Maj okachi kuali titanojnotsakan: maj tikamatalikan akonimej kinekij kimatiskej okachi

“Xiktakamati de motanextililisuan tenika tejua titamachtijtinemi” (1 Tim. 4:16.) Nejin tayolmajxitilis tein Pablo ika inepaleuil Dios kimakak Timoteo, kinextia ke moneki timochikauaskej okachi kuali titanojnotsaskej, yeski tikuikaskej miak xiujmej oso amo. Yejua ika, itech amaix ITekiyo Dios tein Tikchiuaj kiualkuis se tamachtilis tein motokaytis “Maj okachi kuali titanojnotsakan”. Itech sejse tamachtilis momelauas se taman tein motelneki tikchiuaskej, uan motemakas seki tayolmajxitilismej. Techyoleuaj tinochin maj ijkon tikchiuakan itech metsti. Ijkuak tamis metsti uelis tikijtoskej itech Nechikol tein Techmachtia iTekiyo Dios toni ika techpaleuij. Itech nejin tamachtilis techyoleuaj maj tikamatalikan nochi tein techpaleuis keman oksepa tikalpanoskej se akin kineki kimatis okachi.

Keyej moneki. Amo sayoj moneki titanojnotsaskej, ta no maj oksepa tikinkalpanokan akin kinekij kimatiskej okachi uan tikinmachtiskej tein melauak, kemej yeskia tikatekiskiaj xinach tein tiktokkej (Mat. 28:19, 20; 1 Cor. 3:6-9). Sayoj ke moneki oksepa tikinajsiskej taltikpakneminij, tikinnojnotsaskej ika tein yejuan kintekipachoua uan tiktemoskej ika titajtoskej tein ika timonojnotskajya. Yejua ika moneki tikamataliskej nochi keman tikajsiskej se akin kineki kimatis okachi.