Maj tikinnojnotsakan nochin tataman taltikpakneminij
1. ¿Keniuj se kuali tanojnotskej tamati kemej se kuali tamachijchiujkej?
1 Se kuali tamachijchiujkej kipia miak manamikmej, uan no kimati kemanian uan kani kitekitiltis sejse. No ijkon tejuan tikpiaj tataman manamikmej tein techpaleuia maj kuali tikchiuakan tekit kemej tanojnotsanij. Kemej neskayot, tikpiaj folletos tein tataman tamachtilis kipiaj tein techpaleuia maj tikinnojnotsakan nochin tataman taltikpakneminij (1 Cor. 9:22). Itech amatamajsikayot tein kiualkui nejin amaix ixnesij seki folletos, kimelaua akonimej uelis kinpaleuis uan kijtoua toni uelis tikijtoskej keman tiktemakaskej.
2. ¿Kemanian uelis tiktemakaskej folletos itech tanojnotsalis?
2 Kemanian tiktekitiltiskej folletos. Se kuali tamachijchiujkej kitekitiltia manamik tein okachi kipaleuis itech tekit tein kichiuati. No ijkon tejuan uelis tikauiliskej taltikpaknenkej se folleto komo tikitaj ke okachi kipaleuis, maski amo yejua tiktemakatoskej nejon metsti. Kemej neskayot, komo tiktemakatokej amaix Tamachtia Biblia uan tiknojnotsaj akin amo poui itech taneltokalis kampa kijtouaj kitojtokaj Cristo nion kineki momachtis Biblia, xa okachi kuali maj tikauilikan se folleto uan maj tikpaleuikan maj kineki kimatis okachi, uan satepan uelis tikuikiliskej amaix Tamachtia Biblia.
3. ¿Keyej moneki timomachtiskej kuali tiktekitiltiskej manamikmej itech tanojnotsalis?
3 Itech Biblia tel kuali ika motajtoua akin tel ueli kichiua itekiuj (Pro. 22:29). Tein melauj, tikmatij ke ‘titetapoujtinemiskej in Tajtoltsin de Dios’ yejua tekit tein okachi tayekantok (Rom. 15:16). Moneki timomachtiskej kuali tiktekitiltiskej manamikmej itech tanojnotsalis, uan ijkon timochiuaskej kuali tekitinij tein ‘amo teyi onkas tenika timopinaujtiskej’ (2 Tim. 2:15).