ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
JUNIB 1-7
ELOBMÎSA XU HÂ ǂÛǂÛSA MÎDI | GENESIS 44-45
“Joseb ge ǁîb ǃgâsaga ge ǀhûba”
(Genesis 44:1, 2) Tsîb ge Joseba ommûǂamaob âba mîmā tsî ge mî: Nē khoegu di ǁhōga ǂûn ǀkha ǀoaǀoa, tani ǁkhā gu as kōse, îts mâ khoeb hoab di mariba ǁhōb âb di ams ǃnâ ǂgā. 2 Îts ti ǀgabis, ǀhaiǀuriǀgabisa, ǂkhammi di ǁhōb ǃnâ ǂgā ǁîb ǃhorob di marin ǀkha. Ob ge Joseb di mîs hîab ge ǃhoas ǃoa ge dī.
w15-E 5/1 14-15
“Tita ge Elob ǃkhais ǃnâ mâ”
Joseb ge ǁîb ǃgâsaga gere ǃâitsâ. ǁÎb ge ge dī îgu ǁîb ǃgâsaga ǃkhaebē-e, ǃkhōsis ǃnâ ūhe tsî kobiba ǃnaris tsîna ge ǂgā-amhe. Kobib ge Benjaminni ǁgarus ǃnâ a hō-e o, o gu ge hoaga Joseb aiǃâ ge sī-ūhe. Joseb ge ge ǁkhāǁkhāsen ǁîb ǃgâsagu a mâ ǃnôa khoe ǃkhaisa. Judab ge ge ǁîgu di ǃhoa-ao i. ǀKhomab ge ǂgan tsî gere mî hoa 11 gu ge Egipteb ǃnâs tsîna a ǃgā kai ǁkhā. Joseb ge ge mî Benjaminni ǀguib ge ǃgāb ase Egipteb ǃnâ nî hâ xawe nau gu hoagu ge nî oa di. —Gen. 44:2-17.
Judab ge kaise ǃgam ǀgaub ǃnâ ge ǃeream. Judab ge ge mî, ‘ǁîb ge ǀguri ge ǃgau, ǁgûs xa tsî ǁgûb ge ǁîba ǀnam hâ.’ Nē mîdi ge Joseba ge tsâǀkhā ǁîb ge Raxels ǂguro ǀgôa i amaga, ǁîs ge Benjaminni di ǃnaes ǃnâ ge ǁō. Joseb ge ǁîb ǁgûb khami Raxels di ǃgâi dīgu xa gere ǂâiǂâisen. Nē ǃgaeǀhaos hîna kha ge ūhâ is ge ge dī îb Joseba, Benjamina ǀnam.—Gen. 35:18-20; 44:20.
Judab ge Joseba ge ǀkhomma îb tā Benjamina ǃgā dī. Benjaminni ǃkhais ǃnâb ge ge māsen îb ǁîba ǃgā dī-e. ǀUnis aib ge sao ra mîde ge mî, “mati ta kha ǁnâi tita nî ǃapa ǁkhā ti îba ǃoa, ǀgôab ga ti ǀkha hâ tama io? Î ta ǁnā ǃoab, ti îb ǂama ga hāba tā mû ti.” (Gen. 44:18-34) Nēs ge gere ǁgau ǁîb amabes ǃnâ ǀkharaǀkharasen hâsa. ǁÎb ge ǃhōbaseni hâ ǃkhais ǀguisa ge ǁgau tama hâ i xawe khoexaǃnâsib, māsenxasib tsî ǀkhomxaǂgaosib tsîna ge ǁgau.
Joseb ge nēsa ge tani ǁoa i. ǁÎb ǃnâ ge hâ i tsâsigab ge gere ūǂui. ǁÎb ǃgān hoana ī kai tsîb ge ǃgarise gere ā, nēs ge Faraob oms kōse gere ǁnâusen. ǁNās khaoǃgâb ge ǁîb a ham ǃkhaisa ge ǁgau tsî ge mî: “Tita ge Joseta.” ǁÎb ǃgâsagab ge ǁkhoreǁare tsî ǁîba gu ge dī hâ i xūn hoana ge ǀûba. (Gen. 45:1-15) ǁÎb ge Jehovab di ǀgaub māsenxase ǀûbas diba ge ǁgae. (Psa. 86:5) Sida tsîna nēsa ra dī?
(Genesis 44:33, 34) Tsî nēsi ǁnâi, a ta sa ǃgāta nē ǀgôab amǃnâs ai satsa khobose hâba, îb nē ǀgôaba ǃgâsagu âb ǀkha ǃgûǃapa. 34 Mati ta kha ǁnâi tita nî ǃapa ǁkhā ti îba ǃoa, ǀgôab ga ti ǀkha hâ tama io? Î ta ǁnā ǃoab, ti îb ǂama ga hāba tā mû ti.
(Genesis 45:4, 5) Ob ge Joseba ǃgâsagu âb ǃoa: ǀGūǀgūsen go re tita ǁga! ti ge mî. O gu ge ge ǀgūǀgūsen. Ob ge ǁîba ge mî: Tita ge Joseta, sago ǃgâ ta, Egipteba ǃoa go ge ǁamaxū ta. 5 Î go ǁnâi tā ǃhausen, îb ǁaiba tā khâi sago mûǁae, nēxopa go ge ǁamaxū te ǃkhais xa: Elob kom tita sago ais aiǃâ ge sîo, ûib ǃnâ du nî sâuhega.
Gagasi xūna ǀō-aisase ôaǃnâs
(Genesis 44:13) O gu ge saran âga ge ǀkhau tsî mâ khoeb hoab ge eseli âba ge ǃgae tsî gu ge ǁkhawa ǃās ǃoa ge oa.
it-2-E 813
Saraba ǀkhaus
Nēs ge ge ǃoab di ǁgauǁgau i, Jodeǁîn tsî Asiaba xu ra hā khoen ǁaegu ǃgōsase ǁîn ǀgūkhoe-en ga ǁōb ǃnâ ǂoaǃnâ o. ǃNāsa ǁaeba i ge nē ǀkhausa ǂkhari ǃârob ǀguiba ǀkhausa ge ǃkhōǂgā hâ i, i-i noxoba ǃamkuse mûsen.
Nes ge ǂguro ǃnās ase Elobmîs ǃnâ ra mûhe Rubenni Jakob di ǂguro ǀgôab hîna ge oa ǀkhīb ge o ǁgammitsaus tawa ǁîb ǃgâb Joseba hō tama i tsî ǁîb saraba ǀkhau tsî a mîba: “ǀGôab ge a ǀkhai; o tita mâǀî ta ǁnâi nî ǃgû?” ǂGuro ǀgôab aseb ge Rubenna ǁîb ǃgâba nî kōǃgâ ge is ge. ǁÎb ǁgûb Jakob ge ǁîb ǀgôab ǁōbab ge ǁnâu o, ǁîb saraba ge ǀkhau tsî ǃoab di saraba ge ana. (Gen. 37:29, 30, 34) Egipteb ǃnâ gu ge Joseb di ǃgâsaga ǁîgu di saragu ǃâ-e ge ǀkhau Benjaminni ge ǃnari-aob ase mûhe o, ǁgau rase ǃoagu hâsa. —Gen.44:13
(Genesis 45:5-8) Î go ǁnâi tā ǃhausen, îb ǁaiba tā khâi sago mûǁae, nēxopa go ge ǁamaxū te ǃkhais xa: Elob kom tita sago ais aiǃâ ge sîo, ûib ǃnâ du nî sâuhega.6 ǀGam kurikha ǃâtsūǀkhāb dikha kom nēsi hâ go io ǃhūb ǃnâ; o gu ge ganupe koro kuriga ǃgau hâ, ǁîgu ǃnâ ǃhūǃgao-i tsî ǃhoroǃgao-i xare-i hâ tidega.7 Ob ge Eloba tita sago aiǃâ ge sîhā, ǃgauro-e go nî ǂnûibahega ǃhūbaib ai, tsî ûib ǃnâ go nî sâuhega kai ores ǀkha. 8 ǁNā-amaga, sa tama go ge tita ge nēpa a sîhāgo, tsî Elob ǂûb ge, ǁîb ge tita Faraoba ǁgûse ge mâiba, tsî ǃkhūkhoese ommi âb hoaragab ǂama, tsî gaosase Egipteǃhūb hoaragab ǂama.
w04-E 8/15 15 ¶15
ǀApiose ǃhuihes
15 Tae-e nî hui da i da tā khoen hîna xū-e da dīna tama hâ hîna ǃhui da hân ǀkha ǁaixa? ǂÂis ǃnâ ūhâ re sida khākhoegu ge Satanni tsî demongu tsîna. (Efe. 6:12) ǀNî khoen ge ǁaegu ai ǂanapegase ra saoǃgon da xawe ǂguin ge nēsa dī ǂgaos ǀguisa ra hî tamas ka io khoen xa ra ǂgaeǂhapu-e. (Dan. 6:4-16; 1Tim. 1:12, 13) Jehovab ǂâis ge “khoen hoan” aiǂhanuba ūhâsa “amab di ǂans tawa sīsa.” (1Tim. 2:4) ǀNîn hîna ge nē ǀgauga ūhâ în ge nēsi a sada Xristeǁî ǃgâsa sada ǃgâi ǀgaugan ge mû o. (1Pet. 2:12) Xū-e da ge Jakob di ǀgôab Joseba xu a ǁkhāǁkhāsen ǁkhā. Joseb ge ǁîb ǃgâsagu ge ǃgâi tama tanisen ǀgauba ūhâ i xawe ǀhao ǂâisa ǁîgu ǃoa-ai ge ūhâ tama hâ i. Tae-i ǃaroma? ǁÎb ge Jehovab di huiba nē mâsib ǃnâ gere mû, ǁîb ǂâisab gere dīǀoaǀoa ǂgao amaga. (Gen. 45:4-8) ǁNās khamib ge Jehovaba ǂhanuoǃnâsiba mā-am tide ǁîb ǀons di ǃanuǃanus ǃaroma.—1Pet. 4:16.
Elobmîs khomai ǃâs
(Genesis 45:1-15) ǃNubaib ge Joseba ǁkhaesen ǁoa ge i, ǁîb tawa mâ hân hoan aiǃâ, ob ge: Mâ khoe-i hoa-e ti xu ǂoa kai ti ge ǂgai. O i ge khoe-i xare-e ǁîb tawa mâ tama ge hâ i, Joseb ge ǃgâsagu âba ǂanǂansen ǃnubai.2 Ob ge ā rase dommi âba ge ǃhâkhâi, Egipteǁîgu ge ǁnâus kōse, tsî Faraob ommi din ge ǁnâus kōse.3 Tsîb ge Joseba ǃgâsagu âb ǃoa ge mî: Tita ge Joseta! Ti îba ganupeb a ûitsama? Xawe gu ge ǃgâsagu âba ǃeream bi ǁoa ge i, ǃhuri gu ge hâ i amaga, ais âb aiǃâ.4 Ob ge Joseba ǃgâsagu âb ǃoa: ǀGūǀgūsen go re tita ǁga! ti ge mî. O gu ge ge ǀgūǀgūsen. Ob ge ǁîba ge mî: Tita ge Joseta, sago ǃgâ ta, Egipteba ǃoa go ge ǁamaxū ta.5 Î go ǁnâi tā ǃhausen, îb ǁaiba tā khâi sago mûǁae, nēxopa go ge ǁamaxū te ǃkhais xa: Elob kom tita sago ais aiǃâ ge sîo, ûib ǃnâ du nî sâuhega.6 ǀGam kurikha ǃâtsūǀkhāb dikha kom nēsi hâ go io ǃhūb ǃnâ; o gu ge ganupe koro kuriga ǃgau hâ, ǁîgu ǃnâ ǃhūǃgao-i tsî ǃhoroǃgao-i xare-i hâ tidega.7 Ob ge Eloba tita sago aiǃâ ge sîhā, ǃgauro-e go nî ǂnûibahega ǃhūbaib ai, tsî ûib ǃnâ go nî sâuhega kai ores ǀkha.8 ǁNā-amaga, sa tama go ge tita ge nēpa a sîhāgo, tsî Elob ǂûb ge, ǁîb ge tita Faraoba ǁgûse ge mâiba, tsî ǃkhūkhoese ommi âb hoaragab ǂama, tsî gaosase Egipteǃhūb hoaragab ǂama.9 ǃHae î go ti îb ǃoa ǃgûǃapa î go ǁîb ǃoa mî: Nētib ra sa ôab Joseba mî: Elob ge tita ǃkhūkhoese ge mâi Egipteǃhūb hoaragab ǂama. Ti ǃoa ǁgôaxa îts tā ǀhawe! 10 Tsîts ge Gosenǃhūb ǃnâ nîra ǁan, tsîts ge tita ǀgūse nîra hâ, sats tsî sa ôagu tsî sa ôagu di ôan tsî sa gūn tsî sa goman tsî ūts hân hoana.11 Tsî tita ge satsa ǁnāpa nî ǂûmā, ganupe koro kurigu ǃâtsūǀkhāb digu nî hâ amaga, îts tā ǀgâ, sats tsî sa ommi din tsî ūts hân hoana.12 Tsî mû sago mûdi ge ra mû, tsî mûdi ti ǃgâsab Benjaminni didi on, ti ams ra sago ǃoa ǃhoa ǃkhaisa.13 Î go ti îba Egipteb ǃnâ ta ūhâ ǂkhaisib hoab tsî mû go ran hoana sī ǂhôa; ǃhae î go ti îba ūǁgôaxa re! 14 Tsîb ge ǁîba Benjaminni ǃgâsab âba ǁnam tsî ge ā, tsî Benjaminni ge ǃaob âb tawa ge ā. 15 Tsîb ge ǁîb di ǃgâsagu hoaga ǁoa tsî ge ā ǁîgu ǂama. Tsî ǁnās khaoǃgâ gu ge ǃgâsagu âba ǁîb ǀkha ge ǃhoa.
JUNIB 8-14
LOBMÎSA XU HÂ ǂÛǂÛSA MÎDI | GENESIS 46-47
ǃÂtsūǀkhāba xu ǃnorakaihes
(Genesis 47:13) Tsî ǃhūb hoab ǃnâ i ge pere-i xare-e hâ tama ge hâ i; ǃâtsūǀkhāb ge kaise ǃgom i xui-ao; Egipteǃhūb tsî Kanaanǃhūb tsîkha ge ǁnā ǃâtsūǀkhāb xa ǃkhaus kōse.
w87-E 5/1 15 ¶2
Ûiba sâus ǃâtsūǀkhāb ǁaeb ǃnâ
2 Hû kurigu ǂâusa ǂûn dib ge ge ǀam tsî i ge ǃâtsūǀkhāba ge tsoatsoa Jehovab ge mîmâi khami. ǃÂtsūǀkhāb ge Egipteb ǃnâ ǀgui ge hâ tama hâ i xawe “ǃhūbaib hoaragab ǃnâ” ge hâ i. ǃÂtsūǀkhāb ge tsoatsoa o, on Egipteǁîna huiba Faraob tawa ge ǂgan, ob ge Faraoba ge mî: “ǃGû î du Joseb nî mîba du xū-i hoa-e dī.” Joseb ge ǂûxū-e Egipteǁîn ai ge ǁamaxū ǁîn mari-i nî toas kōse. Joseb ge ǁîn xamanina ge ūǃoa matares ase. ǀUnis ain ge Joseb ǃoa ǀkhī tsî ge mî: “ǁAma re sida tsî sida ǃhūba pereb ama; o da ge sida tsî sida ǃhūba Faraoba nî ǃoaba” ob ge Joseba hoa ǃhūba Faraoba ge ǁamaba.—Genesis 41:53-57; 47:13-20.
(Genesis 47:16) Tsîb ge Joseba ge mî: Sadu ǀgoana mā o ta ge ǀgoan ama nî mā du, marib ga tôasio.
(Genesis 47:19, 20) Tare xū-i ǃaroma da kha sa mûra aiǃâ nî ǁō, sida tsî sida ǃhūb on? ǁAma re sida tsî sida ǃhūba pereb ama; o da ge sida tsî sida ǃhūba Faraoba nî ǃoaba, îts ǃkhomma mā, î da ûi, î da tā ǁō, îb ǃhūba tā ǀkhaiǃnâ. 20 Nētib ge Joseba Egipteǃhūb hoaragaba Faraoba ge ǁamaba: Egipteǁîn xa i ge mâ-i hoa-e ǁî-i di ǃhanaba ge ǁamaxū, ǃâtsūǀkhāb xan ge dāhe hâ i amaga; nētib ge ǃhūba ge Faraob di kai.”
(Genesis 47:23-25) ǃNubaib ge Joseba ǁaes ǃoa ge mî: Kō, tita ge nētsē sadu tsî sadu ǃhūba Faraoba ge ǁamaba; mû nē hâ ǃkhomma ū î du ǃhūba tsoro. 24 O i ge nî ūǀkhī xūn xa, o du ge koroǁî ǃâsa Faraoba nî mā, tsî haka ǃâdi ge sadu dise nîra hâ, ǃhūb di ǃkhomse tsî sadu tsî sadu omgu ǃnâ hân di ǂûse, tsî sadu ǀgôaron nî ǂûga. 25 On ge ge mî: Sats ge ûiba go sâuba da; a da ǀkhomma hō re ti ǀhonkhoets mûǁae, o da nî Faraob di ǃgā kai.
kr-E 234-235 ¶11-12
Elob gaosib ge ǁÎb ǂaisa nî īǁkhā kai ǃhūbaib ai
11 ǃNāǂamsasib. Hoa ǃhūbaib ge gagasise ǃâtsūǀkhāb ǃnâ hâ. Elobmîs ge ra mî: “Mû, tsēdi ge nîra hā, tib ra ǃKhūb ǃKhūba mî, o ta ge tita ǃâtsūǀkhā-e ǃhūb ǃnâ nîra sî, perebǀî hâ ǃâtsūǀkhā-e tama tsî ǁgam-iǀî hâ ǁgâ-e tama, xawe ǃKhūb mîsa ǁnâu ǂgaos di-e.” (Amo. 8:11) Elob gaosib ǁanǂgāsaben tsîna ǃâtsūǀkhāba nî ūhâ? Jehovab ge ǃkharagagusib ǁîb ǃoaba-aon tsî ǁîb khakhoen tsîn ǁaegu hâba ge mî: “Mû, ti ǃgāgu ge nîra ǂû, xawe sadu ge nîra ǃâ; mû, ti ǃgāgu ge nîra ā, xawe sadu ge nîra ǁgâ; mû, ti ǃgāgu ge nîra ǃgâiaǂgao, xawe sadu ge nîra tao.” (Jes. 65:13) Nē mîmais dīǀoaǀoasa ǃgaoǃgâ i du ra?
12 Gagasi ǂûn ge ǃāb ǂhawab tsi ǃāb ǃgamsib khami sada ǃoa ra dâu ǀkhī. Nē ǂûn ge ǂkhanin, vidiogu, ǀhaodi, kai ǀhaodi tsî sida internets ǂhaweb ai hâ xūna ǃkhōǂgā hâ. Nē gagasi ǂûn ge ǃhūbaib ǃnâ hâ khoen ra ǃâ hîna sida tawa ra dâu ǀkhī. (Ese.47:1-12; Joe.3:18) Jehovab di mîmais ǃnāǂamsase ra dīǀoaǀoahesa da ra mû os ge nēsa kaise ra ǂkhî kai da. Hoaǁae du Jehovab di tafelsa xu ra ǂû?
Gagasi xūna ǀō-aisase ôaǃnâs
(Genesis 46:4) Tita ge sa ǀkha nî doeǁgôa Egipteb ǃnâ, tsî tita ge ǁkhawa nîra doe kai tsi ǀhûpe ra doeǃapaǃâ; tsî Joseb ge ǃommi âba sa mûra ai nîra ǁgui.
it-1-E 220 ¶1
Tanisen ǀgaub tsî ǃomkha da ra sîsen-ū ǀgaus
ǁŌ hâ khoe-i mûdi ai ǃomma ǁguis. Jehovab ǁgâiǂuisen Jakob ǃoa ai, “Joseb ge ǃommi âba sa mûra ai nîra ǁgui” (Gen. 46:4) Nēs ge ra ǂâibasen Joseb nî Jakob di mûde ǂganamsa ǁîb ga ǁō o. ǂGuro ǀgôab ases ge nēsa a ǁîb di ǃeream. Jehovab ge nēs ǃnâ-ū gere ǁgau nēs a Jakob ǀgôab Joseb di ǃereamsa .—1Kro. 5:2.
(Genesis 46:26, 27) ǀOmdi hoadi, Jakob ǀkha Egipteb ǃnâ ge hādi, ǁîb di kamanaba xu ge ǀkhīdi ge Jakob ôagu di taradi ose, hoase ǃnanidisiǃnaniǀa ǀom ge i.27 Tsî Joseb ôakha Egipteb ǃnâb ge ǁorabahekha ge ǀgam ǀom ge i. ǀOmdi Jakob ommi didi Egipteb ǃnâ ge hādi hoadi ge hûdisi ǀom ge i
nwtsty study notes ǃNǃkh. 7:14 ai
Hûdisikoroǀā ǀomde: Stefanub ge Hebre xoade xu ge xoa tama hâ i Jakob hûdisikoroǀā ǀaokhoen Egipteb ǃnâ hân ǃgôabab ge mā o. Nē ǃgôab ge Hebre xoadi ǃnâ hō-e tama hâ. Ge 46:26, 27 ge ra mî: “ǀOmdi hoadi, Jakob ǀkha Egipteb ǃnâ ge hādi, ǁîb di kamanaba xu ge ǀkhīdi ge Jakob ôagu di taradi ose, hoase ǃnanidisiǃnaniǀa ǀom ge i. 27 ǀOmdi Jakob ommi didi Egipteb ǃnâ ge hādi hoadi ge hûdisi ǀom ge i.” Nēba i ge khoena ǀgam ǃkharagagu ǀgaukha ǃnâ ra ǃgôahe, ǂguro ǃgôas gea ǁîb surib di tsî ǀgamǁî ǃgôab ge a Egipteb ǃnâ ge a ǂgâ khoen di. Jakob di ǀaokhoen di ǃgôab ge Eks.1:5 tsî Deu. 10:22 ǃnâ a māsa tsî ǁnāpa i ge “70” ǃgôaba a māsa. Stefanub ge ǃnonaǁî ǃgôaba ra mā hîna Jakob di kai ǀaokhoen tsîna ǃkhōǂgā hâba. ǀNî khoen ge ram î nēs ge Manaseb tsî Efraimmi tsîkha ǀgôan hîna Septuagint ǂnûiǃkhunis ǃnâ Gen. 46:20 tawa a mîsana.ǀgôagu tsîna ge ǃkhōǂgā hâ i. ǀNîn tsîn g era mî nēs Jakob ǀgôagu taradi tsîna ǃkhōǂgā hâsa hîna Gen. 46:26 tawa mîhe tama hâde. ǁNās ǀkha i ge “75” di hâ ǃgôaba a māsa. Nē ǃgôab tsîn ge Hebre Xoadi ǃnâ gere sîsen-ūhe Jesub ge ǃhūbaib ai hâ io. ǂGui kurigan ge ôaǃnâ-aona “75” di hâ ǃgôaba Gen. 46:27 tsî Eks. 1:5 Grikegowab Septuagintgu ǃnâ gere hō. Sida ǃgôa ǁaeb ǃnâs tsînas ge ǂāxahurib ǃâga Eks. 1:5 sa Hebregowab ǃnâ ge hōhe tsî “75” di hâ ǃgôab tsîn ge ge hōhe. Stefanub ǃgôab ge nē xoade xu ge ǃgaoǃgoasa i. Mâ ǃgôab ga ǂhanu xawes ge Stefanub ǃgôaba ǀkhara ǀgaub ǃnâ Jakobi suriba ǃgôaǀhao hâ.
Elobmîs khomai ǃâs
(Genesis 47:1-17) ǀOmdi hoadi, Jakob ǀkha Egipteb ǃnâ ge hādi, ǁîb di kamanaba xu ge ǀkhīdi ge Jakob ôagu di taradi ose, hoase ǃnanidisiǃnaniǀa ǀom ge i. “ǀOmdi Jakob ommi didi Egipteb ǃnâ ge hādi hoadi ge hûdisi ǀom ge i.” 1 ǃNubaib ge Joseba sī tsî Faraoba ǂhôa tsî ge mî: Ti îb tsî ti ǃgâsagu tsîgu ge ǁîgu di gūn tsî ǁîgu goman tsî ū gu hân hoan ǀkha Kanaanǃhūba xu go hā; tsî mû, ǁîgu ge Gosenǃhūb ǃnâ hâ. 2 Tsîb ge ǃâ-i ǁîb ǃgâsagu di-e ge ū, koro aoga, tsîb ge ǁîga Faraob di ais aiǃâ ge mâi. 3 Ob ge Faraoba ǃgâsagu âb ǃoa: Mâ sîsen-e go ūhâ? ti ge mî. O gu ge Faraob ǃoa: Sa ǃgāge ge a gūǃûi-ao, sige tsî sige îgu tsîge, ti ge mî. 4 ǃAruǀî gu ge Faraob ǃoa ge mî: Sige ge go hā, ǃhaokhoese nî nē ǃhūb ǃnâ ǁanse; ǃû-ai-i xare-i ge gūn sa ǃgāge ūhâna ǀkhaiba, ǃâtsūǀkhāb ge Kanaanǃhūb ǃnâ a ǃgom xui-ao; a ge sa ǃgāge ǁnâi Gosenǃhūb ǃnâ ǁan re! 5 ǃNubaib ge Faraoba Joseb ǃoa ǃhoa tsî ge mî: Sa îb tsî sa ǃgâsagu tsîgu ge sa tawa go hā. 6 Egipteǃhūb ge sa ais aiǃâ hâ, îts sa îb tsî sa ǃgâsagu tsîga ǃhūb di hoan xa ǃgâi ǃkhai-i ǃnâ ǁan kai; a gu Gosenǃhūb ǃnâ ǁan, tsî ǂants kao, ǁîgu ǃnâ gu gā-ai khoega hâsa, îts ǁîga ǂamǀgoaǃûi-aose mâi ū ta hân ǂama. 7 Tsî Joseb ge ǁîb di îb Jakoba ǀhûpe ūǂgâ tsî Faraob di ais aiǃâ sī ge mâi bi; tsî Jakob ge Faraoba ge ǀkhae. 8 Ob ge Faraoba Jakob ǃoa ge mî: Tsēdi sa ûib kurigu dide matikōde? 9 Ob ge Jakoba Faraob ǃoa ge mî: Tsēdi ti ǃgûkhoesi kurigu didi ge a ǀguikaidisi tsî ǃnonadisi kuri; ǀoro tsî di ge tsū ge i ti ûib kurigu di tsēde, tsî di ge ti îgu ûib di tsēdi ǃnâ sī tama ge i, ǁîgu ǃgûkhoesis di tsēdi ǃnâ. 10 Ob ge Jakoba Faraoba ǀkhae tsî Faraob di aisa xu ge ǃgûǂoa. 11 Tsî Joseb ge Jakob tsî ǃgâsagu âb tsîga ǁanǃkhaide ge mā kai, tsîb ge ǁîga ǁîsi-e ge mā Egipteǃhūb ǃnâ, ǃhūb di hoan xa ǃgâi ǃâs ǃnâ, Rameses ǃhūb ǃnâ, Faraob ge mîmā khami. 12 Tsî Joseb ge ǁgûb tsî ǃgâsagu âb tsî ǁgûb ommi din hoana pereb ǀkha ge ǁâǁâ ǀgôaron di ams kōse. 13 Tsî ǃhūb hoab ǃnâ i ge pere-i xare-e hâ tama ge hâ i; ǃâtsūǀkhāb ge kaise ǃgom i xui-ao; Egipteǃhūb tsî Kanaanǃhūb tsîkha ge ǁnā ǃâtsūǀkhāb xa ǃkhaus kōse. 14 ǃNubaib ge Joseba marib, Egipteǃhūb tsî Kanaanǃhūb ǃnâ ge hōheb hoaba ge ǀhaoǀhao ǁnā ǃhorob, ǁîna gere ǁamab ama; tsî Joseb ge ǁnā mariba Faraob ommi ǃnâ ge ūhā. 15 Tsî marib ge Egipteǃhūb tsî Kanaanǃhūb ǃnâ toao, on ge Egipteǁîn hoana Joseb tawa hā tsî ge mî: Pere-i xa mā da re, tare xū-i ǃaroma da kha ǁnâi sa aiǃâ nî ǁō, mari-i a ǀkhai amaga? 16 Ob ge ǁîba ge mî: Sadu ǀgoana mā o ta ge ǀgoan ama nî mā du, marib ga tôasio. 17 ǃNubain ge ǀgoan âna Joseba ge ūsība; ob ge ǁîba ǁîna pereba ge mā, hān ama tsî gūn ama, tsî goman ama tsî eseln ama, tsîb ge ǁîna ǁnā kurib hoaba pereb ǀkha ge ûi kai ǁîn di ǀgoan hoan ama.
JUNIB 15-21
ELOBMÎSA XU HÂ ǂÛǂÛSA MÎDI | GENESIS 48-50
“Kaira khoen ge ǂgui xūn hînan nî mîna ūhâ”
(Genesis 48:21, 22) ǁNās khaoǃgâb ge Israela Joseb ǃoa ge mî: Mû tita ge ra ǁō; xawe Elob ge sadu ǀkha nîra hâ, tsî ǁîb ge sado ǁkhawa sadu îgu di ǃhūb ǃnâ nîra ūǂgâ. 22 Tsî tita ge satsa sa ǃgâsagu dis xa ǃgâi ǃhūǃâsa go mā, ti gôab tsî ti khās tsîra ǀkha ta ge Amorǁîn di ǃomǁaeba xu ūsa.
it-1-E 1246 ¶8
Jakob
ǁŌb nîs aiǃâb ge Jakoba ǁîb ǁnurisagu tsî Joseb ǀgôagu tsîna ge ǀkhae tsî Efraimmi hîna a ǂkhama Manaseb ǂam-ai ge mâi. Joseb hîna ge ǂguroǃnaesabeb di ǃâba hōb ǃoab ge ge mî “tsî tita ge satsa sa ǃgâsagu dis xa ǃgâi ǃhūǃâsa go mā, ti gôab tsî ti khās tsîra ǀkha ta ge Amorǁîn di ǃomǁaeba xu ūsa.” (Gen. 48:1-22; 1Kro. 5:1) Jakob ge ǃamku ǀgaub ǃnâ Sexemmi îb ôagu di ǃomma xu ǃāsa ge ǁama, Hamori di ǀon hâsa. (Gen. 33:19, 20) Nē mîmâis Joseb ǃoa ge mîhes ge Jakob di ǂgomsa ra ǁgau. ǁNāpab ge Kanaanǃhūb di ǀamǂoas xa ge kēbo ǀnais ge ǁîb gôab tsî khās tsîra ǀkha a ī khami. (Mû re AMORITEǁÎN) Joseb di ǃâb ge ǀgam ǃâra ǃnâ ge ǀgorasa i Efraimmi tsî Manaseb ǃhaora ǃnâ.
(Genesis 49:1) ǁNās khaoǃgâb ge Jakoba ǁîb di ôaga ǂgaiǀhû tsî ge mî “ǀHao go re, o ta ge sago nî ǂhôa, saoǃgoaxa tsēdi ǃnâ go nîra ǃoa xūna”
it-2-E 206 ¶1
ǀUni Tsēdi
Jakob ǁōb kharob kēbodi. Jakob ge ǁîb ǀgôaga ǃoa ge mî “ǀHao go re, o ta ge sago nî ǂhôa, saoǃgoaxa tsēdi ǃnâ go nîra ǃoa xūna.”(AT) Nēs ǀkhab ge gere ǂâibasen hānîǁae-i ǁîb mîde nî dīǀoaǀoahesa. (Gen. 49:1) 200 Kurigu aisib ge Jehovaba Abrammi ǃoa ge mî ǁîb surib hakakaidisi kuriga nî ǁgâiǀā-esa. (Gen. 15:13) Nēbab Jakoba hānî “ǀuniga tsēdi” xa ra ǃhoa o, ob ge ra mî ǁnā tsēdi tsoatsoa tidesa hakakaidisi kurigu di ǃgommi toa tama hîna. (Genesis 49 xa du ga ǃnāsase ǂan ǂgao o, Jakob ǀgôagu di ǂkhanisa khomai re ǁîgu ǀon di ǃnāga.) Hānîǁaeb kēbos ge gagasi “Israeli Elob” hîna nî hās di ǃâubasens xa ra ǃhoa.—Gal. 6:16; Rom. 9:6.
(Genesis 50:24, 25) “Tsî Joseb ge ǃgâsagu âb ǃoa ge mî: Tita ge ra ǁō, xawe Elob ge sado ǂanǂansase nî sari, tsîb ge sado nîra doeǃapa kai nē ǃhūba xu ǁnā ǃhūb, hîab ge Abrahammi, Isaki tsî Jakob tsîga nūbab ǃoa.25 Tsî Joseb ge Israeli ôaga ge nū kai, mî raǃâ: Elob ge ǂanǂansase sado nîra sari, o du ge ti ǂkhōga nî ūǃapa nēpa xu”.
w07-E 6/1 28 ¶10
Kaira khoen ge ǂkhamna ǀkhaeb ase ība
10 Kaira khoen ge ǃgâi aiǁgaus ase nau ǃgâsana a ība. ǁÎb di kairasis ǃnâb ge Joseba ǂgomsa ge ǁgau hîna ge nau ǃgâsana a tsâǀkhāsa. ǁÎb ge ge 110 kurixa i ǁîb “ǂkhōgu” xa hâ mîmāsab ge mā o, ǁîb ge ge mî Israelǁîn ge ǁîb ǂkhōga nî ūsao Egipte ǃhūba xun ge ī o. (Heb. 11:22; Gen. 50:25) Nē mîmās ge Israelǁaesa ǃâubasensa gere mā ǂgui kurigu hînan ge ǃgāsis ǃnâ hâ îgu ǃnâ, nēs ge Joseb ǁōb khaoǃgâ ge ī.
Gagasi xūna ǀō-aisase ôaǃnâs
(Genesis 49:19) Gadi xasa, ǂnubis ge ǁîba nîra ǃhabi, xaweb ge ǁîsa nîra ǁkhaebē ǀunis ai.
w04-E 6/1 15 ¶4-5
ǁNān hîna Jehovaba ra koan ge ǀkhaesa
4 Mîmâisa ǃhūb ǃnân nî ǂgâs aiǃân ge Gadi ôana ge ǂgān în Jordanǃāb nauǃaniba ǃoa doe. (Num. 32:1-5) ǁNāpan ge ǂgui ǃgomsina ga hōǃâ hâ. Huriǂoas ǀkhāb di ǁaes ge Jordanǃāb xa ge ǁkhaubasa i. (Jos. 3:13-17) Xawe aiǂoas ǀkhāb ai ge hâ i ǁaes xab ge George Adam Smitha ge mî: “ǁÎn ge ǃgomsi-e hōǃâ tama hâse Arabia ǃhūba ǃoa ge ī. ǁÎn ge ǃâ hâ khoen hîna gere doemān xa mâ kurib hoaba gere ǁnāǂamhe.”
5 Gadi ôana mati nē ǁgâiǀāb ǃnâ ge mâǀgai? Jakob ge ǁōb nîs aiǃâ ge mî: “Gadi xasa, ǂnubis ge ǁîba nîra ǃhabi, xaweb ge ǁîsa nîra ǁkhaebē ǀunis ai.” (Gen. 49:19) Nē mîdi ge ǂguro xūose gere mûsen. Xawe nēs ge amabes ǃnâ gere ǂâibasen în Gadi ôana ǃkhamǃoa. Jakob ge ǁîna ǂgomǃgâsiba ge mā nēsan ga dī o, on ge tsūdī-aona nî taotaohe, Gadi-aona ǁîna khaosǀkhāba xu ra ǁnāǂamse.
(Genesis 49:27) Benjaminni ge ǀkhauǃā ra ǂhiras khami ī; ǁgoaǁaeb aib ge ǃkhōb rana ra ǂû tsî ǃuiǁaeb aib ra ǃkhōb gena ǀgoraǂui.
it-1-E 289 ¶2
Benjaminni
Benjaminni surib di ǃkhams ǁkhāsib ge Jakob ge ǁōb nîs aiǃâ a mā kēbos ǃnâ-ū ra mûhe, “Benjaminni ge ǀkhauǃā ra ǂhiras khami ī; ǁgoaǁaeb aib ge ǃkhōb rana ra ǂû tsî ǃuiǁaeb aib ra ǃkhōb gena ǀgoraǂui” dib ge ge mî. (Gen. 49:27) Benjaminǁîn ge ǃgâi ǂnoa-aon ase ge ǂansa i, ǁîn ge ǀuide hoa ǀgam ǃom ra ǀkha gere ǂnoa. (ǂHǂh. 20:16; 1Kro. 12:2) Ehudi hîna ge ǁare ǀkhāb ǃomma gere sîsen-ū tsî Gao-aob Eglonna a ǃgam mi ge ge Benjaminǁî i. (ǂHǂh. 3:15-21) ǁGoagas ge ge Benjaminǁîn ge, Israeli ǂguro Gao-aoba a ǁgaumâisa, nē Gao-aob ge ge Saul i, Kisi di ôaba ǁîb ge Filisteǁîn ǃoagus tsîna ge ǃkham. (1Sam. 9:15-17, 21) Tsî ǃuian ge Benjaminǁîna Esters tsî Mordekaib tsîra ge mā hîna ge Israelǁîna, Persiaǁîna xu gere sâu ra.—Est. 2:5-7.
Elobmîs khomai ǃâs
(Genesis 49:8-26) Judatse, sats ge ǁîtsa, satsa gu ge ǃgâsagu âtsa nîra ǃkhōǀkhā; sa ǃommi ge sa khākhoen di ǃaob ai nîra hâ; sa aiǃâ gu ge sa îb di ôaga nîra ǃgamǃgâ.9 Judab ge ǂkham xamma! Sats ge ǁkhâuǁnâsa xu go khâi, ti ôa. ǁÎb ra ǃgamsen, ǁîb ra ǁgoe xammi khami tsî kaira xammi khami; tari-e nî khâi kai bi? 10 Gaohais ge Judaba xu bē tide, tsî ǂhanumā-aob on ǁîb di ǂaira di ǁaeguba xu, Silob nîra hās kōse, tsî ǁîba di ge ǁaede nîra ǁnâuǀnam. 11 ǁÎb ge ǂkham eseli âba ǂauxûiǂûhais tawa ra ǃgaemâi tsî esels âb di ǂkhamro-e hoan xa ǃgâi ǂauxûiǂûhais tawa; ǁîb ge sarab âba ǂauxûib ǃnâ ra ǁā, tsî ǂamsarab âba ǂauxûiǂûn di ǀaob ǃnâ. 12 ǁÎb ge a ǀapamûǃnâ ǂauxûib xa tsî a ǃuriǁgû daib xa. 13 Sebulonni ge hurib amǃgâb tawa nîra ǁan, tsîb ge doe-omgu di mâ-ais tawa nîra hâ; tsî ǀkharib âb ge Sidons kōse nîra sī. 14 Isaskari ge ǂkhōxa esela, ǀgam āǃorekha ǁaegu ǁgoeba. 15 Tsî sâb xab ge mûo ǁîb a ǃgâi ǃkhaisa, tsî ǃhūb xa, ǁîb a ǀnamǀnamsa ǃkhaisa, ob ge ǃhōb âba ge ǃgamǃgam, tani nîse, tsîb ge ǃoaba rase ge ī. 16 Danni ge ǁaes âba nîra ǂhanuǂhanu, Israeli ǃhaodi di ǀguis ase. 17 Danni ge ǀaoba daob tawa, ǃgaiba ǃganni amǃgâ, hāb di ǃnôara ra nâba, ǃgapi-aob âb ra ǃgâbǀkhāb ai ǁnāse. 18 Sa ǃgâiǃōba ta ge tita ra ǃâubasen, ǃKhūtse. 19 Gadi xasa, ǂnubis ge ǁîba nîra ǃhabi, xaweb ge ǁîsa nîra ǁkhaebē ǀunis ai. 20 Aseri xasa, pereb âb ge nîra ǁnuixa; tsîb ge ǁîba gao-aosi ǃgâi xūna nîra ūǀkhī. 21 Naftalib ge ǃhae ǁkhamaba, ǁîb ge îsa mîde ra ǃhoaba. 22 Joseb ge ǂûtanixa ǂgonaba, ǂûtanixa ǂgonab ǀau-i tawa; mâ ǂgona-i hoa-i ge ǂnubiǂgoaba ra īǂam. 23 ǁKhâu-aogu ge ǁîba au-au tsî ge ǁkhâu tsî ge ǁkhan bi; 24 xawe khās âb ge ǀkhamasase ge hâ i, tsî ǃomkha âb di ǁôakha ge ǀgaiǀgaihe ge hâ i Jakob di ǀGaisab di ǃomkha ǀkha; ǁnāb ge Israeli, ǀuis ǃÛi-ao ge iba; 25 sa îb di Eloba xus a, satsa nîra huib, tsî Hoaǀgaixab, satsa nîra ǀkhaeb, ǀkhaexūn ǀhommi dina ǀgapiseba xu, tsî ǀkhaexūn ǃgamsib dina, ǃnaga ǁgoeb dina, ǀkhaexūn samdi tsî ǁhādi dina. 26 ǀKhaedi sa îb didi ge ti kaikhoegu di ǀkhaede ra ǃnā ǀamo ǃhomgu di ǀams kōse; ǁîdi ge danas Joseb dis ai nîra hâ, danaǂkhōs ǃgâsagu âb ǃnâ khaihe hâb dis ai.
JUNIB 22-28
ELOBMÎSA XU HÂ ǂÛǂÛSA MÎDI | EKSODUS 1-3
“Tita ge īta a khami nî īta”
(Eksodus 3:13) Ob ge Moseba Elob ǁga ge mî: Mû, Israeli ôan tawa sī tsî ta ga ǁîna ǃoa mîo, Elob sadu îgu dib go sî te sado ǃoa, tsîn ga tiǀî mîo: Matib ǁîba ǀon hâ? Tare-e ta kha ǁnâi ǁîna nî mîǀî?
w13-E 3/15 25 ¶4
Jehovab ǀonsa ǃgôaǃgâ re
4 Khomai re Eksodus 3:10-15. Moseb a 80 kurixa hînab ge Eloba ǁîba ǃgom mîmâisa ge mā mîb ge o, “Îts satsa ti ǁaes, Israeli ôana, Egipteba xu ǂgaeǂguiǂui.” Moseb ge nēsa dîs ǀkha ǃgôasib ǃnâ ge ǃeream. “Sa ǀonsa a tae-e?” dib ge Moseba ge dî. Elob ǀons ge ǀnai ǂansa i xaweb ge Moseba tae-e gere ǂâibasen nē dîs ǀkha? ǁÎb ge nē ǀonsa ra ǂnûǁkhaeba khoe-i xa ǃnāsase gere ǂan ǂgao tsî Elob khoena ǂgomǃgâsiba gere mā ǁîb amabes ǃnâ nî sâu nî ǃkhaisa. Moseb ǂhansens ge ge ǂhanu-ai i Israelǁaes ge kai ǁaeba ǃgāsis ǃnâ hâ i amaga. ǁÎn ge gere ǂhâ Elob amabes ǃnâ nî sâu nî ǃkhaisa. ǀNî Israelǁîn ge Egipteǁîn eloga ge ǃoaba tsoatsoa.—Ese. 20:7, 8.
(Eksodus 3:14) Ob ge Eloba Moseb ǃoa ge mî: Tita ge ī ta a khami nî īta. Tsîb ge ǁîba ǁkhāti ge mî: Nētits ge Israeli ôana nîra mîba: Ī nî ta ge tita sadu ǃoa go sî.
kr-E 43, boksis
ELOB ǀONS ǂÂIBASENS
Jehovab ǀons ge Hebregowab mîs “khami nî ī ta” di ra ǂâibasensa xu ra hā. ǀNî ôaǃnâ-aon ge ra mî nēs ge ra ǁgau khoe-i ǁgaumâi-e hâsa. ǁNās ǀkhan ge ǂgui khoena Elob ǀonsa “hoa xūna ra ī kaiba” di ra ǁnâuǃā. Nēs ge Jehovab kurus ǃnâ ūhâ ǃâba ǃgâise ra ǁgau. ǁÎb ge ǃhūbaib tsî khoen tsîna ge kuru tsî ǁîb ǂâisa noxoba ra dīǀoaǀoa.
Jehovab ge Moseb dîs hîna Eksodus 3:13, 14 ǃnâ hâsa a ǃeream ǀgausa da mati ra ǁnâuǃā? Moseb ge Jehovaba ge dî, “Israeli ôan tawa sī tsî ta ga ǁîna ǃoa mîo, Elob sadu îgu dib go sî te sado ǃoa, tsîn ga tiǀî mîo: Matib ǁîba ǀon hâ? Tare-e ta kha ǁnâi ǁîna nî mîǀî?” Jehovab ge ǃeream tsî ge mî: “Tita ge ī ta a khami nî īta.”
ǃGaoǃgâ re, Moseb ge Jehovaba ge ǂgan tama hâ i îb ǁîb ǀonsa ǂhaiǂhai. Moseb tsî Israelǁîn tsîn ge Jehovab ǀonsa ǀnai ǃamkuse ge ǂan i. Moseb ge gere ǂgao îb Jehovaba ǂgomsa ra ǀgaiǀgai xū-e ǁîb xa ǂhaiǂhai, nē xū-i ge ǁîb ǀons ǂâibasens ǃnâ-ūs tsîna nî ǁgausen. “Tita ge ī ta a khami nî īta” di ǃereams ǃnâ-ūb ge Jehovaba ǂoaǂamsa xū-e ǁîb xa ge ǂhaiǂhai: Mâ mâsib hoab ǃnâb ge ǁîb di ǂâisa ra dīǀoaǀoa. Aiǁgause, Moseb tsî Israelǁaes ǃgaob ge Jehovaba ge ǁîn sâu-ao, ǂhanu mā-ao tsî kōǃgâ-ao i. Jehovab ge mâ xū-i hoa-e ra dī ǁîb mîmâidi ǁîb khoen ǃoagub ge dīde dīǀoaǀoasa. ǁÎb ǀons nēna ǃkhōǂgā hâ xaweb ge ǁîb tsîna aitsama nēn hoana a dī ǁkhā. Nēs ge ǁîb kurusab ra sîsen-ū ǀgaub tsîna ǃkhōǂgā hâ ǁîb ǂâisa dīǀoaǀoas ǃnâ.
Gagasi xūna ǀō-aisase ôaǃnâs
(Eksodus 2:10) Tsî ǀgôarob ge kaio, os ge ǁîba Faraob ôasa ge ūsība tsîb ge ge ǁîs di ôa kai; tsîs ge ǁîba Moseb ti ge ǂgai: ǁGamma xu ta ge ge ǂgaeǂui bi, tis ge mî xui-ao.
g04-E 4/8 6 ¶5
Moseb—Khoeb tamas ka io ǂhumiba?
ǂGom-e ǁkhā-e Egipteǁî gaoǀgôas nēti ī ǀgôa-e nî ūǂgā ǃkhaisa? Hî-î, Egipteǁîn ge gere ǂgom ǃgâi dīgu ge a ǂhâǂhâsa ǀhommi ǃnâ ǂgâsa di. ǀGôa-e xūdībasens xas ge Joyce Tyldesleysa ge mî: “Egipteǁî khoedi ge Egipteǁî khoegu ǀkha a ǀguitikō. ǁÎn ge ǀguitikō aiǂhanuga ge ūhâ i tsî di ge khoede ǀgôa-e xūdībasensa ge mā-amhe hâ i.” ǃKharu ge ǁaeb ǀgôa-e xūdībasens ǂkhanib ge Egipteǁî khoesa ra ǁgauǂui ǁîs ǃgānas ra xūdībasensa. Moseb masa daisi-aos ase ǀkhupis ǃnâs ge The Anchor Bible Dictionary sa ra mî: “Moseb masa matare daisi-aos ases ge Mesopotamiab ǀgôa-e xūdībasens ǂhanugu ǀkha ra ǀgau.”
(Eksodus 3:1) Tsî Moseb ge Jetrob, ǀuiǁgûb âb, Midianni pristeri di gūna gere ǃûi, tsîb ge gūna ǃgaroǃhūb ǃnâ gere ǂgaeǂguiǂgā tsîb ge Elob ǃhommi, Horeb kōse ge sī.
w04-E 3/15 24 ¶4
Mâǂoa ra ǂâidi Eksodus ǂkhanisa xu
3:1—Jetroba ge mâ ǃnôa pristeri ī? ǃKharu ge ǁaeb ǃnâ i ge omaris danaba ǁîb omaris pristeri ase gere ǁgaumâihe. Jetrob ge ge Midianǁîn di dana i. Midianǁîn ge Abrahammi suri i Keturas ǃnâ-ū amagan ge Jehovab xa ge ǂan i.—Gen. 25:1, 2.
Elobmîs khomai ǃâs
(Eksodus 2:11-25) Tsî i ge ǁnā tsēdi ǃnâ ge ī, Moseb ge kaio, ob ge ǃgâsagu âb ǃoa ǃgûǂoa tsî ǁkhō sîsenni âga ge kō; ob ge ge mû Egipteǁî khoeb ra Hebreǁî khoeb, ǃgâsagu âb di ǀguiba ǂnau ǃkhaisa. 12 Ob ge nēpa tsî naupa kō tsî khoe-i a ǀkhai ǃkhaisab ge mûo Egipteǁîba ǃgam tsî ǃhūb ǃnâ ge ǁkhō bi. 13 Tsîb ge sao ra tsēs ai ǁkhawa ge ǂoa; tsî kō, ǀgam Hebreǁî khoekha ge gere ǃkham; ob ge ǂhanuoǃnâb ǃoa ge mî: Tarexats ra sa ǀgūkhoeba ǂnau? 14 Ob ge ge mî: Tari-e satsa sikhom ǂama ǂamkhoese tsî ǂhanuǂhanu-aose mâi hâ? Titats nî ǃgamgats ra nēsa mî, Egipteǁîbats ge ǃgam khami? ǃNubaib ge Moseba ǃao tsî: Amases go ǂansa ǁî ǃkhaisa, ti ge mî. 15 Tsî Faraob ge nē ǃkhaisa ǁnâuo, ob ge Mosebab nî ǃgamse ge ôa-am; xawe Moseb ge Faraob di aisa xu ǁhâ tsî Midianǃhūb ǃnâ ge ǁan, tsîb ge ǂgâb tawa ge ǂnôa i. 16 Tsî Midianni ǃnâ hâ pristeri ge hû ǀgôade ge ūhâ i xuri nîse ge ǀkhīde, tsî di ge āǃnâǃorega ge ǀoaǀoa, ǁgûb di gūna di nî āsiga. 17 ǃNubai gu ge ǃûi-aoga hā tsî ǁîde ǁnāpa xu ge ǃhaebē; ob ge Moseba khâi tsî ǁîde ore tsî gūn âde ge āsi. 18 Tsî ǁîdi îb Regueli tawa di ge sīo, ob ge ge mî: Tare xū-i ǃaroma so kha nētsē nētikō ǃhaese ǁkhawa go hā? 19 O di ge ǁîde ge mî: Egipteǁî khoeb ge sise go ore ǃûi-aogu di ǃomǁaeba xu; tsîb ge ǁkhāti ǃnāǂamsase goro xuribase tsî gūna goro āsi. 20 Ob ge ǁîb di ôadi ǃoa ge mî: Mapab ǁnâi hâ? Tarexa so kha ǁnā khoeba go ǃgû kai? ǁKhau bi îb pereǂû re. 21 Tsî Moseb ge ge māsen, aob tawa ǁansa, tsîb ge ǁîba ǁîb di ôas Siporasa Moseba ge mā. 22 ǁÎs ge ǀgôaba ge ǁora tsîb ge ǁîba Gersom ti ge ǂgai bi; nētib ra mî xui-ao: Tita ge ge ǃhaokhoe kai ǃhao ǃhū-i ǃnâ. 23 Tsî i ge ǂgui tsēdi ǁîs khaoǃgâ ge ī, Egipteb di gao-aob ge ǁō hâ i ǃnubain ge Israeli ôana ǀhâimâinǀom tsî ge ǃau sîsenni ǃaroma; tsî sîsenni ân ǂaman ra ǃgae ǃgaes ge Elob tawa ge sī ǃapa. 24 Tsî Elob ge ǃgaes âna ge ǁnâu tsî Elob ge ǃgaeǀhaos âb Abrahammi, Isaki tsî Jakob tsîgu ǀkhab ge dīs xa ge ǂâi. 25 Tsî Elob ge Israeli ôana ge kōǀî tsî Elob ge ǁîna ge ǂan.
JUNIB 29–JULIB 5
ELOBMÎSA XU HÂ ǂÛǂÛSA MÎDI EKSODUS 4-5
“Sats ǀkha ta ge ǃhoats ra hîna nî hâ”
(Eksodus 4:10) ǃNubaib ge Moseba ǃKhūb ǃoa ge mî: Okha, ǃKhūtse, tita ge ǃgâise a ǃhoa ǁoa khoeta, ǁarisa xus kao, aetsēsa xus kao ǁnā ǁaeb ǁîb aits sa ǃgāta ǀkha goro ǃhoaba xus kao: ǃGom ams â-i tsî ǃgom nams â-i ta kom titao.
(Eksodus 4:13) Xaweb ge ǁîba ge mî: Okha, ti ǃKhūtse, ǂgaots ra khoeb hoab di ǃomma sî re!
w10-E 10/15 13-14
Jehovaba mati ǃgôaǁnâsensa ra mû?
“Tita ge xū-e anu tama hâ.” ǀNîsi du ge ra ǂâi sadu ǃgâiǂhôasa aoǁnâsa anu tama hâ di. ǀNî ǂgomǂgomsa ǃoaba-aon Jehovab din Elobmîs ǁaeb ǃnâ ge ûi hâ în ge ge tsâ ǁîn Jehovab xan mā-e hâ ǁgaumâide a dīǀoaǀoa ǁoa di. Moseb aiǁgaus xa ǂâi re. ǁGaumâisab ge Jehovaba xu a hō o, ob ge Moseba ge mî: “Okha, ǃKhūtse, tita ge ǃgâise a ǃhoa ǁoa khoeta, ǁarisa xus kao, aetsēsa xus kao ǁnā ǁaeb ǁîb aits sa ǃgāta ǀkha goro ǃhoaba xus kao: ǃGom ams â-i tsî ǃgom nams â-i ta kom titao.” Jehovab ge ǂgomǃgâsiba a mā bi xaweb ge Moseba ǃeream tsî ge mî: “Okha, ti ǃKhūtse, ǂgaots ra khoeb hoab di ǃomma sî re.” (Eks. 4:10-13) Jehovaba tae-e ge dī?
(Eksodus 4:11, 12) Ob ge ǃKhūba ǁîb ǃoa ge mî: Tari-e khoeba amsa ge dība, tsî tari-e ǃgomeb, ǂganaǂgae hâb, mû rab tsî ǂgī hâba ge dī? Tita ǁî tama ta hîa ǃKhūta? 12 Îts ǁnâi ǃgû, o ta ge tita sa ams ǀkha hâ tsî nîra ǁkhāǁkhā tsi, tare xū-ets nî ǃhoa ǃkhaisa.
w14-E 4/15 9 ¶5-6
Mûheǁoasaba du ra mû?
5 Moseb Egipteba ǃoa nî oas aiǃâb ge Eloba ǂhâǂhâsa tsoatsoasa ge ǁkhāǁkhā bi, nē tsoatsoasab ge Moseba Jobi ǂkhanis ǃnâ ge xoa: “ǃAoǃgâb ǃKhūb dib ge a gā-aisi.” (Job. 28:28) Moseba ǃaob tsî gā-aisib tsîna omkhâis ǀkha huis ǃaromab ge Jehovaba khoen tsî hoaǀgaixa Elob ǁaegu hâ ǃkharagagusiga ge ǁgau. ǁÎb ge ge dî: “Tari-e khoeba amsa ge dība, tsî tari-e ǃgomeb, ǂganaǂgae hâb, mû rab tsî ǂgī hâba ge dī? Tita ǁî tama ta hîa ǃKhūta?”—Eks. 4:11.
6 Tae-e da ra ǁkhāǁkhāsen? ǂHâbasa tama i ge ge hâ i Moseba ǃaosa. ǁÎb ge Jehovab xa ge sî-e hâ i tsî ǁîb ge Moseba ǂhâb hâ xūn hoana ga mā hâ Faraoba Elob haisi-amsa mîbasa. Faraob ge Jehovab ǀkha a ǀnōhe ǁoa. Nēs ge ge ǂguro ǃnā tama hâ i Elob ǃoaba-aon tsūb ǃnâ hâsa Egipteǁîn ǂgaeǂguis ǃnāga. Moseb ge Jehovab ge Abrahammi, Joseb tsî ǁîb tsîna a ǁkhauba ǀgaus xa gere ǂâi ǃkharu ge Faraogu ǂgaeǂguis ǃnāga. (Gen. 12:17-19; 41:14, 39-41; Eks. 1:22–2:10) Jehovab hîna a “mûheǁoab” ǃnâ ǂgomsa ūhâseb ge Moseba ǁkhoaǂgaoxase Faraob aiǃâ ge ǂhai tsî Jehovab ge mîmā bi xūn hoana ge ǂhôa.
(Eksodus 4:14, 15) ǃNubaib ge ǃKhūb di ǁaiba ge khâi Moseb ǂama, tsîb ge ǁîba ge mî: Aronni, Leviǁîba sa ǃgâsa tamaba? Tita ge a ǂan, ǁîb ǃgâise a ǃhoa ǁkhā ǃkhaisa, tsî kō ǁkhāti, ǁîb ge nîra ǂoaxa, ǃgûǃoa tsib nîse; satsab ga mûo, ob ge ǂgaob âb ǃnâ nîra ǃgâiaǂgao. 15 Ots ge satsa ǁîb ǀkha ǃhoa tsî mîde ams âb ǃnâ nîra ǁgui; o ta ge tita sa ams ǀkha nîra hâ; o ta ge tita nîra ǁkhāǁkhā kho tare-e kho nî dī ǃkhaisa.
w10-E 10/15 14
Jehovaba mati ǃgôaǁnâsensa ra mû?
Jehovab ge Moseba ǁgaumâisa dīǀoaǀoasa xu ge ǂkhā tama hâ i. Xaweb ge Aronna ge ǁgaumâi îb Moseba hui nē ǁgaumâisa dīǀoaǀoasa. (Eks. 4:14-17) Jehovab ge kurigu ra ī khami Moseba gere mâxōǀkhā tsî ǂhâb hâ xūna gere mā bi ǁîb ǁgaumâisa dīǀoaǀoasa. Nētsēs tsîna da ge ǂgomǃgâsiba nî ūhâ Jehovaba ǂansa ūhâ ǃgâsan ǃnâ-ū nî hui da ǃkhaisa i da sida ǁgaumâisa dīǀoaǀoa. Elobmîs ge ra mîmâi Jehovab nî hui da ǃkhaisa ǁîb mîmā da hâ sîsenni ǃnâ.—2Kor. 3:5; “The Happiest Years of My Life” di hâ boksisa mû re.
Gagasi xūna ǀō-aisase ôaǃnâs
(Eksodus 4:24-26) Tsî i ge daob ai ge ī, sâu-ommi ǃnâ, ob ge ǃKhūba ǁîba ǃoa tsî ge ǃgam bi ǂgao. 25 Os ge Siporasa ǀuigôa-e ū tsî aikhōb ǁîs ôab diba ge ǃgao tsî ǁîba ǂaira âb aiǃâ aoǁgui tsî ge mî: Amase, sats ge ǀaoǃkhoeǂgâsabese ība te. 26 Ob ge ǁîba ge ǀûǀkhā bi. ǁNāǃnubais ge ǁîsa: ǀAoǃkhoeǂgâsabets, ti ge mî, ǃgaos ǃaroma.
w04-E 3/15 28 ¶4
Khomai-aon dîdi
Siporas ge “sats ge ǀaoǃkhoeǂgâsabese ība te” di a mî o, os ge nēsa ǃgâise ge ǀō tama hâ i. Nēsa tae-e ǁîs xa ra ǁgau? ǃGaos xa hâ ǂhanuga ǁnâuǀnams ǃnâ-ūs ge Siporasa Jehovab ǀkha ǀhōsagusisa ge omkhâi. Ega ge Israelǁaes ǀkha a dī-e ǃgaeǀhaos ge ra ǁgau, Jehovab kaikhoeb tamas ka io kaikhoes ase ra mûhesa. (Jer. 31:32) Jehovaba ǀaoǃkhoeǂgâsabe di ǂgais ǃnâ-ūs ge Siporasa ge ǁgau nē ǃgaeǀhaosas ra ǃgôaǃgâ ǃkhaisa. Nēs ge ǁîs ge Jehovaba nē ǃgaeǀhaos ǃnâ-ū a ǃgame khami gere mûsen. Elobas ge ǁnâuǀnam amaga i ge ǁîs ǀgôab ûiba ǁkhōǁkhōsasib ǃnâ ge hâ tama hâ i.
(Eksodus 5:2) Xaweb ge Faraoba ge mî: Tariba ǁnā ǃKhūb, dommi âba ta nî ǁnâuǀnamma, Israela ta nî doe kaiga? Tita ge ǁnā ǃKhūba a ǀū, tsî ta ge ǁkhāti Israela doe kai tide.
it-2-E 12 ¶5
Jehova
ǂAns ge xū-i xa ǂan di ǀgui ǂâibasen tama hâ. Nabali ge Davib ǀonsa ge ǂan i xawe noxoba ge dî, “tariba Daviba?” ǀNî hâ mîdi ǃnâb ge “ǁîba matikōse a kai?” di gere dî. (1Sam. 25:9-11; ǀgopeǀnō re 2Sam. 8:13.) Faraob ge Moseba ǃoa sao ra-e ge mî: “Tariba ǁnā ǃKhūb, dommi âba ta nî ǁnâuǀnamma, Israela ta nî doe kaiga? Tita ge ǁnā ǃKhūba a ǀū, tsî ta ge ǁkhāti Israela doe kai tide.” (Eks. 5:1, 2) Nēs ǃnâ-ūb ge Faraoba gere mî Jehovabab a ǀū ǃkhaisa tamas ka iob ǁîba Egipteǁî gao-aoba ǂgaeǂguis ǁkhāsiba ūhâ tama hâsa. Tsîb ǁÎb ǂâisa a dīǀoaǀoa ǁoasa Moseb tsî Aronni tsîkha ge ǂhôa khami. Xawe nēsi i ge Faraob tsî Israelǁaes tsîna nē ǀons di ǂâibasensa nî ǂan. Jehovab ge Moseba a ǁgau khami i ge nēsa Elob ga ǁîb ǂâibasensa Israelǁîn ǃoagu dīǀoaǀoa, ǁîna ǃnorakai, mîmâisa ǃhūba ǁîna mā tsî ǁîb ǃgaeǀhaos ǁîn kai ǁgûgu ǀkhab ge dīsa dīǀoaǀoa o, o ǀgui nî ī. Elob ge nēs xa ge mî: “O du ge sado nîra ǂan, tita a ǃKhū sadu di Elo.”—Eks. 6:4-8; mû re HOAǀGAIXAB di hâ ǃâba.
Elobmîs khomai ǃâs
(Eksodus 4:1-17) ǃNubaib ge Moseba ǃeream tsî ge mî: Xawe kō, ǁîn ge ǂgom te tide, tsî ǁkhāti ti domma ǁnâu tide; ǃKhūb ge sa tawa ǂhai tama hâ tin kom ǁîna nîra mîo. 2 Ob ge ǃKhūba ǁîb ǃoa ge mî: Tare xū-e sa ǃomǁaets ūhâ-e? Ob ge: ǀKharu-i, ti ge mî. 3 Ob ge ǁîba ge mî: ǃHūb ai aoǁgui i! Ob ge ǁî-e ǃhūb ai ge aoǁgui. ǃNubai i ge ge ǀao kai; ob ge Moseba ǁîba xu ge ǁhâ. 4 ǃNubaib ge ǃKhūba Moseb ǃoa ge mî: Sa ǃomma ǀhōǂui îts ǂareb ai ǃkhō bi! Ob ge ǃommi âba ǀhōǂui tsî ge ǃkhō bi; ob ge ǃomǃnāb âb ǃnâ ge ǀkharu kai. 5 ǁÎn nî ǂgomga, ǃKhūb ǁîn îgu di Elob, Abrahammi di Elob tsî Isaki di Elob tsî Jakob di Elob go ǂhai tsi ǃkhaisa. 6 Tsîb ge ǃKhūba ǃaruǀî ǁîb ǃoa ge mî: Sa ǃomma nēsi sa ǁkhaib ǃnâ ǀhōǂgā! Ob ge ǃommi âba ǁîb di ǁkhaib ǃnâ ge ǀhōǂgā; ǁnās khaoǃgâb ge ǁîba ge ǂgaeǂui, tsî mû, ǃommi âb ge ǃomamaxa ge i, ǃuri tsamaros khami. 7 Ob ge ǁîba ge mî: Sa ǃomma ǁkhawa ǀhōǂgā sa ǁkhaib ǃnâ. Ob ge ǃommi âba ǁkhawa ǁîb di ǁkhaib ǃnâ ge ǀhōǂgā; ǁnās khaoǃgâb ge ǁîba ǁkhaib âba xu ge ǂgaeǂui, tsî mû, ob ge ǁkhawa nau ǁgans khami ge ī. 8 Tsî i ge nîra ī, ǂgom tsi taman ga io, tsî ǁkhātin ga dommi ǂguro saos diba ǁnâu tama io, on ge dommi nē ǀuni saos diba nîra ǂgom. 9 Tsî i ge nîra ī, nē ǀgam saoran ga ǂgom tama io, tsî sa domma ǁnâu tama io ots ge Nylǃāb di ǁgamgu xa ū tsî nî ǂnâsab ai ǁhō gu; o gu ge ǁnā ǁgamgu, Nylǃāba xuts nî ūga nîra ǀao kai ǂnâsab ai. 10 ǃNubaib ge Moseba ǃKhūb ǃoa ge mî: Okha, ǃKhūtse, tita ge ǃgâise a ǃhoa ǁoa khoeta, ǁarisa xus kao, aetsēsa xus kao ǁnā ǁaeb ǁîb aits sa ǃgāta ǀkha goro ǃhoaba xus kao: ǃGom ams â-i tsî ǃgom nams â-i ta kom titao. 11 Ob ge ǃKhūba ǁîb ǃoa ge mî: Tari-e khoeba amsa ge dība, tsî tari-e ǃgomeb, ǂganaǂgae hâb, mû rab tsî ǂgī hâba ge dī? Tita ǁî tama ta hîa ǃKhūta? 12 Îts ǁnâi ǃgû, o ta ge tita sa ams ǀkha hâ tsî nîra ǁkhāǁkhā tsi, tare xū-ets nî ǃhoa ǃkhaisa. 13 Xaweb ge ǁîba ge mî: Okha, ti ǃKhūtse, ǂgaots ra khoeb hoab di ǃomma sî re! 14 ǃNubaib ge ǃKhūb di ǁaiba ge khâi Moseb ǂama, tsîb ge ǁîba ge mî: Aronni, Leviǁîba sa ǃgâsa tamaba? Tita ge a ǂan, ǁîb ǃgâise a ǃhoa ǁkhā ǃkhaisa, tsî kō ǁkhāti, ǁîb ge nîra ǂoaxa, ǃgûǃoa tsib nîse; satsab ga mûo, ob ge ǂgaob âb ǃnâ nîra ǃgâiaǂgao. 15 Ots ge satsa ǁîb ǀkha ǃhoa tsî mîde ams âb ǃnâ nîra ǁgui; o ta ge tita sa ams ǀkha nîra hâ; o ta ge tita nîra ǁkhāǁkhā kho tare-e kho nî dī ǃkhaisa. 16 Tsîb ge ǁîba sa amǃnâs ai ǁaes ǀkha nîra ǃhoa; tsî i ge nîra ī, ob ge ǁîba satsa amse nîra ība, ots ge satsa ǁîba Elose nî ība. 17 Îts ǁnâi ǁnā ǀkharus, ǁîs ǀkhats ǁnā saode nî dīsa sa ǃomǁae ū.