Aiǃgû î Jehovab ǀkhats ūhâ ǀhōsagusisa ǀgaiǀgai

1. Khoesiba mâ xūn ǀnîna ǂhâhâ? (Mateub 5:3)

JEHOVAB ge a ǂan khoesib tae-e ǂhâhâsa. Aiǁgause da ge ǂû-i, saran tsî ǁan ǃnâ da nî ǃnorasa ǃkhai-e ǂhâhâ. Nē xūna da ga ūhâ tama io da ge ǁō tamas ka iob ge ûiba kaise ǃgomba da ǁkhā. Jehovab ge a ǂan khoesib ǀnî hâ xū-e ǂhâhâsa. ǁÎb ge ǁîba da nî ǂan ǁkhāsib ǀkha ge kuru da tsî ra ǂhâba î da ǁîb ai ǂgomǃgâ îb daoǁgau da. (Khomai re Mateub 5:3 sa.) Ama ǃgâiaǂgaoba da ga ǂhâba, o da ge nî mûǂan Elob ǀkha da ǀhōsagusisa ǂhâhâsa.

2. Sida mâsiba mati a ǀgui xoaǀgoras ǃnâ ra mî-e khoe-i mâsib ǀkha?

² Nē mîs ǂâibasens ge ra ǁgau khoe-i hîna huiba ǂhâhâ-e. Mûnan-ai re khoe-i hîna ǀurixa sarana ana hâ-e tsî ǂû-i nî xū-e ūhâ tama hâ-e. ǁÎ-i ge omsa-i ūhâ tama hâ amaga sores ǃnâ ra ǂnû tsî i ge ǃuia kaise ra ǃkhai. ǁÎ-i ra mûsen ǀgaub ǃaroman ge khoena ǁî-e ra ǂhābē. ǁÎ-i ge tsauba ra hōǃâ tsî a ǂkhîoǃnâ. ǁÎ-i ge a ǂan huiba i ǂhâhâ ǃkhaisa ûi ǂgao i gao. ǁNās ǁkhās khamin ge ǁnān hîna Eloban ǂhâhâsa a ǂana ǁîb ai huiba ǂgan tsî ra ǃgâ.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge ǂgurose nî ǃhoaǃgao Jesub ai ge huiba a ǀkhoma kaikhoesa xu da tae-e ra ǁkhāǁkhāsensa. ǁKhāǁkhāsen da ge nî mati da ǁîs aiǁgausa ǁgae ǁkhāsa, ǂhâba da ga o îb Jehovaba daoǁgau da. Tsî da ge Paulub, Petrub tsî Davidi tsî gu aiǁgaude nî ǃhoaǃgao hîna ge Elob daoǁgausa ǁîgu ûib ǃnâ ǂhâhâ î ga.

ǂHÂ DA HÂ ǀŌ-AISA ǃNONA ǀGAUGU

4. Nē Kanaanǁî tarasa Jesub tae-e nî dība sisa gere ǂhâba?

⁴ ǀGui tsēs ge Kanaanǁî tarasa Jesub dawa ge sī. ǁÎs ǀgôas ge demon gu xa ge hâǃnâhe hâ i. (Mat. 15:​21-28) Nē taras ge ǃhonǁgoa tsî Jesuba ge ǂgan îb ǁîs ôasa hui-e. Nē Kanaanǁî taras ge ǃgâi ǀgauga gere ǁgau Jesub dawas ge sīo. Hā re î da ǃnona ǀgauga kō nē tarasa da a ǁgae ǁkhā ga.

5. Jesuba tae-e nē tarasa ge dība tsî tae-i ǃaroma? (Ai-īsiba mû re.)

⁵ Nē Kanaanǁî taras ge ama ǃgamǃgamsenxasiba gere ǁgau. Tae-i ǃaroma da ti ra mî? Jesub ge ǁîsa ǂkhari ariron ǀkha ge ǀgopeǀnō xawes ge ǁîsa ge ǁaixa tama hâ i. Tae-ets ga dī hâ Jesub ga sats ǃoa ti mî hâo? ǁAixa tsîts ga Jesub ai huiba ǂgan ǀû hâ? Kanaanǁî taras ge ti ge ī tama hâ i. ǁÎs ge ge ǃgamǃgamsenxa i tsî xū-e ge dī. Tsîs ge aiǃgû tsî Jesub ai huiba ge ǂgan ǀgara. Tae-i ǃaromas ge ǁnāsa dī? Jesub ge ǁîb ǃnâs ūhâ ǀgaisa ǂgomsa mû ob ge ǁîsa ge hui. Jesub ge Israelǁî khoen ǀguinab nî huise ge sî-e. Xaweb ge aiǃgû tsî Kanaanǁî tarasa hui tsî ǁîs ǀgôasa ge ǂgauǂgau.

6. Tae-e da Kanaanǁî tarasa xu ra ǁkhāǁkhāsen?

⁶ Jehovab daoǁgaude xu da ga ǀama ǂgao, o da ge ǁnā taras aiǁgausa nî ǁgae. ǃGamǃgamsenxa tsî da ge Elob ai huiba nî ǂgan ǀgara. ǀGaisa ǂgoms tsîna da ge Jesub Xristub ǃnâ nî ūhâ tsî ǁîb ǁgaumâi hâ ga îgu ǁîb ǁkhāǁkhāsabena daoǁgau. (Mat. 24:​45-47) Jehovab tsî Jesub tsîkha ge a ǂkhî ǃgamǃgamsenxa, huiba ǂgan ǀgara tsî da ga ǂgomsa ūhâo. Nēsa da ga dī, okha ge hui tsî nî daoǁgau da. (ǀGopeǀnō re Jakobub 1:​5-7 sa.) Hā re î da mû Jehovab mati daoǁgau da tsî ǂhâ da hâ-e ra mā dasa î da ǃgâiaǂgao. Mû da ge nî tae-e da Petrub, Paulub tsî Davidi tsîga xu a ǁkhāǁkhāsen ǁkhāsa. Nēs ge nî hui da î da Jehovab ra mā da xūna xu ǃgâiba ǀama.

ELOBMÎSA ǁKHĀǁKHĀSEN ǀGARA

7. Jesuba tae-e Petruba ge mîba xawe tae-i tsînab Petruba nî dī ge īsa? ǁGuiǃā re (Hebreǁîn 5:14–6:1)

⁷ Apostel Petrub aiǁgausa ǃgaoǃgâ re. ǁÎb ge ge ǂguro Jodeǁî i, Jesub a Mesiasa ge mûǃāba. ǁÎb ge ge mûǂan Jehovab ge Jesuba gere sîsenūsa îb khoena ǁkhāǁkhā ǀamo ûib xa. (Jhn. 6:​66-68) Jesub ge ǀhomǃapab nîs aiǃâ Petruba ge mîba: “Ti gūna ǃûi.” (Jhn. 21:17) Petrub ge ǁnāsa ǁnâuǀnam tsî ǃgâsana ǀhaohâgu ǃnâ gere ǁkhāǁkhā. Jehovab tsîn ge ǁîba ge sîsenū îb ǀgam sîǂkhanira xoa nēsi Elobmîs ǃnâ hâra. Petrub tsîn Elobmîsa aitsama nî ôaǃnâ ge īs ge. Aiǁgauseb ge Apostel Paulub ge xoa sîǂkhanide aitsama gere ôaǃnâ. Petrub tsîn ge ge mûǂan Paulub ge xoa xūn ǀnîn ge kaise ǃgom īsa ǁnâuǃāsa. (2Pet. 3:​15, 16) Xaweb ge Petruba aiǃgû tsî nē xūna ge ôaǃnâ ǀgara. ǁÎb ge gere ǂgom Jehovab nî hui bisa îb ǁnâuǃā tsî ǁkhāǁkhāseni go xūna ǁnâuǀnam.—Khomai re Hebreǁîn 5:14–6:1 sa.

8. Petruba tae-e ge dī Jehovab ge mābi ǀasa daoǁgaus ǀkha?

⁸ ǀGaisa ǂgomsab ge Jehovab ǃnâ ūhâ i amagab ge Petruba Jehovab daoǁgaude gere ǁnâuǀnam. Aiǁgauseb ge Petruba ǀguitsē ǁhapos ǃnâ ǀhomǃgāb xa ge mîbahe îb Jodeǁîn ge Moseb ǂhanub ǃoagu ǂû tama hâ i xamanina ǂû. Petrub Jodeǁîb ge nē ǀhomǃgāb ge mî xū-i xa ge tsūbahe i. ǂGuroseb ge Petruba ge ǃeream: “Tātsē ǃKhūtse, tita ge tātsēs tsîna ǃanuoǃnâ xū-e ge ǂû tama hâ i.” Ob ge ge mîbahe: “Tā Elob ga ǃanu a ti mî xū-e satsa ǃanuoǃnâ a ti mî.” (ǃNǃkh. 10:​9-15) Petrub ge ǁnâuǀnam tsî ǁîb ǂâiǀgauba ge dawa. Mati da a ǂan? ǁHaposab ge mû toas khaoǃgâ gu ge ǃnona khoega Petrub oms dawa ge sī. Tsî gu ge ge mîba bi Korneliub ra ǂhâbasa îb Petruba ǁîb dawa sī. Nē ǁhaposab nî mûs aiǃâb ge Petruba Korneliub oms ǃoa ga ī tama hâ. Korneliub ge Jodeǁî tama hâ i amaga. Jodeǁîn ge ǀupen a ǃanuoǃnâ ti gere mî. (ǃNǃkh. 10:​28, 29) Xawe Jehovab ge Petruba a mîba o ǁîb ra ǂhâbasa în hoa khoena ǃgâiǂhôasa ǁnâu, ob ge Petruba ǁkhā ǁaeb ai ǁîb ǂâiǀgauba dawa tsî Jehovaba ge ǁnâuǀnam. (ǂKhm. 4:18) ǁÎb ge Korneliub tsî ǁîb omaris tsîna ge aoǁnâba. Tsî ge mû matin ge amaba ūǃoa, ǃanu gāgāba ǁhōǂui-aihe tsî a ǁāǁnâhe ǀgauba.—ǃNǃkh. 10:​44-48.

9. Mâ ǀgam ǀgaukha ǃnâ da ǃgâiba nî ǀama ǃgomba da a xūna da ga ǁkhāǁkhāseno?

⁹ Petrub khami da ge hoaǁae Elobmîsa nî ôaǃnâ. ǃNākorobe da ge supuse da ra ǁnâuǃā xūna ra khomai. Xawe da ge nî dītsâ î da ǃgomse ra ǁnâuǃāhe xūn tsîna ôaǃnâ. ǂHâǂhâsa ǁaeba da ge nî mâiǂui î da Elobmîsa ǂōrisase ôaǃnâ ǁkhā. Kaise i ge nî ǂhâǂhâsa î da ǁguiǂgāsen tsî ǂguro da ge ǁnâuǃā tama hâ i xūna ǁnâuǃā. Tae-i ǃaroma? ǀGam ǀgaukha ǃnâ da ge ǃgâiba ra ǀama: ǂGurose da ge xūna nî ǁkhāǁkhāsen hui da nî na, î da Jehovaba ǀnam tsî ǃgam ǃgôasiba ǁgau. ǀGamǁîse da ge ǂkhâǃnâhe hâse ra tsâ nauna sida ǀnamxaǃnâ ǁGûb xa mîbasa. (Rom. 11:33; J.ǂHa. 4:11) Petrub aiǁgaus ge ǁkhawa ǀnî hâ xū-e ra ǁkhāǁkhā da: Elobmîsa da ra ǁnâuǃā ǀgaub ǃnâ da ga ǀkharaǀkharana a hō, o da ge sida ǂâiǀgaub tsî tanîsen ǀgaub tsîna ǃkhaese nî dawa. ǁNāsa da ga dī o ǀguib ge Jehovaba aiǃgû tsî nî daoǁgau da. Tsî da ge ǁîba ǂgomǂgomsase nî ǃoaba ǁkhā.

JEHOVAB RA ǂHÂBA KHAMI TANÎSEN

10. Koloseǁîn 3:​8-10 ǃoagu da tae-e nî dī î da Jehovaba ǃgâiaǂgao kai?

¹⁰ Jehovab ge ra daoǁgau da ǁîba ra ǂkhîǂkhî ǀgauba omkhâis ǃnâ-ū. ǁNās ǀkha da tae-e ra ǂâibasen? Apostel Paulub ge ge xoa î da: “ǀOro khoesiba ǁguiǁnâ” tsî “ǀasa khoesib ǀkha anasen.” (Khomai re Koloseǁîn 3:​8-10 sa.) ǁAeb tsî ǁguiǂgāsens tsîna i ge ǂhâhâ Jehovaba ra ǂkhîǂkhî ǀgauba omkhâisa. Paulub xa ǂâi re. ǁÎb ǂkhamsis ǃnâs tsînab ge ǃgarise gere sîsen Jehovaba ǂkhîǂkhîsa. (Gal. 1:14; Fil. 3:​4, 5) Xaweb ge ge ǁnâuǃā tama hâ i matib Eloba ǂhanu ǀgaub ǃnâ nî ǃoabasa. Paulub ge amaba Jesub xa ge ǀū i. Paulub ge ge ǂnīsa i tsî Eloba ra ǂkhîǂkhî ǀgaub ǃnâ ge tanîsen tama hâ i. ǁÎb ge ‘ǁgâiǀā-aob’ ti gere ǂgaisen.—1Tim. 1:13.

11. Mâ ǀkharaǀkharanab ga Pauluba dī hâ? ǁGuiǃā re.

¹¹ Xristeǁî kaib nîs aiǃâb ge Pauluba ǃkhaese gere ǁaixa. ǃNaeǃkhaidi ge ra ǁgau Paulub ge Jesub ǁkhāǁkhāsaben ǀkha ǁaixa hâ īsa. Tsîb ge ǁîna gere ǃgam ǂgaosa. (ǃNǃkh. 9:1) Paulub ge Xristeǁî kaib ges khaoǃgâ ǃgarise gere sîsen îb ǁîb ǁaiba ǃkhō-oa. ǁÎb ge ǃnūǃnâxasib tsî khoexaǃnâsib tsîna ge omkhai. (Efe. 4:​22, 31) Paulub ge gere dīsā. ǁÎb tsî Barnabab tsîkha ge ǁnâusagu, ob ge kaise ge ǁaixa. (ǃNǃkh. 15:​37-39) ǁNā ǁaeb aib ge Pauluba Elob ra ǂgaoǀkhā ǀgaub ǃnâ ge tanîsen tama hâ i. Xaweb ge aiǃgû tsî ǃgarise ge sîsen tsîb ge Jehovaba ǁîb ǀkha ge ǂkhî-i.—1Kor. 9:27.

12. Tae-e Pauluba ge hui îb aiǃgû tsî ǀkharaǀkharana ǁîb tanîsen ǀgaub ǃnâ dī?

¹² Paulub ge ǀkharaǀkharana ǁîb tanîsen ǀgaub ǃnâ ge dīhō ǃgamǃgamsenxab ge i amaga. (Fil. 4:13) Petrub khamib ge Pauluba Jehovab ai ge ǂgomaiǂnûi hâ i îb ǂhâbasa ǀkharaǀkharana dī. (1Pet. 4:11) ǀNî ǁaegu aib ge Pauluba gere dīsā tsî gere ǂkhabuǂâi. Xawe ǁnātib gere tsâ ob ge Jehovab gere dība bi ǃgâi xūna gere ǂâiǂâisen. ǁÎb ǃgôaǃgâsiba ǁgaus ǃaromab ge ǀkharaǀkharana dītsâ tsî Jehovaba ge ǂkhîǂkhî.—Rom. 7:​21-25.

13. Mati da Pauluba a ǁgae ǁkhā?

¹³ ǂGui kuriga da ga Jehovaba a ǃoaba xawe da ge ǃgarise sîsen tsî sada ǀgauga nî ǃgâiǃgâi. Hoa da ge nî dīsā. Aiǁgause, da ge ǁaixa tamas ka io tsū xū-e mî tamas ka io dī ǁkhā. ǁNās ga ī, o da ge tā Jehovaba da ǂkhîǂkhî hō tide ti nî ǂâi. Xawe da ge aiǃgû tsî ǀkharaǀkharana nî dī ǀgara. (Rom. 12:​1, 2; Efe. 4:24) ǀNî ǂhâǂhâsa xū-e da ge ǂâis ǃnâ nî ūhâ. Sada ǀgauga da ga ǃgâiǃgâi ǂgao, o da ge nî ǁnâuǃā Jehovab tae-e ra ǂgaoǀkhā dasa.

MĀ-AM ÎB JEHOVABA ǁKHAUBATSI

14-15. Jehovaba mâǀgaugu ǃnâ ra ǁkhauba da? (Psalmdi 27:5) (Aisǀkhāb ai hâ ai-īsiba mû re.)

¹⁴ Ama ǃgâiǂgaoba da ga hōǃâ ǂgao, o da ge nî mā-am îb Jehovaba ǁkhauba da. Jehovaba mâǀgaub ǃnâ ra ǁkhauba da? Tsî tae-e da nî dī îb ǁîba ǁkhauba da?

¹⁵ Gao-aob Davidi ge ǂgomǃgâsiba ge ūhâ i Jehovab ǃgom ǁaegu ǃnâ ǁîba nî ǁkhaubasa. (Khomai re Psalmdi 27:5 sa.) Jehovaba mati nētsē ǁîb khoena ra ǁkhauba? Jehovab ge ǁîb khoena khoe-i tamas ka io xū-i ǁîn ǂgomsa a ǁgaiǁgai ǁkhā-e xu ra ǁkhauba. Khoen ga dītsâ î da ǁîba ǃoaba ǀû xaweb ge ra mîmai ǁîb ǀkha da ūhâ ǀhōsagusisab nî ǁkhaubasa. (Ps. 34:7; Jes. 54:17) ǁGâuab, ǁîb demongu tsî sida ra ǃgôaǃgon khoen tsîn ge a ǀgaisa. Xawe Jehovab ge a Hoaǀgaixa. ǁÎn ga ǃgam da xaweb ge Jehovaba khâisa nî mā da. (1Kor. 15:​55-57; J.ǂHa. 21:​3, 4) Jehovab ge nî hui da î da tā ǁîba ǃoaba ǀû ǂâiǂhansen da gao. (ǂKhm. 12:25; Mat. 6:​27-29) Jehovab ge ǃgom ǁaegu ǃnâ ǂkhâǃnâ tsî nî mâxōǀkha da ǃgâsana ge mā da. ǁÎb ge ǀhaohâb ǃûi-aogu tsîna ge mā da î gu ǁkhāǁkhā da tsî hui da, î da ǀgaisa ǂgomsa ūhâ ǀgara. (Jes. 32:​1, 2) ǀHaode da ga hâǃnâ o da ge ra ǁkhāǁkhāsen mâǀgaugu ǃnâb Jehovaba hui tsî ra ǁkhauba da ǀgauba.—Heb. 10:​24, 25.

16. Mâǀgaugu ǃnâb ge Jehovaba Davida ǁkhauba?

¹⁶ Davidi ge Jehovaba a ǁnâuǀnam, ob ge Jehovaba ǁîba ge hui îb gā-ai mîǁguiga dī tsîs ge nēsa Davida ge ǂkhî kai. Nē ǀgaub ǃnâb ge Jehovaba ǁîb ûiba ge ǁkhauba. (ǀGopeǀnō re ǂKhoamîdi 5:​1, 2 sa.) Xawe Davidi ge Jehovaba a ǁnâuǃnamoǀnâ ob ge ǁîb ǁgai mîǁguigu xa ǃaromahe hâse ǃgoma gere hōǃâ. Jehovab ge ǁîb ǀkha ge ī ǁgai xūna ge ūbē tama hâ i. (2Sam. 12:​9, 10) ǀNî ǁaegu aib ge Davida naun xab ge ǁgaise gere hâ-ūhe ǃkhais ǃaroma ǃgoma gere hōǃâ. ǁNās ge ī, ob ge Davida Jehovaba ǃoa ǀgore tsî ūb ge hâ i ǂâiǂhansendi hoade ge mîba. Tsîb ge Jehovaba ǁîba ge ǁkhauba. Jehovaba ǁîba mâǀgaub ǃnâ ge ǁkhauba? ǁÎb ge Davida ge ǁkhaeǂgao mîmâiba bib ge o ǁîba kōǃgâ tsîb nî huisa îb Jehovab xab ǀnamhe hâsa hōǃâ.—Psa. 23:​1-6.

17. Mati da Davida a ǁgae ǁkhā?

¹⁷ Davida da ge a ǁgae ǁkhā Jehovaba ǃoa ǀgore tsî da ga ǁîba ǃoa kō o, îb daoǁgau da î da ǃgâi mîǁguiga dī. ǂÂis ǃnâ da ge nî ūhâ Jehovaba da ga ǁnâuǀnâamoǃnâ, ob sida ra dī ǁgai mîǁguiga xu ǁkhauba da tidesa. (Gal. 6:​7, 8) Jehovaba da ga ǁnâuǀnam xawe da ge ǀnî ǁaegu ai ǀkhara ǃaromadi ǃgao ǃgomsina ra hōǃâ. Xawe ǃgom ǁaegu ǃnâ da ge Jehovaba sada ǂâiǂhansendi xa a mîba ǁkhā îb hui da. Tsîb ge ǁîba ǁkhaeǂgao tsî nî hui da î da ǁîb ǀnamma hōǃâ.—Fil. 4:​6, 7.

AIǃGÛ TSÎ JEHOVAB DAOǁGAUDI AI ǂGOMǃGÂ

18. Sida ǂnamipe hâ khoena mati Elob xa daoǁgauhes xa ra tsâ tsî tae-e da nî dī Jehovab Eva daoǁgausa da ga ǂhâba o? (Ai-īsiba mû re.)

¹⁸ 2026ǁÎ kurib xoas: “ǀKhaehen ge hâ ǁnān hîna Eloban ǂhâ hâ di a ǂana.” Nētsē i ge kaise a ǂhâǂhâsa î da Jesub ge mî khami dī tsî Jehovab ai ǂgomaiǂnûi daoǁgauhes ǃaroma. Tae-i ǃaroma? ǂGui khoen ge nētsē ūǃoa tama hâ Elob tsî ǁîb daoǁgaudi tsînan ǂhâhâsa. ǂGuin ǀnîn ge Elob ǃnâ ra ǂgom. Xawe ǁîn ra ǂhâba ǀgaub ǃnâ ra ǃoaba bi. Naun ge khoesi daoǁgaude ǂgomǃgâ hâ. Xawen ge a ǂkhîoǃnâ. Tā da ge ǁîna nî ǁgae. Tae-e da nî dī î da Jehovab ai ǂgomaiǂnûi ǀgara? Aiǃgû tsî da ge Jehovab mîsa nî ôaǃnâ. ǁKhāǁkhāsen ǀgara da ge nî mati da ǁîba ra ǂkhîǂkhî ǀgauga nî ǁgausa. ǁÎba ǁnâuǀnam tsî nî mā-am îb ǁkhauba da.