Abril

¿Tikpanotokej se ouijkayot? Xa se tokniuj itech nechikol techyolkokoj (Sant. 3:2). Oso xa akin iniuan timomachtiaj oso iniuan titekitij techpijpinaujtiaj porin tiktekitiliaj Jiova (1 Ped. 4:3, 4). Uan no, xa se tochankauj kitemoua maj amo tiakanok nechikolmej nion maj titanojnotsakanok (Mat. 10:35, 36). Komo nejon ouijkayot kichiua maj semi titajyouikan, xa tiknekiskej timosenkauaskej. Sayoj ke uelis titakuaujtamatiskej ke maski tein yeski ouijkayot tikpanoskej, Jiova techmakas tamatilis tein techpaleuis maj kuali tikixejekokan toni tikchiuaskej, uan chikaualis tein techpaleuis maj titaxikokan. Jiova kichiuak maj itech Biblia moijkuilouani toni kichiujkej seki taltikpakneminij keman kipanokej ouijkayomej. ¿Keyej? Porin nejon neskayomej uelis techpaleuiskej, kemej kijtoj tatitanil Pablo. Nejin neskayomej uelis techyolseuiskej uan techyolchikauaskej. Sayoj ke komo tiknekij maj techyolseui uan maj techyolchikaua amo sayoj moneki tikixtajtoltiskej Biblia, ta tein tikixtajtoltiaj moneki tikauaskej maj kipata tein tiknemiliaj uan tein tikmachiliaj. w21.03 14 § 1, 2

¿Tikinitaj taltikpakneminij akin tikinnojnotsaj kemej yeskiaj tatet tein uelisya se kitekis? Komo ijkon, panos eyi taman. Yekinika, tikitaskej ke semi moneki titanojnotsaskej. Kemej ixyetok kanachi uejkauas tatekilis, moneki se moijsiuilis. Ojpatika, tiyolpakiskej keman timochikauaskej titapaleuiskej itech nejin tekit. Biblia kijtoua: “Taltikpakneminij yolpakij keman kitekij tatok” (Is. 9:3). Uan expatika, tikitaskej akin tiknojnotsaj kemej se akin uelis mochiuas itatojtokakauj Jesús, yejua ika keman tiknojnotsaskej tikiluiskej tein kiyolnotsas. Seki itatojtokakauan Jesús xa kinemilijkej ke samaritanos amo keman mochiuaskiaj itatojtokakauan, sayoj ke Jesús amo ijkon kinemilij. Tejuan no moneki tiknemiliskej ke akin tikinnojnotsaj uelis mochiuaskej itatojtokakauan Jesús. Tatitanil Pablo techkauilij se kuali neskayot. Yejua tepitsin kiixmatia tein kineltokayaj akin kikakiaj, kimatia tein kinyolnotsaya uan kinemiliaya ke ueliskiaj mochiuaskej itatojtokakauan Jesús. w20.04 8, 9 § 3, 4

Maj amo titeijijtokan, okachi kuali maj timochikauakan tikajsikamatiskej keniuj momachiliaj oksekin. Sayoj Jiova senkis techajsikamati. Yejua ika, maj tiktajtanikan maj techpaleui maj tikinitakan tokniuan ijkon kemej yejuatsin kinita uan no maj tikmatikan keniuj tikinnextiliskej ke tikinikneliaj. Maj amo tiknemilikan ke seki tokniuan moneki tikinikneliskej uan oksekin amo. Nochin yejuan kipanouaj ouijkayomej, ijkon kemej kipanok Jonás, Elías, Agar uan Lot. Seki ouijkayomej yejuan motemolijkej. Sayoj ke tein melauj, tinochin kemansa tikchiuanij teisa tein techualkuilia ouijkayomej. Yejua ika, Jiova techiluia maj tikinajsikamatikan oksekin (1 Ped. 3:8). Keman tiktakamatij, titapaleuiaj maj kuali timouikakan iniuan tokniuan itech nochi taltikpak, maski titatamamej. Yejua ika, maj timochikauakan tikinkakiskej, tikinajsikamatiskej uan tikinikneliskej tokniuan. w20.04 18, 19 § 15-17

Jesús techkauilij se kuali neskayot porin nochipa kitakamatik. Yejua ika, se taman kemej tiktakamatij Jiova yejua komo timochikauaj tikchiuaskej kemej Jesús (Juan 8:29). Tiksentokaskej tinentinemiskej itech tein melauak komo tikneltokaj ke Jiova amo keman takajkayaua, uan yejua ika, nochi tein techiluia itech iTajtol melauak. No moneki tikneltokaskej ke Jesús yejua Mesías akin moijtojka ke ualaskia. Axkan, miakej amo kineltokaj ke Dios kiixpejpenak Jesús kemej Tekiuaj itech iTekiuajyo. Juan tanejmachtij ke moajsiaj “miakke takajkayauani”, akin ueliskiaj kinkajkayauaskej akin amo senkis kineltokayaj nejin tamachtilismej (2 Juan 7- 11). Juan kijkuiloj: “¿Akoni yejua ne tekajkayaukatagat? Yejua [...] ten kijtoa ke Jesús amo Yejuatsin in Cristo” (1 Juan 2:22). Komo timomachtiaj iTajtol Dios amo uelis techkajkayauaskej. Sayoj ijkon uelis tikixmatiskej Jiova uan Jesús (Juan 17:3). Uan keman tikchiuaskej nejin, titakuaujtamatiskej ke tein tikneltokaj yejua tein melauak. w20.07 21 § 4, 5

Komo amo tiknekij tikintsakuiliskej akin touan motalojtokej, keman uelis maj tikchiuakan teisa kemej yejuan kijtouaj uan maj amo tiktemokan maj nochipa mochiua tein tejuan tikijtouaj (Rom. 14:19-21; 1 Cor. 8:9, 13). Nejin semi taman ika tein panoua keman motatanij akin motalouaj, porin sayoj inintech tanemiliaj. Yejua ika xa kitemoskej ajsiskej hasta taixpan maski kintojtopeuaskej oksekin. Sayoj ke, tejuan amo timotatanij iniuan tokniuan (Gál. 5:26; 6:4). Tiknekij tikinpaleuiskej nochin akin tiueliskej maj touan ajsikan kampa ixyetok tiajsiskej uan maj tikselikan netetayokolil: tinemiskej nochipaya. Yejua ika, timochikauaj amo tiktemoskej sayoj tejuan totanejnekilis, ta no inintanejnekilis oksekin, kemej Pablo tayolmajxitij (Filip. 2:4). Kemej Jiova techtasojta, kijtoua ke nochin akin ajsiskej kampa ixyetok kitaniskej netetayokolil uan nemiskej nochipaya, ompa iluikak oso itech Xochital nikan taltikpak. w20.04 28 § 10; 29 § 12

Okseki itekitikauan Dios akin okachi miakej makisaskej itech okachi ueyi tajyouilis uan kalakiskej itech yankuik taltikpak. Nejin takamej uan siuamej kiitaskej okse taman kemej kitanij mikilis: keman millones taltikpakneminij oksepa kiseliskej ininnemilis. ¡Nochin semi yolpakiskej! (Hech. 24:15). Uan nochin akin nochipa kitakamatiskej Jiova uan amo keman kikauaskej no kitaniskej mikilis tein techpanoltilij Adán uan uelis nemiskej nochipaya. Nochin itekitikauan Dios akin tiyoltokejok itech nejin tonalmej semi tiktasojkamatij tein Pablo kinijkuilouilij tokniuan akin nemiaj Corinto porin semi techyolseuia. Moajsi miak taman tein moneki techolinis maj tiktakamatikan nejin tein Pablo tayolmajxitij: “Xiksentokakan xitekititiyakan kachi ok tech ne tekitsin ten Totekotsin Cristo technauatilij” (1 Cor. 15:58). Komo timochikauaj nochipa tikchiuaskej nejin tekit, satepan semi tiyolpakiskej uan tonemilis okachi kualtsin yeski, kemej amo ueli tiknemiliaj. Ijkuak tikitaskej ke tekit tein tikchiujkej amo nenkaj. w20.12 13 § 16, 17

Nesi ke Ezequiel 38:10-23; Daniel 2:43-45; 11:44-12:1 uan Apocalipsis 16:13-16, 21 ika tajtouaj sayoj se taman. Komo ijkon, uelis tikchiaskej maj pano nejin. Tepitsin satepan ke peuas ueyi tajyouilis, “tayekanani ten kinyekantinemij in taltikpakuani nochi senmanauak” mosentiliskej uan mopaleuiskej (Apoc. 16:13, 14). Biblia kitokaytia “Gog akin ualeua itech tal Magog” keman tekiuanij mosentiliskej uan mopaleuiskej (Ezeq. 38:2). Nochin nejin tekiuanij kiixnamikiskej ixolal Dios uan kitemoskej kiixpoloskej. Ika nejin tein panos, tatitanil Juan kiitak ke uetsia uejueyi tesiuit inintech akin kiixnamikij Dios. Nejin uejueyi tesiuit xa kiixnextia keman itekitikauan Jiova kitematiltiskej ke akin kiixnamikij Dios kinixpolotij nejin kichiuas maj Gog akin ualeua Magog kiixnamiki ixolal Dios uan maj kitemo kiixpolos (Apoc. 16:21). w20.05 15 § 13, 14

Ichikaualis Dios yejua se taman tein semi moneki tikpoujkaitaskej. Uelis okachi tiktasojkamatiskej yektikatsin espíritu komo tiknemiliaj keniuj semi tapaleuijtok axkan. Achto ke yaskia iluikak, Jesús kiniluij imomachtijkauan: “Kuak ualas ya namoyolijtik in [y]ektikatsin [e]spíritu, ijkuakon namejuan nankiseliske ichikaualis [...]. Uan no nantetapouijtinemiske de Nejuatsin nonouiyampa de nochi senmanauak” (Hech. 1:8). Yektikatsin espíritu tapaleuiani maj miakej akin kayomej itech nochi taltikpak, panoua ocho millones uan tajko, kiixtalianij kitekitiliskej Jiova. Uan no, tinochin tiitekitikauan Jiova kuali timouikaj porin yektikatsin espíritu techpaleuia maj tikpiakan kualneskayomej kemej netasojtalis, yolpakilis, yolseuilis, kualtakayot, yolkualtakayot, takuaujtamatilis, yolnejmachkayot uan no techpaleuia maj amo tiyolijsiuikan uan maj ueli timotsakuilikan (Gál. 5:22, 23). Kemej tikitaj, yektikatsin espíritu se netetayokolil tein semi kipia ipatiuj. w20.05 28 § 10; 29 § 13

Moajsi miak taman tein kinextia ke akin kinchiaskej akin oksepa nemiskej uelis kinixmatiskej. Kemej neskayot, keman tikixtajtoltiaj itech Biblia keman Jiova kichiuak maj oksepa nemikan seki taltikpakneminij, techajsikamatiltia ke akin oksepa nemiskej kinchijchiuas kemej katkaj tepitsin achto ke momikiliskiaj, kemej moitayaj, kemej tajtouayaj uan kemej tanemiliayaj. Uan no, maj tikelnamikikan ke Jesús kijtoj ke keman se momikilia kemej yeskia se kochi uan ke keman oksepa se nemi kemej yeskia se ijsa oso se tachia (Mat. 9:18, 24; Juan 11:11-13). Keman taltikpakneminij ijsaj oso tachiaj amo mopata kemej moitayaj, kemej tajtouayaj uan tein kinemiliayaj achto ke kochiskiaj. Maj tikitakan tein kipanok Lázaro. Keman Jesús kichiuak maj oksepa nemi, naui tonal achtoya momikilijka, yejua ika inakayo uejueliujtoyaya. Sayoj ke iikniuan niman kiixmatkej uan Lázaro no kinelnamikia (Juan 11:38-44; 12:1, 2). w20.08 14 § 3; 16 § 8

Dios amo okachi kinpatiuita taixpejpenalmej ke okseki ichkamej, ta yejuatsin nochin kintasojta. Tikmatij nejin porin kitemakak sayoj se taman taxtauil, inemilis iKonetsin tein ika kinkouak taixpejpenalmej uan okseki ichkamej. Sayoj taman nechialis tein kipiaj. Sayoj ke nochin, taixpejpenalmej uan okseki ichkamej, moneki kisentokaskej kitakamatiskej Dios uan Cristo (Sal. 31:23). Uan maj amo tikelkauakan ke Dios uelis kichiuas maj iespíritu kinmaka chikaualis nochin itekitikauan. Jiova ueli kimaka iespíritu sejse itekitikauj ijkon kemej monekis, yeski taixpejpenal oso amo. Jiova kinmakani nochin itekitikauan akin iuan motemaktijkejya se kualtsin nechialis (Jer. 29:11). Itech tonal keman moelnamiki imikilis Cristo, tinochin ueli tikueyichiuaj Dios uan tiknextiliaj yejuatsin uan Cristo ke tikintasojtaj uan timotasojkamatij porin kichiujkej maj ueli tikchiakan tinemiskej nochipaya. Keman moelnamiki imikilis Cristo yejua nechikol tein okachi kipia ipatiuj tein tikpiaj xijxiujtika akin yekmelauj tikchiuaj kemej Cristo. w21.01 18 § 16; 19 § 19

Miakej akin mosentiliaj nejon tonal kichiaj nemiskej nikan taltikpak. Komo ijkon, ¿keyej mosentiliaj? Keman monamiktia se taltikpaknenkej, akin kuali iuan mouikaj kinnextiliaj ke kintasojtaj uan ke kinpaleuiaj. No ijkon, okseki ichkamej youij keman moelnamiki imikilis Cristo porin kinekij kinnextiliskej Cristo uan taixpejpenalmej ke kintasojtaj uan ke kinpaleuiaj. Uan no, ijkon kinextiaj ke kitasojkamatij inemilis Jesús tein kitemakak, tein kichiua maj satepan uelikan nemikan nochipaya nikan taltikpak. Okseki ichkamej no mosentiliaj keman moelnamiki imikilis Cristo porin kinekij kitakamatiskej tein Jesús tanauatij. Keman Jesús yekinika kichiuak nejin takualis iniuan itatitaniluan akin amo kikaujkej, kiniluij: “Xiksentokakan xikchiuakan nejin uan ika xinechelnamikikan” (1 Cor. 11:23-26, TNM). Yejua ika, kemej moajsijok taixpejpenalmej nikan taltikpak, okseki ichkamej kisentokaskej mosentiliskej itech iTakualis toTekotsin. w21.01 17, 18 § 13, 14

Akin yekmelauj tikintasojtaj moneki tiknextiskej ika tein tikchiuaj (no xikonita Santiago 2:17, 26). Kemej neskayot, Jiova techtasojta (1 Juan 4:19). Uan technextilia nejon netasojtalis ika kualtsitsin tajtolmej tein moajsij itech Biblia (Sal. 25:10; Rom. 8:38, 39). Sayoj ke amo sayoj tikmatij ke techtasojta ika tein kijtoua, ta no ika tein kichiua. Jiova kikauak maj iKonetsin akin semi kitasojta tajyouiani uan maj toka momikiliani (Juan 3:16). Yejua ika tikneltokaj ke yejuatsin techtasojta. Tiknextiaj ke tikintasojtaj Jiova uan Jesús keman tikintakamatij (Juan 14:15; 1 Juan 5:3). Uan Jesús technauatij nejin: “Ximoyoltasojtatiyakan se uan okse” (Juan 13:34, 35). Nejon netasojtalis moneki tikinnextiliskej tokniuan amo sayoj ika totajtoluan, ta no ika tein tikchiuaj (1 Juan 3:18). w21.01 9 § 6; 10 § 8

Tokniuan taixpejpenalmej kichiaj yetoskej iuan Jesús uan taixyekanaskej iuan itech iTekiuajyo Dios. Kiitaskej, iuan tajtoskej uan yetoskej iuan nochipaya (Juan 14:2, 3). Jesús no kintasojtas uan kinyekpias akin nemiskej nikan taltikpak. Keman kiseliskejya tatiochiualismej tein Jiova uan Jesús kijtojkaj kinmakaskej, okachi kuali mouikaskej iuan Jesús maski amo kiitaskej (Is. 9:6, 7). Keman timochiuaj itasojikniuan Jesús kemej techyoleuak, tikseliaj miak tatiochiualismej. Kemej neskayot, axkan techtasojta uan techpaleuia. Uan no, uelis tinemiskej nochipaya. Uan tein okachi moneki, komo kuali timouikaj iuan Jesús no kuali timouikaskej iuan iTajtsin, Jiova, tein okachi kipia ipatiuj. Se ueyi tatiochiualis maj kuali timouikakan iuan Jesús. w20.04 25 § 15, 16

Amat tein tatitanil Pablo kijkuiloj kintitanilij tokniuan akin nemiaj Corinto, akin katkaj taixpejpenalmej uan kiseliskiaj ininnemilis ompa iluikak. Pablo kiniluij: “Namejuan Dios namechyolchipauak ya para nanpouij iuan Cristo Jesús Temakixtijke. Uan Dios namechnotsak namejuan para kachi ok xichipaukanentinemikan”. Pablo no ininka tajtojtoya taixpejpenalmej keman ininka tajtoj “nochi ne taneltokani de Cristo ten momikilijke ya” (1 Cor. 1:2; 15:18; 2 Cor. 5:17). Uan itech okse amat tein kijkuiloj, kijtoj: “Timajsitinemij iuan Cristo porin Dios techpouak ke tejuan timomikilijke ijkon keme Cristo Jesús momikilij [...]. Uan no xikmatikan ke tejuan timajsitinemij iuan Cristo porin Dios techpouak ke tejuan tipankis[as]ke ya tiyoltokke intsalan in animajme, ijkon keme Cristo Jesús pankisak yoltok” (Rom. 6:3-5). Jesús kiselij inemilis kemej se espíritu uan yajki iluikak. No yejua nejon panos iniuan itatojtokakauan Cristo taixpejpenalmej. Pablo kijkuiloj ke Cristo oksepa nemik kemej “tayekanke de nochi [...] in taneltokani ten momikilijke” (1 Cor. 15:20). Jesús yejua akin yekinika kiselij inemilis kemej se espíritu uan amo kemanok momikilis. w20.12 5, 6 § 15, 16

Itech nejin tonalmej, tokniuan taixpejpenalmej akin momikiliaj niman kiseliaj ininnemilis ompa iluikak. ¿Keniuj tikmatij? Ika tein kijtoj tatitanil Pablo itech 1 Corintios 15:51, 52. Nejin tein kijtoj Pablo mochiujtok axkan. Keman oksepa kiseliskej ininnemilis, nejin iikniuan Cristo senkis yolpakiskej. Biblia kijtoua toni kichiuaskej ompa iluikak akin ‘kintakayojpataj ijkon keme kuak se tetsilijkopi’. Jesús kiniluia: “Nochi nekes ten kitanilitiue ya in amokuali Satanás, uan no kitamitakamatitiue ya notanauatiluan hasta kuak ne momikiliske, yejuan nojonkes nikinaxkatilis tanauatil [...]. Uan ijkon keme Notajtsin Dios nechmaktilij ya tanauatil para nitayekantinemis, no ijkon nejua nikinmaktiliti notaneltokakauan tanauatil para yejuan ma tayekanantinemikan ika ueyi chikaualis. Uan ijkon nochi nekes ten amo tatakamatinemij, yejuan nojonkes tajtamis ninchikaualis ijkon keme se kontsin papayakas kuak uetsis” (Apoc. 2:26, 27). w20.12 12 § 14, 15

Keman tatitanil Pablo kijtoj ke Jesús “tayekanke”, kiteajsikamatiltij ke oksekin no kiseliskiaj ininnemilis ompa iluikak (1 Cor. 15:18). Satepan, tatitanilmej uan okseki itatojtokakauan Cristo taixpejpenalmej kiseliskiaj ininnemilis ompa iluikak, ijkon kemej Jesús. Keman Pablo kintajkuilouilij tokniuan akin nemiaj Corinto, itatojtokakauan Cristo taixpejpenalmej ayamo peuaya kiseliayaj ininnemilis ompa iluikak. Tein melauj, Pablo kiteajsikamatiltij ke mochiuaskia satepan. Yejua kijtoj: “Achto Cristo pankisak yoltok, keme yeskia se tayekankatakilot. Uan satepan tech ne tonal kuak moualuikas Cristo, [...] ten tipoutinemij iuan Cristo, nochi tejuan Totajtsin Dios techpankixtis tiyoltokke” (1 Cor. 15:23; 1 Tes. 4:15, 16). Kemej tikitaj, tatitanilmej uan okseki tokniuan taixpejpenalmej kiseliskiaj ininnemilis ompa iluikak hasta ‘ne tonal ijkuak moualuikaskia Cristoʼ uan ijkon ‘pankisaskej ya yoltokej intsalan in animajme, ijkon keme Cristo Jesús pankisak yoltokʼ. Axkan tinemij itech ‘ne tonal ijkuak moualuikaskia Cristoʼ (Rom. 6:5). w20.12 5 § 12; 6 § 16, 17

Tatitanil Pablo ininka tajtojtoya akin kiseliaj ininnemilis ompa iluikak, kemej espíritus (1 Cor. 15:43-44). Keman Jesús nemik nikan taltikpak, chijchiujtoya kemej tejuan. Sayoj ke keman oksepa kiselij inemilis, mochiuak se espíritu tein kichiua maj se nemi uan mokepak iluikak. No ijkon, taixpejpenalmej kiseliskiaj ininnemilis kemej espíritus. Pablo kijtoj: “Ijkon keme tejuan tiixtamatij keme ne tagat Adán ten Dios kichijchiuak ika tal san, no ijkon tejuan se tonal tiixtamatiske keme ne Cristo” (1 Cor. 15:45-49). Keman Jesús oksepa kiselij inemilis amo nemikok kemej se taltikpaknenkej. Pablo kijtoj keyej keman matantiayaya itamachtilis: “Nakat uan omit amo ueli kiseliaj iTekiuajyo Dios” tein moajsi iluikak (1 Cor. 15:50, TNM). Tatitanilmej uan okseki taixpejpenalmej no amo yaskiaj iluikak kemej chijchiujtokej taltikpakneminij, ika nakat uan omit tein uejueliui. w20.12 10, 11 § 10-12

Dios kichiuak maj seki itatojtokakauan Jesús itech yekinika siglo kijkuilouanij ke sekin kiseliskej ininnemilis ompa iluikak. Tatitanil Juan kijtoj: “Axkan tiikoneuan Dios, sayoj ke ayamo tikmatij keniuj tiyeskij. Tikmatij ke keman yejuatsin monextis tiyeskij kemej yejuatsin” (1 Juan 3:2, TNM). Nejin kinextia ke taixpejpenalmej amo kimatij keniuj yeski ininnemilis ompa iluikak keman oksepa nemiskej. Sayoj ke keman ompa nemiskej kiitaskej Jiova. Biblia techmatiltia seki taman. Kemej neskayot, tatitanil Pablo kijtoj ke taixpejpenalmej yetoskej iuan Cristo keman kiixpolos “nochi tanauatil uan nochi chikaualis uan nochi uelilis”, uan keman “kitamitanilis ya in mikilis”. Satepan, Jesús uan akin iuan tekiuajtiskej nochi kimaktiliskej Jiova, uan yejuan no motemaktiskej uan mokauaskej maj yejuatsin kinixyekana (1 Cor. 15:24-28). ¡Semi kualtsin yeski! w20.12 8 § 2

Akin kiseliskej ininnemilis ompa iluikak yejuan “achtopa [...] Dios kinpankixtis ma oksepa yoltinemikan” (Apoc. 20:6). ¿Melauj ke nejin kiteajsikamatiltia ke moajsij oksekin akin no oksepa kiseliskej ininnemilis? Nejin mouika ika tein Job kijtoj ke kipanoskia satepan (Job 14:15). Akin ‘poutinemij iuan Cristo’ yetoskej iuan Jesús keman kiixpolos “nochi tanauatil uan nochi chikaualis uan nochi uelilis”. Ompa,“Totajtsin Dios [...] kitamitanilis ya in mikilis”. Nejin kinextia ke akin kiseliskej ininnemilis ompa iluikak amo keman momikiliskej. (1 Cor. 15:23-26). Akin amo yaskej iluikak uelis kichiaskej nejin tein Pablo kijtoj itech tajkuilol tein axkan timomachtiaj. Kemej ompa iluikak amo ueli kalakij “ten amo yolkualime”, ika nejin tajtolmej moajsikamati ke oksekin kiseliskej ininnemilis nikan taltikpak. w20.12 6, 7 § 18, 19

Xa timotajtaniaj: “¿Keniuj uelis nikmatis ke Jiova amo kinemilia ke amo nimopatasok?”. Ueliskia tikijtoskej ke keman timochiuiliaj nejin netajtanil tejuan tiknankilijtokejya. ¿Keyej tikijtouaj nejin? Itech se tamachtilis tein kisak miak xiujmej achto itech amaix Tanejmachtijkej moijtouaya keniuj uelis timomachiliskej komo achto tikchiuayaj se taman tein amo kuali uan axkan oksepa techyoltilana. Itech tamachtilis moijtouaya: “Amo xionmosenkaua. Amo xikonnemili ke tein tikonchiuak se ueyi tajtakol uan ke Jiova amo keman mitsontapojpoluis. Satanás kiuelitaskia ijkon xikonnemili. Kemej tionmotekipachoua uan tiontayokoya kinextia ke amo mitsonyolpaktia tein amo kuali. Nochipa xikontataujti Jiova ika yolyemanilis uan xikontajtani maj mitsontapojpolui, maj mitsonpaleui maj amo mitsonkuejmolook motanemilil uan maj mitsonpaleui amo xikonchiuaok tein amo kuali. Xiontajto iuan kemej se konetsin tajtoua iuan ipopaj. Maski konetsin miakpa kipia se taman ouijkayot, nochipa kitajtania ipopaj maj kipaleui. Tatitanil Pablo kichiuak seki taman tein amo kuali achto ke mochiuaskia itatojtokakauj Cristo. Maski kielnamikia tein kichiujka (1 Tim. 1:12-15). Kiitaya inemilis Jesús kemej se netetayokolil tein Dios kimakaka yejua. Nejon kipaleuij maj amo kisentokani kikuejmolouani itanemilil uan maj kitayekanaltiani kimakas Jiova tein okachi kuali. w20.11 27 § 14; 29 § 17

Satanás no kitemoua maj titajtakokan ika okseki taman. ¿Toni tikchiuaj keman panoua nejon? Xa tiknemiliskej se taman kemej nejin: “Amo se ueyi tajtakol, porin amo ika nechkalankixtiskej itech nechikol”. Amo kuali yetok maj ijkon titanemilikan. Okachi kuali maj timotajtanikan seki taman kemej nejin: “¿Kitemojtok Satanás maj amo nikmoujkatoka Jiova ika nochi noyolo? Komo nikchiua tein amo kuali, ¿nikchiuas maj amo kuali ika tajtokan Jiova? ¿Nechpaleuis nejon maj okachi kuali nimouika iuan noDios, oso kichiuas maj amo kuali nimouikaok iuan?”. Maj itech titanemilikan nejin netajtanilmej. Maj tiktajtanikan Jiova maj techmaka tamatilis tein techpaleuis maj titanankilikan ika tein melauak. Nejin semi techpaleuis, porin kichiuas maj senkis tikixtopeuakan tein amo kuali, ijkon kemej Jesús kichiuak keman kijtoj: “Xiyo ya, tejua tiamokuali Satanás” (Mat. 4:10). Maj tikelnamikikan, komo toyolo xeliujtok amo techpaleuis. w20.06 12, 13 § 16, 17

Tiitekitikauan Jiova amo timoueyimatij uan tiktakamatij itanauatiluan, porin tikajsikamatij ke yejuatsin kimati tein okachi uelis techpaleuis (Efes. 4:22-24). Amo timoueyimatiskej kichiua maj tiktayekanaltikan itanejnekilis Dios uan maj tiknemilikan ke oksekin okachi ueyichiuanimej ke tejuan. Nejon kichiua maj kuali timouikakan iuan Jiova uan iniuan tokniuan (Filip. 2:3). Sayoj ke komo amo timoyekpiaj, uelis peuas timoueyimatiskej uan sayoj totech titanemiliskej kemej kichiuaj akin kinixyekana Satanás. Nesi ke seki tokniuan itech yekinika siglo ijkon tanemiliayaj, porin tatitanil Pablo kinyolmajxitij tokniuan akin nemiaj Roma: “Ma amo aken kinemili ke yejua kachi uelilis kipixtinemi uan ke ne uelilis ten Dios kimaktilij ya. Ta [...] ma kajsikamati toni uelilis Dios kitayokolij [...], uan ijkon kuali kuatamatkanemis”. Kemej tikitaj, Pablo kiajsikamatia ke moneki timopatiuitaskej. Sayoj ke yolyemanilis techpaleuis maj tiknextikan taixejekolis uan maj amo tiknemilikan ke tiueyichiuanimej uan techpaleuis maj amo tiknemilikan ke tiueyichiuanimej. w20.07 2 § 1, 2

Maj oksepa ika titajtokan tekiuaj Asá. Yolseuilis tein onkaya Judá tamik, porin se millón tateuianij kayomej Etiopía kinteuitoj. Zérah, akin kinixyekanaya nejon tateuianij, kinemiliaya ke kintaniskiaj akin nemiaj Judá. Sayoj ke tekiuaj Asá takuaujtamatia iuan Jiova. Yejua ika kitataujtij: “Xitechpaleui, Jiova toDios, porin mouan titakuaujtamatij, uan motokaykopa tiualajkej timoteuikoj iniuan nejin taltikpakneminij” (2 Crón. 14:11). Maski tateuianij kayomej Etiopía okachi miakej katkaj, Asá kimatia ke Jiova ueliskia kinpaleuis. Uan yejuatsin ijkon kichiuak, porin tateuianij kayomej Etiopía tapolojkej (2 Crón. 14:8-13). Maski amo tikmatij toni kipanos sejse itekitikauj Dios, kemaj tikmatij ke ejkos tonal keman tamis yolseuilis tein xa tikpiaj axkan. Maj tikelnamikikan ke Jesús kijtoj ke itech itamian tonalmej “nochi in tagayot” kintauelitaskiaj itatojtokakauan (Mat. 24:9). w20.09 17, 18 § 14-16

Amo akin kiuelita maj kiuijuikaltikan. Sayoj ke komo semi timotekipachouaj keman techuijuikaltiaj akin techtauelitaj, tiknekiskej timosenkauaskej (Prov. 24:10). ¿Toni moneki tikchiuaskej komo panoua nejon? Uelis tikchiuaskej kemej tatitanil Pablo uan tiyolpakiskej keman techuijuikaltiskej. ¿Keyej? Porin keman techuijuikaltiaj uan techixnamikij kinextia ke yekmelauj tiimomachtijkauan Cristo (1 Ped. 4:14). Jesús kijtoj ke imomachtijkauan kinixnamikiskiaj (Juan 15:18-20). Uan yejua nejon panok itech yekinika siglo. Kemej neskayot, akin kiselijkaj inintanemililuan griegos kinitayaj imomachtijkauan Cristo ke amo teyi kimatiaj uan amo teyi chiuanimej katkaj. Uan judíos kinitayaj kemej takamej akin “amo keman momachtijke para ma taixmatikan”, kemej kinijtouilijkej tatitanilmej Pedro uan Juan (Hech. 4:13). Miakej kinemiliayaj ke akin kichiuayaj kemej Cristo amo teyi chiuanimej katkaj, porin amo mokalakiayaj itech política nion kinekiaj tapaleuiskej itech neteuilis, uan taltikpakneminij kintauelitayaj. ¿Kintsakuilij yekinika imomachtijkauan Cristo tein kinijtouiliayaj? Amo. w20.07 14, 15 § 3, 4

Tatitanil Juan semi kintasojtaya tokniuan uan kinekia maj kuali mouikanij iuan Jiova. Senkis kinextij nejon ika tein kinyolmajxitij itech eyi amamej tein kinijkuilouilij. Semi techyolchikaua tikmatiskej ke ijkon kemej Juan, takamej uan siuamej akin tekiuajtiskej iuan Cristo no techtasojtaj uan toka motekipachouaj (1 Juan 2:27). Maj tikchiuakan tein motayolmajxitij. Maj tikixtalikan tinentinemiskej itech tamachtilis tein melauak uan maj nochipa tiktakamatikan Jiova. Maj timomachtikan iTajtol uan maj itech titakuaujtamatikan. Maj okachi titakuaujtamatikan iuan Jesús. Maj tikixtopeuakan inintanemililuan akin amo kitekitiliaj Jiova uan tein kijtouaj akin kikaujkej uan kiixnamikij tamachtilis tein melauak. Maj amo tiktemokan tiktekitiliskej Jiova uan no tikchiuaskej tein amo kuali nion maj tikinkakikan akin kitemouaj maj titajtakokan. Maj tiktakamatikan itanauatiluan Jiova. Uan maj tikinpaleuikan tokniuan maj kisentokakan itech tamachtilis tein melauak keman tikintapojpoluiskej akin techyolkokouaj uan keman tikinpaleuiskej akin kipanouaj tein amo kuali. Ijkon, maski tikpanoskej tein yeski taman, tiksentokaskej tinentinemiskej itech tamachtilis tein melauak. w20.07 24, 25 § 15-17

Ika netasojtalis, Jiova kimaka sejse itekitikauj se tekit itech inechikol. Maski tikpiaj tataman tekimej, Jiova tinochin techpatiuita uan tinochin timosenpaleuiaj itech nechikol. Tatitanil Pablo kinextij ke amo uelis tikitaskej okse itekitikauj Jiova uan tiknemiliskej “amo semi timitsnekij xiyeto touan” (1 Cor. 12:21). Onkas yolseuilis itech nechikol komo timopatiuitaj uan tisentekitij (Efes. 4:16). Keman tokniuan sentekitij, mochikaua inintakuaujtamatilis uan kimachiliaj ke kintasojtaj. Jiova kinixpejpena nochin tayekananij ika iyektikatsin espíritu, sayoj ke tataman tein uelij kichiuaj (1 Cor. 12:17). Sekin xa yankuixtok mochiujkej tayekananij uan ayamo semi kimatij keniuj kichiuaskej nejon tekit, uan oksekin xa xiuejkejya oso mokokouaj uan yejua ika amo ueli kichiuajok tekit kemej achto. Sayoj ke nion se tayekankej monekiskia kiitas okse tayekankej uan kinemilis “amo semi timitsnekij xiyeto touan”, ta nochin moneki kichiuaskej tein Pablo tayolmajxitij itech Romanos 12:10. w20.08 26 § 1, 2; 27 § 4

Ika inechikol tein moajsi nikan taltikpak, Jiova techixyekana itech ojti tein teajxitia itech yankuik taltikpak. Keman inechikol Dios kipata kemej kimelauaya se tamachtilis oso techiluia keniuj uelis tichipaujkanemiskej, niman titatakamatij. Sayoj ke ¿toni tikchiuaj komo tein kiixtaliaj kipata okseki taman itech tonemilis? ¿Keyej kinamakaskej se Kali kampa tiMosentiliaj? Tiksentokaskej tiyolpakiskej komo tikelnamikij ke tiktekitiliaj Jiova uan ke yejuatsin kiixyekantok inechikol (2 Cor. 6:1). Tekiuaj David techkauilij se kuali neskayot keman tapaleuij ika tomin keman mochijchiuaskia templo. Kijtoj: “¿Toni nichiujkej nejua uan toni chiujkej noxolal yejua ika ueli timitsmakaj nejin netetayokolilmej? Porin nochi motech ualeua, uan tein timitsmakakej ualeua momako” (1 Crón. 29:14). Keman titapaleuiaj ika tomin, no tikmakaj Jiova tein yejuatsin techmakak. Maski ijkon, Jiova kitasojkamati maj titapaleuikan ika totiempo, tochikaualis uan tein tikpiaj itech tekit tein yejuatsin kineki maj tikchiuakan (2 Cor. 9:7). w20.11 22, 23 § 14-16

Kemej tiitaixpantijkauan Jiova, amo tikitaj ke kuali tikchiuaj nejon tekit komo ueli tikinpaleuiaj miakej maj mochiuakan itatojtokakauan Cristo (Luc. 8:11-15). Kiita ke kuali tikchiuaj komo tiksentokaj titanojnotsaj uan tikinmachtiaj oksekin. ¿Keyej? Porin tikchiujtokej tein Jiova uan iKonetsin technauatiaj (Mar. 13:10; Hech. 5:28, 29). Moajsi okse taman tein kichiua maj tiitatojtokakauan Cristo timochikauakan titanojnotsaskej: ke amo uejkaua Jiova kiixpolosya tein amo kuali. Amo tikpiajok miak tonalmej, yejua ika moneki titanojnotsaskej uan tikinpaleuiskej oksekin maj makisakan. Amo xikonnemili ke moneki tionmochias hasta maj nochi kuali yeto itech monemilis uan ijkon uelis tikonchiuas nejin tekit tein semi moneki. Axkan moneki tikonchiuas tein mitsonpaleuis xikonneki tiontanojnotsas, no moneki tikonixmatis tein tamachtia Biblia, tikonpias yolchikaualis uan tionmochikauas tikonchiuas tein moneki. Xiontekiti iniuan panoua ocho millones itatojtokakauan Cristo akin moajsij itech nochi taltikpak, uan tikonmachilis “yolpakilis tein Jiova kitemaka” (Neh. 8:10; Luc. 5:10). Xikonixtali tiontanojnotsas hasta keman Jiova kijtos ke amo motanojnotsasok. w20.09 7 § 18-20

Tejuan amo tiknejnekikan tikpiaskej okachi taman porin nejon uelis techtapololtis. “In ricojyot” uelis kichiuas maj amo tiktasojtakanok Jiova, maj amo tiktasojkamatikanok iTajtol nion maj tiknekikanok tikinmatiltiskej oksekin tein tamachtia (Mat. 13:22). Komo tiknekij tikyekpiaskej tein Jiova techmakatok, moneki niman tikixtopeuaskej tein uelis kichiuas maj tikpolokan. Moneki tikitaskej toni tikchiuaskej komo keman tikitstokej se película, se taman itech televisión oso keman tikuitokej Internet, moita auilnemilis, tateuilis oso tein kiteixmatiltiaj akin kikaujkej uan kiixnamikij tamachtilis tein melauak. Komo tiknemilijkejya toni tikchiuaskej, niman tikixtopeuaskej porin tiknekij tiksentokaskej kuali timouikaskej iuan Jiova uan tichipaujkanemiskej (Sal. 101:3; 1 Tim. 4:12). Tiitekitikauan Jiova moneki tikyekpiaskej tein techmakatok tein semi kipia ipatiuj. Nejin yejua tamachtilis tein melauak uan tatiochiualis tein tikpiaj tikinmachtiskej oksekin. Komo tikyekpiaj, amo techkuejmolos totanemilil, tiyolpakiskej uan kuali timomachiliskej porin tikinpaleuiaj oksekin maj kiixmatikan Jiova (1 Tim. 6:12, 19). w20.09 30 § 16-19

Komo timoauijkejya, nejon kijtosneki ke tiknextijkejya ininixpan miakej ke titakuaujtamatij iuan Jiova uan ke tiknekij tiktekitiliskej iuan inechikol. Itech nejin tonalmej, tikitaj ikualneskayouan Jiova, tein kiixtalijtok kichiuas uan itanauatiluan ijkon kemej kiixyekana inechikol. Xikonita eyi taman tein kinextia Jiova itech inechikol. Yekinika, “Dios amo kinchichikojtasojta in tagayot” (Hech. 10:34). Jiova kitemakak iKonetsin maj toka momikili porin techtasojta (Juan 3:16; 1 Tim. 2:6). Kemej kineki maj miakej kinpaleui inemilis Jesús tein kitemakak, kichiua maj itekitikauan kinmatiltikan nochin akin kinekiskej kinkakiskej tein kichiuas iTekiuajyo. Ojpatika, Jiova kiuelita maj onka yolseuilis uan maj amo se xexeliujto (1 Cor. 14:33, 40). Yejua ika itekitikauan amo xexeliujtokej uan kitemouaj maj onka yolseuilis. Expatika, Jiova ‘toUeyi Tamachtijkauj’ (Is. 30:21). Yejua ika, itekitikauan kinmachtiaj oksekin tein kijtoua iTajtol itech nechikolmej uan itech tanojnotsalis. w20.10 20 § 1-3