¿Keniuj mitsonpaleuia tikonixmatis Dios?

Tikitakejya seki taman tein techpaleuia maj tikmatikan akoni Dios. Tikitakejya ke Biblia tamachtia ke itokay yejua Jiova uan no ke semi techtasojta. No timomachtijkej tein toka kichiuani uan tein kichiuas satepan. Maski onkakok miak taman tein uelis timomachtiskej kemej tamati Dios, tejuatsin xa tionmotajtania ox mitsonpaleuis tikonixmatis.

Jiova kijtoua ke komo tikontemoua, yejuatsin mokauas xikonajsi (1 Crónicas 28:9). Komo tionmochikaua tikonixmatis, uelis tikonselis se kualtsin tatiochiualis: kuali tionmouikas iuan (Salmo 25:14). ¿Keniuj mitsonpaleuis nejon?

Yekmelauj tionyolpakis. Biblia kijtoua ke Jiova yejua “Dios akin yolpaki” (1 Timoteo 1:11, TNM). Komo iuan tionmotokia uan tikonchiua kemej yejuatsin, yekmelauj tionyolpakis uan nejon mitsonpaleuis kuali xionmoajsi itech monemilis, motanemilil uan kuali xionmomachili (Salmo 33:12). Uan no, amo tikonchiuas tein mitsonijtakos, ta tikonchiuas tein kuali uan kuali tionmouikas iniuan oksekin. Uan no tikonijtos kemej kijtoj akin kijkuiloj se salmo: “Semi kuali maj nimotoki iuan Dios” (Salmo 73:28).

Dios mitsonyekpias. Jiova kiniluia akin kuali iuan mouikaj: “Nejua nimitsitstos uan ijkon nimitsyolmajxitis” (Salmo 32:8). Nejin kijtosneki ke Jiova kinyekpia sejsemej itekitikauan uan kinmaka tein kinpoloua (Salmo 139:1, 2). Keman kuali tionmouikas iuan, tikonitas ke nochipa mitsonpaleuis.

Kualtsin tionnemis satepan. Jiova mitsonpaleuia xionyolpaki axkan uan no motenkaua mitsonmakas se kualtsin nemilis satepan (Isaías 48:17, 18). Biblia kijtoua: “Nachipa nemilis kijtosneki yejua nijin: ‘Ke in taltikpakuani ma mitsonixmatikan Tejuatsin ke tion Dios tion Yolmelauaktsin [...]. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik’” (Juan 17:3). Tein tikchiaj tikseliskej satepan kemej yeskia “takitskijtok ya tech totalnamikilis, ijkon keme se tepos ancla” tein techpaleuia maj titaxikokan keman tikpanouaj ouijkayomej (Hebreos 6:19).

Nejin sayoj seki taman tein uelis tikseliskej komo okachi kuali tikixmatij Dios uan kuali timouikaj iuan. Komo tikonneki tikonmatis okachi, timitsonyoleuaj xiontajto iuan se itaixpantijkauj Jiova oso xikonita página itech Internet kampa timoteixmatiltiaj itech www.jw.org/ncj.