Tein mokui keman tikitaj Tein timomachtiaj itech nechikol Tonemilis uan toTanojnotsalis
2-8 METSTI MARZO
TAMACHTILIS TEIN KIPIA BIBLIA | GÉNESIS 22, 23
Maj tiktemokan tamachtilis ika nejmachkayot
Jiova kinotsak “notasojikniuj”
13 Achto ke pankisaskia itech tepet iuan Isaac, Abrahán kiniluij itakeualuan: “Ximokauakan nikan iuan asno, sayoj ke telpoch uan nejua tiyouij nepa uan titaueyichiuatij uan timokepaskej namouan” (Gén. 22:5). ¿Keyej Abrahán kiniluij ke Isaac no mokepaskia? ¿Kinkajkayauak? Amo. Biblia kijtoua ke yejua takuaujtamatia ke Jiova ueliskia kiajokuis Isaac (xikonixtajtolti Hebreos 11:19). Yejua kimatia ke Dios uelik kichiuak maj yejua uan Sara kipianij se konetsin maski xiuejkejya katkaj (Heb. 11:11, 12, 18). Yejua ika kimatia ke Dios nochi ueli kichiua. Melauak ke amo kimatia toni panoskia nejon tonal. Sayoj ke takuaujtamatia ke komo Isaac momikiliaya, Jiova ueliskia oksepa kiyolitis uan ijkon kichiuas tein motenkaujka. Yejua ika Biblia kijtoua ke Abrahán “uejkautat de nochi nekes ten takuautamatiske”.
Tein tajtanij akin taixtajtoltiaj
Naujpatika, Jiova kiixpejpena amo kimatis nochi tein techpanos satepan. Melauak ke komo yejuatsin kineki, uelis kimatis toni panos satepan (Is. 46:10). Sayoj ke Biblia kijtoua ke onkak seki taman tein Jiova kiixpejpena amo kimatis (Gén. 18:20, 21; 22:12). ¿Keyej? Porin yejuatsin tetasojtakej uan melauak, uan kipoujkaita maj toselti tiuelikan titaixpejpenakan (Deut. 32:4; 2 Cor. 3:17).
Tein moixtajtoltia itech Biblia
(GÉNESIS 22:1-18) Satepan ke panok nochi nejon, Dios akin melauak kiyejyekoj Abrahán. Dios kiluij: “¡Abrahán!”. Yejua kinankilij: “¡Nikan niyetok!”. 2 Dios kiluij: “Ika kualtakayot, xikuika itech tal Moria mokonetsin Isaac, akin sayoj setsin uan semi tiktasojta. Ompa xiktemaka kemej se nemaktil tachichinol itech semej tepemej tein nimitsnauatis”. 3 Yejua ika, Abrahán meuak kualkan, kikuito iburro uan kiniluij ome itakeualuan maj yanij iuan uan ikoneuj, Isaac. No kitapanak kouit tein ika kichichinoskia nemaktil. Satepan, yajki kampa Dios akin melauak kinauatij. 4 Uiptika, Abrahán kiuejkaitak tal. 5 Ompa, Abrahán kiniluij itakeualuan: “Nikan ximokauakan iuan burro. Nokoneuj uan nejua tiyouij nepa tikueyichiuatij Dios uan timokepaskej”. 6 Abrahán kikuik kouit tein ika kichichinoskia nemaktil uan kimamaltij ikoneuj, Isaac. Abrahán kiuikak tit uan cuchillo. Ompa, omen senojtokakej. 7 Satepan, Isaac kiluij itat: “¡Paj!”. Yejua kinankilij: “¡Toni nokonetsin!”. Isaac kitajtanij: “Tikualkuijya tit uan kouit, sayoj ke ¿kani yetok borrego tein tiktemaktiskej uan tikchichinoskej?”. 8 Abrahán kinankilij: “Nokonetsin, Dios techmakas borrego tein tikchichinoskej”. Uan kisentokakej ojtokakej. 9 Ompa, ajsikej kampa Dios akin melauak kinauatij Abrahán. Yejua kichijchiuak se altar uan tapani kitalij kouit. Satepan, kimetsilpij uan kimailpij ikoneuj, Isaac, uan kitekak itech altar. 10 Ompa, Abrahán kikuik cuchillo tein ika yaya kimiktiti ikoneuj. 11 Sayoj ke iángel Jiova akin moajsia iluikak kinotsak uan kiluij: “¡Abrahán! ¡Abrahán!”. Yejua tanankilij: “¡Nikan niyetok!”. 12 Ángel kiluij: “Amo xikoko telpoch, amo teyi xikchiuili. Nikitakya ke tikmoujkatoka Dios porin yaya tinechmakati mokoneuj, akin sayoj setsin”. 13 Ompa, Abrahán moixajokuik uan kiitak ke ompakauin moajsia se borregojueuet tein motsikojka koujtsalan ika ikuaomiyouan. Yejua ika, kikitskij borrego uan kichichinoj kemej nemaktil, uan amo kitemaktijok ikoneuj. 14 Abrahán kitokaytij nejon tal Jiova-Yiré. Yejua ika hasta axkan moijtoua “Motemakas tein moneki itech tepet tein iaxka Jiova”. 15 Iángel Jiova akin moajsia iluikak oksepa kinotsak Abrahán 16 uan kiluij: “Jiova kijtoua: ‘Nimitsyekiluia notokaykopa ke kemej tikchiuak nejon uan kemej yaya tinechmakati mokoneuj, akin sayoj setsin, 17 nimitstatiochiuis uan nikchiuas maj momiakilikan mokoneuan kemej sitalimej tein moajsij iluikak uan kemej xal tein onkak ueyi atenoj. Uan no, mokoneuan moaxkatiliskej ininxolaluan akin kinixnamikiskej. 18 Uan inintechkopa mokoneuan kiseliskej tatiochiualis nochin altepemej tein moajsij itech taltikpak porin tinechkakik’”.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Ika tajtoua ome uvajtal
¿Akonimej kinixnextiaj ome ikoneuan takat akin Jesús ininka tajtoua?
Itech ojpatika neskayot, ¿akoni kiixnextia akin iaxka uvajtal? ¿Akonimej kinixnextia uvajtal? ¿Akonimej kinixnextiaj tekitinij? ¿Akonimej kinixnextiaj takeualmej? ¿Akoni kiixnextia akin kiselis nejon uvajtal?
¿Toni kinpanos akin kinixnextiaj tekitinij?
9-15 METSTI MARZO
TAMACHTILIS TEIN KIPIA BIBLIA | GÉNESIS 24
Maj tiktemokan tamachtilis ika nejmachkayot
“Nikneki niyas”
Se tonal keman atakuito, satepan ke kipexontij itsotsokol, kiajsito se takat akin xiuejya uan kiluij: “Xinechmaka, ika kualtakayot, tepitsin at tein tikualkui itech motsotsokol”. ¡Nejon tein kitajtanijka ika tajtolmej tein yemankej amo katka ouij! Kemej moitaya ke nejon takat uejka ualeuaya, niman kitemoltij itsotsokol uan amo kimakak sayoj tepitsin, ta hasta maj amikseui. Rebeca kiitak ke nejon takat kinuikaya majtakti camellos uan ke amo onkaya at kampa kinamakayaj tapialmej. Kiitak ke takat kiitstoya ika nejmachkayot uan kinekik kipaleuis. Yejua kiluij: “No nikinkixtilis at mocamellos hasta maj moamikseuikan” (Génesis 24:17-19).
Tikitaj ke amo sayoj kijtoj ke kinmakaskia tepitsin at camellos, ta hasta maj moamikseuikan. Se camello tein amiktok uelis tayis at kemej 95 litros. Yejua ika Rebeca xa miak horas tel tekitiskia. Tein panok satepan, kinextia ke camellos amo semi amiktoyaj, sayoj ke yejua amo kimatia nejon keman kijtoj ke kinmakaskia at. Maski ijkon, kichiuak tein monekik tein ika kinextij ke kuali kiseliaya nejon takat akin uejka ualeuaya, uan takat kiselij inepaleuil. Nejon takat akin xiuejya kiitak keniuj Rebeca miakpa kipepexontij itsotsokol ika at uan kiuikaya kampa kinamakayaj camellos (Génesis 24:20, 21).
“Nikneki niyas”
Axkan ika titajtotij tein tikijtojkej itech ipeujyan nejin tamachtilis. Nochin akin ojtokaj panouaj ompa Négueb uan peuaya tapoyaui. Rebeca kiita se takat nejnentok ompa ixtauat akin moita ke tanemilijtok. Tajkuilol kijtoua ke pantemoua itech camello, maski xa nion kichia maj tapial motankuaketsa. Uan kitajtania takat akin xiuejya: “¿Akoni nejon takat akin ualnejnentok ne ixtauat technamikiki?”. Keman kimatik ke katka Isaac, mokuatsonpiki ika se tilmaj (Génesis 24:62-65). ¿Keyej kichiua nejon? Xa ijkon kinextia ke kipoujkaita akin iuan monamiktiti. Nejon tein kinextij Rebeca axkan uelis moitas ke amo tapaleuiaok. Sayoj ke, takamej ijkon kemej siuamej uelis kintelmachtis yolyemanilis tein kinextij Rebeca.
Tein moixtajtoltia itech Biblia
(GÉNESIS 24:1-21) Abrahán katka semi xiuejya. Uan Jiova semi kitatiochiuijka. 2 Se tonal, Abrahán kinojnotsak itakeual akin okachi uejkaujya kitekitilijtoya. Nejon takeual kiixyekanaya nochi tein Abrahán kipiaya. Abrahán kiluij: “Ika kualtakayot, xiktali momay itech nokes. 3 Xinechyekilui itenkopa Jiova, Dios akin taixyekana iluikak uan taltikpak, ke amo tiknamiktis nokoneuj iuan semej ininichpochuan akin kayomej Canaán, kampa ninemi. 4 Xiyouj noaltepeuj uan xiktemo semej nochankauan akin monamiktis iuan nokoneuj, Isaac”. 5 Sayoj ke, itakeual kiluij: “¿Uan toni nikchiuas komo siuat amo kineki ualas? ¿Tikneki maj nikuika mokoneuj itech altepet kampa tikisak?”. 6 Abrahán kinankilij: “Amo keman xikuika nokoneuj ompa. 7 Jiova, Dios akin taixyekana iluikak, nechnauatij maj nikisa ichan nopaj uan ininaltepeuj nochankauan. Yejua nechnojnotsak uan nechiluij: ‘Mokoneuan nikinmakas nejin tal’. Yejua kititanis iángel maj mitsixyekana, uan ompa tikajsis se siuat akin monamiktis iuan nokoneuj. 8 Komo siuat amo kineki ualas, ijkuak tamis tein monekia tikchiuas. Sayoj ke, amo xikuika nokoneuj itech nejon altepet”. 9 Ompa, takeual kitalij imay itech ikes Abrahán, akin katka iteko, uan kiluij ke kichiuaskia tein kinauatijka. 10 Yejua ika, takeual kikuik 10 camellos tein iaxka Abrahán uan yajki xolal Nacor. Nejon xolal moajsi Mesopotamia. Kiuikak miak netetayokolilmej tein iteko kimakak. 11 Keman ajsik, camellos moseuijkej inakastan se atekoch tein moajsia ompakauin itech xolal. Katka tiotakya uan nejon hora siuamej yayaj kikixtitij at. 12 Ompa, takeual motataujtij: “Jiova, iDios noteko Abrahán, ika kualtakayot, xinechpaleui maj kuali mochiua tein moneki. Xiknextili noteko Abrahán ke semi tiktasojta. 13 Nonakastan moajsi se ameyal, uan ininichpochuan takamej akin nemij itech nejin xolal kikixtijtokej at. 14 Nimitstajtania maj ichpoch akin nikiluis ‘Ika kualtakayot, xiktemoui motsotsokol uan xinechuanti at’, uan komo nechnankilia ‘Xitayi at, uan no nikinualkuilis at mocamellos’, yejua akin tikixpejpenak maj monamikti iuan motekitikauj, Isaac. Ijkon nikmatis ke semi tiktasojta noteko”. 15 Achto ke matamiskia inetataujtil, itech xolal kisak se ichpoch akin monotsaya Rebeca uan kimamaya se tsotsokol iajkoltipan. Yejua katka iichpoch Betuel. Imomaj Betuel katka Milcá. Yejua monamiktij iuan Nacor, iikniuj Abrahán. 16 Rebeca katka semi kuakualtsin uan amo motektoya iuan se takat. Yejua temok kampa moajsia ameyal, kipexontij itsotsokol uan oksepa pankisak. 17 Ompa, takeual niman motaloj kiajsito uan kiluij: “Ika kualtakayot, xinechuanti tepitsin at tein tikuika itech motsotsokol”. 18 Rebeca kinankilij: “Xitayi noteko”. Yejua ika, niman kitemouij itsotsokol uan kimakak. 19 Keman takeual amikseuik, Rebeca kiluij: “No nikinkixtiliti at mocamellos hasta maj moamikseuikan”. 20 Yejua ika, at tein kipiaya itech tsotsokol niman kikepak kampa tapialmej tayij at uan miakpa motaloj kikixtito at. Kinkixtilij at nochi icamellos takeual. 21 Ijkuak, takat sayoj kiitstoya uan kimoujkaitaya. No monemiliaya ox Jiova kipaleuijtoya ika tein monekia kichiuas.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Se tekiuaj kinyoleua miakej maj yakan se nenamiktilis
¿Akoni kiixnextia tekiuaj? ¿Akoni kiixnextia ikoneuj tekiuaj? ¿Akonimej yekinika kinyoleuaj maj yakan se nenamiktilis?
¿Kemanian kemej yeskia kinyoleuaj judíos, uan akonimej kinyoleuaj satepan?
¿Keniuj Jesús kinextia ke maski kinyoleuaj miakej sayoj sekin kinixpejpenaj?
16-22 METSTI MARZO
TAMACHTILIS TEIN KIPIA BIBLIA | GÉNESIS 25, 26
Maj tiktemokan tamachtilis ika nejmachkayot
Tein tajtanij akin taixtajtoltiaj
Maj oksepa tikitakan Hebreos 12:16, kampa tatitanil Pablo kijkuiloj: “Amo xiauilnentinemikan. Uan no ximoyekpixtiyakan para ma amo xikixmajpeutiyakan ne mouistik tatiochiualis de Dios, ijkon keme kichiuako touejkautat Esaú. Porin yejua kinamakak ya itanauatil ten yejua kualkui keme tayekanke okichpil”. ¿Toni kinekia tamachtis?
Pablo amo ininka tajtojtoya iuejkaujtatuan Mesías. Tepitsin achto, kiniluijka tokniuan: “Xikyektakamatiyakan Totajtsin Dios tech ne melauak iojtsin”. Nejin kiniluij porin komo auilnemiaj amo ueliskiaj kiseliskej iueyi teiknelilis Dios (Heb. 12:12-16). Komo kichiuayaj nejon, yeskiaj kemej Esaú, akin kiixtopeuak “ne mouistik tatiochiualis de Dios”.
Esaú nemik itech tonalmej keman takat akin taixyekanaya ichan tekitia kemej inintiopixkauj ichankauan, uan kemansa xa hasta kipiak tatiochiualis kitemakas nemaktilmej (Gén. 8:20, 21; 12:7, 8; Job 1:4, 5). Sayoj ke, kemej amo kipatiuitak kuali mouikas iuan Jiova, kiixtopeuak nochi tein kinamikia kiselis kemej tayekankakonet uan kiixpatak ika sentapalkat lentejas. Xa amo kinekia kipanos tajyouilis tein moijtojka ke kipanoskiaj ikoneuan Abrahán (Gén. 15:13). Esaú no kiixtopeuak “ne mouistik tatiochiualis de Dios” keman monamiktij iniuan ome siuamej akin amo kiueyichiuayaj Dios, uan nejon semi kintayokoltij itatuan (Gén. 26:34, 35). Tel amo monejnemiltij kemej Jacob, akin monamiktij iuan se siuat akin kiueyichiuaya Dios akin melauak (Gén. 28:6, 7; 29:10-12, 18).
it-2 pág. 368 § 6
Takajkayaualis
Biblia kijtoua ke amo kuali yetok maj se takajkayaua. Nejon amo kijtosneki ke moneki se kiluis tein melauak akin amo kinamiki kimatis. Jesucristo kijtoj: “Amo xikinmaktilikan itskuinme ne chipaktsin Tajtoltsitsin de Dios, uan amo no xikintamakakan pitsome den tanextililis de Dios keme yeskia perlas ten semi telpatio. [...] Uan uelis yejuan kitsojtsoniksaske in Tajtoltsin de Dios uan no mokuepaske para namechkejketsomaske” (Mt 7:6). Yejua ika, Jesús amo nochipa kijtoj nochi oso amo niman tanankilij keman kitajtaniayaj teisa, porin nejon kiualkuiliskia kuejmolmej (Mt 15:1-6; 21:23-27; Jn 7:3-10). Abrahán, Isaac, Rahab uan Eliseo no ijkon kichiujkej. Yejuan amo kiniluijkej nochi tein melauak akin amo kiueyichiuayaj Jiova (Gé 12:10-19; cap. 20; 26:1-10; Jos 2:1-6; 2Re 6:11-23; Snt 2:25).
Tein moixtajtoltia itech Biblia
(GÉNESIS 26:1-18) Satepan, peuak onka mayan itech altepet, sayoj ke amo yejua yekinika mayan tein mochiujka itech itonaluan Abrahán. Yejua ika, Isaac yajki Guerar, kampa nemia Abimélec, akin kinixyekanaya filisteos. 2 Ompa, Jiova monextij iixpan Isaac uan kiluij: “Amo xiyouj Egipto. Ximokaltali itech altepet kampa nimitsnextilis. 3 Ximolkaltali itech nejin altepet maski okseko tikayot, uan niksentokas niyetos mouan uan nimitstatiochiuis. Namechmakas nejin talmej tejua uan mokoneuan. Nikchiuas tein nikiluij mopaj Abrahán keman nikijtoj: 4 ‘Nikchiuas maj mokoneuan momiakilikan kemej sitalimej tein moajsij iluikak uan nikinmakas nejin talmej. Uan inintechkopa mokoneuan nochin altepemej kiseliskej se tatiochiualis’. 5 Ijkon nikchiuas porin Abrahán nechkakik uan kitakamatik notanauatiluan”. 6 Yejua ika, Isaac kisentokak nemik ompa Guerar. 7 Keman takamej akin ompa nemiaj kitajtaniayaj akoni katka Rebeca, Isaac kiniluiaya “Yejua nokniuj”. Ijkon kijtouaya porin mouia kijtos ke katka inamik. Kemej Rebeca katka semi kuakualtsin, Isaac monemiliaya: “Takamej akin nikan nemij uelis nechmiktiskej porin kinekiskej Rebeca”. 8 Satepan, Abimélec, akin kinixyekanaya filisteos, naltachiak itech ventana uan kiitak ke Isaac kinauajtoya inamik, Rebeca. 9 Abimélec niman kinotsak Isaac uan kiluij: “¡Yejua monamik! ¿Keyej tikijtoj ‘Yejua nokniuj’?”. Isaac kinankilij: “Nimouia maj nechmiktikan porin kinekiskiaj Rebeca”. 10 Abimélec kiluij: “¿Toni titechchiuilij? ¡Akin yeski itech nejin xolal ueliskia motekas iuan monamik, uan tikchiuaskia maj titajtakokan!”. 11 Ompa, Abimélec kiniluij nochin akin nemiaj itech xolal: “¡Akin kichiuilis tein amo kuali nejin takat uan inamik, mikis!”. 12 Satepan, Isaac peuak kitoka tatok itech nejon xolal, uan itech nejon xiuit kiololoj 100 okachiok ke tein kitokka porin Jiova kitatiochiuijtoya. 13 Isaac peuak kipia miak taman, uan kisentokak kipiak okachi uan semi tominpiak. 14 Kinpiak miak borregos, kuakuejmej uan no kinpiak miak takeualmej. Sayoj ke, filisteos peuak kinexikoluiaj. 15 Yejua ika, filisteos kipexontijkej ika tal atekochmej tein itakeualuan Abrahán kiichkuakej keman yejua nemiaok. 16 Ompa, Abimélec kiluij Isaac: “Ximokaltaliti uejka, porin tikpia okachi miak taman ke tejuan”. 17 Yejua ika, Isaac kisak kampa nemia, uan mokaltalij tal tamanis Guerar. 18 Isaac oksepa kinichkuak atekochmej tein kinichkuakaj keman nemia itat, Abrahán, tein filisteos kipachojkaj satepan ke Abrahán momikilij. Uan kintokaytij kemej itat kintokaytijka.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Amo ueli kiyejyekouaj Jesús
¿Keniuj fariseos kitemouaj kiyejyekoskej Jesús, uan keniuj kinnankilia?
¿Keniuj Jesús kinnankilia saduceos keman kitemouaj kiyejyekoskej?
¿Toni kijtoua Jesús ke okachi tayekantok keman kinankilia se tajkuilojkej?
23-29 METSTI MARZO
TAMACHTILIS TEIN KIPIA BIBLIA | GÉNESIS 27, 28
Maj tiktemokan tamachtilis ika nejmachkayot
w06 15/4 pág. 6 § 3, 4
¿Keniuj uelis kuali monojnotsaskej akin namikyejkej?
¿Kuali monojnotsayaj Isaac uan Rebeca? Keman Esaú monamiktij iuan iichpochuan Het, mochiuak se ueyi kuejmol. Rebeca peuak kiluia Isaac: “Iichpochuan Het kichiujkej maj amo niknekiok ninemis. Komo se tonal Jacob monamiktia iuan semej iichpochuan Het, kemej nejin ichpochmej akin kayomej itech nejin altepet, ¿keyej maj ninemiok?” (Génesis 26:34; 27:46). Nesi ke Rebeca kinextij ke semi motekipachouaya.
Isaac kiluij ikoneuj Jacob, iikniuj Esaú, maj amo monamiktiani iniuan ichpochmej akin nemiaj Canaán (Génesis 28:1, 2). Rebeca kijtoj tein kinemiliaya. Isaac uan Rebeca uelik kiyektalijkej se ueyi kuejmol. Nejon techmachtia tein uelis tikchiuaskej axkan. Sayoj ke, ¿toni uelis kichiuaskej takat uan siuat komo amo ueli kiyektaliaj se kuejmol?
w04 15/1 pág. 28 § 6
Tein moixtajtoltia itech amatajkuilol Génesis (taxelol 2)
28:12, 13. ¿Keyej Jacob kikochitak “se escalera”? Nejon “escalera” xa katka miak tet tein nepaniujtoya hasta ajko. Nejon kijtosneki ke akin nemij taltikpak uan iluikak momatiltiaj seki taman, uan ke ángeles semi tapaleuiaj maj Jiova kinpaleui taltikpakneminij akin kuali iuan mouikaj (Juan 1:51).
Tein moixtajtoltia itech Biblia
(GÉNESIS 27:1-23) Keman Isaac xiuejya katka uan amo semi tachiayaok, kinotsak ikoneuj akin tayekanaya, Esaú, uan kiluij: “¡Nokonetsin!”. Yejua kinankilij: “¡Nikan niyetok!”. 2 Isaac kiluij: “Nixiuejya uan amo nikmati kanachi tonalmej niyoltosok. 3 Ika kualtakayot, xikui momanamikuan, flechas uan moarco, uan xiyouj koujtaj uan xinechkitskili se koujtajtapial. 4 Xinechchijchiuili se tapalol tein nikuelilia, xinechualkuili uan nikuas. Ompa, nimitstiochiuas achto ke nimikis”. 5 Sayoj ke, Rebeca kikaktoya tein Isaac kiluijtoya Esaú. Ompa, Esaú yajki tatokato. 6 Ijkuak, Rebeca kiluij ikoneuj, Jacob: “Yekin nikakik ke mopaj kiluij mokniuj Esaú: 7 ‘Xinechkitskili se koujtajtapial uan xinechchijchiuili se tapalol tein uelik. Nikuas uan nimitstiochiuas iixpan Jiova achto ke nimikis’. 8 Nokonetsin, xinechkaki uan xikchiua tein nimitsiluiti. 9 Ika kualtakayot, xiyouj kampa yetokej tapialmej uan xinechualkuili ome cabras tein konemej uan tein kualmej uan nikchijchiuilis mopaj tapalol tein kiuelilia. 10 Satepan, tikuikilis mopaj maj kikua uan ijkon mitstiochiuas achto ke momikilis”. 11 Sayoj ke, Jacob kiluij inan: “Sayoj ke nokniuj Esaú semi tsonej uan nejua amo. 12 ¿Uan komo nopaj kimatoka nomay? Kinemilis ke ika nimauiltijtok uan kijtos maj nechpano tein amo kuali, uan amo nechtiochiuas”. 13 Keman inan kikakik, kiluij: “Nokonetsin, komo mitsiluia maj mitspano tein amo kuali, maj notech mochiua. Xikchiua tein nimitsiluij. Xiyouj uan xikinualkui cabras”. 14 Yejua ika, Jacob kintemoto uan kinualkuik. Inan kichijchiuak se tapalol tein uelik, kemej Isaac kiueliliaya. 15 Satepan, Rebeca kikuik itaken ikoneuj akin tayekanaya, Esaú, tein okachi kuali kipiaya ikalijtik uan kitalilij ikoneuj, Jacob, akin katka xokoyot. 16 Ieuayo cabra no kitalij imako uan ikechko Jacob porin ompa amo tsonej katka. 17 Satepan, Rebeca kimakak Jacob tapalol tein uelik uan pantsin tein kichijchiujka. 18 Ompa, Jacob kalakik kampa yetoya itat uan kiluij: “¡Paj!”. Isaac kinankilij: “¡Nikan niyetok nokonetsin! ¿Tiakoni?”. 19 Jacob kiluij itat: “Nejua niEsaú, akin tayekana. Nikchiuakya tein tinechnauatij. Ika kualtakayot, ximotali. Xikua tein nikitskij uan xinechtiochiua”. 20 Sayoj ke, Isaac kitajtanij ikoneuj: “Nokonetsin, ¿keniuj ijsiujka tikajsik?”. Yejua kinankilij: “Jiova moDios kitalij noixpan”. 21 Ompa, Isaac kiluij Jacob: “Nokonetsin, ika kualtakayot, ximotoki uan maj nikmachili ox tejua tinokoneuj Esaú”. 22 Jacob motokij kampa yetoya itat. Isaac kimatokak uan kijtoj: “Mokaki ke Jacob, sayoj ke imauan kemej Esaú”. 23 Isaac amo kiixmatik porin Jacob semi tsonej katka imako kemej iikniuj Esaú. Yejua ika, kitiochiuak.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Jesús kijtoua tein amo kuali tein kichiuaj taixyekananij judíos
Keman Jesús kintajtania fariseos tein kijtoj David itech Salmo 110, ¿keyej amo kinankiliaj?
¿Keyej itempan inintaken fariseos okachi ueyak uan no okachi uejueyi ininkaxontsitsin?
¿Toni Jesús kinyolmajxitia imomachtijkauan?
30 METSTI MARZO HASTA 5 METSTI ABRIL
TAMACHTILIS TEIN KIPIA BIBLIA | GÉNESIS 29, 30
Maj tiktemokan tamachtilis ika nejmachkayot
it-1 pág. 56
Akin kinseliaj tekoneuan kemej ininkoneuan
Raquel uan Lea kinselijkej kemej ininkoneuan akin Jacob kinpiak iuan siuamej akin katkaj inintakeualuan (Gé 30:3-8, 12, 13, 24). Nejon konemej no kiselijkej netetayokolil tein kiselijkej konemej akin Jacob kinpiak iuan Raquel uan Lea. Kemej inintakeualuan kipiakej konemej iuan Jacob, uelis moijtos ke no katkaj ininkoneuan Raquel uan Lea.
w04 15/1 pág. 28 § 7
Tein moixtajtoltia itech amatajkuilol Génesis (taxelol 2)
30:14, 15. ¿Keyej maski Raquel ueliskia motekas iuan Jacob uan kipias se konetsin kiixpatak ika seki mandrágoras? Ne uejkauj, kikuiaj mandrágora porin ika mokochtiayaj uan ika mopajtiayaj keman sepouiaj. No kinemiliayaj ke mandrágora kinpaleuiaya maj kinekinij motekaskej uan maj uelini kinpianij konemej (El Cantar de los Cantares 7:13). Maski Biblia amo kijtoua keyej Raquel ijkon kichiuak, xa kinemiliaya ke mandrágora kipaleuiskia maj kinpiani konemej. Sayoj ke, seki xiujmej satepan Jiova kichiuak maj Raquel uelini kinpiani konemej (Génesis 30:22-24).
Tein moixtajtoltia itech Biblia
(GÉNESIS 30:1-21) Keman Raquel kiitak ke amo uelia kinpiaya konemej iuan Jacob, kinexikoluij iikniuj uan kiluij Jacob: “Xinechmaka konemej. Komo amo tinechmaka, nimikis”. 2 Jacob kualanik iuan Raquel uan kiluij: “¿Xe nejua niDios? Yejua akin amo mitskauani xikinpia konemej”. 3 Yejua ika, Raquel kiluij: “Nikan yetok notakeual Bilhá. Ximoteka iuan uan maj nechmaka konemej. Ijkon, yejua kichiuas maj nikinpia konemej”. 4 Yejua ika, Raquel kimakak itakeual, Bilhá, kemej inamik uan Jacob iuan motekak. 5 Satepan, Bilhá kipiak se konet iuan Jacob. 6 Ompa, Raquel kijtoj: “Dios mochiuak notamelaujkauj uan no nechkakik. Yejua ika, nechmakak se konet”. Yejua ika kitokaytij Dan. 7 Satepan, Bilhá, itakeual Raquel, oksepa kipiak okse konet iuan Jacob. 8 Ompa, Raquel kijtoj: “Miakpa nimoteuiani iuan nokniuj. ¡Uan nitatanik!”. Yejua ika kitokaytij Neftalí. 9 Keman Lea kiitak ke amo ueliaok kinpiaya konemej, kimakak Jacob itakeual Zilpá kemej inamik. 10 Zilpá, itakeual Lea, kipiak se konet iuan Jacob. 11 Ompa, Lea kijtoj: “¡Semi kuali tein nechpanok!”. Yejua ika kitokaytij Gad. 12 Satepan, Zilpá, itakeual Lea, kipiak okse konet iuan Jacob. 13 Lea kijtoj: “¡Semi niyolpaki! Siuamej kijtoskej ke semi niyolpaki”. Yejua ika kitokaytij Aser. 14 Se tonal, keman kiololouayaj trigo, Rubén moajsia koujtaj uan kiajsik seki mandrágoras. Yejua ika kiuikilij inan, Lea. Ompa, Raquel kiluij Lea: “Ika kualtakayot, xinechmaka mandrágoras tein kiajsik mokoneuj”. 15 Sayoj ke Lea kinankilij: “¿Xe amo tikita ke tinechkuilijya nonamik? ¿No tikneki axkan tikpias mandrágoras tein iaxka nokoneuj?”. Raquel kinankilij: “Kuali. Ximoteka iuan Jacob nejin youak, sayoj ke xinechmaka mandrágoras tein iaxka mokoneuj”. 16 Keman tapoyauik, Jacob mokepak porin yajka kampa moajsiaj itapialuan, Lea kinamikito uan kiluij: “Xiuiki nouan, porin niktaxtauij Raquel ika mandrágoras tein iaxka nokoneuj uan ijkon timotekas nouan”. Yejua ika, Jacob motekak iuan Lea nejon youak. 17 Uan Dios kikakik inetataujtiluan Lea. Satepan, Lea kipiak makuiltika ikoneuj iuan Jacob. 18 Ompa, Lea kijtoj: “Dios nechtaxtauij porin nikmakak nonamik se notakeual”. Yejua ika, kitokaytij Isacar. 19 Satepan, Lea oksepa kipiak se konet iuan Jacob. 20 Lea kijtoj: “Dios nechmakak se kualtsin netetayokolil. Nonamik kuali nechitasya porin nikinpiak chikuasen konemej”. Yejua ika kitokaytij Zabulón. 21 Satepan, Lea kipiak okse konet uan kitokaytij Dina.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Jesús moajsi itech Templo achto ke momikilis
¿Toni kichiua Jesús keman moajsi itech templo achto ke momikilis?
¿Toni kijtoua Jesús ke kipanos templo?
¿Keyej kijtoua Jesús ke siuatsin akin amo nemiok inamik temakak okachi ke akin tominpiaj?