Itech tonal 2 metsti abril peuas tikmoyauaskej tayoleualis
1. ¿Kemanian tikmoyauaskej tayoleualis nejin xiuit, uan keniuj tapaleuia ijkuak mochiua nejon?
1 Itech tonalmej 2 a 17 metsti abril, tikmoyauaskej amat tein ika tikinyoleuaskej maj yetokan itech Talnamikilis tein okachi motelneki, tonal keman tikelnamikiskej imikilis Cristo. Itech xiujmej tein tiualpanokej, miakej kiselianij tayoleualis tein tikmoyauaj xijxiujtika. Se neskayot, itech tonal keman mochiuaskia Talnamikilis, se siuat tanotsak sucursal uan kijtoj: “Yekin niejkok nochan uan nikajsiko se tayoleualis itampa puerta. Nikneki niyas sayoj ke amo nikmati toni hora mochiuas”. Tokniuj akin tanankilij kiiluij kani itech tayoleualis kijtoua toni hora mochiuas. Siuat monauatij ika nejin tajtolmej: “Niyas itech nejon Talnamikilis nejin tiotak”.
2. ¿Toni uelis tikijtoskej keman tiktemakaskej tayoleualis?
2 Keniuj tikchiuaskej. Kemej amo miak tonalmej tikxelojtoskej tayoleualis itech nochi xolalmej kampa titanojnotsaj, semi kuali maj amo tiuejkauakan itech se kali. Uelis tikijtoskej satepan ke titatajpaloskej: “Tiknekij tamechyoleuaskej touan xiyetokan itech se talnamikilis tein motelneki tein mochiuas noyampa taltikpak itech domingo 17 metsti abril [xikonkauili tayoleualis taltikpaknenkej]. Nejon tonal tikelnamikiskej imikilis Jesús. Ompa motemakas se tanojnots kampa moijtos ika Biblia keniuj uelis techpaleuis inemilis Cristo tein kitemakak kemej se taxtauil. Amo monekis se taxtauas. Nejin amat kijtoua kani uan toni hora mochiuas”.
3. ¿Keniuj uelis tikinyoleuaskej tel miakej taltikpakneminij?
3 Komo tonechikol kipia miak xolalmej kampa titanojnotsaj, tayekananij uelis kiixejekoskej ke itech kali kampa amo akin yetos, uelis tikauaskej tayoleualis kampa amo kiitaskej ojneminij. No moneki tikinyoleuaskej akin tikinkalpanojtokej, tochankauan, akin iuan titekitij oso akin iuan timomachtiaj uan oksekin tein tikinixmatij. Keman tikxelojtoskej nejon amat itamian semana, uelis tiktemakaskej revistas komo tikitaj ke ueli. ¿Uelis tiontekitis kemej precursor auxiliar uan ijkon okachi uelis tiontapaleuis maj momoyaua nejin tayoleualis?
4. ¿Keyej tiknekij maj oksekin no yetokan itech nejon Talnamikilis?
4 Tein yaskej nejon tonal, kiseliskej tamachtilis tein okachi motelneki. Kikakiskej ueyi netasojtalis tein kinextij Jiova keman kitemakak Jesús kemej se taxtauil (Juan 3:16). Kimatiskej keniuj iTekiuajyo Dios kinualkuilis tatiochiualismej taltikpakneminij (Isa. 65:21-23). No kinyoleuaskej maj kiniluikan tayektalianij maj aksa kinmachti ika Biblia uan ijkon kimatiskej okachi. Tiktataujtiaj Jiova maj miakej tein yolmelaujkej kiselikan tayoleualis tein tikmoyauaskej uan maj no yetokan itech nejon Talnamikilis.