ǁNaeǁgaudi Sida Xristeǁî ûib tsî aoǁnâ sîsenni ǂkhanib — ǃKhē xu ǂgōmmi INTERNETS AI HÂ ǂKHANINǁGÂUB

ǁNaeǁgaudi Sida Xristeǁî ûib tsî aoǁnâ sîsenni ǂkhanib

APRILI 1-7

ELOBMÎSA XU HÂ ǂÛǂÛSA MÎDI | 1 KORINTEǁÎN 7–9

“ǀGuri hâs—ǀkhaeb”

(1 Korinteǁîn 7:32) Tsî ta ra ǂgao, ǂhansens ose du nî hâsa. ǃGame tamab ge ǃKhūb din xa ra ǂhansen, matib nî ǃKhūba ǃgâibasa.

w11-E 1/15 17-18 ¶3

ǃGame tama is ûiba ûi ǂguire

³ ǃGame tama hâ ǃgâsan ge kai ǁaeba ūhâ ǁnā ǃgâsan hîna ǃgame hân xa. (1Kor. 7:32-35) ǁÎn ge ǁîn aoǁnâ sîsen-e khoraǂui, ǀhōsana kuru tsî Jehovab ǃoagus tsîna ge ǀgū. Nēs ǃnâ-ūn ge ǂgui Xristeǁîna ǃgâiǃgâba ra ǀama ǁîn di ǃgâme tamase hâs ǃnâ. Tsî ǀnîna ‘ǁkhān’ as kōse ra dītsâ ǃgame tamase hâsa xū ǀamasa tsî nēsa kaise ra ǃgôaǃgâ. Xristeǁîn tsîn ge ra ǀapeǁgui ǃgame tamase hâsa xawe mâsib ga tawa o, on ge ǀgores ǃnâ Jehovab huib ǀkha nēsa ra mâǃoa ǁîn ǂgaob ǃna. ǁÎn ge mâsib ra dawas tsîna ra ūǃoa tsî ǁnās ǀkha ǃgâme tamase hâs xa a ǂkhî.—1 Cor. 7:37, 38.

(1 Korinteǁîn 7:33, 34) xawe ǃgame hâb ge ǃhūbaib din xa ra ǂhansen, matib nî tarasa ǃgâiǃgâibasa. Taras tsî ǂkhamkhoes tsîra ge a ǃkharaga. ǃGame tamas ge ǃKhūb din xa ra ǂhansen, matis nî ǃanu ǃkhaisa, soros ǃnâs kas, gagas ǃnâs kas hoasa; xawe ǃgame hâs ge ǃhūbaib din xa ra ǂhansen, matis nî aoba ǃgâiǃgâibasa.

w08-E 7/15 27 ¶1

Korinteǁîn ǂkhanisa xu ra mâǂoa xūn

7:33, 34—Taena a “ǃhubaib” di hînan ǃgame hâ khoena ra ǂhansenbana? Paulub ge nēba tsēkorobe ûib di xūn hînan Xristeǁîna ra ǂhansenban xa ra ǃhoa. Nēs ge ǂûn, saran tsî omsa kōǃgâs tsîna ǃkhōǂgā hâ, xawe ǃhūbaib di ǁgai xūn hînan Xristeǁîna nî ǃhuin ose.—1 Johaneb 2:15-17.

(1 Korinteǁîn 7:37, 38) Khoe-i ga ǂgaob â-i ǃnâ mâǁapo, tsî i ga ǂhâsi-i xare-e ūhâ tama io, tsî i ga ǁî-i ǂâis ǂama ǀgai-e ūhâo, tsî i ga ǂgaob â-i ǃnâ ǂâibaseno, ǂkhamkhoes â-i ǃgameb ose nî hâsa, ǁnā-i ge ǃgâise ra dī. ³⁸ ǁNā-amaga ǃgameb ǃoa ra māǂui si-i ge ǃgâise ra dī-e, tsî ǃgameb ǃoa māǂui si tama-i ge ǁnās ǃgâ-ai ǃgâise ra dī-e.

w96-E 10/15 12-13 ¶14

ǃGame tamase hâs ge ǂhani-e ǁoa mâsiba ūhâ

¹⁴ ǃGame tama Xristeǁî-i ge ǁî-i ǃgame tamasis mâsiba tā ǁgai mîǁguigu ǃgao nî sîsen-ū. ǁÎ-i ge “gaosib ǀhommi dib ǃaroma” ǃgame tamase ra hâ ǀnî hâ xūn ose. (Mateub 19:12) ǃGame tama tarekhoes tamas ka io aore khoeb ge “ǃKhūb din xa ra ǂhansen”, ‘ǃKhūba ǃgâiba’ xūna ra dī tsî hoaǁae “ǃKhūba ǂhani-i” ose ra ǃoaba. Nēs ge ra ǂâibasen ǂhanihe tamase Jehovab tsî Jesub Xristub tsîna ǃoabasa. Nēsa dīs ǃnâ-ū ǀguin ge ǃgame tama Xristeǁîna “ǃgâise” ra dī ǃgame hân xa.

Gagasi xūna ǀō-aisase ôaǃnâs

(1 Korinteǁîn 7:11) Tsî ǀgoras ga os nî ǃgame tamase hâ, tsî ǁnā tamas ka io, as aob ǀkha ǂkhîbagusa dī; îb aoba tarasa tā ǁnāxū.

lvs-E 251

Endnotes [ǀArosa ǃgāsasib]

ǀNî ǁaegan ge Xristeǁîna ra mîǁgui în ǃgameba xū ǀgora, ǀaib ga nēsa ǃaroma tama i xawe. (1 Korinteǁîn 7:11) Sao ra mâsigu ǀguigu ge ǀgorasa a ǃaroma ǁkhā.

• Māsenxase kōǃgâ tama is: Aob ge ǁîb omarisa kōǃgâ ǂgao tama hâ sorisise tsîs ge nēsa ra ǃaroma în omaris ǁanina mari-i tsî ǂûn oses tsîna hâ.—1 Timoteub 5:8.

• ǂKhabadīb: Sorosise ǃgame i hâ khoe-e ra tsûtsû tsî ǁkhōǁkhōsa ǀaeb mâsib ǃnâ ǁî-e ra mâi.—Galateǁîn 5:19-21.

• Khoe-i Jehovab ǀkha ūhâ ǀhōsagusisa ǁkhōǁkhōsa mâsib ǃnâ ra mâi: Aob tamas ka io taras hîna ǁî-i ǃgame hâ khoe-i Jehovaba nî ǃoabasa ra ǃgom kai i.—ǃNaeǃkhaidi 5:29.

(1 Korinteǁîn 7:36) Tsî khoe-i ga ǂâi, anu tamase i ra dī ǃkhaisa, ǁî-i di ǂkhamkhoes ga ǂkhamkhoesis âsa īǂamo, tsî i ga ǀkharase ī ǁoao, a-i dī, ǂgao i hâ khami; ǁore tama i hâ, a ra ǃgame.

w00-E 7/15 31 ¶2

Sats ge nē ǀurixa ǃhūbaib ǃnâ ǃanuse a tanisen ǁkhā

ǂKhamkhoen ge tā ǃgameb ǃgao nî ǃhae ǁîn ǀgaisa turaga ǁgoe-ūgus xa ūhâ hîna. ǃGameb ge ǁguiǂgāsens tsî ǃgameb mîǁguib ǃoagu ûisa ǃkhōǂgā hâ. Nēs ge kaisisa ǂhâ hâ. (Genesis 2:24) ǁNās ǀkha î ge a ǂhâǂhâsa aibe “ǂkhamkhoesis âsa” ǃkharusa, ǁnāb ge ǁaeb hîna i ǁgoe-ūgus turaga a ǀgaisasa tsîs ge nēsa khoe-e ǀgoraǃgâ ǀgauba a ǂhani ǁkhā. (1 Korinteǁîn 7:36) Tsî kaise i ge nî gâre-i khoe-i hîna ra ǃgame ǂgao î ga ǁgauoǃnâ ǀgaub ǃnâ tanisen o, ǃgame ǂgao i ra xawe î khoe-e a ǀkhai ǃkhais ǃgao.

Elobmîs khomais

(1 Korinteǁîn 8:1-13) Tsî ǁgôatsuiǁgoaǁguibadi xa da ge a ǂan hoada ǂansa ūhâ ǃkhaisa. ǂAns ge ra khū kai, xawe ǀnammi ge ra ǂnubikhâi.²Tsî khoe-i ga ǂâi, xū-e i a ǂansa, ǁnā-i ge xū-i xare-e ǂan tama hâ, khoe-i nî ǂan khami.³Xawe Eloba ga ǀnam khoe-i, ǁnā-i ge ǁîb xa ǂanhe hâ-e.⁴Tsî ǁgôatsuiǁgoaǁguibas di ǂûs xa da a ǂan, ǁgôatsuiǁgoa-i ǃhūbaib ǃnâ xū tamasa, tsî ǀnî elo-i hâ tamasa, ǀgui Elob ǀguib. ⁵Tsî hân a xawe, elose ra ǂgaihena, ǀhommi ǃnâs karao, ǃhūbaib ais karao (ǂgui ǁgôatsuiǁgoan tsî ǂgui ǃkhūgu hâ amaga),⁶xawe da ge sada ǀgui Elob ǀguiba ūhâ, ǁGûb ǁîba xun hoa xūna hâb, tsî ǁîb ǃoa da sada hâba; tsî ǀgui ǃKhūb ǀguib, Jesub Xristub, ǁîba xun hoa xūna hâb, tsî sada ǁîb ǃnâ.⁷Xawe nē ǂans ge hoan ǃnâ hâ tama hâ. On ge ǀnîna nēsis kōse xawe ǁgôatsuiǁgoab di ǂâis ǀkha hâ tsî ǁgôatsuiǁgoaga ǁguibahe hâ-e ra ǂû; os ge ǁîn di ǂâis ǂkhabu hâsa ra ǂnaoǂnaohe.⁸Tsîs ge ǂûsa Elob tawa ǀgūǀgū da tama hâ. ǂÛ da ga xawe da ǃnā tama hâ; tsî ǂû tama da ga i xawe da ǃonkhao tama xui-ao. ⁹Xawe kōbasen, nē ǃnorasasib âdu ǂkhabusa-e ǃnôa-ai xūse ība tide ǃkhaisa.¹⁰Khoe-i ga sats, ǂansa ūhâtsa ǁgôatsuiǁgoab tempeli ǃnâ tāb tawa mûǂnôao, xares kha ǁî-i ǂâisa, ǂkhabusas a amaga, ǁgarihe tide, ǁgôatsuiǁgoaga ǁguibahe hân xa ǂûsa?¹¹O i kom ǂkhabusa ǃgâsa-i âts, Xristub ge ǁōba-e, sa ǂansa xu nî kāǁō-o.¹²Tsî ǁnāti du ga ǃgâsan ǃoagu ǁoreo, tsî ǁîn di ǂkhabusa ǂâide tsûtsûo, o du kom Xristub ǃoagu ra ǁoreo.¹³ǁNā-amaga ǂûs ga ti ǃgâsa-e ǁgonǁgonǂgao-o, o ta tātsēs kōse ǁgan-e ǂû tide, ti ǃgâsa-e ta ǁgonǁgonǂgao tidega.

APRILI 8-14

ELOBMÎSA XU HÂ ǂÛǂÛSA MÎDI | 1 KORINTEǁÎN 10–13

“Jehovab ge a ǂgomǂgomsa”

(1 Korinteǁîn 10:13) ǀNî ǃâitsâ-i ge sado gorose hāǂam tama hâ, khoesi ǃâitsâ-i ǀgui-i: Tsî Elob ge a ǂgomǂgomsa, ob ge ǁkhā du as ǂamai ǃâitsâ du tide, tsîb ge ǃâitsâb ǃnâts nî mâǃkharusa nî īǁkhā kaiba tsî, ǁîsa du nî tani ǁkhāse.

w17-E.02 29-30

Khomai-aon dîdi

Apostel Paulub ge ge xoa Jehovab ge “ǁkhā du as ǂamai ǃâitsâ du tide.” (1Kor. 10:13) Nēsa ra ǂâibasen Jehovab tani ǁkhā da a ǃgomsiga kō tsî ra mā-amsa tsî nē ǃgomsin tsîna ra ǃaromasa?

▪ Khoen nēsa ra mû ǀgaub xa ǂâi re. ǀNî ǃgâsab hînab ge ǁîb ǀgôaba a ǃgamsen nî ge ge dî: ‘Jehovaba ǀnai ge mîǁgui hâ i tita tsî ti taras tsîn ge sim ǀgôab ǁōb ǃnâ nî mâǀgai di? Eloba nēsa ge ī kai sim nî mâǀgai ǃkhaisab ge ǂan i amaga?’ ǃAroma-e hâ ǂgom da nîsa Jehovab sada ûigu ǃnâ ra ī xūna ra ǃaromasa?

Paulub mîdi hîna 1 Korinteǁîn 10:13 ǃnâ hâdi ge sao rase ra ǀam: Elobmîs ai i ge ǃgaoǃgaosa tama hâ ǂgomsa Jehovab ge ǁkhā da as xa ǃâitsâ da tama hâ tsî ǃgomsin tsîna ǃaroma tama hâ. Hā re i da haka ǃaromade ǃhoaǃgao hîna da nē ǂâi ǀgauba a ūhâ ǁkhāba.

ǂGurose, Jehovab ge hoa khoena aitsama ǁhûis di ǁkhāsiba ge mā. ǁÎb ge ra ǂgao î da aitsama sida ûi ǀgauba ǁhûi. (Deu. 30:19, 20; Jos. 24:15) ǂHanu-ai ûi ǀgauba da ga ǁhûi o, o da ge Jehovaba ǃoa nî kō daoǁgauhes ǃgao. (ǂKhm. 16:9) Xawe da ga ǃgâi tama ûi ǀgauba ǁhûi o, o da ge ǁnās ǀkha ra sao xūna nî ǃâubasen. (Gal. 6:7) Jehovab ga sida ǃgomsina ǃaroma hâ o, ob ga aitsama ǁhûis ǁkhāsiba mā da hâ?

ǀGamǁîse, Jehovab ge ‘ǁaeb tsî mûhe’ ǁoasa ǃnaeǃkhaidi xūs tsîna a ǁkhauba da ǁoa. (Aoǁn. 9:11) Tsūtsūsa mâsib ge a ǃaroma ǁkhā tsî da ge ǀnîsi ǂhanu tama ǁaeb ai ǃgâi tama ǃkhais tawa a hâ ǁkhā. Tsūkeǃgân hîna ǃgomsiga ra ǃaroman ge ǂhanu tama ǁaeb ai da ga ǃgâi tama ǃkhais ai ga ra hâ o, o a īǁkhā. Jesub ge 18 khoen hîna ge ǀgapi ommi ge ǁnā o, o a ǁōn xa ge mî ǁîn ge Elob xa ǃaromahe tama hâse a ǁōsa. (Lukab 13:1-5) Amase da a mî ǁkhā Elob ra mîǁguisa ham-i nî ǁōs tamas ka io ûisa nēti i mâsib ǃnâ?

ǃNonaǁîse, Mâ khoe-i hoa-i ge nē ǂhanu-aisib ǃnâ a ǃâ. ǂÂi-oa re, ǁGâuab ge Jehovab di ǂhanu-aisiba ge dîǃnâ mî rase khoen ge ǃâitsâhen ga o, o Jehovab ǃoa-ai ǂgomǂgomsase hâ tide di. (Job. 1:9-11; 2:4; J.ǂHa. 12:10) Jehovab ga ǃgomsin hîna da ra hōǃân ǀkha hui da hâ o, ob ge ǁGâuaba ga mî hâ Jehovaba da huidab ra ǃkhais ǃaroma ǀgui ra ǃoaba di?

Hakaǁîse, Jehovab ge hoa xūn hîna sada ûib ǃnâ ra īna a aimûǀgaru ǁoa. ǂÂi ǀgaub hînab Jehovaba sada ûib ǃnâ ra ī xūna a ǂans ge ra ǂâibasen ǁîb sada ûib hoab xa a ǂansa. Xawe nē ǂâi ǀgaub ge Elobmîs xa ǂkhâǃnâ-e tama hâ. Xawe Elob ge hānîǁaeb xa a ǂan. (Jes. 46:10) Xawes ge Elobmîsa ra mî ǁîb ǃnaeǃkhaidi hānîǁaeb ǃnâ nî ǂhaiǂhaihe ǀgauba a ǂan di. (Gen. 18:20, 21; 22:12) Xaweb ge ǁîb ǀgaib hānîǁaeb xa ǂans diba hoaǁae sîsen-ū tama hâ. Nēsa da Elob hîna ge aitsama ǁhûis ǁkhāsiba a mādaba xu a ǃâubasen ǁkhā tsî ǁîb hoa xūna ǂans ǁkhāsiba ǃgâi ǀgaub ǃnâ ra sîsen-ūba?—Deu. 32:4; 2Kor. 3:17.

O Paulub di mîde da mati ra ǁnâuǃā “Elob ge . . . ǁkhā du as ǂamai ǃâitsâ du tide”? Nēbab ge Pauluba Jehovab ra dī xu-i xa ra ǃhoa, ǁîb ǃgomsib aiǃâ tamas ka io khaoǃgâ ra dī xu-i ose. Apostel Paulub mîdi ge ra ǁgau matikōseb ga ǃgomsiba kai xaweb Jehovaba nî hui dasa ǁîb ai da ga ǂgomaiǂnûi o. (Psa. 55:22) Paulub mîdi ge ǀgam xūn ai a ǃgaoǃgaosa.

ǂGurose, ǃgomsigu hîna da ra hōǃâgu ge ‘hoa’ khoen xa ra hōǃâ-e. Sida ǃgomsigu ge khoesib xa ra hōǃâ-e. Nē ǃgomsiga da ge a taniǁkhā Elob ai da ga ǂgomaiǂnûi o. (1Pet. 5:8, 9) 1 Korinteǁîn 10:13, ǃnâb ge Pauluba Israelǁaes ge ǃgaro ǃhūb ǃnâ gere hōǃâ ǃâitsâga ǃoa ra ǁnaeǁgau. (1Kor. 10:6-11) Nē ǃgomsin hoan ge khoesi ǂans tamas ka io ǁkhāsib xa ge ǀgapi tama hâ i. Paulub ge haka ǃnâdi kōse ge mî ‘ǀnîn’ ge ge ǁnâuǀnamoǃnâ di. Tsûtsûsa as ge ǂgui Israelǁîn ge ǁgai turagu ǃnâ a māǁnâsensa Elob ain ge ǂgomaiǂnûi tama hâ i amaga.

ǀGamǁîse, ‘Elob ge a ǂgomǂgomsa.’ Nē ǃnaeǃkhais ge ra ǁgau Elob ge ǁîb khoen ǀkha a hâ ǀgausa, mî rase “ǁîba ǀnam hân tsî mîmādi âba ra ǃkhōǀgaipena.” (Deut. 7:9) Tsî ǁnās ge ra ǁgau Elob hoaǁae ǁîb mîmâisa ra dīsa. (Jos. 23:14) ǁÎb di ǂgomǂgomsa tanisen ǀgauba xūn ge ǁîba a ǀnam tsî ra ǁnâuǀnamna ǁîb di mîmâidi ǃnâ nî ǂgom ǃgomsiban ra hōǃâ ǁaeb ǃnâ: (1) ǁÎb ge mā-am tide î-i ǃgomsina tanisa ǃgom (2) ‘tsîb ge ǃâitsâb ǃnâ da nî mâǃkharusa nî īǁkhā kai’.

Jehovaba mati ǁîb ai ra ǂgomaiǂnûina ǃgomsigu ǃnâ nî hui? ǁÎb ǂâis ga o, ob ge ǃgomsiba a ūbe ǁkhā. Xawe Paulub mîdi xa ǂâi re: “Tsîb ge [Jehovaba, NW] ǃâitsâb ǃnâts nî mâǃkharusa nî īǁkhā kaiba tsî.” Tsîb ge ǁîba amase hoaǁae ‘mâǃkharus’ ǁkhāsiba ra māda, ǂhâ da hâna mādas ǃnâ-ū. Kō re ǀgaugu hînab Jehovaba mâǃkharus ǁkhāsiba ra mādaba:

▪ ǁÎb ge “Elob ǁkhaeǂgaob hoab diba.” (2Kor. 1:3, 4) ǁÎb ge sida ǂâi ǀgaub, ǂgaob tsî tsâsib tsîna ǁîb Mîs, ǃanu gagab tsî gagasi ǂû-i tsîn ǃnâ-ū nî sâsa kai.—Mat. 24:45; Jhn. 14:16; Rom. 15:4.

▪ ǁÎb ge ǃanu gagab ǃnâ-ū nî daoǁgauda. (Johaneb 14:26) Hîna Elobmîs ǃnaeǃkhaidi tsî tsoatsoadi tsîna nî ǂâiho kaida te î da gā-ai ǀgaub ǃnâ ǃgû.

▪ ǁÎb ge ǀhomǃgān tsîna a sîsen-ū ǁkhā.—Heb. 1:14.

▪ ǁÎb ge nau Xristeǁîn ǃnâ-ūs tsîna a hui da ǁkhā. ǁÎn mîdi tsî dīgu ǃnâ-ūs tsîna a ‘ǀgaiǀgaida’ ǁkhā.—Kol. 4:11.

ǀAms ai da mati 1 Korinteǁîn 10:13 ǃnâ hâ mîde ra ǁnâuǃā? Jehovab ge sada ǃgomsina ǁhûi tama hâ. Xawe da ga ǃgomsina hōǃâ ǁaeb ai da ge saoran xa nî ǂâi: Jehovab ai da ga ǂgomaiǂnûi o, ob ge ǁîba mā-am tide î-i nē ǃgomsina khoe-i tani hō tidese ī. ǁÎb ge nē ǃgomsina tanis ǁkhāsiba nî māda. Nēs ge kai ǁkhaeǂgaosa.

Gagasi xūna ǀō-aisase ôaǃnâs

(1 Korinteǁîn 10:8) Î da ǁkhāti tā ǀai, ǀnîn ân gere ǀai khami, tsîn ge ǀgui tsēs ai ǀgamdisiǃnonaǀaǀoadisise ge ǁnā.

w04-E 4/1 29

Khomai-aon dîdi

Tae-i ǃaromas nē ǁaraǃāsa ra mî 23 000 Israelǁîn ge ǀai tsî a ǁōsa ǀgui tsēs ǃnâ, Numeris 25:9 ra ǁgau hîna 24 000 khoen ge ǁōsa?

ǂGui ǃaromadi ge hâ ǃgôagu nē xoadi ǃnâ ra ǃkharagagusa. Mî ǁkhā da as ge ǂhanu ǃgôab 23 000 tsî 24 000 ǁaegu hâsa.

ǀNî hâ ǃaromas tsîn ge a hâ ǁkhā. Apostel Paulub ge Israelǁaes ge Sitims ǃnâ hâ î ǃnaeǃkhaisa ra sîsen-ūse Korinteǁîs ǃnâ ge hâ i Xristeǁîna ge ǃkhâikhom. Nē ǃās ge ǁgai ûiǀgaub xa ge ǀoahe hâ i. ǁÎb ge ge xoa: “Î da ǁkhāti tā ǀai, ǀnîn ân gere ǀai khami, tsîn ge ǀgui tsēs ai ǀgamdisiǃnonaǀaǀoadisise ge ǁnā.” ǁÎb ge ǁîn hîna ǀai tsî Jehovab xa ge ǃgamhena ǀguri ge ǃgôa, Paulub ge 23 000 ǃgôaba ge mā.—1 Korinteǁîn 10:8.

Numeris di 25ǁî danaǃâs ge ra mî “Tsî Israeli ge Baal-Peora ǃgaeǁaeseno, ob ge ǃKhūb [Jehovab, NW] di ǁaiba ge ǂhubi Israeliǀî.” Tsîb ge Jehovaba Moseba ge mîmā îb “ǁaes di danakhoegu hoaga ū” tsî ǃgam. Tsîb ge Moseba ǂhanuǂhanu-aoga ge mîba î gu ǁnāsa dī. Tsîb ge Pinehaba ǃhaese Israeǀǁîb hîna ge Midiaǁîsa kamps ǃnâ a hauba ge ǃgam, “ǃnubaib ge ǁōba Israeli ôan ǂamaiba xu ge ǀû.” Nē ǃnaeǃkhais ge sao ra mîdi ǀkha ra ǀam: “Tsî ǁnān, ǁōb xa ge ǁōn, ge ǀgamdisihakaǀaǀoadisi ge i.”—Numeri 25:1-9.

Numeris ǃnâ hâ ǃgôab ge “ǁaes di danakhoegu” hîna ge ǂhanuǂhanu-aogu tsî Jehovab xa aitsama a ǃgamhen tsîna ǃkhōǂgā hâ. Tsî î ge ǀnîsi duisens ǃnâ hân hîna ge ǂhanuǂhanu-aogu xa a ǃgamhena 24 000 ǃgôab kōse ra sī. Nē danagu ge ǀnîsi ǀaib danakhoegu, ǁgoatsuiǁgoa elogu ǁaxasib tsēdi di ǃnâ ǁhao tamas ka io nēna gere dī khoena gere ǃkhōǃoa ǁnās ǀkha gu ge ǁîkha “Baal-Peori” ǀkha ge ǃgaeǁaesen.

Nē “ǃgaeǁaes” di hâ mîs ge ǀgui ôaǃnâs ǃoagu ra ǁgau nēs “khoe-i ai ǃgae mâisens” di ra ǂâibasen di. Israelǁaes ge Jehovab ai ge māǁnâsen hâ i ǁaesa xawen ge “Baal-Peori” ǀkha ǃgaeǁaesa a dī o, on ge Elob ǀkhan ge ūhâ i ǃgaeǁaesa ge ǂoaǃnâ. Tsî 700 kurigu khaoǃgâb ge Jehovaba kēbo-aob Hoseab ǃnâ-ū Israelǁaesa ge mîba: “Tita ge Israeli dina ǂauxûiǂûn axase ge hō ǃgaroǃhūb ǃnâ, tita ge sadu îna ǂguro ǂûn, ǀnomahais ai hân, ǀkhī ran axase ge mû; xawen ge Baal-Peori ǃoa ǃgû tsî ǁnā taotaosasiba ge khaisenba tsîn ge hoaragase ge ǁgaiǁgaixū kai ǁîn di ǁâsabeb ǂûb khami.” (Hoseab 9:10) ǁÎn hîna ge nēna a dīn ge ǀgoraǃgâhesa ge ǂhâ hâ i. Tsîb ge Moseba Israeli ǀgôana ge mîba: “Sadu di mûdi ge ge mû, Baal-Peori tawab ge Eloba dīna; mâ khoeb hoab Baal-Peora ge saobab ge ǃKhūb, sadu Eloba sadu ǁaeguba xu ge hîkākā.”—Deuteronomium 4:3.

(1 Korinteǁîn 11:5, 6) mâ taras hoas, ǀgores kas, kēbos kas hîa ǀōdana hâsa, ǁnās ra danas âsa ǃgôao kai; ǂkhomhes ga hâs ǁkhās khami i kom īo.⁶Taras ga ǀgapa ǂgao tama io, as ǂkhomkaisen; xawe taras ga ǂkhomkaisens nîs xa tsî ǀûnas nî ǁara kais xa taotaosabaheo, as ǀgapa.

(1 Korinteǁîn 11:10) ǁNā-amagas ge tarasa ǀhau-e danas ai nî ūhâ ǀhomǃgāgu ǃaroma.

w15-E 2/15 30

Khomai-aon dîdi

Tare ǃgâsasa danas ai ǃkhaiba nî ǃgae, aore ǃgâsab hâ hînas ga Elobmîs ǁkhāǁkhāsa dī o?

▪ “Khomâi-aon dîdi” hîna Julib 15, 2002ǁî kurib di The Watchtower ǂkhanib ǃnâ xoasas ge ge ǁgau tare ǃgâsas danas ai ǃkhaiba nî ǃgaesa, aore ǃgâsab ǀkhas ga Elobmîs ǁkhāǁkhāsa dī o. Nēs ge ǁāǁnâhe hâ ǃgâsab tamas ka io ǁāǁnâhe tama hâb tsîna ǃkhōǂgā hâ. Tsî nēs ge ra ǁgau nēs a ǂhanusa.

ǁĀǁnâhe hâ ǃgâsas ge Elobmîs ǁkhāǁkhās ǃoas ga ī tsî nēsa ǃkhō dana o ǁāǁnâhe hâ ǃgâsab tamas ka io ǁîs ǃgame-aob hâ hîna, os ge ǁîsa ǃkhaiba nî ǃgae. Nēs ǃnâ-ūs ge ǁîsa Jehovaba ǃgôasiba ra ǁgau Xristeǁî ǀhaohâb tsî omaris ǃnâ, ǁîs ǃgâsab tamas ka io ǃgame-aob ga dī hâ ǃâbas ra ǃkhō dana amaga. (1Kor. 11:5, 6, 10) Xawes ge ǁîsa ǃgâsaba a ǂgan ǁkhā îb Elobmîs ǁkhāǁkhāsa dī ǁîb ga mā-amsa ūhâ o.

Tsîs ga ǃgâsasa ǁāǁnâhe tama hâ ǃgâsab ǀkha Elobmîs ǁkhāǁkhāsa dī o, os ge ǁîsa Xoadi xa ǂgaoǀkhāhe tama hâ ǃkhaiba ǃgaesa. Xawe di ge ǀnî ǃgâsade ǁîdi ǃgâiǂâis ga mā-am tama io, o ǃkhaiba a ǃgae ǁkhā.

Elobmîs khomâis

(1 Korinteǁîn 10:1-17) Tsî ta ǂgao tama hâ, ǃgâsado, ǀūǂamse du nî hâsa, sada îgu hoagu ge ǀnanus ǃnaga hâ i ǃkhaisa, tsî hoagu ge huriba ǃgûǃganu ǃkhaisa; ²tsî hoagu ge Moseb ǃnâ ǁāǁnâhe ǃkhaisa ǃâus tsî hurib tsîra ǃnâ; ³tsî hoagu ǁkhā gagasi ǂû-e gere ǂû ǃkhaisa;⁴tsî hoagu ǁkhā gagasi āxū-e gere ā ǃkhaisa (saoǀhao ge gagasi ǃhaob ǃnâ gu gere ā xui-ao, tsî ǁnā ǃhaob ge Xristu ge i;) ⁵xawe ǂguin ân ǃnâb ge Eloba ǃgâiǃgâibasen-e ūhâ tama ge hâ i; on ge ǃgaroǃhūb ǃnâ ge ǂnauǁguihe. ⁶Tsî nēn ge aiǁgause ge ǃnaeba da, sada ǂkhababa tura tidega, ǁîn gere tura khami. ⁷Î du ǁkhāti tā ǁgôatsuiǁgoan di ǃgā kai, ǀnîn ân ge ī khami; xoamâihe hâ khami: “ǁAes ge ge ǂnû, ǂû tsîn nî āse, tsîn ge ge khâi ǀhurun nîse.” ⁸Î da ǁkhāti tā ǀai, ǀnîn ân gere ǀai khami, tsîn ge ǀgui tsēs ai ǀgamdisiǃnonaǀaǀoadisise ge ǁnā. ⁹Î da ǁkhāti Xristuba tā ǃâitsâ, ǀnîn ân ge ǃâitsâ bi khami, tsîn ge ǀaon xa ge hîkākāhe. ¹⁰Î du ǁkhāti tā ǀara, ǀnîn ân gere ǀara khami, tsîn ge ǁgaoǁgao-aob xa ge hîǀhuruhe. ¹¹Tsî nēn hoan ge ǁîna aiǁgause ge hāǂam; tsîn ge sada, ǃhūbaib di ǀkhâuǀamdi ge hāǂamda ǁnamase ge xoamâibahe. ¹²ǁNā-amaga, mâ ta hâ, ti kara ǂâi-e, a-i ǂanbasen, î-i tā ǁnā. ¹³ǀNî ǃâitsâ-i ge sado gorose hāǂam tama hâ, khoesi ǃâitsâ-i ǀgui-i: Tsî Elob ge a ǂgomǂgomsa, ob ge ǁkhā du as ǂamai ǃâitsâ du tide, tsîb ge ǃâitsâb ǃnâts nî mâǃkharusa nî īǁkhā kaiba tsî, ǁîsa du nî tani ǁkhāse. ǁGôatsuiǁgoaǃoabas tsî ǁgâuagu ǀkha hâ ǀhûhâsib on xa. ¹⁴ ǁNā-amaga, ti ǀnamsabedo, ǁgôatsuiǁgoaǃoabasa ǁhâxū re. ¹⁵ǁNâuǃāxa khoe-i ǀkhas khami ta ra ǃhoa-ū du; ǁî-aitsama ǀgora mî ta ra-e. ¹⁶ǁNā ǀgabis gangans dis, ǁîsa ge ra ǀkhaesa, Xristub ǀaob di amǃnâxasi tamasa? ǁNā pereb, ǁîba ge ra khôaba, Xristub soros di amǃnâxasi tamaba? ¹⁷ǀGui pereb a khami da ge sa ǂguida a ǀgui soro; sada hoada ǀgui pereb ǃnâ ra amǃnâxa xui-ao.

APRILI 22-28

ELOBMÎSA XU HÂ ǂÛǂÛSA MÎDI | 1 KORINTEǁÎN 14–16

Elob ge ‘hoan ǃnâ’ nî hui du

(1 Korinteǁîn 15:24, 25) ǁNās khaoǃgâs ge ǀamsa nîra hā, gaosibab ga Elob ǁGûba māǁnâ ǃnubai, hoa ǂamkhoesib tsî ǁkhāsib, tsî ǀgaib tsînab ga hîkākā ǃnubai. ²⁵ǁÎb ge nî gaosîsen xui-ao, ǁîb di khākhoen hoanab nîra ǁîb ǂaira ǃnaga ǁguis kōse.

w98-E 7/1 21 ¶10

“ǀUni khākhoeb, hîkākāhe nîb ge ǁōba”

¹⁰ “ǀUnis” ge Xristub di 1 000 kurigu di ǂgaeǂguis ǀams xa ra ǃhoa hînab Jesuba ǃgamǃgamsen tsî ǂhauǃnâse Gaosiba nî mā-oasa ǁîb ǁGûba ǃoa. (ǂHaiǂhais 20:4) Elob ǂâibasens Xristub ǃnâ hoa xūna ‘ǀgui danab ǃnâ ǃkhōǀhaos’ ge nî dīǀoaǀoahe. (Efeseǁîn 1:9, 10) Aibeb ge Xristuba ǂgurose ‘ǂamkhoesigu, ǁkhāsib tsî ǀgaib’ tsîna nî dīkaka hîna Elob ǂgaeǂguisa ra mâǃoaga. Nēs ge Armagedons torob xa ǃnāsana ǃkhōǂgā hâ. (ǂHaiǂhais 16:16; 19:11-21) Paulub ge ge mî: “ǁÎb ge nî gaosîsen xui-ao, ǁîb di khākhoen hoanab nîra ǁîb ǂaira ǃnaga ǁguis kōse. ǀUni khākhoeb, hîkākāhe nîb ge ǁōba.” (1 Korinteǁîn 15:25, 26) Adammi ǁoreb tsîb ǁōb tsîn ge nî ūbehe. Tsîb ge Eloba hoa “ǀhobadi” ǃnâ hâ khoena khâisa nî mā.—Johaneb 5:28.

(1 Korinteǁîn 15:26) ǀUni khākhoeb, hîkākāhe nîb ge ǁōba.

kr-E 237 ¶21

Gaosib ge Elob ǂâibasensa ǃhūbaib ai nî dīǀoaǀoa

²¹ O, ǁoreb xa ra ǃaromahe ǁōb? Nēb ge sada “ǀuniga” khākhoeba hîna khoesib aisi ǀae nî ǀgaioǃnâba. (1Kor. 15:26) Xawe Jehovaba ǁōba dīkakasa ra ǃao? Jesajab ge ge kēbo: “ǁÎb ge ǁōba nîra hapu dans ǃoa, tsî ǃKhūb ge ǁgamroga aidi hoade xu nîra ǀombē.” (Jes. 25:8) ǁNā mâsiba du a mûnan-ai ǁkhā? ǁKhō-e ǀkhai, ǁkhō ǂgāde ǀkhai, ǁgamrona ǀkhai tsî ǃoab tsîna. Mî da ga o, o i ge ǂkhîb di ǁgamrona nî ǀoa Jehovab ǁîb di mîmâisa ra dīǀoaǀoa amaga. (Khomai re Jesajab 26:19.) ǁŌb xa ǃaromahe hâse hâ ǀhapis ge nî ǂgau.

(1 Korinteǁîn 15:27, 28) Hoanab ge ǁîb di ǂaira ǃnaga mâi xui-ao. Tsî hoan ǁîb ǃnaga mâihe hân ga mîo, o i ge a ǂhaisa, hoana ǁîb ǃnaga ge mâib a ǃkhōǂuihesa ǃkhaisa. ²⁸Tsî hoan ga ǁîb ǃnaga hâ, ǃnubaib ge ǀGôab ǂûb ona hoana ǁîb ǃnaga ge mâiba nîra ǃnaga hâba, îb Eloba hoan ǃnâ hū ti.

w12-E 9/15 12 ¶17

ǂKhîba ǀoadisi kurigu tsî ǀamosib kōse

¹⁷ Nēsa da nî ǁguiǃā ǀgaub ge a ǀkhai Elob nî “hoan” ǃnâ hui da amaga. Nēsa tae-e ra ǂâibasen? Edenni ǃhanab xa ǂâi re ǀoasa kurusa ūhâ khoera Adammi tsî Evas tsîra xa, ǁîra ge ge Jehovab di omaris ǁani i. Jehovab ǃhūbaib di Kuru-aob ge ǀhomǃgān tsî khoesib ǂama ra ǂgaeǂgui. Adammi tsî Evas tsîra ge Elob ǀkha ge ǃhoa ǁkhā i, ǃoababi ǁkhā i tsî ǁîb xa gere ǀkhae-e. ǁÎb ge “hoa” khoena gere hui.

Gagasi xūna ǀō-aisase ôaǃnâs

(1 Korinteǁîn 14:34, 35) ǁNās ǁkhās xase a di sadu tarade ǀhaohâb ǃnâ ǃnō; ǃhoasa di mā-amhe tama hâ xuige, tsî di ge mîmāhe hâ, ǃnaga di nî hâsa, ǂhanub on ra mî khami. ³⁵Tsî xū-e di ga ǁkhāǁkhāsen ǂgao-o, a di oms tawa ǁîdi aogu ǂûga dî; anu tama i kom hâo taradi tawa, ǀhaohâb ǃnâ ǃhoasa.

w12-E 9/1 9, boksis

Apostel Pauluba tare khoede ge ǃkhâikhōm î di tā ǃhoa?

“ǁNās ǁkhās xase a di . . . tarade ǀhaohâb ǃnâ ǃnō” tib ge Apostel Pauluba ge xoa. (1 Korinteǁîn 14:34) Nēsa tae-e ra ǂâibasen? ǁÎdi gā-aisibab gere ǃgôaǁnâ ǂgao? Hî-i. ǁÎb ge ǁîdi di ǃgâi ǁkhāǁkhādi xa ǀnîhâ xoadi ǃnâs tsîna ra ǁnaeǁgau. (2 Timoteub 1:5; Titub 2:3-5) ǁÎb di sîǂkhanis Korinteǁîn dis ǃnâb ge Pauluba tarekhoedi ǀguidi ǀkha ge ǃhoa tama ha i xawe hoan hîna ǃanu gagaba ge ǃkhoǃoan tsîn ǀkha gere ǃhoa, ‘ǃnō re’ nau ǃgâsan ga ǃhoa o. (1 Korinteǁîn 14:26-30, 33) ǂGui tarekhoedi hîna ge ǀasa ǂgomsa hōdi ge ôasase dîna ǃhoa-aoba gere dî. Tsî nē ǃnoa ǀgauba ǁkhaes ǃaromab ge Pauluba ǁîna gere ǂkhâǃnâ “oms tawa ǁîdi aogu ǂûga dî.”—1 Korinteǁîn 14:35.

(1 Korinteǁîn 15:53) Nē ǁgaoǁgaosib nî ǁgaoǁoasiba ana tsî nē ǁōǁkhāsib nî ǁōǁoasiba ana xui-ao.

it-1-E 1197-1198

ǁGaoǁgaosib

Jesub ǀkha ǀguiǀguihes ǁîb di ǁōb ǃnâ, ǁîb di ǂkhauhesan ge ǁōba xu ǀgui khâi kaihe tide xawe ǀamo ûib tsîna nî mâhe. Gaxuse ûi, ǂgomǂgomsase ǃoabas tsî ǁore-aose ǁōs ge ǀam tama hâ ǁîn ge ǀamo ûiba ǁnās khaoǃgâ ra hō, Paulub ge ǃgāsase a mî khami 1 Korinteǁîn 15:42-54 ǃnâ. Nēs ge ǁîn di ǀamo ǂkhî ûiba ǃoa ra ǁnaeǁgau ǀam o tsî ǁō ǁoase, ǁō ra soros ǁîs di ǂkhabusasiba ǃoa ra ǁnaeǁgau hîna xawe soros Elob ra mās ge ǁō ǁoa tamas ka io a hîkākāhe ǁoa. Nēs ǃaromab ge Jehovaba ǁîna ǁkhāsiba ge mā în aitsama huisen ǁîn di gagasi tsî nau kurusaben khami. Nēs ge Jehovab sada ǃnâ ūhâ ǂgomǃgâsib ǃoa ra ǁgau. Nē ǃnorasasib tsî ǀamo ûib tsîn ge a hōhe ǁkhā xawes ge nēsa Elob ǂgaeǂguisa xu ǃnoraǃnora nî tama hâ tsîn ge ǁîb di danab Jesub tsîna ra ūǃoa tsî ǁîb ǁGûb di daoǁgaude ra sao.—1Kor. 15:23-28 mū re Immortality; Soul.

Elobmîs khomai ǃâs

(1 Korinteǁîn 14:20-40) ǃGâsado, tā ǀgôa kai re ǁnâuǃāb ǃnâ; î du ǂkhabab ǃnâ ǀgôa kai re, î du ǁnâuǃāb ǃnâ ao kai re. ²¹ ǂHanub ǃnâ xoamâihe hâ: “ǀKhara namgu ǀkha tsî ǀkhara amǁgaugu ǀkha ta ge nē ǁaes ǀkha nîra ǃhoa, xawen ge ǁkhāti ǁnāti ǁnâu te tide, tib ra ǃKhūba mî,” ti. ²²O gu ge namga saose ība ǂgomsana tama i, tsî ǂgomoǃnâna; tsî kēbosis ge saose ība, ǂgomoǃnâna tama i, tsî ǂgomsana. ²³Tsî ǀhaohâb hoab ga ǀguipa ǀhûo, tsîn ga hoatsama ǃhao namgu ǃnâ ǃhoao, tsî i ga ǁkhāǁkhāhesa tama-i kas, ǂgomoǃnâ-i kas hoasa ǂgâxao, ǃkhau du hâ, tin kha mî tide? ²⁴Xawe hoan ga kēbo, tsî i ga ǁkhāǁkhāhesa tama-i kas, ǂgomoǃnâ-i kasa ǂgâxao, o i nî hoan xa ǃhoagaobahe, o i nî hoan xa ǀgoraǃgâhe. ²⁵O gu nî ǁnāti ǂganǃgâsigu ǁî-i ǂgaob diga ǂhai; o i nî ǁnāti ǁî-i ais ai ǁnāǁgoe, tsî nî Eloba ǀgorelî tsî nî ǁguiǁnâ, Elob amase sadu ǃnâ hâ ǃkhaisa.ǀHaohâb di eloǃoabas ǃnâb ge ǃamkusiba a ǂhâbasa. ²⁶Matisa kha ǁnâi, ǃgâsado? ǀHû du karao, mâ-i hoa-i âdo, psalm-e i ga ūhâo, ǁkhāǁkhā-e i ga ūhâo, namga i ga ūhâo, ǂhaiǂhaisi-e i ga ūhâo, ǁguiǃā-e i ga ūhâo, an hoana ǂnubikhâis ǃoa ī. ²⁷ Tsî khoe-i ga nammi ǀkha ǃhoao, an ǀgamǀgameses karao, ǃnonaǃnonabeses karao, saogubes ai ǃhoa, î-i ǀgui-e ǁguiǃā. ²⁸Tsî ǁguiǃā-ao-i ga hâ tama io, a-i ǀhaohâb ǃnâ ǃnō; a-i ǁî-aitsama ǃhoabasen, tsî Elob tsîn ǃoa. ²⁹Tsî kēbo-aoga a gu ǀgamǀgamese, ǃnonaǃnonabese ǃhoa, în nauna ǀgora; ³⁰tsî ǀnîb, ǁnāpa ǂnôab ga ǂhaiǂhaisi-e hō, ab ǂguroba ǃnō.³¹Hoadu ge saogubes ai a kēbo ǁkhā xui-ao, hoan nî ǁkhāǁkhāhese, tsî hoan nî ǁnamahese. ³²Tsî kēbo-aogu di gagadi ge kēbo-aogu ǃnaga māsen hâ. ³³Elob ge ǃkhaerasib di Elo tamaba xui-ao, xaweb ge a ǂkhîb di Elo. ³⁴ǁNās ǁkhās xase a di sadu tarade ǀhaohâb ǃnâ ǃnō; ǃhoasa di mā-amhe tama hâ xuige, tsî di ge mîmāhe hâ, ǃnaga di nî hâsa, ǂhanub on ra mî khami. ³⁵Tsî xū-e di ga ǁkhāǁkhāsen ǂgao-o, a di oms tawa ǁîdi aogu ǂûga dî; anu tama i kom hâo taradi tawa, ǀhaohâb ǃnâ ǃhoasa. ³⁶Elob mîsa sado xus ge ǂoa? Sadu ǀgui du ǃoas kha ge sī? ³⁷Khoe-i ga ǂâi, kēbo-ao i a tamas ka io, gagasi i a ǃkhaisa, a-i mûǂan, sado ta ra xoaban a ǃKhūb di mîmā ǃkhaisa; ³⁸tsî khoe-i ga ǁîsa mûǂan ǂgao tama io, o i ge ǁî-i ona ǂanǃgâhe tide. ³⁹ǁNā-amaga, ǃgâsado, kēbo du nîsa ǃhaeǃgon, î du nammi ǀkha ǃhoasa tā ǃkhâi. ⁴⁰Xawe an xūn hoana anu hâse tsî ǃamkuse dīhe.

APRILI 29–MEIB 5

ELOBMÎSA XU HÂ ǂÛǂÛSA MÎDI | 2 KORINTEǁÎN 1-3

Jehovab—“Elob ǁkhaeǂgaob hoab diba”

(2 Korinteǁîn 1:3) Ab karehe Elob tsî ǁGûb sada ǃKhūb Jesub Xristub dib, ǁGûb ǀkhomxaǂgaosigu dib tsî Elob ǁkhaeǂgaob hoab diba,

w17-E.07 13 ¶4

“Ā ran ǀkha ā re”

⁴ Sada ǁGûb ge ǁōb ǃnâ ǀnamsa na ǂoaǃnâs tsûba a ǂan hînab ge Abrahammi, Isaki, Jakobub, Moseb tsî Gao-aob Davib tsîna a hōǃâba. (Num. 12:6-8; Mat. 22:31, 32; ǃNǃkh. 13:22) Elobmîs ge ra mîba da Jehovab ge mâ-amxase ge mîǁgui ǁîna ǁōba xu khaisa māsa. (Job. 14:14, 15) ǁÎn ge ǂkhî gaxū ûiba nî ūhâ. ǂÂi re, Elob di ǀnamǀnamsa ǀgôab xa “ǁîb tawa kaikaiǀgôase ge hâ” ība ǁîb ge ǁgaoǁgaosa ǁōba ge ǁō. (ǂKhm. 8:22, 30) Mîdi ge a mîǃā ǁoa matib Jehovaba gere tsûsa.—Johaneb 5:20; 10:17.

(2 Korinteǁîn 1:4) sige ǁgâiǀāb hoab ǃnâ sige ra ǁkhaeǂgaoba, sige nî ǁkhāti mâ ǁgâiǀāb hoab ǃnâ hâna ǁkhaeǂgao ǁkhāse, ǁnā ǁkhaeǂgaob ǀkha, ǁîb ǀkha ge aitsama Elob xa ra ǁkhaeǂgaoheba.

w17-E.07 15 ¶14

“Ā ran ǀkha ā re”

¹⁴ ǁNâuǃāxase i ge a ǃgomba da ǁkhā ǁōb ǃnâ ǀnamsa-e ǂoaǃnâhâ khoe-e ǁkhaeǂgaosa. Xawes ge Elobmîsa ra mî “nams gā-aigu dis ge a soǀôa” di. (ǂKhm. 12:18) ǂGuin ge ǁkhaeǂgao ra ǂâide When Someone You Love Dies di hâ ǂkhaniba xu ge hō. ǃNāsa ǁaegu ai i ge “ā ran ǀkha” āsa ra hui. (Rom. 12:15) “ǁGamron ge ge ti ǂgaob di gowa kai” dis ge Gabisa ra mî, ǁîs aob ge ǁōsa. “Nēs ǃaroma ta ge ra ǁkhaeǂgao-e khoen ga tita ǀkha ā o. ǁNā ǁaeb ai ta ge ǀguri tsâsen tama hâ ti ǃoab ǃnâ.”

Gagasi xūna ǀō-aisase ôaǃnâs

(2 Korinteǁîn 1:22) sige ǁkhāti ge ǀgaiǀgaib, tsî mâiǁkhaes Gagab disa sige ǂgaogu ǃnâ ge māba.

w16-E.04 32

Khomai-aon dîdi

Tae-e a “mâiǁkhaes” tsî “ǀgaiǀgaib” hîna i mâ ǂkhauhesa Xristeǁî-e ra ǃkhōǃoa-e?—2Kor. 1:21, 22

▪ Mâiǁkhaes: Ôaǃnâs ǃoagu Grikegowab ǃnâs ge nē mîs “mâiǁkhaes” di hâsa 2 Korinteǁîn 1:22 ǃnâ ǁaxasib ǃoa ra ǁnaeǁgau hîna “ǂguro mâiǁkhaes tamas ka io nēsa ra īǁkhā kai xū-i xa ra ǃoa.” Xawe ǂkhauhesan di ǃâb ǃnâs ge nēsa 2 Korinteǁîn 5:1-5 ǃnâ ǁîn di ǀamo ûiba ǃoa ra ǁnaeǁgau. Nēs ge ǀkhaeb ǁkhawa ǁō tidese īs diba.—1Kor. 15:48-54.

ǀAsa ǃhoa ǀgaub Grikegowab dis ǃoagus ge nē mîsa ǃgameb ringsa ǃoa ra ǁnaeǁgau. Nēs ge ǃgâi ǁguiǃāsa ǁnān hîna Xristub ǀkha nî ǃgamese îna ǃoa-i ra ǁnaeǁgau amaga.—2Kor. 11:2; J.ǂHa. 21:2, 9.

▪ ǀGaiǀgaib: ǃKharu ge ǁaeb ǃnâ i ge ǀgaiǀgaiba ǁnâuǃāgus ǃgao gere sîsen-ūhe. ǂKhauhesan ge Elob gagab xa ǀgaiǀgaihe hâ ǁîb khoen ase. (Efe. 1:13, 14) Nē ǀgaiǀgaib ge hoaǁae hâhâ tama hâ, xawe khoe-i nî ǁōs kōse ǀgui tamas ka io kai ǁgâiǀāb kōse.—Efe. 4:30; J.ǂHa. 7:2-4.

(2 Korinteǁîn 2:14-16) Tsî Eloba ab ganganhe, mâ ǁaeb hoab ai sige ra dan kaiba Xristub ǃnâ, tsî ǁîb ǂans di ǁamaba sige xu ǃkhaidi hoadi ai ra ǂhai kaiba. ¹⁵ ǃGâi ǁamage Xristub dige ge sige xui-ao Elob tawa ǃgâiǃō ran ǃnâs karao, kāǁō ran ǃnâs karao; ¹⁶ nēna ge ge ǁōb di ǁamase ība ǁōb ǃoa, tsî nauna ûib di ǁamase ûib ǃoa. Tsî tari-e ǁîna ǃoa a ǁkhā?

w10-E 8/1 23

ǂAn i du go i?

Pauluba tae-e ǂâis ǃnâ ge ūhâ i “mâ ǁaeb hoab ai ra dan” dib ge mî o?

▪ Paulub ge ge xoa: “Tsî Eloba ab ganganhe, mâ ǁaeb hoab ai sige ra dan kaiba Xristub ǃnâ, tsî ǁîb ǂans di ǁamaba sige xu ǃkhaidi hoadi ai ra ǂhai kaiba. ǃGâi ǁamage Xristub dige ge sige xui-ao Elob tawa ǃgâiǃō ran ǃnâs karao, kāǁō ran ǃnâs karao; nēna ge ge ǁōb di ǁamase ība ǁōb ǃoa, tsî nauna ûib di ǁamase ûib ǃoa. Tsî tari-e ǁîna ǃoa a ǁkhā?”—1 Korinteǁîn 2:14-16.

Apostel Paulub ge nēba Romeǁîn ǁnaetigu ǃoa ra ǁnaeǁgau Gao-aob ge torob ǃnâ gere dan o, o gere dī-e ǁaxasib xa. ǁNā ǁaxasib tawa i ge ǃkhōsis ǃnâ ge hâ i khoen hîna a toroǃkham-aogu tsîna ǃkhōǂgā hâse khoen aisi gere mâihe tsî gomab ge gere ǁguibāhe ǀgapi ǂhārode ūhâ aogu ǃgôasiba ra māhe hîna. Nē ǁaxasib ǀams ai, i ge gomaba gere ǁguibāhe tsî ǃkhōsis ǃnâ ge hâ i khoena gere ǃgamhe.

‘ǃGâi ǁamab Xristub’ di hâ mîs ge ǀnîna ûib tsî nauna ǁōb di ra ǂâibasenba tsî nēs ge “Romeǁîn di ǁaxasib hîna i ǁguibade ra dīheb” xas tsîna ra ǃhoa dis ge “The International Standard Bible Encyclopediasa” [Elobmîs] ra mî. “Nē ǁamab ge dans di ǃgâiaǂgaob hînan ǃkhōsis ǃnâ hâ khoena ǃnorakaihen nî ǁaeb xa gere ǂâis ǃoa ra ǁnaeǁgau.”

Elobmîs khomais ǃâs

(2 Korinteǁîn 3:1-18) ǁKhawa ge kha ǁî-aitsama ra koasentsoatsoa. Xare ge sige ǀnîgu khami ǃkhō-amǂkhanide sadu tawa ra ǂhâ? ǃKhō-amǂkhanide sado xu ǂhâ ge hâ? ²Sadu ge sige ǂkhanido, sige ǂgaogu ǃnâ xoahe hâdo, khoen hoan xa ra mûǂanhe tsî khomaihedo, ³sadu hîa ge ǂhai kaido, Xristub ǂkhanidu a ǃkhaisa, sige ǃoabasa xu ǂhomihe hâdo, inki ǀkha tama i tsî ûitsama Elob di Gagab ǀkha xoahe hâdo, ǀuis xoa-aidadi ai tama i tsî ǁgans xoa-aidadi ǂgaob didi ai. ⁴Tsî ǁnāti ī mûmâinǃgâ-e ge ge Xristuba xu Elob ai ūhâ: ⁵ǁNāti tama: Sige xu ge ge aitsama ǁkhābasen ǃkhaisa, xū-e ge nî ǂâisa, sige ǁkhāge xus a khami, xaweb ge sige ǁkhāsiba Eloba xu hâ; ⁶ǁîb sige ǁkhāti ge ǁkhā kaiba, ǀasa ǃgaeǀhaos di ǃoabasabe kai ge nîsa, ǂkhanimûs di tama i tsî Gagab di ǃoabasabe; ǂkhanimûs ra ǃgam, xawe Gagab ra ûi-ûi xui-ao. ⁷Tsî ǁōb di ǃoabas, ǂkhanimûdi ǀkha ǀuixoa-aidadi ǃnâ xoaǂgāhe ge hâ is ga ǂkhaisab ǃnâ hâ io, Israeli ôan ge Moseb di aisa ǃgapaǀî ǁoa is kōse, ǁîb ais di ǂkhaisib kā nîb ǃaroma, ⁸matikō ǃnā hâses kha Gagab di ǃoabasa ǂkhaisib ǃnâ nî hâ? ⁹Tsî ǀâxarexūsib di ǃoabas ga ǂkhaisa io, os ge ǂhanu-aisib di ǃoabasa ǃnāǂamsase ǂkhaisib ǃnâ hâ. ¹⁰ǂKhaisib ge nē ǃâs ai ǂkhaisise i tama hâ i nē ǃnāǂamsa ǂkhaisib xa xui-ao. ¹¹ǁNā -i, kā nî-i ga ǂkhaisa io, o i ge hâhâ ra-e ǃnāǂamsase nî ǂkhaisa xui-ao. ¹²Tsî nēti ī ǃâubasensa ge ūhâ amaga ge ge kai ǁkhoaǂgaosib ǀkha ra sîsen; ¹³tsî ge ge Moseb ge dī khami dī tama, ǃgū-ai-e ais âb ai ge ǁguiba, Israeli ôan kā nî ǂkhaisib di ǀamsa kō tidega; ¹⁴o di ge ǂâidi âna karokarohe hâ; nētsēs kōses kom ǁnā ǃgū-ais ǁkhāsa ūǁnâhe tamase ra hâo, ǀoro ǃgaeǀhaos ra khomaiheo, Xristub ǃnâ nîra kāsa; ¹⁵tsî nētsēs kōse, Moseb ra khomaihe hîas ge ǃgū-aisa ǁîn di ǂgaob ai ra ǁgoe; ¹⁶xawe ǃKhūb ǃoan ga ǃhobaseno, os ge ǃgū-aisa nîra ūǁnâhe. ¹⁷ǃKhūb ge a Gaga; tsî ǃKhūb di Gagab hâpa, ǁnāpab ǃnorasiba hâ; ¹⁸xawe da ge sada hoada ǃgū-aihe tama ais ǀkha ǃKhūb di ǂkhaisiba mûsenxūs ǃnâ ra kōǃâ ǁkhā īsib ǃnâ ra ǀkharaǀkharahe, ǂkhaisiba xu ǂkhaisib ǃoa, ǃKhūb Gagaba xus ase.