Keniuj monemachtil ika Biblia uelis okachi mitsonpaleuis uan mitsonyolpaktis

Josué kiixtajtoltia Tanauatil; xitini tepamit tein kiyoualouaya Jericó uan ichan Rahab kisentoka ijkatok; Josué momaajokui keman kichiua netataujtil

JOSUÉ moneki kinixyekanas israelitas itech Tal tein Dios motenkauak kinmakas. Nejin tel ouij. Sayoj ke Jiova kiluia ke uelis kichiuas uan maj moyolchikaua. Kiluia ke komo kiixtajtoltia uan kitakamati Tanauatil, kuali taixpejpenas uan kuali kikisas tein kichiuas (Jos. 1:7, 8).

Itech nejin tonalmej tein semi ouijkej, no tikpanouaj ouijkayomej (2 Tim. 3:1). Tejuan no kuali techyas komo tikchiuaj tein Jiova kiluij Josué. Moneki tikixtajtoltiskej Biblia mojmostaj uan tikuiskej tein timomachtiaj keman titaixpejpenaskej.

Sayoj ke, timiakej amo tikmatij keniuj timomachtiskej oso amo techyolpaktia. Sayoj ke, motelneki timomachtiskej Biblia. Kampa kijtoua “Xikonchiua nejin”, tikonajsis kuali tayolmajxitilis tein mitsonpaleuis maj okachi mitsonyolpakti uan maj okachi mitsonpaleui monemachtil.

Semej akin kijkuiloj salmos mokuikatij: “Xinechyekana itech ojti tein kipia motanauatiluan, porin itech niyolpaki” (Sal. 119:35). Tejuatsin no uelis semi mitsonyolpaktis tionmomachtis iTajtol Dios. Tikonajsis kualtsitsin tamachtilis ijkon kemej tikonsentokas tionmomachtis Biblia.

Maski tejuatsin amo moneki tikonixyekanas se xolal ijkon kemej Josué, kemaj tikonpia ouijkayomej. Yejua ika, ijkon kemej Josué, xionmomachti uan xikontakamati iTajtol Dios. Komo tikonchiua, kuali tiontaixpejpenas uan kuali kisas tein tikonchiuas.

XIKONCHIUA NEJIN

Achto xikontataujti Jiova. Itech Biblia moajsij itanemililuan Dios, uan moijkuilojkej porin kineki maj techpaleui. Yejua ika, keman tikonixtajtoltis Biblia, xikontajtani Dios maj mitsonpaleui xikonajsikamati, xikonelnamiki uan xikonchiua (Esd. 7:10).
Xionmochiuili netajtanilmej. Keman tikonixtajtoltis Biblia oso amaixmej tein ika tajtouaj, xionmotajtani: “¿Toni nechmachtia nejin kemej tamati Jiova? ¿Keniuj mouika ika tamachtilis tein tayekantok itech Biblia? ¿Keniuj uelis nikinpaleuis oksekin ika nejin tajkuilolmej?”.
Xiontanemili itech tein tionmomachtia. Keman tiontaixtajtoltijtos, xionmotsakuili uan xikonnemili: “¿Keniuj nimomachilia ika nejin tamachtilis? ¿Keyej ijkon nimomachilia? ¿Keniuj mouika ika tein nikpanouani, ika tein nikpanotok uan ika tein uelis nikpanos? ¿Keniuj uelis niktakamatis nejin tayolmajxitilis?” (Job 23:5; Sal. 49:3). Xikonnemili ox ueli tikonmelaua keyej Jiova kiniluia itekitikauan maj amo kichiuakan seki taman uan toni panoskia komo amo kitakamatij (Deut. 32:28, 29).
Xionmonemili ke ompa tionmoajsi. Kemej neskayot, ¿ueli tikonita keman ismaelitas kikoujtokej José porin iikniuan kinamakakej? (Gén. 37:18-28.) ¿Toni tikonita? ¿Toni tikonkaki? ¿Toni tikonijnekui? Xionmonemili ke tejuatsin mitsonpanotok tein tikonixtajtoltijtok uan xionmotajtani: “¿Toni kinemilijtokej? ¿Toni kimachiliaj?”. Tiontanemilis itech nejin taman kichiuas xikonmachili ke ompa tionyetok uan okachi mitsonpaleuis.
Xikontekitilti nepaleuilmej tein mochijchiuanij maj ika se kitemo okachi tamachtilis. Xikontemo katiyejua moajsij itech motajtol, tein se kitekitiltia itech teposmej oso tein kinamakixtijkej. Amo xionomeyoloua tikoniluis oksekin maj mitsonnextilikan keniuj kuali tikontekitiltis. Kemej neskayot, itech amaix Nepaleuil tein ika momachtiaj itaixpantijkauan Jiova tikonajsis miak tataman tamachtilismej. Uan no, itech Amaix tein ika timomachtiaj iTajtol Dios tikonajsis kampa nesi kani moajsiaj talmej uan keniuj katkaj, kemanian mochiuak seki taman, tataman tamachiuj uan tomin uan okseki taman.
Xikontekpana tanemililmej tein tayekantokej. Nejin mitsonpaleuis xikonelnamiki tein tionmomachtij. Uan okachi mitsonpaleuis komo tikontapouia oksekin. Xionmonemili: “¿Ueliskia niktekitiltis nejin tamachtilis itech tanojnotsalis?”. Nejin mitsonpaleuis xikonelnamiki tanemililmej tein tayekantokej, uan ika uelis tikonpaleuis oksekin.