¿Moajsi se taneltokalis tein uelis itech titakuaujtamatiskej?

Komo se taneltokalis amo mitsonpaleuij kemej tikonchiaya, xa amo tikonnekiok tiontakuaujtamatis itech nion se. Sayoj ke uelis tikonyekmatis ke moajsi se taneltokalis tein uelis itech tiontakuaujtamatis. Keman Jesús yetoya nikan taltikpak, kinsentilij seki itatojtokakauan uan kinmachtij maj nemikan kemej kijtoua itanauatiluan Dios. Axkan no moajsij akin yekmelauj kitojtokaj Cristo, akin ika nochi ininyolo mochikauaj nemiskej kemej tamachtij. ¿Akonimej?

Estelle, akin ika titajtojkej achto, kijtoua: “Peuak nikajsikamatik tein kijtoua Biblia keman nimomachtij iniuan itaixpantijkauan Jiova. Nikitak ke semi melauak tein kijtoua Juan 8:32: ‘Nankajsikamatiyaske de ne Tajtoltsin ten yek melau. Uan [...] yejua ne namechtojtomatiu’”.

Ray no kijtoua: “Itaixpantijkauan Jiova nechmachtijkej ika Biblia ke Dios amo kichiua maj onka tajyouilis. Uan maski kipia seki taman tein motelneki, yejua ika kikaujtok maj onka tein amo kuali, motenkaua ke amo uejkaua kitamis”.

Se kichiuas tein kuali itech nejin taltikpak kampa semi amo chipaujkanemij, semi ouij, maski ijkon uelis tikchiuaskej. Miakej kinekij maj kinpaleuikan maj kiajsikamatikan Biblia uan maj kichiuakan kemej kijtoua. Yejua ika, itaixpantijkauan Jiova noyampa taltikpak kinmachtiaj ika Biblia ininchan tel miakej taltikpakneminij uan amo moneki taxtauaskej. Tel miakej momachtijtokej tein yekmelauj tamachtia Biblia, motokijtokej iuan Dios uan okachi yolpakij itech ininnemilis.a

Keman tiontajtos iniuan, ¿keyej amo tikontajtania keyej takuaujtamatij itech inintaneltokalis? Xikonita tein tamachtiaj uan tein kichiuaj, uan moselti xikonita ox moajsi se taneltokalis tein uelis itech titakuaujtamatiskej.