Marzo

Iikniuan Jefté kitauelitayaj uan kinexikoluiayaj. Yejua ika kikuilijkej talmej tein katka iaxka (Juec. 11:1-3). Maski ijkon, keman kitataujtijkej maj kinpaleui, yejua ijkon kichiuak (Juec. 11:4-11). Amo kitayekanaltij tein kimachiliaya. Yejua kiitaya ke okachi monekia maj moueyitali itokay Jiova uan kipaleuis ixolal. Jefté kinekia kinextis ke takuaujtamatia iuan Jiova. Uan yejua ika yejuatsin kitiochiuak yejua uan nochi ixolal (Heb. 11:32, 33). ¿Keniuj uelis tikchiuaskej kemej Jefté? Maj tiknemilikan nejin: ¿toni tikchiuaskiaj komo se tokniuj amo kichiua tein tikchiayaj oso tiknemiliaj ke techchiuilia tein amo kuali? Maski timoyolxokoliskej, nejon maj amo techtsakuili maj amo tiktekitilikanok Jiova, maj amo tiyakanok nechikolmej oso maj amo iniuan timosentilikanok tokniuan. Okachi kuali, maj tiktakamatikan Jiova. Nejin techpaleuis maj amo timosenkauakan keman tikpanoskej ouijkayomej uan maj tikinkauilikan oksekin se kuali neskayot (Rom. 12:20, 21; Col. 3:13). w16.04 1:7, 9, 10

Motelneki maj titaxikokan hasta keman ejkos tamilis, uan amo sayoj seki tonalmej. Maj tiknemilikan ke se barco pankalaktok itech at. Komo akin itech youij kinekij makisaskej, moneki ajkuiskej hasta atenoj uan amo mosenkauaskej nion tepitsin. No ijkon, komo tiknekij tinemiskej itech Xochital, moneki titaxikoskej hasta keman ejkos tamilis uan nion tepitsin timosenkauaskej. Moneki no tikijtoskej tein kijtoj tatitanil Pablo: “Amo keman timoyolkejkepaj” (2 Cor. 4:16). Tikyekmatij ke Jiova techpaleuis maj titaxikokan hasta keman ejkos tamilis. Pablo kijkuiloj ke senkis titatantokej ika inepaleuil akin techtasojtak. Uan ke amo teyi uelis kichiuas maj Dios amo techtasojta, “maski timikiske uan maski tiyoltinemiske. Uan amo no in ángeles, nion in amokuali ejekame, nion in uejueyi tamatinime [...,] tajyouilis ten axkan tikpanotokke [...,] tajyouilis ten topan uetsikiu mosta oso uipta [...,] ne tayekanani ten ualpantemoske den ajko, [...] uan nion no nekes ten ualpankisaske den tani”. Uan no kijtoj: “Amo ongak okse taman ten Dios itachijchiu ten uelis techtsinkixtis itech in tetasojtalistsin de Totajtsin Dios, porin tipoutinemij iuan Totekotsin Cristo Jesús” (Rom. 8:37-39). w16.04 2:17, 18

Uelis tiktajtaniskej Dios maj techmaka tamatilis tein techpaleuis maj tikmatikan kemanian uelis nesis ke tikpaleuijtokej se tekiuajyot uan chikaualis tein techpaleuis maj tikchiuakan tein kuali. Kemej amo tikpaleuiaj nion se tekiuajyot, xa techtsakuaskej oso techtatsakuiltiskej. Komo techpanoua nejon, maj tiktajtanikan Jiova maj techmaka yolchikaualis tein techpaleuis maj kuali tikmelauakan keyej sayoj tikpaleuiaj iTekiuajyo (Hech. 4:27-31). Jiova techmakak Biblia tein ika techyolchikaua. Onkak seki tajkuilolmej tein uelis techpaleuiskej maj sayoj tikpaleuikan iTekiuajyo Dios. Uelis itech titanemiliskej uan timochikauaskej maj mokaua itech totanemilil takan se tonal amo ueli tikpiaj se biblia. Biblia no uelis techpaleuis maj okachi titakuaujtamatikan ke Dios kichiuas tein motenkauak. Nejin techpaleuis maj titaxikokan keman techtajyouiltiskej (Rom. 8:25). Maj tikixpejpenakan tajkuilolmej tein ika tajtouaj Xochital uan maj timochikauakan tiknemiliskej tein tiknekij tikpiaskej ompa. w16.04 4:14, 15

Akin taixyekanaj itech taneltokalismej kampa kijtouaj kitojtokaj Cristo amo kiteixmatiltiaj kuali tanauatilmej ika iTekiuajyo Dios. Uan komo ika tajtouaj Tekiuajyot, miakej kijtouaj ke se taman tein tikpiaj itech toyolo (Luc. 17:21). Amo tamachtiaj ke Tekiuajyot se taixyekanalis tein moajsi iluikak nion ke Jesús yejua Tekiuaj itech nejon taixyekanalis. Yejuan ika tajtouaj Jesús itech Navidad oso Semana Santa. Amo tamachtiaj ke iTekiuajyo Dios kiyektalis kuejmolmej tein onkak nikan taltikpak uan ke amo uejkaua kiixpolos tein amo kuali tein mochiujtok (Apoc. 19:11-21). Senkis moita ke amo kimatij tein Jesús kichiuas kemej Tekiuaj itech iTekiuajyo Dios. Amo kiajsikamatij toni moneki teolinis maj se tanojnotsa. Tanojnotsalis amo se tekit tein ika se kitanis tomin oso se kichijchiuas uejueyi kalmej. ITajtol Dios amo ika se tatani (2 Cor. 2:17). Imomachtijkauan Jesús amo moneki tajtaniskej maj kintaxtauikan porin tanojnotsaj (Hech. 20:33-35). w16.05 2:7, 8

Maj tiknemilikan ke semi tikuelitaj seki taman tilmaj. Sayoj ke tikmatij ke komo timotaliliaj, seki tokniuan itech nechikol uelis amo kuali kiitaskej. Biblia amo kijtoua ke amo uelis timotaliliskej. ¿Keniuj uelis tikmatiskej tein Jiova kinemilia? Biblia techyolmajxitia: “Siuame taneltokani ma motakentikan ika taixejekolis san ten kuali san. [...] Uan kuak mokuaxiluiske, ijkuakon ma amo semi kitelpanoltikan. Uan kuak motaliliske oro uan ne tetsitsin ten semi patio ten kiliaj perlas, ijkuakon ma amo sayo ika moueyimatinemikan. Uan nion no ma motakentikan ka ne takemit ten semi patio [...]. Ta, se siuat ma mokualnexti ika ne ichipaukanemilis” (1 Tim. 2:9, 10). Nejin tayolmajxitilis moneki kitakamatiskej amo sayoj tokniuan siuamej, ta no takamej. Komo tiyolyemankej, tikitaskej tein oksekin uelis kinemiliskej ika tilmaj tein timotaliliskej uan kemej timochijchiuaskej. Uan kemej tikintasojtaj tokniuan, timochikauaj amo tikinkuejmoloskej nion tikinkualantiskej (1 Cor. 10:23; Filip. 3:17). w16.05 3:14

Keman Adán amo kitakamatik iTachijchiujkauj, yejuatsin amo kiitakok kemej ikonetsin. Sayoj ke miakej akin itech ualeujkej kiixtalijkej kikauaskej maj Jiova kinixyekana (Heb. 12:1). Yejuan ika yolyemanilis kitakamatkej Akin kinchijchiuak. Ijkon kiixtopeujkej Satanás uan kinextijkej ke kinekiaj maj Jiova mochiuani ininTajtsin uan Sokikonchiujkej akin kinpaleuia (Juan 8:44). Nejon tein kichiujkej techelnamiktia tajtolmej tein israelitas akin moyolnonotskej kijtojkej itech tajkuilol tein axkan tikitaj. Itech nejin tonalmej, akin yekmelauj tiitekitikauan Dios timochikauaj tiktakamatiskej ika yolyemanilis. Tikitaj ke se ueyi tatiochiualis tikijtoskej ke Jiova toTajtsin. Tiknekij maj yejuatsin mochiua Sokikonchiujkej akin techpaleuia. Yejua ika moneki timotajtaniskej: “¿Nimochiua kemej sokit tein amo ouij se kitekitiltia tein Dios uelis ika kichijchiuas se komit tein tel patiyoj? ¿Nikinita nokniuan kemej yeskia sokit tein Jiova kitekitiltijtokok?”. w16.06 1:2, 3

Okachi amo uejkauaok tinemiskejya itech Xochital, uan moneki tiknextiskej ox chikauak moajsi totakuaujtamatilis. Maj itech titanemilikan tein kijtoua Mateo 6:33 uan maj timotajtanikan: “¿Kinextia tein nikixtalijtok nikchiuas satepan uan tein nikixpejpena ke yekmelauj nikneltoka ke mochiuas tein kijtoj Jesús? ¿Nimopolouiliskia nechikolmej oso amo nikisaskia tanojnotsalis sayoj porin nikneki niktanis okachi tomin? ¿Toni nikchiuas komo moneki okachi nitekitis? ¿No peuas nitanemilis kemej akin amo kitekitiliaj Dios uan nikauas maj nejon nechtsakuili maj amo niktekitiliok?”. ¿Tiktakamatij keman Biblia kijtoua maj amo tikinpiakan amo kuali tasojiknimej, maj amo timouikakan iniuan akin kinkalankixtiaj itech nechikol oso maj kuali tikixpejpenakan neixpetanilis? Komo amo tiktakamatij, uelis tiyoltakuauayaskej. Komo techpanoua nejon, motelneki maj niman tikitakan ika Biblia keniuj moajsi totakuaujtamatilis uan maj tikauakan maj techpaleui maj tikpatakan tein tikmatij ke amo tikchiujtokej kemej moneki. w16.06 2:8, 9

Axkan moajsi se nechikol kampa pouij taltikpakneminij akin kitasojtaj Dios uan kinekij kitekitiliskej. Moixmatij kemej itaixpantijkauan Jiova. Melauak ke mopolouaj, sayoj ke Jiova kinixyekana uan kintatiochiuia ika iyektikatsin espíritu. Itech xiuit 1914, semi amo miakej taltikpakneminij kiueyichiuayaj Jiova. Sayoj ke kemej yejuatsin kintatiochiuiani itekitikauan itech tanojnotsalis, tel miak millones taltikpakneminij kiixmatinij tein Biblia yekmelauj tamachtia uan mochiuanij itaixpantijkauan Jiova. Ne uejkauj, Dios kijtoj ke akin pouij itech ixolal momiakiliskiaj, kemej kijtoua tajkuilol tein axkan tikitaj. Uan no kijtoj: “Nejua, Jiova, nikijsiuiltis keman ajsis tonalmej”. Nejin tajtolmej yekmelauj mochiujtok itech totonaluan. Ixolal Jiova tamati kemej se ueyi altepet kampa moajsij panoua chikueyi millones taltikpakneminij. Nejin kijtosneki ke okachi timiakej ke nochin akin nemij itech miak altepemej. w16.06 4:1, 2

Jesús senkis kimatia ke komo Jiova kinyekpia totomej, no kinyekpias taltikpakneminij (1 Ped. 5:6, 7). Sayoj ke ijkon kemej totomej, moneki tiyeskij titekitinij. Moneki titatokaskej oso tiktaniskej tomin tein ika tikouaskej takual. Uan Jiova techtatiochiuis. Komo amo semi tikpiaj tomin oso takual, yejuatsin uelis techmakas tein techpoloua. Kemej neskayot, oksekin xa techuantiskej tein kipiaj. Jiova no kinmaka totomej kani nemiskej. Kinchijchiuak kemej uelis kichijchiuaskej inintapajsoluan. Uan no, kichijchiuak tein kikuiskej. No ijkon, Jiova uelis techpaleuis maj tikajsikan kani uelis tinemiskej iniuan tochankauan. Keman Jesús kiniluij tajtolmej tein moajsij itech tajkuilol tein axkan tikitaj, xa kinemilijtoya ke tepitsin satepan ininka momikiliskia taltikpakneminij (Luc. 12:6, 7). Jesús amo ininka momikilij totomej, ta imikilis techpaleuia tejuan maj ueli tikselikan nemilis nochipaya (Mat. 20:28). w16.07 1:11-13

Kemej itech tiualeuaj Adán, tinochin titajtakouanij uan timomikiliaj (Rom. 5:12, 14, 17). Maski ijkon, uelis tikchiuaskej maj tajtakol amo techyekana. ¿Keniuj? Keman titakuaujtamatij itech inemilis Cristo tein kitemakak. Ijkon tikauaj maj iueyi teiknelilis Jiova techyekana (Rom. 5:20, 21). Maski titajtakouanijok, amo moneki tikauaskej maj techyekana tajtakol. Yejua ika, keman tikchiuaj teisa tein amo kuali, tiktajtaniaj Jiova maj techtapojpolui. Komo tikauaj maj iueyi teiknelilis Jiova techyekana, ¿toni tein kuali tikseliskej? Pablo kijtoj ke tikixtopeuaskej “amokuali nemilis uan [...] tanejnekilisme ten ualeutok iuan in taltikpakuani san” uan tinemiskej ika “kuali taixejekolis”, tikpiaskej “yolmelaukanemilis” uan “[tikmouistiliskej] Totajtsin Dios nikan taltikpak” (tejuan tiktalilijkej cursivas; Tito 2:11, 12). w16.07 3:5, 6

Yekinika nemilis kemej namikuanij ijtakauik keman Adán uan Eva amo kitakamatkej Jiova. “Kouat ten ne achtopa ipa nentiuits”, oso Satanás, kikajkayauak Eva uan kiluij ke komo kikuaya itakilo “kouit tein kiixnextia taixmatilis ika tein kuali uan tein amo kuali”, kiixmatiskia se taman tein kipaleuiskia maj kiixpejpena tein kuali uan tein amo kuali. Eva kinextij ke amo kipoujkaitaya Adán kemej itaixyekankauj keman kikuaj koujtakilot porin amo kinemilij achto kiluis inamik. Uan Adán amo kitakamatik Dios keman kikuaj takilot tein inamik kimakak (Apoc. 12:9; Gén. 2:9, 16, 17; 3:1-6). Keman Jiova kintajtanij toni kichiujkaj, Adán kitajtakoltij Eva. Uan Eva kitajtakoltij kouat (Gén. 3:12, 13). ¡Tel amo kuali kemej motenpaleuijkej! Adán uan Eva amo kitakamatkej Jiova uan kiixnamikkej. Yejua ika, yejuatsin kintatsakuiltij. ¿Toni techmachtia tein kichiujkej? Ke komo namikuanij kinekij nochipa yolpakiskej, moneki kitakamatiskej Jiova uan tanankiliskej ika tein kichiuaskej. w16.08 1:1, 4, 5

¿Keyej seki namikuanij kipiaj uejueyi kuejmolmej? Sekin amo kuali momachiliaj oso kualanij porin amo mochiuak tein kichiayaj. Miakpa kipiaj kuejmolmej porin tataman kemej kiniskaltijkej oso tataman kemej sejse momachilia. Kemansa kipiaj kuejmolmej ika ininchankauan, tomin oso kemej kiniskaltiaj konemej. Sayoj ke semi kuali se kiitas ke miakej tokniuan namikuanij ueli kiyektaliaj kuejmolmej tein kipiaj porin mokauaj maj Dios kinixyekana. Keman namikuanij kipiaj uejueyi kuejmolmej, moneki kintajtaniskej tayekananij maj kinpaleuikan. Nejin tokniuan kipiaj miak taixmatilis uan uelis kinpaleuiskej maj kichiuakan tein Dios tayolmajxitia. Komo namikuanij kitajtaniaj Jiova iyektikatsin espíritu, uelis kitakamatiskej tein Biblia tayolmajxitia uan kinextiskej ikualneskayouan Cristo (Gál. 5:22, 23). w16.08 2:11-13

Jesús nochipa kipiaya miak tekit. Sayoj ke keman taltikpakneminij kinekiaj kikakiskej, yejua kinmachtiaya miak taman. Kemej neskayot, se tonal tel miakej yajkej atenoj porin kinekiaj kikakiskej. Jesús tejkok itech se barco iuan Pedro uan ompa peuak kinmachtia. Itech nejon tonal kipaleuij Pedro maj ueli kinkitski tel miak amichimej. Satepan kiluij tein moajsi itech tajkuilol tein axkan tikitaj. Biblia kijtoua ke Pedro uan oksekin akin iuan moajsiaj niman “kikauteuke ninbarcos uan yajke kitoktilijke Jesús para momachtiske itanextililis” (Luc. 5:1-11). Nicodemo no kinekia okachi kimatis tein tamachtiaya Jesús. Sayoj ke kemej pouia iniuan tamelauanij judíos, kimouiliaya tein oksekin ueliskia kijtoskej komo kiitayaj tajtojtok iuan Jesús. Yejua ika kikalpanoto youak uan Jesús kiselij ika pakilis (Juan 3:1, 2). Jesús keman yeski kinmachtiaya taltikpakneminij uan kichikauaya inintakuaujtamatilis. Tejuan no moneki tikinkalpanoskej taltikpakneminij keman okachi kemantiskej uan tikinpaleuiskej maj kiajsikamatikan tein tamachtia Biblia. w16.08 4:10, 11

Moneki tiyeskij tiyolyemankej uan tikajsikamatiskej ke Jiova chipauak uan yektik, uan ke tein technauatia yejua tein okachi kuali techixyekana. Komo tiknekij tiyeskij tiyolyemankej, nochipa tiktakamatiskej itanauatiluan. Uan no, komo tiyolyemankej tikpoujkaitaskej tein kimachiliaj uan tein kinemiliaj oksekin. Ika tilmaj tein timotaliliaj moneki senkis tiknextiskej ke tiitekitikauan Jiova. Dios kitalia itanauatiluan, uan tejuan tiktakamatij ika pakilis. Semi kuali tein kichiuaj tokniuan takamej uan siuamej akin kuali mochijchiuaj uan kuali monejnemiltiaj. Yejuan tapaleuiaj maj taltikpakneminij akin kipiaj kuali ininyolo kiselikan itamachtilis Biblia tein temakixtia uan kiueyitaliaj uan kiyolpaktiaj Jiova. w16.09 3:18-20

Jacob senkis kiixtalijka taxikos hasta kiselis itatiochiualis Jiova (Gén. 32:24-26). Uan amo nenkajtik. Yejuatsin kitokaytij Israel, tein kijtosneki “Akin mochijchikaua iuan Dios”. Jiova kimakak itatiochiualis porin taxikoj. Yejua nejon tein tejuan no tiknekij tikpiaskej. Raquel, inamik Jacob akin okachi kitasojtaya, kinekia kiitas keniuj Jiova kintatiochiuiskia ikoneuan, kemej yejuatsin kiluijka inamik. Sayoj ke Raquel amo uelia kinpiaya konemej, uan nejon semi kiyolkokouaya se siuat ne uejkauj. ¿Toni kichiuak Raquel? Amo keman kipoloj itakuaujtamatilis. Miakpa kitataujtiaya Jiova maj kipaleui maj taxiko. Jiova kikakik inetataujtiluan, uan satepan kitatiochiuij porin uelik kinpiak konemej (Gén. 30:8, 20-24). w16.09 2:6, 7

Motelneki xikonnextili mokoneuan ke okachi yolpakiskej komo kitakamatij tein kijtoua Biblia (Sal. 1:1-3). Kemej neskayot, uelis tikoniluis maj kinemilikan ke yatij nemitij itech se tal tein moajsi tatajko ueyiat uan ke moneki kinixpejpenaskej seki taltikpakneminij akin iniuan ompa nemiskej. Ompa uelis tikontajtanis: “¿Akonimej nankinixpejpenaskiaj maj ompa nemikan tein tapaleuis maj nochin kuali mouikakan?”. Uan satepan uelis tikonixtajtoltilis Gálatas 5:19-23. Ijkon uelis tikonnextilis mokoneuan ome tamachtilismej tein motelnekij. Yekinika, ke Jiova techmachtijtok axkan keniuj tinemiskej ika yolpakilis uan kuali timouikaskej iniuan oksekin. Uan ojpatika, ke yejuatsin techmachtijtok keniuj tinemiskej itech yankuik taltikpak (Is. 54:13; Juan 17:3). No uelis tikonnextilis keniuj Biblia kinpaleuiani okseki tokniuan, kemej kampa kijtoua “ITajtol Dios kipatak ininnemilis”, itech amaix Tanejmachtijkej. w16.09 5:13, 14

Maski xa moneki tikchiuaskej miak taman, tinochin moneki tikixtaliskej tonal keman timomachtiskej toselti uan keman titaueyichiuaskej iniuan tochankauan (Efes. 5:15). Keman timomachtiskej, moneki amo sayoj tikixtajtoltiskej miak páginas itech Biblia uan itech toamaixuan, oso tikitaskej toni titanankiliskej itech nechikolmej, ta moneki tiktemoskej maj iTajtol Dios ajsi itech toyolo uan maj kichikaua totakuaujtamatilis. Moneki tiknextiskej taixejekolis keman timomachtiskej uan tiknemiliskej keniuj uelis techpaleuis tejuan, uan amo sayoj keniuj kinpaleuis oksekin (Filip. 1:9, 10). Keman timomachtiaj tein tikijtoskej itech tanojnotsalis, tein titanankiliskej itech nechikolmej, keniuj tiktemakaskej se tanojnots oso se tamachtilis, amo nochipa tiknemiliaj keniuj uelis techpaleuis tein tikixtajtoltiaj. Kemej neskayot, maski se takualchiujkej moneki kiyekos takual tein kichijchiua achto ke kitemakas, amo ueli kuali motamaka sayoj ika tein kiyekoua. Komo kineki kuali yetos, moneki nochipa mochijchiuilis takual tein kipaleuis maj kipia chikaualis. No ijkon, komo tiknekij tikchikauaskej tokuali uikalis iuan Jiova, moneki nochipa timomachtiskej Biblia uan tiktemoskej maj techpaleui itech tein techpoloua. w16.10 2:10, 11

Biblia ome taman kemej kimelaua toni kijtosneki takuaujtamatilis itech Hebreos 11:1. Yekinika kijtoua ke “kuak titakuautamatij iuan Dios, ijkuakon timoyekmatiltiaj ya ke se tonal tikselijtiue nochi ne ten axkan tikyolikachixtokke”. Itech tein tikchixtokej pouij tatiochiualismej tein Dios motenkaua kiualkuis satepan. Kemej neskayot, tikyekmatij ke nochi tein amo kuali ixpoliuis uan ke onkas se yankuik taltikpak. Uan ojpatika, kijtoua ke ijkuak titakuaujtamatij, timoyekmatiltiaj ke yekmelauj moajsi nochi tein amo tikitstinemij. Seki taman tein yekmelauj moajsi sayoj ke amo tikitaj yejua Jiova, Jesucristo, ángeles uan Tekiuajyot tein moajsi iluikak. ¿Keniuj tiknextiaj ke yekmelauj titakuaujtamatij itech tein Dios motenkaua uan itech tein amo tikitaj? Tiknextiaj kemej timonejnemiltiaj uan ika tein tikijtouaj uan tikchiuaj. w16.10 4:6

Jiova uan Jesús kipatiuitaj nochi tein tikchiuaj keman tiktayekanaltiaj iTekiuajyo Dios, maski amo tiuelij tikchiuaj nochi tein tiknekiskiaj (Luc. 21:1-4; 2 Cor. 8:12). Kemej neskayot, tokniuan akin xiuejkejya mochikauaj yaskej nechikolmej uan nochipa tanojnotsatiuij. ¿Tikinyolchikauaj uan tikiniluiaj ke kuali tein kichiuaj? Maj tikinyolchikauakan oksekin nochipa keman uelis. Komo tikitaj ke aksa kuali kikisak teisa, maj tikiluikan. Keman Pablo uan Bernabé yetoyaj Antioquía de Pisidia, takamej akin taixyekanayaj itech sinagoga kiniluijkej: “Namejuan nantokniuan, komo nankompiaj tensa tajtolme tenika nantechyolmajxitiske, [...] xiktechnojnotsakan”. Yejua ika Pablo peuak kinyolchikaua (Hech. 13:13-16, 42-44). Komo tikinyolchikauaj oksekin, yejuan xa no kinekiskej techyolchikauaskej (Luc. 6:38). w16.11 1:3, 15, 16

Se ueyi tatiochiualis tipouiskej itech inechikol Jiova. Kemej tikmatij tein yejuatsin kiyolpaktia, moneki tiktakamatiskej uan tikchiuaskej tein kuali. Miakej kiuelitaj kichiuaskej tein amo kuali. Sayoj ke tejuan moneki tiktauelitaskej tein amo kuali, ijkon kemej Jiova kitauelita (Sal. 97:10). Moneki amo tiyeskij kemej akin kinemiliaj ke “tein kuali, amo kuali, uan tein amo kuali kiitaj ke kuali” (Is. 5:20). Tiknekij tikyolpaktiskej Jiova. Yejua ika senkis tikixtalijtokej maj chipauak moajsi tonakayo, totanemilil uan totaueyichiualis (1 Cor. 6:9-11). Tikmatij ke tein techiluia itech Biblia techpaleuia. Uan no, tiktasojtaj Jiova uan amo tiknekij tikauaskej. Yejua ika tiktakamatij itanauatiluan tokalijtik, itech nechikol, kampa titekitij, itech kaltamachtiloyan oso kampa yeski timoajsiskej. w16.11 3:13

Momachtianij ika Biblia amo kiyekajsikamatiaj tein Biblia kijtosneki keman technauatia maj tikintakamatikan tekiuanij. Yejua ika kemansa tapaleuijkej itech neteuilis. Kemej neskayot, akin tekiuajtia Estados Unidos kiniluij taltikpakneminij maj itech tonal 30 metsti mayo xiuit 1918 kichiuanij netataujtil kampa tajtaniskiaj maj onka yekyetolis. Amaix Tanejmachtijkej itech tajtol inglés kinyoleuak Momachtianij ika Biblia maj no kichiuanij. Seki tokniuan tapaleuijkej ika tomin itech neteuilis, uan sekin hasta mochiujkej tateuianij uan yajkej kampa mochiujtoya neteuilis. Kemej tikitaj, monekia maj Dios kinmelauani. Sayoj ke maj amo tiknemilikan ke yejua ika moajsikej imako Ueyi Babilonia. Tein melauj, itech Yekinika Ueyi Neteuilis senkis kistoyajya (Luc. 12:47, 48). w16.11 5:9

¿Keyej Pablo kinnejmachtij tokniuan taixpejpenalmej maj amo “moyekantinemi[nij] ika ne chikaualis de nintalnamikilis de tajtakol”? Porin akin yeski akin kichiua kemej Cristo uelis peuas kitayekanaltis itanejnekilis. Kemej neskayot, Pablo kijtoj ke seki tokniuan akin nemiaj Roma kikauayaj maj kinyekanani inintanejnekilis. Xa kijtosnekia ke okachi kitayekanaltiayaj auilnemiskej, takuaskej oso kichiuaskej okseki taman (Rom. 16:17, 18; Filip. 3:18, 19; Jud. 4, 8, 12). Uan itech xolal Corinto, se tokniuj kipiaya “keme isiuau ne itakpanan” (1 Cor. 5:1). Yejua ika monekia maj Pablo kinnejmachtiani (Rom. 8:5, 6). Nejin tanejmachtilis no semi tapaleuia axkan. w16.12 2:5, 8, 9

Uelis techpaleuis maj amo timoteltekipachokan komo tiktapouiaj aksa akin itech titakuaujtamatij keniuj timomachiliaj. Xa tonamik, se totasojikniuj oso se tayekankej techpaleuis maj tikajsikamatikan tein tikpanotokej. Biblia kijtoua ke teisa amo kuali kisa komo amo tikinixejekoltiaj oksekin (Prov. 15:22). Nechikolmej no uelis techpaleuiskej maj amo timoteltekipachokan. Ompa iniuan timosentiliaj tokniuan, akin toka motekipachouaj uan kinekij techyolchikauaskej (Heb. 10:24, 25). Keman timosenyolchikauaj techpaleuia maj tikpiakan chikaualis uan maj ueli tikixnamikikan tein yeski kuejmol (Rom. 1:12). w16.12 3:17, 18

Xa timokokouaj oso tikpanotokej okseki ouijkayomej, uan amo ueli tikpataj tein tikpanotokej. ¿Toni moneki tikchiuaskej? Maj tikauakan nochi imako Jiova uan maj titakuaujtamatikan ke yejuatsin toka motekipachoua (1 Ped. 5:6, 7). Maj timochikauakan tikseliskej nepaleuil itech nechikolmej uan ika okseki nepaleuilmej tein techmakaj itech inechikol Jiova (Heb. 10:24, 25). ¿Toni uelis kichiuaskej tetatmej akin iuan takuaujtamatij Jiova komo kipiaj konemej akin amo kitekitiliajok yejuatsin? Ineskayo tanauatijkej Samuel uelis kinpaleuis. Samuel amo uelia kinchikaujkauiaya ikoneuan akin uejueykejya katkaj maj kitakamatinij Dios (1 Sam. 8:1-3). Yejua ika nejon kikauilij Jiova. Sayoj ke mochikauak amo kikauas iTajtsin uan kiyolpaktis (Prov. 27:11). Miakej tokniuan tetatmej no ijkon kipanotokej. ¿Toni kichiuaj? Takuaujtamatij ke Jiova kineki oksepa kinselis akin moyolnonotsaj (Luc. 15:20). Yejua ika yejuan kisentokaj kitakamatij Jiova uan kichiaj maj ininneskayo kinolini ininkoneuan maj mokepakan itech nechikol. w17.01 1:15, 16

Akin kinextia yolyemanilis kimati ke amo nochi ueli kichiua uan kijtoua keman mopoloua. Uan no, kikaki tein oksekin kinemiliaj uan kitemoua toni kimachtia tein kichiuaj. Jiova semi kiyolpaktia maj se kinexti yolyemanilis. Biblia kinextia ke akin yolyemanik kuali moixmati uan kimati ke onkak seki taman tein amo ueli kichiua oso tein amo moneki kichiuas. Nejin kipaleuia maj kinpoujkaita oksekin uan maj kualtakat iniuan. Komo amo timoyekpiaj, uelis peuas timoueyinekiskej uan nion tikmatiskej. Xa peuas tiknemiliskej ke okachi tiueyichiuanimej ke oksekin porin tikpiaj seki tekimej itech nechikol oso porin totasojikniuan kipiaj (Rom. 12:16). Oso xa peuas tiktemoskej maj okachi techitakan (1 Tim. 2:9, 10). Hasta xa peuas tikiniluiskej oksekin tein moneki kichiuaskej oso tein amo (1 Cor. 4:6). w17.01 3:6-8

Tanojnotsalis kisentoka momoyaua uan itech inechikol Dios motekitiltijtok yankuik taman tein kichijchiuaj tamatinij. Sayoj ke tokniuan akin xiuejkejya kemansa kinouijmaka ueliskej yankuik taman kemej mochiua seki taman (Luc. 5:39). Uan no, moajsikamati maj amo kipiakanok chikaualis kemej achto ijkon kemej panotiyouij xiujmej. Yejua ika, semi kuali maj tokniuan takamej akin xiuejkejya kinmachtikan takamej akin ayamo xiuejkej tein kinpaleuis maj kiselikan okachi tekimej itech nechikol (Sal. 71:18). Tokniuan akin taixyekanaj kemansa kinouijmaka kinkauiliskej tokniuan takamej akin ayamo xiuejkej tekit tein kipiaj. Xa tayokoyaj keman kinemiliaj ke kipolotij se tekit tein kiteluelitaj oso kimachiliaj ke amo kuali mochiuas tekit komo amo yejuan kiixyekanaj. Oso xa kinemiliaj ke amo kemantij kinnextiliskej oksekin keniuj kichiuaskej tekit. Uan no, takamej akin ayamo xiuejkej moneki amo yolijsiuiskej keman amo kiseliskej okachi tekimej. w17.01 5:3, 4

Jesús mochiuak se takat akin amo tajtakolej, kemej katka Adán (Juan 1:14). Sayoj ke yejua kemaj kitakamatik tanauatilmej tein Dios kichiaya maj kitakamatini se takat akin amo tajtakolej. Maski kipanok okachi uejueyi ouijkayomej, nochipa kitakamatik itanauatiluan Dios. Keman Jesús toka kitemakak inemilis tein amo kipiaya tajtakol, uelik techmakixtij itech tajtakol uan mikilis. Yejua monejnemiltij kemej Adán monekia monejnemiltis. Katka se takat yektik akin amo keman kikauak Dios uan nochipa kitakamatik (1 Tim. 2:6). Inemilis tein kitemakak kichiua maj nochin takamej, siuamej uan konemej uelikan kichiakan nemiskej nochipaya (Mat. 20:28). Kemej tikitaj, tel tapaleuia maj mochiua tein Dios kiixtalijtok (2 Cor. 1:19, 20). w17.02 1:15, 16

Xikonnemili ke moneki tionojtokas nochi youal. Kampa yeski tiontachias tatayouayan. Sayoj ke tikonmati ke amo uejkaua tanesis. Kemansa uelis ijkon yeski tonemilis. Xa tikpanouaj uejueyi ouijkayomej uan timoteltekipachouaj. Hasta Jesús xa no ijkon momachilij. Keman kipilojkej itech kouit, kipinaujtijkej uan kichiujkej maj tel tajyoui. Tikyekmatij ke yejua nejon tein okachi ouij tein kipanok (Heb. 12:3). Yejua itech tanemilij tatiochiualismej tein kiseliskia komo taxikouaya, okachiok ke tapaleuiskia maj mochipaua itokay Dios uan maj monexti ke yejuatsin kinamiki taixyekanas. Kimatia ke ouijkayot tein kipanotoya tamiskia, sayoj ke tatiochiualis tein kiseliskia ompa iluikak uejkauaskia nochipaya. Keman tikpanoskej uejueyi kuejmolmej, uelis titanemiliskej itech tatiochiualismej tein tikseliskej komo titaxikouaj uan tikelnamikiskej ke kuejmolmej tamiskej. w16.04 2:10

Axkan, miakej amo kinkuejmoloua inintanemilil keman tajtakouaj. Yejua ika amo kiajsikamatij keyej moneki kinpaleuis imikilis Jesús. Amo kiajsikamatij toni kijtosneki tajtakol, keniuj kinijtakoua uan toni moneki kichiuaskej tein kinpaleuis maj amo kinyekanaok tajtakol. Komo kipiaj kuali ininyolo, kitasojkamatij kimatiskej ke Dios kiualtitanik iKonetsin maj techijkuanili tajtakol uan mikilis. Uan no, kiajsikamatij ke Jiova kichiuak nejin porin techteltasojta uan technextilia iueyi teiknelilis (1 Juan 4:9, 10). Inemilis Jesús tein kitemakak yejua tein okachi kinextia ke Dios techtasojta uan ke kitelneki technextilis iueyi teiknelilis. Techyolseuia tikmatiskej ke komo titakuaujtamatij itech imikilis Jesús, Dios uelis techtapojpoluis totajtakoluan uan amo techkuejmolos totanemilil (Heb. 9:14). ¡Tel kuali tanauatilmej! ¿Melauj ke tiknekij tikinmatiltiskej nochin? w16.07 4:6, 7

Jiova techyekmatiltia ke uelis kichiuas maj totajtakoluan senkis ixpoliuikan komo titakuaujtamatij itech inemilis Jesús tein kitemakak. Nejin kijtosneki ke uelis senkis techtapojpoluis (Hech. 3:19-21). Inemilis Jesús tein kitemakak kichiua maj Jiova kinseli tokniuan taixpejpenalmej kemej ikoneuan uan maj nemikan ompa iluikak (Rom. 8:15-17). Sayoj ke no, Jiova kinyoleua tokniuan akin pouij iniuan ‘okseki ichkamej’ maj pouikan iniuan ichankauan nikan taltikpak. Keman amo kipiaskejok tajtakol, monekis kipanoskej se tayejyekolis tein mochiuas satepan ke panos mil xiujmej. Komo amo kikauaj Jiova, yejuatsin no kinselis kemej ikoneuan (Rom. 8:20, 21; Apoc. 20:7-9). Jiova nochipa kintasojtas nochin ikoneuan. Uan ika inemilis Jesús tein kitemakak, tiksentokaskej tikselijtoskej tatiochiualismej nochipaya. Jiova techmakak nejin ueyi netetayokolil, uan amo akin uelis techkuilis. w17.02 2:15, 16

Jiova kimatia ke titajtakouanij uan ke yejua ika timopolouaj. Maski ijkon, kinekik maj kuali iuan timouikakan. Kemej semi techtasojta, techmakak se netetayokolil tein kipia miak ipatiuj. Kiualtitanik iKonetsin maj toka momikiliki uan maj kiixtauaki totajtakoluan (Juan 3:16). Keman timopolouaj, ueli tiktajtaniaj Jiova maj techtapojpolui. Ika inemilis Jesús tein kitemakak, Dios techtapojpoluia uan ueli tiksentokaj kuali iuan timouikaj maski titajtakouanij (1 Tim. 1:15). w16.05 4:6, 7