ǁNaeǁgaudi Sida Xristeǁî ûib tsî aoǁnâ sîsenni ǂkhanib
JUNIB 3-9
ELOBMÎSA XU HÂ ǂÛǂÛSA MÎDI | GALATEǁÎN 4–6
“Nē ‘ǂkhōs’ sida ai ūhâ sîsenǂuib”
(Galateǁîn 4:24, 25) Nē xūn ge ǂkhōs xase ī; nē tarara ge ǀgam ǃgaeǀhaora xui-ao: ǀGuis Sinaiǃhommi dis, ǃgāsis ǃaroma ra ǀgôana hōs, ǁîs ge Hagarsa. 25 Hagars ge Arabiab ǃnâ ǁgoe Sinaiǃhomma, tsîs ge nēsi hâ Jerusalems ǀkha ra ǀgui, tsî ǀgôan âs ǀkha ra ǃoabasa;
it-1-E 1018 ¶2
Hagars
Apostel Paulub ǃoagus ge Hagarsa ǂkhōs ǃnâ Israelǁaesa gere ǂnûǁkhaeba, hîna ge Jehovab ǀkha a ǃgaeǀhaohesa ǂhanub ǃgaeǀhaos xa tsî ge Sinaiǃhommi ai a mâiǂgāhesa. Ne ǃgaeǀhaos ge “ǃgāsis . . . ǀgôana” ge ǀkhī-ū. Khoen di ǁoregu amsis ge ǁaesa ǃgaeǀhaos ǂgaoǀkhādi ǃoagu ge ûi ǁoa i. Tsî nes ǃoagus ge Israelǁaesa ge ǃnora tama hâ i tsî ǁore-aon hîna ǁōba anuhân ase ge ǀgoraǃgâhe. ǃGāsis ǀgôan ge ī xawe. (Jhn. 8:34; Rom. 8:1-3) Paulub tsēdi ǃnâs ge Jerusalemsa Hagarsa gere ǂnûǁkhaeba tsî Jerusalems danaǃās ge Israelǁaes ǀapeǂhumisa gere ǂnûǁkhaeba hîna ge ǃgasis ǃnâ ǁîs ǀgôan ǀkhā a hōsensa. ǂKhauhesa Xristeǁîn ge “Jerusalems ǀgapise hâs” di ǀgôa, hîna Elob di ǀapeǂhumis di ǀhommi ǃâba taras ase ra ǂnûǁkhaebasa. Nē Jerusalems ge Saras, ǃnorasa taras khami ǃgāsis ǃnâ ge hâ tama hâ i. Tsîb ge Isaka Ismaeli xa gere mâǃoahe khamin ge “Jerusalems ǀgapise hâs” di ǀgôan hîna ge Jerusalems ǃkhōsis ǃnâ hâ ina Jesub xa ge ǃnorakaihe. Hagars tsî ǁîs ǀgôab tsîn ge ǃhaeǂuihe ǀgaub ge Jehovab ge Israelǁaesa gere ǃhaeǂui ǀgauba ra ǁgau.—Gal. 4:21-31; mû re Jhn. 8:31-40.
(Galateǁîn 4:26, 27) xawe ǁnā Jerusalems, ǀgapise hâs ge a ǃnorasa, ǁîs ge a sada hoada di î, 27 xoamâihe hā xui-ao: “Dâ, sas ǀgamǀkhā tamas, sas ǁora tamas; dâxase ǂgai, sas, ǁoratsû-e tsâ tamas; ǃū-aise hâs di ôan nî aoba ūhâs din xa ǂgui xuige.”
w14-E 10/15 10 ¶11
Mâǁaposa ǂgomsa ūhâ re Elob gaosib ǃnâ
11 Abrahammi ǃgaeǀhaos ge mûǃāhe ra ǀgaub ǃnâ ge dīǀoaǀoahe Abrahammi surib ge mîmâisa ǃhūba a ǀumi o. Xoadi ge ra ǁgau nē ǃgaeǀhaos ge gagasises tsîna a dīǀoaǀoahesa. (Gal. 4:22-25) Gagasi dīǀoaǀoas xab ge Apostel Pauluba ge ǁguiǃā ǂguro ǃâb Abrahammi surib dib a Xristusa tsîb ǀgamiǁî ǃâba a 144 000 ǂkhauhesa Xristeǁîn dīsa. (Gal. 3:16, 29; J.ǂHa. 5:9, 10; 14:1, 4) Taras hîna ge ne suriba a kurus ge a “Jerusalems ǀgapise hâs” Elob ǀapeǂhumis di ǀhommi ǃâ, hina gagasi kurusabena ǃkhōǂgā hâsa. (Gal. 4:26, 31) Abrahammi ǃgaeǀhaos ge a mîmaî khamis ge ne taras di suriba ǀkhaeba khoesiba ǃoa nî hau.
(Galateǁîn 4:28-31) O da ge sada, ǃgâsado, Isaki xase a mîmâis di ôa. 29 Tsî ǁnāǃnubaib ǁgans ǃoa ge ǃnaeba Gagab ǃoa ge ǃnaeba gere ǃgôaǃgon khami, ǁnās ǁkhās xase i ge ǁkhāti nēsi ī. 30 Xawe xoasa matis ra mî? “ǂHāǂui ǃgāsa ǁîs di ôab ǀkha; ǃgās di ôab ge ǃnorasas di ôab ǀkha tātsē ǀumi tide xuige,” ti. 31 ǁNā-amaga, ǃgâsado, ǃgās di ôa tamada, tsî da a ǃnorasas di.
Gagasi xūna ǀō-aisase ôaǃnâs
(Galateǁîn 4:6) Tsî ǀgôa du a amagab ge Eloba ǁîb Ôab di Gagaba sadu ǂgaogu ǃnâ ge sî, ǁîb Abba ti îtse, ti ra ǂgaiba.
w09-E 4/1 13
ǂAn i du go i?
Jesuba tae-i ǃaroma ǀgores ǃnâ Jehova “Abba ti îtse” ti ge ǂgai?
Siriaǁîgowab mîs ʼab·baʼʹ di hâs ge “ti îtse” tamas ka io “ti ǁgûtse” di ra ǂâibasen. Hoa ǃnona ǃnādi ǃnâs ge nē ǁgâiǂuisen ǀgauba xoadi ǃnâ hâ tsîs ge nēsa ǀgores ǃnâs tsîna ra sîsen-ūhe, ǀhommi di ǁgûb Jehovab ǃoa ra ǁnaeǁgause. Nē mîsa mâ ǀō-aisa ǂâibasensa ūhâ?
The International Standard Bible Encyclopedias ge ra mî: “Jesub ge tsēkorobe ǃhoa ǀgaub ǃnâ ʼabbāʼ di hâ mîsa gere sîsen-ū, nēs ge ǀgū ǀhōsagusis tamas ka ion ǀgôana ǁgûba ra ǁgau ǃgôasib ase gere sîsen-ūhe.” Nēb ge ǃgôasiba ǁgaus ase gere sîsen-ūhe tsî nēs ge ǂgui mîdi di ǀguis hînan ge ǀgôarona ǂgurose gere ǁkhāǁkhāsensa. Jesub tsîn ge nēsa ǂgaob ǃgamsiba xu gere ǂgai ǁîb ǁgûb ǀkhāb gere ǃhoa o. Getsemanes ǃhanab ǃnâb ge Jesuba ǁōb nîs aiǃâ ǀgores ǃnâ Jehovaba “Abba ti îtse” ti ge ǂgai.—Markub 14:36.
“’Abba’ ti hâ mîsa Eloba ǃoa sîsen-ūs ge Jodeǁîn ǂkhanin hîna Greco-Romani ǃnâ hân ǃoagu ǃgôasioǃnâsiba Eloba ǁgaus ǀkha ra ǀgopeǀnōhe” dis ge ǀnî ôaǃnâsa ra mî. Xawe “Jesub ge nē mîsa ǁîb ǀgores ǃnâ gere sîsen-ū o, ob ge gere ǁgau ǁîb Elob ǀkha ǀgū tsî ǀgaisa ǀhōsagusisa ūhâsa.” Tsî nau ǀgam ǃnāra nē mîs “Abba” di hâs Xoadi ǃnâ ra sîsen-ūhes ge Apostel Paulub ge xoa ǂkhanidi ǃnâ ra hō-e. Tsîs ge ǁnās tsîna ra ǁgau ǂgurokham ǁaeb Xristeǁîn ge nē mîsa ǀgoredi ǃnâ gere sîsen-ūsa.—Romeǁîn 8:15; Galateǁîn 4:6.
(Galateǁîn 6:17) ǃAruǀî a-i khoe-i xare-e tita tā ǁnora; tita ge ǃKhūb Jesub di ǀhapin saode ti soros ǃnâ ra tani xuige.
w10-E 11/1 15
ǂAn i du go i?
Apostel Pauluba tae-e gere ǂâibasen mîb ge o ǁîb “ǃKhūb Jesub di ǀhapin saode” tani hâ di?—Galateǁîn 6:17.
▪ Apostel Paulub mîdi ge ǀnîsi ǂguiǃnâgu ǂâibasende ǂgurokham ǁaeb Xristeǁîna ga ūba hâ. Aiǁgause, ǃkhōsis ǃnâ ge hâ i khoen ge ǀgamsa khaura ǀurib ǀkha gere saohe aiǁgause, tempels xūna gere ǃgari khoen tsî ǃhūsabe ǃgān tsîna. Khoen ai i ge nē saosa gere sîsen-ūhe o, o i ge ǃgôasioǃnâsib saos ase gere mûhe.
Xawe i ge nē saode hoaǁae ǁgai ǀgaub ǃnâ ge mûhe tama hâ i. ǂGui khoen ge nēsa ǃhaos tamas ka io ǂgoms di ǁanin ase ǁgausens ǃgao gere sîsen-ū. Theological Dictionary of the New Testaments ge ra ǁgau, “Siriaǁîn ge Hadad tsî Atargatis elogu di ǃoaba-aon ase ǁgausens ǃgao, ǁîn ǃomǃaros tamas ka io ǃaob ai anis ǂais khami i ǂgaboba gere khau. Nēs ge Dionysus ǂgomsabe-i ases tsîna.
ǂGui ǂhôa-aon ge gere mî Paulub ai ge hâ i saodi ge khoen xab ge aoǁnâ sîsenni ǃnâ gere ǂnauhesa xu a ǃaromahe di. (2 Korinteǁîn 11:23-27) Xaweb ge Pauluba gere mî, nēs ǁîba Xristeǁî-i ase ra ǁgau di.
Elobmîs khomais ǃâs
(Galateǁîn 4:1-20) Tsî ta nēsa ra mî: ǀUmi-ao-i a ǀgôa hîa i ge ǃgā-e xu ǀgorahe tama hâ, xūn hoan di ǀhonkhoe i a xawe; 2 tsî i ge kaikai-aogu tsî mûǂamaogu ǃnaga mâihe hâ, ǁgûb xa mîmâihe hâ ǁaeb kōse. 3 ǁNās ǁkhās xase ǁkhāti sada, ǀgôada ge i ǃnubai da ge ǃhūbaib di tsoatsoa-ain ǃnâ ǃgādīhe ge hâ i; 4 xawe ǁaeb ge ǀoao, ob ge Eloba ǁîb di Ôaba ge sî, tara-e xu ge ǃnaeb, tsî ǂhanub ǃnaga ge dīheba, 5 ǁnān ǂhanub ǃnaga hânab nî ǁamaǂuise, sada nî ǀgôasisa hōga. 6 Tsî ǀgôa du a amagab ge Eloba ǁîb Ôab di Gagaba sadu ǂgaogu ǃnâ ge sî, ǁîb Abba ti îtse, ti ra ǂgaiba. 7 Ots ge ǃaruǀî ǃgā tama hâ, ots ge a ǀgôa; tsî ǀgôats kao, ots ge ǁkhāti a Elob di ǀumi-ao Xristuba xu. 8 Tsî Eloba du ge ǂan tama hâ i ǃnubai du ge ǁnāgu ǂūsiba xu elo tamaga gere ǃoaba; 9 xawe nēsi, Eloba du a ǂan ǃnubai, ā nēs ǃgâ-ai kais: Elob xa du mûǂanhe hâ ǃnubai, mati du kha ǁkhawa ra ǃhoba ǁnā ǂkhabusa tsî ǁkhoatsama tsoatsoa-ain, ǀasa-ame du ǁkhawa ra sîsenba ǂgaon ǃoa? 10 Tsēde du ra tsēdī, tsî ǁkhâgu, tsî ǁaegu, tsî kurigu tsîna. 11 ǃAoba du ta ra, ǀnîsi ta nî ǁause sadu tawa sîsen hâ ǃkhaisa. 12 Tita khami ī re; sadu khami ta ǁkhāti ī xuige. ǃGâsado, ǂgan du ta ra; tsū xū-e du kom tita dī tamao. 13 Tsî du ge a ǂan, ǁgans di ǂkhabusasib ǃnâ ta ǂguro ǃnāsa ǃgâiǂhôasa gere aoǁnâba dusa; 14 tsî du ge ǃharaxū tama tsî ǃkhāǃkhā tama ge i ti ǃâitsâb, ǁgans ǃnâ ge hāba teba; xawe du ge Elob di ǀhomǃgā-i ase, ā, Xristub Jesub ase ge ǃkhōǃoa te. 15 Tarebe ǃgâiǃōsi-e du ǁnāǃnubai ge ūhâ i? ǃKhō-amba du ta ra, īǁkhā i ga io, o du ga sadu mûde ǁhoroǂui tsî du ga ǁîde tita mā hâ. 16 Sadu khākhoe kai ta ge, amaba ta ge mîba dus ǀkha? 17 Sadu ǂama gu ra tau ǃgâi dommi ai tama i, tsî gu ge sado ǂgaebē ǂgao hâ, î du ga ǁîgu ǃaroma tau ti. 18 ǁGūbasens ge a ǃgâi, hugaǀgui i ga ǃgâi xū-i ǃaroma īo, tsî sadu ǀkha ta hâ ǁaeb ǀguib ai tama. 19 Ti ôarodo, ǁkhawa ta tsûb ǀkha ra ǁorado, Xristub nî sadu ǃnâ īsi-e hōs kōse! 20 O ta ǂgao hâ, nēsi sadu tawa hâ tsî ta ga ti domma ǀkharaǀkhara ǁkhā; sadu ǂama ta ra îganǀgē xui-ao.
JUNIB 10-16
ELOBMISA XU HÂ ǂÛǂÛSA MÎDI | EFESEǁÎN 1-3
“Jehovab ǂgaeǂguis [ǀhaoǀhaos] tsî ǁîb sîsengu”
(Efeseǁîn 1:8, 9) ǃnāǂamsase sada ǂama ge hāba gā-aisib tsî ǁnâuǃāb hoab ǃnâ; 9 sada ǂanǂan hâǃâ ǂganǃgâsib ǁîb ǂâis diba, ǁîb di ǃgâiǃgâibasensa ǃoa, ǁîb ǂûb ǃnâb ge ǂâibasensa,
it-2-E 837 ¶4
ǂGanǃgâsib
Mesiab Gaosib. Paulub ge ǁîb xoadi ǃnâ Xristub xa hâ amaba ge ǂhaiǂhai. Efeseǁîn 1:9-11 ǃnâb ge Eloba ‘ǂganǃgâsiba’ ǁîb ǂâis xa ra ǂhaiǂhai, mî rase: “ǁîb di ǃgâiǃgâibasensa ǃoa, ǁîb ǂûb ǃnâb ge ǂâibasensa, ǁaegu ǀoasib diga ǂhomisa ǃoa xūn hoanab nî ǀgui danab ǃnâ ǃkhōǀhaose: Xristub ǃnâ, ǀhommi ǃnâ hân kas, ǃhūbaib ai hân kas hoasa. ǁÎb ǃnâ da ge ǁkhāti ǀumixū kaihe, sada aiǂnûiǂgāhe hâda, ǁnāb, xūn hoana ǁîb ǂâis di ǀapeǀapes ǃoa ra dīb di ǂâibasensa ǃoa.” Nē ‘ǂganǃgâsib’ ge Gaosiba ǃkhōǂgā hâ, Mesiab Gaosiba. Paulub ra ǁnaeǁgau “ǀhommi ǃnâ hân” ge Elob Gaosiba nî ǀumin xa ra ǃhoa, Xristub ǀkha ǀguiba. Tsî “ǃhūbaib ai hân” ge ǃhūbaib ai ǀamose nî ûin xa ra ǃhoa. Jesub ge ǁîb ǁkhāǁkhāsabegu ǀkhab gere ǃhoa o, o Gaosib ǂganǃgâsib xa gere ǃhoa, mîb ge o: “Sadu ge Elob Gaosib di ǂganǃgâsiga māhe hâ.”—Mrk. 4:11.
(Efeseǁîn 1:10) ǁaegu ǀoasib diga ǂhomisa ǃoa xūn hoanab nî ǀgui danab ǃnâ ǃkhōǀhaose: Xristub ǃnâ, ǀhommi ǃnâ hân kas, ǃhūbaib ai hân kas hoasa.
w12-E 7/15 27-28 ¶3-4
“ǀGui Jehovab” ge ǁîb omarisa ra ǀhaoǀhao
3 Moseb ge Israelǁaesa ge mîba: “ǃKhūb [Jehovab, NW] sa Elob ge a ǀgui ǃKhū.” (Deu. 6:4) Jehovab ra dī xūn tsî ǁîb ǂâibasens tsîn ge a ǀguiǃnâxa. ǁNās ǀkhab ge Eloba “ǁaegu ǀoasib” dīgu aiǃâ sîsenga ge “ǃkhōǀhao”, nau mîdi ǃnâ ǁîb di kurusa ge ǀguiǃnâxa kai. (Khomai re Efeseǁîn 1:8-10.) Nē ǃkhōǀhaos ge ǀgam ǃâgu ǃnâ nî dīhe. ǂGuro ǃâb ge ǂkhauhesana ra aiǂhomi ǀhommi ǃâubasens ǃgao, Jesub Xristuba ǁîn Danab ase. Nēs ge ǀnai Pinkstertsēs ai 33ǁî kurib ǃnâ ge tsoatsoa, Jehovab ge Xristub ǀkha sī ǀguiba nî ǃoaba khoena a ǁhûi o. (ǃNaeǃkhaidi 2:1-4) ǂKhauhesan ge Xristub di Xoremarib ǁguibas ǃnâ-ū ǂhanu-aise ge ǀgoraǃgâhe tsîn ge ǁîna ‘Elob ǀgôan’ ase ra mûǂansen.—Rom. 3:23, 24; 5:1; 8:15-17.
4 Tsî ǀgamǁî ǃâb ge ǁîn hîna Paradais ǃhūbaib ai ǀamose Xristub di Gaosib ǃnāga nî ǁanan ǃoa ra ǁnaeǁgau. “Kai ǂnubis” ge nē ǃâba ra kuruǂui. (J.ǂHa. 7:9, 13-17; 21:1-5) Tsîn ge duisend kurigu di ǂgaeǂguis ǃnâ ǁîn hîna khâisa ra hōna nēna nî ǁhao. (J.ǂHa. 20:12, 13) Mûnan-ai re matis, nē khâisa ǀguiǃnâxasiba nî ǁgau ǀgausa. Tsî duisend kurigu khaoǃgân ge “ǃhūbaib ai hân” hoana ǀuniga ǃâitsâsa nî hōǃâ. ǁÎn hîna ǂgomǂgomsase ra mâǁapon ge “Elob ôan” ase nî ǂgaihe.—Rom. 8:21; J.ǂHa. 20:7, 8.
Gagasi xūna ǀō-aisase ôaǃnâs
(Efeseǁîn 3:13) ǁNā-amaga ta ra ǀkhoma, ti tsūǀkhāgu, sadu ǃaroma ra hāǂam te gu, sadu di ǂkhaisise īgu ǃnâ du ǂkhabuǂâi kaihe tide ǃkhaisa.
w13-E 2/15 28 ¶15
Tā i xū-e ǁkhaedu Elob ǂhaisib xa tsâǀkhāhes ǃnâ
15 Jehovab ǂâisa dīs ǃnâ da ga mâǀgai o, os ge ǁnāsa nauna nî hui în Elob ǂhaisib xa tsâǀkhāhe. Efesus ǃnâ hâ ǀhaohâba ǃoab ge Pauluba ge xoa: “ǁNā-amaga ta ra ǀkhoma, ti tsūǀkhāgu, sadu ǃaroma ra hāǂam te gu, sadu di ǂkhaisise īgu ǃnâ du ǂkhabuǂâi kaihe tide ǃkhaisa.” (Efe. 3:13) Mâǀgaub ǃnâ gu ge Paulub di ǁgâiǀkhāga ‘ǂkhaisase’ ī Efeseǁîn aiǃâ? Paulub di ǀgaugu hînab ge ǁkhoase gere aoǁnâgu tsîb ge ǃgomsigab gere hōǃâ xawe Efeseǁîna ge ǁgau ǁîn Xristeǁîn ase ūhâ ǁgui-ais a ǀgapi tsî ǃgôahesa anuhâsa. Paulub ga ǁgâiǀkhāgu ǃnâ mâǁnasen hâ o, os ga ǁnāsa ǁgau tama hâ ǁîb Jehovab ǀkha ūhâ ǀhōsagusis, aoǁnâ sîsenni tsî ǃâubasens tsîna ǃgôaǃnâ tama hâsa? Paulub di mâǁapos ge ge ǁgau ǁîb Xristeǁî tsî ǁkhāǁkhāsabesis tsîn ǃgao ǁguibasa dīsa ra ǃgôaǃgâsa.
(Efeseǁîn 3:19) tsî du nî mûǂanse ǂansa ra īǂam ǀnammi Xristub diba, mâ ǀoasib Elob dib hoab ǀkha du nî ǀoaǀoahese.
cl-E 299 ¶21
“ǀNammi Xristub diba” ǂan re
21 Grikegowab mîs “ǂan” di hâs ge “hoaǃnâ-aixase ǂans” di ra ǂâibasen. Jesub khami da ga ǁîǀnamsenxa tama i, khoexaǃnâse khoen ǂhâsiga kôǃgâ tsî ǂgaoba xu ga ǀûba o, o da ge ǁîb tsâsiba ǃgôaǃgâsiba ra ǁgau. Nē ǀgaub ǃnâ da ge “mûǂanse ǂansa ra īǂam ǀnammi Xristub diba, mâ ǀoasib Elob dib hoab ǀkha.” Tsî ǂâis ǃnâ da ge nî ūhâ, Xristub khami da ga ī o, o da ge Jehova Elob ǀgūse nî tsâ.
Elobmîs khomais ǃâs
(Efeseǁîn 1:1-14) Pauluta, Jesub Xristub di apostelta, Elob di ǂâisa xu, Efesus ǃnâ hâ ǃanun, tsî Xristub Jesub ǃnâ ǂgom hân ǃoa: 2 ǀKhomma ab hâǀkhā du, tsî ǂkhîba Elob sada îba xu tsî ǃKhūb Jesub Xristuba xu! 3 Ab Eloba karehe sada ǃKhūb Jesub Xristub Îb, sada gagasi ǀkhaexūn hoan ǀkha ge ǀkhaeba ǀhommi din ǀkha Xristub ǃnâ. 4 Sadab ge ǁîb ǃnâ ǃhūbaib di ǃgaoǃgaohes aiǃâ ǃkhōǂuibasen khami, ǃanu tsî da nî ūose īse ǁîb aiǃâ ǀnammi ǃnâ; 5 sîb ge sada ge aiǂnûiǂgā, ǁîb ǂûb di ǀgôase da nî Jesub Xristub ǃnâ ǃkhōǃoahese, ǁîb ǂâis di ǃgâiǃgâibasensa ǃoa; 6 ǁîb ǂkhaisa ǀkhommi nî karehese, ǁîb ǀkhab ge sada ǀkhomxaǂgaoba ǀnamǀnamsa ǀGôab âb ǃnâ; 7 ǁîb ǃnâ da oresa ūhâ ǀaob âba xu: ǁOren di ǀûbasa, ǁîb ǀkhommi di ǃkhūsib ǃoa, 8 ǃnāǂamsase sada ǂama ge hāba gā-aisib tsî ǁnâuǃāb hoab ǃnâ; 9 sada ǂanǂan hâǃâ ǂganǃgâsib ǁîb ǂâis diba, ǁîb di ǃgâiǃgâibasensa ǃoa, ǁîb ǂûb ǃnâb ge ǂâibasensa, 10 ǁaegu ǀoasib diga ǂhomisa ǃoa xūn hoanab nî ǀgui danab ǃnâ ǃkhōǀhaose: Xristub ǃnâ, ǀhommi ǃnâ hân kas, ǃhūbaib ai hân kas hoasa. 11 ǁÎb ǃnâ da ge ǁkhāti ǀumixū kaihe, sada aiǂnûiǂgāhe hâda, ǁnāb, xūn hoana ǁîb ǂâis di ǀapeǀapes ǃoa ra dīb di ǂâibasensa ǃoa; 12 ǁîb ǂkhaisib di koas ǃoa da nî īse, sada Xristub ai ge ǂgomaiǂnûida. 13 ǁÎb ǃnâ du ge ǁkhāti sado hâ, mîs amab disa du ge ǁnâus khaoǃgâ, sadu ǃgâiǃōsib di ǃgâiǂhôasa; ǁîb ǃnâ du ge ǁkhāti ǂgom du ges khaoǃgâ ge ǀgaiǀgaihe ǃAnu Gagab mîmâis dib ǀkha; 14 ǁîb ge mâiǁkhaeb sada ǀumis diba, ǁîb dinab nî orese, ǁîb di ǂkhaisib nî koahese.
JUNIB 17-23
ELOBMÎSA XU HÂ ǂÛǂÛSA MÎDI | EFESEǁÎN 4–6
“Hoaraga ǁâtanin Elob dina ana”
(Efeseǁîn 6:11-13) ǁÎb ǃnâ da ge ǁkhāti ǀumixū kaihe, sada aiǂnûiǂgāhe hâda, ǁnāb, xūn hoana ǁîb ǂâis di ǀapeǀapes ǃoa ra dīb di ǂâibasensa ǃoa; 12 ǁîb ǂkhaisib di koas ǃoa da nî īse, sada Xristub ai ge ǂgomaiǂnûida. 13 ǁÎb ǃnâ du ge ǁkhāti sado hâ, mîs amab disa du ge ǁnâus khaoǃgâ, sadu ǃgâiǃōsib di ǃgâiǂhôasa; ǁîb ǃnâ du ge ǁkhāti ǂgom du ges khaoǃgâ ge ǀgaiǀgaihe ǃAnu Gagab mîmâis dib ǀkha;
ǂKhamkhoedo ǁGâuaba mâǃoa re
APOSTEL Paulub ge sida Xristeǁî ûiba toroǃkham-aogu hîna ǃomdi ǀkha ra ǃkhamgu ǀkha ge ǀgopeǀnō. Sida ǃkhams a gagasi ǃkham, xawes tsîna î ge sida khākhoena a ama. Satanni tsî demongu tsîn ge ǂansa ūhâ ǃkham-aoga. Sida ge ǃâubasensa ūhâ tama hâ khami a mûsen ǁkhā. ǂKham Xristeǁîn tsîn ge huihe ǁoasase a mûsen ǁkhā. Matin ǁîna ǁgai gagaga xu dansa a hōǁkhā? ǂKhamkhoen ge a dan ǁkhā. Tae-i ǃaroma? ǁÎn “ǃKhūb ǃnâ ǀgai, tsî ǁîb ǀgaib di ǁkhāsib ǃnâ” ra ǃgû amaga. Xawen ge Elob ǀgaiba xu ǀgui ǀama tama hâ. ǁÎn ge ǃkhams ǃgao aiǂhomisen hâ. Toroǃkham-aogu khamin ge “hoaraga ǁâtanin Elob dina ana” hâ.—Khomai re Efeseǁîn 6:10-12.
(Efeseǁîn 6:14, 15) Mâ ǁnâi re, î du kamanagu âdo amab ǀkha ǃgaeǂnami, î du ǁkhaib ǁâsarab ǂhanu-aisib diba ana; 15 î du ǂaide ǂgaeǂgā māsenxasib ǂkhîb ǃgâiǂhôas dib ǀkha.
ǂKhamkhoedo ǁGâuaba mâǃoa re
4 ǁNās ǁkhās khami î ge amab hîna da Elobmîsa xu ra ǁkhāǁkhāsena ra hui da gagasi ǁkhōǁkhōsasiba xu tsî ama tama ǂgomdi ra ǁkhāǁkhā xūna xus tsîna. (Jhn. 8:31, 32; 1Jhn. 4:1) Amaba da ra ǀnam khami î ge ‘ǁkhaib ǁâsaraba’ anasa ra supu tsîs ge ǁnāsa ra dī î da Elob ǁgaragu ǃoagu ûi. (Psa. 111:7, 8; 1Jhn. 5:3) Elobmîsa xu hâ amaba da ga ra ǁnâuǃā o, o da ge sida mâǃoa-aona nî mâǃoa ǁkhā.—1Pet. 3:15
7 Nēs ge kaise ǃgâi ǂkhōs hîna ra ǁgausa Jehovab sida ǂgaoga nî ǁkhaubasa. (ǂKhm. 4:23) Toroǃkham-aogu ǀurib ǀkha a kurusa ǁâsaraba ǃkhōǃkhuni ǁoa khami da ge sida tsîna Jehovab ǁgaragu tae-i a tsūs tsî ǃgâis tsîn diga a ǃkhōǃkhuni ǁoa. Sida ge ǀoasa kurusa ūhâ tama hâ tsî ǁnā-amaga a ǀgoraǃgâsen ǁoa. (ǂKhm. 3:5, 6) Hoaǁae da ge nî ôaǃnâsen î da kō sida ‘ǁâsarab’ ǃgâise hâsa.
10 Romeǁî toroǃkham-aogu ge ana hâ i ǁharon ge ǁîga ǃkhams ǃnâ gere hui. Xawe Xristeǁîn ra ana ǁharon ge ǁîna ra hui în ǂkhîb di ǂhôasa khoen ǃoa ī-ū. (Jes. 52:7; Rom. 10:15) Xawes ge nēsa ǁkhoaǂgaosiba ǂhâ hâ. “Ti ǀhōsan ǀkha skoli ai ǃhoasa ta ge gere ǃao.” Dib ge Bo di ǀon hâ ǃgâsab hîna a 20 kurixaba ra mî. “Tita ge gere tao. Kō-oa ta ra o, o ta ge a ǀū tae-i ǃaroma ta gere taosa. Nēsi ta ge ti ǀhōsana ra aoǁnâba.”
(Efeseǁîn 6:16, 17) Î du nēn hoan ǂamai khōsikhōb ǂgoms diba ǃkhōbasen, ǁîb ǀkha du ǀaexa ǂāgu ǂkhabab digu hoaga a ǀari ǁkhāba; 17 î du toroǀgapas ǃgâiǃōsib disa ū, tsî Gagab di gôab, ǁnāb ge a Elob mî.
ǂKhamkhoedo ǁGâuaba mâǃoa re
13 ǀNî “ǀaexa ǂāgu” hînab Satanna ra sîsen-ūn ge ǂhumiba sida Jehovab xa mîbasa. ǁÎb ge ra mî Jehovab ge sida ǀnam tama hâ di. Ida di ǀon hâ ǃgâsas ge a 19 kurixa tsî ra ǃgôaǁnâsen. ǁÎs ge ra mî: “Tita ge Jehovab ti ǀgūse hâ khami tsâ tama hâ tsî ǁîb ti ǀhōsa kai ǂgao tama hâ khami ra tsâ.” ǁÎsa nē tsâsiga mati nî mâǃoa? “ǀHaodi ge ti ǂgomsa ra omkhâi” dis ge Ida sa ra mî. “Tita ge ǀhaodi tawa ǂnûs ǀguisa gere dī, khoe-i tita ra mî xū-e ǃgâ tide di ta ge gere ǂâi. Nēsi ta ge ǀhaodi ǃgao ra aiǂhomisen tsî ǀgam tamas ka io ǃnona ǃnāde ra ǃeream. Kaise î ge a ǃgom xawe ta ge ǁnās khaoǃgâ ǃgâise ra tsâ. ǃGâsan tsîn ge ra ǂkhâǃnâ te. Tita ge ǀhaodi khaoǃgâ ǃgâise ra tsâ tsî a ǂan Jehovab a ǀnam te ǃkhaisa.”
16 ǀGapas ǃkham-aob di ǂkhûsa ra ǁkhauba khami î ge ‘ǃâubasens ǀgapasa’ sida ǂâi ǀgauba ra ǁkhauba. (1Tes. 5:8; ǂKhm. 3:21) ǃÂubasens ge ra hui da î da Elob mîmâidi ai ǂgomaiǂnûi tsî ǃgomsina ǃgâi ǀgaub ǃnâ sîsenǂam. (Psa. 27:1, 14; ǃNǃkh. 24:15) Sida ‘ǀgapas’ ǃgâi sîsenǂuiba nî ūhâsa da ga ra ǂgao o, o da ge ǁîsa hoaǁae sida danas ai nî ǀgapa.
20 Paulub ge Elobmîsa gôab ǀkha ra ǀgopeǀnō. Sida ǂgoms ǃgao da ga mâǃoahe o, o da ge sida ǂâi ǀgauba nî ǁkhauba, mîsa ǃgâise sîsen-ūs ǃnâ-ū. (2Kor. 10:4, 5; 2Tim. 2:15) Mati du sadu ǀgauga a ǃgâiǃgâi ǁkhā? Sebastiani hîna a 21 kurixab ge ra mî: “Tita ge ti Elobmîs khomaisa ta ra dī ǁaeb hoab ai, ǀgui ǁaraǃāsa ra xoa mâi. Nē ǀgaub ǃnâ ta ge tita ra tsâǀkhā xoade ra ǀhaoǀhao. Tsîs ge nēsa ra hui te î ta Jehovab ǂâi ǀgauba ǁgae.” Danieli hîna ǃkharu go xoaǀgoradi ǃnâ a xoasab ge ra mî: “Elobmîsa ta ra khomai khami ta ge xoadi hîna aoǁnâ sîsenni ǃnâ a hui te ǁkhā te ra ǀhaoǀhao. Mû ta ge ra matin khoena ra ǃgâ ǀgauba, Elobmîsa xūts ga ǁîna a khomaiba o tsîn ge nēs ǃnâs tsîna ra mû sats matikōse Elobmîsa a ǀnamsa.”
Gagasi xūna ǀō-aisase ôaǃnâs
(Efeseǁîn 4:30) Î du Elob di ǃAnu Gagaba tā ǃoaǃoa, ǁîb ǀkha du ǂganamǀgaiǀgaihe hâba, ores di tsēs kōse.
it-1-E 1128 ¶3
ǃAnu gagab
ǃAnu gagab. Jehovab ǀgaib tamas ka io gagab ge ǁîb xa ra ǂgaeǂguihe tsî ǁîb ǂâisa ra dīǀoaǀoa. Nē gagab ge ǃanu tsî ǃgâi sîsengu ǃgao Elob xa ra sîsen-ūhe ǁnā-amaga “ǃanu gagab” tsî “ǃanuǃanusis di Gagaba” di ra ǂgaihe. (Psa. 51:11; Luk. 11:13; Rom. 1:4; Efe. 1:13) ǃAnu gagab hîna khoe-i ǃnâ ra sîsen i ge ǁî-e ra ǁgari ī-î ǃanu. ǀUrixa tsî ǁgai sîsengu ge nē gagaba ra mâǃoa tamas ka io ra “ǃoaǃoa”. (Efe. 4:30) Nē gagab ge khoe-i khami ī tama hâ xawe Elob ǃanu īsiba ra ǁgauǂui, ǁnā-amaga a ‘ǃoaǃoahe’ ǁkhā. Tsūdīs ge ‘Gagaba ra ǀari.’ (1Tes. 5:19) Tsūdīgu ga aiǃgû ūhe o, ob ge Elob ǃanu gagaba a ‘tsûtsûhe’ ǁkhā. Tsî nēs ge nî ǃaroma îb Eloba tsūdī ra khoe-i di khākhoe kai. (Jes. 63:10) Khoe-i hîna Elob ǃanu gagaba ra ǃoaǃoa i ge nē gagaba ǃkhāǃkhā ǁkhās tsîna i. Jesub Xristub ge ge mî nē ǁoreb ge ǀûbahe tide, nēsis tsî ǃgôaxa ǁaeb tsîn hoan ǃnâ.—Mat. 12:31, 32; Mrk. 3:28-30; mû re GAGAB ti hâ ǃâba.
(Efeseǁîn 5:5) Nēsa du nî ǂan xuige, ǀai-ao-i karao, ǃanuoǃnâ-i karao, xūǃgunuxa-i, ǁî-i ǁgôatsuiǁgoaǃoaba-ao-i karao i Xristub tsî Elob di gaosib ǃnâ ǀumi-amǃnâ-e ūhâ tama hâ ǃkhaisa.
it-1-E 1006 ¶2
Xūǃgunuxa
Dīgu ǃnâ a ǃgāsa. Xūǃgunuxasib ge khoe-i di ǁgai tsî ǃkhō-oasen ǁoa turagu ǃnâs tsîna ra mûǃāhe. Jakobub ge ge xoa ǁgai turagu ga ǂûtani o, ob ge ǁoreba ra ǁora. (Jak. 1:14, 15) ǁNās ǃaroma i ge xūǃgunuxa khoe-e ǁî-i dī xūn ai ra mûǃāhe. Apostel Paulub ge ǁnā-amaga ge mî xūǃgunuxa khoe-i a ǁgôatsuiǁgoaǃoaba-ao di. (Efe. 5:5) Nē xūǃgunuxa khoe-i ge ǁî-i turaga ra elo dī, Kuru-aoba-i nî ǃoabas xa.—Rom. 1:24, 25.
Elobmîs khomais ǃâs
(Efeseǁîn 4:17-32) O ta nēsa ra mî tsî ǃKhūb ǃnâ ra ǃkhō-am, ǃaruǀî du tanisen tide ǃkhaisa, nau ǀūben ra ǁîn di ǁau ǂâis ǃnâ tanisen khami, 18 ǁnâuǃāb ân ǃnâ ǃkhae hân, Eloba xu hâ ûiba ǃhaokhoese īban, ǀūsib ǁîn ǃnâ hâba xu, ǁîn ǂgaob di karokarosens ǃaroma, 19 ǁîn karokarosensa xu ǁî-aitsama ǁgaiǁgaisana ge māǁnâsenn, ǂguiǃnâgu ǃanuoǃnâ dīgan nî turaxase dīse. 20 Xawe du ge sado Xristuba ǁnāti ǁkhāǁkhāsen tama hâ; 21 ǁîba du ga ǁnâu, tsî ǁîb ǃnâ ǁkhāǁkhāheo, Jesub ǃnâb amaba hâ khami: 22 ǁGuiǁnâ du nîga aibekam tanisens ǃoa ǀoro khoeb, ǂgaeǂhapu ra turagu xa ra ǁgaoǁgaosenna; 23 tsî du nî ǀasakaisenga sadu ǂâis di gagas ǃnâ; 24 tsî du nî anaga ǀasa khoeb, Elob ǃoa kuruhe hâba ama ǂhanu-aisib tsî ǃanusib ǃnâ. 25 ǁNā-amaga ǂhumiba ǁguiǁnâ, î du amaba ǃhoa mâ-i hoa-e ǁî-i di ǀgūkhoe-i ǀkha; uniǁaebagu da a xuige. 26 ǁAixa, î xawe tā ǁore; as soresa sadu ǁaixasib hâ hîa tā ǂgâ. 27 Î du ǁgâuaba tā ǃkhai-e mā. 28 ǃNari ge-e, a-i ǃaruǀî tā ǃnari, î-i ǃomkha ǀkha ǃgâi xū-e sîsen, ǂhâsib ǃnâ hâ-e i nî au ǁkhāse. 29 Î du ǀurisa mî-i xare-e sadu amsa xu tā ǂoa kai; î du ǃgâi mî-i ǂnubikhâigusa ǃoa ǂhâbasa-e ǂoa kai, ǁnâu ran nî ǀkhomma hōse. 30 Î du Elob di ǃAnu Gagaba tā ǃoaǃoa, ǁîb ǀkha du ǂganamǀgaiǀgaihe hâba, ores di tsēs kōse. 31 Hoa au-ausens, tsî ǁaixasib, tsî ǁaib tsî ǃaugus, tsî ǃkhāǃkhāgus tsîna, an sado xu bē ǂkhabasib hoab ǀkha. 32 Î du khoexagu tsî ǀkhomxagu, î du ǀûbagu, Elob ge ǁkhāti sado Xristub ǃnâ ǀûbas ǁkhās khami.
JUNIB 24-30
ELOBMÎSA XU HÂ ǂÛǂÛSA MÎDI | FILIPEǁÎN 1-4
“Xū-i xare-i xa tā ǂhansen”
(Filipeǁîn 4:6) Xū-i xare-i xa tā ǂhansen, î du xūn hoan ǃnâ sadu ǂgande ǀgores tsî ǀkhomas tsîra ǃnâ gangans ǀkha Elob aiǃâ ǂhaisa kai.
w17.08-E 10 ¶10
“Elob di ǂkhîb, ǁnâuǃāb hoaba ǃnā hâba”
10 Tae-e nî huida î da tā ǁnātikōse ǂhansen tsî ‘Elob di ǂkhîba’ hōǃâ? Paulub ge Filipeǁîn ǃoa a xoa mîdi ge ra ǁgau, ǂhansen da ga ǁaeb ai da nî ǀgoresa, nēs sōǀôa-i khami ī amaga. ǁNās ǀkha da ge ǂhansenda ga ǁaeb ai nî ǀgore. (Khomai re 1 Petrub 5:6, 7) ǀGore da ga ǁaeb ai da ge nî ǂgom Jehovab nî kōǃgâda ǃkhaisa. ǁÎb ǃoa “ganganxa” ǂgaob ǀkha ǀgore re, tā sadu ǀkhaega ǀuru. Sada ǁîb ǃnâ ūhâ ǂgomǃgâsib ge nî ǀgai, ǂâis ǃnâ da ga ūhâ o ǁîb “hoana ǃnāǂamsase a dī ǁkhāb, sada ǃnâ ra sîsen ǀgaib âb ǃoa.”—Efe. 3:20.
(Filipeǁîn 4:7) Tsî Elob di ǂkhîb, ǁnâuǃāb hoaba ǃnā hâba, ab sadu ǂgaogu tsî ǂâidi tsîna Xristub Jesub ǃnâ sâu.
w17.08-E 10 ¶7
“Elob di ǂkhîb, ǁnâuǃāb hoaba ǃnā hâba”
7 ǃGâsan ge Paulub sîǂkhanisan ge Filipis ǃnâ a khomai o, o ǁîb ǀkha ge īn xa ge ǂâihō, ǁîn ge ǂgom tama hâ i amaga Jehovab Pauluba mati nî kōǃgâsa. Pauluba tae-e ǁîna gere ǁkhāǁkhā? ǀNî mîdi ǃnâ: Tā ǂâiǂhansen. ǀGore, o du ge Elob ǂkhîba nî hō. Tsî ǂâis ǃnâ ūhâ re, ‘Elob di ǂkhîb, ǁnâuǃāb hoaba ǃnā hâ.’ Nēsa tae-e ra ǂâibasen? ǀNî ǂnûiǃkhunidi ge ra mî, “sada ǁhapodi hoade ǃnā hâ” tamas ka io “khoesib di ǂâi ǀgauba ǃnā hâ.” Paulub ge ǀnî mîdi ǃnâ gere mî, “Elob di ǂkhîb” a kai ǀgauba, mûnan-aihe ǁoase. ǁNās ǀkha khoesib mûǀgaub ǃoagu da ǃgomsigu di ǀamsa a mûǁoa xawe Jehovab ge ra mû tsîb ge ǁîba ǂgomhe ǁoana ra dī.—Khomai re 2 Petrub 2:9.
w17.08-E 12 ¶16
“Elob di ǂkhîb, ǁnâuǃāb hoaba ǃnā hâba”
16 Tae-e ra ī “Elob di ǂkhîb, ǁnâuǃāb hoaba ǃnā hâba” da ga hō o? Elobmîs ge ra ǁgau nes ‘sida ǂgaogu tsî ǂâidi tsîna nî sâusa Xristub Jesub ǃnâ.’ (Fil. 4:7) ǀNî gowab ǃnâs ge “sâu” di hâ misa torob ǃnâ ra sîsen-ūhe. Ne mîs ge toroǂnubidi hîna ǀgui ǃkhais ai ǀhao tsî ǃāsa ra ǃûide ǃoa ra ǁnaeǁgau. Filipes ge ge ǁnā ǃā i. Filipe ǃās khoen ge sâsase gere ǁom ǂanan ge ī amaga soldagu ǃāsa ra ǃûisa. ǁNās ǁkhās khami da ge sida tsîna “Elob di ǂkhîb” ǃnâ da ga hâ o, o ǂgaob tsî ǂâidi ǃnâs tsîna a sâsa. ǂAn da ge a Jehovab sida ǀkha ǁae hâsa tsî aiǃgû tanisa ǂhâba hâsa. (1Pet. 5:10) Nēsa ǂans ge ra hui da îda tā ǂâiǂhansen.
Gagasi xūna ǀō-aisase ôaǃnâs
(Filipeǁîn 2:17) Tsî sadu ǂgoms di ǁguibas tsî eloǃoabas ǃaroma ta ga ǁguibahe xawe ta ra ǃgâiaǂgao, tsî ta sadu hoadu ǀkha ra ǃgâiaǂgao.
it-2-E 528 ¶5
ǁGuibadi
ǂNâǁguibas. ǂNâǁguibas ge nau ǁguibadi ǀkha ǀguiba gere dīhe, aiǁgause nēs ge Israelǁîn ge Mîmâisa ǃhūb ǃnâ a ǂgâs khaoǃgâs tsîna ge dīhe. (Num. 15:2, 5, 8-10) Nēs ge ǂâu xûi-e (‘ǀgaisa xûiba’) ǃkhōǂgā hâ i hîna ge altars ai gere ǁhōǂuiheba. (Num. 28:7, 14; ǀgopeǀnō re Eks. 30:9; Num. 15:10.) Apostel Paulub ge Filipes ǃnâ hâ Xristeǁîna ge xoaba: “Sadu ǂgoms di ǁguibas tsî eloǃoabas ǃaroma ta ga ǁguibahe xawe ta ra ǃgâiaǂgao.” Nēbab ge ǂnâǁguibas di ǂkhōsa ge sîsen-ū, ǁgau rasa matib ge māsenxase ǁîb ǃgâsan ǃgao a māsensa. (Fil. 2:17) ǁÎb ǁōb aiǃâb ge Timoteuba ǃoa ge xoa: “Tita ǀnai ǂnâǁguibase ra ǁguibahe xui-ao, tsî orehe ta nîra ǁaeb ge a ǀgū.”—2Tim. 4:6.
(Filipeǁîn 3:11) î ta ga, īǁkhā i kao, ǁō hân di khâis tawa sī ti.
w07-E 1/1 26-27 ¶5
‘ǂGuro khâisa’—ǀAese ra ī
5 Sao rasen ge ǂkhauhesa ǃgâsan “Elob di Israeli” dina Jesub Xristuba nî ǁhao tsîn ge ǁîna “hugaǀgui ǃKhūb ǀkha” nî hâhâ. (Galateǁîn 6:16; 1 Tesalonikaǁîn 4:17) ǁNā ǁaxasib ge “ǁō hân di khâis” tamas ka io “ǂguro khâisa” di a ǂansa. (Filipeǁîn 3:10, 11; ǂHaiǂhais 20:6) ǁNā khâis khaoǃgân ge miluindi ǃnâ hâ khoena ǃhūbaib ai khâisa nî hō ǀamose ûis ǂâibasens ǀkha paradais ǃhūbaib ai. Nēsi da ga ǃhūbaib ai ǀamose ûis tamas ka io ǀhommi ǃâubasensa ga ūhâ xawe da ge hoada “ǂguro khâis” ǃnâ ǃgâiǃgâibasensa nî ūhâ. Nē khâisa mati ī? Tsî mâǁae i nî hā?
Elobmîs khomais ǃâs
(Filipeǁîn 4:10-23) Tsî kaise ta ge ǃKhūb ǃnâ ǃgâiaǂgao hâ i, tita xa du nî ǂâiǂâisense du ge ǁkhawa ǃnoaǂkhai ǃkhaisa; ǁîsa du gere ǂâibasen, xawe du ge ǃgâi ǁae-e hō tama ge i. 11 Tôasib xa ta nēsa mî tama; ǁkhāǁkhāsen ta ge xui-ao, hâǃnâ ta a īsib ǀkha ǂâusa. 12 ǃGamse hâsa ta a ǂan; ǃnāǂamse hâsa ta a ǂan; mâ xū-i hoa-i ǃnâ ta ǁkhāǁkhāhe hâ, ǁâs tsî ǃâsa, ǃnāǂamsase ūhâs tsî ǂhâb ǃnâ hâsa; 13 hoana ta a ǁkhā ǁîb, tita ra ǀgaiǀgaib, Xristub ǃnâ. 14 Xawe du ge ǃgâise ge dī, ti ǁgâiǀāb ǃnâ du ge tita ǀkha amǃnâxa ǃkhaisa. 15 Tsî sadu ǁkhāti a ǂan, Filipeǁîdo, ǃgâiǂhôas di tsoatsoas ǃnâ, Masedoniaba xu ta ge ǂoa ǃnubai i ge ǀnî ǀhaohâ-i xare-e māǂuis tsî ǃkhōǃoas ǃereamsa ǃoa tita au tama hâ isa, sadu ǀguidu. 16 Tesalonikas ǃoa du ge ǀguis xa ǃnāsa ǃnāde huiba ge sîba te. 17 ǀKhaexū-e ta ra ôa khami tama, xawe ta ǂû-e ra ôa, sadu ǃgôaǁnâs ǃnâ nî ǃnā-e. 18 Hoana ta ge ǃkhōǃoa tsî ta ǃnāǂamsiba ūhâ. Sado xu ra ǀkhīna ta ge Epafroditub ǀkha ǃkhōǃoao, ǃgâise ra ham ǁamab ase tsî ǃkhōǃoasa ǁguibas, Eloba a ǃgâibas ase. 19 Tsî ti Elob ge ǁîb di ǃkhūsib ǃoa sadu ǂhân hoana nî ǀoaǀoa ǂkhaisib ǃnâ Xristub Jesuba xu. 20 Ab sada Elob tsî ǁGûba ǂkhaisiba ūhâ ǀamosib hoab kōse! Amen. 21 Hoa ǃanuna tawede re Xristub Jesub ǃnâ. Tita ǀkha hâ ǃgâsagu ra tawede du. 22 ǃAnun hoan ra tawede du, ǀō-ai Kaesari ommi dina. 23 Ab sada ǃKhūb Jesub Xristub di ǀkhomma sadu hoadu ǀkha hâ! Amen.