Julio

Kemej Jiova techtasojta kichiuak maj ueli titajtokan. Sayoj ke niman peuak amo kuali kikuij nejon netetayokolil. Satanás kikajkayauak Eva, uan yejua ika axkan tinochin titajtakolejkej (Gén. 3:​1-4). Adán amo kuali kikuik netetayokolil tein Jiova kimakaka keman kitajtakoltij Eva uan hasta Jiova tein yejua kichiujka (Gén. 3:12). Satepan ke Caín kimiktij iikniuj, Abel, amo kiluij Jiova tein melauj (Gén. 4:9). Axkan semi ouij se kiajsis se película kampa amo mokuij pitsotik tajtolmej. Uan no mokui nejin tajtolmej itech kaltamachtiloyamej uan kampa taltikpakneminij tekitij. Kemej semi miakej kikuij pitsotik tajtolmej komo amo timoyekpiaj xa no uelis peuas ijkon titajtoskej. Itekitikauan Jiova tiknekij tikyolpaktiskej yejuatsin, yejua ika amo sayoj amo tikuij pitsotik tajtolmej, ta no timochikauaj kuali titajtoskej kemej ika tikueyichiuaskej. w22.04 4 § 1-3

Jesús kiitaya kemej monekia tein kipiaya. Kiuelitaya takuas uan tayis (Luc. 19:​2, 6, 7). Se tonal, kichiuak maj at mokepani vino tein okachi kuali, nejon yejua yekinika milagro tein kichiuak (Juan 2:​10, 11). Uan keman momikilij, kipiaya se taken tein semi patiyoj (Juan 19:​23, 24). Sayoj ke amo kitayekanaltiaya kipias miak taman. Jesús tamachtij ke komo tiktayekanaltiaj iTekiuajyo Dios, Jiova techmakas tein monekis (Mat. 6:​31-33). Miakej semi kinpaleuiani keman kiitaj tomin kemej Jiova kijtoua. Maj tikitakan tein kichiuak Daniel, se tokniuj akin amo kipia inamik. Yejua kijtoua: “Keman katka nitelpoch nikixtalij nochipa niktayekanaltis niktekitilis Jiova”. Kemej Daniel amo kitemouani kipias miak taman, ueli tapaleuiani keman mochiuaj tetsaujmej uan Betel. No kijtoua: “Uan no, komo nikixtaliskia niktanis tomin, amo niyolpakiskia kemej axkan ke niktekitilia Jiova. Yejuatsin semi nechtatiochiuani”. w22.05 21, 22 § 6, 7

Uelis tiknextiskej ke tikpatiuitaj tamachtilis tein melauak komo nochipa timomachtiaj Biblia uan toamaixuan. Maski uejkaujya tikixmatij Jiova onkak miak taman tein uelisok timomachtiskej. Para timomachtiskej moneki timochikauaskej, sayoj ke amo nenkaj komo tikchiuaj. Sekin amo tikuelitaj titaixtajtoltiskej uan timomachtiskej, sayoj ke Jiova techiluia maj tiksentokakan timomachtikan para okachi tikajsikamatiskej tamachtilis tein melauak (Prov. 2:​4-6). Komo timochikauaj timomachtiskej nochipa techpaleuis. Se tokniuj takat akin monotsa Corey kijtoua ke keman momachtia Biblia, kiitstiuj sejse versículo. Yejua kijtoua: “Nikita notas tein nesij tatsintan, referencias marginales uan satepan niktemoua tamachtilis itech okseki amaixmej. […] Keman nikchiua nejin nimomachtia miak taman”. Xa timomachtiaj kemej nejin tokniuj oso xa taman kemej timomachtiaj, sayoj ke komo tikixtaliaj tiempo uan timochikauaj timomachtiskej Biblia, tiknextiskej ke tikpatiuitaj tamachtilis tein melauak (Sal. 1:​1-3). w22.08 17 § 13; 18 § 15, 16

Keman Jesús yetoya nikan taltikpak, ika tajtoj tein Jehová kichijchiujka uan ika kinmachtij imomachtijkauan keniuj katka iTajtsin. Maj tikitakan se taman. Jehová kintasojta nochin. Keman Jesús tamachtij itech se tepet, ika kinnojnotsak imomachtijkauan ome taman tein Jehová kichijchiuak tein miakej amo kiitaj ke semi tapaleuia: tonaltsin uan kiouit. Nejin ome taman semi moneki para tiyoltoskej. Jehová nochin kinmaka tonaltsin uan kiouit para maj kinpaleui porin semi tetasojta (Mat. 5:​43-45). Jesús ika tajtoj nejin para kinnextilis imomachtijkauan ke Jehová kineki maj tikintasojtakan nochin. Keman tikitaskej keniuj semi kualtsin tiotaki oso keniuj mixkiouit kualtsin taseselia, maj itech titanemilikan ke Jehová techtasojta uan amo techichikouia. Tein kichiua techmachtia ke no moneki titetasojtaskej uan tiknextiaj keman nochin tikinnojnotsaj ika Biblia. w23.03 17 § 9, 10

¿Toni kimoujkaitak tatitanil Juan? Se siuat akin tokotsyetoya ipanko se koujtajtapialmej chichiltik tein petani. Moixnextia kemej se “siuaauilnenke”, uan motokaytia “ueyi […] Babilonia”. Uan nejon siuat auilnemi iniuan tekiuanij itech taltikpak (Apoc. 17:​1-5). ¿Toni “ueyi […] Babilonia”? Nejin siuat amo uelis kiixnextis se tekiuajyot porin Apocalipsis kijtoua ke auilnemi iniuan nochi tekiuajyomej (Apoc. 18:9). Kemej moijtoua ke tokotsyetiuj ipanko se koujtajtapial, nejon kinextia ke kitemoua kinixyekanas. Uan amo no uelis kinixnextis tanamakanij akin sayoj kitemouaj motomintiskej, porin Apocalipsis ininka tajtoua uan kintokaytia “tanamakanij de nochi taltikpak” (Apoc. 18:​11, 15, 16, TNM). Ne uejkauj itech xolal Babilonia, akin ompa nemiaj semi kinueyichiuayaj tiotsitsin. Yejua ika “ueyi […] Babilonia” kiixnextia nochi tataman taueyichiualis tein amo melauak. Tein melauj, kijtosneki nochi taneltokalismej tein amo melaujkej (Apoc. 17:​5, 18). w22.05 11 § 14-16

Se temomaj kemansa xa motajtanis ox ikoneuan kiixtaliskej kitekitiliskej Jiova. Tetatmej kimatij ke ininkoneuan kiixnamikiskej miak ouijkayomej itech nejin taltikpak kampa taixyekana Satanás. Uan okachi ouij keman tokniuan siuamej moneki ininselti kiniskaltiskej ininkoneuan porin amo kipiaj ininnamik oso porin ininnamik amo itaixpantijkauj Jiova. Tokniuan akin ininselti kitekitiliaj Jiova ouij kinkisa kinpaleuiskej ininkoneuan maj kiixtalikan kitekitiliskej. Sayoj ke no ouij kinkisa akin nochin omen kitekitiliaj Jiova. Komo tikonpanotok nejon, amo xionmotekipacho. Jiova mitsonpaleuis. No uelis tikontajtanis okseki tetatmej keniuj kikuij nejon keman taueyichiuaj kemej kalyetouanij (Prov. 11:14). Uan no, uelis tikontataujtis Jiova maj mitsonpaleui xikonmati toni tikontajtanis mokoneuan uan ijkon kijtoskej tein yekmelauj kinemiliaj uan kimachiliaj (Prov. 20:5). w22.04 17 § 4, 7; 18 § 9

Komo kuali tikixmatij Jesús no techpaleuis maj okachi tiktasojtakan Jiova, porin yejua senkis kichiua kemej iTajtsin (Heb. 1:3). Uelis okachi kuali tikixmatiskej Jesús komo timomachtiaj naui Evangelios. Komo ayamo tikixtajtoltia Biblia mojmostaj, uelis peuas tikixtajtoltis kampa ika tajtoua inemilis Jesús. Keman tikitas tein kichiuaya xikita keniuj tamatia. Miakej kinekiaj iuan yetoskej Jesús uan iuan tajtoskej, hasta kinnapalouaya konemej (Mar. 10:​13-16). Imomachtijkauan kuali momachiliayaj iuan, yejua ika kiluiayaj nochi tein kinemiliayaj (Mat. 16:22). Jesús ijkon katka porin iTajtsin ijkon kichiua, yejua ika amo ouij techkisa timotokiskej iuan Jiova. Ueli tiktataujtiaj uan tikiluiaj nochi uan amo tiknemiliaj ke techijijtos. Yejuatsin techtasojta uan toka motekipachoua (1 Ped. 5:7). w22.08 3 § 4, 5

Jiova kuali techixmati porin yejuatsin techchijchiuak. Se kimoujkaita maj semi kuali kinixmati sejsemej (Sal. 139:​15-17). Yejua ika, ueli kiita nochi tein amo kuali tein techpanoltilijkej totatuan. Uan no, kemej kimati tein tikpanouanij kimati keyej tikchiuaj teisa. Jiova kuali techixmati yejua ika semi techiknelia (Sal. 78:39; Sal. 103:​13, 14). Jiova kinextiani ke kineki techtapojpoluis. Yejuatsin kimati ke kemej yekinika takat, Adán, tajtakoj tinochin titajtakolejkej uan timomikiliaj (Rom. 5:12). Uan amo ueliskia tikchiuaskej maj amo titajtakolejkejok nion maj timomikilikan uan amo no ueliskia tikinpaleuiskej oksekin (Sal. 49:​7-9). Sayoj ke Dios techiknelij uan kichiuak teisa tein ika ueliskia techmakixtis. Juan 3:16 kijtoua ke Jiova semi techtasojta, yejua ika kiualtitanik iKonetsin maj toka momikiliki (Mat. 20:28; Rom. 5:19). w22.06 3 § 5, 6

Jiova kiyekijtoj ke akin tetapojpoluiaj no kitapojpoluis kemej kichiuak iuan Job. Tein kiluijkej Elifaz, Bildad uan Zofar, semi kiyolkokoj nejin itekitikauj Dios. Jiova kinauatij Job maj ininka motataujtiani nejon eyi takamej uan keman kichiuak yejuatsin kitatiochiuij (Job 42:​8-10). Amo techpaleuia keman tikualantokej. Keman tikualantokej kemej yeskia tikmamajtokej teisa, uan Jiova amo kineki maj tikmamajtokanok nejon, ta maj tiyolseuikan (Efes. 4:​31, 32). Yejuatsin techiluia: “Ximoijkuanili kualanyot uan xikaua yolkualanyot” (Sal. 37:8). Techpaleuia komo tikchiuaj nejin, porin komo tikualantokej uelis kichiuas maj tikokolispeuakan (Prov. 14:30). Keman tikualantokej kemej yeskia timopajuiaj porin okachi techijtakoua tejuan ke akin techchiuilij teisa. Yejua ika, keman titetapojpoluiaj tejuan timopaleuiaj. Tiyolseuij uan ueli tiksentokaj tiktekitiliaj Jiova. w22.06 10 § 9, 10

Tein tikchiaj kemej yeskia se teposkuatsakuiloni tein kiyekpia totanemilil uan techpaleuia maj amo sayoj totech titanemilikan, porin nejon uelis kichiuas maj amo kuali timouikakanok iuan Jehová (1 Cor. 15:​33, 34). Teposkuatsakuiloni no techpaleuia maj amo tiknemilikan ke nenkaj komo timochikauaj tikyolpaktiskej Jehová. Maj tikelnamikikan ke Elifaz, akin kijtouaya ke kuali mouikaya iuan Job, yejua nejon tein kinekik kiajsikamatiltis. Elifaz kijtoj: “¿Keniuj uelis yeski chipauak takat akin momikilia […]? Xikita, Dios amo takuaujtamati itech iangeluan, uan nion iluikak chipauak iixpan” (Job 15:​14, 15). ¡Senkis amo melauak nejon! Maj tikelnamikikan ke Satanás kineki maj ijkon titanemilikan. Yejua kimati ke komo tiksentokaj ijkon titanemiliaj amo titakuaujtamatiskejok itech tein tikchiaj. Yejua ika, maj amo tikneltokilikan Satanás. Maj nochipa tikelnamikikan ke Jehová kineki maj tinemikan nochipaya uan ke yejuatsin techpaleuis maj ijkon mochiua (1 Tim. 2:​3, 4). w22.10 25, 26 § 8-10

Satanás kinekia maj Job kinemiliani ke tajyouijtoya porin Jiova kualantoya iuan. Yejua ika kichiuak maj chikauak ejeka para maj uetsi kali kampa tatakuajtoyaj majtakti ikoneuan (Job 1:​18, 19). No kichiuak maj uetsi tit para maj mikikan itapialuan uan no itakeualuan tein kinyekpiayaj (Job 1:16). Kemej ejekat uan tit ualeujkej iluikak, Job kinemilij ke Jiova kiualtitanilijtoya uan kinemilij ke kichiujka teisa tein kikualantijka. Maski ijkon Job amo kinekik kiuijuikaltis Jiova, kielnamikik ke yejuatsin kimakatoya miak taman tein kuali, uan ke ijkon kemej kiselijka tein kuali no monekia kiselis tein amo kuali. Yejua ika kijtoj: “Maj kisentoka moueyitali itokay Jiova” (Job 1:​20, 21). w22.06 21 § 7

Jesús kiniluij itatojtokakauan ke ijkon panoskia kemej kijtoua itech Juan 17:14. Axkan tikitaj ke mochiujtokya seki taman tein moijtojka itech Génesis 3:​15, okachiok itech 100 xiujmej tein panouanij. ¿Keyej ijkon tikijtouaj? Jesús peuak tekiuajti itech xiuit 1914 uan tepitsin satepan kiualpantamotak Satanás nikan taltikpak. Axkan Satanás sayoj ueli kichiua tein kineki nikan taltikpak uan kimati ke amo uejkaua ixpoliuis (Apoc. 12:​9, 12). Semi kualantok uan kemej amo kimati toni kichiuas semi kinixnamiki itekitikauan Dios (Apoc. 12:​13, 17). Yejua ika taltikpakneminij okachi techtauelitaj axkan. Sayoj ke amo moneki tikmouiliskej Satanás uan akin kipaleuiaj, ta ijkon kemej Pablo no uelis tikneltokaskej nejin tein kijtoj: “Komo Dios touan yetok, ¿akoni uelis techixnamikis?” (Rom. 8:​31, TNM). Uelis senkis titakuaujtamatiskej iuan Jiova. w22.07 18 § 14, 15

Jesús kimatia ke itech itamian tonalmej miakej tapaleuiskiaj. Kimatia ke mochiuaskia nejin tein achtook moijtojka: “Moxolal kiixtalis motemakas itech tonal keman tikinixyekanas motateuijkauan” (Sal. 110:3). Komo tejuatsin tikonteixmatiltia kuali tanauatilmej tikonpaleuijtok Jesús, “takeual takuaujtamach uan tamatkej”, uan no tiontapaleuijtok maj mochiua nejin tein achtook moijtojka. Axkan motanojnotsa, sayoj ke no tikpanouaj seki ouijkayomej. Miakej techixnamikij uan nejon se ouijkayot tein tikpanouaj. Kemej neskayot, akin kikaujkej uan kiixnamikij tamachtilis tein melauak, tekiuanij uan akin taixyekanaj itech taneltokalismej techtakajkayauiliaj. Komo tochankauan, akin tikinixmatij uan akin iniuan titekitij kineltokaj nochi tein techijtouiliaj xa kitemoskej maj tikauakan Jiova uan maj amo titanojnotsakanok. Itech miak altepemej tokniuan kinixnamikij, kintajyouiltiaj uan hasta kintsakuaj. w22.07 8 § 1; 9 § 5, 6

Jiova techpaleuia ika tein kijtoua Biblia, yejua ika kineki maj nochipa timomachtikan iTajtol uan maj itech titanemilikan. Komo tikchiuaj tein timomachtiaj, okachi titakuaujtamatiskej uan okachi kuali timouikaskej iuan Jiova. Nejon techpaleuis maj titaxikokan. Uan no, komo titakuaujtamatij itech iTajtol yejuatsin techmakas ichikaualis. Nejon techpaleuis maj tikpiakan “chikaualis tein toselti amo ueli tikpiaj”, uan uelis tikxikoskej tein yeski ouijkayot (2 Cor. 4:​7-10, TNM). Jiova kipaleuia “takeual takuaujtamach uan tamatkej” para kikixtis miak tataman tamachtilis, videos uan nekuikatilmej tein techpaleuiaj maj okachi titakuaujtamatikan iuan Jiova uan maj kuali timouikakan iuan (Mat. 24:​45, TNM). Jiova techmachtia maj timotasojtakan uan maj timoyolchikauakan keman tikpanouaj ouijkayomej (2 Cor. 1:​3, 4; 1 Tes. 4:9). Tokniuan ika miak pakilis techpaleuiskej maj amo keman tikauakan Jiova keman tikpanoskej ouijkayomej. w22.08 12 § 12-14

Keman tikijtouaj tein kuali tein kichiuaj oksekin. Nejon tapaleuia maj tokniuan okachi motasojtakan uan maj okachi kuali mouikakan. Kemansa, hasta tokniuan akin semi kuali mouikaj iuan Jiova uelis mokualantiskej oso motajtolteuiskej. Yejua nejon tein kinpanok tatitanil Pablo uan Bernabé, akin semi kuali mouikayaj. Yejuan mokualantijkej porin se kinekia kiuikas Marcos keman yaskiaj uejka tanojnotsatiuij, uan okse amo kinekia kiuikas. ¿Toni panok satepan? Biblia kijtoua: “Semi mokualantijkej uan motajtolteuijkej, uan moxelojkej” (Hech. 15:​37-39, TNM). Sayoj ke Pablo, Bernabé uan Marcos kiyektalijkej nejon kuejmol. Satepan, Pablo kuali ininka tajtoj Bernabé uan Marcos (1 Cor. 9:6; Col. 4:10). Tejuan no moneki tikyektaliskej kuejmolmej tein tikpiaskej iniuan tokniuan uan tikitaskej tein kuali tein kichiuaj. Nejon tapaleuis maj kuali timouikakan. w22.08 23 § 10, 11

Maj tikauakan maj Jiova kiixtali ox tein kichiuaj oksekin kuali yetok oso amo. Maj tikelnamikikan ke Jiova yejua “tamelaujkej itech nochi taltikpak” (Gén. 18:25). Yejuatsin amo techixtalij kemej tamelauanij. Maj tikitakan tein kipanok José, akin kichiuaya tein kuali. Yejua amo kiixtalij tein kinnamikia kiseliskej oksekin, maski kichiuilijkej tein amo kuali. Iikniuan kitajyouiltijkej, kinamakakej kemej takeual uan kichiujkej maj ipopaj kineltoka ke momikilijka. Seki xiujmej satepan, José oksepa kinitak iikniuan. Sayoj ke axkan katkaya se tekiuaj akin kipiaya tanauatil uan ueliskia momakepas uan kinchiuilis tein amo kuali. Yejua nejon tein kinemiliayaj iikniuan José ke kichiuaskia, maski moyolpatakajya. Sayoj ke yejua kiniluij: “Amo ximouikan. ¿Xe nejua niDios?” (Gén. 37:​18-20, 27, 28, 31-35; 50:​15-21). José katka yolyemanik uan kielnamikik ke sayoj Jiova kinamikia kinmelauas iikniuan. w22.08 30 § 18, 19

Keman se tokniuj kitataujtia Jehová maj kipaleui, yejuatsin uelis kichiuas maj tejuan tikpaleuikan. Uan nejin nochin uelis kichiuaskej, uelis yeski tayekananij, tapaleuianij, precursores, tanojnotsanij, telpochmej uan ichpochmej, akin xiuejkejya, takamej oso siuamej. Keman aksa akin kitasojta Jehová kitataujtia maj kipaleui, yejuatsin uelis kichiuas maj tayekananij oso okseki itekitikauan ‘kiyolchikauakan’ (Col. 4:11). Semi techyolpaktia ijkon tiktekitiliskej Jehová uan tikinpaleuiskej tokniuan. Uelis tikchiuaskej nejin keman onkas se ueyi kokolis, keman mochiuas se tetsauit oso keman techtajyouiltiskej. Xa tikuelitaskiaj tikinpaleuiskej oksekin, sayoj ke tochankauan no tajyouijtokej. Maski ijkon, tiknekij tikinpaleuiskej tokniuan uan Jehová semi yolpaki keman kiita ke tikchiuaj nochi tein tiuelij (Prov. 3:27; 19:17). w22.12 22 § 1, 2

Komo titetasojtaj uelis touan takuaujtamatiskej. Jesús kijtoj ke tiktasojtaskej Jehová uan tikintasojtaskej oksekin yejua ome tanauatilmej tein okachi tayekantokej (Mat. 22:​37-39). Jehová yejua akin okachi takuaujtamach uan kemej tiktasojtaj tiknekij tikchiuaskej kemej yejuatsin. Kemej neskayot, kemej tikintasojtaj tokniuan amo tikintapouiaj oksekin keman aksa techiluia tein kipanotok. Maj amo keman tikijtokan teisa tein uelis kinyolkokos oso kinpinaujtis. Uan no, komo amo timoueyimatij tapaleuis maj oksekin touan takuaujtamatikan. Se tokniuj amo kitemos yejua yekinika kijtos teisa para maj oksekin kiueyitalikan (Filip. 2:3). Amo no kitemos maj oksekin kinemilikan ke kimati seki taman tein oksekin amo. Uan komo amo timoueyimatij, amo tikijtojtinemiskej tein tiknemiliaj ika se taman tein amo ika tajtoua Biblia oso toamaixuan. w22.09 12 § 12, 13

Se ángel kiluij Daniel ke itech itamian tonalmej itekitikauan Dios okachi kuali kiajsikamatiskiaj tein achtook moijtojka itech amatajkuilol Daniel, sayoj ke “nion se akin amo yolkuali kiajsikamatiskia” (Dan. 12:10). Axkan moneki tiknextiskej ke amo tipouij iniuan akin amo yolkualmej (Mal. 3:​16-18). Jehová kinsentilijtok akin semi kinpatiuita. ¿Melauj ke tiknekij iniuan tipouiskej? Semi kualtsin tein axkan panotok, sayoj ke amo uejkaua panos okseki taman tein okachi kualtsin. Amo uejkaua ixpoliuis nochi tein amo kuali. Satepan tikitaskej keniuj mochiua tein Jehová motenkauak iuan Daniel, keman kiluij ke oksepa nemis uan kiselis tein yejuatsin kiluijka ke kimakas (Dan. 12:13). Xa semi tiknekij maj ejkoya tonal keman Daniel oksepa nemis uan no akin semi tikintasojtaj akin momikilijkejya. Yejua ika, maj timochikauakan amo tikauaskej Jehová. Ijkon, yejuatsin kijkuilos totokay itech amatajkuilol kampa ixnesij akin nemiskej. w22.09 24 § 17; 25 § 19, 20

Nejon xa semi kiyolchikauak. Xa kielnamikia ke yejuatsin no ijkon kiniluij Moisés uan Isaías keman kinixpejpenak kemej itanauatijkauan (Éx. 3:10; Is. 6:8). Ezequiel no kimatia ke Jehová kinpaleuijka nejin tanauatianij maj kichiuakan seki tekimej tein semi ouijkej. Yejua ika, keman ojpa kiluij: “Nimitstitani”, yejua kimatia ke Jehová kipaleuiskia. Uan no, itech amatajkuilol Ezequiel miakpa tikajsij nejin tajtolmej: “Jehová nechiluij” (Ezeq. 14:2). Uan miakpa no nesi nejin: “Jehová oksepa nechiluij” (Ezeq. 6:1). Yejua ika, Ezequiel senkis kimatia ke Jehová yejua akin kititanka. Uan no, kemej itat Ezequiel katka tiopixkat, xa kimachtijka ke Jehová nochipa kiniluiaya itanauatijkauan ke kinpaleuiskia, porin yejuatsin no kiniluijka Isaac, Jacob uan Jeremías: “Nejua nietok mouan” (Gén. 26:24; 28:15; Jer. 1:8). w22.11 2 § 3

Maski Adán uan Eva tajtakojkej uan kichiujkej maj ininkoneuan no momikilikan, Jehová amo kipatani tein kiixtalijtok (Is. 55:11). Yejuatsin kisentoka kineki maj nemikan nochipaya akin kitakamatij. Tikmatij nejin porin kijtouani uan kichiuani miak taman para uelis kichiuas tein kiixtalijtok. Jehová motenkauani ke kichiuas maj oksepa nemikan akin momikilijkejya uan uelis nemiskej nochipaya (Hech. 24:15; Tito 1:​1, 2). Job, akin amo keman kikauak Jehová, kimatia ke yejuatsin kitelneki kichiuas maj oksepa nemikan akin momikilijkejya (Job 14:​14, 15). Tanauatijkej Daniel kimatia ke akin momikilijkejya oksepa nemiskiaj uan ueliskia nemiskej nochipaya (Sal. 37:29; Dan. 12:​2, 13). Judíos akin nemiaj keman Jesús yetoya nikan taltikpak, no kimatiaj ke Jehová ueliskia kichiuas maj ‘nemikan nochipaya’ itekitikauan akin amo kikauaj (Luc. 10:25; 18:18). Jesús miakpa ika tajtoj nejin tein Jehová motenkauak, uan hasta yejua oksepa nemik porin iTajtsin ijkon kichiuak (Mat. 19:29; 22:​31, 32; Luc. 18:30; Juan 11:25). w22.12 4, 5 § 8, 9

Jehová techyoleua maj iuan timotokikan (Sant. 4:8). Yejuatsin kineki yeski toDios, toPopaj uan toTasojikniuj. Technankilia keman tiktataujtiaj uan techpaleuia keman tikpiaj kuejmolmej. Uan no techmachtia uan techyekpia ika inechikol. Uelis timotokiskej iuan Jehová komo tiktataujtiaj, tikixtajtoltiaj Biblia uan itech titanemiliaj. Nejon kichiuas maj okachi tiktasojtakan uan maj timotasojkamatikan iuan. Tiknekiskej tiktakamatiskej uan tikueyichiuaskej ijkon kemej kinamiki (Apoc. 4:11). Keman okachi tikixmatiskej Jehová, okachi iuan titakuaujtamatiskej uan no itech inechikol tein ika techyekpia. Sayoj ke, Satanás kitemoua maj yolik peua amo titakuaujtamatikanok iuan Jehová uan itech inechikol. Sayoj ke uelis tikixnamikiskej. Komo senkis titakuaujtamatij iuan Jehová amo tikauaskej yejuatsin nion inechikol (Sal. 31:​13, 14). w22.11 14 § 1-3

Miakej itekitikauan Jehová mokauanij maj kintsakuakan oso hasta maj kinmiktikan porin kitasojtaj Jehová, ininueyi Taixyekankauj. Senkis kiixtaliaj amo kikauaskej ijkon kemej eyi hebreos. Yejuan amo mikkej keman kinpantamotkej itech tit porin amo kikaujkej Jehová, akin okachi Ueyichiujkej. David, akin kijkuiloj seki salmos kimatia ke motelneki maj amo se kikaua Dios. Yejua kijkuiloj: “Jehová kiixtalis tein kinnamiki kiseliskej xolalmej. Keman ijkon tikchiuas nouan, Jehová, xikelnamiki ke niyolmelauak uan ke amo nimitskauani” (Sal. 7:8). Uan no kijtoj: “Xinechyekpia porin amo nimitskauani uan porin niyolmelauak” (Sal. 25:21). Okachi kuali tinemiskej komo amo tikauaj Jehová. Komo ijkon tikchiuaj, timomachiliskej kemej akin kijkuiloj nejin salmo: “Yolpakij akin amo kikauaj Jehová uan kitakamatij itanauatiluan” (Sal. 119:​1, nota). w22.10 17 § 18, 19

Itech nochi inemilis Job, miakej iniuan tajtouaya, sayoj ke xa okachi kielnamikia keman tajtoj iuan Jehová. Yejuatsin kiluijka Job maj kiita seki taman tein kualtsin tein kichijchiuak. Nejon kipaleuiskia maj kimati ke Jehová semi tamatkej uan maj takuaujtamati ke yejuatsin ueli kinyekpia itekitikauan. Job kiitak ke ijkon kemej Dios kinmaka tapialmej tein moneki para nemiskej, no kimakaskia tein kipoloskia (Job 38:​39-41; 39:​1, 5, 13-16). Keman Job itech tanemilij seki taman kemej nejin, okachi kimatik keniuj tamatia Dios. Tejuan no uelis okachi tikixmatiskej Dios komo tikitaj tein kichijchiuak. Sayoj ke xa ouij techkisas uan okachiok komo tinemij itech se ueyi xolal. Uan komo tinemij kampa onkak nejin tein kualtsin tein Dios kichijchiuak, xa amo tikxelouaj tiempo para tikitaskej. Yejua ika timomachtiskej keyej semi kuali komo tikixtaliaj tikitaskej. w23.03 15 § 1, 2

Jesús kiniluij imomachtijkauan ke achto ke tamiskia tein amo kuali semi taloliniskia uan mochiuaskiaj okseki tetsaujmej (Luc. 21:11). No kijtoj ke okachi mochiuaskia tein amo kuali, uan yejua nejon tein tikitaj axkan porin miakej tateuiaj uan kichiuaj teisa para kinmiktiskej tel miakej (Mat. 24:12). Jesús amo keman kijtoj ke nejin sayoj kinpanoskia akin amo kitekitiliaj Jehová, ta hasta seki itekitikauan tajyouianij porin panouani se tetsauit kampa nemij (Is. 57:1; 2 Cor. 11:25). Jehová xa amo kichiuas maj amo techpano tein amo kuali, sayoj ke techpaleuis maj tiyolseujtokan. Uelis tiyolseujtoskej komo tikmatijya toni tikchiuaskej. Komo achto tikchiuaj teisa tein techpaleuis amo kijtosneki ke amo titakuaujtamatij iuan Jehová, ta tiknextiaj ke titakuaujtamatij ke yejuatsin techyekpias. ¿Keyej ijkon tikijtouaj? Porin Biblia techiluia maj achto tikchiuakan tein techpaleuis keman panos tein amo kuali. w22.12 18 § 9, 10

Keman José tsaktoya, Jehová kichiuak maj akin tekiuajtia ompa Egipto kikochitani ome taman tein kichiuak maj semi motekipacho. Yejua ika, keman kimatik ke José ueliskia kiluis toni kijtosnekia, tanauatij maj kikuitij. Jehová kipaleuij José maj kiluiani faraón toni kijtosnekia tein kikochitak uan no maj kiluiani toni monekia kichiuas. Nejin semi kimoujkaitak faraón. Yejua ika, keman kiitak ke Jehová kipaleuiaya nejin telpoch, kiixtalij maj kiixyekana keniuj motemakaskia takual itech nochi Egipto (Gén. 41:​38, 41-44). Seki xiujmej satepan, amo semi onkayaok tein kikuaskiaj ompa Egipto nion Canaán, kampa nemiaj ichankauan José. Kemej José kiixyekanaya keniuj motemakaskia takual, ueliskia kinpaleuis ichankauan, akin mochiuaskiaj iuejkaujtatuan Mesías. Tikyekmatij ke Jehová yejua akin kipaleuij José para maj kuali kichiuani nochi. Maski iikniuan kinekiaj kimiktiskej, Jehová kipatak nejon para maj mochiua tein yejuatsin kinekia. w23.01 17 § 11, 12

¿Toni kijtosneki maj timotachilikan? Kijtosneki tikitstoskej toni uelis kichiuas maj amo timouikakanok iuan Jehová uan timoyekpiaskej. Komo tikchiuaj nejin, Dios kisentokas techtasojtas (Prov. 22:3; Jud. 20, 21). Tatitanil Pablo kiniluij akin kichiuaj kemej Cristo ke monekia motachiliskej. Tokniuan akin nemiaj Éfeso kinijkuilouilij: “Ximoyekpiakan para amo nanentinemiskej kemej akin amo kuatamatij, ta kemej akin tamattokej” (Efes. 5:​15, 16). Satanás semi kitemoua maj amo tiktekitilikanok Jehová. Yejua ika, Biblia techyolmajxitia maj tikajsikamatikan “toni kineki Jehová” para timoyekpiaskej keman Satanás techixnamikis (Efes. 5:17). Para kuali titaixpejpenaskej, moneki tikajsikamatiskej “toni kineki Jehová”. ¿Keniuj tikchiuaj? Keman timomachtiaj iTajtol Dios uan nochipa itech titanemiliaj tein timomachtiaj. Keman okachi tikajsikamatiskej toni kineki Jehová uan okachi timochikauaskej ‘titanemiliskej kemej Cristo’, tinentinemiskej “kemej akin tamattokej”, uan kuali titaixpejpenaskej hasta keman Biblia amo senkis kijtos toni uelis tikchiuaskej (1 Cor. 2:​14-16). w23.02 16, 17 § 7, 9

¿Mojmostaj tiontachipaua mokalijtik? Achto ke ompa tionnemiskia xa kuali tiontachipauak. ¿Sayoj ke toni panoskia komo amo tiontachipauaskiaok? Niman oksepa motapitsotiliskia. Para maj tochan kuali moita moneki mojmostaj titachipaujtoskej. No ijkon moneki tikchiuaskej ika tein tiknemiliaj uan tein tikchiuaj. Achto ke timoauiskiaj tikpatakej kemej tinemiaj uan timochipaujkej “de nochi tein kipitsotilia tonakayo uan totanemilil” (2 Cor. 7:1). Sayoj ke axkan moneki tikchiuaskej tein kijtoj tatitanil Pablo: “Moneki nankisentokaskej nankipatatoskej kemej nantanemiliaj” (Efes. 4:23). Tein amo kuali tein mochiua nikan taltikpak uelis niman techijtakos uan kichiuas maj amo tichipaujkejok iixpan Jehová. Yejua ika moneki maj kuali tiknemilikan ox tein tikchiuaj, tein tiknejnekij uan tein tiknemiliaj kiyolpaktia Jehová. w23.01 8 § 1, 2

¿Kemansa tiknemilianij keniuj mokakia Jesús keman tamachtiaya? Keman Jesús moauij uan Dios kiixpejpenak ika ichikaualis, kielnamikik nochi tein kipanoka keman yetoya ne iluikak achto ke ualaskia nikan taltikpak. Yejua nochipa ika tajtouaya tein kijtoua iTajtol Dios maski amo kiixtajtoltijtiaya. Ijkon kinextij ika tein kijtoj satepan ke moauij uan tein kijtoj achto ke momikiliskia (Deut. 8:3; Sal. 31:5; Luc. 4:4; 23:46). Uan itech eyi xiuit uan tajko keman tanojnotsak, Jesús nochipa kiixtajtoltij Tajkuilolamatsin, ika tajtoj uan kimelauak (Mat. 5:​17, 18, 21, 22, 27, 28; Luc. 4:​16-20). Hasta achto ke Jesús peuaskia tanojnotsaskia, momattoya kiixtajtoltis iTajtol Dios uan kinkakis keman oksekin kiixtajtoltiayaj uan ika tajtouayaj. Xa ichan kinkakia María uan José ke ika tajtouayaj amatajkuilolmej keman monojnotsayaj (Deut. 6:​6, 7). Uan no, tikmatij ke nochi sábados Jesús yaya kampa taueyichiuayaj judíos iniuan ichankauan uan kuali kikakia keman kiixtajtoltiayaj amatajkuilolmej (Luc. 4:16). w23.02 8 § 1, 2

Onkak miak taman tein kichiua maj tiktasojtakan Jehová. Tionmomachtiani ke Jehová ‘kichiua maj tiyoltokan’ uan techmaka “nochi tatiochiualismej tein kuali uan tein amo teyi kinpoloua” (Sal. 36:9; Sant. 1:17). Nochi tein kuali tein tikonpia Jehová mitsonmakani, porin kiuelita kitemakas teisa uan semi tetasojta. Jehová techmakak se kualtsin netetayokolil porin kitemakak Jesús para techmakixtis. ¿Keyej ijkon tikijtouaj? Maj tiknemilikan keniuj Jehová uan iKonetsin semi motasojtaj. Jesús kijtoj: “NoTajtsin nechtasojta” uan “Niktasojta noTajtsin” (Juan 10:17; 14:31). Kemej tel miak xiujmej senyetoyaj ompa iluikak, semi kuali mouikayaj (Prov. 8:​22, 23, 30). Xikonnemili keniuj Jehová semi kiyolkokoj keman kikauak maj iKonetsin tajyouiani uan maj momikiliani. Sayoj ke, Jehová kitemakak iKonetsin maj toka momikili para uelis tinemiskej nochipaya porin kintasojta nochin uan tejuatsin no (Juan 3:16; Gál. 2:20). Yejua nejin tein okachi kichiua maj tiktasojtakan Dios. w23.03 4, 5 § 11-13

Maj tikixtopeuakan tein tamachtiaj akin kikaujkej uan kiixnamikij tamachtilis tein melauak. Jesús kinchikaujkanojnotsak seki tokniuan akin nemiaj Pérgamo porin kichiujtoyaj maj moxexelokan (Apoc. 2:​14-16). Sayoj ke, tokniuan akin nemiaj Tiatira kiniluij ke kuali tein kichiuayaj porin amo kikakiaj “tamachilisme de [...] Satanás”, uan kinyolchikauak maj amo keman kikauanij tamachtilis tein melauak (Apoc. 2:​24-26). Tokniuan akin amo kuali mouikayajok iuan Jiova uan mokaujkaj maj kinkajkayauakan ika nejon tamachtilismej, monekia moyolnonotsaskej oso moyolnemiliskej. ¿Toni techmachtia tejuan? Moneki tikixtopeuaskej tein yeski tamachtilis tein kiixnamiki tein kinemilia Jiova. Akin kikaujkej uan kiixnamikij tamachtilis tein melauak xa kinextiaj ke kiitaj tein kijtoua Biblia sayoj ke ika tein kichiuaj kinextiaj ke amo (2 Tim. 3:5). Komo kuali timomachtiaj iTajtol Dios, niman tikitaskej katiyejua tamachtilis amo melauj uan tikixtopeuaskej (2 Tim. 3:​14-17; Jud. 3, 4). Moneki maj tikueyichiuakan Jiova kemej kiyolpaktis. Komo tikchiujtokej teisa tein amo kuali, moneki niman tikpataskej (Apoc. 2:​5, 16; 3:​3, 16). w22.05 4 § 9; 5 § 11