃnâ Jesuba ‘Pasxabǁkhaob’ di ge ǂgai. (1Kor. 5:7) Apostel Petrub ge “ǃgomǀgausa ǀaob Xristub, ǀhapio tsî ūo ǁkhaob dib” xa ge ǃhoa. (1Pet. 1:19) Tsî 25 ǃnādi xa ǃnāsase î ge ǂHaiǂhais ǃnâs tsîna Jesuba “ǁkhaob” di ra ǂgaihe.—ǀNî aiǁgaudi ge: J.ǂHa. 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.
Elobmîs khomai ǃâs
(Johaneb 1:1-18) Tsoatsoas ǃnâs ge mîsa ge hâ i, tsîs ge mîsa Elob tawa ge hâ i, tsîs ge mîsa Elo ge i. 2 Nēs ge tsoatsoas ǃnâ Elob tawa ge hâ i. 3 Hoa xūn ge ǁîsa xu ge ī, tsî ǁîs ose i ge xū-i xare-e ī tama ge hâ i, ī ge-i hoa-i xa.4 ǁÎs ǃnâb ge ûiba hâ, tsîb ge ûiba khoen di ǃnâ ge i, 5 tsîb ge ǃnâba ǃkhaenab ǃnâ ra ǃnâ, tsîb ge ǃkhaenaba ǃkhā bi tama ge i. 6 Khoe-i ge ge i, Eloba xu ge sîhe-i, Johaneb ti ǀon hâba. 7 ǁÎb ge ǃkhō-ammi nîs ǃoa ge hā, ǃnâb xab nî ǃkhō-amse, hoan nî ǁîba xu ǂgomse. 8 ǃNâ tamab ge ǁîba ge i, xaweb ge ge sîhe, ǃnâb xab nî ǃkhō-amga. 9 Tsî ǁnā ǃnâb ge ama-ai ǃnâ ge i, hoa khoen, nē ǃhūbaib ai ra hâna ra ǃnâǃnâba. 10 ǃHūbaib ǃnâb ge hâ i, tsî ǃhūbaib ge ǁîba xu ge ī, tsî ǃhūbaib ge ǁîba ǀū ge i. 11 ǁÎb din ǃoab ge ge hā, tsîn ge ǁîb dina ǃkhōǃoa bi tama ge i. 12 Xawe ǁîba ge ǃkhōǃoan kōseb ge ǁîna ǀgaiba ge mā, Elob ôa kaisa; ǁnān ǁîb ǀons ǃnâ ra ǂgomna, 13 ǁnān, ǀaoba xus karao, ǁgans di ǂâisa xus karao, aob di ǂâibasensa xus karao ǃnae taman, tsî Eloba xu ǃnae hâna. 14 Tsîs ge mîsa ge ǁgan kai, tsîs ge sada ǃnâ ge ǁan, tsî da ge ǁîs di ǂkhaisiba ge ǃgapa, ǁGûba xu ǀGuiseǃnae hâb di ǂkhaisib ase, ǀkhommi tsî amab tsîkha xa ǀoa hâba. Johaneb ǁĀǁnâ-aob di ǃkhō-ams xa. 15 Johaneb ge ǁîb xa ǃkhō-am, tsî ǂgai tsî ra mî: Nēb ge a, ǁnāb, ǁîba ta goro mîba: Ti khaoǃgâ ǃgoaxab ge ti aiǃâ ge hâ iba; tita xab ge ǂguro i xui-ao. 16 Tsî ǁîb di ǀoasasiba xu da ge sada hoada ǀkhommi ama ǀkhom-e ge hō. 17 ǂHanub ge Moseb xa māhe xui-ao; xawe ǀkhommi tsî amab tsîkha ge Jesub Xristuba xu ge hā. 18 Khoe-i xare-i ge Eloba tātsē mû tama hâ; ǀguise ǃnae hâ ǀGôab ǁGûb di tîǂams ǃnâ hâb, ǁîb ge Eloba ge ǁguiǃāba da.
SEPTEMBERI 10-16
ELOBMÎSA XU HÂ ǂÛǂÛSA MÎDI | JOHANEB 3-4
Jesub ge Samariaǁî kaikhoesa ge aoǁnâba
(Johaneb 4:6, 7) Tsîs ge ǁnāpa Jakob di tsausa ge hâ i. Ob ge Jesuba ǃgûs xa ǀhupu hâse tsaus xōǀkhā ge ǂnû; tsî-i ge ǃnaniǁî ir ge i. 7 Os ge Samariaǁî tarasa ge hā, ǁgam-es nî xurise. Ob ge Jesuba ǁîs ǃoa ge mî; Mā te, î ta ā re!
nwtsty study note Jhn. 4:6
ǃgûs xa ǀhupu hâse: Nē xoas ǃnâ ǀguib ge Jesuba ‘tsaub’ hâse ra mîhe. 12ǁÎ khama ǃuiab ge Jesuba Jordana xu Judeab kōse ge ī, nēs ge 900 meterga ge ǃnū i.—Jhn. 4:3-5; App. A7 sa mû re.
(Johaneb 4:21-24) Ob ge Jesuba ǁîs ǃoa ge mî; Tarase, ǂgom te re, iri ge nîra hā, ǁîb ai du ǁGûba nē ǃhommi ais karao, Jerusalems tawas karao ǀgoreǀî tideba. 22 Sadu ge ǀū du a-e ra ǀgoreǀî; xawe da ge sida ǂan tari-e da ra ǀgoreǀîsa; ǃgâiǃōsib Jodeǁîna xu ra hā xui-ao. 23 Xaweb ge ira nîra hā, tsîb ǀnai nēsi hâ, on ge ama-ai ǀgoreǀî-aona ǁGûba Gagab tsî amab tsîkha ǃnâ nîra ǀgoreǀî; ǁGûb nēti ra ǀgoreǀî bina ra ôa xui-ao. 24 Elob ge a Gaga; tsî ǁîba ra ǀgoreǀîn ge Gagab tsî amab tsîkha ǃnâ nî ǀgoreǀî bi.
(Johaneb 4:39-41) ǂGuin ǁnā Samariaǁî ǃāros din ge ǁîb ǃnâ ge ǂgom, taras di mîs ǃaroma: Dī ta geren hoanab go mîba te, ti ra ǃkhō-amsa. 40 Tsî Samariaǁîn ge ǁîb tawa sīo, on ge ge ǀkhoma bi, ǁîn ǀkhab nî hâsa; ob ge ǀgam tsēra ǁnāpa ge hâ. 41 On ge naun ǃgâ-ai ǂguina ǁîb di mîs ǃaroma ge ǂgom,
Gagasi xūna ǀō-aisase ôaǃnâs
(Johaneb 3:29) ǃGame-aosa ūhâb ge ǃgame-aoba; tsî ǃgame-aob di khoeb mâ tsî ra ǁnâu bib ge ǃgame-aob di dommi xa kaise ra ǃgâiaǂgao. ǁNātib ge nē ǃgâiaǂgaob tiba go ǀoa.
nwtsty study note Jhn. 3:29
ǃgame-aob di ǀhōsab: Elobmîs ǁaegu ǃnâ î ge ǃgame-aob ǀhōsa-e ge ǁîb ǂhanu ǂnûǁkhaeba-ao i tsî ǁîb ǃgameb hoaba gere aiǂhomi. ǁÎb ge ǃgame-aob tsî ǃgame taras tsîna go ǀhaoǀhao aob ase gere mûǂanhe. ǃGameb tsēs ai î ge ǃgameb ǃnâ ra ǁhao khoena ǃgame-aob omsa ǃoa ra ī ǃgameb ǁaxasib hâba. ǃGame-aob ǀhōsa î ge kaise nî ǂkhî ǃgame-aob di domma î ga ra ǁnâu o ǃgame taras ǀkha ra ǃhoase. Johaneb ǁĀǁnâ-aob ge ‘ǃgame-aob ǀhōsab’ ase gere ǁgauǁgausen. Nē ǃkhais ǃnâb ge Jesuba ge ǃgame-ao i tsî ǁîb ǁkhāǁkhāsabega ǃgame tarasa gere ǂnûǁkhaeba. Mesiaba daoba aiǂhomibas ǃgaob ge Johaneb ǁĀǁnâ-aoba ǂguro ǃâb ǃgame taras diba Jesub tawa ge mâi-aiǃâ. (Jhn. 1:29, 35; 2Kor. 11:2; Efe. 5:22-27; J.ǂHa. 21:2, 9) ‘ǃGame-aob ǀhōsab’ ge ǁîb ǁgaumâisa ge dīǀoaǀoa ǂhanu mâi-aiǃâde dīs ǃnâ-ū. Johaneb ge ǁîb xa ge mî: “ǁÎb ge ǃaruǀîǀgui nî ǀom, xawe tita ge ǃaruǀîǀgui nî ǂkhari.”—Jhn. 3:30.
(Johaneb 4:10) Ob ge Jesuba ǃeream tsî ǁîs ǃoa ge mî: Elob hōsas ga ǂano, tsî tarib a ǃkhaisa: Mā te, î ta ā re! ti ra mîǀî siba, os ga ǁîba ǂgaoǀkhā hâ, tsîb ga ûitsama ǁgam-e mā si hâ.
nwtsty study note Jhn. 4:10
ûitsama ǁgam-e: Nē Grikegowab mîs ge ǃkhoe ra ǁgammi tsî ǀaus ǁgammi tsîn ǃoa ra ǁnaeǁgau. Nē ǁgammi ge ǃnōsa ǁgammi hîna xabas ǃnâ hâ-e xu ra ǀkhara. Lev. 14:5 tawa î ge ‘ǃkhoe ra ǁgammi’ di hâ mîsa ûitsama ǁgamme ǃoa ra ǁnaeǁgau. Jer. 2:13 tsî 17:3 tawab ge Jehovaba “ûitsama ǁgam-i di ǀaub” ase ra ǁguiǃāhe hîna ǁgam-e ra māba, ûiba ūhâ-e. Jesub ge Samariaǁî kaikhoes ǀkhab gere ǃhoa o, o “ûitsama ǁgam-i” di hâ mîsa ge sîsen-ū ǁgauǁgaus ase tsîs ge ǁîsa nēsa amab ase ge ūǃoa.—Jhn. 4:11; mû re study note Jhn. 4:14.
Elobmîs khomai ǃâs
(Johaneb 4:1-15) Tsî ǃKhūb ge hōǃâo, Farisegu ge ǁnâu ǃkhaisa, Jesub ge Johaneb ǃgâ-ai ǂguina ǁkhāǁkhāsabedī tsî a ǁāǁnâ ǃkhaisa, 2 (Jesub ge aitsama ǁāǁnâ tama, tsî ǁîb ǁkhāǁkhāsabegu ge ǁîsa ge dī), 3 ob ge Judeaba xū tsî ǁkhawa Galileab ǃoa ge ǃgû. 4 Tsîb ge Samariab ǃnâ-ū nî ǃkharu. 5 Ob ge Samariaǁîn di ǃāros Sixar ti ǀon hâs, Jakob ge ǁîb ôab Joseba mā ǃhanab ǀgūse ǁgoes tawa ge sī. 6 Tsîs ge ǁnāpa Jakob di tsausa ge hâ i. Ob ge Jesuba ǃgûs xa ǀhupu hâse tsaus xōǀkhā ge ǂnû; tsî-i ge ǃnaniǁî ir ge i. 7 Os ge Samariaǁî tarasa ge hā, ǁgam-es nî xurise. Ob ge Jesuba ǁîs ǃoa ge mî; Mā te, î ta ā re! 8 Tsî gu ge ǁkhāǁkhāsabegu âba ǃāros ǃoa ge ǃgû hâ i, ǂûna gu nî ǁamase. 9 Os ge Samariaǁî tarasa ǁîb ǃoa ge mî: Matits ǁnâi satsa, Jodeǁîts a hîa, tita Samariaǁî tarata ǁgam-e ra ǂgaoǀkhā? (Jodeǁîn kom Samariaǁîn ǀkha ǁae-ūgu tamao.) 10 Ob ge Jesuba ǃeream tsî ǁîs ǃoa ge mî: Elob hōsas ga ǂano, tsî tarib a ǃkhaisa: Mā te, î ta ā re! ti ra mîǀî siba, os ga ǁîba ǂgaoǀkhā hâ, tsîb ga ûitsama ǁgam-e mā si hâ. 11 Os ge tarasa ǁîb ǃoa ge mî: ǃKhūtse, ǃkhā-ūxū-ets kom ūhâ tamao, tsî tsaus kom a ǃgamo; mapa xuts ǁnâi ûitsama ǁgam-e ūhâ? 12 Abob Jakob, nē tsausa ge mā dab ǃgâ-aits a kai? Tsîn ge ǁîb ǂûb, ǁîb di ôan, tsî ǁîb ǀgoan tsîna ǁîs ǃnâ ge ā. 13 Ob ge Jesuba ǃeream, tsî ǁîs ǃoa ge mî; Nē ǁgam-i xa ra ā-i hoa-i ge ǁkhawa nî ǁgâ-e. 14 Xawe ǁnā ǁgam-i, tita nî ǁî-e mā-i xa kara ā-i hoa-i ge ǀamose ǁgâ tide-e; xaweb ge nî ǁnā ǁgam-i, tita nî ǁî-e mā-i, ǁî-i ǃnâ ǁgamxa ǀau kai, ǀamo ûib kōse ra ôa-e. 15 Os ge tarasa ǁîb ǃoa ge mî: ǃKhūtse, ǁnā ǁgam-i xa mā te, î ta tā ǁgâ, î ta tā nēpa xuri hāsa ǂhâ.
SEPTEMBERI 17-23
ELOBMÎSA XU HÂ ǂÛǂÛSA MÎDI | JOHANEB 5-6
Jesuba ǂhanu ǃaromas ǃgao sao re
(Johaneb 6:9-11) Axarob ge nēpa hâ, koro gerstperes tsî ǀgam ǁaukha tsîna ūhâba, xawe tarena ǁîna nētikō ǂgui ǂnubis ǃnâ? 10 Ob ge Jesuba ge mî: An khoena ǂnû! Tsîs ge ǁnā ǃkhaisa ǀgâxa ge i. ǃNubai gu ge koroǀoadisi nî ī khoega ge ǂnû. 11 Ob ge Jesuba perega ū, tsî gangan, tsî ǁîga ǁkhāǁkhāsabega ge mā, tsî ǁkhāǁkhāsabegu ge ǂnû gona ge mā; ǁnās ǁkhās xase ǁaun tsîn xa, ǂgaon ge hâ is kōse.
nwtsty study note Jhn. 6:10
ǃnubai gu ge koroǀoadisi nî ī khoega ge ǂnû: Mateub ǂkhanis ǀguis ge “taradi tsî ǀgôan tsîn ose” di ra mî nē ǃnaeǃkhais ǃnâ. (Mat. 14:21) Īǁkhā î ge a buruxa ǀgaub ǃnâ ge ǂûmāhe khoen ge 15 000 xa ǃnāsa isa.
(Johaneb 6:14) Tsî khoen ge Jesub go dī saosa mûo, on ge ge mî: Nēb ge amase ǁnā kēbo-aob, ǃhūbaib ai nîra hāba.
(Johaneb 6:24) Tsî ǂnubis ge mû, Jesub tsî ǁîb di ǁkhāǁkhāsabegu tsîgu ǁnāpa ǀkhai ǃkhaisa, on ge ǁîn ona ǂgaudi ǃnâ ǂgâ tsî Kapernaums tawa ge sī, Jesuba ra ôase.
nwtsty study note Jhn. 6:14
kēbo-aob: ǂGui Jodeǁîn ge ge ǃâubasen hâ i Moseb a Mesia ǃkhaisa hîna Deu. 18:15, 18 ǃnâ a xoasa ba. ǃHūbaib ai nîra hāba di hâ mîdi ge hā nî Mesiaba ǃoa ra ǁnaeǁgau. Johaneb ǀguib ge nē ǃnaeǃkhais xa ge xoa.
(Johaneb 6:25-27) Tsî hurirob nauǃanin ge hō bio, on ge ǁîb ǃoa ge mî: Rabitse, mâ ǁaets go nēpa hā? 26 Ob ge Jesuba ǁîna ǃeream tsî ge mî: Amase, amase ta ra mîba du, saode du ge mûs ǃaroma tama i tsî peren xa ǂû tsî du go ǁâ ǃkhais ǃaroma du ra ôa te. 27 Tā kā ra ǂû-i ǃaroma sîsen, î du ǁnā ǂû-i, ǀamo ûib kōse ra hâhâ-i Khoen Ôab nîra mā du-i ǃaroma sîsen; ǁîbab ǁGûb Eloba ǀgaiǀgai hâ xuige.
(Johaneb 6:54) Ti ǁgansa ra ǂû-i, tsî ti ǀaoba ra ā-i, ǁnā-i ge ǀamo ûiba ūhâ tsî ta ge ǁî-e nîra ǂkhaiǂkhai ǀuni tsēs ai.
(Johaneb 6:60) Tsî ǂguin ǁîb ǁkhāǁkhāsaben din ge ǁnâuo, on ge ge mî: Ama ǁgonǁgonǂgaosa mî-i ge nē-e; tari-e ǁî-e a ǁnâu ǁkhā?
(Johaneb 6:66-69) ǁNā ǁaeba xun ge ǂguin ǁîb ǁkhāǁkhāsaben dina oa, tsî ǃaruǀî ǁîb ǀkha ǃgû tama ge i. 67 Ob ge Jesuba disiǀgamǀagu ǃoa ge mî: Tsî sago ona ra ǃgûbē ǂgao? 68 Ob ge Simon Petruba ǁîba ge ǃeream: ǃKhūtse, tari-i ǃoa ge kha nî ǃgû? Sats kom mîdi ǀamo ûib dide ūhâo. 69 Tsî ge kom sige ǂgom tsî ge mûǂano, Xristu, ûitsama Elob di Ôats a ǃkhaisa.
nwtsty study notes Jhn. 6:27, 54
kā ra ǂû-i . . . ǁnā ǂû-i, ǀamo ûib kōse ra hâhâ-i: Jesub ge ge ǁnâuǃā ǀnî khoen ge ǁîb tsî ǁîb ǁkhāǁkhāsabegu ǀkhas tsîna ǃgâi xūnan nî hō amaga ǀgui gere hâ di. ǂÛ-i ge khoena ǀgaiba ra mā xawe Elobmîsa xu hâ ǂû-i ge khoena ǀamo ûiba nî mā. Jesub ge khoena ge ǂkhâǃnâ în ǁnā ǂû-i, ‘ǀamo ûib kōse ra hâhâ-i’ ǃoagu sîsen, nēs ge ra ǂâibasen gagasi ǂhâsiga dīǀoaǀoa tsî ǂgomsa ūhâsa ǁkhāǁkhāsen da ra xūn ǃnâ.—Mat. 4:4; 5:3; Jhn. 6:28-39.
ti ǁgansa ra ǂû-i, tsî ti ǀaoba ra ā-i: Nē xoas ge ra ǁgau ǁnān hîna ǂû tsî ra ān ge nēsa Jesub Xristub ǃnâ ǂgoms ǃnâ-ū ra dī. (Jhn. 6:35, 40) Jesub ge nēsa 32ǁî kuri ge ǂnûiǂgā. ǃUiǂûs xab ge ge ǃhoa tama hâ i nēs ge kurib khaoǃgâ ǀgui a ī amaga. ǁÎb ge nēsa ‘Pasxab, Jodeǁîn di kaitsēs’ ge ǀgū khami ge mî. (Jhn. 6:4) Nēs ge ǃgâ-aona ǃuiǂûs di ǂhâǂhâsasiba ge ǂâiǂâiǃnâ tsî ǀaob di ǂhâǂhâsasiba Israelǁaes ge Egipteba xu a sâuhe ǃui. (Eks. 12:24-27) Jesub ge gere ǁgau ǁîb ǀaob tsîn ǂhâǂhâsa ǃâ-e ūhâsa ǁîb ǁkhāǁkhāsabega ǀamo ûiba hōs ǃgao.
w05-E 9/1 21 ¶13-14
Jehovab sida Elob ǀons ǃnâ da ge nî ǃgû
13 Khoen ge Jesuba sao tsî ‘hurib nau ǀkhāb ai’ ge hō bi Johaneb ge mî khami. Tae-i ǃaroman ge ǁîba sao Gao-ao kai ǂgao tamab ge hâ i xawe? ǂGuin ge xūn hînab ge Jehovaba Moseb tsēs ǃnâ a mān ǃoa ǀgui gere ǁnaeǁgau. Nēs ge gere ǂâibasen îb Jesuba noxoba xūna ǁîna mā ǀgara. Jesub ge nēsab ge mûǂan o, o gagasi amab xa ge ǁkhāǁkhā nî tsoatsoa, nēs ge ǁîn ǂâi ǀgauba ge dawa. (Jhn. 6:17, 24, 25, 30, 31, 35-40) ǂGuin ge sao ra ǂkhōsab ge mā o, o ǁîb ǃoagu gere ǃgae: “Ob ge Jesuba ǁîn ǃoa ge mî: Amase, amase ta ra mîba du: Khoen Ôab di ǁgansa du ga ǂû tama io, tsî ǁîb ǀaoba du ga ā tama io, o du kom sadu ǃnâ ûi-e ūhâ tamao. Ti ǁgansa ra ǂû-i, tsî ti ǀaoba ra ā-i, ǁnā-i ge ǀamo ûiba ūhâ tsî ta ge ǁî-e nîra ǂkhaiǂkhai ǀuni tsēs ai.”—Jhn. 6:53, 54.
14 Jesub ǂkhōs ge gere ǁgau khoen amabes ǃnâ Elob ǀkha ra ǃgûsa. Nēs ge ǀgau-e ge ūhâ tama hâ i. Khoen tanisen ǀgaugu ge nēs ǃnâ-ū gere mûhe. Nēti î ge ra khomai: “Tsî ǂguin ǁîb ǁkhāǁkhāsaben din ge ǁnâuo, on ge ge mî: Ama ǁgonǁgonǂgaosa mî-i ge nē-e; tari-e ǁî-e a ǁnâu ǁkhā?” Jesub ge ge mî gagasi ǂâibasens ǁîb mîdi diden ge nî ôaǃnâ di. ǁÎb ge ge mî: “Gagab ge ûi-ûi raba, ǁgans ge harebe tama hâ. Mîdi, sadu ǃoa ta go ǃhoadi ge gaga tsî a ûi.” Xawen ge ǂguina noxoba ge ǃgâ tama hâ i, Elobmîs ge ra mî: “ǁNā ǁaeba xun ge ǂguin ǁîb ǁkhāǁkhāsaben dina oa, tsî ǃaruǀî ǁîb ǀkha ǃgû tama ge i.”—Johaneb 6:60, 63, 66.
Gagasi xūna ǀō-aisase ôaǃnâs
(Johaneb 6:44) Khoe-i xare-i ge tita ǁga a hā ǁoa, ǁGûb tita ge sîb ga ǁî-e tita tawa ǂgaihā tama io; tsî ta ge tita ǁî-e nîra ǂkhaiǂkhai ǀuni tsēs ai.
nwtsty study note Jhn. 6:44
ǂgaihā: Grikegowab mîs “ǂgai” di hâs ge ǂgae dis tsîna ra ǂâibasen, nēs ge ǁau ǃkhōs ǃnâs tsîna ra sîsen-ūhe. (Jhn. 21:6, 11) Nēs ge ǂâibasen tama hâ Elob khoena ra ǁgari di. Nē mîs ge “ǂgae” dis tsîna a ǂâibasen ǁkhā. Jesub mîdi ge Jer. 31:3 ǃoa ra ǁnaeǁgau hînab ge Jehovaba ǁîb khoen ǃoa a mîde: “Tita ge satsa ǀkhomxasib ǀkha ge ǂgae.” (Septuaginti ge nē Grikegowab mîsa nēpa ra sîsen-ū.) Jhn. 12:32 ge ra ǁgau Jehovab ge khoen hoana ǁîb ǃoa ra ǂgae di. Xoadi ge ra ǁgau Jehovab ge khoesiba aitsama ǁhûis di ǁkhāsiba ge mā di. Mâ khoe-i hoa î ge aitsama nî ǁhûi Jehovaba ǃoabasa. (Deu. 30:19, 20) Jehovab ge māxa ǂgaoba ūhâ khoena ǁîba ǃoa ra ǂgae. (Psa. 11:5; ǂKhm. 21:2; ǃNǃkh. 13:48) Jehovab ge nēsa ǁîb mîs tsî ǃanu gagab tsîn ǃnâ-ū ra dī. Jes. 54:13 ǃnâ hâ kēbos hîna Jhn. 6:45 sa xu ūhe hâs ge khoen hîna ǁîb xa ra ǂgaehen ǃoa ra ǁnaeǁgau.—ǀGopeǀnō re Jhn.6:65.
(Johaneb 6:64) Xawe ǀnîn ge sadu ǃnâ hâ ǂgom tamana. Tsoatsoasa xub kom Jesuba ge ǂan io, mân a ǃkhaisa, ǂgom tidena, tsî mâb a ǃkhaisa ǁîba nî ǀapexūba.
nwtsty study notes Jhn. 6:64
Jesub ge ge ǂan i . . . mâb nî ǀapexūbi ǃkhaisa: Jesub ge Judab Iskarioǁîb ǃoa gere ǁnaeǁgau. Jesub ge hoa ǃuisa ǁîb ǁGûb ǃoa ge ǀgore ǁîb di 12 Apostelgab nî ǁhûis aiǃâ. (Luk. 6:12-16) ǁNās ǀkhab ge Judaba ǂgurose Elob ǃoa ai ge ǂgomǂgomsa i. Jesub ge HebreXoadi ǃoagu ge ǂan i ǁîb, ǁîb di ǀgū ǀhōsab xa nî ǀāpexūhesa. (Psa. 41:9; 109:8; Jhn. 13:18, 19) Judab ge ǁgaiǂoa tsoatsoa o, ob ge Jesub hîna ǂâidi tsî ǂgaogu tsîna ra mûba ǀnai Judab tanisen ǀgaub ǃnâ ǀkharaǀkharana ge mû. (Mat. 9:4) ǁÎb a hoan di Kuru-ao amagab ge Eloba ǀnai ge ǂan-i Jesub nî ǀāpexūhesa. Xawes ge nēsa Elob ǀgaugu tsî ǁîb ge khoena ǃkharu ge ǁaeb ǃnâ gere hâ-ū ǀgauba xu ra ǀkhara, aiǁgause Judab Jesuba nî ǀāpexūsa aimûǀgarus ǀkha.
tsoatsoasa xu: Nē mîdi ge Judab ǃnaes tamas ka iob ge ǁîba Jesub xa Aposteli ase a ǁhûi-e ǁaeb xa mî tama hâ. (Luk. 6:12-16) Xawes ge nēsa Judab ge gaxaǃnâse a tanisen tsoatsoa ǀgaub xa ra ǃhoa hînab ge Jesuba a mûǂan nî xa. (Jhn. 2:24, 25; J.ǂHa. 1:1; 2:23; mû re study notes Jhn. 6:70; 13:11.) Nēs tsîn ge ra ǁgau Judab ge nēs xa ǂâi tsî gere ǂhomisensa matib nî dīsa. “Tsoatsoas” (Grike, ar·kheʹ) di hâ mîsa Xristeǁî Xoadi ǃnâ ǁnā ǀgaub ǃnâ sîsen-ūs ge a ǂhanu. Aiǁgause, 2Pet. 3:4 ǃnâ î ge “tsoatsoas” di hâ mîsa kurus tsoatsoas ǃoa ra ǁnaeǁgau. Xawe ǀnî ǁaeb ai ǀnî hâ ǀgaub ǃnâs tsîna ra sîsen-ūhe. Aiǁgauseb ge Petruba ge mî ǃanu gagab ge Jodeǁî taman ai “tsoatsoas ǃnâb ge sada ai ǁnās ǁkhās khami” ge ǁnā di. (ǃNǃkh. 11:15) Petrub ge ǁîb ǃnaes tamas ka io Apostel kaib ge ǁaeb xa ge ǃhoa tama hâ i. Xaweb ge ǁîba 33ǁî kurib ǃnâ ge pinkstertsēs ai a ī xū-i xa gere ǃhoa, ǃanu gagab ge ǃaromas ǃgao a ǁnā “tsoatsoa” o. (ǃNǃkh. 2:1-4) ǀNî hâ aiǁgaude du ge “tsoatsoa” di hâ mîs xa Luk. 1:2; Jhn. 15:27 tsî 1Jhn. 2:7 tawa a hō ǁkhā.
Elobmîs khomai ǃâs
(Johaneb 6:41-59) On ge Jodeǁîna ǁîb ǂama ge ǀara: Tita ge ûib di pereta, ǀhomma xu ge ǁgôaxa ta, tib goro mî ǃkhais ǃaroma. 42 On ge ge mî: Jesub, Joseb ôa tamaba kha nēb, ǁîb ǁgûb tsî ǁgûs tsîra da a ǂanna? Matib ǁnâi: ǀHomma xu ta ge ǁgôaxa, ti ra mî? 43 Ob ge Jesuba ǃeream, tsî ǁîn ǃoa ge mî: Tā sadu ǃnâ ǀara. 44 Khoe-i xare-i ge tita ǁga a hā ǁoa, ǁGûb tita ge sîb ga ǁî-e tita tawa ǂgaihā tama io; tsî ta ge tita ǁî-e nîra ǂkhaiǂkhai ǀuni tsēs ai. 45 Kēbo-aogu ǃnâ xoamâihe hâ: Tsîn ge hoana Elob xa ǁkhāǁkhāhe hâse nî hā. Mâ-i hoa-i, ǁGûb xa ǁnâu tsî ra ǁkhāǁkhāsen-i ge tita ǃoa ra hā. 46 ǁNāti tamas: Khoe-i ga ǁGûba mû hâs, ǁnāb, Eloba xu hâb ǀguib kom ǁGûba ge mûo. 47 Amase, amase ta ra mîba du: ǂGom ra-i hoa-i ge ǀamo ûiba ūhâ. 48 Tita ge ûib di pereta. 49 Sadu îgu ge ǃgaroǃhūb ǃnâ manaba gere ǂû, xawe gu ge ge ǁō. 50 Nēb ge pereb, ǀhomma xu ra ǁgôaxaba, ǁîb xa ga ǂû khoe-i ǁō tidese. 51 Tita ge ûitsama pereta, ǀhomma xu ge ǁgôaxa ta. Nē pereb xa kara ǂû khoe-i ge ǀamosib kōse nîra ûi-e. Tsî pereb, tita nî māb ge ti ǁgans, ǃhūbaib di ûib ǃaroma ta nîra māsa. 52 On ge Jodeǁîna ǂnoagu tsî ge mî: Matib kha nēba sada ǁîb di ǁgansa a ǂûmā ǁkhā? 53 Ob ge Jesuba ǁîn ǃoa ge mî: Amase, amase ta ra mîba du: Khoen Ôab di ǁgansa du ga ǂû tama io, tsî ǁîb ǀaoba du ga ā tama io, o du kom sadu ǃnâ ûi-e ūhâ tamao. 54 Ti ǁgansa ra ǂû-i, tsî ti ǀaoba ra ā-i, ǁnā-i ge ǀamo ûiba ūhâ tsî ta ge ǁî-e nîra ǂkhaiǂkhai ǀuni tsēs ai. 55 Ti ǁgans a ama-ai ǂû, tsî ti ǀaob a ama-ai āxū xui-ao. 56 Ti ǁgansa ra ǂû-i, tsî ti ǀaoba ra ā-i ge tita ǃnâ ra hâ-e, tsî tita ge ǁî-i ǃnâ ra hâ. 57 Ûitsama ǁGûb ge tita sî, tsî ta ǁGûba xu ra ûis ǁkhās khami i ge ǁkhāti tita ra ǂû-e tita xu nîra ûi. 58 Nēb ge pereb, ǀhomma xu ge ǁgôaxaba, sadu îgu ge manaba ǂû tsî gere ǁō khami ī tamaba. Nē pereb xa kara ǂû-i kom ǀamosib kōse nîra ûi-eo. 59 Nēnab ge Kapernaums tawa ge mî, sinagogeb ǃnâ ra ǁkhāǁkhāǃâ.
SEPTEMBERI 24-30
ELOBMÎSA XU HÂ ǂÛǂÛSA MÎDI | JOHANEB 7-8
Jesub ge ǁîb ǁgûba ǂhaisiba ra ǁgau
(Johaneb 7:15-18) On ge Jodeǁîna buru, tsî ge mî: Matib kha nēba xoade a ǂan, ǁkhāǁkhāhe tamab hâ hîa? 16 Ob ge Jesuba ǁîna ǃeream tsî ge mî: ǁKhāǁkhās âtas ge ti tama hâ, xawes ge a tita ge sîb di. 17 Khoe-i ga ǁîb di ǂâisa dī ǂgao-o, o i ge nî hōǃâ, ises nē ǁkhāǁkhāsa Eloba xu hâsa, īse ta aitsama tita xa ra ǃhoasa. 18 Aitsama ǁî-i xa ra ǃhoa-i ge ǁî-i ǃgôab ǂûba ra ôa-e, xawe ǁî-e ge sîb di ǃgôaba ra ôa-i, ǁnā-i ge a ama-ai, tsî ǂhanuoǃnâsi-i xare-i ge ǁî-i ǃnâ hâ tama hâ.
cf-E 100-101 ¶5-6
Xoa-e hâ
5 Jesub ge gere ǂhâba în khoena ǂan ǁîb haisi-ams māpa xu ra hāsa. ǁÎb ge ge mî: “Khoe-i ga ǁîb di ǂâisa dī ǂgao-o, o i ge nî hōǃâ, ises nē ǁkhāǁkhāsa Eloba xu hâsa, īse ta aitsama tita xa ra ǃhoasa.” (Johaneb 7:16) Tsîb ge ǀnî ǁaeb ai ge mî: ‘Tita xu ta aitsama xū-e dī tama, tsî ti Îb ge ǁkhāǁkhā te khami ta ra ǃhoa.’ (Johaneb 8:28) Tsîb ge ge ǀaro: “Mîdi, sadu ǃoa ta ra ǃhoade ta kom tita xu ǃhoa tamao; xawe Abob tita ǃnâ ǁan hâb, ǁnāb kom ǁîb di sîsenga ra dīo.” (Johaneb 14:10) ǀGui ǀgaub Jesub tsîn ge nēsa a ǁgaus ge aoǁnâb gere ǃnās hoasa Elobmîsa xu ǁgaeǁgaesa.
6 Jesub di ǃnaeǃkhaidi ge gere ǁgau ǁîb ge HebreXoade xu ǀnî ǁae gere ǁgaeǁgaesa. Nēs ge ǀnîsi ǂhanu tamase ra ǁnâusen. ǀNîsi du ge ra ǂâi tae-i ǃaromab ge Jesuba 3 kurigu tsî ǃhare-i tsîna hoa xoade xu ǁgaeǁgae tama hâ isa. Mî da ga ra o, ob ge ǁîba nēsa gere dī. Jesub di mîdi tsî ǁîb gere dī xūn ǀguin xa î ge xoahe hâ. (Johaneb 21:25) Sadu ge Jesub di ûib xa ǃnubu ǁaeb ǃnâ a khomai ǁkhā. Mûnan ai re Elob tsî ǁîb Gaosib xa ǃnubu ǁaeb ǃnâ ǃhoa tsî nau ǀkhāb ai ǁkhawa HebreXoade xu ǁgaeǁgaesa. Jesub ge ǂkhanib ai xoade ge ūhâ tama hâ i. ǁÎb ǃhommi aoǁnâs aib ge Jesuba HebreXoade xu ǂgui ǃnāde gere ǁgaeǁgae, nēsab ge ǂâihōb gere xoade xu gere dī.
(Johaneb 7:28, 29) Ob ge Jesuba tempeli ǃnâ ra ǁkhāǁkhāse ǃgarise ge ǂgaiǂui: Ā, sadu ge tita ǂan hâ, tsî du ge a ǂan, mapa xu ta hâsa: Aitsama ta ge tita xu hā tama hâ, xawe ama-aib ge ǁîb, tita ge sîb, sadu ǂan tama hâba. 29 Xawe ta ge tita a ǂan bi, ǁîba xu ta hâ xui-ao, tsîb ge ǁîba ge sî te.
(Johaneb 8:29) Tsî tita ge sîb ge tita ǀkha hâ; Abob ge tita ǀguri hâ kai tama hâ, ǃgâiba bi ana ta hugaǀgui ra dī xui-ao.“as tā ti ǂâisa ī, îs sa ǂâisa ī re.”
w11-E 3/15 11 ¶19
Elob gagaba ǃkhōǃoa re, ǃhūbaib dīb ose
19 Jehovaba ǁnâuǀnam re. Jesub ge hoaǁae ǁîb ǁGûba gere ǂkhîǂkhî xūna gere dī. ǀNî ǁaeb aib ge Jesuba mâsiba ǁîb ǁGûb dī tide ǀgaub ǃnâ ge sîsenǂam. Xaweb ge Jesuba ǀnî ǁae ge mî: ‘As tā ti ǂâisa ī, îs sadu ǂâisa ī re.’ (Lukab 22:42) Dîsen re, ‘Eloba ta ǃgom i ga ra ǁaeb ais tsîna ra ǁnâuǀnam?’ Eloba ǁnâuǀnams ge kaise a ǂhâǂhâsa. ǁÎba da ge sida Kuru-ao, Ûib mā-aob tsî ǃÛi-aob ase nî ǁnâuǀnam. (Psa. 95:6, 7) ǁNâuǀnamxasib ge a ǃkhōǃkhunihe ǁoa. Elob xa da ge a ūǃoahe ǁoa ǁnâuǀnamoǃnâ da ga ra io.
Gagasi xūna ǀō-aisase ôaǃnâs
(Johaneb 7:8-10) Sago ǁnâi nē kaitsēs ǃoa ǃgû. Tita ge nē kaitsēs ǃoa ganupe ǃgû tide, ti ǁaeb ganupe hā tama hâ xui-ao. 9 Tsî nēna mî tsîb ge Galileab ǃnâ ge hâ. 10 Tsî ǃgâsagu âb ge ǃgûbē ǃnubaib ge ǁîb ǂûb ona ge ǃgû, ǂhaisase tama, xawe ǂganǃgâsib ǃnâ.
w07-E 2/1 6 ¶4
Tae-i ǃaroma da amaba nî ǃhoa?
Jesuba tae-i aiǁgausa nēs xa ge ǁgau? Jesub ge ǀnî ǁae Eloba ǃoaba tama khoegu xa gere dî-e mâpab ra īsa. “Nēpa xu ǃgû, î Judeab tawa sī” di gu ge ge mîba bi. Jesuba tae-e ge ǃeream? “Sago ǁnâi nē kaitsēs ǃoa ǃgû. Tita ge nē kaitsēs ǃoa ganupe ǃgû tide, ti ǁaeb ganupe hā tama hâ xui-ao.” Tsîb ge Jesuba ǁaero i ǃkharu hâse Jerusalemsa ǃoa ge ǃgû. Tae-i ǃaromab ge di ǃeream? ǁÎgu ǃkhai tama ge is ge ǁîb māpa ra īsa ǂansa. ǁNās ǀkhab ge Jesuba ǁîga ǃoa ge ǃeream tama hâ i xawe ǀgaub ǃnâ ge ǃeream nēs ga ǁîb tsî ǁîb ǁkhāǁkhāsabegu ûiba ǁkhōǁkhōsa mâsib ǃnâ mâi hâ amaga. ǁÎb ge ge ǂhumi tama hâ i, ǁnās ǀkhab ge Apostel Petruba ge xoa: “ǁÎb, ǁore-i xare-e dī tamab, tsî ams âb ǃnâ gāxaǃnâsi-i xare-e hōhe tamab.”—Johaneb 7:1-13; 1 Petrub 2:22.
(Johaneb 8:58) Ob ge Jesuba ǁîn ǃoa ge mî: Amase, amase ta ra mîba du, Abrahammi hâ tama hîa ta ge tita ge hâ i.
nwtsty study note Johaneb 8:58
tita ge: Mâǃoa gere Jodeǁîn ge Jesuba gere ǃgam ǂgao ǁîb ge ‘Abrahammab’ go mû ti gere mî amaga tsîb ge Jesuba “korodisi kurixa” tama hâ i amaga. (Jhn. 8:57) Jesub ge ǁîb ǃereams ǃnâ gere mî ǁîb ge gagasi kurusabeb ase ǀnai ǀhommi ǃnâ hâ isa Abrahammi nî ǃnaes aiǃâ. ǀNîn ge ra mî nē ǁaraǃās ra ǁgausa Jesub ge Elob ǀkha hâ isa. Tsîn ge ǀnîna ǁkhawa ra mî Grikegowab mîs e·goʹ ei·miʹ (ǂâibasen rasa “tita” di ǀnî Elobmîdi ǃnâ) di hâs Septuaginti ǃnâ hâ xoas Eks. 3:14 ǀkha a ǀguisa. (Mû re Johaneb 4:26.) Xawe nē xoa ǀgaub ǃoagu î ge Grikegowab sîsen mîs ei·miʹ di hâsa “Abrahammi hā tama hîa ta ge tita ge hâ i” di ra tsoatsoa ǂâibasen rase ǀnâi ge hâ i di. ǁNās ǃaroma î ge “tita ge ge hâ i” di a ǂnûiǃkhunisa, “tita ge” di ī nî ǂnûiǃkhunihes xa tsî nē ǁaeb ǃnâs tsîna î ge ǁnā ǀgaub ǃnâ ra ǂnûiǃkhunihe. Tsî Johaneb 14:9 tawas tsînab ge Jesuba ǁnā Grikegowab sîsen mîs ei·miʹ di hâsa ra sîsen-ū: “Filiputse, nētikō ǂomxase ta ge sago ǀkha hâ, xawets ǂan te tama hâ? Tita ra mû-i kom ǁGûba ra mû-eo. Matits ǁnâi: Sa Îba ǁgau ge re, ti ra mî?” ǃNāsa ǂnûiǃkhunidi ge ǁnā xoa ǀgauba ra ǁgae tsî nēs ǃnâ-ū ra ǁgau ei·miʹ di hâ mîs ra ǂâibasensa “ǀnai” ge hâ i di. (ǀNî hâ aiǁgaude ge Luk. 2:48; 13:7; 15:29; Jhn. 1:9; 5:6; 15:27; ǃNǃkh. 15:21; 2Kor. 12:19; 1Jhn. 3:8 ǃnâ hâ.) Tsî Jesub mîdi hîna Jhn. 8:54, 55 ǃnâ hâ di tsîn ge ra ǁgau ǁîb ge ǁîb ǁGûb ǀkha ǀgui tama hâ isa.
Elobmîs khomai ǃâs
(Johaneb 8:31-47) Tsîb ge Jesuba ǁîb ǃnâ ǂgom hâ Jodeǁîn ǃoa ge mî: Ti mîs ǃnâ du ga hâhâo, o du ge a amase ti ǁkhāǁkhāsabe; 32 tsî du ge amaba nî ǁnâuǃā, tsîb ge amaba sado nî ǃnoraǃnora. 33 On ge ge ǃeream bi: Abrahammi surida komo, tsî da kom tātsē khoe-i di khobo tama ge hâ io; matits ǁnâi: ǃNoraǃnorahe du ge nî, ti ra mî. 34 Ob ge Jesuba ǁîna ǃeream, tsî ge mî: Amase, amase ta ra mîba du, ǁoreba ra dī-i hoa-i ge a ǁoreb di khobo. 35 Khobo-i ge ǀamose oms ǃnâ hâ tama hâ; ǀgôab ge ǀamose ra hâ. 36 ǀGôab ga ǁnâi ǃnoraǃnora duo, o du ge a amase ǃnorasa. 37 Abrahammi suridu a ǃkhaisa ta a ǂan; xawe du ǃgam te du nîsa ra ôa-am, ti mîs sadu ǃnâ ǂgâǃkhai-e ūhâ tama xui-ao. 38 Tita ge ti Îb tawa ta ge mûna ra ǃhoa; tsî du sadu ona sadu îb tawa du ge mûna ra dī. 39 On ge ǃeream, tsî ǁîb ǃoa ge mî: Abrahammi kom sida îo. Ob ge Jesuba ǁîn ǃoa ge mî: Abrahammi ôa du kao, o du ga Abrahammi di sîsenga dī hâ. 40 O du nēsi tita du nî ǃgamsa ra ôa-am, khoeta, Eloba xu ta ge ǁnâu amaba ra ǃhoaba du ta; nēsab ge Abrahamma dī tama hâ. 41 Sadu ge sadu îb di sîsenga ra dī. On ge ǁîb ǃoa ge mî: ǀAiba xu da ǃnae tama hâ. ǀGui ǁGûb ǀguiba da ge ūhâ, Eloba. 42 Ob ge Jesuba ǁîn ǃoa ge mî: Elob ga sadu Îo, o du ga tita ǀnam hâ; Eloba xu ta ge ǂoa tsî hā xui-ao; ti aitsama ta ǂoa tama, xaweb ge ǁîba ge sî te. 43 Tarexa du kha ti mîsa ǁnâuǃā tama hâ? Ti mîsa du a ǁnâu ǁoa amaga. 44 Sadu ge ǁgâuaba ǁgûb ase ūhâ, tsî du ge sadu îb di turagu ǃoa ra dī ǂgao. ǁÎb ge khoen ǃgamao ge i, tsoatsoasa xu, tsîb ge amab ǃnâ mâhō tama ge i; ama-i xare-i ǁîb ǃnâ hâ tama hâ xui-ao. ǂHumibab ra ǃhoa, ob ge ǁîb ǂûb di-e xu ra ǃhoa, ǂhumi-aob a, tsî ǂhumib di ǁgûb a amaga. 45 Xawe tita, amaba ta ra mî amaga du ǂgom te tama. 46 Tari-i âdo tita ǁore-i xa a mîdan ǁkhā? Tsî amaba ta kara mîo, tarexa du ǂgom te tama hâ? 47 Eloba xu hâ-i ge Elob di mîde ra ǁnâu-e; ǁnā-amaga du sado ǁnâu tama. Eloba xu du hâ tama xui-ao.