Maj okachi timotasojtakan

1. ¿Akonimej tapaleuijkej maj mochiua se nechikol ompa Filipos?

KEMAN tatitanil Pablo, Silas, Lucas uan Timoteo ajsikej xolal Filipos, kinajsikej miakej akin kinekiaj kimatiskej toni iTekiuajyo Dios. Nejin naui tokniuan tapaleuijkej maj mochiua se nechikol ompa. Nochin itatojtokakauan Cristo peujkej monechikouaj, xa ichan Lidia se siuat akin kuali teseliaya (Hech. 16:40).

2. ¿Toni ouijkayomej niman kipanok nechikol tein moajsia Filipos?

² Nejon yankuik nechikol niman peuak kipanoua ouijkayomej. Satanás kichiuak maj kinixnamikikan nejon tokniuan. Tekiuanij kikitskijkej Pablo uan Silas, kinuijuitekkej uan kintsakkej. Mostika kinkajkaujkej. ¿Toni kichiujkej? Kinitatoj akin yankuixtok mochiujkaj imomachtijkauan Cristo uan kinyolchikaujkej. Satepan Pablo, Silas uan Timoteo yajkej okseko, sayoj ke Lucas xa ompa mokauak. Uan ¿toni kichiujkej akin yankuixtok mochiujkaj imomachtijkauan Cristo? Ika inepaleuil yektikatsin espíritu kisentokakej kitekitilijkej Jiova (Filip. 2:12). Pablo semi kiyolpaktij tein kichiujkej.

3. Kemej kijtoua Filipenses 1:9-11, ¿toni ika motataujtij Pablo?

³ Kemej majtakti xiujmej satepan, Pablo kintajkuilouilij filipenses. Keman tikixtajtoltiaj niman tikitaj ke tatitanil kintasojtaya tokniuan. Kiniluij ke semi kintemouaya uan ke ijkon kemej Cristo semi kintasojtaya (Filip. 1:8). No kiniluij ke ininka motataujtiaya uan kiluiaya Jiova maj kinpaleui maj okachi motasojtanij, maj kiitanij toni okachi tayekantok, maj amo kipianij nepololmej, maj amo kinuetsiltianij oksekin uan maj kisentokanij kichiuanij tein kuali. Senkis tikneltokaj ke no uelis techpaleuis tein kijtoj Pablo (xikonixtajtolti Filipenses 1:9-11, TNM). Itech nejin tamachtilis tikitatij tein ika tajtoj uan keniuj uelis ijkon tikchiuaskej.

MAJ OKACHI TIMOTASOJTAKAN

4. 1) Kemej kijtoua 1 Juan 4:9, 10, ¿keniuj kinextiani Jiova ke techtasojta? 2) ¿Keniuj moneki tiktasojtaskej Dios?

⁴ Jiova kinextij ke semi techtasojta keman kiualtitanik iKonetsin maj toka momikiliki uan ijkon kiixtauak totajtakoluan (xikonixtajtolti 1 Juan 4:9, 10). Nejon techolinia maj no tiktasojtakan (Rom. 5:8). ¿Keniuj moneki tiktasojtaskej Dios? Jesús kinankilij nejin netajtanil keman kiluij se fariseo: “Xiktasojta [...] Totajtsin Dios ika nochi moyolo, uan ika nochi motanejnekilis, uan ika nochi motanemililis” (Mat. 22:36, 37). Amo tiknekij tiktasojtaskej sayoj tepitsin, ta tiknekij mojmostaj okachi tiktasojtatiyaskej. Pablo kiniluij filipenses ke monekia maj okachi kiueyiltijtiyakan ininnetasojtalis. ¿Toni uelis tikchiuaskej tein techpaleuis maj okachi tiktasojtakan Dios?

5. ¿Toni moneki tikchiuaskej tein techpaleuis maj okachi tiktasojtakan Dios?

⁵ Moneki tikixmatiskej Dios sayoj ijkon uelis tiktasojtaskej. Biblia kijtoua: ‘Tein amo tetasojtatinemij, [...] amo kiixmatij Totajtsin Dios, porin to Dios Yejuatsin tetasojtatinemi’ (1 Juan 4:8). Tatitanil Pablo kijtoj ke okachi tiktasojtaj Jiova keman okachi tikixmatij uan keman tikajsikamatij keniuj kiita teisa (Filip. 1:9). Keman peuak timomachtiaj Biblia, tikmatkej seki taman tein yejuatsin kinextia uan nejon kichiuak maj peua tiktasotakan. Sayoj ke okachi tiktasojtakej keman okachi timomachtijkej keniuj tamati uan ikualneskayouan. Yejua ika semi moneki maj nochipa timomachtikan iTajtol uan maj itech titanemilikan (Filip. 2:16).

6. Kemej kijtoua 1 Juan 4:11, 20, 21, ¿toni techpaleuis maj okachi tikintasojtakan tokniuan?

⁶ Tikmatiskej ke Dios semi techtasojta techolinia maj no tikintasojtakan tokniuan (xikonixtajtolti 1 Juan 4:11, 20, 21). Xa tiknemiliskej ke amo ouij tikintasojtaskej tokniuan porin tiktekitiliaj Jiova uan timochikauaj tikchiuaskej kemej yejuatsin. Uan no porin tiktojtokaj ineskayo Jesús akin semi techtasojtak uan toka momikilij. Sayoj ke, kemansa techouijmaka timotasojtaskej se iuan okse. Maj tikitakan tein panok itech nechikol ompa Filipos.

7. ¿Toni techmachtia tein Pablo kiyolmajxitij Evodia uan Síntique?

⁷ Evodia uan Síntique katkaj ome tokniuan siuamej akin semi kipaleuijkej tatitanil Pablo. Sayoj ke yejuan mokualantijkej. Keman Pablo kintajkuilouilij filipenses kintokaytij nejon ome tokniuan uan kinyolmajxitij maj amo xexeliujtonij (Filip. 4:2, 3). Pablo kiitak ke no monekia kiniluis nochin tokniuan nejin: “Nochi [...] xikchiutiyakan [...] amo ika ne neyolkuejmololis. Uan amo no ximotajtoltenteuikan” (Filip. 2:14). Tein Pablo kinyolmajxitij kinpaleuij maj okachi motasojtanij nejin ome tokniuan siuamej uan no tokniuan itech nechikol.

8. ¿Keyej uelis techouijmakas maj tikintasojtakan tokniuan uan toni techpaleuis maj amo techpano nejon?

⁸ Ijkon kemej Evodia uan Síntique, xa techouijmakas tikintasojtaskej tokniuan porin okachi tikitaj ininnepololuan. Tinochin mojmostaj timopolouaj. Komo okachi tikitaj ininnepololuan tokniuan amo tikintasojtaskejok. Maj tikijtokan se neskayot. Se tokniuj kielkaua techpaleuis maj titachipauakan itech Kali kampa tiMosentiliaj, yejua ika tikualanij iuan. Uan komo peua tikelnamikij okseki inepololuan okachi tikualanij uan amo semi tiktasojtajok. ¿Techpanotok nejon? Komo ijkon, maj tikelnamikikan ke Jiova kiita tonepololuan uan inepololuan tokniuj uan maski ijkon kisentoka techtasojta. Yejua ika, moneki titetasojtaskej kemej yejuatsin uan okachi tikitaskej tein kuali tein kichiuaj oksekin. Keman timochikauaj tikintasojtaskej tokniuan, okachi kuali timouikaj iniuan (Filip. 2:1, 2).

TEIN “OKACHI TAYEKANTOK”

9. ¿Katiyejua seki taman tein “okachi tayekantok” ika tajtoj Pablo keman kintajkuilouilij filipenses?

⁹ Jiova kinauatij Pablo maj kinilui tokniuan filipenses uan nochin akin kichiuaj kemej Cristo maj kiitanij “toni okachi tayekantok” (Filip. 1:10, TNM). Seki taman tein tayekantok yejua maj moueyitali itokay Dios, maj mochiua tein kiixtalijtok uan maj akin pouij itech nechikol kuali mouikakan uan maj yolseujkanemikan (Mat. 6:9, 10; Juan 13:35). Keman tiktayekanaltiaj nejon tiknextiaj ke tiktasojtaj Jiova.

10. ¿Toni moneki tikchiuaskej uan ijkon Jiova techitas ke amo tikpiaj nepololmej?

¹⁰ Pablo no kijtoj ke moneki maj ‘amo tikpiakan nepololmej’. Nejon amo kijtosneki ke senkis amo timopoloskejok. Amo ueli tikchiuaj kemej Jiova akin senkis amo mopoloua. Sayoj ke techitas ke amo tikpiaj nepololmej komo timochikauaj okachi titetasojtaskej uan tiktayekanaltiaj tein okachi moneki. Uan tiknextiaj ke titetasojtaj keman timochikauaj amo tikchiuaskej maj aksa kijtako ikuali uikalis iuan Dios.

11. ¿Keyej amo moneki tikinuetsiltiskej oksekin?

¹¹ Moneki amo tikauilmatiskej keman technejmachtiaj maj amo tikinuetsiltikan oksekin. Kemej timoixpetaniaj, kemej timotakentiaj uan hasta itech tein titekitij uelis kinuetsiltis oksekin. Xa kuali yetok tein tikchiuaj, sayoj ke tel amo kuali yeskia komo tein tikixpejpenaj kikuejmoloua itanemilil aksa uan kijtakoua ikuali uikalis iuan Dios. Jesús kijtoj ke okachi kuali maj techkechpilouilikan se ueyi tet uan maj techpantamotakan itech ueyiat uan maj amo tikuetsiltikan se iichkatsin (Mat. 18:6).

12. ¿Toni techmachtia tein kichiujkej seki precursores akin namikuanij?

¹² Maj tikitakan keniuj se tokniuj takat iuan inamik akin precursores mochikaujkej amo kinuetsiltiskej oksekin. Kampa monechikouayaj, no yaya se takat uan se siuat namikuanij akin yekin moauijkaj uan miak taman amo kuali kiitayaj porin ijkon kiniskaltijkaj. Yejuan kinemiliayaj ke amo kuali yetoya maj akin kichiuaj kemej Cristo kiitatij películas maski amo kipiaskia tein amo kuali. Yejua ika semi amo kiuelitakej keman kimatkej ke nejon tokniuan precursores kiitatoj se película. Yejua ika, precursores kiixtalijkej amo yaskejok hasta maj tokniuan akin yekin moauijkaj kuali kimachtianij inintanemilil (Heb. 5:14). Ijkon kinextijkej ke kintasojtayaj amo sayoj ika tein kijtouayaj, ta ika tein kichiuayaj (Rom. 14:19-21; 1 Juan 3:18).

13. ¿Keniuj ueliskia tikchiuaskej maj aksa tajtakolchiua?

¹³ No ueliskia tikuetsiltiskej aksa komo tikchiuaj maj tajtako. Maj tikitakan keniuj ueliskia panos nejon. Maj tiknemilikan ke se akin momachtijtok Biblia semi mochikauak amo tauanasok. Ijsiujka kipata inemilis uan moauia. Yejua kimati ke nion tepitsin moneki kiyekos tayil. Se tonal, se tokniuj kiyoleua ichan iniuan okseki tokniuan, kimaka tayil uan kiluia: “Timoauijya uan tikpiaya yektikatsin espíritu uan nejon mitspaleuis ximotsakuili amo titayis miak”. Tel amo kuali yeskia komo nejon tokniuj kichiua tein kiluiaj uan oksepa peua tauana.

14. ¿Keniuj techpaleuiaj nechikolmej maj tikchiuakan tein tayolmajxitia Filipenses 1:10?

¹⁴ Itech miak taman nechikolmej techpaleuiaj maj tikchiuakan tein tayolmajxitia Filipenses 1:10. Yekinika, techelnamiktiaj tein Jiova kiita ke okachi tayekantok. Ojpatika, technextiliaj keniuj tikchiuaskej tein ompa timomachtiaj uan ijkon amo tikpiaskej nepololmej. Uan expatika, techoliniaj maj tikintasojtakan oksekin uan maj tikchiuakan tein kuali (Heb. 10:24, 25). Keman tokniuan techyolchikauaj okachi tikintasojtaj yejuan uan Jiova. Uan komo tiktasojtaj Jiova uan no tokniuan timochikauaskej amo tikuetsiltiskej nion se tokniuj.

MAJ TIKSENTOKAKAN TIKCHIUAKAN TEIN KUALI

15. ¿Toni kijtosneki tikchiuaskej tein kuali?

¹⁵ Pablo kitataujtij Jiova maj kinpaleuiani filipenses maj kisentokanij kichiuanij tein kuali (Filip. 1:11, TNM). Itech nejin tein kuali pouia maj kitasojtanij Jiova uan itekitikauan. No maj kitematiltianij ke takuaujtamatiaj itech Jesús uan tein kichiayaj. Uan no, Pablo kijtoj ke yejuan katkaj kemej “tanex [...] kampa tayouayanilot” (Filip. 2:15). Nejin melauak porin Jesús kijtoj ke itatojtokakauan kemej yeskiaj “tanexilome para in taltikpakuani” (Mat. 5:14-16). Yejua no kinnauatij maj kinchiuakan imomachtijkauan uan maj tanojnotsakan “senmanauak” taltikpak (Hech. 1:8; Mat. 28:18-20). Tikchiuaj tein kuali keman tiktayekanaltiaj tanojnotsalis.

16. Kemej kijtoua Filipenses 1:12-14, ¿keniuj uelis tiyeskij kemej tanex maski tikpanoskej ouijkayomej? (xikonita taixkopin ipeujyan amaix.)

¹⁶ Tein yeski tein tikpanotoskej, uelis tiyeskij kemej se tanex itech taltikpak. Kemansa, tein ueliskia techtsakuilis maj titanojnotsakan uelis techpaleuis maj tikchiuakan. Ijkon kipanok tatitanil Pablo. Keman kintajkuilouilij filipenses tsaktoya ichan ompa Roma. Maski ijkon kinnojnotsaya akin kipixtoyaj uan akin kikalpanouayaj. Ineskayo kinyolchikauak tokniuan maj tanojnotsakan “ika in Tajtoltsin de Dios [...] pero amo ika moukayot” (xikonixtajtolti Filipenses 1:12-14; 4:22).

17. ¿Keniuj seki tokniuan kisentokaj tanojnotsaj maski amo kinkauaj?

¹⁷ Miakej tokniuan no kinextiaj ke yolchikaujkej kemej Pablo. Nemij itech altepemej kampa amo kinkauaj maj tanojnotsakan senteixtenoj nion kajkalpan, yejua ika kitemouaj keniuj tanojnotsaskej (Mat. 10:16-20). Itech semej nejon altepemej, se tokniuj takalpanojkej kiniluij tokniuan maj kinnojnotsanij ininchankauan, akin nemiaj kampa ika yejuan, akin iniuan tekitiaj oso momachtiayaj uan oksekin akin kinixmatiaj. Itech ome xiuit, okachi momiakilijkej nechikolmej itech nejon circuito. Tejuan xa amo teyi techtsakuilia maj titanojnotsakan. Sayoj ke tein kichiuanij nejon tokniuan technextilia ke moneki nochipa tiktemoskej titanojnotsaskej uan titakuaujtamatiskej ke Jiova techpaleuis hasta keman yeski ouij (Filip. 2:13).

18. ¿Toni moneki tikixtaliskej tikchiuaskej?

¹⁸ Okachi itech nejin tonalmej, maj tikixtalikan tikchiuaskej tein Pablo kinyolmajxitij filipenses. Maj tikitakan toni okachi tayekantok, maj timochikauakan amo tikpiaskej nepololmej, maj amo tikinuetsiltikan oksekin uan maj tiksentokakan tikchiuakan tein kuali. Ijkon, okachi titetasojtaskej uan tikueyitaliskej toTajtsin Jiova, akin tetasojta.