Maj okachi kuali titanojnotsakan: xikonnexti ke yekmelauj tikonneki tiontapaleuis
Keyej motelneki. Jesús yekmelauj kinekia kinpaleuis oksekin. Se tonal kipajtito se takat akin amo uelia takakia, uan kemej xa kiitak ke amo kuali momachiliaya porin miakej kiitstoyaj, kiuikak okseko (Mar. 7:31-35). Yejua kinajsikamatia imomachtijkauan uan amo kinmachtiaya miak taman porin kimatia ke amo kiajsikamatiskiaj nochi (Juan 16:12). Jesús, akin moajsi iluikak, kisentoka kinpaleuia oksekin (2 Tim. 4:17). Itaixpantijkauan Jiova timochikauaj tikchiuaskej kemej yejua (1 Ped. 2:21; 1 Juan 3:16, 18). Komo tiknekij maj kuali kisa totanojnotsalis, moneki tikinajsikamatiskej oksekin uan tikitaskej tein kipanotokej, tein kiuelitaj uan tein kintekipachoua. Okachi kinekiskej techkakiskej komo kiitaj ke amo tikinkalpanouaj sayoj porin tikinnojnotsatij ika teisa oso porin tikinkauilitij amaixmej, ta porin yekmelauj tiknekij tikinpaleuiskej.
Xikonchiua nejin itech metsti:
Keman tiontaueyichiuas iniuan mokalyetouanij, oso itech tanojnotsalis, xionmomachti keniuj uelis tikonpatas tein tikonixtalij peuas ika tiontajtos komo taltikpaknenkej kineki kimatis okse taman.
Tokniuj akin kiixyekana nechikolmej tein mochiua achto ke titanojnotsatiuij no uelis kimelauas seki taman kemej tiknextiskej ke yekmelauj tiknekij titapaleuiskej, oso kitemakas se ixneskayot.