Maj oksepa tikinkalpanokan akin kinekij momachtiskej
1. ¿Toni moneki se kiatekis uan ijkon uelis moskaltis?
1 Keman tiktokaj se xinach moneki tikatekiskej uan ijkon uelis ixuas. No ijkon moneki se kichiuas ika tamachtilis tein kipia iTajtol Dios, tein moneskayotia kemej se xinach, tein tiktokaj itech imin yolo taltikpakneminij kampa titanojnotsaj (1 Cor. 3:6). Yejua ika, moneki oksepa tikinkalpanoskej uan ijkon, kemej eskia tikatekiskiaj nejon xinach ijkuak tiktekitiltiaj iTajtol Dios. Nejon tapaleuis maj monaluayoti, maj moskalti uan maj kitemaka takilot.
2. ¿Keniuj uelis tikchiuaskej maj taltikpaknenkej kineki techkakis keman oksepa tikalpanoskej?
2 Xikonkaua se netajtanil. Keman tionmomachtijtos tein tikonijtos itech tanojnotsalis, semi kuali komo achto tikonnemilia se netajtanil tein uelis tikonkauilis taltikpaknenkej uan tikonnankilis keman oksepa tikonkalpanos. Moneki se netajtanil tein kiolinis maj okachi kineki kimatis. Xikonchiua keman tiontamitajtos iuan taltikpaknenkej uan xionmotenkaua iuan kemanian tionmokepas. Miakej kiitaj ke semi tapaleuia maj kichiuakan se netajtanil tein kipia amaix Tamachtia Biblia tein kinpaleuis maj kipeualtikan se nemachtil ika Biblia.
3. Komo taltikpaknenkej kineki kimatis okachi, ¿toni uelis tikamataliskej?
3 Xikonijkuilo tein moneki. Keman tiontamitajtos iuan akin yekinika tikonkalpanoj, niman xikonijkuilo keniuj motokaytia, kani nemi, tonal uan hora keman tikonkalpanoj, toni ika nantajtojkej uan katiyejua amaixmej tikonkauilij, komo ijkon tikonchiuak. No semi tapaleuis komo tikonijkuiloua ox poui itech se taneltokalis, kipia ichankauan, teisa kitekipachoua oso kineki kimatis se taman. Nochi nejin mitsonpaleuis xikonmati toni ika tiontajtos iuan taltikpaknenkej keman tionmokepas. Xikonelnamiki tikonijkuilos tonal keman tionmotenkauak tionmokepas uan netajtanil tein tikonkauilij.
4. ¿Keyej moneki tiksentokaskej tikalpanoskej akin kineki kimatis okachi?
4 Xikonsentoka. Satanás kitemos keniuj ‘kinajchiuilis in Tajtoltsin de Dios’ tein kemej eskia toktok itech imin yolo taltikpakneminij (Mar. 4:14, 15). Yejua ika, amo xionmosenkaua komo amo tikonajsi kalijtik akin kineki kimatis okachi keman oksepa tikonkalpanos. ¿Uelis tikonijkuilos se amatsin uan tikonkauas kaltenoj oso tikontitanilis se amat? Se precursora peuak kimachtia ika Biblia se siuat ikaltenoj, sayoj ke satepan amo kiajsiaok, yejua ika kititanilij se amat. Keman oksepa kiajsik, siuat kiiluij tokniuj ke kiteluelitak maj ika motekipachouani. Komo tikatekiaj xinach, tein ika moneskayotia tamachtilis tein kipia iTajtol Dios, semi techyolpaktis keman tikitaskej ke ixua, moskaltia uan ‘kitemaka sempoal uan majtakti, eyipoal, uan makuilpoal takilomej’ (Mar. 4:20).