ToTachijchiujkauj techtasojta uan toka motekipachoua

1. YEJUATSIN KICHIUA MAJ TONA

¿Tikonnemilia keniuj tinemiskiaj komo amo tikpiaskiaj Tonaltsin? Tonal kichiua maj koujmej seliakan, maj taxochioua, maj onka takilomej uan maj onka tatet. No kichiua maj koujmej kichichinakan at itech ininnaluayo, maj at youi hasta ininmaxiujyo uan maj oksepa pankisa kemej mixti.

2. YEJUATSIN KICHIUA MAJ KIOUI

Dios techtayokolia kiouit. Yejua ika, semi tataki uan techajsi tein tikuaskej uan nejin semi techyolpaktia.

Se totot yetok itech imakoujyo se kouit uan kineki kikuas se koujtet ejekaixko

3. YEJUATSIN TECHMAKA TEIN TIKUASKEJ UAN TEIN TIMOTALILISKEJ

Miakej tetatmej kintekipachoua maj ininchankauan kipiakan tein motaliliskej uan tein kikuaskej. Biblia kijtoua: “Xikitakan san in tototsitsin ten patantinemij ejekaixko. Yejuan amo no tatokaj, nion no kajokuij takilot, nion no kieua in takilot tech sinkal. Uan Namoueyitajtsin [...] kintamakatok. ¿Xe kachi amo nantayekantokke namejuan iuan Dios uan ke nijin tototsitsin?” (Mateo 6:25, 26).

“Kuali xikitakan keniu moskaltiaj ne milajxochime [...]. Uan maski ne ueyi rey Salomón ika nochi ikualtsiyo motankentiaya, pero amo keman uelia kinejneuilij kualtsin keme nijin xochime. Uan Dios kikualnextijtok nijin milajxochime [...] namejuan kachi ok namechpaleuis uan namechtakentis” (Lucas 12:27, 28).

Komo Dios ueli techmaka tein timotaliliskej uan tein tikuaskej, no uelis techmakas okseki taman tein techpolos. Komo timochikauaj tiktakamatiskej, techpaleuis maj tikpiakan tein tikuaskej oso techpaleuis maj ueli tikpiakan se tekit uan ijkon tikouaskej tein techpolos (Mateo 6:32, 33, TNM).

Keman itech titanemiliaj Tonaltsin, kiouit, totomej uan xochimej, tikitaj ke Dios kinamiki maj tiktasojtakan. Itech okse tamachtilis tikitaskej keniuj toTachijchiujkauj techmatiltia seki taman.