ǀNamsabe-e ǃgâiaǂgaob ǀkha kōǃgâ ǀgara

1-2. Kaira tamas ka io ǀaesen hâ ǀnamsabe-e du ga kōǃgâ ob Jehovaba mati sadu xa ra tsâ? (ǂKhoamîdi 19:17) (Ai-īsiga mû re)

ǃGÂSAB Jin-yeoli Koreab ǃnâ ra hâb ge ra mî: “Tita tsî ti taras ge 32 kuriga ǃgamme hâ, ti taras ge ǁaeroba ǀaesen hâ tsî ti huiba ǂhâ hâ. ǁÎs ge kaise ǁkhōǁkhōsa ǀaeba ūhâ tsî ǃgomse ǁîs sorosa ra sîsenu. Ti tarasa ta ge kaise a ǀnam tsî ǃgâiaǂgaob ǀkha ǁîsa ra kōǃgâ. Mâ ǃuis hoasas ge ǁîs ǂhâsigu ǃoagu kuruhe hâ kharob ǃnâ ra ǁgoe. Tita ge ǁîs xōǀkha ra ǁgoe tsîm ge ǃnomde ǃkhōgu hâse ra ǁom.”

² ǀNîsi du ge omaris ǁani-i tamas ka io ǀhōsa-e ra kōǃgâ. ǁÎ-e du ge ǃgâiaǂgaob ǀkha ra hui ǀnam-i du a amaga. ǀNamsabe-e kōǃgâs ǃnâ-ū du ge ra ǁgau Jehovaba du a ǀnamsa. (1Tim. 5:​4, 8; Jak. 1:27) Xawe i ge ǀnî ǁaega supu tama hâ sadu ǀnamsabena kōǃgâsa. ǀNî ǁaega du ge naun mû tama hâ ǃgomsiga ra ǃkharuǃnâ. ǀNî ǁaega du ge a tsâ ǁkhā khoen ǁnâuǃā tama hâsa tae-e du ra ǃkharuǃnâsa. Khoen ge ǀnom du rasa ra mû xawe a ǀū ǀnî ǁaegu ai du ra tsûaǂgaosa. (Psa. 6:6) Khoen ga ǃkhâruǃna du ra xūna mû tama i xaweb ge Jehovaba hoana ra mû. (ǀGopeǀnō re Eksodus 3:7) Dī du ra sîsenni, ā du ra ǁaeb tsînab ge ra mû tsîb ge kaise a ǀnam du. (Psa. 56:8; 126:5) Jehovab ge ra mî sadu ǀnamsabe-e du ga kōǃgâ o du ǁîba surude hâsa. Tsîb ge ǁnās ǀkha ra mîmâi mādawa-am dub nîsa dī du ran hoan ǃaroma.—Khomai re ǂKhoamîdi 19:17 sa.

3. Abrahammi tsî Sara hâra mâ ǃgomsiga ge hōǃâ Teraba ra gere kōǃgâ ǁaeb ai?

³ Elobmîs ǁaeb ǃnâs tsînan ge khoena ǀaesen hâ tamas ka io kaira hâ khoena gere kōǃgâ. Aiǁgause Saras tsî Abrahammi xa ǂâi re. Abrahammi dadasab Terab ge ge 200 kurixa i Ursa xūn gere īo. Terab ge ǁnātikōse kaira hâ-i xaweb ge Ursa xu ge ī. ǁÎn ge 960 kilometerga Harans ǃoa ge ī. (Gen. 11:​31, 32) Abrahammi tsî Saras tsîn ge Teraba ge ǀnam i xawe i ge ge supu tama hâ i kaira-aoba kōǃgâsa, ǃgōsase daob ain ge hâ i ǁaeba. Īǁkhāsib ga hâ on ge ǁîna ǃgapi ǃnaigu tamas ga io donkigu ǀkha gere ǃgapi tsîs ge nēsa ǀnîsi Teraba ge ǃgomba i. Abrahammi tsî Saras tsîn ge ǀnî ǁaegu ai gere tsau. Mati ǀgui-i ga ī xaweb ge Jehovaba ǁîra ǂhâ ra ge hâ i huiba gere mâ. Jehovab ge Abrahammi tsî Saras tsîna hui khamib ge sadu tsîna huiba nî mā î du aiǃgû tsî sadu ǀnamsabe-e kōǃgâ.—Psa. 55:22.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ ǃGâiaǂgao du ga o i ge nî supuba du sadu ǀnamsabe-e kōǃgâsa. (ǂKhm. 15:13) ǂÂis ǃnâ ūhâ ǃgâiaǂgao ǁkhā du ge a ûib ga ǃgom xawe. (Jak. 1:​2, 3) Tae-e du a dī ǁkhā î du ǃgâiaǂgao ǀgara? Jehovaba ǃoa ǀgore ǀgara îb hui du ǃgâi mûǂuiba ūhâs ǀkha. ǀNî hâ xūn tsîn ge hâ hui du ǁkhā ana î du ǃgâiaǂgaob ǀkha hâ ǀgara. Nē ǁkhāǁkhāǃâs ǃnâ da ge ǀnî xūna nî ǃhaoǃgao. Naun a hui du ǁkhā ǀgaub tsîna da ge nî ǃhoaǃgao. ǂGurose da ge nî mû tae-i ǃaroma da ǃgâiaǂgaob ǀkha sida ǀnamsabe-e nî kōǃgâsa. Tsî tae-i ǃaromas nēsa ǀnîsi a ǃgom ǁkhāsa.

NAUNA KŌǃGÂSA MATI SADU ǂKHÎBA TSÂǀKHA ǁKHĀ?

5. Kōǃgâ-aose da tae-i ǃaroma ǃgâiaǂgao hâse nî hâ ǀgara?

⁵ Khoe-e kōǃgâs xa ra ǃaromahe ǃgomsin xa ǀgui da ga ǂâi, o da ge ǁîna kōǃgâs ǀgaiba ǂoaǃnâ ǁkhā. (ǂKhm. 24:10) Tsau da ga o da ge ǁîna khoexaǃnâse hâ-ū hō tide. Nauna da ga kōǃgâ ǁaeb ai i tae-i ǃaroma ǃgom ǁkhā ǃgâiaǂgaoba ūhâsa?

6. Tae-i ǃaroman ǀnî kōǃgâ-aona ra tsau?

⁶ Kaise du ge tsau ǁkhā. ǃGâsas Leahs ge ra mî: “Xūn ga ǃgâise ǃgûǁnâ xawe ta ge noxopa tsēs ǀams ai ra ǂâiǂhansen tsî ta ge ǀgai-ose ra tsâ. ǀNî ǁaega ta ge ǀgaib tsîna ūhâ tama hâ smsa ǃereamsa.” ǀNîn ge ǂaunâse ǁom tsî sâǁaeb tsîna ūhâ tama hâ tsî nēs ge ǂhâbasa dīsa. ǃGâsas Ines ge ra mî: “Tita ge ǂaunâse ǁom tama hâ. Mâ iri hoaba ta ge ǃuia ra khâimâ î ta ti ǀuiǁgûsa kōǃgâ. ǂGui kurigam ge ti-ao hâma sâǁae ro-e ūhâ tama. “ Kōǃgâ-aon ge ǁkhoaxa ǁaeba ǀhōsan ǀkha ūhâ tama tamas ka io ǀnî xūna Jehovab ǃoabas ǃnâ dīho tama, kaira khoe-en ǀoasase ra kōǃgâ amaga. ǁNās ǀkhan ge ra ǁkhore naun ǀkha hâsa tsî nēs xa ra tsûaǂgao kaihe ǁkhān an hoanan dīhō tama xui-ao.

7. Tae-i ǃaroman kōǃgâ-aona ǀhapistâsen tamas ka io ǃoab tsâsiga ra hōǃâ?

⁷ ǀNîsi du ge ǁgaise a tsâ ǁkhā, ǁkhā du an hoana du ǀnam du a khoe-i tamas ka io kaira-e dība hō tama amaga. ǃGâsas Jesikas ge ra mî: “ǀNî ǁaega ta ge ra tsâ ti dadaba ta ǃnāsa-e a dība ǁkhāsa. Tsî ta ge ǁgaise ra tsâ ǁaeba ū tsî ta ga sâ tamas ka io dī ǂgao tara xu-e a dī o.” Kōǃgâ-aon ge ra ǀhapitsâsen ǀnî ǁaegan ǁîn mâsiba ūǃoa ǂgao tama hâ amaga. ǀNîn ge ra ǂâiǂhansen ǃnāsa-en dī tama hâsa ǁîn ǀnamsabena kōǃgâsa. Tamas ka ion ge ra tsâ ǁnā khoe-en aiǃgû tsî kōǃgâ ǁoasa. Tsîn ge tsaun ga o ǂâibasen taman hâ xū-e mî tamas ka io a dī ǁkhā. Nēn hoan ge ǁîna ǁgaise a tsâ kai ǁkhā. (Jak. 3:2) ǀNîn ge ra tsûaǂgao ǁîn ǀnamsaben ǀaeb xa ra ǂkhabu ǀgausan ra mû o. ǃGâsas Babaras ge ra mî: “Kaise i ge a tsûaǂgaoxa mûsa mati i ǀhōsa-e tsēs hoasa ra ǀaeǂgâ ǀgausa.”

8. Aiǁgau-e mā re mati i kōǃgâ-ao-e ǃgôaǃgâs mîdi xa tsâǀkhahe ǁkhā ǀgausa?

⁸ ǀNîsi du ge a tsâ ǁkhā naun dība nî du ra xūna ǃgôaǃgâ tamasa. Tae-i ǃaroma? ǂGui khoen sadu ra dī sîsenni ǃgao gangan ti mî tama, tamas ka io koa du tama amaga. Khoe-i ga dī du go sîsenni ǃgao gangan du os ge nēsa ra ǃgâiaǂgao kai du. (1Tes. 5:18) ǃGâsas Melisas ge ra mî: “ǀNî ǁaega ta ge ra ā tsau tamas ka io tara ǂkhabuǂâi xui-ao. Kōǃgâ ta ran ga gangan te o dī ta ra xūn hoan ǃaroma o ta ge kaise ra ǃgâiaǂgao. Nēs ge ǀgaiba māte tsî ra ǂkhâǃnâ te î ta aiǃgû tsî ǁîna kōǃgâ.” ǃGâsab Ahmandub tsî ǁîb taras tsîn ge ǁîs ǁnuris kaise ǀaesen hâsa ra kōǃgâ. ǁÎb ge ra ǁguiǃā, mati ra ra tsâsa ǁîra ǁnuris ga gangan ra o. ǁÎb ge ra mî: “Sîm ǁnuris ge ǁnâuǃā tama taen hoanam ra dīsa ǁîsa kōǃgâs ǃaroma. Xawem ge ra ǃgâiaǂgao ǁîs ga gangan mî tamas ka io xoa o ‘ǀnam ro ta ge a.’”

ǂKHÎBA DU ŪHÂ ǀKHARA ǁKHĀ ǀGAUS

9. Kōǃgâ-aona mati nî ǃgamǃgamsenxa?

⁹ ǃGamǃgamsen xa. (ǂKhm. 11:2) Hoaǁae da ge ǁaeb tamas ka io ǀgaib tsîna ūhâ tama hâ î da dī ǂgao ta ra i hoa-e dī. Xawe du ge mîǁgui ǁkhā taen hoana du ra dī ǂgaosa. ǀNisi du ge hoaǁae khoen ra dī kai du xūn hoana dīǁoa. Ti i ga īo du ge tā ǁgaise nî tsâ ǃgamǃgamsenxasiba i ra ǁgau amaga. Naun ga hui du ǂgao o ǃgôaǃgâsiba ǁgau tsî ǁîna mā-am în hui. ǃGâsab Jayb ge ra mî: “ǂGui xūna da ge tsēs ǃnâ a dī ǁoa. ǁKhā da i ǀgui-e da ga tsēs ǃnâ dī o da ǃgâiaǂgaoxase nî hâ ǀgara.”

10. Khoe-e du ga kōǃgâ o du tae-e nî ǁnâuǃā? (ǂKhoamîdi 19:11)

¹⁰ ǁNâuǃāxasiba ǁgau. (Khomai re ǂKhoamîdi 19:11 sa.) ǁNâuǃāxa du ga o du ge ǃnomsase nî hâ ǀnamsabe-i ga ǃgâi tama xū-e a mî tamas ka io dī o. ǁNâuǃāxa khoe-i ge ra dītsâ khoe-i ra tanisen ǀgauba ǁnâuǃāsa. ǀNî ǀaegu ge a ǃaroma ǁkhā khoe-e hoaǁae i dī tama hâ xūna dīsa. (Aoǁn. 7:7) Aiǁgause, ǃgâi tsî khoexaǃnâ ge i khoe-i ge nēsi sadu ǀkha a ǂkhaba tsoatsoa ǁkhā. Tamas ka io i ge ǁî-e mâ xu-i hoa i xa a ǂhani-e ǁkhā tamas ka io ra ǁaixa. ǀNîsi du ga ǁkhōǁkhōsa ǀae-e ūhâ khoe-e kōǃgâ o i ge kaise nî ǃgâi i du ǁî-i ūhâ ǀaeb xa ǃnāsase ǁkhāǁkhāsen. ǁNā khoe i ūhâ ǀaeba ǁnâuǃās ge nî hui du ǁî-i ra mî tamas ka io dī khoexaǃnâ tama xūn ǁîn ǀaeb xa ra ǃaromahesa.—ǂKhm. 14:29.

11. Mâ ǂhâǂhâsa xūnan kōǃgâ-aona tsēs hoasa nî dī? (Psalmdi 132:​4, 5)

¹¹ ǁAeba ǁamaǂui tsî sadu ǀhōsagusisa Jehovab ǀkha ǀgaiǀgai. ǀNî ǁaegu ai du ge dī ǂgao du ra xūn ai ǂkhari ǁaeroba a sîsenu ǁkhā î du “ǂhâǂhâsa” xūna ǂgurose dī. (Fil. 1:10) Aiǁgause, ǁaeba du ge ǂhâhâ î du sadu ǀhōsagusisa Jehovab ǀkha ǀgaiǀgai. Davidi ge Jehovaba ǂgurose ǁîb ûib ǃnâ gere mâi gao-aob ge i xawe. (Khomai re Psalmdi 132:​4, 5 sa.) ǁNās ǁkhās khami da ge ǁaeba tsēs ǃnâ ǁamaǂui tsî Elobmîsa khomai tsî nî ǀgore. ǃGâsas Elishas ge ra mî: “Jehovaba ǃoa ǀgore, Psalmde khomai tsî ta ga khomai ta go mîde ǃgamse ǂâiǃgâ, o ta ge ǃnomsase tsâ tsî ǃgâiaǂgaoba ra hō. Jehovaba ǃoa ǀgores ge ǃnāsase ra hui te. Tsēs ǃnâ ta ge ǂguiǃnāde Jehovaba ǃoa ra ǀgore îb hui te.”

12. Tae-i ǃaroman kōǃgâ-aon tsîna ǁîn ǂurusiba nî kōǃgâ?

¹² ǁAeba ǁamaǂui tsî sadu ǂurusiba kōǃgâ. Kōǃgâ-aon ge kaise a ǀhabe tsî ǁnās ǀkha ǂauna ǁaeba ūhâ tama ǃgâi ǂûna ǁama tsî sâisa. Xawe sadu soros tsî ǁnâuǃāb tsîn ge ǃgâi ǂûna ǂûs tsî sorosise ǃâisens tsîna ǂhâ hâ î du ǂuruse hâ ǁkhā. ǂAuna ǁaeba du ga ūhâ tama i xawe i ge a ǂhâǂhâsa î du ǃgâi ǂûna ǂû tsî ǃâisen. (Efe. 5:​15, 16) ǁNās ǂam-ai ǂaunase ǁom. (Aoǁn. 4:6) ǂKhûs xa ǁkhāǁkhāsen hâ khoen ge ra mî, ǁom da ga os sida ǂkhûsa ra ǀasaǀasahesa. ǀGui khomaiǃâs ǂurusib xa hâs ge ra mî, khoe-i ga ǂaunase ǁom oi ge ǁnatikōse ǂâiǂhâsen tama tsî ǃgom mâsigu ǃnâ ǃnomsase ra hâ. ǁKhoaxa ǁaeba ūhâs ǃaromas tsîna du ge ǁaeba nî ǁamaǂui. (Aoǁn. 8:15) ǀGui ǃgâsas ge ra ǁguiǃā tae-i ǁîsa ra hui sa is ǃgâiaǂgaob ǀkhā hâ ǀgara. ǁÎs ge ra mî: “Tita ge sores ga ǂoaxa o ǃauga sī ra hâ. ǁKhâb ǃnâ ta ge ǀgui ǃnāsa ra dītsâ î da ǁkhoaxa ǁaeba ti ǀhōsan ǀkhā ūhâ.”

13. Tae-i ǃaroma i ǃgâi âisa? (ǂKhoamîdi 17:22)

¹³ Âi kai du ra xūna ôa re. (Khomai re ǂKhoamîdi 17:22 sa; Aoǁn. 3:​1, 4.) Âis ge sa ǂurusib ǃaroma a ǃgâi. Khoe-e du ra kōǃgâ hîna i ge ǃâubasen tama du hâ xū-e go ī, o du ge ǀnisi ǁnā i xa âi tsî ǀorose nî ǁaixa. ǁNā khoe-i ǀkha du ga ǀguiba âi, ob ge sadu ǀnamma nî ǀgai.

14. Mati i ǂgomǃgâ du ra ǀhōsa-i ǀkha ǃhoasa a hui du ǁkhā?

¹⁴ ǂGomǃgâ du ra ǀhōsa-i ǀkha ǃhoa. ǂKhîse hâsa du ga dītsâ xawe du ge ǀnî ǁaega a ǂâiǂhasen ǁkhā. ǁNās ka io du ge ǃgâise du a ǂan ǀhōsa-i ǀgoraǃgâ du tide i ǀkhā a ǃhoa ǁkhā. (ǂKhm. 17:17) ǁÎn ge sado ǃgâ tsî nî ǂkhâǃnâ ǂhâ du hâ ǁaeb ai î du ǁkhawa ǃgâiaǂgao.—ǂKhm. 12:25.

15. Paradais xa ǃhoasa mati nî ǂkhî kai du?

¹⁵ Mûnan-aisen sadu ǀnamsabe-i ǀkhā paradais ǃnâ. ǂÂis ǃnâ ūhâ re kaira tamas ka io ǀaesen hâ khoe-e du ge ǀamose kōǃgâ tide. Jehovab ge ǂgaoǀkha tama hâ în khoena nē sîsen-e dī. (2Kor. 4:​16-18) Hānîǁaeb ǃnâ da ge Jehovab ra ǂgaoǀkha da khami nî ûi. (1Tim. 6:19) Sadu ǀnamsabe-i ǀkha du ga paradais ǃnâ du ǀguiba nîdī xūn xa ǃhoa, os ge nēsa hoa ǀgam ro nî ǂkhî kai. (Jes. 33:24; 65:21) ǃGâsas Heathers ge ra mî: “Kōǃgâ ta ra na ta ge ra mîba, ǀgūǁae da ge ǀguiba ǂom, ǀguiba ǃkhoe tsî ǀurihāga ǀguiba nî ǃgabi. Tsî da ge ǀnamsaben khâisa nî hōna pere-e amba tsî ǂû-e nî sâiba. ǀGuiba da ge Jehovaba sada ǃâubasens !gao nî gangan.”

NAUN A HUI ǁKHĀ ǀGAUS

16. Kōǃgâ-ao-e da mati sida ǀhaohâb ǃnâ a hui ǁkhā? (Ai-īsiba mû re.)

¹⁶ Sadu ǃgâsan ge hui du ǁkhā î du ǂhâ du hâ sâba hō. ǃGâsan ge ǁaeba ǁamaǂui tsî sadu ra kōǃgâ ǃgâsa-i ǀkha hâ ǁkhā. ǁNās ge ǁaeba nî mā du î du sâ tsî dī ǂgao du ra xūna dī. (Gal. 6:2) ǀNî ǃgâsan ge nēsa xoamâi hâ în ǂan ham-i saora wekheb ǃnâ nî huisa. Natalia ti ǀon hâ ǃgâsas ge ra mî: “ǀNî ǃgâsab ǁîn ǀhaohâb ǃnâb hâb ge ǁîs kaikhoeb ǃgû tamaba ǀgam tamas ka io ǀgui ǃnâsa ra sari. ǁÎkha ge ǀguiba aoǁnâ sîsenni ǃnâ ǁhao, ǀguiba ǃhoa tsî movina ǀguiba ra kō. Ti aob ge kaise ǃgâise ra tsâ ǁîb ǀhōsab ǀkhab ga ǃgâi ǁaeba ūhâ o. Nēs ge tita tsîna ǁaeba ra mā, sâ tsî ǂgao ta ra xū-e dīsa.” ǀNîn ge māsenxase kōǃgâ-ao-e hui ǁkhā în ǃuia khoe-e kōǃgâ.

17. Mati da kōǃgâ-aona ǀhaodi ai a hui ǁkhā?

¹⁷ ǀHaos ǁaeb ai du ge kōǃgâ-ao-e hui ǁkhā. ǀNîn ge ǀhaohâb, ǀkharib kai ǀhaos tsî ǂharis kai ǀhaos ai ǃnāsa-e hō tama hâ ǁîn ǀnamsabenan da kōǃgâ amaga. ǁNān hîna ǀhaohâb ǃnâ hân ge a hui ǁkhā în kairan tamas ka io ǀae hân ǀkha ǀguiba ǂû ǀhao. Kaira i tamas ka io ǀaesen hâ i ga omsa xū a īǁoa,o da ge hui nî ǁkhā. ǁÎ-i omsa ǃoa da ge īǁkhā î-i kōǃgâ-ao-e ǀhaosa ǃoa īǁkhā.

18. Tae-i tsîna da kōǃgâ ra khoe-e a dība ǁkhā?

¹⁸ Nauna ra kōǃgâna da ge ǂkhâǃnâ tsî ǀgoreba ǁkhā. ǀHaohâb ǃûi-aogu ge ǁaeba xu ǁaeb ǀkha nauna ra kōǃgâna nî ǂkhâǃnâ. (ǂKhm. 27:23) Tsî hoa da ǀhaohâb ǃnâ hâ da ge kōǃgâ-ao-e nî mîba, ǁîna da a ǀnam tsî dīn ra xūna ra ǃgôaǃgâsa. ǁÎn tsîna da ge ǀgoreba ǁkhā, îb Jehovaba ǁîna ǀgaiǀgai tsî hui în ǂkhîba ūhâ ǀgara.—2Kor. 1:11.

19. Tae-i ǃoa da nî mûǂui?

¹⁹ Jehovab ge ǀgūǁae ǃgomsigu tsî tsûaǂgaob tsîna ra ǃaroma xūna nî ūbē. ǀAeb tsî ǁōb tsîn ge ǃaruǀî hâ tide. (J.ǂHa. 21:​3, 4) ǃHoran ge ǁkhama-i khami nî uri. (Jes. 35:​5, 6) Kairasis tsî ǀaesen hâna kōǃgâs xa ra ǃaromahe xūn ge “ǂâihō-e tide.” (Jes. 65:17) Jehovab buruxa mîmâidi nî dīǀoaǀoahes kōse da ge ǂgomǃgâ ǁkhā ǁîb ǁnāxuǃnâ da tidesa. ǁÎb ai ta ga ǂgomǃgâ ob ge nî hui da, î da “taniǀnamxasib ǀkha mâǃkharu.”—Kol. 1:11.