Febrero

¿Toni nejon tekit? Taxikolis techpaleuia maj ‘tiajsitokanʼ, oso maj okachi kuali tiknextikan ikualneskayouan Cristo. Sayoj ke ¿keniuj kichiua? Keman tikpiaj se kuejmol, xa tikitaskej ke moneki okachi amo tiyolijsiuiskej, okachi timotasojkamatiskej oso okachi titetasojtaskej. Keman titaxikouaj, tikmatij keniuj okachi tiknextiskej nejin kualneskayomej uan timochiuaj okachi kuali tiitatojtokakauan Cristo. Ijkon tikauaj maj taxikolis kitamichiua tekit totech. Kemej taxikolis techpaleuia maj okachi kuali tiknextikan ikualneskayouan Cristo, maj amo tiktemokan tikyektaliskej se kuejmol keman amo tiktakamatiskej Dios. Maj tikijtokan ke tikpiaj se amo kuali tanemilil. Moneki amo tikchiuaskej tein tiknemiliaj, ta okachi kuali maj tiktajtanikan Jiova maj techpaleui maj timoijkuanilikan. Oso maj tiknemilikan ke se tochankauj techixnamiki porin tiitaixpantijkauan Jiova. Moneki amo timosenkauaskej, ta maj tiksentokakan tiktekitilikan Jiova. Maj amo tikelkauakan ke komo tiknekij maj Jiova techtatiochiui, moneki titaxikoskej (Rom. 5:3-5; Sant. 1:12). w16.04 2:15, 16

Jiova amo kinemilia ke sekin okachi ueyichiuanimej ke oksekin. Yejuatsin amo techchichikotasojta. Melauak ke Dios techchijchiuak titatamamej. Uan tikitaskej nejon techyolpaktia. Jiova amo techtajtania maj amo tikchiuakan tein momattokej kichiuaskej kampa tinemij (Rom. 10:12). Moneki amo keman timotelueyinekiskej ika toaltepeuj hasta tiknemiliskej ke okachi kuali ke okseki. Itech yekinika siglo, seki tokniuan hebreos amo kinpoujkaitakej seki tokniuan siuamej akin tajtouayaj griego (Hech. 6:1). ¿Keniuj uelis tikmatiskej ox peua timoueyinekij? Maj tiknemilikan: “¿Toni nikchiua keman se tokniuj akin kayot okse ueyi altepet nechyolmajxitia? ¿Amo nikaki porin niknemilia ke itech noaltepeuj okachi kuali tikchiuaj teisa?”. Komo tiknemiliaj nejon, maj tikelnamikikan tein Biblia kijtoua itech tajkuilol tein axkan tikitaj. w16.04 4:12, 13

Jesús kiteixmatiltij “kuali tanauatilmej ika iTekiuajyo Dios”. Uan kineki maj imomachtijkauan no kiteixmatiltikan. ¿Katiyejua taneltokalis kinmatiltijtok taltikpakneminij nejon kuali tanauatilmej? (Mat. 28:19.) Sayoj itaixpantijkauan Jiova. Se takat akin katka misionero uan tiopixkat kiluij se itaixpantijkauj Jiova ke nemik itech miak uejueyi altepemej uan ke itech sejse ueyi altepet kintajtaniaya itaixpantijkauan Jiova toni kiteixmatiltiayaj. Takat kijtoj: “Nochin tel amo tamatij porin nechnankiliayaj sayoj se taman: ‘Kuali tanauatilmej ika iTekiuajyo Dios’”. Tein nejin takat kijtoj kinextia ke amo melauak ke amo titamatij, ta kinextia ke amo tixexeliujtokej porin yekmelauj tiitatojtokakauan Cristo (1 Cor. 1:10). ITekiuajyo Dios no yejua tein okachi ika tajtoua amaix Tanejmachtijkej. Kiteixmatiltijtok iTekiuajyo Jiova. Mokixtia itech 254 tataman tajtolmej, uan sejse tapoual moamakixtia kemej 59 millones. Tanejmachtijkej yejua amaix tein okachi momoyaua noyampa taltikpak. w16.05 2:6

Maj tiknemilikan ke tiknekij tikchiuaskej tekit kemej precursor. Xa tikpatakejya seki taman tein techpaleuis maj tiuelikan okachi titanojnotsaskej. Sayoj ke timotajtaniajok ox tiyolpakiskej komo amo tikpiaj miak tomin nion miak taman. Melauak ke Biblia amo kijtoua ke sayoj uelis tiktekitiliskej Jiova komo tikchiuaj tekit kemej precursor. Uelis tiktekitiliskej ika nochi toyolo kemej tanojnotsanij. Sayoj ke Jesús tamachtij ke Jiova kintatiochiuia akin motemakaj kikauaskej seki taman porin kinekij okachi kitekitiliskej (Luc. 18:29, 30). Uan no, Biblia kijtoua ke Jiova kiyolpaktia maj tikchiuakan nochi tein tiueliskej tein ika tikueyichiuaskej. Yejuatsin kineki maj tiktekitilikan ika yolpakilis (Sal. 119:108). Komo timotataujtiaj uan titanemiliaj itech nejin, uelis tikixpejpenaskej tein uelis tikchiuaskej uan tein Jiova kitiochiuas. w16.05 3:13

Moneki amo tiknemiliskej ke amo moneki tikixtajtoltiskej tamachtilismej tein kinijkuilouiliaj telpochmej uan ichpochmej. Tejuan no tikpanouaj miak kuejmolmej tein ika motajtoua itech nejon tamachtilismej. Kemej neskayot, tinochin moneki tikinmelauiliskej oksekin tein tikneltokaj, tiktsakuiliskej tein tikmachiliaj, amo timokauaskej maj techchiualtikan tein amo kuali, amo tikinpiaskej amo kuali tasojiknimej uan amo timoixpetaniskej ika tein amo kuali. Tamachtilismej tein kinijkuilouiliaj telpochmej uan ichpochmej no kimelauaj tein kijtoua Biblia uan kinpaleuia maj okachi kuali mouikakan iuan Jiova. Yejua ika tinochin akin tikchiuaj kemej Cristo uelis techtelpaleuis (Ecl. 12:13). w16.05 5:15, 16

“Jiova toDios sayoj se Jiova.” Nejin semi teyolchikaua. Israelitas kinmakak chikaualis tein kinpaleuij maj kixikouanij kuejmolmej tein kipiakej keman kalakkej uan moaxkatilijkej Tal tein Dios motenkaujka kinmakas. Tejuan no uelis techmakas chikaualis tein techpaleuis maj timakisakan itech okachi ueyi tajyouilis uan titapaleuiskej maj kuali tiyetokan iniuan oksekin uan maj amo tixexeliujtokan itech Xochital. Maj tiksentokakan tikueyichiujtokan sayoj yejuatsin. Maj tiksentokakan tiktasojtakan uan maj tiksentokakan tiktekitilikan ika nochi toyolo, totanemilil uan tochikaualis. Maj tiksentokakan timochikauakan kuali tiyetoskej iniuan tokniuan uan amo tixexeliujtoskej. Ijkon, Jesús kiixtalis ke titamatij kemej ichkamej uan techiluis nejin tajtolmej: “Xiualakan nouan namejuan, porin nantatiochiualme den Notajtsin Dios. Uan xikselikan nijin yek yetolis [...] [tein] namechchijchiuilij ya desde ne tonal kuak tsinpeuak in taltikpak” (Mat. 25:34). w16.06 3:2, 20

Ueyinekilis uelis kichiuas maj timotenpaleuikan keman timopolouaj. Komo techpanoua nejon, amo tiyeskijok kemej sokit tein ueli se kitekitiltia. Komo kemansa techyolxokolij se tokniuj oso tikpolojkej se tekit tein tikpiayaj itech nechikol, ¿toni tikchiujkej? ¿Timoueyinekkej, oso tikajsikamatkej ke okachi tayekantok maj kuali tiyetokan iniuan tokniuan uan maj nochipa tiktakamatikan Jiova? (Sal. 119:165; Efes. 4:32.) Komo titajtakojtokej uan hasta tiktatiaj tein tikchiujtokej, xa techouijmakas tikakiskej tein Dios techyolmajxitia. Nejon kichiuas maj okachi amo techtekipachook tiksentokaskej titajtakoskej (Ecl. 8:11). Se tokniuj akin kiitaya auilnemilis kijtoua ke peuak kinijijtoua tayekananij. Nejin kijtakoj ikuali uikalis iuan Jiova. Keman momatik tein kichiujtoya, mokauak maj tayekananij kipaleuikan. Semi melauak ke tinochin titajtakouanij uan timopolouaj. Sayoj ke komo tikinijijtouaj akin techyolmajxitiaj oso tiktemouaj timotenpaleuiskej uan amo tiktajtaniaj Dios maj techtapojpolui uan maj techpaleui, uelis tiyoltakuauayaskej. w16.06 2:5, 6

Jesús kimatia ke imomachtijkauan kintekipachouaya keniuj kiajsiskiaj tein kikuaskiaj uan tein motaliliskiaj. Kimatia ke komo imomachtijkauan semi motekipachouayaj, ueliskiaj kielkauaskej tein okachi tayekantok. Uan kemej kinekia maj yolpakikan, itech tanojnots tein kitemakak itech se tepet naujpaok kinnejmachtij ke tamouilil maj se moteltekipacho (Mat. 6:27, 28, 31, 34). Jesús kimatia toni kinpolouaya taltikpakneminij. Uan no, kimatia ke imomachtijkauan okachi ouij moixpanoltiskiaj itech itamian tonalmej (2 Tim. 3:1). Axkan, miakej amo kiajsij tekit, uan okachi tapatiyoua. Miakkan, taltikpakneminij sayoj tepitsin kipiaj tein kikuaskej oso amo teyi kipiaj. Sayoj ke Jesús no kimatia ke okachi tayekantok inemilis se taltikpaknenkej ke takual uan tilmaj. w16.07 1:8, 9

Kemej amo ueli senkis tiktakamatij Jiova itech nochi, amo technamiki maj techikneli, ta technamiki maj timikikan. Tekiuaj Salomón kijtoj: “Amo onkak nion se takat yolmelauak nikan taltikpak akin nochipa kichiua tein kuali uan amo keman tajtakoua” (Ecl. 7:20). Tatitanil Pablo kijtoj ke “tinochin timotajtakolmakakke iixpantsinko Yejuatsin uan uejka [tinentinemij] de ne chipaukanemilis ten Dios kimonekiltia” uan ke “tajtakol keme yeskia se patrón ten tetaxtauia sayo ika mikilis” (Rom. 3:23; 6:23a). Jiova kinteltasojta nochin taltikpakneminij. Yejua ika kiualtitanik iKonetsin akin sayoj setsin maj toka momikiliki. Nejin yejua tein okachi ika kinextij iueyi teiknelilis (Juan 3:16). Pablo kijtoj ke “Dios konueyipantalij uan konmouiskapouak Cristo Jesús porin ne tajyouilis ten kipanoko Yejuatsin kuak momikiliko” uan ke Jesús toka momikilij porin “Totajtsin Dios techyoliknelij” (tejuan tiktalilijkej cursivas; Heb. 2:9). Kemaj, “Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús” (Rom. 6:23b). w16.07 3:3, 4

Noyampa, taltikpakneminij monamiktiaj. Sayoj ke ¿keniuj peuak nemilis kemej namikuanij, uan keyej moixtalij? Tikmatiskej nejin techpaleuis maj tikitakan kemej moneki nemilis kemej namikuanij uan nochi tein kuali tein kiualkui. Keman Dios kichijchiuak Adán, kinauatij maj kintaliliani inintokay tapialmej. Adán kiitak ke onkaya tapialueuet uan tapialsiuat, “sayoj ke takat amo kipiaya se tapaleuijkej kemej itamajsikayo”. Yejua ika Dios kichiuak maj Adán kochini uan ika se ielchikiuj kichijchiuak se siuat uan kimakak Adán kemej inamik (Gén. 2:20-24). Kemej tikitaj, nemilis kemej namikuanij se inetetayokolil Jiova. Jesús no kijtoj tein Jiova kijtoj itech Xochital tein moajsia Edén: “Tagat ma kinkaua itatajtsin uan inanajtsin uan ma mosentali iuan isiuau. Uan in ome mokauas sanse” (Mat. 19:4, 5). Kemej Dios kichijchiuak Eva ika se ielchikiujomiyo Adán, yejuan xa kiajsikamatkej ke Jiova kinekia maj nochipa senyetonij. Yejuatsin amo keman kinekik maj namikuanij mokakauakan nion maj aksa kipia ome inamik oso okachi. w16.08 1:1, 2

Jesús miakpa kinmachtiaya sejsemej taltikpakneminij. Kemej neskayot, se tonal tel kuali tajtoj iuan se siuat akin atakuito ompakauin itech xolal Sicar (Juan 4:5-30). Okse tonal tajtoj iuan se takat akin kisentiliaya tomin akin monotsaya Mateo Leví. Jesús kiyoleuak maj mochiua itatojtokakauj, uan Mateo kijtoj ke kemaj. Satepan nejin takat kiyoleuak Jesús uan oksekin maj takuatij ichan. Itech nejon tatakualis, Jesús kinnojnotsak miakej (Mat. 9:9; Luc. 5:27-39). Se takat akin monotsaya Natanael amo kuali ininka tajtojka akin kayomej Nazaret, ixolal Jesús. Maski ijkon, Jesús kuali kinojnotsak. Yejua ika, Natanael kipatak kemej kiitaya Jesús uan kinekik okachi kiixmatis (Juan 1:46-51). Komo tikualtakamej iniuan taltikpakneminij, xa okachi kinekiskej techkakiskej. Maj tikinnextilikan akin yankuikej maj kualtakamej. Ijkon, okachi kinyolpaktis tanojnotsaskej. w16.08 4:7-9

Seki namikuanij kinemiliaj mokakauaskej oso kitsayanaskej amat ininixpan tekiuanij keman amo ueli kiyektaliaj uejueyi kuejmolmej. Sayoj ke Jesús kinextij ke nejin amo auil. Yejua kijtoj tajtolmej tein Dios kijtojka kemej moneki nemiskej namikuanij uan satepan kitamajxitij: “Tagat uan in siuat ten Dios kinsentalis namikuani ya, yejuan nojonkes ma amo se tagat kinxexelos” (Mat. 19:3-6; Gén. 2:24). Senkis moita ke Jiova kineki maj namikuanij senyetokan (1 Cor. 7:39). Tinochin moneki tikelnamikiskej ke Jiova techtajtanis maj titanankilikan ika tein tikchiuaskej. Nejin techpaleuis maj niman tikyektalikan kuejmolmej, achto ke okachi uejueyiaskej. w16.08 2:10, 11

Nochipa moneki timotachilijtoskej porin tein techixnamiki uelis techijtakos keman amo tikmattoskej oso keman tikmachiliskej ke amo tichikaujkej. Komo tiksentokaj timochikauaj amo tikchiuaskej tein amo kuali, uelis titataniskej. Sayoj ke komo amo timoyekpiaj uan amo timochikauajok, Satanás, nochi tein kiixyekana uan tonepololuan uelis techtaniskej. Yejua ika maj amo timosenkauakan nion maj tiyolkuetauikan (1 Ped. 5:9). Komo tiknekij titataniskej, moneki tikelnamikiskej ke titaxikojtokej porin tiknekij maj Dios techmaka itatiochiualis. Hebreos 11:6 kijtoua: “Komo se yejua kineki se motokitiu iuan Dios, ijkuakon moneki ma kiyekneltoka ke ongak se Dios uan no ma kiyekneltoka ke Dios kinpaleuis nekes ten kiyoltemoske”. Komo tiknekij maj Jiova techtatiochiui, moneki tikchiuaskej se ueyi chikaujkayot (Hech. 15:17). w16.09 2:4, 5

Biblia techpaleuia maj tikixpejpenakan tikchiuaskej tein kiueyitalis Dios. Maski ijkon, itech totaken moita tein tikuelitaj timotaliliskej. Kemej tikuelitaj timochijchiuaskej uan tilmaj tein timokouiliaj uelis yeski taman ke tein kikuij oksekin. Sayoj ke totilmaj nochipa moneki yeski chipauak uan maj amo tel soltik, kemej kinamikis kampa tiyaskej uan maj kuali moita kampa tinemij. Kemansa semi ouij kisa se kiajsis tilmaj tein kuali moitas uan tein uelis tikuiskej. Miakkan sayoj kinamakaj tilmaj tein yankuixtok kisak. Yejua ika xa okachi tiuejkauaskej uan monekis miakkan tiktemoskej tein kualtsin moitas uan tein amo kopitstik. Nejin no moneki tikelnamikiskej komo tejuan timochijchiuiliaj totaken. Sayoj ke tokniuan kiitaskej uan kitasojkamatiskej maj timochikauakan kualtsin timotakentiskej uan kemej kinamikis. Uan no tikueyitaliskej toTajtsin akin techtasojta, uan nejon okachi techyolpaktis maski semi techouijmakas tikajsiskej tein uelis timotaliliskej. w16.09 3:15, 16

Komo tejuatsin tikonmachtia mokoneuan ika seki tetapouilis uan neskayomej, tikonpaleuis maj kitekitiltikan inintanemilil. Uelis tikonkuis neskayomej tein ika tikonnextilis mokoneuan ke nochi tein kijtoua Biblia melauak. Kemej neskayot, uelis tikonixtajtoltilis tajkuilol tein axkan tikitaj. Sayoj ke amo sayoj xikonilui ke yejua Jiova akin kimatiltij Job nejin. Xikonpaleui maj kitekitiltikan inintanemilil. Uelis tikoniluis ke itech itonaluan Job taltikpakneminij xa amo kineltokayaj ke taltikpak moajsia ejekaixko. Kimatiaj ke nochi tein onkak teisa kimamajtoya. Amo akin kinextijtoya ke taltikpak moajsi ejekaixko, porin ayamo onkayaj telescopios nion teposmej tein kititanij iluikak. Maski Biblia moijkuiloj tel miak xiujmej achto, nochi tein kijtoua melauak porin ompa kipia itanemililuan Jiova (Neh. 9:6). w16.09 5:9, 12

Komo titakuaujtamatij iuan Jiova uan Jesús, amo sayoj timokauaskej ika tein tikmatij ke kichiuanij uan tein toka kichiuaskej. Tiknejnekiskej tinemiskej kemej yejuan techmachtiaj uan tikinpaleuiskej oksekin maj kinixmatikan. Komo tiknekij tinemiskej nochipaya itech yankuik taltikpak, moneki tikpiaskej takuaujtamatilis uan tiksentokaskej tikchikauaskej. Takuaujtamatilis tamati kemej se xochit. Komo tiknekij maj se xochit kuali moskalti, moneki nochipa tikatekiskej. Komo amo tikatekiaj, kuetauis uan uakis. No ijkon, moneki tikyekitaskej maj totakuaujtamatilis chikauak moajsi uan maj kisentoka moskalti (Luc. 22:32; 2 Tes. 1:3; Tito 2:2; Heb. 3:12). w16.10 4:4, 5

Keman Daniel uan itasojikniuan kinuikakej Babilonia, akin ompa nemiaj kitemojkej kichiuaskej maj neminij kemej ompa nemiaj, yejua ika kinmachtijkej inintajtol uan kintalilijkej tokaymej tein mokuiaj ompa (Dan. 1:3-7). Kemej tiotsin tein okachi kiueyichiuayaj monotsaya Bel, babilonios kipatilijkej itokay Daniel uan kitalilijkej Beltsasar. Akin tekiuajtia Babilonia xa kinekia maj Daniel kineltokani ke itiotsin okachi kipiaya chikaualis ke Jiova, Dios akin Daniel kiueyichiuaya (Dan. 4:8). No kinekiaj kimakaskej kuajkuali takual tein tekiuaj kikuaya. Sayoj ke yejua kiixtalijtoya kitakamatis iTajtol Dios (Dan. 1:8). Ikuali uikalis iuan Jiova kisentokak chikauak maski nemia itech okse altepet. ¿Toni kipaleuij? Momachtiaya iTajtol Dios, tein ijkuiliujtoya itech tajtol hebreo (Dan. 9:2). Kemej 70 xiujmej satepan ke ajsik Babilonia, kisentokayaj kiixmatiaj ika itokay hebreo, Daniel (Dan. 5:13). w16.10 2:7, 8

Itech xiuit 1919 hasta axkan, Jesús kichiuani maj takeual takuaujtamach uan tamatkej kinpaleui itekitikauan Dios maj kiajsikamatikan Biblia uan maj kitakamatikan (Mat. 24:45-47). Keman tiktakamatij tein Biblia tayolmajxitia, nochin tichipaujkanemij, kuali timouikaj uan onkak yolseuilis itech nechikol. Maj timotajtanikan: “¿Niktakamati Jesús uan tanauatilmej tein techmaka takeual takuaujtamach uan tamatkej?”. Itekitikauan Jiova ompa iluikak no kuali ixyetok keniuj tekitiskej. Kemej neskayot, Ezequiel kiitak Jiova itech se carro tein ijsiujka yaya kampa yeski kampa yejuatsin kinekia (Ezeq. 1:4-28). Amo uejkaua, Cristo uan ángeles kiixpoloskej tein amo kuali. Ijkon nochin kipoujkaitaskej Jiova, itokay uan kiitaskej ke yejuatsin kinamiki taixyekanas. w16.11 3:9, 10

Jiova techiluia maj nochipa tiyakan nechikolmej, porin ompa timomachtiaj keniuj tamati yejuatsin uan timosenyolchikauaj (1 Cor. 14:31). Tokniuan akin uejkaujya kitekitilijtokej no moneki maj se kinyolchikaua. Maj titanemilikan itech Josué. Jiova kiixpejpenak maj kinixyekana israelitas keman yaya kalakitij itech Tal tein motenkaujka kinmakas. Maski Josué miak xiujmejya kitekitilijtoya Jiova, yejuatsin kiluij Moisés: “Xikixtali Josué uan xikyolchikaua uan xikchikaua, porin yejua panos oksekopa iixpan nejin xolal uan yejua kichiuas maj kiselikan tal tein tejua tikitas” (Deut. 3:27, 28). Josué monekia maj kiyolchikauanij porin satepan israelitas moteuiskiaj iniuan akin kayomej itech okseki xolalmej uan porin tapoloskiaj sepa (Jos. 7:1-9). Axkan, tokniuan tayekananij uan takalpanouanij no moneki maj tikinyolchikauakan. ¿Keyej? Porin yejuan semi mochikauaj kinyekpiaskej tokniuan (1 Tes. 5:12, 13). w16.11 1:12, 13

Momachtianij ika Biblia kiajsikamatkej ke amo sayoj monekia kiniluiskej ininchankauan, inintasojikniuan uan oksekin itech inintaneltokalis ke amo pouiskiajok itech taneltokalis tein amo melauak. Kinekiaj noyampa kiteixmatiltiskej ke Ueyi Babilonia tamati kemej se siuaauilnenkej. Yejua ika itech metsti diciembre xiuit 1917 hasta ipeujyan 1918, Momachtianij ika Biblia, akin sayoj seki miles katkaj kimoyaujkej ika yolchikaualis se tratado tein motokaytiaya “Babilonia tapoloj”. Ika nejin tratado kiteixmatiltijkej tein amo kuali tein mochiuaya itech taneltokalis tein amo melauak. Kemej uelis timonemiliskej, taixyekananij itech taneltokalismej tel kualankej. Sayoj ke Momachtianij ika Biblia kiixtalijtoyaj kisentokaskej tanojnotsaskej uan kitakamatiskej “Totajtsin Dios uan ma amo achto [kintakamatiskej] in tagayot” (Hech. 5:29). Nochi nejin kinextia ke akin kichiuaj kemej Cristo amo peuak moajsij imako Ueyi Babilonia itech Yekinika Ueyi Neteuilis. Tein melauj, kistoyajya uan kinpaleuijtoyaj oksekin maj no kisanij. w16.11 5:2, 4

Ueliskia tiknemiliskej ke Pablo ininka tajtojtoya akin amo katkaj itatojtokakauan Cristo uan akin kemaj katkaj itatojtokakauan. Sayoj ke yejua kijtoj: “Namechtajkuilouilia nochi namejuantsitsin ten [...] Totajtsin Dios [...] namechijitak ke namejuan xichipaukanentinemikan” (tejuan tiktalilijkej cursivas; Rom. 1:7). Nejin kijtosneki ke akin moyekanayaj ika tajtakol uan akin moyekanayaj ika yektikatsin espíritu katkaj itatojtokakauan Cristo. Itech Romanos 7:5, Pablo kijkuiloj: “Ne achtopa ya techyekantinemia ok ne tosoltiktalnamikilis ten kuika tajtakol”. Nejin kijtosneki ke “nekes ten moyekantinemij ika ne chikaualis de nintalnamikilis de tajtakol” yejuan akin kikauaj maj kinyekana amo kuali tanejnekilis tein kipiaj uan kichiuaj tein kinekij. w16.12 2:5, 7

Kemansa, techtekipachoua tein tikchiujkej achto. Tekiuaj David no ijkon momachiliaya keman tanemiliaya itech tajtakolmej tein kichiujka. Yejua kijtoj ke semi motekipachojtoya uan yolkuetaujtoya (Sal. 38:3, 4, 8, 18). Sayoj ke takuaujtamatik ke Jiova kiikneliskia uan kitapojpoluiskia (Sal. 32:2, 3, 5). Kemansa, xa techtekipachos tein tikpanotokej. Kemej neskayot, keman David kijkuiloj Salmo 55, mouia porin kinekiaj kimiktiskej (Sal. 55:2-5). Sayoj ke amo kikauak maj netekipacholis kichiuani maj amo takuaujtamatiniok iuan Jiova. David kitataujtij maj kipaleuiani. Sayoj ke no kimatia ke monekia kichiuas teisa tein ika kiyektalis ikuejmoluan (2 Sam. 15:30-34). Tein kichiuak techmachtia maj amo timoteltekipachokan, ta okachi kuali maj tikchiuakan tein tiueliskej tein ika tikyektaliskej kuejmol uan maj titakuaujtamatikan ke Jiova techpaleuis. w16.12 3:14, 15

Keman Jiova kititanik tanauatijkej Natán maj kimelauati, David kikakik. Yejua no kiluij Jiova tajtakolmej tein kichiujka. Ijkon kinextij ke kinekia oksepa kiselis itatiochiualis (Sal. 51:1-17). No amo kikauak maj itanemililuan nochipa kikuejmolouanij, ta kiajsikamatik tein monekia. Uan nejon kipaleuij maj amo keman kichiuaniok. Xiujmej satepan momikilij kemej se takat akin kipiaya chikauak itakuaujtamatilis, uan Jiova ijkon kielnamiki (Heb. 11:32-34). ¿Toni techmachtia ineskayo David? Ke komo tiueyitajtakouaj, moneki yekmelauj timoyolnonotsaskej, tikiluiskej Jiova ke titajtakojkej uan tiktajtaniskej maj techtapojpolui (1 Juan 1:9). No moneki iniuan titajtoskej tayekananij, porin yejuan uelis techpaleuiskej maj oksepa kuali timouikakan iuan Jiova (Sant. 5:14-16, TNM). Komo tikseliaj inepaleuil Jiova, tiknextiskej ke titakuaujtamatij ke yejuatsin techtapojpoluis ijkon kemej motenkauak. Maj amo oksepaok tikchiuakan nejon tajtakolmej uan maj tiksentokakan tiktekitilijtokan ika takuaujtamatilis (Heb. 12:12, 13). w17.01 1:13, 14

¿Keniuj se kinextia ke se moueyineki? Keman se kichiua tein amo tenamiki oso amo se kipia tanauatil se kichiuas, xa porin se kinemilia ke tenamiki oso se yolijsiui. Kemej titajtakouanij, tinochin kemansa ijkon tikchiuanij. Sayoj ke komo nochipa ijkon tikchiuaj, tikijtakoskej tokuali uikalis iuan Jiova, ijkon kemej kichiuak tekiuaj Saúl. Salmo 119:21 kijtoua ke Jiova kinmelaua akin moueyinekij. ¿Keyej? Se kichiuas teisa porin se moueyineki, se ueyi nepolol. Yekinika, porin tiknextiaj ke amo tikpoujkaitaj Jiova, toDios uan toTekiuaj. Ojpatika, porin keman tikchiuaj teisa maski amo tikpiaj tanauatil tikchiuaskej uelis techuikas maj tikpiakan kuejmolmej iniuan oksekin (Prov. 13:10). Uan expatika, porin uelis timopinaujtiskej keman oksekin kiitaskej ke ijkon tikchiujkej porin timoueyinekij (Luc. 14:8, 9). Yejua ika Jiova techiluia maj tiyolyemankej. w17.01 3:4, 5

Kemej Adán katka tajtakolejya, amo uelikok senkis kinextij ikualneskayouan Jiova. Kipoloj kualtsin nemilis tein kipiaskia satepan uan no ijkon panok iniuan ikoneuan. Sayoj uelik kinpanoltilij tajtakol uan mikilis (Rom. 5:12). Ikoneuan amo ueliskiajok nemiskej nochipaya. Adán uan Eva amo ueliajok kinpiayaj konemej akin yektikej, uan no ijkon ininkoneuan. Satepan ke Satanás kichiuak maj Adán uan Eva kiixnamikinij Dios, kisentokani kitemouani maj tinochin tikchiuakan nejon (Juan 8:44). Maski Adán uan Eva kikaujkej Jiova, yejuatsin kisentokaya kintasojtaya taltikpakneminij. Kinekiaok maj yeskiaj itasojikniuan uan amo kinekia maj nion akin momikili (2 Ped. 3:9). Yejua ika niman kichiuak tein kinpaleuiskia maj oksepa yeskiaj itasojikniuan (Juan 3:16). w17.02 1:12-14

Maj tikitakan tein kuali tein kichiuaj oksekin, kemej Jiova kiita. Ijkon, amo tiktemoskej maj okachi techitakan oso amo tikiniluiskej oksekin tein moneki kichiuaskej, ta tikintajtaniskej maj techyolmajxitikan uan tikakiskej tein techiluiskej. Uan no, kichiuas maj tiyolpakikan keman kiseliskej se tekit itech nechikol. No tiktasojkamatiliskej Jiova maj techkaua maj tiktekitilikan iniuan tokniuan (1 Ped. 5:9). Uan no, uelis tikixpejpenaskej tein yejuatsin kiyolpaktia. Komo timomachtiaj, tikchiuaj netataujtil uan tikchiuaj tein timomachtiaj, totanemilil mochikauas uan yekinika inintech titanemiliskej oksekin (1 Tim. 1:5). Komo tikchiuaj nejin, Jiova motenkaua ke techpaleuis maj okachi tiknextikan kualneskayomej uan maj tiksentokakan tiknextikan yolyemanilis (1 Ped. 5:10). w17.01 4:17, 18

Nochin tokniuan kinnamiki maj tikinpoujkaitakan. Okachiok tokniuan akin taixyekanaj itech nechikolmej, kemej tayekananij, takalpanouanij, akin taixyekanaj itech sucursales uan tokniuan Oloch Taojtokaltianij. Yejuan kiyekpiaj ixolal Dios. Biblia kijtoua ke yejuan kemej yeskiaj se netetayokolil tein kiseliaj nechikolmej. Yejua ika taixejekol maj tikinpoujkaitakan maski okseko kayomej, tataman tamachtilis kipiaj, kipiaj uejueyi tekimej oso kipiaj tomin. Tokniuan itech yekinika siglo kinpoujkaitakej tokniuan akin kinixyekanayaj, uan tejuan no ijkon tikchiuaj. Sayoj ke, keman tiyetokej iniuan nejin tokniuan, amo tikinitaj kemej yeskiaj ángeles, ta tikinpoujkaitaj porin tel tekitij uan yolyemankej (2 Cor. 1:24; Apoc. 19:10). w17.03 1:13

Tekiuaj Herodes Agripa I taixyekanak Judea. Yejua amo katka kemej Jesús. Se tonal keman mochiuaya se ueyi nechikol, Herodes motakentij ika tilmaj tein tel patiyoj. Keman taltikpakneminij kiitakej uan kikakkej, peuak kijtouaj chikauak: “Nijin tagat ten tajtojtok amo tagat san. Ta, yejua se dios”. Herodes semi kiuelitak maj kiueyitalianij. Sayoj ke “se ángel takeual de Dios kikokoliskuiltiko ne Herodes. Porin nojon Herodes amo kiueyipanchiutoya Totajtsin Dios [...]. Ika ya nojon Herodes momikilij uan inakayo kitamijke in talokuilinme” (Hech. 12:21-23). Senkis moitaya ke Jiova amo kiixpejpenka kemej taixyekankej. Sayoj ke Jesús kinextij ke Dios kiixpejpenka uan nochipa kiueyitalij kemej Okachi Ueyi Taixyekankej itech ixolal. Jiova amo kinekia maj Jesús yeskia Taixyekankej itech ixolal sayoj seki xiujmej. Satepan ke moajokuik, Jesús kiniluij imomachtijkauan: “Notajtsin Dios nechmaktilij ya nochi in tanauatil tech in eluiyaktsinko uan nikan taltikpak”. Uan no kiniluij ke nochipa iniuan yetoskia hasta keman ixpoliuis nochi tein amo kuali (Mat. 28:18-20). w17.02 3:20, 21