Ikualtsin tachijchiualis Dios kinextia iueyipanchiualis
Miakej kinyolpaktia kiitaskej keniuj tachijchiujtok. Sayoj ke miakej amo kiajsikamatij ke tein kiitaj, yejua se taman tein kinextia keniuj tanemilia uan tein kimachilia toTachijchiujkauj (Rom. 1:20). Ne uejkauj, David kiixmatik Jiova porin kiixtajtoltiaya iTajtol. Sayoj ke no kemej yeskia kiitak uan iuan motokij keman kiitak itachijchiualis (Sal. 8:3, 4). Video tein motokaytia Las maravillas de la creación revelan la gloria de Dios uelis techpaleuis tejuan, tokoneuan uan akin tikinmachtiaj ika Biblia, maj okachi ika tanemilikan itachijchiualis Jiova, maj kiitakan ikualneskayouan uan kemej tamati toUeyi Tachijchiujkauj, uan maj tikchikauakan toyekuikalis iuan. Satepan ijkuak tikonitas video, xikonnankili nejin netajtanilmej.
1) Ijkuak tikonmati itamachiuj uan kemej yekyetok nochi semanauak, ¿keniuj kichiua maj okachi xikontasojkamatili Jiova? (Isa. 40:26.) 2) Keman tikitaj at ika nejmachkayot, ¿toni technextilia kemej tamati Dios akin kichijchiuak? (Rev. 14:7.) 3) ¿Keniuj kinextia itamatilis Jiova itamachiuj taltikpak uan kemej xeliujtok iuan Tonaltsin? 4) ¿Toni ika tapaleuia metsti? (Sal. 89:37.) 5) ¿Toni techmakak Jiova tein ika ueli tiyolpakij itech tonemilis? 6) ¿Toni ADN? (Sal. 139:16.) 7) ¿Keniuj taltikpakneminij amo chijchiujtokej kemej okseki taman tein Jiova kichijchiuak? (Gén. 1:26.) 8) ¿Toni tikonneki tikonchiuas keman motayektalis nikan taltikpak?
Okseki: 9) ¿Keniuj mochijchiuaj tapalmej? 10) ¿Keniuj ueli at pankisa hasta ininkuapan koujmej? 11) ¿Keniuj tekiti at itech inakayo se taltikpaknenkej? 12) Xikonijto seki neskayomej tein kinextia keniuj mouikaj nochi tataman itachijchiualis Dios tein yoltokej. 13) ¿Keniuj sejse itachijchiualis Dios tein yoltok kimati mouikas iniuan oksekin? 14) ¿Toni tein kiiluiaj ángulo áureo, uan keniuj monextia itech itachijchiualis Dios?
Maj tikitakan itachijchiualis Dios ika nejmachkayot. Jesús kinyoleuak imomachtijkauan maj ‘kiitakan san in tototsitsin ten patantinemij ejekaixko’ uan maj ‘kiitakan kenin moskaltiaj ne milajxochimej’ (Mat. 6:26, 28). Komo ijkon tikchiuaj, mochikauas totakuaujtamatilis uan okachi tikpoujkaitaskej itamatilis Jiova, ichikaualis tein ika temakixtia uan inetasojtalis. Maj amo titachiakan itech tein mochiujtok itech taltikpak, ta okachi kuali, maj tikxelokan tonal uan tochikaualis uan ijkon maj okachi tikitakan ikualtsin tachijchiualis Jiova, uan maj titanemilikan itech tein techmachtia ika toTajtsin (Sal. 19:1).