Dios kineki maj kipoujkaitakan siuat

KEMAN Jesús yetoya nikan taltikpak, kinextij keniuj tamati Dios uan keniuj kichiua teisa. Kijtoj: “Nochi ten Nejuatsin nikchiutinemi amo de nejua no tanejnekilis san. Ta, sayo nikijtojtinemi ten Notajtsin Dios nechnextilij ya”. Uan no kinextij: “Nejuatsin nachipa nikchiutinemi sayo ne ten Yejuatsin kipaktia” (Juan 8:28, 29). Yejua ika, komo tikitaj neskayot tein kikauak Jesús, techtelpaleuis maj tikmatikan keniuj Dios kinita siuamej uan keniuj kineki maj timouikakan iniuan.

Miakej akin motelmachtiaj ika amaixmej kampa ika tajtoua Jesús, kinemiliaj ke yejua kipatak tanemilil kemej kinitayaj siuamej. ¿Keniuj? Uan tein okachi motelneki, ¿uelis itamachtilis Jesús tapaleuis maj kinitakan kemej moneki siuamej tein axkan nemij?

Keniuj mouikaya Jesús iniuan siuamej

Jesús kinitaya ika se tanemilil chipauak. Miakej tayekananij judíos itech taneltokalis, kiitayaj ke siuamej kichiuayaj maj takamej tanemilikan ika tein amo kuali uan komo mouikayaj iniuan ueliskia kinuikas maj auilnemikan. Yejua ika kintakaualtiayaj maj amo tajtokan iniuan takamej senteixtenoj uan kinnauatiayaj maj mokuapikinij. Sayoj ke Jesús amo keman kiteajsikamatiltij maj siuamej amo mosentilianij iniuan oksekin. Ta Jesús tamachtij ke takamej monekia kitsakuiliskej inintanejnekilis tein amo kuali uan maj kinpoujkaitanij siuamej (Mateo 5:28).

Jesús no kijtoj: “Takan se tagat mosiuakauas uan kimaktis se amat tenika ixnesis ke mosesekokauke ya, uan de ompa monamiktiti oksepa, ne tagat motajtakolmakas de suapapatalis ika ne achto siuat” (Marcos 10:11, 12). Kemej tikitaj, Jesús amo kinemiliaya ke takamej ueliskiaj “mosiuakaua[skej] tenika tenesi ouijkayot” kemej kinemiliayaj tamachtianij (Mateo 19:3, 9). Miakej judíos amo kinemiliayaj ke se takat motajtakolmakaya komo motekaya iuan se siuat akin amo inamik. Tamachtianij kinteltajtouiayaj takamej uan kijtouayaj ke sayoj siuamej kikajkayauayaj itakauj iuan okse. Kemej kimelaua se amaix tein ika tajtoua Biblia, “keman Jesús nochin omen kinnauatij maj chipaujkanemikan, kichiuak maj siuat kipoujkaitakan”.

Keniuj kinpaleuia axkan siuamej: Itech nechikolmej tein kipiaj itaixpantijkauan Jiova, siuamej uelij mosentiliaj iniuan takamej uan kiyekmatij ke kinpoujkaitaskej keman mouikaskej iniuan, uan amo kinitaskej ika se tanemilil tein amo kuali. Takamej tein kichiuaj kemej Cristo kitojtokaj nejin tayolmajxitilis: “Xikinyekyolmajxiti in taneltokani siuame den kachi xiuejke ya, ijkon keme yeskia timonojnotstoskia iuan monantsin. Uan [...] ika ne yolchipaualis in taneltokani ichpokame, ijkon keme [...] iuan mokniuan siuame” (1 Timoteo 5:2).

Jesús kinmachtiaya siuamej. Tamachtianij itech nejon tonalmej amo kinekiaj maj siuamej kiselikan tamachtilis. Sayoj ke Jesús kinmachtiaya tein melauak uan kinyolchikauaya maj kijtouanij tein kinemiliayaj. Uan no, amo kinemiliaya ke sayoj monekia yetoskej tikotenoj. Ijkon kinextij se tonal keman amo kitsakuilij María maj kikakini tamachtilis (Lucas 10:38-42). Uan kuali tanankilil tein Marta, iikniuj María, kimakak Jesús keman momikilij Lázaro, kinextij ke no kipaleuij itamachtilis Cristo (Juan 11:21-27).

Jesús kitelnekia maj siuamej kiselikan tamachtilis. Miakej siuamej judías itech nejon tonalmej tel yolpakiaj komo ininokichpil mochiuaya ueyi chiujkej oso okachi komo mochiuaya tanauatijkej. Yejua ika, keman se siuat kiiluij, “tatiochiual de Dios ne siuat ten mitsyolitij”, kiitak ke ueliskia kimachtis ke okachi moneki maj se kitakamati Dios (Lucas 11:27, 28). Ijkon kinextij ke siuamej monekia kichiuaskej se taman tein okachi monekia ke tein kinextiaya inintamachtilis judíos (Juan 8:32).

Keniuj kinpaleuia axkan siuamej: Itech nechikol kampa kichiuaj kemej Cristo, kuali kiseliaj tanankilil tein kitemakaj siuamej itech nechikolmej. Akin ompa tamachtiaj kinpoujkaitaj siuamej akin kuali taixejekouaj, akin kalijtik uan kalampa ‘kitenextilijtinemij den ninchipaukanemilis’ (Tito 2:3). No kimatij ke tapaleuiaj maj motetapoui tein kichiuati iTekiuajyo Dios (Salmo 68:11; xikonita recuadro “¿Kintakaualtij tatitanil Pablo maj amo tajtokan siuamej?”).

Jesús kitekipachouaya tein kinpanouaya siuamej. Itech tonalmej keman moijkuilojtoya Biblia, tetatmej okachi kinekiaj kinpiaskej okichpipil. Talmud kijtouaya: “Yolpakij akin kinpiaj okichpipil uan tetayokoltij akin kinpiaj siuapipil”. Sekin tetatmej kiitayaj se ouijkayot komo kinpiayaj siuapipil: monekia kitemoliskej itakauj uan taxtauaskej, uan amo ueliskiaj kichiaskej maj kinyekpia keman xiuejkejya yeskiaj.

Jesús amo sayoj kitekipachouaya tein kinpanouaya okichpipil ta no siuapipil. Moitak keman kiajokuik iokichpil se siuat tein nemia Naín akin momikilijkaya itakauj, uan no ijkon kichiuak iuan isiuapil Jairo (Marcos 5:35, 41, 42; Lucas 7:11-15). Okse tonal kipajtij “se siuat ten mokokoaya kaxtolomeyi xiutika ya [...] [porin] se amokuali ejekat kichiualtij in siuat ma tomotskisa”. Hasta kinotsak “tekoneu [...] de Abraham”, seki tajtolmej tein amo moixmatia itech inintajkuiloluan judíos (Lucas 13:10-16). Keman kikuik nejin tajtolmej ika poujkaitalis uan netasojtalis, kinextij ke amo sayoj kinitaya kemej oksekin taltikpakneminij, ta kipoujkaitaya ueyi takuaujtamatilis tein kinextiayaj (Lucas 19:9; Gálatas 3:7).

Keniuj kinpaleuia axkan siuamej: Ompa Asia moajsi se tanemilil tein kinextia ke tetatmej akin kiiskaltiaj se siuapil kemej yeskia taatekiaj tetalpan. Sayoj ke tepopaj tetasojtakej tein kichiua kemej Cristo amo kitojtoka nejon tanemilil. Ta kinyekpia nochin ikoneuan okichpipil oso siuapipil, uan kiita maj kiselikan tamachtilis uan tapajtilis tein moneki.

Jesús inintech takuaujtamatia siuamej. Keman se siuat tajtouaya ininixpan tamelauanij judíos, amo kineltokiliayaj tein kijtouaya kemej yeskia se takeual. Tein melauj, tajkuilojkej Josefo itech yekinika siglo kijtoj: “Amo uelis se kinneltokilis tein kijtouaj siuamej porin ipa amo teyi ueli se kinneltokilia”.

¡Semi taman katka Jesús! Yejua kinixpejpenak siuamej maj kiteixmatiltianij ineajokuilis (Mateo 28:1, 8-10). Maski siuamej tein amo kikauayaj Dios kiitakej keman kimiktijkej toTekotsin uan kipachojkej, hasta tatitanilmej amo kinneltokiliayaj tein kijtouayaj (Mateo 27:55, 56, 61; Lucas 24:10, 11). Sayoj ke, ijkuak yekinika monextij ininixpan siuamej satepan ke moajokuik, kinextij ke kinitaya ke ueliskiaj kiteixmatiltiskiaj ineajokuilis kemej kichiuaskia okse imomachtijkauj (Hechos 1:8, 14).

Keniuj kinpaleuia axkan siuamej: Takamej tein taixyekanaj itech nechikol kampa kichiuaj kemej Cristo, kinpoujkaitaj siuamej keman kikakij tein kinekij kijtoskej. Uan tetakauan kinpoujkaitaj ininnamik ijkuak kinkakij ika nejmachkayot (Génesis 21:12; 1 Pedro 3:7).

Tein tayolmajxitia Biblia kinualkuilia yolpakilis siuamej

Akin kichiuaj kemej Cristo kinkauaj siuamej maj kichiuakan miak taman uan kinpoujkaitaj, ijkon kemej Dios kinekia ijkuak kichijchiuak siuat (Génesis 1:27, 28). Tetakauan akin kichiuaj kemej Cristo amo tachikaujkauiaj maj mochiua sayoj tein yejuan kijtouaj. Ta, okachi kuali, kichiuaj tein tayolmajxitia Biblia uan nejon kinualkuilia ueyi yolpakilis ininnamik (Efesios 5:28, 29).

Keman Yelena peuak momachtia Biblia kixikouaya nochi taman tein amo kuali tein kichiuiliaya itakauj. Kampa moskaltij itakauj moteuiayaj, kinichtekiaj siuamej akin kinekiaj iuan monamiktiskej uan kinteltajyouiltiayaj. Yelena kimelaua: “Tein nimomachtij itech Biblia nechmakak chikaualis. Nikmatik ke nemia se Dios akin yekmelauj nechtasojta, nechpoujkaita uan kitekipachoua tein nechpanoua. Nikajsikamatik ke notakauj ueliskia mopatas komo no momachtiskia Biblia”. Keman panok tonalmej, mochiuak tein kinejnekia keman itakauj moauij uan mochiuak itaixpantijkauj Jiova. Yelena kijtoua: “Notakauj motelpatak uan axkan ueli motsakuilia keman kineki kichiuas tein amo kuali. Uan no ueli timotapojpoluiaj. Tein tayolmajxitia Biblia nechpaleuiani maj nikmachili ke notakauj nechtasojta uan nechyekpia” (Colosenses 3:13, 18, 19).

Amo sayoj Yelena ijkon kipanouani. Moajsij tel miakej siuamej akin kichiuaj kemej Cristo, tein kemej yejua, tel yolpakij porin, iniuan inintakauj, mochikauaj kitakamatiskej tein Biblia kinyolmajxitia kemej namikuanij. Uan no, kiseliaj yolchikaualis, kimachiliaj ke kinpoujkaitaj uan kuali momachiliaj keman moajsij iniuan akin mosentiliaj (Juan 13:34, 35).

Nochin takamej uan siuamej tein kichiuaj kemej Cristo, kimatij ke moajsij itech ijtakauilis uan yejua ika amo ueli mokixtiliaj tajtakol. Sayoj ke, kuali kimatij ke komo motokiaj iuan toTajtsin Dios, Jiova, akin semi tetasojta, kinajchiuilis “ijtakauilis uan kipias[kej] ueyi nemakixtilis kemej tein kipiaj ikoneuan Dios”. ¡Semi kualtsin tein kichiaj kipiaskej takamej uan siuamej akin moajsiskej imako Dios akin teyekpia ika netasojtalis! (Romanos 8:20, 21, Traducción del Nuevo Mundo de las Santas Escrituras, [TNM].)