Noyampa taltikpak tikmoyauaskej tayoleualis
1. ¿Toni tekit mochiuas itech nochi taltikpak achto ke tikelnamikiskej imikilis Jesús?
1 “Xiksentokakan xikchiujtokan nejin uan ika xinechelnamikikan.” (Luc. 22:19, NM.) Yejua nejin tanauatil kitemakak Jesús. Yejika, nochin tein tiktekitiliaj Jiova uan miakej tein kiseliskej tayoleualis, tikelnamikiskej imikilis Cristo itech tonal 30 metsti marzo xiuit 2010. Sayoj ke achto, itech tonalmej 13 a 30 itech metsti marzo, noyampa momoyauas se tayoleualis.
2. ¿Keniuj uelis tiktemakaskej tayoleualis?
2 Keniuj tikchiuaskej. Uelis tikinmakaskej tayoleualis akin tikinajsiskej, tikinnextiliskej iixko amat uan tikijtoskej: “Itech tiotak 30 metsti marzo, tel miakej timonechikoskej noyampa taltikpak uan tikelnamikiskej imikilis Jesús. No tamechyoleuaj ximosentilikan touan. Tamechkauiliaj nejin amat. Akin nankinixmatij no uelis yaskej. Nikan kijtoua kani uan toni hora mochiuas”. Komo ueli, maj tiknextilikan tanauatil tein moajsi itech Lucas 22:19. Sayoj ke moneki tikelnamikiskej ke amo miak tonalmej tikxelojtoskej nejin amat, yejika okachi kuali maj amo tiuejkauakan.
3. ¿Akonimej uelis tikinyoleuaskej?
3 Komo miak xolalmej kampa titanojnotsaj, xa tayekananij techiluiskej maj tikauakan tayoleualis itech yekinika takalpanolis maski amo akin tikajsiskej. Keman tiktemakaskej revistas, maj tikinkauilikan tayoleualis komo ueli. Maj tikinyoleuakan akin tikinkalpanojtokej, akin tikinmachtijtokej ika Biblia, akin imiuan titekitij oso timomachtiaj, tochankauan, akin nemij ompakauin kampa tinemij, uan oksekin tein tikinixmatij.
4. Komo tiktasojkamatij inetasojtalis Jiova ¿toni techolinis maj tikchiuakan?
4 Maj tikitakan keniuj okachi titekitiskej. Itech metsti keman tikelnamikiskej imikilis Jesús, semi kuali maj okachi titekitikan. ¿Uelis tikonxelos ome eyi tonalmej uan tiontekitis kemej precursor auxiliar? ¿Moskaltijtokej espiritualmente mokoneuan oso akin tikonmachtijtok ika Biblia? Komo kemaj, xikonilui tayekananij uan yejuan kiitaskej ox uelisya kimoyauaskej amat kemej tanojnotsanij tein ayamo moauiaj. Komo tiktasojkamatij netasojtalis tein Jiova technextilia porin kitemakak iKonetsin, amo sayoj techolinis maj tiyetokan keman tikelnamikiskej imikilis Jesús, ta no tikinyoleuaskej nochin tein tiueliskej (Juan 3:16).