Xikonixtajtolti Biblia kemej okachi mitsonpaleuis

1. ¿Keniuj tikmatij ke Jesús kipatiuitaya iTajtol Dios?

¿KEMANSA tiknemilianij keniuj mokakia Jesús keman tamachtiaya? Yejua nochipa ika tajtouaya tein kijtoua iTajtol Dios maski amo kiixtajtoltijtiaya. Ijkon kinextij ika tein kijtoj satepan ke moauij uan tein kijtoj achto ke momikiliskia (Deut. 8:3; Sal. 31:5; Luc. 4:4; 23:46).b Uan itech eyi xiuit uan tajko keman tanojnotsak, Jesús nochipa kiixtajtoltij Tajkuilolamatsin, ika tajtoj uan kimelauak (Mat. 5:17, 18, 21, 22, 27, 28; Luc. 4:16-20).

2. ¿Toni kipaleuij Jesús maj kuali kiixmatini amatajkuilolmej keman moskaltijtoya? (Xikonita taixkopin ipeujyan amaix).

² Hasta achto ke Jesús peuaskia tanojnotsaskia, momattoya kiixtajtoltis iTajtol Dios uan kinkakis keman oksekin kiixtajtoltiayaj uan ika tajtouayaj. Xa ichan kinkakia María uan José ke ika tajtouayaj amatajkuilolmej keman monojnotsayaj (Deut. 6:6, 7).c Tikmatij ke nochi sábados Jesús yaya kampa taueyichiuayaj judíos iniuan ichankauan uan kuali kikakia keman kiixtajtoltiayaj amatajkuilolmej (Luc. 4:16). Satepan peuak kiixtajtoltia iselti. Nejin amo sayoj kipaleuij maj kimatini toni kijtouaya, ta no maj kitasojtani uan maj kichiuani. Ijkon kinextia tein kipanok itech templo keman kipiaya 12 xiujmej. Tamachtianij akin kuali kiixmatiaj iTanauatil Moisés, “kimojkaitayaj keniuj kiajsikamatia nochi uan kemej tanankiliaya” (Luc. 2:46, 47, 52).

3. ¿Toni tikitaskej itech nejin tamachtilis?

³ Tejuan no uelis tikixmatiskej uan tiktasojtaskej iTajtol Dios komo nochipa tikixtajtoltiaj. Sayoj ke, ¿toni uelis tikchiuaskej para uelis techpaleuis tein tikixtajtoltiaj itech Biblia? Uelis tikmatiskej komo tikitaj tein Jesús kiniluij akin kuali kiixmatiaj tanauatil, kemej tajkuilouanij, fariseos uan saduceos. Maski nejon taixyekananij itech taneltokalis nochipa kiixtajtoltiayaj amatajkuilolmej, amo kinpaleuiaya. Jesús kijtoj eyi taman tein monekia kichiuaskej para ueliskia kinpaleuis. Tein kijtoj no techpaleuis 1) maj okachi tikajsikamatikan tein tikixtajtoltiaj, 2) maj tikajsikan tamachtilismej uan 3) maj tikauakan maj iTajtol Dios techpaleui maj timopatakan.

MAJ TIKAJSIKAMATIKAN TEIN TIKIXTAJTOLTIAJ

4. ¿Toni techmachtia tein kijtoua Lucas 10:25-29 kemej moneki tikixtajtoltiskej Biblia?

⁴ Tiknekij tikajsikamatiskej tein tikixtajtoltiaj itech Biblia, porin komo amo tikchiuaj, amo uelis techpaleuis. Maj itech titanemilikan keman Jesús iuan monojnotsak “se takat akin kuali kiixmatia iTanauatil Moisés” (xikonixtajtolti Lucas 10:25-29). Nejin takat kinekia kimatis toni monekia kichiuas para nemiskia nochipaya, uan keman Jesús kinankilij kichiuak maj itech tanemiliani iTajtol Dios. Kiluij: “¿Toni ijkuiliujtok itech iTanauatil Moisés? ¿Keniuj tikajsikamati?”. Takat kuali kinankilij, kijtoj tein kijtouaya Tajkuilolamatsin, ke monekia kitasojtas Dios uan no oksekin (Lev. 19:18; Deut. 6:5). Sayoj ke satepan kitajtanij: “Uan ¿akoni moneki niktasojtas?”. Ika nejin kinextij ke amo kiyekajsikamatia tein kiixtajtoltijka uan yejua ika amo kimatia keniuj kiyekchiuas.

5. ¿Keyej komo timotataujtiaj uan yolik titaixtajtoltiaj okachi techpaleuia maj tikajsikamatikan tein kijtoua Biblia?

⁵ Okachi tikajsikamatiskej iTajtol Dios komo timomatij tikixtajtoltiskej. Onkak seki taman tein uelis tikchiuaskej. Yekinika, moneki timotataujtiskej achto ke tikixtajtoltiskej Biblia. Amo uelis tikajsikamatiskej komo Jehová amo techpaleuia, yejua ika moneki tiktajtaniskej ichikaualis para maj amo teyi techtapololti. Ompa maj peua tikixtajtoltikan, sayoj ke yolik, kemej uelis tikajsikamattiaskej tein tikixtajtoltiskej. No uelis techpaleuis komo chikauak titaixtajtoltiaj oso komo tikaktiouij grabación, ijkon tikmachiliskej ke ompa tietokej, uan tikajsikamatiskej, tikelnamikiskej uan okachi timomachtiskej iTajtol Dios (Jos. 1:8). Keman timatamiskej, maj oksepa tiktataujtikan Jehová para tiktasojkamatiliskej porin techmakatok iTajtoltsin uan para maj techpaleui maj tikchiuakan tein tikixtajtoltijkej.

6. ¿Keniuj techpaleuia komo tikijkuilouaj uan timotajtaniaj seki taman keman tikixtajtoltiaj Biblia? (No xikonita taixkopimej).

⁶ ¿Toni no techpaleuis maj kuali tikajsikamatikan tein tikixtajtoltiaj itech Biblia? Keman titaixtajtoltijtoskej maj timotajtanikan seki taman. Kemej, ¿akonimej okachi ininka tajtojtok?, ¿akoni tajtojtok?, ¿akonimej kinnojnotstok uan keyej?, ¿kani uan kemanian mochiujtok? Nejin techpaleuis maj itech titanemilikan uan maj tikajsikamatikan tanemililmej tein okachi monekij. No uelis tikijkuilojtiaskej seki taman. Keman tikijkuilouaj tein tikixtajtoltiaj okachi itech titanemiliaj. Uan nejon techpaleuia maj okachi tikajsikamatikan uan maj amo tikelkauakan. ¿Toni ueliskia tikijkuiloskej? Tein timotajtanijkej, tein timomachtijkej, tanemililmej tein okachi monekij, keniuj uelis techpaleuis oso keniuj timomachilijkej keman titaixtajtoltijkej. Komo tikchiuaj nochi nejin, tikmachiliskej kemej yeskia Jehová technojnotstok.

7. ¿Toni moneki tikchiuaskej keman tikixtajtoltiskej Biblia uan keyej? (Mateo 24:15).

⁷ Jesús kijtoj ke para tikajsikamatiskej tein tikixtajtoltiaj itech Biblia moneki kuali itech titanemiliskej (xikonixtajtolti Mateo 24:15). ¿Keniuj uelis tikchiuaskej? Moneki kuali tiknemiliskej keniuj se tanemilil mouika iuan okse uan keniuj okseki tanemililmej tataman, uan no maj se kiajsikamati tein amo moyekmelaua. Uan ijkon kemej Jesús kijtoj, komo kuali tikajsikamatij techpaleuis maj tikitakan ke seki taman tein panokya uan tein panotok kinextia ke yekmelauj mochiua tein achto moijtojka. Uan no, semi moneki kuali tikajsikamatiskej porin nejin kichiuas maj nochi tein tikixtajtoltiaj itech Biblia techpaleui.

8. ¿Toni moneki tikchiuaskej para kuali tikajsikamatiskej tein tikixtajtoltiaj?

⁸ Jehová kinpaleuia itekitikauan maj kuali kiajsikamatikan tein kiixtajtoltiaj. Yejua ika moneki tiktataujtiskej uan tiktajtaniskej maj techpaleui (Prov. 2:6). Sayoj ke no moneki tikchiuaskej okse taman. Moneki yolik timomachtiskej tein tikixtajtoltiaj uan tikitaskej keniuj mouika ika tein tikmatijya. Tikpiaj miak amaixmej tein techpaleuiskej maj tikchiuakan nejon, kemej Nepaleuil tein ika momachtiaj itaixpantijkauan Jiova. Komo timomachtiaj nejin amaixmej, techpaleuiskej maj tikajsikamatikan tein ika tajtoua Biblia uan tikitaskej keniuj uelis tikchiuaskej tein timomachtiaj (Heb. 5:14). Komo itech titanemiliaj tein tikixtajtoltiaj itech Biblia, techpaleuis maj okachi kuali tikajsikamatikan.

MAJ TIKAJSIKAN TAMACHTILISMEJ TEIN TECHPALEUISKEJ

9. ¿Toni tamachtilis tein motelneki amo kinekiaj kineltokaskej saduceos?

⁹ Maski saduceos kuali kiixmatiaj yekinika makuil amatajkuilolmej tein kipia Escrituras Hebreas, amo kitakamatiaj tamachtilismej tein okachi monekiaj tein Dios kichiujka maj moijkuilo. Xikonnemili tein Jesús kinnankilij saduceos keman kitajtanijkej ox oksepa nemiskiaj mikemej keman kinekiaj kiixnamikiskej. Yejua kintajtanij: “¿Amo nankiitakej itech iamatajkuilol Moisés tein Dios kiluij itech kouit tein uitsyoj: ‘Nejua niiDios Abrahán, niiDios Isaac uan niiDios Jacob’?” (Mar. 12:18, 26). Xa saduceos miakpa kixtajtoltijkaj nejon tamachtilis, sayoj ke tein Jesús kintajtanij kinextij ke amo kinekiaj kineltokaskej tein iTajtol Dios tamachtia: ke mikemej oksepa nemiskej (Mar. 12:27; Luc. 20:38).d

10. ¿Toni moneki kuali tikitaskej keman tikixtajtoltiaj Biblia?

¹⁰ ¿Toni techmachtia tein ika monojnotskej? Ke keman tikixtajtoltiaj Biblia, moneki kuali tikitaskej toni techmachtia se versículo oso se taman tein panok. Amo sayoj moneki maj tikajsikamatikan tein amo ouij, ta no maj tikajsikamatikan tamachtilismej uan tayolmajxitilismej tein techpaleuiskej, nejin kemej yeskia teisa tein kitelpia ipatiuj porin amo niman se kiajsi.

11. ¿Keniuj tein kijtoua 2 Timoteo 3:16, 17 techpaleuia maj tikajsikan tamachtilismej itech Biblia?

¹¹ ¿Keniuj uelis tikajsiskej nejon tamachtilismej tein kipia Biblia? Maj timomachtikan tein kijtoua 2 Timoteo 3:16, 17 (xikonixtajtolti). Ompa kijtoua ke “nochi tein ijkuiliujtok itech Tajkuilolamatsin […] tapaleuia” itech naui taman: titamachtiskej, technextilia tein amo kuali yetok, tikyektaliskej nochi uan titatakamatiskej. Hasta amatajkuilolmej tein kipia Biblia tein amo semi ika titajtouaj no techpaleuiaj. Maj kuali timomachtikan tein tikixtajtoltiaj para tikitaskej toni techmachtia de Jehová, tein kiixtalijtok kichiuas oso tein techyolmajxitia. Uan, ¿keniuj uelis technextilis tein amo kuali yetok keman titaixtajtoltiskej? Maj tiktemokan tein techpaleuis maj tikmatikan uan maj tikixtopeuakan tein amo kuali tein xa tikchiuajok uan tein techpaleuis maj amo keman tikauakan Jehová. Maj tikitakan keniuj se versículo uelis techpaleuis para tikyektaliskej se taman tein amo kuali yetok tein xa techiluijkej itech tanojnotsalis. ¿Toni moneki tikchiuaskej para maj tein tikixtajtoltiaj techpaleui maj titatakamatikan? Maj tiktemokan nochi tein techpaleuis maj titanemilikan kemej Jehová. Komo tikchiuaj nejin naui taman tikajsiskej tamachtilismej tein okachi techpaleuis keman tikixtajtoltiskej Biblia.

MAJ TIKAUAKAN MAJ ITAJTOL DIOS TECHPALEUI MAJ TIMOPATAKAN

12. ¿Keyej Jesús kintajtanij fariseos ox amo kiitakaj tein kijtouaya Tajkuilolamatsin?

¹² Jesús kintajtanij fariseos ox amo kiitakaj tein kijtouaya Tajkuilolamatsin, ika nejin kinextij ke fariseos taixtajtoltiayaj sayoj para taijijtoskej (Mat. 12:1-7).e Nejon tonal, fariseos kijtojkej ke imomachtijkauan Jesús amo kitakamatiaj tanauatil tein ixyetoya itech tonal sábado. Jesús kinnankilij ika ome taman tein kijtouaj amatajkuilolmej uan ika se versículo tein kipia Oseas, ijkon kinextij ke fariseos amo teikneliayaj uan amo kiajsikamatiaj keyej moixtalijka nejon tanauatil. Maski yejuan kiixtajtoltiayaj iTajtol Dios, amo kinpaleuiaya. ¿Keyej? Porin moueyimatiaj uan sayoj kinekiaj taijijtoskej. Kemej amo kuali tanemiliayaj amo kiajsikamatiaj tein kiixtajtoltiayaj (Mat. 23:23; Juan 5:39, 40).

13. ¿Toni moneki tiknextiskej keman tikixtajtoltiskej Biblia uan keyej?

¹³ Tein Jesús kijtoj techmachtia ke keman tikixtajtoltiskej Biblia moneki tiktemoskej maj techpaleui. Maj amo tikchiuakan kemej fariseos, ta maj tiyolyemankej uan maj tikauakan maj Jehová techmachti. Kemej kijtoua Santiago 1:21, “xiyolnejmachmej uan xikauakan maj kemej yeskia monaluayoti itech namoyolo itajtol Dios”. Komo tiyolnejmachmej tikauaskej maj iTajtol Dios kipata tein titanemiliaj uan tein tikchiuaj. Keman tikixtajtoltiskej Biblia, maj amo timoueyimatikan nion maj tikitakan toni tein amo kuali kichiuaj oksekin. Sayoj ijkon uelis titeikneliskej uan titetasojtaskej kemej Biblia tamachtia.

14. ¿Keniuj uelis tikmatiskej ox tikaujtokej maj Biblia techpaleui maj timopatakan? (No xikonita taixkopimej).

¹⁴ Moitas ox tikaujtokej maj Biblia techpaleui maj timopatakan komo kuali timouikaj iniuan oksekin. Kemej fariseos amo kikaujkej maj iTajtol Dios kipatani kemej tanemiliayaj, kijtouayaj maj kintatsakuiltikan akin amo teyi kichiujtoyaj (Mat. 12:7). Yejua ika, maj kuali tiknemilikan keniuj tikinitaj uan keniuj timouikaj iniuan oksekin. Maj tiknemilikan, ¿nochipa ika titajtouaj tein kuali tein kichiuaj oksekin, oso sayoj tikitaj ininnepololuan? ¿Niman tikintapojpoluiaj akin techchiuiliaj tein amo kuali oso tikinijijtouaj uan tikelnamiktokej tein techchiuilijkej? Tein titanankiliskej kinextis ox tikaujtokej maj Biblia techpaleui maj tikpatakan tein tiknemiliaj, tein tikmachiliaj uan tein tikchiuaj (1 Tim. 4:12, 15; Heb. 4:12).

TIYOLPAKIJ KEMAN TIKIXTAJTOLTIAJ BIBLIA

15. ¿Keniuj kiitaya Jesús iTajtol Dios?

¹⁵ Jesús semi kitasojtaya iTajtol Dios. Itech Salmo 40:8 moijtojka keniuj semi kipatiuitaskia iTajtol Dios, ompa kijtoua: “Nikchiuas motanejnekilis, noDios, semi nechyolpaktia, uan motanauatil moajsi noyolijtik”. Kemej semi kipatiuitaya kipaleuij maj yolpakini uan maj kisentokani kitekitiliani Jehová. Tejuan no tiyolpakiskej uan tiksentokaskej tiktekitiliskej komo tikixtajtoltiaj iTajtol Dios uan tiktasojtaj (Sal. 1:1-3).

16. ¿Keniuj uelis okachi mitsonpaleuis tein tikonixtajtoltis itech Biblia? (Xikonita recuadro “Tein Jesús kijtoj techpaleuia maj tikajsikamatikan tein tikixtajtoltiaj”).

¹⁶ Tein kijtoj uan tein kichiuak Jesús techyolchikaua maj nochipa tikixtajtoltikan Biblia uan maj timomachtikan. Para okachi tikajsikamatiskej tein tikixtajtoltiaj maj tiktataujtikan Jehová, maj yolik titaixtajtoltikan, maj timotajtanikan uan maj tikijkuilokan seki taman. Para itech titanemiliskej, maj kuali timomachtikan tein ika tajtojtok uan maj tiktemokan tamachtilis itech toamaixuan. Para kuali tikixmatiskej Biblia moneki tiktemoskej tamachtilismej tein kipia, hasta itech seki taman tein panok tein amo semi moixmati. Uan para maj iTajtol Dios techpata moneki maj tiyolyemankej, komo tikchiuaj nochi nejin okachi techpaleuis tein tikixtajtoltiskej itech Biblia uan okachi timotokiskej iuan Jehová (Sal. 119:17, 18; Sant. 4:8).